Mga Instrumento sa Satanismo—Mga Droga ug Musikang Heavy-Metal

SI Carl A. Raschke, direktor sa University of Denver Institute of Humanities, misulat: “Dili sulagma lamang nga ang mga droga, [musikang] heavy metal, kabangis, ug walay-piling kapintasan tanan nahimong mangil-ad nga bandera nga nagkayabkayab ibabaw sa nadaot nga kahimtang sa katawhan samtang nagpaingon kita ngadto sa ikatulong dekada sa Panahon ni Satanas.” Siya usab miingon: “Mahimong makaingon ka nga ang musikang heavy metal rock iya sa Satanismo sama nga iya sa Kristiyanidad ang musika sa ebanghelyo. Diyutay kaayong tawo ang nakabig sa Kristiyanidad tungod lamang sa pagpamati sa musika sa ebanghelyo sa radyo. Apan ang musikang heavy metal maoy usa ka gamhanan kaayong padasig. Gipakamatarong niini ang daotang mga buhat nga niini nalangkit na ang mga bata.”

Usa kini ka kusganong akusasyon batok sa giisip sa daghan kaayong kabataan karong adlawa nga normal nga kalingawan gikan sa mga kabalaka sa kinabuhi​—ang musikang heavy metal ug mga droga. Makataronganon ba kining mga akusasyona? Posible ba nga ang mga droga ug musikang heavy metal mao ang posibleng mga simtoma sa Satanismo? Palandonga ang mga komento niadtong kinsa nakaatubang na sa kapintasan sa satanikong mga magsisimba ug niadtong nag-imbestigar kanila.

“Ang mapangguboton nga mensahe sa musikang heavy metal dili ikahibulong nga ‘relihiyoso’​—sa diwa nga gimantala niini ang usa ka mas hataas nga gahom nga nagdumala sa uniberso. Hinunoa, kining gahoma dili ang Diyos,” misulat si Raschke, sa iyang librong Painted Black. “Kini . . . gimaniobra sa Dakong-Demonyo mismo.” Dugang pa, siya miingon: “Ang satanikong gahom ug kapintasan maoy usa ka butang diin ngadto niini ang mga batan-on nga nawad-ag paglaom, ug nakubalag tanlag, daling madani. . . . Ang natugaw ug giabusohang mga batan-on, tungod sa ilang natun-an gikan sa daotang kasinatian sayo sa kinabuhi, nagtuo nga ang Mas-Hataas nga Gahom maoy daotan. Kini nga ‘teolohiya’ gipamatud-an sa heavy metal ug gilakip kini diha sa musika.”

Sumala kang Dr. Paul King sa University of Tennessee, kinsa mipamatuod atubangan sa Senado sa Tinipong Bansa bahin sa musikang heavy-metal, ang musika nga gipili sa daghang natugaw nga mga batan-on mao kadtong “di-naandang mga tema sa kapintasan, pagdumot, rebelyon, malaw-ay nga sekso, pag-abuso sa mga babaye, ug paghimaya kang Satanas. Kon lakip sa estilo sa kinabuhi sa mga tin-edyer ang mga droga, malagmit nga mas gusto nila kini.” Gihimaya ug gibayaw sa musikang heavy-metal ang gahom sa daotan, miingon si King. Sa musikang heavy-metal, “ang daotang mga buhat ilabinang ginahimaya sa panahon sa mga konsiyerto,” siya miingon.

Tagda ang mga bunga sa mensahe sa heavy metal nga nakaapekto sa hunahuna nga dili-lamang mahibaloan diha sa mga taho nga mosunod.

Sa miaging tuig sa New Jersey, T.B.A., mapintasong gipatay sa duha ka 15-anyos nga batang lalaki ang binuhi sa pamilya nga iro nga Labrador nga ginganlag Princess. “Kadto maoy usa ka halad alang kang Satanas,” sila miingon. Ilang gibitay ang iro sa kadena niini, gipatidpatiran kini hangtod namatay, giabis ang iyang dila ug gigamit kini diha sa usa ka satanikong rituwal. Gisab-it nila ang giputolputol nga lawas sa iro diha sa dakong kaw-it nga metal ug gibitay kini sa nataran sa silingan. Ang satanikong mga simbolo nakita diha sa ulo sa iro, ug usa ka pentagram (bituon nga may lima ka talinis nga tumoy sulod sa usa ka lingin​—usa ka Satanikong simbolo) ang gikudlit diha sa yuta sa tiilan sa patayng lawas sa iro. Sa gabii sa pagpatay, sila namati sa Deicide (nga nagkahulogang pagpatay sa Diyos), usa ka banda nga nagatugtog ug musikang death-metal, kansang pangunang mag-aawit nagpasiatab bahin sa pagsakit ug pagpatay sa mga mananap.

