Ang Hunahuna sa Bibliya

Ang Kamatayon sa Usa ka Bata—Nganong Gitugotan Kini sa Diyos?

DAGHAN nga nagbangotang mga ginikanan ang mahupayan nga mahibalo nga wala kuhaa sa Diyos ang ilang anak pinaagi sa kamatayon, sumala sa ginatudlo sa pila ka relihiyon.a Bisan pa niana, kining ugdang nga kamatuoran magapabilin: Ang Diyos may gahom sa pagsanta sa kamatayon. Bisan pa niana, gitugotan niya kini nga magpadayon.

Busa sa dihang mamatay ang usa ka bata, ang mga ginikanan tingali modanguyngoy sa kaguol, “Nganong gitugotan sa Diyos nga mahitabo kini?” Ang kamatayon, kon kaha pinaagi sa aksidente, pinaagi sa sakit, o pinaagi sa kabangisan, halos sa kanunay mopatim-awng mapintason ug dili makataronganon. Ang pagkamatay sa usa ka bata maorag labaw pa niana. Sa usa ka sementeryo ang lapida sa usa ka bata gisulatan niining makapasubong pagtutol: “Labihan ka bata, labihan ka makalingaw, labihan ka dali.”

May Simpatiya ang Maglalalang Alang Nimo

Sa unsang paagi ikatugot sa Diyos ang maong kaguol? Kon bag-o ka pang namatyan ug anak, walay katin-awan, bisan unsa pa ka rasonable, ang makapawagtang sa kaguol sa maong kamatayon. Sa panahon sa Bibliya, bisan ang mga tawong may dakong pagtuo nagmagul-anon tungod sa dili-makataronganong mga trahedya sa kinabuhi ug nangutana sa Diyos nganong iyang gitugotan ang maong mga butang. (Itandi ang Habakkuk 1:1-3.) Apan adunay mga tubag diha sa Bibliya nga sa nahaigong panahon makahupay kanato.

Hibaloi una nga dili gusto sa Diyos nga ang imong anak mamatay. Ang Diyos dili gani malipay sa kamatayon sa mga daotan, labi pa sa kamatayon sa usa ka bata. (Itandi ang 2 Pedro 3:9.) Sa pagkamatuod, siya dulot maguol sa dihang ang usa ka bata mamatay. Kon buot sabton, maguol kita bahin sa trahedya sa kamatayon tungod lamang kay kita makaarang sa paghigugma, may pagbati alang sa mga biktima. Ug kita makaarang sa paghigugma lamang tungod kay kita gibuhat diha sa dagway sa Diyos. Gibanaag nato ang hingpit nga katakos sa Diyos sa paghigugma, bisan tuod sa mahuyang nga paagi. (Genesis 1:26; 1 Juan 4:8) Ang Bibliya nagpasalig kanato nga ang Diyos makabasa sa mga pagbati sa atong mga kasingkasing, makaihap sa mga buhok mismo diha sa atong mga ulo, nahibalo pa sa dihang ang usa ka maya mahulog gikan sa usa ka kahoy. Busa, siya gitawag “ang Amahan sa malumong mga kaluoy.”​—2 Corinto 1:3; Mateo 10:29-31.

Nan, tin-aw nga dili gusto sa Diyos nga mamatay si bisan kinsa sa iyang intelihenteng mga linalang. Maoy iyang katuyoan nga taposon ang kamatayon, nga pagalamyon ang kamatayon sa walay kataposan. (Isaias 25:8) Apan kon kana mao ang iyang pagbati, nganong gitugotan man niya ang kamatayon kasamtangan, ilabina sa mga bata?

Sa Dihang Misugod ang Kamatayon

Gitugotan sa Diyos ang kamatayon sa samang katarongan nga gitugotan niya nga mamatay ang mga hamtong. Ang kamatayon maoy gipili ni Adan, dili sa Diyos. Bisan sa wala pa morebelde si Adan ug si Eva batok sa ilang Maglalalang sa Eden, sila nahibalo gayod nga gibutang sa Diyos ang silot nga kamatayon tungod sa sala. Kon wala nila pilia nga mahimong dili maunongon ngadto sa Diyos, sila buhi pa unta karong adlawa. Apan sa pagkahungog ilang gilabay ang labing bililhong panulondon nga ilang ikapasa ngadto sa ilang mga anak​—ang katungod sa hingpit, walay-kataposang kinabuhi sa yuta. Sa dihang sila nakasala, sila dili na hingpit. Ang ila lamang nahipasa ngadto sa ilang mga anak mao ang sala ug kamatayon.​—Genesis 3:1-7; Roma 5:12.

