Mga Saksi ni Jehova sa Rusya

Panglantaw sa Usa ka Teologo

SA Roma, ang mga pangulo sa Hudiyohanong komunidad sa unang siglo miingon bahin sa Kristiyanidad: “Mahitungod niini nga sekta nahibaloan namo nga sa bisan diin kini ginasultihan ug pagbatok.” Unsay gihimo sa maong mga pangulo? Ikalipay, sila miadto kang apostol Pablo, nga niadto gibilanggo sa balay, ug miingon: “Among gihunahuna nga husto nga maminaw gikan kanimo kon unsay imong mga hunahuna.” (Buhat 28:22) Sila naminaw sa may kahibalong Kristohanon inay niadtong misulti batok sa Kristiyanidad.

Si Sergei Ivanenko, usa ka respetadong teologo nga Ruso, mihimo sa sama. Bisan tuod siya mituo sa daghang negatibong mga taho bahin sa mga Saksi ni Jehova nga mikaylap sa Rusya, siya midesidir sa pagtawag sa sangang buhatan sa mga Saksi, nga nahimutang sa gawas lamang sa St. Petersburg, aron makahipos ug impormasyon. Iyang gidawat ang imbitasyon nga makaduaw didto, makapangutana, ug makapaniid sa mga Saksi mismo.

Sa dihang si G. Ivanenko midangat sa Oktubre 1996, ang mga pasilidad nga gipuy-an sa duolag 200 ka membro nga kawani sa sanga sa mga Saksi ni Jehova sa Rusya hapit nang matapos. Sa misunod nga tulo ka adlaw, gihatagan siyag kahigayonan sa pag-obserbar sa dapit sa konstruksiyon, pagkaon sa kan-anan, ug pag-interbiyo ni bisan kinsang buot niya.

Ang artikulo nga gisulat ni G. Ivanenko bahin sa mga Saksi gipatik sa ilado nga senemanang Moscow News sa Rusya niadtong Pebrero 16-23, 1997. Ang artikulo, nga nag-ulohang “Angay ba Kitang Mahadlok sa mga Saksi ni Jehova?,” migula usab sa Ingles nga edisyon sa Moscow News, nga pinetsahan ug Pebrero 20-26. Sanglit daghang magbabasa sa Pagmata! ang interesado kaayo sa kalihokan sa mga Saksi ni Jehova sa Rusya, among gipresentar pag-usab dinhi, uban ang pagtugot, ang kadaghanan niining artikuloha. Nagsugod si G. Ivanenko uban sa mosunod nga kasinatian, nga gisulat sa klarong mga letra:

“‘Mga sektaryan, pamahawa sa Rusya!’ maoy mabasa sa poster nga giwarawara sa mga membro sa partidong LDPR ni Zhirinovsky nga miprotesta sa usa ka tigom sa mga Saksi ni Jehova. ‘Unsay wala nimo maangayi niining organisasyona?’ akong gipangutana ang usa niadtong miprotesta. Iya akong gitunolan ug kopya sa Megapolis-Express nga may ulohang ‘Pagkaylap sa Relihiyosong Sipilis sa Kamchatka.’ Ang mantalaan nag-ingon nga aron makasapi ang organisasyon, ang mga Saksi ni Jehova namugaw ug nagpadagan ug mga sindikato sa pamampam, nga nagpakaylap ug sakit beneryal taliwala sa mga tripulante. ‘Usa ka ba usab sa ilang mga biktima?’ mabination ko siyang gipangutana, ‘Mituo ka ba niining impormasyona?’ ‘Dili na kana importante,’ mao ang tubag. ‘Ang importante mao nga kining Amerikanhong sekta nagadaot sa espirituwalidad ug kultura sa Rusya, ug kinahanglang sumpoon namo kini.’”

Ang artikulo nga gisulat ni G. Ivanenko maoy misunod ubos sa pasiuna nga: “Sinulat ni Sergei Ivanenko, teologo, kandidato sa pilosopiya.”

“Ang pagkamatinud-anon nga sama niini maoy talagsaon kaayo, bisag tinuod nga daghang Ruso ang walay maayong pagtagad sa mga Saksi ni Jehova. Mahisgotan lang gani kining organisasyona motultol na sa kutay sa mga komento bahin sa makadaot nga panatisismo niini, sa Amerikanhong sinugdanan niini, bahin sa lunod-patay nga pagkamaunongon sa ordinaryong mga membro sa mga pangulo sa organisasyon, ug ang pagtuo nga ang kataposan sa kalibotan ania na. Daghang tawo nag-isip nga ang mga Saksi ni Jehova makapaaghat ug kahadlok nga inubanan sa kamausisahon.

