Ang Pagbangon ug Pagkapukan sa Satanismo
Ang satanikong mga rituwal gihimo sa itom-ug-bisteng mga pari diha sa ngitngit nga mga lawak sa silong, nga nagyamyam ug mga pag-ampo ibabaw sa ginapos nga mga biktima diha sa altar, nga may nag-awop-awop nga mga kandila nga nakaporma ug makahahadlok nga mga anino diha sa mga bungbong samtang ang pagsimba sa ilang diyos, si Satanas, nagpadayon. Natigom sa tagong kahibalo sa usa ka misteryo nga may diyutayng bahin sa labaw-sa-kinaiyanhon, ang batan-ong mga sumasalmot niining panaw ngadto sa okulto mibatig makapanglimbawot nga kaukyab nga maoy nangibabaw sa palibot. Sila miduol sa altar nga may katingad-ang pagbati sa pagkapinili nga sila lamang ang nakabaton.
Usa ba kini ka dili-makadaot, umalagi nga uso? O usa ka demonyohanong pagkadaotan nga kaylap sa katilingban karong adlawa?
DAGHAN na ang nasulat sa mga peryodiko, sa mga magasin, ug sa mga libro mahitungod sa ngilngig nga mga buhat sa satanikong mga kulto. Ang mga detalye sa kaylap nga kalihokan sa mapintas nga satanikong mga grupo nasibya na sa telebisyon ug radyo sa nasod. Kini nahimong dakong problema sa kapolisan diha sa gagmay ug sa dagkong mga siyudad sa Amerika, Canada, ug Uropa.
Ang Satanismo adunay talagsaon nga pangdani sa mga batan-on karong adlawa. Ang tagtukod sa Iglesya ni Satanas nagbatbat kon ngano, ingon sa gitaho diha sa magasing ’Teen sa Hunyo 1993: “Imbes mandoan ang mga membro nga pugngan ang ilang natural nga mga gana, kami nagtudlo nga angayng patumanan nila kini. Lakip niini ang kaulag, ang tinguha sa pagpanimalos, ang sobrang pangagpas sa materyal nga mga kabtangan.”
Tino nga nahimuot si Satanas niining dinasig sa demonyo nga ideolohiya, sanglit sukwahi kini sa Kristohanong mga prinsipyo nga dinasig sa Diyos!
Ang Satanismo nagkadaghan. Kini maoy usa ka nagakadakong kapeligrohan, apan ang pagkamatay niini haduol na. Ang diyos niini gihukman na sa kamatayon. Maingon man ang kalibotan ni Satanas ug ang mga sumusunod niini, kay “ang tibuok kalibotan nahimutang diha sa gahom sa tuman-kadaotang usa.” (1 Juan 5:19; Roma 6:16) Alang sa mga magsisimba ni Satanas ug alang sa tanang uban kinsa nahibalo o wala nga sila nag-alagad sa mga katuyoan ni Satanas, ang mensahe ni Jehova mao: “Ang Diyos nga nagahatag ug kalinaw magagupok kang Satanas ilalom sa inyong mga tiil sa dili-madugay.”—Roma 16:20.
Nan unsay palaabuton sa nagaantos nga katawhan gikan “sa Diyos nga nagahatag ug kalinaw”? Ang tulo ka artikulo nga mosunod magpakita sa pagtungha ug pagkapukan sa Satanismo ug ang mga kahimtang sa yuta nga mopuli niana.