Mga Mensahero sa Pakigdait sa Silangang Uropa

ANG mga bungol nakadungog! Ang mga piniriso gipagawas! Ang mga polis halos walay gibuhat! Bahin sa unsa ang among gitaho? Among gihisgotan kon unsay nahitabo sa di pa dugayng internasyonal nga mga kombensiyon sa mga Saksi ni Jehova nga gihimo sa Silangang Uropa sulod sa Hulyo ug Agosto sa miaging tuig.

“Mga Mensahero sa Diyosnong Pakigdait” maoy ulohan sa programa, ug daghang tawo ang nakakita nga bisan pa sa kasamok nga giawhag sa klero sa Romania,a ang mga Saksi ni Jehova nakabaton gayod ug pakigdait gumikan sa pagkaila sa Diyos ug kang Kristo Jesus.​—Isaias 26:2, 3; Filipos 4:7.

Ang mga kombensiyon gihimo sa Prague, Republika sa Czech; Budapest, Hungaria; Warsaw ug Lodz, Polandia; Tallinn, Estonia; ug Brasov ug Cluj-Napoca, Romania.

Ang mga delegado gikan sa daghang langyaw nga mga nasod mitambong niining mga kombensiyona ug naghatag ug tinuod nga timailhan sa pagkainternasyonal sa mga kombensiyon. Sa Prague dihay dagkong mga grupo gikan sa Alemanya, Hapon, Polandia, ug Tinipong Bansa. Usa ka taho gikan sa sangang buhatan sa Watch Tower Society sa Czechia miingon: “Kami nadasig pag-ayo sa daghan kaayong tighupot ug integridad nga mga magsisimba ni Jehova nga Diyos gikan sa ubang kanasoran. Pananglitan, kadaghanan sa mga delegado sa Hapon maoy mga payunir, ug ang ilang hinlo nga panapot ug kahapsay dayag nga nagdayandayan sa ilang seksiyon sa estadyum. Namatikdan usab namo ang pagkamainiton sa Polakong delegasyon, ang pagkamapasalamaton sa mga igsoong taga-Slovakia, ang kamanggihatagon sa mga Aleman, ug ang pagkabukas-ug-kasingkasing sa mga Amerikano. Silang tanan nagsilbing leksiyon alang kanamo.”

Sa unsang paagi naapektohan sa mga kombensiyon ang bag-ong mga kaubanan? Usa ka 85-anyos nga eskolar, awtor, ug linggwista mitambong, bisan pa sa pag-antos gumikan sa diabetes ug sa sakit sa bitiis. Siya nagtuon na sa Bibliya sa tabang sa librong Kahibalo sulod sa mga unom ka bulan. Panahon sa programa, siya nagtunong sa pagtagad, dili sa linggwistikanhon ug gramatikanhong bahin sa mga pakigpulong, kondili sa laing butang. “Kahibulongan kadto!” siya mituaw. “Ang gugma ug konsiderasyon nga inyong nabatonan sa inyong taliwala mas madanihon kay sa mga pulong.”​—Juan 13:34, 35; 1 Corinto 13:1-8.

Ang langyawng mga bisita sa Prague nalingaw sa pagduaw sa makasaysayanhong mga dapit ug paghatag ug dili-pormal nga pagsangyaw sa matag higayon. Sa usa ka kastilyo sa habagatang Prague, usa ka Amerikanang Saksi, asawa sa usa ka abogado, naghulat sa ibabaw sa torre sa kastilyo aron sa paghatag ug mga tract nga Czech sa tanang mosaka sa hagdanan. Ang uban nanghatag ug mga tract sa dihang nasugatan nila ang usa ka grupo sa mga estudyanteng babaye nga nagduaw sa karaang Hudiyonhong sementeryo. Ug, siyempre, ang tanang propesyonal nga mga tour guide ug mga drayber sa bus nakadawat ug literatura.​—1 Pedro 3:15.

Usa ka guide nga nakadayeg sa mga Saksi ug sa ilang panggawi misulat: “Wala pa gayod ako makahibalag ug daghang mahigalaon ug mabinationg mga tawo sa tibuok nakong kinabuhi. Bisan tuod ako Katoliko, ako nadani sa inyong espirituwal nga tinamdan. Kamong tanan naghatag kanako ug paglaom nga aduna pay kaugmaon ang katawhan. Pasalamatan ko kamo sa inyong kalulot. Magapanalangin unta ang Diyos kaninyo!”

