Mga Kanta nga Makapasuod Nato sa Diyos

Ang musika maoy nindot kaayong regalo gikan kang Jehova. Makaapektar ni sa atong hunahuna, emosyon, ug makadasig nato, sama sa atong orihinal nga mga kanta. Gani, ang maong mga kanta mas makapasuod nato kang Jehova.

Sukad niadtong 2014, kapin na sa 70 ka orihinal nga kanta ang nahimo, ug labing menos ang usa niana available karon sa kapig 500 ka pinulongan! Pero tingali nakapangutana ka, ‘Kinsay naghimo ani nga mga kanta, ug giunsa ni paghimo?’

Paghimo sa mga Kanta

Ang orihinal nga mga kanta gihimo sa music team sa Audio/Video Services, nga gidumala sa Komite sa Pagpanudlo sa Nagamandong Lawas. Dunay 13 ka igsoon sa music team, ug motabang sila sa pag-compose, sa music engineering, sa pag-eskedyul, ug sa ubang importanteng buluhaton. Giaprobahan pod sa Komite sa Pagpanudlo ang mga remote volunteer gikan sa lainlaing nasod, sama sa mga composer, musician, ug singer, nga motabang niini nga buluhaton. Kini nga mga igsoon mapainubsanong naggamit sa ilang mga talento, ug wala sila magtinguha nga dayegon sila sa uban.

Giunsa paghimo ang orihinal nga mga kanta? Una, ang Komite sa Pagpanudlo mopilig mga teksto sa Bibliya nga basehan sa kanta ug kon unsang emosyon ang ipabati sa kanta. Dayon, ang music team mag-asayn kon kinsay mag-compose sa musika ug magsulat sa lyrics. Unya maghimog sampol nga rekording. Paminawon ni sa Komite sa Pagpanudlo ug mohatag silag dugang direksiyon. Dayon, i-adjust sa music team ang kanta ug magrekord silag final version. Ang mga kanta irekord sa lainlaing lokasyon, apil na sa mga branch facility ug mga studio sa balay.

Sa pag-compose ug pagrekord sa orihinal nga mga kanta, ang atong mga igsoon naggamit ug mga digital audio workstation, music notation program, mga audio library, ug uban pang computer program. Kinahanglan sab silang mogamit ug mga musical instrument, mixing console, amplifier, speaker, ug mikropono. Ang usa ka mikropono mokantidad ug $100 ngadto sa kapig $1,000 (U.S.). Niadtong 2020, migasto tag $116,000 (U.S.) para sa equipment sa rekording.

Unsay ginahimo aron makadaginot ug kuwarta? Imbes magpormag dakong music team sa Bethel, daghang remote volunteer ang gigamit. Dugang pa, imbes daghang musician ang aktuwal nga magtapok aron magrekord ingong orkestra, ang atong mga igsoon sagad mag-compose ug maghimog musika gamit ang computer program nga naay tingog sa daghang musical instrument.

“Nakapalig-on Gyod ni Nako”

Ang mga igsoon ganahan kaayong maminaw sa orihinal nga mga kanta. Si Tara, nga taga-Germany, miingon: “Ang mga kanta nakatabang nako nga marelaks dihang mabalaka ko. Samtang maminaw ko ani sa akong pinulongan, mora kog gigakos ni Jehova.” Ang brader sa Kazakhstan nga si Dmitry miingon: “Ganahan kong maminaw ani nga mga kanta kay dili na ko mabalaka kon supak ba ni sa mga prinsipyo sa Bibliya. Nakatabang pod ni nako nga pirmeng magpokus sa espirituwal nga mga butang.”

Si Delia, sa South Africa, miingon bahin sa orihinal nga mga kanta: “Nakapalig-on gyod ni nako. Dihang maguol ko ug naay problema, naa gyoy kanta nga haom sa akong situwasyon. Sagad, ang tono pa lang sa kanta makapausab na sa akong gibati!”

Naay orihinal nga mga kanta nga paborito sa uban. Si Lerato, nga taga-South Africa pod, miingon: “Ang kanta nga ‘Duol Na Gyod Kaayo’ ug ‘Sa Bag-ong Kalibotan’ nakatabang nako nga maimadyin ang panahon nga makita nako pag-usab ang akong pinangga nga mama. Dihang maminaw ko ani nga mga kanta, maimadyin nako siya nga nagdagan paingon nako aron gakson ko.”

Dako kaayog tabang sa usa ka tin-edyer sa Sri Lanka ang usa ka orihinal nga kanta. Siya miingon: “Gikasab-an ko sa akong maestra sa science atubangan sa klase kay Saksi ni Jehova ko. Nahadlok ko ug wa ko katingog. Pag-uli nako, giingnan ko ni Mama nga paminawon nako ang kanta nga ‘Study Makes You Strong.’ Tungod sa kanta, nakita nako nga kinahanglan kong mag-research ug mag-andam ug tubag. Pagkaugma, nakig-estorya ko sa akong maestra. Naminaw siya nako ug naapresyar niya ang mga pagtulon-an sa mga Saksi ni Jehova. Mapasalamaton ko sa organisasyon ni Jehova sa paghimog makapadasig nga mga kanta para nato.”

Asa gikan ang kuwarta nga gigasto sa paghimo sa mga kanta? Sa mga donasyon sa worldwide work, nga ang kadaghanan gipadala gamit ang mga paagi nga naa sa donate.jw.org. Salamat kaayo sa inyong mga donasyon ug pagkamahinatagon.