Mga Batan-on Nangutana . . .

Ang Gugma Sama ba Nianang Anaa sa mga Awit sa Gugma?

ANG mga awit sa gugma—mga awit nga nagdayeg sa matuod nga gugma, mga awit nga gibakhoan ang nawalang gugma—maoy naandan sa kahanginan sa radyo. Ug bisan kon unsa man ang ilang takuban, ma-rhythm ug mga blue, soul, pop, o rock, kini sila labihan ka popular sa mga tin-edyer. Unsa may hinungdan niini?

Ang kadaghanan sa mga awit dunay kusganong tuno nga makadani—mananoy nga mga honi, makapahinuklog nga mga pulong, makapasayaw nga mga kompas. Makatandog sila sa mga pagbati ug makalalang sa halos makapatulog romantiko nga gana. “Kon ako makig-istorya sa telepono sa akong hinigugma mahitungod sa pipila ka kakulian ug naglisod sa paglitok sa mga pulong,” matod sa usa ka batan-on nga ginganlag Rusty, “ang nindot nga awit sa gugma nga madunggan sa background makapahaluna kanako sa malumong gana, ug dali rang mogula ang mga pulong.”

Bisan pa, ang popularidad sa mga awit sa gugma dili lamang tungod sa bisan unsang musikal nga merito sa mga tono nila. Kon tin-edyer ka, nagtuon ka unsaon sa pagsagubang sa imong seksuwal nga mga pagbati. Ukitan mahitungod sa mga misteryo sa gugma ug romansa, mahimong sayon ra nga mobati duyog sa mga awit nga nagbatbat sa mga kalipay ug mga kasakit sa panagdeyt ug panagbulag. Sama sa pagpahaluna niini sa usa ka magsusulat, pinaagi sa mga awit sa gugma, ang mga tin-edyer “makatilaw ug diyotay kon unsa ang bation sa mahigugma, ug busa masinati sa pipila sa mga kalipay ug mga kahigawad sa gugma.”

Dili sinati sa mga paagi sa gugma ug lagmit dili seguro sa ilang abilidad sa pagpahayag sa ilang mga pagbati, ang uban modangop sa mga awit sa gugma sa pagkaplag sa hustong mga pulong igsusulti nianang usa nga espesyal. Ang ubang mga batan-on ngani admitido nga naningkamot sa pagdani sa mga sakop sa kaatbang nga sekso uban sa mga pulong nga gikuha sa popular nga mga awit. Apan ngadto sa unsang sukod ang mga awit sa gugma sa pagkamatuod nagtudlo sa mga batan-on mahitungod sa gugma?

Mga Leksiyon sa mga Awit sa Gugma

Palandonga, una, ang usa sa labing nindot nga mga awit sa gugma nga sukad masukad gisulat. Ginganlag Ang Awit ni Solomon, kini ang talaan sa Bibliya mahitungod sa matahom Sulamitanhon nga babaye ug sa iyang gugma alang sa lalaki nga magbalantay sa karnero. Ang ilang gugma gihulga ni Haring Solomon, kinsa, uban sa iyang makapasulaw nga himaya, kaalam, ug bahandi, naningkamot sa pagbihag sa kasingkasing sa batan-ong babaye—apan sa kakawangan. Ang iyang gugma napamatud-an dili kanang matang nga palingpaling. Nagpahayag ang batan-ong babaye: “Ang pagkamalahutayon sa bug-os nga pagkamaunongon sama ka dili matarog sa Sheol. Ang mga pangidlap niana mao ang mga pangidlap sa kalayo, ang siga ni Jah.”—Awit ni Solomon 8:6.

Ang mga awit sa gugma ba karon susama nga nagpalambo sa dungganon, apan realistiko, nga panlantaw sa romantikong gugma? Sa kasukwahi. Ang magsusulat nga si Sally Helgesen nakamatikod nga ang mga awit sa gugma “nagsaulog sa kalibotan sa melodrama ug gisakit nga pagbati, diin ang gugma” kasagaran makakaplag sa “hingpit nga tubag.” Sa kasubo, ang ‘hingpit nga mga tubag’ pipila ra ug halayo sa matuod nga kinabuhi, ug ang usa kinsa mangita kanila nagdapit sa kapakyasan. Aw, bisan ngani ang halangdon balaknon nga mga pahayag ni Haring Solomon napakyas sa pag-angkon kaniya sa gugma sa dalagang Sulamitanhon! Midugang si Helgesen: “Ang mga awit nagpukaw ug walay pormang damgo sa hamtong nga kinabuhi diin gituhop sa romantikong pagbati ang tanang ubang pagbati ug ang responsabilidad wala magpabug-at kang bisan kinsa.” Sa makausa pa, halayo kaayo sa matuod nga kinabuhi.

