Pagpaminaw Pinaagi sa Imong mga Mata

UNSA ang usa ka yawi sa kalamposan sa epektibong pagpakigsulti sa usa ka Bungol? Ang tin-aw ug haom nga pagtinan-away. Kinahanglanon kini sa dihang ang mga Bungol nagasulti. Sa pagkatinuod, kon ang duha ka tawo nag-estoryahanay diha sa gisenyas nga pinulongan, giisip nga dili-maayong pamatasan kon ang usa kanila molingiw ug moputol sa pagtinan-away. Ug unsaon nimo pagkuha ang pagtagad sa Bungol? Inay gamiton ang ngalan sa maong tawo, mas haom nga kabliton siya ug hinay sa abaga o bukton, mowarawara sa kamot nga makita niya o, kon layo, mosenyas sa laing tawo nga kuhaon ang pagtagad sa Bungol. Depende sa kahimtang, mahimo nimong tuktokon ang salog o pasigaon ug palongon ang mga suga. Kini ug ang ubang haom nga makapakuha-sa-pagtagad nga mga pamaagi maghingpit sa kasinatian sa mga Bungol ug maoy bahin sa kultura sa Bungol.

Ang Naghiusang Bugkos sa Pinulongan

Sa dihang makahibalag ug Bungol, ang uban sayop nga mihinapos nga sayon nga tahas ang pagbasa sa ngabil. Apan, daghang Bungol ang nag-isip niini nga usa ka limitado kaayong paagi sa pagpakigsulti. Siyempre, dunay mga eksepsiyon, sanglit ang pipila ka indibiduwal hanas kaayo sa pagbasa sa sinultihan, apan kasagaran maluloton nga dili maghunahunang daan nga ang usa dali rang makabasa sa imong mga ngabil. Tingali ang paggamit ug usa ka tighubad o ang pagsulat diha sa papel kon unsay buot nimong isulti makapahinabo ug makahuloganong pagpakigsulti.

Bisan pa niana, kon ikaw kanunayng makahibalag ug mga Bungol, dili ba mahunahunaon ang pagtuon ug gisenyas nga pinulongan? Pagkakahibulongang bugkos ang ipatungha niini, ilabina taliwala niadtong parehas ug pagtuo! Susama kini sa pagtuon sa mga paninugdan sa ubang pinulongan diha sa duhay-pinulongang kultura. Ang mga Saksi ni Jehova dugay nang nagmaikagon nga mabatonan sa tanan ang impormasyon bahin kang Jehova nga Diyos. Kon atong ilhon nga ang mga Bungol dili makakat-on sa pagbaton ug normal nga pandungog, pagkalabing maayo kon mopahiuyon kita kanila pinaagi sa paggamit sa gisenyas nga pinulongan!​—1 Corinto 9:20-22.

Si Antonino nag-ingon nga sa dihang nagsugod siya sa pagtambong sa Kristohanong mga tigom sa Italya, sa sinugdan “walay tinuoray ug aktibong pagdinasigay diha sa mga pakig-estoryahanay uban sa mga igsoong makadungog. Tungod kay dili kami magkasinabtanay, mibati akong nahilain.” Daghang membro sa kongregasyon ang misanong pinaagi sa pagtuon sa Italian Sign Language (LIS). Ang interesadong mga Bungol nagsugod pagtuon sa Bibliya, ug ang mga tigom gidumala diha sa LIS. Si Antonino nadasig ug karon nagtinguha “sa pagpakigsulti sa tanan nakong Bungol nga mga higala bahin sa among mga tigom ug sa mainit nga gugma nga naglungtad taliwala sa katawhan ni Jehova.”

Sa tibuok kalibotan ang mga Saksi ni Jehova nagtukod ug mga kongregasyon sa senyas nga pinulongan, diin ang mga Bungol makapahimulos sa mainit ug mahigugmaong pakig-ubanay sa usag usa. Sa Espanya, ang mga grupo sa senyas nga pinulongan alang sa mga Bungol naglungtad na sulod sa kapin sa 20 ka tuig. Sa Tinipong Bansa, sa pagkakaron dunay 19 ka aktibong mga kongregasyon alang sa mga Bungol ug 47 ka gagmayng mga grupo.

Ang mga Bungol makaalagad ingong bug-os-panahong mga ministro (mga payunir), ministeryal nga mga alagad, ug mga ansiyano maingon man usab makapakigpulong diha sa mga kombensiyon, makatudlo diha sa mga Tunghaan sa Payunir nga Pag-alagad, ug makapanguna diha sa nagkalainlaing mga paagi. Niini nga palibot walay limitasyon, mga kahigayonan lamang sa pagdayeg kang Jehova ginamit ang mga katakos sa usa.

Ang atong kinaiyanhong panginahanglan sa pagpakig-uban ug pagpakigsulti gipahayag pinaagi sa daghang kultura ug mga pinulongan sa tibuok kalibotan. Inay lantawon ang mga Bungol nga nakulangan o dunay apan, pagkalabing maayo kon lantawon nato ang mga kalamposan, mga katakos, ug mga hiyas nga naghimo kanatong tanan nga tawo! Pinaagi sa atong pagtahod sa uban ug sa atong pagkaandam sa pagpahiuyon, kitang tanan makaamot ngadto sa usa ka nagkadaiya apan nahiusang tawhanong pamilya.

[Hulagway sa panid 24]

Sa dihang makig-estorya sa gisenyas nga pinulongan, magtinan-away kanunay

[Hulagway sa panid 24]

Ang mga bungol malipayong nag-alagad ingong bug-os-panahong mga ministro

[Hulagway sa panid 25]

Pagsenyas sa mga awit sa Gingharian sa Espanya

[Hulagway sa panid 25]

Pagpakigpulong diha sa usa ka kombensiyon sa Korean Sign Language

[Hulagway sa panid 25]

Binase-sa-Bibliyang mga publikasyon nga gihulagway sa senyas nga pinulongan diha sa video