“Unsa man Kining Relihiyona, ug Angay ba Natong Kahadlokan Kini?

“Aron akong masusi kini, akong giduaw ang balangay sa Solnechnoye sa distrito sa Kururtnoye, St. Petersburg, diin ang administratibong sentro sa mga Saksi ni Jehova sa Rusya nahimutang.

***

“Nahimutang [kini] sa luna sa kanhing summer camp. Sa 1992 ang [orihinal] nga tinukod nadaot pag-ayo sa katalagman, ug ang mga bata gipulihan sa mga libodsuroy ug panon sa mga ilaga. Dayag nga ang dili maayong kahimtang sa dapit ang nakatabang sa mga Saksi ni Jehova nga madawat ang pito ka ektaryang lote sa yuta aron magamit sa walay tino nga panahon. Ilang gipatahom ang karaang mga tinukod ug usab misugod sa pagtukod ug mga bag-o, lakip na ang usa ka upat-ka-andanang administratibong tinukod, usa ka [Kingdom Hall] nga kalingkoran ug 500, ug usa ka kan-anan. Ang mga Saksi ni Jehova nagtanom usab ug bag-ong mga balili (espesyal nga giorder gikan sa Pinlandia) ug nagkadaiyang matang sa talagsaong mga kahoy. Ang trabaho gidahom nga matapos niining umaabot nga ting-init. Ang pangunang tahas sa administratibong sentro mao ang pag-organisar sa buluhaton sa pagsangyaw ug ang pagpanghatod ug literatura ngadto sa lokal nga mga kongregasyon sa mga Saksi ni Jehova. Ang Solnechnoye walay kaugalingong mga pasilidad sa pagpatik, busa ang literaturang Ruso gipatik sa Alemanya, dayon gihatod ngadto sa St. Petersburg, diin gikan niana giapod-apod kini ngadto sa mga rehiyon. Duolan sa 190 ka tawo ang nagtrabaho sa sentro. Nagtrabaho sila sa boluntaryong paagi ug bisan tuod wala sila magdawat ug mga suhol, sila gitagan-an sa tanang pangunang mga panginahanglan, sama sa dapit kapuy-an, pagkaon, ug panapot.

“Ang buluhaton sa sentro gidumalahan sa usa ka komitiba sa 18 ka ansiyano. Si Vasily Kalin mao ang koordinetor sa administratibong sentro sukad sa 1992. Gipanganak siya sa Ivano-Frankovsk. Sa 1951, sa nag-edad ug kuwatro anyos, siya ug ang iyang mga ginikanan gidestiyero ngadto sa Siberia (sa 1949 ug sa 1951 halos 5,000 ka pamilya ang gipanglutos sa mga awtoridad tungod sa pagkahimong mga Saksi ni Jehova). Nabawtismohan siya niadtong 1965 ug mipuyo sa rehiyon sa Irkutsk. Nagtrabaho siya isip kapatas sa usa ka gabsanan ug kahoy.

“Gawas pa sa mga boluntaryo sa administratibong sentro aduna pa usab ing 200 ka boluntaryong trabahante sa konstruksiyon gikan sa Rusya, Pinlandia, Sweden ug Norway nga nagpuyo sa Solnechnoye: Ang kadaghanan kanila mipalta gikan sa ilang naandang trabaho. Usab adunay daghang Saksi ni Jehova nga naggikan sa Ukraine, Moldova, Alemanya, sa Tinipong Bansa, Pinlandia, Polandia ug ubang kanasoran. (Walay pagpihigpihig sa rasa ang mga Saksi ni Jehova. Luyo sa kamatuoran nga ang mga taga-Georgia, taga-Abkhaz, taga-Azerbaijan ug mga taga-Armenia nag-uban pagpuyo diha sa sentro, sulod sa upat ka tuig walay bisan usa ka panag-away.)

