Hapit na Bang Matapos ang mga Relihiyon sa Kalibotan?

SINULAT SA KORESPONSAL SA PAGMATA! SA SWEDEN

KINI bang maong ulohan nakapahibulong kanimo: ‘Sa unsang paagi mahitabo kana? Dili ba ang mga relihiyon sa kalibotan may igong kalig-on ug impluwensiya sa tibuok yuta karong adlawa?’

Oo, bisan pag nagsagubang sa daghang suliran, daw ingon gihapon sila niana. Niining ika-20ng siglo, ang relihiyon gikaduhaduhaan ug giyagyag nga labi pa kay sukad masukad sa kasaysayan sa tawo. Ang mga astronomo nagsuhid sa uniberso ginamit ang ilang dagkong mga teleskopyo, ug ang mga astronot naglataslatas sa wanang; ug ingon sa pagpahayag niini sa usa ka Sobyet nga kosmonot, wala silay makitang “Diyos o mga manulonda.” Ang mga pisiko nagbungkag sa materya ngadto sa mas gagmay ug gagmay pang mga tipik nga wala makadiskobre ug bisan unsang gahom sa Diyos nga nagpatungha sa kinabuhi. Ang mga biologo ug mga paleontologo nangangkon nga gitukod nila pag-usab ang hataas nga kutay sa pagbag-obag-o sa kinabuhi, gikan sa ameba ngadto sa tawo, nga wala makakita sa kinagamyang kalambigitan sa usa ka maglalalang bisan asa ubay sa maong kutay.

Bisan pa niana, ang sekular nga kaalam ug materyalistikanhong pilosopiya napakyas sa pagpapas sa relihiyosong sentimento gikan niining planetaha, ug ang ateyistikong politikanhong mga gahom ug mga pilosopiya wala usab molampos. Sulod sa kapin sa 70 ka tuig, ang totalitaryan, ateyistikong Komunismo nagtawag sa relihiyon ingong patuotuo ug “ang opyum sa katawhan,” nagtaktak sa relihiyosong mga lider gikan sa ilang mga katungdanan ug nagdili sa ilang mga kalihokan, naglaglag o naglungkab sa mga simbahan ug mga templo, ug nag-usab sa hunahuna ug tinamdan ug nagpatay sa mga magsisimba. Bisan pa niana, ang maong mga buhat wala gayod magwagtang sa relihiyosong sentimento. Sa dihang nahugno ang maong mga gobyerno, ang relihiyon mibangon gikan sa kaulawan uban sa daw nabag-ong kalagsik. Sa mga nasod nga kanhing Komunista, ang mga tawo nanagganayan na usab paingon sa ilang karaang mga templo, nga nanagluhod uban ang debotadong pagsimba sama sa gibuhat sa ilang katigulangan una kanila.

Ang relihiyosong sentimento mainiton pa gihapon sa ubang mga dapit sa kalibotan. Kada tuig ang siyudad sa Mecca, sa Saudi Arabia, nagdawat sa minilyong Muslim nga mga peregrino gikan sa tibuok yuta. Ang St. Peter’s Square sa Batikano subsob nga nagsugwak sa Katolikong mga magtutuo nga gustong motan-aw sa papa ug nanghinaot nga makadawat sa iyang bendisyon. Minilyong Hindu nga mga debotos nagpadayon sa pagganayan ngadto sa gatosang dapit nga duawanan sa mga peregrino diha sa mga tampi sa “balaang” mga suba sa India. Ang relihiyosong mga Hudiyo nanagpanon ngadto sa Wailing Wall sa Jerusalem aron mag-ampo ug magbilin sa ilang sinulat nga mga pag-ampo diha sa mga liki sa pader.

Oo, daw imposibleng wad-on ang relihiyon gikan sa katawhan. “Pinaagi sa iyang pagkahulma ang tawo maoy usa ka relihiyosong hayop,” matod sa Irlandes nga estadistang si Edmund Burke. Sumala sa estadistika, 5 sa 6 ka indibiduwal sa yuta kapin kon kulang ang nalangkit sa usa ka relihiyon. Sumala sa bag-ong mga ihap, adunay duolan sa 4.9 ka bilyong sumusunod sa naestablisar nga relihiyon sa kalibotan, samtang adunay mga 842 ka milyon lamang nga dili-relihiyosong mga tawo.a

Sa pagkonsiderar niini, makataronganon ba ang pagtuo nga ang mga relihiyon sa kalibotan hapit nang matapos? Ug kon mao man, kanus-a ug sa unsang paagi masinati nila kana? May mahibilin pa bang relihiyon? Konsiderahon nato kining mga pangutanaha sa mosunod nga duha ka artikulo.

[Footnote]

[Hulagway sa panid 3]

St. Peter’s Square, Siyudad sa Batikano