Gikan sa Among mga Magbabasa

Baligya nga Kamatayon Salamat sa maong serye sa matulon-anong mga artikulo. (Hulyo 8, 1989) Nakaangay ako sa paagi sa paghatag ninyo sa mga kamatuoran bahin sa kadaot nga ginahimo sa pagtabako nganha sa lawas ug usab sa impormasyon mahitungod sa segundaryong mga epekto niini. Nagtuo ako nga ang tanang tigtabako nga buot mohunong sa daotang bisyo angay makabatog kopya niining magasina.

C. T. M., Tinipong Bansa

Wall Street Salamat kaayo tungod sa matinud-anon ug punog-kaalam nga mga artikulo mahitungod sa Wall Street ug sa pagkahagsa sa stock market. (Agosto 8, 1989) Ang pinansiyal nga kalibotan karon nakigbugno sa bug-os nga kampanya sa pagpasalig sa katilingban nga ang pagkahagsa maoy usa ka ‘hitabong gidahom apan wala mahitabo,’ ug luwas ang pagpangapital na usab. Ang tawong intelihente nga masinaboton nasayod nga ang kalibotan anaa sa lalom nga sulirang panalapi. Giagda ko ang mga magbabasa nga magpahilayo sa stock market, bayran ang utang, ug magtigom hinuon ug kuwarta inay gastohon kana.

B. W., Tinipong Bansa

Tungod sa huyang nga ekonomiya sa kalibotan, tinong makataronganon nga magmaalamon kon bahin sa salapi, ug ang mga riyesgong nalangkit sa pagpangapital sa stock market dili mahimong dili tagdon. Bisan pa niana, ang tanang pangapital—apil ang mga deposito sa bangko—ikaingon nga nagalangkit sa pila ka riyesgo. Busa ang mga tawo kinahanglang mohimog personal nga desisyon kon unsa ka dakong riyesgo ang andam nilang batonan. Ang mga artikulong nahisgotan wala tuyoa nga mahimong usa ka giya sa pagpangapital o sa partikular sa dili pagdasig sa mga pangapital sa stock market. Sila nagpasiugda nga ang kadalo mao ang gamot sa kadaghanan sa pinansiyal nga mga suliran sa kalibotan ug ang kagamhanan sa Diyos mao lamang ang kasulbaran.—ED.

Mga Daugdaogan sa Eskuylahan Ingong nag-inusarang ginikanan nga may tin-edyer nga anak lalaki nga atimanon, nakaplagan ko ang dakong giya, ug mga tubag sa daghang pangutana ug mga sulirang akong giatubang, diha sa mga artikulo sa “Mga Batan-on Nangutana . . .” Ang bag-ong artikulo bahin sa mga daugdaogan (Agosto 8, 1989) mao gayod ang gikinahanglan sa akong anak lalaki. Gibasa niya kanag katulo sa adlaw nga iya kanang nadawat.

V. B., Tinipong Bansa

Homoseksuwalidad Ang artikulo sa “Ang Hunahuna sa Bibliya” bahin sa homoseksuwalidad (Hulyo 8, 1989) nagpaduhaduha nako bahin sa pagkahomoseksuwal. Abi ninyo, ako nakigsekso uban sa mga lalaki sukad nga ako 12 anyos. Karon ako 47 na. Ako nakaapil usab sa daghang pornograpikong mga pelikula. Apan sa akong hunahuna panahon na nga ako magkinabuhing normal, ug ako nagsugod sa pagtuon sa Bibliya uban sa mga Saksi ni Jehova. Salamat kaayo tungod sa kahibulongang artikulo.

T. M., Tinipong Bansa

Pagpakigkokabildo Ang artikulong “Sa Unsang Paagi Mapauswag Nako ang Pagpakigkokabildo?” (Mayo 22, 1989) nakakuha sa akong pagtagad. Ako nalisdan sa pagpakigbahin sa mga kabildohay ug sama gayod sa pipila sa mga batan-ong gihisgotan sa artikulo. Sa tabang ni Jehova nga Diyos ug sa maayong mga sugyot nga inyong gihatag, karon ako nang namatikdan ang dakong kauswagan niining bahina. Nagtuo ako nga libolibong batan-on mapasalamaton sa tagana sa mga artikulo sa “Mga Batan-on Nangutana . . .”

M.C.M., Brazil

Depresyon Salamat sa artikulo bahin sa depresyon sa inyong Oktubre 22, 1987, nga isyu. Nabasa nako kini sa makadaghan nga halos nasayran ko kini nga kinasingkasing. Inyong gidasok ang daghan kaayong impormasyon sa 15 ka panid! Bisan ang mga letrato makapadasig. Usahay palandongon ko lamang ang letrato sa hapin niadtong babaye nga masulob-ong tan-awon ug dayon mapahiyomon, ug mobati ako nga labi pang maayo. Ang depresyon maoy kasakitan. Apan ang pagbasa bahin sa uban nga nakasinati niini makatabang. Kamo daw makasabot pag-ayo kon unsay bation sa usang may depresyon. Kadto nahisamag ang artikulo nakigsulti lamang kanako.

J. A., Tinipong Bansa