“Ang kadaghanang materyal sa konstruksiyon ug kahimanan gisuplay sa mga nasod sa Scandinavia, ug daghan ang gitagana usab nga walay bayad pinaagi sa mga isigkamagtutuo. Gipakitaan akog buldoser nga gidala sa usa ka Swekong Saksi ni Jehova ngadto sa Solnechnoye sa 1993. Gigamit niya kadto sa tanang panahon nga didto siya, ug una pa mipauli sa iyang nasod iyang gihatag kadto sa iyang mga igsoon sa pagtuo. Ang mga trabahante sa konstruksiyon gipapuyo sa hamugaway nga mga abtanan ug mga sak-anan. Ang ilang rutina sa trabaho ingon niini: 7:00 s.b.​—pamahaw ug mga pag-ampo; motrabaho sila gikan sa 8:00 s.b. hangtod sa 5:00 s.h. nga may usa ka oras alang sa paniudto. Sa mga Sabado motrabaho sila hangtod sa tingpaniudto, ug ang Dominggo maoy adlaw sa pagpahulay.

“Maayo ang ilang kaon ug kanunayng may prutas diha sa ilang menu. Kining relihiyona wala magsunod ug bisan unsang mga pagpuasa o estriktong mga lagda sa pagkaon sa bisan unsa pa man. Human sa trabaho, daghan ang moadto sa sauna ug dayon moinom ug serbesa ug maglingkodlingkod lamang sa pagpaminawg musika. Walay mga hubog taliwala sa mga Saksi ni Jehova, apan ang alkoholikong ilimnon wala usab gidili. Ang mga magtutuo gitugotan sa pag-inom ug kasarangang gidaghanon sa bino, cognac, vodka ug uban pa. Bisan pa niana, ang mga Saksi ni Jehova dili manabako.

***

“Tulo ka beses sa usa ka semana adunay mga klase sa pagtuon sa Bibliya, nga kasagarang gitambongan sa mga batan-on. Apan, kasagaran ang pagkakaplag niadtong kinsa nahimong mga Saksi ni Jehova sulod na sa 30-40 ka tuig. Halos ang tanang mga tigulang nakagugol ug panahon sa mga bilanggoan, mga kampong konsentrasyon ug sa pagkadestiyero. Human nga ang yugto sa pagdili natapos, daghang doktor, mga abogado, mga inhenyero, mga magtutudlo, mga negosyante, ug mga estudyante ang mianib sa pundok sa mga Saksi ni Jehova.

“Ang mga kongregasyon naningkamot sa pagpreserbar sa atmospera sa pagkamanagsama tali sa ilang mga membro. Pananglitan, bisan ang koordinetor sa administratibong sentro manghugas ug plato human sa panihapon kon iya nang turno. Ang mga Saksi ni Jehova nagtawag sa usag usa diha sa di-pormal nga paagi ug dasonan usab ug ‘brader’ o ‘sister’ sa dihang mosangpit sa usa ginamit ang ilang ngalan.

“Sa dihang supakon sa usa ka Saksi ni Jehova ang mga pagtulon-an sa Bibliya ug modumili sa paghinulsol, ipailalom siya sa labing seryosong porma sa silot​—siya ipalagpot. Ang tawo makatambong gihapon sa mga tigom, apan dili na siya tagdon sa iyang mga isigkamagtutuo. Ang dili kaayo bug-at nga silot mao ang pagbadlong.

***

“Migahin akog taas nga panahon sa pagpaniid sa mga Saksi ni Jehova aron masusi kon unsay nakapadani sa daghan kaayong matang sa mga tawo ngadto niining maong relihiyosong organisasyon. Uban sa tanang kalainan sa ilang mga personalidad, gidak-on sa edukasyon ug personal nga mga gusto ug dili gusto, [ang mga Saksi ni Jehova dili mopakig-ambit sa pagsimba duyog sa] mga relihiyon nga mokompromiso uban sa makasasalang kalibotan. Gil-asan sila sa mga dapit diin ang [mga tawo] kinahanglang mosunod nga lunod-patay sa awtoridad, diin adunay bahin sa mistisismo, diin ang mga tawo gibahin sa herarkiya ug sa masinundanong katawhan.

“Ang mga Saksi ni Jehova nailhan sa ilang lig-ong pagtuo sa pagkinabuhi sumala sa Bibliya. Naningkamot sila nga paluyohan ang ilang matag lihok uban niini o niana nga prinsipyo sa Bibliya, o pinaagi sa pagsitar ug usa ka teksto gikan sa Daan o Bag-ong Testamento. Ang mga Saksi ni Jehova nagtuo nga ang Bibliya ug ang Bibliya lamang ang naundan sa mga tubag sa tanang pangutana. Alang sa mga Saksi ni Jehova, ang Bibliya mao ang konstitusyon, ang kodigo sibil ug ang kinatas-ang kapahayagan sa kamatuoran.

