Usa ka Umaabot nga Katuohan
“Diin walay panan-awon ang mga tawo mawad-an sa pagpugong,” matud pa sa usa ka magsusulat sa Bibliya sa dugay nang panahon. (Proverbio 29:18, “The Jerusalem Bible”) Ang mga tawo nagkinahanglan ug panan-awon, usa ka paglaom alang sa usa ka masanag nga kaugmaon. Kay kon maohon sila maluya ug magpatuyang. Apan duna bay usa ka kaugmaon nga atong katuohan?
Ang tema alang sa bangga sa pagsulat sa Voice of Democracy sa miaging tuig maoy “Pagpangandam Alang sa Umaabot sa Amerika.” Ang nakadaog sa unang ganti sa ang-ang sa distrito sa estado sa Virginia mao ang 16-anyos nga batang babaye, usa sa mga Saksi ni Jehova. Siya gidapit usab sa usa ka lokal nga miting sa Veterans of Foreign Wars, diin iyang gipahayag ang iyang sinulat ngadto sa duolan sa usa ka gatos ka beterano. Ang sinulat migula diha sa lokal nga basahong “Saltville News-Messenger,” sa Disyembre 15, 1988. Basaha ang iyang sinulat, ug tan-awa kon nganong kining batan-ona nagtuo gayod nga dunay usa ka matahom nga umaabot.
“Handurawa ang imong kaugalingon diha sa paraiso. Ikaw anaa sa kapatagan taliwala sa lanubo, lunhaw nga alpombrang balili ilalom sa imong mga tiil. Sa imong kiliran mao ang matahom kaayong busay nga nagabuhagay ibabaw sa mga bato sa ubos nga bakilid. Sa ibabaw nagabitay ang maanindot nga mga kahoyng weeping-willow nga may mga pungpong sa purpurang mga bulak nga nangalimyon sa iyang kahumot. Sa halayo imong nakita ang usa nga nanibsib. Giduol ka sa usa ka uso ug gipasagdan ka sa pagdula ug sa paghapohap sa iyang baga nga balahibo. Ang mga bird of paradise nga nanag-awit sa usa ka mananoy nga awit. Dili ba kana katingalahan? Pagkatahom nga umaabot nga pagapaabuton!
“Unsa may nakulang diha sa larawan? Wala ko hisgoti kaninyo ang mga buak nga mga bildo ug mga lata sa ilimnon nga naghugaw sa sapa tungod kay sila wala man didto. Wala ko hisgoti kaninyo ang imong mabalak-ong panagway tungod sa kahadlok sa nukleyar nga gubat kay kini wala didto. Wala ko hisgoti kaninyo ang makasubong kamatuoran nga ikaw mamatay sa duha na lang ka bulan tungod sa AIDS kay wala man usab kana didto. Karon ilha kon unsang talan-awon ang kamatuoran. Dili kini malisod. Karon hain niini ang umaabot sa mga Amerikanhon?
“Kapin sa usa ka yugto sa 40 ka tuig, gikan sa 1945 ngadto sa 1985, ang Amerika nakahimog 60,000 ka nukleyar nga mga bomba, nga nakagasto ang nasod ug $82 bilyones. Kana maoy 1,500 sa usa ka tuig ug upat ka hinagiban matag adlaw. Ang pulong ‘polusyon’ nagapadayag sa iyang kaugalingon. Kita mga saksi niini diha sa atong kaugalingong lugar ug sa kanait nga mga lungsod. Dunay usa ka suba sa duol nga nagadagayday sa daghang lungsod nga napundo ug nabaho sa kemikal nga polusyon. Hain na man ang Amerikanhon nga utlanan sa halapad nga yuta nga ginalantaw sa unang mga eksplorador? Gibanabana nga sa tuig 2000 ang tres-kuwarto sa nagatubong populasyon mamuyo sa mga siyudad.
“Dunay sobrang pagkahugno sa moralidad. Ingong resulta sa mga katuigan sa kahilayan, sa New York lamang 250,000 ngadto sa 400,000 ang natakdan sa AIDS. Kini nakapildi sa matag biktima ug $50,000 sa matag tuig. Kining ubos nga mga sukdanan sa moral nagkahulogan usab nga dunay 12 ka milyong aktibo sa sekso nga mga batan-on sa Amerika karon. Nan, dili ikahibulong nga ang Amerika ilado nga dunay labing taas nga gidaghanon mga tin-edyer nga mabdos taliwala sa industriyalisadong mga nasod. Anaa usab ang panglimbong. Ang mga kawatan sa panahon, o mga empliyado kinsa nagapangawat sa panahon sa kompaniya, nakadugang sa bayranan sa Amerika nga $170 ka bilyon sa usa ka tuig.