Bisan tuod mibunok ang ulan sa Biyernes didto sa Prague, ang mga pamilya nanglingkod sa gawas didto sa estadyum, nga nagdawat sa espirituwal nga pagkaon nga gipahayag sa lokal ug langyawng mga mamumulong. Daghan kaayong masuso didto nga aron malikayan ang aksidente diha sa mga pasilyo, ang usa ka espesyal nga parkinganan sa stroller, o karetilya sa bata, ang gihimo sa gawas sa estadyum.

Ang kombensiyon sa Prague gitambongan sa 22,000, ug 432 ka bag-ong dedikado nga mga Saksi ang nabawtismohan, lakip sa duha ka tawo nga naglingkod sa silyang may ligid maingon man sa laing lima nga baldado.

Ang mga Bungol “Nakadungog” sa Budapest

Nahimutang ubay sa Suba Danube mao ang matahom nga siyudad sa Budapest, nga nahimong siyudad nga gihimoan sa internasyonal nga kombensiyon niadtong Hulyo. Ang kinatas-ang gidaghanon nga 23,893 ang mitambong, lakip sa 3,341 ka delegado gikan sa 11 ka nasod gawas sa Hungaria.

Sa usa ka tolda nga duol sa plataporma, ang tibuok programa gihubad alang sa mga bungol, nga mga 100 ang mitambong. Sa mga pulong sa pag-abiabi sa tanang delegado nga nagsulti sa mga pinulongan gawas sa Hungariano, ang mga bungol ilabinang giabiabi, sa mga pulong: “Usa ka pinulongan nga dili nato buot nga kalimtan sa paghisgot nga niana ang tibuok programa pagahubaron mao ang senyas nga pinulongan. Kita mapasalamaton nga kauban nato ang mga bungol.”

Pagpakig-ambit sa Kamatuoran sa Uban

Niining maong mga kombensiyon ang bag-ong literatura sa Bibliya giluwatan, lakip ang librong Ang Sekreto sa Kalipay sa Pamilya. Human madawat kining publikasyona, ang mga Pranses nga delegado misakay ug bus aron mopauli sa ilang hotel. Samtang nagbiyahe may nakita silang bag-ong kinasal kauban sa ilang mga bisita. Gihangyo sa mga igsoon nga pahunongon sa drayber ang bus. Usa sa mga Saksi nanaog ug mitunol ug usa ka kopya sa bag-ong libro sa Hungariano ngadto sa magtiayon. Mapasalamaton silang midawat niana ug misugod dayon sa pagbasag maayo sa libro. Lagmit mao kadto ang usa sa unang mga kopya nga napahimutang tapos sa pagluwat niana!

Gikan sa Pagka-Katoliko Ngadto sa Pagka-Komunista Ngadto sa Pagka-Saksi

Ang 510 nga nabawtismohan niining kombensiyona naghawas sa kapin sa 2 porsiyento sa nanambong. Tulo niining bag-ong mga Saksi nabilanggo pa, nga nag-alagad sa sentensiya sa krimen nga ilang nahimo una pa makakat-on sa kamatuoran sa Bibliya. Ang lokal nga mga igsoon regular nga nagduaw kanila ug nagdumala ug mga panagtuon sa Bibliya duyog sa uban. Sa usa ka prisohan sa Budapest, mga 50 ka panagtuon sa Bibliya ang ginadumala uban sa mga binilanggo.

Usa ka tawo nga gimatuto sa usa ka Benedictine nga Katolikong tunghaan nawad-an sa iyang pagtuo sa Iglesya Katolika ug, sa edad nga 20, nahimong membro sa Partido Komunista. Sa ulahi, mianib siya sa kasundalohan ug miuswag ngadto sa ranggo nga tenyente. Ingong membro sa Workers’ Militia, siya nagtudlo ug Marxismo-Leninismo diha sa unibersidad. Siya nainteres sa eslogan sa Komunista nga “kagawasan, panag-igsoonay, kaangayan.” Bisan pa niana, ang sayop nga paggamit niadtong anaa sa awtoridad sa eslogan nga “gobyerno sa katawhan” nagpaduhaduha kaniya sa Komunismo. Gibati niyang may nakulang. Ngadtongadto, siya miretiro. Sa dihang ang mga Saksi mituktok sa iyang pultahan, siya andam nga mamati. Siya mitaho: “Panahon sa akong unang duaw sa Kingdom Hall, kombinsido ako nga sa kataposan ania ang tinuod nga panag-igsoonay. Ako gipalibotan sa gugma sa matuod nga mga sumusunod ni Kristo. Ang akong kausaban gikan sa pagka-Komunista ngadto sa pagka-Saksi gidangtag upat ka tuig. Apan akong napili ang kamatuoran.” Siya nabawtismohan didto sa kombensiyon.

