Ang Bungol Nagadayeg Kang Jehova

SINULAT SA KORESPONSAL SA PAGMATA! SA NIGERIA

SA DAGHANG tuig malisod alang sa mga Saksi ni Jehova sa Nigeria ang pagtudlo sa Bibliya ngadto sa bungol nga mga tawo. Tungod kini kay diyutay lamang sa mga Saksi ang nahibalo sa senyas nga pinulongan. Apan kana nagkausab. Dugang ug dugang mga Saksi ang nakakat-on sa pagsenyas ug nagasangyaw sa bungol nga populasyon. Ang dakong lakang niini nga kahimoan mao ang distritong kombensiyon sa mga Saksi ni Jehova nga gihimo sa Nigeria kapin sa usa ka tuig nga miagi.

“Imong mabati ang kaukyab sa palibot,” nag-ingon ang usa ka delegado sa maong kombensiyon, sa Ota, Nigeria. “Dihay usa ka pagbati sa kahingangha, usa ka pagbati sa kahibulong,” matod pa sa lain. Unsay nagpahinabo sa maong mga pagbati? Sa unang higayon sa Nigeria, ang tibuok nga programa gihubad pinaagig pagsenyas. Kini mao lamang ang bugtong kombensiyon sa mga 96 nga gihimo sa tibuok nasod sa panahon sa tuig nga ang tibuok nga programa gihubad pinaagig pagsenyas.

Lakip sa libolibong mitambong mao ang 43 ka bungol nga mga delegado, nga naglingkod sa wala sa plataporma, diha sa seksiyon sa atubangan. Ibabaw kanila nagbitay ang usa ka dakong puting tabla nga may pulang mga letra nga mabasa, “Senyas nga Pinulongan.” Ang bungol nga mga delegado nalipay nga atua didto. Usa kanila misulat: “Uban sa tugob nga kalipay ug luhaang mga mata nga ako nagsulat. Niining bag-o lamang gibati namo ang kahigawad samtang among nahibaloan nga ang espirituwal nga mga tagana gihimo alang sa among bungol nga mga isigka-Kristohanon sa ubang kayutaan. Kami walay kalibotan nga ang samang panalangin moabot kanamo dinhi.”

Kinsay Mitambong?

Ang bungol nga mga tawo naggikan sa tanang bahin sa Nigeria. Usa ka bungol nga Saksi nagdala ug tulo sa iyang bungol nga mga tinun-an sa Bibliya. Ang laing grupo sa mga bungol, nga mibiyaheg 700 kilometros matag panaw, nagtigom ug pamilite sulod sa pito ka bulan. Ugaling, sa dihang miabot ang panahon sa pagbiyahe, sila wala makaabang ug kasakyan gikan sa kompaniya sa estado sanglit kadto maoy panahon nga pista opisyal. Sa dihang ang kagamhanan sa estado nasayod sa ilang kalisod, kini naghatag kanila ug 13,000 naira ($152, T.B.) agig tabang sa pagkuhag alternatibong kasakyan!

Ang mga pamilya nga may bungol nga kabataan mibiyahe sa pagtambong niining talagsaong kombensiyon. Usa ka babaye gikan sa balangay nakadungog bahin sa kombensiyon ug miabot duyog sa iyang bungol nga anak nga lalaki. Siya ug ang iyang anak wala kaayoy nahibaloan sa pagsenyas. Nakahilak sa ilang nakita, sila karon determinado sa pagkakat-on sa pagsenyas.

Sa libolibo nga mitambong, ang uban naggikan sa gilay-ong gatosan ka kilometros aron lang makita kon sa unsang paagi ang mga bungol “makadungog” sa programa. Ang mitambong sa Dominggo maoy 13,936​—ang kinatas-an sa bisan hain sa 96 ka distritong kombensiyon sa Nigeria. Ang bungol nga mga delegado nalipay nga mahimong bahin niana nga panon.

