1995​—Komosta ang Atong Umaabot?

“Ang kalibotan nagkinahanglag usa ka giya nga mas maayo kay sa yanong mga panghaylo sa demokrasya ug mga baligyaan—​apan dili kana ikatagana.”​—Will Hutton, Guardian Weekly.

GIKAN sa tawhanong panglantaw, ang maong pahayag tingali tinuod. Ang kalibotan daw wala makabatog usa ka kasaligang giya nga mopunting sa direksiyon paingon sa kalinaw, kasegurohan, hustisya, panag-angay, ug maayong kagamhanan. Ang tawo nakasulay sa hapit matag sistema sa kagamhanan, gikan sa mga monarkiya ngadto sa mga republika, gikan sa mga diktador nga pagmando ngadto sa mga demokrasya, ug sa gihapon iyang nakaplagang ang iyang kalibotan halos dili magamhan. Asa man siya karon angay modangop?

Daw adunay kapilian​—ang alagianan paubos ngadto sa kalibotan nga may dugang kabangisan, krimen, kahiwian, inhustisya, relihiyoso ug politikanhong pagkasalingkapaw, nasyonalistikanhong pagdumot, ug pagpanghimulos sa mga kabos. Kana ang alagianan nga giingon sa pipila nga mosangpot sa anarkiya.

O anaa ang hago, nagsakripisyo-sa-kaugalingong pagtungas paingon sa mas maayong kalibotan nga gipasukad sa solusyon sa Diyos alang sa kagamhanan, nga hikaplagan diha sa Bibliya. Hago kini tungod kay nagkinahanglan kinig moral nga kaisog, personal nga pagsakripisyo, espirituwal nga panglantaw sa kinabuhi, ug pagtuo sa Diyos nga may katuyoan. Apan aron magmalamposon ang maong pagtungas ang tawo kinahanglang mahimong mapainubsanon usab​—mapainubsanon atubangan sa iyang Maglalalang. Kinahanglang modangop siya sa Diyos alang sa matarong nga pagmando. Ang Kristohanong apostol Pedro mitambag: “Busa, ipaubos ang inyong kaugalingon ilalom sa gamhanang kamot sa Diyos, aron nga iya kamong bayawon sa takdang panahon; samtang inyong ginatugyan kaniya ang tanan ninyong mga kabalaka, kay siya aduna may kahangawa kaninyo.”​—1 Pedro 5:​6, 7; Pinadayag 4:11.

Kinsay Nagaimpluwensiya sa Katawhan Aron Magmadinumtanon?

Ang tawo sa kaugalingon dili makausob sa dayon niining kalibotana aron magmaayo​—ang hakog, daotang mga elemento daghan kaayo ug gamhanan kaayo. Si propetang Jeremias husto sa misulat siya: “Nahibalo ako pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang tikang.” (Jeremias 10:23) Kon wala ang Diyos, ang tawo dili makatultol nga malamposon sa iyang mga tikang sa kaayohan sa tibuok tawhanong pamilya. Ngano man kana? Tungod kay dugang sa atong dala-sa-pagkatawong kadili-hingpit anaa kanunay kanang dili-makitang kaaway si Satanas, kinsa andam sa pag-impluwensiya, sama sa iyang gibuhat sa Rwanda, nga gipahinabong magpatuyang ang katawhan sa madugoong panagbangi.​—Genesis 8:21; Mateo 4:​1-11.

Aron sa pagsiba sa pagkamapihigon, pagdumot, ug pagbuno diha sa mga kasingkasing ug mga hunahuna sa katawhan, gisilsil ni Satanas diha sa mga nasod ang mga ideya sa nasodnon, tribonhon, ug relihiyosong pagkalabaw. Kining dulot nga pag-edukar sa pagdumot gitanom na sukad sa pagkabata sa mga ginikanan kansang mga kaisipan sirado na niana, subsob tungod sa kasiglohan sa tradisyon. Unya ang maong tradisyon gipalig-on sa mga sistema sa tunghaan ug relihiyosong mga pagtulon-an. Sa ingon ang minilyong tawo gimatuto nga may pagdumot ug pagkamapihigon diha sa ilang mga kasingkasing. Sila nakondisyon, nadoktrinahan sukad sa pagkabata, sa pagbatok sa ilang isigkatawo sa mando sa way-konsensiyang politikanhon ug relihiyosong mga pangulo. Ang pagbugag di-makataronganong mga panultihon ug mga sibya makapaimpluwensiya, makapahinabog kahimtang nga tuling mokaylap, nga mosangko sa usa ka “etnikong panglimpisa” o usa ka organisadong paglaglag.

