Usa ka Makuyaw, Nagdakong Kapeligrohan

Ang Satanismo, o pagsimba sa Yawa, nagkadaghan, nga nagpasiugda ug paghalad sa hayop ug tawo, seksuwal nga pag-abuso, ug ubang kriminal nga mga buhat. Unsay gituohan sa mga Satanista? Ug nganong ang ilang relihiyon madanihon? Tubagon sa “Pagmata!” kining mga pangutanaha ug nagabadbad usab sa maskara sa luyo niining makahahadlok nga relihiyon.

IKAW ba panguyapan tungod sa kalisang sa paghunahuna sa mga tawong edaran nga mangukoy sa ubang mga tawo ug unya, sama sa gutom nga mga liyon, magpatay sa ilang mga biktima, imnon ang ilang dugo, kaonon ang ilang kasingkasing ug ubang mga bahin sa lawas—ang tanan sa ngalan sa relihiyon?

Mangurog ka ba sa paghunahuna sa mga inahan ug mga amahan nga magtanyag sa ilang kaugalingong mga anak nga abusohan sa ubang mga tawo sa sekso, sa ulahi patyon diha sa altar atubangan sa tanang mga tumatan-aw alang sa relihiyosong katagbawan?

Makalibog ba kanimo ang paghunahuna sa mga lalaki nga makigsekso sa mga patay diha sa mga punerariya aron lang sa pagpahimuot sa espiritu nga linalang nga ilang gihunahuna nga balaan?

Maminhod ba ang imong mga pagbati sa dihang makabasa ka mahitungod sa mga bata nga gipatay ang ilang mga ginikanan ug unya giputolputol ang ilang mga lawas nga walay pagkatugaw sa tanlag o pagbasol—ang tanan aron sa paglipay sa Yawa?

Makalingolingo ka ba sa imong ulo sa bug-os nga pagkadili-makatuo sa mga tawo nga nagapangalot ug mga lubong, nangawat ug mga ulo ug nagapamutol ug mga tudlo aron isul-ob kini diha sa relihiyosong mga seremoniya?

Unsay imong hunahuna sa usa ka relihiyon nga nagapasiugda nga ang ilang 13-anyos ngadto sa 25-anyos nga membrong mga babaye gamiton sa mga katuyoan sa pagsanay aron ang ilang mga anak ihalad diha sa mga pagsakripisyo sa pagpaagas sa dugo?

‘Unsa na man usab unyay sunod nga mahunahunaan sa mga taghimog mga pelikula?’ tingali mangutana ka samtang imong gibasa kini. ‘Total, dili man kini tinuod,’ tingali moingon ka. Ah, apan tinuod ba?

Ang imong gibasa tinuod! Dili kini bunga sa handurawan sa magsusulat sa pelikula. Ang mga hitabo tingali nahitabo na sa inyong kaugalingong lungsod. Kon kini wala pa mahitabo, dunay nagdakong mga kahadlok nga kini mahitabo.

Ang relihiyon nga nagabuhat ingong bahin sa mga seremoniya niini sa paghalad sa mga hayop ug mga tawo, ang pag-abuso sa mga bata, ang paglugos sa dalagitang ulay, ang seksuwal nga kalaw-ayan, ug sa susamang mga kalihokan gitawag Satanismo, o pagsimba sa Yawa. Hilabihan ka mangilngig, hilabihan ka halayo gikan sa sumbanan, mao ang mga buhat sa Satanismo nga daghang opisyal ug mga lungsoranon nagdumili sa pagtuo nga buhaton kining mga butanga sa mga tawo ingong bahin sa ilang pagsimba.

Ang kulto sa Satanismo, nga sa pipila lang ka tuig kanhi diyutay ray sumusunod, nagkadako, makuyaw nga kapeligrohan. “Ang Satanismo maoy kulto sa katuigang ’80,” mitaho ang usa ka polis sa San Francisco. “Ang Satanismo maoy bahin sa organisadong krimen sa Australia,” miingon ang usa sa pangunang eksperto sa krimen niadtong nasora. “Sa banabana ko nga kini duhay banggiitang 20,000 ka sumusunod sa tibuok Australia, nga aktibong nalangkit sa pagsimba ni Satanas, kahilayan sa sekso, sa paghalad sa mga hayop ug bisan sa mga tawo. Nagtuo ako nga kining kalihokana maoy nakaingon usab sa listahan sa nangawalang mga bata ug kini hilabihang nalangkit sa mga droga ug sa pagpanamastamas sa mga sementeryo.”

Ang Sataniko nga mga grupo sa kulto sa kasagaran organisado sa mga pundok sa mga ungo, nga dunay 9 ngadto sa 13 ka sakop matag usa—tingali mas daghan pa, depende sa mga sirkumstansiya. Ang mga awtoridad nagbanabana nga sa Tinipong Bansa, dunay mga 10,000 ka pundok sa mga ungo sa 1946; 48,000 sa tuig 1976; ug 135,000 sa 1985. Kon pila niining mga pundoka sa mga ungo ang dili-mapintas ug nga naningkamot sa pagpalayo gikan niadtong mapintas wala hibaloi. Sumala pa sa Marso 7, 1986, nga National Catholic Reporter, “dunay 150 ka aktibong mga pundok sa mga ungo” sa siyudad sa El Paso, Texas, “nga dunay 2,000 ka satanista sa tanang panuigon.” Ug ang basahong Bulletin sa Pennsylvania State Police nagtaho: “Ang Satanismo nagkadaghan sa Amerika. Halos walay adlaw ang molabay nga walay mga taho sa mabangis nga mga buhat nga gihimo sa mga Satanista.”