Nakadayeg ang mga Nagpakakita

Daghan sa mga bungol “nakadungog” sa maayong balita pinaagig pagsenyas sa unang higayon. Ug kadtong makadungog nakakita sa pagsenyas sa unang higayon. Usa ka delegado miingon nga nahibulong siya nga makitang ang tanan diha sa programa gihubad​—mga awit, mga pag-ampo, mga pahibalo, ug bisan ang drama! “Kini makapakugang gayod,” matod sa lain.

Ang kalipay sa bungol nga mga delegado gipabanaag diha sa ilang pag-awit. Nga madasigon, gigamit nila ang ilang mga kamot sa pagdayeg kang Jehova. Alang sa mga makadungog, ang pagkakita sa bungol nga “nagaawit” maoy labing makapatandog nga kasinatian. Kini nagpaluha sa daghang mata. Usa ka delegado nadungog nga mipatugbaw, “Oh Jehova!” diha sa mapabilhong kahibulong. Kas-a, sa dihang natapos ang awit, kadtong naglingkod duol sa senyas-pinulongang seksiyon dungang namakpak.

Human sa pakigpulong sa bawtismo, samtang ang mga kandidato sa bawtismo nanindog, usa ka bayongbayong diha sa senyas-pinulongang seksiyon mitindog usab. Ang mga hungihong sa pagpabili nadungog diha sa mamiminaw sa dihang siya misenyas ug “oo” sa pagtubag sa duha ka pangutana nga gisukna sa mamumulong.

Pagkadako sa kalipay sa bungol nga mga delegado nga mahimamat ang ilang espirituwal nga mga igsoong lalaki ug babaye gikan sa ubang mga bahin sa nasod! Ang mga bukton ug mga tudlo naglihok nga maukyabon samtang ang bungol naghimamatay sa usag usa. Dihay daghang paglamanohay ug pagbayloay ug mga adres.

Siyam ka maghuhubad (tigsenyas) miabot gikan sa nagkalainlaing mga bahin sa nasod. Maanindot nga tan-awon samtang ang ilang mga tudlo ug mga kamot maanindot nga nagsenyas sa tanang pakigpulong ug mga awit. Tungod sa ilang mga paningkamot sila gigantihan pinaagig mga gakos, mga lamano, ug komendasyon. Sila gihugopan ug mga pangutana usab: Giunsa nimo pagkakat-on? Unsaon nako pagkakat-on? Aduna bay mga libro nga nagtudlo sa pagsenyas?

Usa ka Bag-ong Natad Nabuksan

Alang sa bungol, ang haylayt sa kombensiyon mao ang pagluwat sa videotape sa senyas-pinulongang bersiyon sa librong Kahibalo nga Motultol sa Kinabuhing Walay Kataposan. Daghan ang giawhag sa pagkat-on sa pagsenyas ug, uban sa tabang niining tabang sa pagtudlo, sa pag-abot sa mga bungol sa tibuok Nigeria. Ang kombensiyon nagpadeterminado sa daghan sa pagbuhat sa ingon.

“Sa miagi sa dihang kami makahibalag ug tawong bungol diha sa ministeryo sa kanataran, kami mopadayon lang sa sunod nga balay,” matod sa usa ka igsoong babaye. “Karon, kami nahibalo na kon unsay buhaton.” Pinaagi sa gibanabanang lima ka milyong bungol nga taga-Nigeria, aduna pa gayoy dakong potensiyal. Usa ka brader nag-ingon: “Kini maoy sinugdanan. Karon kinahanglan natong tikaron kining talagsaong bag-ong natad.”

Sa mga bulan sukad sa kombensiyon, kana mao gayod ang nahitabo. Ang duyog nga mga paningkamot ginahimo sa pagtudlo sa mga kamatuoran sa Pulong sa Diyos ngadto sa milyonmilyong bungol sa Nigeria. Kini usab sila kinahanglang makakat-on bahin sa maayong balita sa umaabot nga bag-ong kalibotan ubos sa Gingharian sa Diyos, kay didto ang milagrosong pagpang-ayo mahitabo ug “ang mismong mga igdulungog sa mga bungol mabuksan.”​—Isaias 35:5.