Daghan Kaayong Diyos, Hangtod Nakaplagan Ko ang Matuod
NATAWO ako sa Croydon, Inglaterra, niadtong 1921, ang panganayng babaye taliwala sa tulo ka anak babaye ug duha ka anak lalaki. Sa tres anyos pa ako, pipila kanamo nga mga anak ang nasakit sa dipterya. Naospital ako. Ang igsoon nakong lalaki nga si Johnnie namatay, ug kay wala man siyay bunyag, ang Iglesya Anglikano wala motugot sa serbisyo alang sa lubong. Tungod niadto naglagot ang akong amahan ug gihangyo ang usa sa klero nga mangadyi siya iniglunod na sa lungon ni Johnnie sa yuta. Siya mibalibad.
Miingon ang akong inahan nga tungod niadto ang akong amahan mipahilayo sa relihiyon hangtod sa hangtod. Ang akong inahan nahadlok pag-ayo nga basin may mahitabo kanako o sa akong mga igsoong babaye nga wala magpahibalo sa akong amahan, iya kaming gidala ngadto sa simbahan ug gipabunyagan. Ang akong amahan nahimong aktibong membro sa Komunistang partido ug nagdasig kanamo nga mobasag mga basahon nga may kalabotan sa diyalektikal nga materyalismo, apil ang mga libro ni Huxley, Lenin, ug Marx. Wala gayoy paghisgot bahin sa Diyos sa balay gawas dihang moingon ang akong amahan nga walay Diyos.
Niadtong 1931, sa mga diyes anyos na ako, usahay ako mobaktas sa kalye aron duawon ang mga ginikanan sa akong amahan. Si Lolo kanunayng gisaway sa uban, apan siya may kidlap sa iyang nindot asulong mga mata ug kanunay siyang malipayon. Kasagaran nga iya akong hatagag kendi ug balasahon inigpauli nako. Kaonon nako ang kendi ug ilabay ang balasahon. Wala ako makasabot niadto kon nganong ang uban negatibog komento bahin kaniya.
Sa tin-edyer na ako, miduyog ako sa Liga sa Batan-ong Komunista ug sa taudtaod nahimong sekretarya. Ako naghatag ug mga pakigpulong sa munisipyo ug nanagtag sa mantalaang Challenge, nga nagtanyag kang bisan kinsa nga mamati. Niadtong panahona, usa ka Pasistang grupo nga gitawag ug Blackshirts aktibo ug supak kaayo sa Komunismo. Mahinumdom ako nga samtang nagbarog ako sa karsada nga nagtanyag sa Challenge, ang mga membro sa Blackshirts moduol kanako ug makigsulti kanako, nga magtawag kanakog Sunshine, usa ka anggang ilang gihatag kanako. Ang mas tigulang nga mga membro sa Komunistang partido nga akong gipakig-aniban nakadiskobreng ang mga Pasista nagplano sa pagsuntok kanako pinaagig pitsikurno, mao nga gisugdan nila ang paghatag kanakog eskorte.
Sa usa ka okasyon, nasayran namo nga ang mga Pasista momartsahay agi sa East End sa London (nga niadto gipuy-an kasagaran sa mga Hudiyo). Gisugo kami sa pagpakigharong kanila ug pagdalag mga puyo sa mga marbol, nga among ipanglabay ilalom sa mga tiil sa mga kabayo sa kapolisan inigdasdas nila aron sa pagbungkag sa kontraryong mga pundok. Daghan ang nadakpan niadtong adlawa, apan maayo na lang, ako wala maapil kanila, kay ako mihukom nga dili moadto.
Naaktibo ang Akong Tanlag
Sa laing okasyon, gisugo ako sa pagsulti sa usa ka butang nga akong nasayran nga dili tinuod sa panahon sa usa ka publikong tigom. Ako mibalibad ug gisukna, “Unsay daotan niana basta atong ikapasabot ang punto?” Sa maomaong panahon sa akong kinabuhi ako gitulisok na sa akong tanlag, ug ako misugod pagkahibulong bahin sa daghang butang.