Sa pagpaila kon unsa tingali ang duol nga umaabot, si Martin van Creveld, usa ka militaryong historyano sa Israel, misulat diha sa The Transformation of War: “Gikan sa bantaaw nga bahin sa panahon karon, mopatim-aw nga adunay tanang kalaoman nga ang relihiyosong . . . mga pagkapanatiko modulag dakodakong bahin sa panukmod sa armadong panag-away” sa Kasadpan kay sa bisan unsang panahon “sulod sa miaging 300 ka tuig.” Sa ingon ang relihiyon, inay nga usa ka puwersa alang sa kalinaw ug pagbayaw sa espirituwalidad sa katawhan, walay kausaban sa makasaysayanhong papel niini sa paghagit sa panagdumot, panagbangi, ug pagpatay.

Usa ka Lahing Umaabot Gisaad

Aron mahimong takos ang katawhan sa kinabuhi sa usa ka matarong nga bag-ong kalibotan, nan kinahanglang sila makigbahin sa pagtuman sa tagna ni Isaias: “Siya [Jehova] magatudlo kanato mahitungod sa iyang mga dalan, ug kita magalakaw sa iyang mga alagianan. . . . Ug siya magahukom gayod taliwala sa mga nasod ug magatul-id sa mga butang may kalabotan sa daghang katawhan. Ug sila magasalsal sa ilang mga espada ngadto sa mga punta sa daro ug sa ilang mga bangkaw ngadto sa mga galab. Ang nasod dili mobakyaw ug espada batok sa nasod, ni sila makakat-on pa ug gubat.”​—Isaias 2:​3, 4.

Kinsay nagapamati karong adlawa niining talagsaong tagna sa tibuok kalibotan? Kinsa ba ang nangamatay sa Rwanda inay mopatay sa ilang isigkamagtutuo sa usa ka laing tribo? Kinsa ang nangamatay sa mga kampo konsentrasyon sa Nazi inay moalagad sa kasundalohan ni Hitler? Kinsay migugol ug panahon sa mga bilanggoan sa daghang nasod inay makakat-on sa gubat? Sila mao kadtong nagpahimulos sa katumanan sa Isaias 54:13: “Ang tanan nimong mga anak mao unyay mga tawo nga tinudloan ni Jehova, ug ang pakigdait sa imong mga anak magmadagayaon.”

Ang mga Saksi ni Jehova sa tibuok kalibotan nagbaton sa maong pakigdait karon tungod kay ilang gidawat ang pagtulon-an ni Jehova gikan sa iyang Pulong, ang Bibliya. Ginasunod nila ang mga pagtulon-an ug panig-ingnan ni Kristo Jesus. Ug unsay iyang giingon? “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:​34, 35) Ginapadapat sa mga Saksi ni Jehova kining gugmaha sa dakong paagi nga, bisan pag kanhi mga Katoliko ug mga Protestante, sila karon nagabuhat nga nagkahiusa sa Amihanang Irlandia. Bisan pag kaniadto relihiyosong mga kaaway, sila karon nagtinabangay ingong mga Kristohanon sa Israel, Lebanon, ug ubang mga nasod. Wala na sila magtuon sa pakiggubat. Pagkadako unta sa kalainan kon ang tanang katawhan sa kalibotan mamati sa mga pulong ni Jesus ug magpadapat niana diha sa ilang mga kinabuhi!

Ang mga Saksi ni Jehova nagtuo nga ang gisaad nga bag-ong kalibotan sa Diyos duol na, usa ka kalibotan nga pagamandoan sa usa ka langitnong kagamhanan. Unsa ang ilang pasikaranan sa maong positibong paglaom?

