Gikan sa Among mga Magbabasa
Tibuok-Yutang Pag-igsoonay Gipabilhan ko gayod ang impormasyon diha sa Disyembre 8, 1990, nga isyu. Nagpuyo ako sa usa ka pamilya diin may rasanhong pagkamadapigon, ug kini kasagarang makapalagot kanako. Ako nagpaabot ug impormasyon nga sama niini aron ikapaambit kanila. Ang mga artikulo, nga gipahayag sa tin-aw ug deretso sa punto, angay makatabang nila sa pagsabot nganong angay natong sundon ang panig-ingnan sa Diyos sa pagkawalay-pinalabi.
T. C., Tinipong Bansa
Mga Panimalay nga Nabahin sa Relihiyon Salamat kaayo sa artikulong “Mga Batan-on Nangutana . . . Sa Unsang Paagi Makapuyo Ako sa Panimalay nga Nabahin sa Relihiyon?” (Enero 22, 1991) Samtang gibasa sa akong mga anak ug nako sa tingob ang artikulo, gibati namo nga maorag kamo nakasabot gayod unsa ka lisod ang kahimtang nga sama niini. Kana nagbatbat sa mga suliran nga among giatubang diha sa among kaugalingong panimalay. Makapadasig kaayo ang pagkadawat ug praktikal nga tambag gikan sa Kasulatan!
D. H., Tinipong Bansa
Ako usab nagdako sa usa ka panimalay nga nabahin sa relihiyon. Sama sa batang lalaki nga gikutlo diha sa artikulo, usahay ako maluoy kaayo sa akong amahan kay siya mabilin nga usa ra diha sa balay inig-adto namo sa Kristohanong mga tigom. Usahay ako matental sa pagkompromiso sa akong pagtuo. Ugaling lang, pagkahuman sa pagbasa niining artikuloha gihukom nako nga bisan tuod kinahanglan ako magmaluluton ug magmatikanhon ngadto sa akong amahan, kinahanglang magbantay usab ako pag-ayo sa paglikay sa espirituwal nga mga lit-ag.
J. O., Hapon
Pagdawat sa Pagsaway Sukad sa pagkahimo nakong Kristohanon, ang akong mga ginikanan nangitag mga butang nga ikasaway nako. Kini makapalagot kaayo. Apan ang inyong artikulong “Dili Ka ba Gustong Sawayon?” (Pebrero 8, 1991) nagpakita kanako kon unsaon pag-atubang kining kahimtanga.
M. M., Tinipong Bansa
Dihadihang Katagbawan Magaingon ako ‘salamat!’ tungod sa mga artikulo bahin sa dihadihang katagbawan. (Enero 22, 1991) Gipakigbisogan ko kini nga kaisipan, nga maoy tungod sa diyetang unom ka oras sa telebisyon sa usa ka adlaw sa pagkabata pa nako. Ang pagbasa sa mga artikulo nakapalunhaw sa akong panglantaw.
R. D., Tinipong Bansa
Pagtabako Nakakaplag akog usa ka kopya sa Pagmata!, nga bahin sa pagtabako, sulod sa usa ka balaybalay sa telepono. (Hulyo 8, 1989) Ang kalabera sa ulo sa hapin makadani kaayo sa pagtagad! Mihunong ako sa pagtabako upat ka tuig kanhi, apan gipasa ko ang magasin ngadto sa usa sa akong mga anak nga motabako. Ako may tulo pa anak lalaki nga kinahanglan usab nga mohunong. Ang mga artikulo labing matulon-anon ug deretso sa punto. Bisan tuod ako dili sakop sa inyong relihiyon, kana akong gitahod.
P. T., Tinipong Bansa
Ang akong magtutudlo labihan ka hinabako, ug matag panahong siya makigsulti kanako, siya manimahong aso sa sigarilyo. Nakahinumdom ako sa artikulo nga may napulo ka paagi sa paghunong sa pagtabako. Gidad-an kog usa ka kopya ang akong magtutudlo ug nangutana kaniya tulo ka bulan sa ulahi kon siya nakahunong ba sa pagtabako. Giingnan niya ako nga sa tabang sa magasin ug sa paningkamot sa iyang bahin, siya nakahunong. Siya nagtabako sulod sa 25 ka tuig.
B. O., Tinipong Bansa
Mga Panimalay sa Nag-inusarang Ginikanan Ako usa ka nag-inusarang ginikanan, ug tungod sa kalisod sa pagpadako ug pagbuhi sa akong mga anak sa akong kaugalingon, lagmit ako maghunahuna kon sa unsang paagi apektado ako niining mga butanga, nga kasagarang mobati nga ako nag-inusara gayod. Ang inyong artikulo “Sa Unsang Paagi Ako Magmalipayon sa Pagpuyo Uban sa Usa Lamang ka Ginikanan?” (Disyembre 22, 1990) nakatabang nako sa pagtan-aw sa mga butang gikan sa laing anggulo—ang sa akong mga anak. Akong naamgohan nga ang akong mga pagbati ug mga panginahanglan dili mao lamang ang pagatagdon.
P. G. B., Tinipong Bansa