Alang sa kapolisan, ang pagbantay diha sa usa ka kombensiyon kasagarang usa ka dakong kausaban sa trabaho. Usa ka polis nga naasayn nga magbantay atubangan sa estadyum miingon nga ang pagbantay diha sa mga kombensiyon sa mga Saksi malisod kaayo. Ngano? Tungod kay ang tanan naglihok nga hapsay kaayo nga ang polis malisdan sa pagpabiling magtukaw!

Maayong mga Taho sa Prensa sa Polandia

Duha ka internasyonal nga kombensiyon ang gihimo sa Polandia, nga may kapin sa 20,000 nga mitambong sa Warsaw, ang kaulohang siyudad, ug duolan sa 12,000 sa Lodz, ang ikaduhang-kinadak-ang siyudad sa Polandia.

Ang nag-unang mantalaan sa Warsaw, Życie Warszawy, naundan sa mosunod nga balita: “‘Adunay maayong balita nga imantala! Kini maoy balita bahin sa pakigdait, tinuod nga pakigdait. Ang among gugma kang Jehova ug sa among silingan nagtukmod kanamo sa pagpadayon sa pagsangyaw nga walay hunong hangtod ang Diyos moingon nga natapos na ang buluhaton,’ matod ni Carey Barber, usa ka membro sa Nagamandong Lawas sa mga Saksi ni Jehova.”

Usa ka magsusulat sa mantalaang Sztandar Młodych miingon: “Sulod sa duha ka adlaw 12,000 o maingon-ingon niana nga mga Saksi ni Jehova ang nagkatigom sa usa ka relihiyosong asembliya sa Legia Stadium, sa Warsaw. Ang sumbanan nga kahusay naglungtad, ug bisan tuod ug gisusi ko pag-ayo, wala akoy nakitang mga sakyanan sa polis o mga pundok sa militar nga nagabantay.

“Ang Polandia, sumala sa kadaghanan, maoy halos bug-os nga Katolikong nasod. Apan sa dihang ang atong mga batan-ong Katoliko magtigom sa mao gihapong estadyum, ang dakong puwersa sa kapolisan kanunayng presente, andam nga molihok.

“Makapatugaw gayod nga ang mga mibiya sa Katolisismo, mga sektaryan, o bisan unsay tawag ninyo kanila [mga Saksi ni Jehova] makahimo sa pagtigom sa dinagkong pundok ug dili magpahinabog kapeligrohan sa kahusay ug kasegurohan sa publiko, samtang ang atong Katolikong mga batan-on kon maggrupo mahimong peligroso, ug ang panalipod sa polis batok sa ilang pagbinagis maoy kinahanglanon. Adunay daghang butang nga takos palandongon.”

Ang pagbawtismo sa bag-ong mga magtutuo nahitabo usab dinhi, nga may 462 ang nabawtismohan sa Warsaw ug 278 sa Lodz. Usa kanila mao ang 19-anyos nga si Sylwia, kinsa mapihigon sa mga Saksi. Usa ka adlawng ting-ulan siya giduol sa usa ka Saksi diha sa karsada. “Ako siyang napapahawa, ug ako mipadayon sa paglakaw. Apan akong gipaambit ang akong payong sa usa ka dalagita nga basa na. Siya usab usa diay ka Saksi! Mitanyag siya nga dad-an ako ug librong Mga Pangutanang Gisukna sa mga Batan-on​—Mga Tubag nga Mosaler. Sugo sa maayong pamatasan akong gihatag kaniya ang akong adres, ug . . . ako gibawtismohan karong adlawa!”

Ang Gamayng Nasod sa Estonia Nakadawat ug Dakong Pagpanaksi

Ang Estonia, Latvia, ug Lithuania maoy naglangkob sa Baltic States. Ang populasyon sa Estonia maoy 1.5 milyon lamang, ug ang kaulohang siyudad adunay mga 450,000 ka molupyo. Duha ka kombensiyon ang gihimo didto niadtong Agosto 1996.

Dako ang epekto niining dagkong mga tigom nga usa ka mantalaan ang miingon: “Ang Tallinn sa literal napuno sa pagsimba sa mga Saksi ni Jehova. Ang ilang kombensiyon nga gihimo sa Linnahall gikaingon nga nagtigom sa kinadak-ang mamiminaw sa tanang relihiyon nga gihimo sukad sa Estonia.” Ang tanang hotel gipareserba sa mga Saksi.

