Gikan sa Among mga Magbabasa

Down’s Syndrome Salamat sa inyong artikulo “Pagkinabuhi nga May Down’s Syndrome.” (Agosto 8, 1989) Kami usab adunay baldadong sakop sa among pamilya, ug among nakita kon sa unsang paagi ang gugma naghatag kaniya ug dali nga kauswagan. Diha sa Kristohanong mga tigom, siya magarbohong molingkod didto uban sa iyang kaugalingong Bibliya ug basahon sa Bibliya. Among nadawat ang dakong pagdasig sa nagbasa bahin kang Suzy ug sa walay-pagkapakyas nga gugma sa iyang pamilya.

L. S. B., Habagatang Aprika

Talagsaon, Mahingawaon Bag-o pa lang akong nakahuman sa pagbasa sa Oktubre 8, 1989, nga Pagmata! Talagsaon kaayo kining gulaa. Ang ubang mga magasin impormatibo kaayo apan mobilin kanako ug nasubong pagbati o kawalay-mahimo. Gipadayag sa Pagmata! ang katuyoan sa Diyos sa pagsulbad sa mga suliran. Kini gisulat sa masinabuton, matinud-anon, prangka apan mahinagawon nga paagi. Wala ako makapugong sa paggawas gilayon ug sa pagtanyag niini ngadto sa mga tawo niining komunidara. Salamat kaayo kaninyo!

S. D., Tinipong Bansa

Natandog kaayo ako sa sugilanon ni inday Suzy nga tungod niana nakahilak ako. Ako anaa na sa akong katuigang 70, ug ang akong inahan anaa na sa iyang katuigang 90. Nakita ko siya nga anam-anam nga nagakaluya gikan sa sunodsunod nga stroke. Sa miaging walo ka bulan, sama siya sa usa ka bag-ong natawo bata, buhi ug nagginhawa samag tawo apan dili-mabuhi sa iyang kaugalingon. Busa gibati ko ang samang gibati sa inahan ni inday Suzy. Gibati ko usab ang kalit nga pagbul-og sa gugma ug apresasyon sa atong langitnong Amahan, kinsa sa umaabot mohimo kang pinalanggang inday Suzy ug sa akong inahan nga hingpit sama sa iyang gimbut-an alang sa tanang katawhan.

I. S., Tinipong Bansa

Steroids Karong bag-o kanunay kong gipalandong ang inyong artikulo bahin sa steroids. (Marso 22, 1989) Ang akong stepbrother nakakuha ug mga medalya sa ’86 nga Winter Olympics. Apan, siya wala matagbaw nga mahimong labing maayo; siya kinahanglan nga mahimong labaw pa. Sulod sa duha ka tuig nga paggamit ug steroid, napabug-at niya pag-usab ang iyang timbang sa lawas sa katunga kay sa naandan. Kadtong maong mga libra maoy lunlon nga kaunoran. Apan migrabe ang iyang pagkamasuk-anon ug pagkaagresibo. Siya umadtoay sa Lake Placid sa 1990 alang sa bangga sa dula. Hinunoa, iyang gipalabay ang iyang tingtugnaw sa sementeryo. Ang steroids nakapatay kaniya.

A. N., Tinipong Bansa

Relihiyosong Kasaysayan Bag-o pa lang ako nakahuman ug basa sa Bahin 12 sa seryal “Ang Umaabot sa Relihiyon Tungod sa Iyang Kagahapon.” Nakita nako kining mga artikuloha nga makaiikag ug impormatibo. Palihog iapil ako sa inyong listahan sa koreyo.

M. K., Tinipong Bansa

Tabi Sa dihang gibasa ko ang “Mga Batan-on Nangutana . . .” sa mga artikulo bahin sa tabi (Hulyo 8, 1989 ug Hulyo 22, 1989), mihilak ako tungod kay ang tanan nga ilang gipadayag nalangkit kanako. Ako nakaapil sa pagpasa ug hungihong, ug nakahatag kadtog kasakit sa daghang tawo, hasta sab ko. Nawala ang pagtahod sa mga tawo kanako ug gani may mga hungihong nga gipakaylap bahin kanako. Ang artikulo nakatabang kanako. Ambot kon unsaon ko kamo sa pagpasalamat.

J. P., Tinipong Bansa

Mga Awit sa Gugma Bag-o pa lang ako nakahuman sa artikulong “Mga Batan-on Nangutana . . . Ang Gugma Sama ba Nianang Anaa sa mga Awit sa Gugma?” (Hunyo 22, 1989) Ang artikulo maayo kaayong pagkasulat ug punog katin-awan. Akong nasabtan nga ang tanang mga awit sa gugma makadaot alang niadtong wala sa posisyon nga magminyo. Apan nagpasabot ba kini nga ang mga minyo mohunong usab sa pagpamati sa mga awit sa gugma?

D. K., Tinipong Bansa

Ang artikulo nag-alagad, dili sa pagtunglo sa mga awit sa gugma, kondili sa pagpakita nga daghan niining mga awita nagtudlo ug dili-realistiko ug dili-maayong hunahuna bahin sa gugma ug kaminyoon. Apan, ang yanong kamatuoran nga ang usa ka awit nagapahayag ug romantikong sentimento wala sa awtomatiko nagpahimo niini nga dili-maayo sa mga Kristohanon. Busa gidasig ang mga batan-on nga magmapilion sa ilang pagpilig musika. Ang minyong mga Kristohanon magiyahan sa sama.—ED.

Abi nakog ang mga awit sa gugma tinuod nga nagapahayag kon unsaon sa pagpakita sa gugma ug kon unsaon kini sa paghatag. Kining artikuloha nakapaamgo kanako sa kataposan nga kinahanglang molihok ka sa paglig-on sa relasyon ug magpabilin niana latas sa maayo ug dili-maayong panahon.

M. Z., Tinipong Bansa