Gikan sa Among mga Magbabasa
Tigpatalinghog Ang artikulong “Ikaw ba Usa ka Makigbation nga Tigpatalinghog?” (Disyembre 8, 1994) mao gayod ang akong gikinahanglan. Gisultihan ako sa usa ka higala sa daghang higayon nga dili siya makaangay sa dihang sultihan ko siya nga ang iyang problema dili ingon niana ka grabe ug dayon magpadayon sa paghatag kaniyag wala pangayoang tambag. Sa tinuod, ako naghunahuna nga dili maayo ang iyang tinamdan. Karon nakita ko nga ako nasayop!
S. H., Tinipong Bansa
Ako nagpaabot ug usa ka artikulo nga sama niini, apan kini milabaw sa tanan kong mga pagdahom. Masubsob, gipakamenos nato ang importansiya sa pagkahibalo kon unsaon pagpatalinghog. Bisan pa, kadaghanan kanato nangandoy nga makadawat sa maong pagtagad sa atong kaugalingon.
S. D., Italya
Ako 18 anyos, ug ako sagad makakaplag sa akong kaugalingon nga dili mahibalo kon unsay isulti sa pipila ka situwasyon. Apan human mabasa ang maong maanindot nga artikulo, gibati ko nga ako mahimong makigbation nga tigpatalinghog.
J. M., Australia
Maayong mahibalo nga dili kinahanglan natong sulbaron ang matag problema nga atong madunggan apan sagad ang pagpatalinghog igo na. Ilabina alang kanato nga gikan sa mga pamilya nga may problema nga kinahanglang makakat-on sa pangunang mga katakos sa komunikasyon. Salamat sa padayong paggamit sa Bibliya sa pagtudlo kanamo kon unsaon sa pagkinabuhi.
J. D., Tinipong Bansa
Napauswag nga Buhat sa Arte Ako nagtuon ug visual design sa tunghaan. Sa samang panahon, nagtuon ako ug Bibliya uban sa mga Saksi ni Jehova. Apan sa dihang ako magdalag Pagmata! sa tunghaan, sawayon sa akong kaubang mga estudyante ang desinyo niini—nga ang ‘kolor’ dili maayo ug uban pa. Apan, sa bag-o pang mga bulan ang mga desinyo sa pagkatinuod talagsaon. Ako magarbohon gayod sa mga magasin!
N. I., Hapon
Nadaot nga Atmospera Mao pay pagkatapos nako pagbasa sa artikulong “Sa Dihang Madaot ang Atong Atmospera” ug nalingaw gayod niana. (Disyembre 22, 1994) Tinong kamo adunay linaing katakos sa pagpili ug makahuloganong mga ulohan nga pagasulaton. Sa daghang panahon, hinunoa, naghisgot kamo ug tibuok yutang pag-init apan walay gihatag nga pamatuod. Pagbantay! Kon usa ka adlaw mapamatud-an nga walay tibuok yutang pag-init, ang inyong pagpanulat mahimong maduhaduhaan.
M. L., Tinipong Bansa
Wala kami magduso sa teoriya sa tibuok yutang pag-init apan yanong nagtaho lamang sa kamatuoran nga daghang tinamod nga mga siyentipiko nagtuo niini nga nagakahitabo. Kon ang kontrobersiyal nga teoriya mapamatud-an o dili pinaagi sa dugang panukiduki nagpabiling tan-awonon pa.—ED.
Mga “Class Trip” Nalipay ako sa pagbasa sa inyong artikulong “Mga Batan-on Nangutana . . . Komosta na man ang Bahin sa mga ‘Class Trip’?” (Oktubre 22, 1994) Sa daghang tuig nga miagi ang among klase nagplano ug usa ka semanang biyahe. Human namalandong niana diha sa pag-ampo, mihukom ako sa dili pag-uban. Sa dihang namauli ang klase, nahibaloan ko nga ubay-ubay sa akong mga klasmet nakahimog seksuwal nga imoralidad. Sa pagkatinuod, ang maong mga biyahe mahimong lisod gayod nga pagsulay alang sa batan-ong Kristohanon.
J. S., Norway
Ang artikulo nakatabang gayod kanako tungod kay ako nakaagi nag daghang field trip. Ang mga pangutana nga inyong gitanyag makahimo sa usa ka batan-on sa pag-analisar sa kahimtang. Salamat sa pagtabang kanako nga ibutang ang mga class trip sa hustong panglantaw.
M. R., Tinipong Bansa
Sa dili pa dugay gidapit ako sa pag-uban sa usa ka class trip ngadto sa usa ka dapit nga dugay ko nang gustong makita. Mihukom ako sa dili pag-uban sa biyahe, bisag nakapalit na ako ug tiket. Sa ulahi misugod ako sa pagpalandong bahin sa nawala kanako. Apan miabot ang inyong artikulo sa hustong panahon. Human makabasa niana, ako segurado nga nakahimo akog hustong desisyon.
L. S. B., Brazil