Krusada sa Kabangisan—Ngano?

ANG Satanismo, o pagsimba sa Yawa, pinetsahan balik pa sa panahon sa unang mga tawo. Kadto nga pagtakoban nga presensiya ni Satanas sa tanaman sa Eden ang nagtultol sa unang tawhanong paris sa pagpalayo gikan sa ilang Maglalalang, si Jehova nga Diyos. (Genesis 3:1-6; Pinadayag 12:9) Kini walay-kataposang nagtimaan kanila ingong unang mga kaanib ni Satanas.

Sa panahon sa mga milenyo nga misunod, ang Satanismo mipagim-aw sa iyang mangil-ad nga ulo sa nagkalainlaing mga porma—pangungo, mahika negra, panglamat, ug daghan pang uban. Apan, sa malimbongon, ang ngalan ni Satanas ug ang ilhanan sa iyang pagsimba sa kasagaran gitago gikan sa mga sumusunod ug sa mga tigpraktis niini.

Sukad sa paglabay sa ika-20ng siglo, dihay bukas ug dayag nga pagbalik sa satanikong pagsimba, ug karon kini mikaylap sa daghang bahin sa kalibotan. Ang Satanismo mitungha sa relihiyosong esena nga may lutaw bag-o nga larawan. Kini wala na tabontaboni sa pagkawala-hiilhi, uban sa pagtakoban nga panagway sa pagkamaayo. Apan, si Satanas gisimba sa labing mabangis nga mga paagi nga mahanduraw.

Ang usa sa unang mga magtutukod sa Satanismo niining sigloha maoy usa ka Ingles nga ginganlag Aleister Crowley. Niadtong 1905, sa Los Angeles, California, giorganisar ni Crowley ang Satanismo nga grupo nga gitawag “Ordo Templi Orientis.” Sa ulahi siya gidawat nga mao ang lider sa nagtubong kulto. Diha sa iyang librong Book of Law, gipasiugda ni Crowley ang bag-ong pormula sa relihiyosong pagtuo: “Ang pagbuhat sa bisan unsay imong gusto kinahanglan mao ang tibuok nga balaod.” Gikan niining maong pilosopiya nga giawhag ni Crowley ang paglapas sa tanang moral nga lagda ug prinsipyo sa Bibliya nga nailhan sa tawo. Ang pagbuno, kabangisan, panglugos, ug paghalad ug tawo sa ingon nahimong bahin sa relihiyosong rituwal.

Mahitungod sa paghalad ug tawo, si Crowley misulat: “Halos sa tanang mga katuyoan ang paghalad ug tawo mao ang labing maayo, ug ang bata nga lalaki nga hingpit ang pagkainosente ug intelehente kaayo mao ang labing makatagbaw ug takos nga biktima.” Gitawag ni Crowley kas-a ang iyang kaugalingon nga mao ang “labing daotang tawo sa kalibotan.” Human nakagugol ug panahon sa ospital sa mga buang, siya gitaho nga namatay nga giyanon sa heroina diha sa barot nga giabangang balay sa Inglaterra.

Apan, sa pagkaalaot, ang pilosopiya ni Crowley sa kagawasan “sa pagbuhat sa bisan unsa nga gusto sa tawo” sa ngalan sa relihiyon wala mamatay duyog kaniya. Matikdi ang gipamulong sa usa ka magsusulat: “Ang landong ni Aleister Crowley migim-aw pag-ayo sa [dapit sa Los Angeles], apan ang iyang mga paghingapin wala ra sa kumingking kon itandi sa mga magisisimba sa yawa karong adlawa.”

Pagkamaunongon Ngadto sa Yawa

Gituohan sa mga magsisimba ni Satanas nga ang Yawa nagmando sa kalibotan. Dugang pa, sumala kang Robert J. Barry, nagsulat diha sa The National Sheriff, “inig-abot sa kataposan sa kalibotan, ang mga panon ni Lucifer modaog sa mga panon sa Diyos ug ni Kristo ug maoy momando sa langit. Busa, ang Satanista nagapanumpa nga magmaunongon sa yawa, dili alang lamang sa iyang pagtabang niining kalibotana, kondili sa umaabot nga kalibotan.”

Ang ubang mga magsisimba ni Satanas ginaingon nga nagtuo nga si “Kristo ug si Satanas nag-uban sa pagtapos sa kalibotan.” Gamiton ni Kristo sumala pa sa usa ka sataniko nga kulto si Satanas ingong tigpatay. Busa, sumala kang Maury Terry, diha sa iyang librong The Ultimate Evil, “ang pagsimba kang Satanas managsama ra sa pagsimba kang Kristo. Ug ang pagpatay sa ngalan ni Satanas sa aktuwal maoy pagpatay alang kang Kristo: usa ka balaan nga misyon.”

Si Aleister Crowley ang miingon nga siya gusto, ingong bahin sa relihiyosong doktrina ug mga praktis sa kulto, “ug pamalikas, pagbuno, panglugos, rebolusyon, bisan unsang daotang butang.” Sa pagkamatuod, ang usa ka lider sa kulto nagamantala sa malanog nga panawag: “PAMATAY KAMO!” Ug dayag nga kini gayod ang ginahimo sa mga membro sa mga kulto sa sataniko.