Apan ikaw maghunahuna tingali: ‘Sanglit dako kaayo ang bayad, nganong gitugotan sa Diyos nga makasala si Adan ug si Eva? O nganong wala niya sumpoa ang ilang rebelyon una nila ikapasa ang kamatayon ug kagul-anan sa ilang mga anak​—ug sa atong mga anak?’

Nalangkit ang Usa ka Tibuok-Kalibotang Isyu

Gitugotan sa Diyos nga ang atong unang mga ginikanan mosupil tungod kay dili gayod niya katuyoan nga maglalang ug usa ka kalibotan sa mga automaton, mga linalang nga nag-alagad lamang sa Diyos tungod kay sila naprograma sa paghimo niana. Sama ni bisan kinsang ginikanan, buot sa Diyos nga ang iyang tawhanong mga anak magsugot kaniya tungod sa mga pagbati sa pagsalig ug gugma, dili pinugos. Gihatagan niya si Adan ug Eva ug igong hinungdan sa pagsalig ug paghigugma kaniya, apan sila misupil ug misalikway gihapon sa iyang pagmando.​—Genesis 1:28, 29; 2:15-17.

Ngano mang wala patya dihadiha sa Diyos ang mga rebelde? Napahayag na sa Diyos ang iyang katuyoan nga ang yuta may adlaw nga bug-os mapuy-an sa mga anak ni Adan ug Eva. Siya dili gayod mapakyas sa pagtuman sa iyang mga katuyoan. (Isaias 55:10, 11) Apan labing hinungdanon, ang usa ka bililhong gumonhap mitungha sa Eden. Ang Diyos may katungod ba sa pagmando ibabaw sa tawo, ug ang Iya bang paagi ang labing maayo, o ang tawo makamando ba sa iyang kaugalingon sa mas maayong paagi?

Ang bugtong paagi lamang sa pagtubag sa gumonhap sa makausa ug sa tanang panahon mao ang pagtugot sa tawo sa pagmando sa iyang kaugalingon. Ang kasaysayan nagtubag sa gumonhap sa makapasubong paagi. ang timawang mga sangpotanan sa tawhanong pagmando anaa sa atong palibot​—usa ka kalibotan diin ang kamatayon sa mga batang inosente maoy kasagaran, nga halos nalumos diha sa dagat sa ubang mga kadaotan. Kon wala may lain pa, ang unom ka libo ka tuig sa tawhanong pagmando nagpamatuod niini: Ang ideya nga ang tawo makamando sa iyang kaugalingon nga wala ang Diyos grabe pa kay sa makapasubong handurawan; kini usa ka dakong bakak. Samtang ang tawo magamando nga wala ang Diyos, ang tawo mabuhi ug mamatay diha sa kasakitan.

Si Jehova, ang mahigugmaon, matarong nga Diyos may mas maalamong pagpili. Sama kaayo sa paagi nga itugot sa usa ka ginikanan nga ang usa ka minahal nga anak makaagom sa masakit nga operasyon alang sa malipayon ug may-kahimsog nga kaugmaon sa bata, gitugotan sa Diyos nga ang tawo makaagom sa kasakitan sa pagmando sa kaugalingon alang sa walay-kataposang kaugmaon sa tawo. Ug maingon nga ang kasakitan sa usa ka operasyon dili molungtad sa walay kataposan, ang pagmando sa tawo ug ang iyang mga inhustisya duol nang matapos.

Sa dihang ang Gingharian sa Diyos magamando nga walay pagsupak ibabaw niining yutaa, ang minilyong mga bata pagabanhawon ug pagadawaton balik gikan sa mga patay. Sama sa mga ginikanan kansang mga anak gibanhaw ni Jesus sa unang siglo K.P., daghan unya “malipay sa tuman.” (Marcos 5:42; Lucas 8:56; Juan 5:28, 29) Ug sa dihang ang tanang tawo sa kataposan ipasig-uli sa hingpit nga kahimtang nga giwala ni Adan ug ni Eva, nan wala na unyay mamatay​—apil ang mga bata!​—Pinadayag 21:3, 4.

[Footnote]

[Blurb sa panid 27]

Minilyong bata ang pagabanhawon ug pagadawaton balik gikan sa mga patay