“Kini maoy mga problema nga nahibaloan ug pagaatubangon natong tanan. Tugotan ta nga kini makapabalaka, apan nakadungog ako ug balak niadto nga mabasa, ‘Duha ka tawo nanan-aw sa gawas sa selda sa prisohan, ang usa nakakita ug lungag sa lapok, ang usa nakakitag mga bitoon.’ Aron masulbad kining mga problemaha kita kinahanglang motan-aw sa mga bitoon, nagkahulogan nga kita kinahanglan magbaton ug positibong mga hunahuna. Sa libolibo ka tuig ang tawo nagtukod ug mga kagamhanan, ang matag usa lahi apan walay usa ang milampos o mitagal ug dugay. Ang usa ka propeta niadto miingon, ‘Dili iya sa usa ka tawo ang pagtultol sa iyang kaugalingong mga lakang.’ Ang maalamong hari miingon nga ang tawo nagamando sa tawo sa iyang kadaot. Aron makabaton ug umaabot kinahanglan motan-aw kita sa mga bitoon, dili sa mga bitoon sa bandera, ug dili sa mga bitoon nga giangkon sa mga astrologo nga maoy pagasumikaran sa atong kaugmaon, kondili kinahanglan kita motan-aw saylo pa niana sa mas hataas nga tuboran, ang atong Maglalalang.
b“Ang atong Maglalalang nagsaad diha sa Salmo 46:9 nga ang mga gubat pagahunongon. Diha sa Pinadayag kapitulo 11 ug bersikulo 18 siya nagpasalig kanato nga iyang laglagon kadtong nagalaglag sa yuta. Kita makasalig usab sa katumanan sa Daniel 2:44, nga naghisgot mahitungod sa usa ka gingharian, usa ka kagamhanan nga molungtad sa walay kataposan. Kining hingpit nga kagamhanan mopatungha alang sa yuta nianang atong gilarawan sa sinugdanan niini nga pakigpulong.
“Sa dihang magtuon kita sa Bibliya, atong makat-onan kon unsay gitagana ni Jehova nga Diyos alang sa atong umaabot. Si Presidente Reagan nahibalo nga tinuod kini tungod kay niadtong 1983 siya mipirma ug resolusyon nga gipasa sa Kongreso nga nagpadayag sa 1983 nga mao ang nasodnong ‘Tuig sa Bibliya.’ Kining resolusyona miila sa usa ka ‘nasodnong panginahanglan sa pagtuon ug sa pagpadapat sa mga pagtulon-an sa Balaang Kasulatan.’ Si Gn. Reagan nangutana, ‘Kita ba makasaad sa pagkab-ot, sa pagtuon ug sa pagpaningkamot sa pagsunod sa dakong mensahe nga nasulat sukad, ang Pulong sa Diyos ug ang Balaang Bibliya? Sulod sa mga panid niini mao ang tanang mga tubag sa tanang mga problema nga nahibaloan sukad sa tawo.’
“Handurawa pag-usab ang paraiso. Kana mao ang umaabot nga akong gituohan, diin ang mga tawo molihok tungod sa gugma, pagkamatinud-anon ug katim-os. Ang mga problema sa Amerika dili tagsaon sa Amerika. Ang mao gihapong mga problema ang gibati sa tibuok kalibotan. Kini atong makita pinaagi sa yanong pagbasa sa adlaw-adlaw nga peryodiko o sa pagtan-aw sa mga balita sa gabii ni Tom Brokaw. Ang bugtong paagi sa pagsulbad niining mga problema mao ang pagtan-aw sa atong Maglalalang. Ang iyang orihinal nga katuyoan sa yuta mao nga himoon kini nga usa ka paraiso. Nahinumdoman ba nimo ang Tanaman sa Eden, diin iyang gibutang si Adan ug Eva? Ako nagtuo nga iyang tumanon kana nga katuyoan. Kinahanglan mosalig lamang kita kaniya. Busa tun-an nato kon unsay gitagna sa Bibliya ug magpadayon kita sa paglaom alang sa usa ka matahom nga umaabot.”