Si Brader Carey Barber sa ulahi mihatag ug taho nga niana siya miingon: “Dili ikatingala nga ang mga igsoong taga-Pinlandia ug ang uban nga giasayn sa Estonia gustong atua didto. Kining gamay apan matahom nga nasod gidaogdaog sa mas dagkong mga nasod ug nag-antos sa hilabihan. Karon ang mga taga-Estonia . . . naglaom pag-ayo nga makabaton sa umaabot ug dumalayong pakigdait ug kasegurohan gikan kang Jehova.” Adunay kapin sa 3,100 ka Saksi nga aktibo sa Estonia, katunga kanila nagsultig Ruso.

Ang mga kombensiyon nag-alagad sa mga taga-Estonia, nagsultig-Ruso nga mga taga-Estonia ug mga taga-Latvia, mga taga-Lithuania, ug nagaduawng mga delegado gikan sa 15 ka nasod, lakip ang 155 gikan sa Britanya ug 300 gikan sa Pinlandia.

Ang Bungol “Nakadungog” Usab sa Estonia

Tulo ka tuig kanhi usa ka bungol nga ansiyano gikan sa Pinlandia ang miadto sa Tallinn, Estonia, aron pagsusi kon unsay iyang mahimo alang sa mga bungol nianang nasora. Wala siyay nailhan nga bisag usa ka bungol didto, busa mitambong siya sa balayng tigomanan sa mga bungol sa Tallinn, nga may dalang hugpong sa mga magasing Bantayanang Torre ug ubang literatura. Ang mga bungol nga taga-Estonia nag-abiabi kaniya ug buot masayod kon unsay iyang dala. Gipahimutang niya ang tanang literatura sa iyang unang duaw ug gisulat ang mga ngalan ug mga adres sa mga interesado, tanantanan 70 ka ngalan.

Halos tanan buot nga magtuon sa Bibliya, ug ang igsoon nakaamgo nga dili niya madumala kadtong tanan nga panagtuon. Busa kinahanglan niyang pilion ang mga tawo nga labing interesado. Wala madugay human sa iyang unang duaw sa Estonia, siya may 30 ka panagtuon sa Bibliya ug usa ka listahan sa 40 ka umaabot nga mga panagtuon sa Bibliya! Karon aduna nay upat ka maghuhubad sa senyas nga pinulongan alang sa mga bungol sa Tallinn.

“Usa ka Bag-ong Yugto sa Drama sa Bag-ong Testamento”

Usa ka Saksi ang nag-atang diha sa usa ka dunggoanan sa lantsa nga nag-abiabi sa mga delegado sa kombensiyon. Giduol niya ang usa ka tour guide nga taga-Estonia ug gipangutana siya kon unsay iyang hunahuna bahin niining dakong kombensiyon. Ang guide namulong kaniya nga siya naggiya sa daghang grupo sa mga Saksi gikan sa lainlaing Uropanhong mga nasod ug nakamatikod nga ang mga Saksi kanunayng maayog panggawi, buotan nga mga tawo. Siya gidapit sa pagduaw sa sangang buhatan sa Watch Tower Society sa Puhangu Street, ug siya natingala nga nakita ang kahapsay ug ang malulot ug malipayong mga batan-on. Dili niya masabtan kon nganong ang mga Saksi nag-atubang sa pintas nga mga pagsupak ug bakak nga mga sumbong sa dihang ang mga kamatuoran nagpamatuod nga ang mga akusasyon dili tinuod. Siya miingon: “Sa akong hunahuna ang inyong buluhaton, inyong pag-alagad, maoy sama sa usa ka bag-ong yugto sa drama sa Bag-ong Testamento.”

Tino nga ingong mga mensahero sa diyosnong pakigdait, ang mga Saksi ni Jehova nagdahom nga makaestablisar ug maayong dungog sa tibuok kalibotan tungod sa ilang talahorong panggawi ug sa ilang kalulot sa mga langyaw. (1 Pedro 3:16) Kining maong mga kombensiyon sa Silangang Uropa nagpakita nga bisan pa sa pasipala ug pagbutangbutang gikan sa relihiyosong mga kaaway ug mga apostata, ang mga Saksi ni Jehova nakabaton sa panalangin sa Diyos samtang sila nagmantala sa mensahe sa pakigdait nga gikinahanglan pag-ayo sa atong nagusbat-sa-gubat, puno-sa-pagdumot nga kalibotan.​—Isaias 2:2-4; Marcos 13:10.

[Footnote]

[Kapsiyon sa panid 23]

Bisan pa sa ulan, ang mga pamilya namati pag-ayo sa programa

[Kapsiyon sa panid 24]

Malipayong Polako nga mga Saksi dala ang ilang bag-ong giluwatang mga publikasyon

[Kapsiyon sa panid 25]

Mangayaong mga Saksi nga taga-Estonia nga nagsul-ob sa naandang nasodnong sinina