Sa California, duha ka tin-edyer nga managtrato, kinsa, sumala sa mga higala, nagumon kaayo sa pagsimba kang Satanas, mapintasong nagpatay sa inahan sa babaye pinaagi sa pagdunggab kaniya ug sa pagpuspos kaniya sa liyabe de tubo. Sa mao gihapong lugar, usa pa ka batan-on ang nagtanyag ug pag-ampo kang Satanas ug dayon gipusil ang iyang amahan sa kamatayon. Ang mga polis nga nag-imbestigar sa krimen kombinsido nga ang musikang heavy-metal mao ang nakaingon. “Kasagaran, ang musika nagtudlo nga dili ka kinahanglang mamati sa imong mga ginikanan, ug nga angay kang magkinabuhi sa gusto nimo,” miingon ang usa ka awtoridad sa kapolisan.

Sa Inglaterra ang mga biktima nga sunodsunod nga gilugos sa mga gang nagtaho sa kapolisan nga usa sa mga manglulugos may mga patik nga simbolo sa heavy-metal nga banda nga ang pulong sa mga awit may mga mensahe bahin sa panglugos ug kapintasan.

Sa Arkansas, T.B.A., usa ka tin-edyer sa baryo misulay sa pagpatay sa iyang mga ginikanan pinaagi sa pagbunal kanila sa usa ka batuta ug dayon gihiwahiwa sila sa kutsilyo sa matansador. Nakita sa mga polis diha sa iyang audiocassette player ang usa ka teyp sa usa ka awit sa banda sa heavy-metal nga, “Altar of Sacrifice,” diin ang mga pulong nagsiyagit: “Ang hataas nga saserdote nagapaabot, baraw sa kamot, nagaula sa dugo sa dalagang ulay. Pagpamatay ni Satanas, seremonyal nga kamatayon, sunda ang tanan niyang sugo. Sulod sa kalibotan ni Satanas . . . Tun-i ang sagradong mga pulong sa pagdayeg, ‘Dayega si Satanas.’”

Kon bahin sa mga pulong sa ubang mga awit nga giawit sa nagasiyagit nga mga membro sa heavy-metal nga mga banda​—kasagarang magubot nga gisundan ang pag-awit sa ilang mga magdadayeg diha sa mga konsiyerto, o ginapamati sa mga teyp sa audiocassette sa daghang oras​—unsang impluwensiya ang ikahatag sa mga mensahe diha sa daling maimpluwensiyahan nga mga batan-on? Tagda, pananglitan, kining mga pulonga sa awit: “Si Satanas nga among agalon sa daotang kapintasan nagatultol kanamo sa matag unang lakang,” ug “Ibubo ang imong dugo, pabanawa kini kanako. Guniti ang akong kamot ug buhii ang imong kinabuhi . . . Nabubo mo ang dugo. Nakuha ko ang imong kalag.”

“Kon atong gidawat nga ang pornograpiya makapukaw sa usa ka tig-abusog bata,” misulat si Carl Raschke, “nganong dili palandongon ang ideya nga ang mga pulong sa awit nga nagsiyagit ug patya, tagodtagora, pianga, sakita, laglaga mahimong aktuwal nga magdasig sa usa nga nawad-ag hustong pangisip sa paghimo niini mismo?”

Nagtuo ang mga tigdukiduki sa tanang dapit nga magkauban ang pag-abusog droga ug Satanismo. Ang kanhi sekreta batok sa bisyo nga si David Toma nasubo nga siya “wala pa gayod makakitag usa ka magsisimba ni Satanas nga wala mogamit ug mga droga.” Ang paggamit ug droga, nagtaho ang magasing ’Teen, nagpakomplikar pa sa mga butang diha sa mga tin-edyer “nga modangop sa pagsimba sa yawa, nga dugang nagpalisod sa pag-ila kon unsa gayod ang tinuod ug ang daw tinuod kon lantawon diha sa kalibog sa mga droga ug alkohol.”

“Ang heavy metal nalangkit gayod sa kusog nga paggamit ug droga sama nga ang mga loteriya nalangkit sa gumon kaayong mga sugarol,” miingon si Raschke. “Ang giyanon sa droga nga mga batan-on nagsunod sa estilo-sa-kinabuhi sa kahambog, kabangisan, pagpangawat ug paghingapin sa sekso​—diin ang tanan ginapasamot sa pagsiyagit ug pagngaab sa heavy-metal nga mga grupo.”

Walay duhaduha, ang usa ka batan-on daling mabiktima sa impluwensiya ni Satanas kon ang maayong pangisip kuhaon gikan sa iyang utok ug maoy mobanos ang mga hunahuna sa kahiwian ug kapintasan.

[Blurb sa panid 8]

Ang usa daling mabiktima sa impluwensiya ni Satanas kon ang maayong pangisip kuhaon gikan sa utok ug maoy mobanos ang kahiwian ug kapintasan

[Hulagway sa panid 7]

Unsay imong ginapasulod sa imong hunahuna?