Unsay Anaa sa Usa ka Ngalan?
NASAYOD ka ba kon nganong gihatagan ka sa imong mga ginikanan ug ngalan? Sa panahon sa Bibliya ang mga ngalan sa tawo sagad nagbanaag ug pagtuo sa Diyos ug sa iyang mga saad. Pananglitan, ang ngalang Abraham, nga gihatag sa Diyos kaniya, nagkahulogang “Amahan sa usa ka Panon.” Si Ismael nagkahulogan nga ang “Diyos Namati (Nagpatalinghog).” Ug ang Jesus nagkahulogan nga “Si Jehova Kaluwasan.”
Diha sa kayutaan sa Aprika karong adlawa, ang paghatag ug ngalan sagad nagpabanaag sa relihiyosong mga pagtuo ug mga sukdanan. Kini ilabina gayod taliwala sa daghang mga Saksi ni Jehova sa Aprika.
Sa Nigeria usa ka dalaga ang miasoy: “Ang akong amahan nakakat-on sa kamatuoran sa Bibliya gikan sa mga Saksi ni Jehova usa ka tuig una pa ako gipanganak. Nianang samang tuig, ang librong Ang Kamatuoran nga Motultol sa Kinabuhing Dayon giluwat diha sa Ingles. Sa ulahi, halos dungan sa panahon sa pagpanganak kanako, ang librong Kamatuoran migula sa among Yoruba nga pinulongan. Tungod niana, ang akong amahan nagtuo nga haom nga paganganlan ako ug Truth.”
Ang laing Saksi ni Jehova, usa ka lalaki, miingon: “Ang akong papa nahimong Saksi sa tuig una pa ako gipanganak. Siya nagtrabaho sa usa ka dapit nga gidumala sa usa ka debotadong Katoliko, ug tungod sa iyang pagtuo, siya nawad-an sa iyang trabaho. Sa dihang ako gipanganak, siya walay trabaho ug gamay ra gayod ug kuwarta. Apan siya wala mawad-ig paglaom. ‘Ako nag-antos sa pagkawalay trabaho tungod sa akong pagkamaunongon sa Gingharian sa Diyos,’ siya miingon. Busa iya akong ginganlan ug Kingdom.”
“Ginganlan ako sa akong mga ginikanan ug Ifeanyichukwu, usa ka ngalang Igbo,” miingon ang laing batan-ong lalaki. Kana lisod litokon sa dili makasultig Igbo, busa gusto akog ngalan nga sayon litokon. Gusto usab akong moalagad sa Bethel [ang lokal nga sangang buhatan sa Watch Tower Society], ug ako dunay higala nga may ngalang Bethel. Busa gihangyo ko ang akong mga ginikanan kon mahimo ba nga ilisan ug ‘Bethel’ ang akong ngalan. Sila misugot.”
“Ang akong mga ginikanan maoy mga payunir [bug-os panahong mga alagad],” miasoy ang laing tawo nga taga Nigeria. “Gusto sa akong amahan nga nganlan ang usa sa ilang mga anak gikan sa ilang bokasyon. Mao nga nakabaton ako ug ngalang Pioneer. Sila naglaom nga ako usab makasinati sa dagayang mga panalangin sa bug-os panahong pag-alagad.”
Sa dihang ang usa ka membro sa Nagamandong Lawas sa mga Saksi ni Jehova miadto sa Côte ďIvoire niadtong Disyembre 1978, nahimamat niya ang usa ka igsoong babaye nga may usa ka batang gitawag Victorious Faith tungod kay siya gipanganak samtang ang inahan mitambong sa “Victorious Faith” nga Kombensiyon.
Sila si Truth, Kingdom, Bethel, ug Pioneer nag-alagad diha sa sangang buhatan sa Watch Tower Society sa Nigeria. Usab nag-alagad didto mao ang mga Saksi nga may mga ngalang sama sa Bible, Wisdom, Christian, Love, Innocent, Genesis, ug Blessing. Kining tanang Kristohanong mga ministro nagapanlimbasog sa paghupot ug maayong kadungganan, o ngalan, uban kang Jehova nga Diyos, nga kaniya utangan ang tanang pamilya sa langit ug yuta ug ngalan.—Itandi ang Efeso 3:14, 15.