Dugang pa, ang Satanista nagpasigarbo ug mga sakop sa mga tawo nga gikan sa tinahod nga propesyon sa kalibotan—mga doktor, mga abogado, mga negosyante, mga polis, mga madre, mga pari, mga ginang sa panimalay, ug mga sakop sa militar. Apan, uban sa dramatikong mga resulta, bag-ong mga sakop ang gipangabig gikan sa mga kampos sa hayskol ug sa mga kolehiyo sa tibuok kalibotan. Busa, diha sa daghang dapit karong adlawa, ang mga grupo sa tin-edyer ang naglangkob sa kadaghanang mga sakop sa mga pundok sa mga ungo.

Ang New Zealand Herald sa Agosto 26, 1988, mitaho: “Ang mga tin-edyer nga sama ka bata sa 14 anyos ginakabig sa kalibotan sa Satanismo.” Miingon ang usa ka opisyal sa Canada: “Ang mga bata kinsa . . . nakiglangkit sa Satanismo hulga usab sama sa banggiitang (mga Satanista).”

Nagtaho mahitungod sa daghang batan-on nga nabilanggo sa usa ka sentro sa bilanggoan sa Canada, ang usa ka empliyado miingon: “Nakurat ako nga ang kadaghanan niining mga bataa mga Satanista. Ilang patikan ang ang ilang mga panit ug Satanikong mga simbolo, sila mohimog mga rituwal, sila nagtuo gayod sa yawa.”

Ang usa ka 18-anyos nga babaye nga isigkabinilanggo sa miuyon nga popular kaayo ang Satanismo sa iyang mga isigkaingon. Ang usa ka batan-ong taga Canada miadmiter nga siya sakop sa 400-ka-membro sa kulto nga Sataniko nga nagalihok sa Alberta. “Ang mga tin-edyer nga mga magsisimba dili angay pasagdan,” miingon ang usa ka eksperto sa krimen sa Canada.

Ang mga membro sa kulto nagahimog malig-on tibuok-kinabuhi nga panaad sa grupo, nga nag-apil sa mapig-oton nga panumpa sa pagkatinago. “Ang mga membro dili tugotan sa pagbulag gikan sa grupo human nga naladlad sa ilang nagkalainlaing kriminal nga mga kalihokan,” mitaho ang The National Sheriff. “Ang usa ka membro nga molapas sa kodigo sa pagkatinago seryosong nagpameligro sa iyang kinabuhi ug sa mga kinabuhi sa iyang pamilya,” midugang ang magasin. “[Sila] giprograma sa dili pagtug-an,” miingon ang awtoridad sa Chicago. “Kon sila motug-an, sila giprograma sa pagpatay sa ilang kaugalingon.”

Ang mga sakop sa pundok sa mga ungo naningkamot usab nga magpabiling dili-magpaila ug dili-maila sa mga opisyal nga nagapatuman sa balaod. “Sila nagtuo,” miingon ang usa ka tuboran, “nga ang ilang daotan kriminal nga mga buhat dili pagagantihan ni Satanas kon sila mailhan ug pasakaan ug sumbong sa mga awtoridad.” Busa, sulagma lang nga maila nga kulto sa satanismo ang nagpatunhay sa usa ka krimen. Karon lang bag-ong katuigan nga nailhan sa ubang mga ahensiya sa tigpatuman sa balaod ang mga ilhanan nga mabilin sa esena sa mabangis nga mga krimen ang nagatimaan nga nalangkit ang okulto—pananglitan, ang bali nga mga panid sa Bibliya nga dunay mga krus nga gidibuho nga duol sa hugaw o ang numerong 666 gikulit sa dugo diha sa biktima.

Apan, nganong mogamit man ug kabangisan sa ngalan sa ilang relihiyon? Palandonga ang pipila ka makalilisang nga mga katarongan diha sa sunod nga artikulo.

[Kahon sa panid 3]

Lisod Tuohan—Apan Tinuod

Ang “Bulletin,” usa ka publikasyon sa pundok sa mga tawong nangawala sa Pennsylvania State Police, mitaho: “Nalisdan ang mga imbestigador sa pagtuo sa katilingalahan ug mangilngig nga mga sugilanon sa kriminal nga mga buhat nga ginahimo sa mga tawo nga nanagsul-ob ug mga besti sa pari ug nagdayandayan ug mga simbolo sa yawa.”

Apan, sumala sa “Bulletin”: “Walay adlaw ang molabay nga walay mga taho sa mabangis nga mga buhat nga ginahimo sa mga satanista. Sa tibuok nasod ang mga organisasyon sa tigpatuman sa balaod nagpakadawat ug mga taho sa pagpatay, pagputolputol sa lawas, pag-atake, paghikog, pag-abuso sa bata ug pagputolputol sa mga hayop nga nalangkit sa satanikong kulto.”