Gisaysay sa usa ka tawo ang ilang mga katarongan sa kapintasan: “Ang mga paglugos maoy alang sa katuyoan sa pagbuong sa pagkaulay sa usa ka dalagang ulay, nga dunay linain nga kahulogan alang sa mga magsisimba ni Satanas. Ang pagsunog maoy simbolo sa dakong pagsunog, o Armageddon, ug ang mga mamumuno gisugo sa pagpakaylap sa kagubot ug sa pagtuman sa tagna sa Daniel: ‘Ang daotan mobuhat ug labi pang daotan.’”

Ang pagsusi sa mga doktrina sa pipila ka magsisimba ni Satanas nagbutyag usab nga sila nagtuo nga si Adolf Hitler takos nga pagasimbahon. Sa pagkamatuod, ang usa ka magsusulat miingon: “Ilang gilantaw ang kalaglagan nga nahimo ni Hitler ingong pagbansaybansay nianang umaabot—ug sila gusto nga malangkit nianang dakong hitabo.”

Unsay katarongan sa luyo sa pagbayaw kang Hitler? Ang reporter sa imbestigasyon si Maury Terry mibatbat nga ang usa ka katarongan “mao nga ang talaan sa mga numero sa matag letra sa alpabeto gihatagan ug numero. Ubos niini nga sistema, ang A katumbas sa 100 ug ang Z gitugbangan ug 125. Ang mga numero nga katumbas sa mga letra sa apelyido ni Hitler (107, 108, 119, 111, 104, 117) mototal ug 666—ang numero sa mapintas nga mananap sa Biblikanhong basahon sa Pinadayag. Ang numero sa yawa.”

Kini ang nakatabang sa pagpatin-aw sa kaylap nga paggamit sa numerong 666, nga ginapintal diha sa mga bungbong sa mga tigomanan sa mga ungo o sa publikong mga bungbong ug sa mga taytayan. Ang mga letrang HT ug HH ginaingon nga naghawas kang Hitler, ug ang mga kilat sa Alemang SS ginaingon nga nagsimbolo sa “langit ngadto sa impiyerno, kusog.” Ang swastika gigamit usab sa mga Satanista. “Ang tanang mga timaan sa mananap, Satanas-Hitler, nga ilang gialagaran,” miingon ang usa ka tagasulod.

Mga Tigom nga Mopahinabog Kabangisan

Gitaho nga dunay kapin sa 20 ka espesyal nga mga okasyon alang sa mga tigom sa mga ungo sa panahon sa tuig. Ang kadaghanan iatol sa gitawag nga mga selebrasyong Kristohanon. Kini nahiuyon sa ilang gilantaw ingong paagi sa pagtampalas sa tanan nga giisip nga maayo o balaan. Ang halloween maoy usa ka dakong satanikong piyesta. Ang mga tigom, o mga sabbat, ginahimo sa tagong mga dapit, nga ibalhin sumala sa mga kahimtang. “Sa dili pa magsugod ang matag tigom sa ungo,” misulat si Terry, “si Satanas kinahanglang lukmayon pinaagi sa paglugos ug usa ka ulay [dalagita], sa holocaust [pagsunog], o sa rituwal nga pagpatay ug usa ka tawo o hayop.”

Ang paghalad ug mga iro ug mga iring dako diha sa kulto. Diha sa usa ka lugar duol sa New York City, pananglitan, ang gipanitan nga 85 ka German shepherds ug mga Doberman nakit-an sulod sa usa sa 12-ka-bulang yugto, ang tanan gituohan nga trabaho sa mga Satanista. Sa kasagaran, ang mga bahin sa lawas kasagaran gikuha ug gikaon sa pagtuo nga kini dunay gahom sa madyik. Ipasa ang dugo ug imnon gikan sa plata nga mga kopa nga kinawat gikan sa mga simbahan—ang tanan ingong bahin sa pagsimba ni Satanas. Sa pagkamatuod, ang tawo nga halad giisip nga labing dako nga halad nga makapahimuot kaayo niya. Ug siya malukmay niining paagiha.

Apan kinsa kining si Satanas? Tinuod bang naglungtad siya? O siya ba maoy bunga sa usa ka naghiwasa nga handurawan?

[Kahon/Letrato sa panid 7]

Paghalad Aron sa Paglukmay sa Yawa

Niadtong miaging Abril ang kalibotan nakurat sa nakit-ang mga patayng lawas nga kapin sa usa ka dosenang mga lalaki kinsa sinakripisyong gipatay sa gawas sa siyudad sa Mexico sa Matamoros, duol sa utlanan sa Texas. Ang magasing Time mitaho:

“Aron maangayan sila sa yawa, lat-an sa mga mamumuno ang mga utok ug mga kasingkasing sa ilang mga biktima, sagolan kini ug mga bukog sa tiil ug mga bukton ug mga ulo sa hayop. Hilabihan kaayo ka bangis ang mga magsisimba sa yawa nga ang duha ka patologo . . . migugol ug halos upat ka adlaw sa pagtapos sa mga awtopsiya.”

Ang mga magsisimba sa Yawa nagtuo nga sila makadawat ug panalipod gikan sa ilang diyos pinaagi sa paghupay kaniya pinaagi sa mga halad nga tawo. Ang usa ka tenyente sa kapolisan miingon nga ang mga mamumuno nag-ampo sa yawa “aron dili sila dakpon sa kapolisan, aron dili sila madutlan sa bala ug aron sila makakitag daghang kuwarta.”