Usa ka panahon sa bag-o pa akong natin-edyer, ako gidasig sa akong inahan nga moatender sa usa ka serbisyo sa simbahan, aron tan-awon lamang kon unsa ba gayod kadto. Mahinumdom ako nga gipaduol sa altar aron pagkumpisal sa akong mga sala. Samtang didto, akong namatikdan nga ang borda sa tabon sa altar may tulo ka singsing nga naglambigit. Nangutana ako kon unsay gihawasan niadto ug gisultihang kadto naghawas sa “Santa Trinidad—Diyos nga Amahan, Diyos nga Anak, ug Diyos nga Espiritu Santo.” Naghunahuna ako, ‘Katingad-anan kini. Sila nagtuo ug tulo ka diyos, apan ang akong amahan nag-ingon nga wala ganiy diyos!’ Sa nangutana akog dugang, gisaysay nga ang usa ka itlog dunay tulo ka bahin apan sa tinuoray ang itlog usa lang. Kadto wala makapatagbaw kanako. Unya giingnan ako nga daghan ra kaayo kog pangutana. Ako mipauli ug miingon sa akong inahan nga dili ko na gustong moadto sa simbahan, ug wala na ako moadto!
Sa pag-ulbo sa Gubat sa Kalibotan II, dili na ako aktibo sa Liga sa Batan-ong Komunista. Naminyo ako sa usa ka Canadiano nga nag-alagad sa militaryo, ug kami nakabatog usa ka anak lalaki. Ang una namong balay sa London nabombahan. Ang V-1 nga misil nahulog atubangan sa among balay sa dihang ang akong anak lalaki ug ako diha sa balay. Nawad-an kami sa tanan namong materyal nga kabtangan. Nalubong kami sa mga guba apan nabulahan nga igo rang naluwas ang among mga kinabuhi. Ang akong bana didto niadto sa Normandy, Pransiya.
Sa maomaong panahon, ako mahinumdom nga nakigsulti ngadto sa duha ka batan-ong babaye ug nangutana kanila, “Kon adunay Diyos, nganong gitugotan niya kining tanang pag-antos?” May gisulti sila bahin kang Satanas ingong ang diyos niining kalibotana. “Ay,” naghunahuna ako, “laing diyos nga wala akoy nahibaloan!” Unya, usa ka batan-ong lalaki miabot. Girakrakan ko siyag mga pangutana, ug siya miingon nga nangita siyag mga karnero, dili mga kanding. Kay wala masinati sa sambingay ni Jesus, gisukna ko siya kon ministro ba siya o mag-uuma. Miaginod ang pipila pa ka tuig, ug ang Gubat sa Kalibotan II natapos. Ang akong bana mipauli human makakita sa 95 porsiyento sa Saskatoon Light Infantry nga maoy iyang gialagaran nga natigbak sa gubat. Kami mipuyo sa laing balay sa Croydon.
Ang mga Saksi Nanuaw
Usa ka Dominggo, duha sa mga Saksi ni Jehova miabot ug mitimbre sa among pultahan. Ang akong bana maoy miadto sa pultahan ug dugay kaayong nakigsulti kanila. Nayugot siya sa tanang relihiyon tungod sa kasalingkapaw nga iyang nasaksihan panahon sa gubat. Ang kamatuorang ang mga Saksi nagbaton ug neyutral nga baroganan nakapahingangha kaniya. Gisultihan niya ako nga iya silang gidapit nga mobalik aron hisgotan ang Bibliya. Nabalaka kaayo ako ug nangutana sa akong amahan kon unsay angay nakong buhaton. Miingon siya nga dili ako makiglangkit ug kon ang akong bana magpadayon sa maong binuang nga relihiyon, maayo pang ako mopayl ug diborsiyo.
Mihukom ako nga moapil sa usa sa mga panaghisgot aron sa pagsusi kon bahin kadto sa unsa. Kaming tanan nag-alirong paglingkod sa lamesa, ug ang Saksi miingon: “May adlaw nga makagakos ka sa usa ka leyon nga sama ra nga magakos nimo ang usa ka iro.” ‘Ay, buang na sila,’ naghunahuna ako. Wala ako makahunahunag laing butang sa gipanulti niadtong gabhiona. Human niadto, giingnan ko ang akong bana nga dili na ko gustong mobalik pa sila. Daghang luha ang mitubod, ug gihisgotan namo nga magdiborsiyo.
Wala madugay human niadto, laing Saksi ang miduaw. Among nasayran sa ulahi nga siya magtatan-aw sa sirkito nga nagduaw sa lokal nga kongregasyon ug nakadungog bahin kanamo. Tin-aw ko siyang mahinumdoman. Siya may asul nga mga mata ug maluloton kaayo, mapailobong kinaiya. Gipahinumdoman niya ako bahin sa akong apohan. Gihulbot nako ang usa ka listahan nga may 32 ka pangutana nga akong nasulat. “Hisgotan nato kini silang tinagsa,” matod niya, ug gihisgotan namo kana. Gitabangan niya ako pagpabili nga aron bug-os masabtan kon unsay ginaingon sa Bibliya, kinahanglang akong basahon ug tun-an kana. Misugyot siya nga may paanhaon nga regular aron magtuon sa Bibliya uban kanamo. Giingnan ko siyang OK.