Si Sheila Davis, propesor sa pagsulat sa mga pulong sa awit sa Unibersidad sa New York, miingon nga ang mga awit sa gugma dugang naglimbong sa katawhan sa ideya nga ang panaad “dili na uso.” Ang lain pang popular nga tema sa mga awit sa gugma mao nga ang gugma dihadiha. Usa ka popular nga awit nagpahayag nga ang gugma “kalit” nga mitungha human sa “unang hello” ug sa “unang pahiyom.” Ang mga awit sa gugma sa ingon nagtudlo nga ang gugma buta, nga nag-ila sa kalig-on apan nagdumili sa pagtan-aw bisan sa dayag nga kahuyangon.

Unsa ka balido ang maong mga leksiyon? Buweno, palandonga: Ang unang impresyon ba mahimong matuod nga pasukaranan alang sa dayon nga relasyon? Malisod. Tagda kon giunsa sa Bibliya pagbatbat ang matuod nga gugma: “Ang gugma mapailobon ug maloloton . . . Ang gugma dili bastos o hakog o masuk-anon . . . Ang gugma dili mohunong; ug ang pagtuo, paglaom, ug pagpailob niini bisan kanus-a dili mapakyas. Ang gugma walay kataposan.”—1 Corinto 13:4-8, Today’s English Version.

Ang matuod nga gugma dili dihadiha nga hitabo, ni kini yanong naglangkit lamang sa mga pagbati. Ang hamtong nga gugma may mga mata; kini makakita sa kalig-on apan manumbaling sa kahuyangan. Ang matuod nga gugma maugmad sa molabay ang panahon samtang ang kahibalo mabatonan mahitungod sa personalidad ug mga hiyas sa lain—“ang pagkatawo nga natago sa kasingkasing.” (1 Pedro 3:4) Ang matuod nga gugma dili moatras sa panaad; kini motapot sa usa ka relasyon ug maningkamot sa pagpalambo niini bisan kon dili maayo ang mga kahimtang. Pagkalahi sa matuod nga gugma gikan sa gugma nga sagad batbaton sa mga awit!

Malaw-ay nga mga Pulong

Ang mga awit sa gugma may hilig usab sa pagtumbas sa gugma uban sa sekso—usa ka leksiyon nga gitudlo karon uban sa makapakugang nga kawalay ulaw. Matuod, ang mga awit sa gugma nga kanhi gisayawan sa imong mga ginikanan o bisan mga apohan panagsa may malinglahong linya o duha nga masugyoton. Apan ang kadaghanan sa mga awit karong adlawa malinglahon. Si Sheila Davis, nga gikutlo sa sinugdan, miingon: “Dili lamang ang ka prangka mipuli sa tanghagaon, ug ang erotikong teritoryo misangkad sa paglakip sa masturbasyon ug [hiwing] sekso, apan ang mga pulong sa awit bisan pa misakop sa kanhi gidili nga natad sa pagpakighilawas sa duol nga kabanay.” Ang ubay-ubayng kompaniya sa rekord sa T.B. karon miuyon sa pagbutang ug mga pahibalo sa mga rekord nga naundan sa malaw-ay nga mga pulong maylabot sa sekso o kapintas.

Ang 16-anyos nga si Leslie nangatarungan: “Ang mga pulong sa awit dili sama niana ka importante kon makahimo ka sa pagsayaw niini. Wala ako maghunahuna nga kini makadaot kang bisan kinsa. Musika ra man kini.” Ang mga batid wala mouyon. “Ang pagsublisubli sa samang popular nga musika makadaghan sa matag adlaw makapahinabo sa sayon nga pagsag-ulo sa seksuwal nga mga mensahe,” matod sa usa ka tigpanukiduki. Wala ka ba, sama sa uban, nakakaplag sa imong kaugalingon nga naglitok sa hilas o imoral nga mga pulong sa awit tungod sa pagpaminaw kanila sa makadaghan? (Efeso 4:29) Si Dr. Joseph Stuessy, propesor sa musika sa Unibersidad sa Texas sa San Antonio, mipasidaan: “Bisan unsang matang sa musika nag-apektar sa atong gana, pagbati, tinamdan ug sa atong resulta nga kagawian.”—Italiko amoa.

