Pagpakigsultihay Pinaagig Senyas sa mga Kamot
SUGOD sa Hunyo 1995 ug padayon sa tibuok ting-init, ang mga Saksi ni Jehova sa teritoryo sa sangang buhatan sa Tinipong Bansa naghimog 181 ka distritong mga kombensiyon nga nag-ulohang “Malipayong mga Magdadayeg.” Sa duha niini—usa sa sidlakan ug ang lain sa kasadpan—ang tibuok nga programa gipresentar nga laktod sa Amerikanhong Senyas nga Pinulongan. Busa ang katin-aw sa programa misamot pag-ayo—kay ang laktod nga presentasyon ngadto sa mga bungol ginamit ang senyas nga pinulongan mas masabtan kay sa paghubad sa gisulti nga pulong.
Ang mga delegado mitambong gikan sa 11 ka kongregasyon nga naggamit ug senyas nga pinulongan ug mga 30 ka grupo nga senyas ang pinulongan sa tibuok Tinipong Bansa. Apan mitambong usab ang mga delegado gikan sa Alemanya, Britanya, Canada, Denmark, Ecuador, Hapon, Mexico, Norway, Puerto Rico, Republika sa Dominica, ug Rusya. Busa, adunay internasyonal nga kahimtang.
Ang mga monitor sa video gihikay aron ang programa makita sa closed-circuit nga telebisyon. Bisan pa niana, daghang delegado ang parehong bungol ug buta. Sa unsang paagi kining mga tawhana makabenepisyo sa programa? Tinuod nga makapatandog ang pagkakita sa kapin sa usa ka gatos ka boluntaryo nga nagpulipuli sa pagkomunikar sa programa matag adlaw ngadto kanila pinaagi sa tactile (paghikap) nga hubad.
Niining duha ka kombensiyon, 36 ang nagpasimbolo sa ilang pahinungod kang Jehova nga Diyos pinaagi sa pagpabawtismo. Ang laing haylayt mao ang drama, Pagtahod sa mga Takos sa Ilang Katuigan sa Pagkatigulang. Pagkakulbahinam nga kining maong drama gipresentar sa bug-os diha sa senyas nga pinulongan, nga nagtugot sa mga bungol nga membro nga makabaton ug dakong bahin sa presentasyon!
Unya giluwatan ang bag-ong giya sa pagtuon sa Bibliya, Kahibalo nga Motultol sa Kinabuhing Walay Kataposan. Ang mga kombensiyonista ilabinang nalipay sa pagkasayod nga ang senyas-nga-pinulongang hubad niining libroha gihimo nang mabatonan diha sa videotape! Ang Tomo I, nga giluwatan sa kombensiyon, naundan sa unang tulo ka kapitulo. Ang lima pa ka laing mga tomo mosunod. “Pagkamapasalamaton namo niining bag-ong video,” matod sa usa ka delegado gikan sa Ohio. “Kini makatabang kanamo sa pagpadali sa buluhaton diha sa mga teritoryo nga may mga bungol.”
Ang 2,621 nga mitambong niining duha ka kombensiyon mipauli nga napalagsik sa espirituwal. Labi pa sukad masukad, sila determinado sa pagpalanog sa mga pulong sa salmista: “Ang tanang buhing butang—padayega kang Jah. Dayega si Jah, kamong katawhan!”—Salmo 150:6.