Samtang inanay kong nasabtan ang bahin sa atong Maglalalang, si Jehova nga Diyos, ako nakahilak. Mahinumdom ako nga misulod sa lawak-higdaan ug miampo kang Jehova nga pasayloon unta niya ako ug tabangan sa pagsabot sa Bibliya ug sa iyang mga katuyoan. Ang akong bana, akong anak lalaki, ug ako nabawtismohan niadtong 1951. Ang akong amahan napikal kaayo nga nakadungog bahin niadto ug miingon nga palabihon pa niyang makita akong patay kay sa usa sa mga Saksi ni Jehova.
Pag-alagad Diin Labaw ang Panginahanglan
Gihukom sa akong bana nga mobalik sa Canada, ug niadtong 1952 kami namalhin ngadto sa Vancouver, British Columbia. Ang akong amahan midumili nga manamilit, ug siya wala na gayod nako igkita o igdungog pa. Human kami makapuyog ubay-ubayng katuigan sa Vancouver, may awhag nga moadto diin labaw ang panginahanglan, ilabina ngadto sa mga dapit nga sama sa Quebec, diin si Premier Duplessis may samag-Hitler nga tinamdan bahin sa mga Saksi ni Jehova.
Niadtong 1958 among gikarga ang tanan namong yutan-ong kabtangan sa among sakyanan ug mibiyahe paingon sa internasyonal nga kombensiyon sa New York. Gikan didto kami mibiyahe paingon sa Montreal, Quebec, diin kami naasayn ngadto sa usa ka Pranses nga kongregasyon sa Ville de Jacques-Cartier. Daghan kamig makaiikag nga mga kasinatian samtang nag-alagad kang Jehova sa Quebec. Usa ka higayon, ang among sakyanan gibalintong, gilabay ug mga bato, ug ang usa ka babaye nagpasirit sa hose kanamo nga kusog kaayo. Kadto maoy sa dapit nga gitawag ug Magog.
Sa laing higayon, ang akong kauban ug ako miagi sa usa ka simbahan samtang ang mga tawo nanggawas. May nakaila kanamo ug misinggit: “Témoins de Jéhovah!” (“Mga Saksi ni Jehova!”) Misunod ang gukdanay, nga gipangunhan sa pari, apan wala makaapas kanamo ang panon. Gidakop kami sa daghang higayon. Bisan pa niana, nalipay ako nga nakatabang ug ubay-ubayng mga tawo sa pagkat-on kang Jehova, nga daghan kanila aktibo gihapong nagaalagad kaniya.
Sa sinugdan sa katuigang 1960, ang amo sa akong bana nagbalhin kaniya ngadto sa Los Angeles, ug kami nag-alagad sa usa ka kongregasyon didto sulod sa kapig 30 anyos. Makapahimuot gayod nga kami makigsulti bahin sa kamatuoran ngadto sa mga tawong namalhin sa Los Angeles gikan sa tanang bahin sa yuta! Nakapribilehiyo ako sa pagtuon uban sa mga tawo nga gikan sa Lebanon, Ehipto, Tsina, Hapon, Pransiya, ug Italya, sa pagngalan lang ug pipila. Mahinumdom ako sa usa ka babaye nga dili antigong mosultig Iningles—maayo na lang, ang iyang bana antigo. Busa ang akong bana ug ako nagtuon kauban nilang duha. Sa kadugayan may separado akong pagtuon uban niya. Gigamit ko ang librong Let God Be True nga Iningles, ug iyang tan-awon ang mga teksto diha sa iyang Ininsek nga Bibliya ug tubagon ang mga pangutana sa Ininsek. Unya, isulti ko ang tubag sa Iningles, ug iyang sublion kana sa Iningles. Sa kadugayan, siya nahimong larino sa Iningles, bisan pag mosulti siya niana nga may Britanikong tono. Ako malipay sa pag-ingon nga siya ug ang iyang bana karon maoy dedikadong mga alagad ni Jehova.
Bag-o pa kaming namalhin sa Tucson, Arizona, ug nakabaton sa dugang pribilehiyo nga makakita sa tanang membro sa among pamilya nga matinumanong nagaalagad kang Jehova, apil ang among mga apo sa tuhod, kinsa ginatudloan bahin sa atong Dakong Maglalalang, si Jehova.
Lain pay ato, ako nalipay sa pagkahibalo gikan sa mga igsoon sa Croydon nga ang akong apohang lalaki nga may makidlapong asul nga mga mata maoy usa sa mga Saksi ni Jehova.—Sumala sa giasoy ni Cassie Bright.