Makapahimsog ba ang pagpamati o pag-awit sa mga pulong nga tataw nga nagbatbat o nagpalambo sa seksuwal nga imoralidad? Dili kaha ang paghimo niana makadaot sa imong panlantaw sa hustong papel sa sekso diha sa kaminyoon?—1 Corinto 7:3-5.

“Panahon sa Gugma”

Ang laing peligroso sayop nga pagsabot nga gitudlo sa popular nga musika mao nga ang mga tin-edyer andam na alang sa panagsuod uban sa kaatbang nga sekso. Matuod, dunay “panahon sa gugma”—apan ang Bibliya dinhi wala magpasabot sa erotikong gugma. Kon bahin sa gugma sa panagtiayon, karon na ba ang panahon niana alang kanimo? Lagmit dili ba sa daghan pang tuig sukad karon, sa dihang may igoigo ka nang panuigon? (Ecclesiastes 3:8) Kon ang ulahi mao ang matuod, may katarungan ba ang pagpukaw sa kusganong mga tinguha alang sa usa ka butang dili pa nimo maangkon?

Kay walay kapahungawan alang sa ilang naablihan romantikong mga pagbati, ang ubang mga batan-on nabitik sa romantiko damgong kalibotan. Ang uban “mahigugma” sa ilang paborito nga mga mag-aawit, nga naghanduraw nga ang tagsa ka mabinationg pulong giawit nga gihonghong sa ila mismong mga igdulungog. Tigomon nila ang tagsa ka album, hulagway, ug poster sa artista nga ilang makaplagan ug magdamgo nga magpakasal kaniya. Apan ang dayag bugtong sangpotanan alang sa maong hinanduraw nga relasyon mao ang kahiubos ug kasakit.

Busa ang Awit ni Solomon nagtudlo ug lain pang importante nga leksiyon. Matinguhaon sa pagpabiling maunongon sa iyang hinigugma nga magbalantay sa karnero, ang dalagang Sulamitanhon miawhag sa iyang kaubang mga babaye sa ‘dili pagpukaw o pag-aghat sa iyang gugma’ alang kang Haring Solomon, kinsa naninguha sa iyang pagmahal. (Awit ni Solomon 2:7) Nahibalo sa tinagong gahum niini, yano siya nga midumili sa pagpaminaw sa mga sultisulti nga mahimong makadaot sa iyang mga pagbati. Ang susamang kalihokan mapamatud-an nga maalamon alang kanimo sa imong pagpili sa musika. Nganong dili yanong likayan ang musika nga nagpukaw sa kusganon romantikong mga pagbati diha kanimo o mopasubo ug mopahimo kanimong mamingawon?

Hinumdomi: Ang musika maoy gasa gikan sa Diyos. Ug makapaneguro ka nga siya dili mahimuot sa musika nga nagpaubos ug nagdaot sa moral, nagpahiwi sa Kristohanong mga prinsipyo o nagdasig sa luag nga paggawi. Ang Kristohanong kabatan-onan kinahanglan magmapilion sa ilang pagpili sa musika. Ang disinuybe-anyos nga si Scott nagkanayon: “Una pa ako mopalit ug rekord o cassette, akong susihon ang hapin ug sabton ang ideya sa mga pulong sa awit. Kon sila masugyoton, dili ko kini paliton.”

Ang gugma dili kay sama lang sa mga awit sa gugma. Makat-onan mo kining kamatuorana pinaagi usahay sa masakit nga kasinatian sa kinabuhi. Hinumdomi, usab, nga ang matahom nga mga awit dili kapuli sa matuod nga mga higala. Inay magpalain sa imong kaugalingon diha sa musikal nga damgo nga kalibotan, paggugol ug panahon uban sa mga tawo—sa imong mga ginikanan, sa mga mahadlokon sa Diyos nga mga batan-on, ug sa hamtong nga mga Kristohanon. (Proverbio 18:1) Ang maong panag-uban mosangko sa imong pagbati nga gihigugma sa diyosnon nga paagi—pagbati nga labaw pa sa mga handuraw sa mga awit sa gugma.

[Blurb sa panid 14]

“Bisan unsang matang sa musika nag-apektar sa atong gana, pagbati, tinamdan ug sa atong resulta nga kagawian”

[Letrato sa panid 12]

Tanan bang mga awit sa gugma naghulagway sa matuod nga kinabuhi?

[Letrato sa panid 13]

Magmapilion kon unsa ang imong paminawon!