“Tungod niining katarongana ang mga Saksi ni Jehova nailhan sa tibuok kalibotan ingong masinundanon pag-ayo sa balaod nga mga tawo ug ilabina sa ilang higpit nga tinamdan sa pagbayad ug mga buhis. Ang tax inspection office kanunayng magsusi kanila ug sa matag panahon matingala sa pagkaplag nga walay mga kalapasan sa bisan unsang paagi. Siyempre, ang mga Saksi ni Jehova makahimo, sama sa uban, sa pagsulay sa pagpangitag rason aron dili makabayad ug buhis, apan ang Bibliya nag-ingon nga ang usa kinahanglang magmatinud-anon sa pagbayad ug buhis, ug alang sa mga Saksi ni Jehova kini mao ang kataposang awtoridad.

“Bisan pa niana, ang ilang walay pagkompromisong tinamdan sa Bibliya kasagarang mao ang tinubdan sa pipila ka seryosong mga panagbangi tali sa mga Saksi ni Jehova ug sa kagamhanan. Ang ilang absolutong baroganan batok sa politika mao ang pangunang hinungdan sa kasungian, ug kini madayag mismo diha sa ilang pagdumili sa pag-alagad diha sa kasundalohan.

“Ang mga Saksi ni Jehova literal nga nagsabot sa mga pulong ni Jesus kon sa unsang paagi ang iyang mga tinun-an ug ang iyang gingharian dili bahin niining kalibotana, ug tungod niini nga rason sila modumili sa pag-apil sa politika ug gubat, walay sapayan kon diin ug alang sa unsang rason kana gibugno. Sanglit ang mga Saksi ni Jehova midumili sa pagsinggit ug ‘Heil Hitler’ ug sa pag-alagad sa kasundalohan ni Hitler, libolibong magtutuo ang gipangbalhog ngadto sa mga kampong konsentrasyon sa Nazi, ug linibo ang nangamatay. Ang matag Aleman nga Saksi ni Jehova nga mibuhis sa iyang kinabuhi gumikan sa pagdumili nga makigbahin sa pagsulong batok sa Unyon Sobyet, giila sa mga Ruso ingong usa ka tawo nga nakahimog usa ka dalayegon kaayong moral nga binuhatan. Sa samang panahon, hinunoa, daghang Ruso ang wala makiling sa pagbatig kaluoy alang niadtong [Ruso] nga mga Saksi ni Jehova nga gipamatay gumikan sa pagdumili sa paggamit ug armas ug pag-apil sa Gubat sa Kalibotan II, o kinsa gikondenar gumikan sa pagdumili sa pag-alagad diha sa kasundalohan sa mga panahon sa kalinaw. Apan sa maong mga kahimtang ang mga Saksi ni Jehova milihok sumala sa ilang relihiyosong tinuohan ug dili sa politikanhong mga kombiksiyon.

“Dili pa dugay ang susamang kahimtang mitungha sa Hapon, diin ang pipila ka estudyante nga mga Saksi ni Jehova midumili sa pagbansay ug martial arts ug nameligrong papahawaon gikan sa unibersidad. Sa 1996 ang Korte Suprema sa Hapon mipakanaog ug mando nga nagpaluyo sa mga katungod niining mga estudyanteha ug nagtugot kanila sa pagkuhag kapuling mga klase.

***

“Unsa ang bahin sa mga Saksi ni Jehova nga nakapahibulong sa modernong mga tighunahuna? Labaw sa tanan mao ang ilang pagsigeg sangyaw nga ang kataposan sa kalibotan haduol na (naghimo silag misyonaryong buluhaton diha sa kadalanan ug sa mga pultahan). Dili pa dugay ang mga ansiyano nagtambag sa mga magsasangyaw nga dili hatagag dakong pagpasiugda ang ‘kataposan sa kalibotan’ ug ang makaluluoy nga sangpotan nga dangatan sa mga makasasala, apan hinunoa ilang isaysay ngadto sa mga mamiminaw nga si Jehova nagatanyag kanilag kahigayonan sa pag-angkon ug ‘walay kataposang kinabuhi sa paraisong yuta.’

