Ang Kaalam sa Paglikay ug sa Monogamiya

SA PAGKAKARON, duolag 30 ka milyong tawo ang naapektahan sa virus sa AIDS ug kapin sa 6 ka milyon ang namatay. Mga 8,500 ka bag-ong kaso ang madayagnos kada adlaw​—nga 1,400 kanila mga bata, nga sagad mamatay sulod sa unang tuig sa kinabuhi. Ang giingong luwas-nga-sekso nga mga kampanya nakaukay sa publikong pagtagad, apan gibati sa pipila nga kini dili igo. “Ang AIDS maoy sakit nga mopatay,” misulat si Dr. Steven J. Sainsbury diha sa The Tampa Tribune, “ug bisan unsang mga lakang nga himoon sa pagsanta sa pagkapasa niini kinahanglang 100 porsiyentong epektibo.”

Bahin sa paggamit ug mga kondom ingong usa ka paagi sa pagsanta sa AIDS, si Dr. Sainsbury mikomento: “Tan-awa kini niining paagiha. Pananglit nga, tungod sa wala-hisayring mga hinungdan, ang mga kotse kalit mobuto matag higayong may moliso sa ignisyon. Ang mga motorista mangabuthan sa tibuok nasod. Sa kataposan, ang gobyerno mopahayag ug usa ka solusyon. Ibutang lang kining aditiboha sa gasolina, matod nila, ug ang risgo sa pagbuto mous-os ug 90 porsiyento. Isipon mo bang nasulbad na ang suliran? Magpadayon ka ba gihapon sa pagmaneho sa imong kotse? Maduhaduhaon ako. Nan nganong ato mang dawaton ang mga kondom ingong solusyon alang sa AIDS?”

Sa pag-ila nga ang AIDS kasagaran kaayong ipahinabo sa seksuwal nga pakigduol, si Dr. Sainsbury mitanyag ug usa ka solusyon: “Walay pakigsekso hangtod nga ang usa andam nang makomitir sa usag-kapikas nga relasyon uban sa wala-hitakdi nga tawo. Ang yawing mga pulong mao ang paglikay ug ang monogamiya.”

Ang Bibliya nagbaod sa paglikay sa pakigsekso alang sa tagsaanong mga tawo ug sa monogamiya alang niadtong minyo. Ang hataas nga mga sukdanan sa Bibliya nagdili sa pakighilawas, panapaw, ug homoseksuwalidad. (Mateo 19:4-6; 1 Corinto 6:9, 10; 7:8, 9) Bisan pag daghan nagsaway niining sukdanana, nga nag-ingong kini hupas na o kinaraan, ang moralidad sa Bibliya nagpausbaw sa maayong panglawas ug kalinaw sa hunahuna.​—Isaias 48:17.