Gisaad nga Mahukmanong Paglihok sa Diyos

Diha sa iyang Pulong, ang Bibliya, ang Diyos nagsaad ug usa ka matarong nga pagmando alang sa tanang masinugtanong katawhan. Pinaagi sa iyang propetang si Daniel, siya mitagna nga sa panahon sa kataposan niining sistema karon, iyang tukoron ang usa ka permanente ug matarong nga kagamhanan. “Sa mga adlaw nianang mga haria ang Diyos sa langit magatukod ug usa ka gingharian nga dili gayod malaglag. Ug ang gingharian mismo dili igahatag ngadto sa ubang katawhan. Kini magadugmok ug magatapos niining tanang gingharian, ug kini mismo mobarog sa panahong walay tino.” (Daniel 2:44) Kini ang samang Gingharianong pagmando nga gitudlo ni Kristo sa mga magtutuo nga pangayoon diha sa iyang bantog nga pag-ampo: “Amahan namo sa mga langit, balaana ang imong ngalan. Paanhia ang imong gingharian. Matuman ang imong kabubut-on, ingon sa langit, mao usab sa yuta.”​—Mateo 6:​9, 10.

Nianang pag-ampoa atong ginahangyo ang Diyos nga tumanon ang iyang mga saad mahitungod sa iyang matarong nga pagmando. Ug kita nahibalo nga ang Diyos dili makabakak. Si Pablo naghisgot bahin sa “kinabuhing walay kataposan nga gisaad sa Diyos, si kinsa dili makabakak, sa wala pa ang kapanahonan nga dugay nang naglungtad.” (Tito 1:2; Hebreohanon 6:​17, 18) Ug unsay gisaad sa Diyos? Si apostol Pedro nagtubag: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.”​—2 Pedro 3:13; Isaias 65:17; Pinadayag 21:​1-4.

Sa dili pa bug-os mapabilhan ang maong matarong nga pagmando dinhi sa yuta, kinahanglang mahitabo ang dakong pagpanghinlo. Ang mga tagna sa Bibliya nagkatapo sa pagpailang kining lihok aron hinloan ang kalibotan kang Satanas ug sa iyang daotang mga puwersa duol nang mahitabo. (Tan-awa ang Mateo, kapitulo 24; Lucas, kapitulo 21; ug Marcos, kapitulo 13.) Kining kataposang buhat sa paghinlo gitawag ang gubat sa Armageddon, “ang gubat sa dakong adlaw sa Diyos nga Labing Gamhanan.”​—Pinadayag 16:​14, 16.

Bisan pa kon unsay hunahunaon tingali sa daghan, ang tuig 2000 dili makahuloganon. Kon buot sabton, kanang petsaha katuohan lamang alang sa Kakristiyanohan. Ang ubang mga kultura adunay ilang kaugalingong mga sistema sa pagpetsa. Ang makahuloganon mao nga karon mao na ang panahon sa pagdangop sa Diyos ug sa iyang Pulong aron susihon sa imong kaugalingon kon unsa “ang maayo ug dalawaton ug hingpit nga kabubut-on sa Diyos.” (Roma 12:​1, 2) Ang hinungdanon mao nga karon mao na ang panahon nga ikaw magpili​—kon molakaw paingon sa usa ka umaabot nga binulahan sa Diyos o mopadayon pagsubay sa agianan sa kapakyasan nga ginatanyag sa kalibotan ni Satanas. Giawhag ka namo sa pagpili sa dalan sa Diyos. Pilia ang kinabuhi!​—Deuteronomio 30:​15, 16.

[Blurb sa panid 14]

“Adunay bag-ong mga langit ug usa ka bag-ong yuta nga atong ginapaabot sumala sa iyang saad.”—2 Pedro 3:13

[Hulagway sa panid 13]

Ang mga nasod tinuod nga makasalsal sa ilang mga espada ngadto sa mga punta sa daro ubos lamang sa pagmando sa Gingharian sa Diyos