Gikan sa Among mga Magbabasa

Pagkanaulahi Giapresyar nako ug dako ang artikulong “Kanunay Ka Bang Maulahi?” (Hunyo 8, 1989) Inyong gisugyot ang pagpaabot ug mga yugto sa paghulat ug sa pagdalag balasahon aron mapuliki nga mabungahon samtang magahulat. Ang inyong mga sugyot tinuod nga praktikal.

I. D., Nigeria

Mga Daogdaogan Bisag dili ako mahadlok nga dagmalan sa tunghaan, ginasungog-sungog ako kanunay tungod kay ang akong mama gikan man sa laing nasod ug lahi nga tan-awon. Ang inyong artikulo mahitungod sa mga daogdaogan sa tunghaan (Agosto 8, 1989) nagsulti kanako sa dili pagtagad kanila, ug kana nakatabang kanako. Akong naamgohan usab karon nga ang kadaghanan niadtong mga bataa nagagikan sa bungkag nga mga panimalay ug nagapasa sa ilang mga kapakyasan ngadto sa ubang mga bata. Nalipay kaayo ako nga kamo nakasabot sa batan-ong kaliwatan.

M. D., Tinipong Bansa

Miagas nga Aseite Sa dihang akong nakita ang ulohang “Miagas nga Aseite!” (Septiyembre 22, 1989) nagduhaduha akog diyutay. Daghan na akog nabasa bahin sa pag-agas diha sa mga peryodiko ug mga magasin ug nahibulong kon unsay idugang sa Pagmata! Buweno, human nabasa ang puno-sa-kamatuoran, bag-ong mga anggulo nga artikulo, ang kahibulong nahunong. Milabaw usab kamo sa mga peryodiko ug sa mga magasin ug nagpakita nga ang matuod nga tubag sa mga suliran sa katawhan mao ang bag-ong kalibotan sa Diyos.

C. K., Tinipong Bansa

Espesyal nga mga Panginahanglan Hapit na akong mag-14 ug gustong mopasalamat kaninyo alang sa Agosto 22, 1989, sa artikulo bahin sa pagtabang niadtong adunay linain nga mga panginahanglan. Sa nagtungha pa ako sa elementarya, kami dunay tulo ka bungol nga bata sa among klase, ug ang mga tawo naglihok nga daw sila wala maglungtad ug dili makigsulti kanila tungod kay sila dili man makadungog. Busa ang pipila kanamo nag-uban ug nagtuon kon unsaon sa pakigkomunikar kanila. Sa dihang nakita sa ubang mga bata nga maayo ang pagbuhat niadto, sila misugod usab sa pagsunod niadto! Naghinaot ako nga moabot ra ang adlaw nga makahubad ako alang sa mga bungol diha sa mga kombensiyon sa mga Saksi ni Jehova.

A. B., Tinipong Bansa

Relihiyosong Kasaysayan Mapasalamaton ako sa seryal nga “Umaabot sa Relihiyon Tungod sa Iyang Kagahapon.” Nakabagat ako ug mga tawo nga adunay nagkalainlaing mga relihiyon. Kining mga artikuloha makatabang kanako sa daghan sa pagsubay sa relihiyon gikan sa sinugdan hangtod sa presente.

D. S., Tinipong Bansa

Nagbasa ako sa seryal bahin sa relihiyosong kasaysayan. Daghan kaayo akog nakat-onan, labaw pa sa akong nakat-onan sa eskuylahan.

B. J., Tinipong Bansa

Kabataan Mangamatay Ang akong napulo-ka-bulan nga apo nga babaye nagkalibang. Gipapauli siya sa ospital sa balay, ug misamot siya ka grabe matag adlaw. Akong nahinumdoman ang inyong artikulo bahin sa pagluwas sa mga bata pinaagi sa paggamit sa pormula alang sa Oral Rehydration Therapy. (Septiyembre 22, 1988) Akong gisunod ang mga instruksiyon, ug sa pagkasunod adlaw misugod nga naulian ang iyang kusog. Mihunong ang kalibang, ug siya bug-os nga naayo.

R. M., Tinipong Bansa

Pag-atiman ug Binuhi Ako nagtrabaho sa usa ka dangpanan sa mga hayop ug tighatag ug mga pakigpulong sa pag-edukar sa publiko bahin sa mga responsabilidad sa pag-atiman ug binuhi. Nalipay ako sa pagkadawat sa inyong artikulo “Makaatiman Ka ba Gayod sa Usa ka Binuhi?” (Hunyo 8, 1989) ang adlaw sa dili pa ang dakong presentasyon sa eskuylahan. Ang akong kaubanan nakadayeg kaayo sa artikulo ug gustong mogamit niini sa among tinghunlak nga magasin. Kasagaran na nga ang mga tawo mopili ug binuhi tungod kay nadala sila sa emosyon sa maong yugto. Kadto dalayegon, hinunoa, ang paagi sa inyong pagpresentar sa mga kamatuoran ug sa mga responsabilidad kinahanglan timbangtimbangon sa tawo sa dili pa magpili ug binuhi.

C. S., Tinipong Bansa