Gikan sa Among mga Magbabasa
Kawalay-Trabaho Daghan kaayong salamat sa mga seryal nga “Kawalay-Trabaho—Adunay Solusyon.” (Marso 8, 1996) Kini miabot sa panahong ako nagpangita ug trabaho, apan wala akoy nakita. Gisulayan ko ang pagmugnag trabaho sa balay, ingon sa inyong gihisgotan diha sa panid 11, ug kini misaler kanako. Salamat kang Jehova tungod kaninyo!
J. M., French Guiana
Ang mga artikulo naghubit sa kahimtang nga akong naagoman sa dili pa dugay. Sa pipila ka bulan, nagpahiangay ako sa pagbuhat sa “tanang matang sa buluhaton,” sama sa giingon sa usa ka artikulo. Apan wala ako mawad-ig kadasig. Naningkamot ako nga makabatog positibong panglantaw, ug sa kataposan nakakaplag ako ug permanenteng trabaho. Nianang yugtoa, gitabangan ako sa akong asawa, nga daginotan kaayo sa pagpamalit. Salamat pag-usab sa impormasyon nga nagatabang kanamo sa pagpadapat sa mga prinsipyo sa Bibliya sa malisod nga mga panahon.
U. C., Italya
Nagustohan ko ilabina ang inyong kahong “Pagmugnag Trabaho sa Balay.” Ako usa ka regular payunir, usa ka bug-os panahong ebanghelisador, ug sa duha ka tuig nagadumala akog lisensiyadong day-care center sa balay. Nagbantay akog mga bata sa dili pa ug pagkatapos sa klase ug maayog kita. Kini nagtugot kanako sa pagsangyaw sa panahon sa udto, ug ako nagtrabaho lamang sulod sa upat ka oras matag adlaw. Daghang ginikanan ang mapasalamaton tungod kay ang dekalidad nga pag-atiman malisod pangitaon. Ako naglaom nga ang uban usab makakaplag ug trabaho nga motabang kanila sa pag-alagad kang Jehova.
T. K. L., Tinipong Bansa
Inyong gisugyot nga ang mga tawong walay-trabaho makatrabaho nga pribado sa pag-upholster, pagpanupi, pagtrabaho isip dyanitor, ug uban pa. Kamo nag-ingon usab nga ubos sa pipila ka kahimtang sila makapaanunsiyo sa ilang mga serbisyo nga libre o barato ang bayad. Dili ba kini ilegal sa Alemanya?
R. T., Alemanya
Ang mga balaod sa matag nasod dili-pareho, ug tingali kini nga mga sugyot mahimong ilegal sa pipila ka nasod. Mao nga sa panid 9 gipunting namo ang panginahanglan nga masayod ug tahoron ang mga balaod sa piskal ug buluhisan sa dili pa sugdan ang maong buluhaton. Ang mga Kristohanon obligado sa pagsunod sa mga balaod sa mga nasod nga ilang ginapuy-an. (Roma 13:1)—ED.
Zoo Nalingaw gayod ako sa artikulong “Pagtuon sa Bibliya—Diha sa Zoo!” (Marso 8, 1996) Gusto ko ang impormasyon bahin sa mga hayop nga gihisgotan sa Bibliya. Ako wala masayod nga gihisgotan diay sa Bibliya ang mga sebra. Nagustohan ko usab ang parapo bahin sa mga olmigas. Ang artikulo nagdasig kanako sa pagpanukiduki sa nagkalainlaing hayop matag bulan.
M. F., Tinipong Bansa
Ang Akong Minahal nga Higala Buot nakong ipahayag ang akong kinasingkasing nga pagpabili alang sa makaiikag nga artikulong “Ang Akong Minahal nga Higala.” (Pebrero 22, 1996) Makapalipay nga basahon ang maong maanindot nga panaghigalaay nga naglungtad bisan pa sa ingon niana nga diperensiya sa edad. Kini nag-ilustrar nga dili-kinahanglang ang mga batan-on magbaton lamang ug ilang labing suod nga mga higala nga sama kanilag edad. Adunay daghang tigulang nga daghag ikatanyag sa bahin sa kasinatian, kaalam, ug pagtiniaw.
S. T., Inglaterra
Ang artikulo nagpamatuod nga ang bata ug tigulang mahimong magkasinabot ug maayo ug nga ang mga batan-on makabatog kaayohan gikan sa daghang kasinatian sa edarang kaliwatan. Ako mismo migugol ug daghang makaiikag ug makapalipayng mga oras uban sa tigulang nga higala. Dako siyag nahimo sa pagtabang kanako nga makiglabot sa mga suliran sama sa pagpit-os sa isigkaingon.
W. S., Austria
Hangtod karon wala pa ako makasulay nga makakat-on gikan sa mga tigulang. Salamat niining artikuloha, ako nakasabot na karon kon unsang mga butang ang akong makat-onan gikan kanila. Buot ko gayod nga mahimong suod nga higala sa pipila ka mga tigulang nga daghan ug kaalam.
R. K., Hapon