“Ang laing makapasamok mao ang negatibong tinamdan sa mga Saksi ni Jehova sa panagsagol sa pagtuo, ug ang ilang pagsalikway sa ekumenismo o kalihokan sa paghiusa sa tanang relihiyon sa kalibotan. Sila nagtuo nga ang Kristiyanong kalibotan nagbudhi sa Diyos ug sa Bibliya, ug nga ang tanang ubang relihiyon nasayop gayod pag-ayo. Ang mga Saksi ni Jehova nagtandi niining mga relihiyona ngadto sa ‘bigaon sa Babilonya,’ ug nag-ingon nga ang samang dulnganan modangat kanila. Ang bag-ong isyu sa ‘Pagmata!’ nag-ingon nga haduol na ang kataposan sa lainlaing mga relihiyon, ug nga ang bugtong relihiyon nga magpabilin mao ang usa nga ginasangyaw sa mga Saksi ni Jehova.

“Lain pay ato, ang mga Saksi ni Jehova miila sa katungod sa matag tawo sa kagawasan sa tanlag.

***

“Ubay-ubayng nasod ang mipahayag na ug kabalaka kon kaha hulga ba o dili ang mga pagtulon-an sa mga Saksi ni Jehova sa katilingban. Ang Korte Suprema sa estado sa Connecticut, Tinipong Bansa (1979) ug New South Wales, Australia (1972), ang Probinsiyal nga Korte sa British Columbia, Canada (1986) ug ubang mga korte mideklarar nga walay ebidensiya nga ang mga Saksi ni Jehova maoy hulga sa katilingban, o nga sila maoy hulga sa panglawas o emosyonal nga kahimtang sa mga tawo. Ang Korte sa Tawhanong mga Katungod sa Uropa (1993) milaban sa katungod sa mga Saksi ni Jehova sa kagawasan sa relihiyon, nga gilimitehan sa Gresya ug Austria. Karong adlawa ang mga Saksi ni Jehova nakasinatig paglutos sa 25 ka nasod . . .

“Ang mga Saksi ni Jehova maisip ingong panig-ingnan sa ilang isigkalungsoranon tungod sa ilang debosyon sa Biblikanhong kamatuoran ug sa ilang kaandam sa paglaban sa ilang tinuohan nga maisogon. Apan ang pangutana motungha: Andam ba ang atong katilingban sa pagtaganag konstitusyonal nga mga garantiya sa kagawasan sa tanlag ngadto sa mga organisasyon nga kusganong mopahayag sa ilang pagdangop sa Bibliya sa tanang bahin sa kinabuhi sa bug-os ug dili-mokompromisong paagi?”

Niining kataposang tudling pulong, si G. Ivanenko nagpatunghag hinungdanong pangutana. Sa unang siglo, si apostol Pablo, nga gipiling direkta ni Kristo aron moalagad ingon nga iyang hawas, miantos ug mapihigong “mga gapos sa prisohan.” Busa, si Pablo misulat ngadto sa mga isigkamagtutuo bahin sa iyang mga paningkamot “sa pagdepensa ug sa legal nga pagpundar sa maayong balita.”​—Filipos 1:7; Buhat 9:​3-​16.

Ang mga Saksi ni Jehova karon nagdasig sa tanan sa pagsusi pag-ayo sa ilang mga buluhaton, sama sa gihimo ni G. Ivanenko. Kami masaligon nga kon buhaton kana sa mga tawo, ilang makaplagan nga ang negatibong mga taho bahin sa mga Saksi dili tinuod, sama ra nga ang maong mga taho bahin sa unang mga Kristohanon dili usab tinuod. Labaw sa tanan, ang mga Saksi nagtuman sa “bag-ong sugo” nga gihatag ni Jesus sa iyang mga tinun-an: “Maghigugmaay sa usag usa; ingon sa akong paghigugma kaninyo.”​—Juan 13:​34, 35.

[Kahon sa panid 23]

MN Payl

(Ang mosunod nga impormasyong gikan sa mga payl sa Moscow News gipatik duyog niining artikuloha ni Sergei Ivanenko.)

“Ang mga Saksi ni Jehova sa Rusya maoy bahin sa tibuok-kalibotang Kristohanong organisasyon nga naglihok sa 233 ka nasod ug adunay 5.4 ka milyong membro. Ang mga Saksi ni Jehova nagsunod sa espirituwal nga pagtultol sa Nagamandong Lawas nga nahimutang sa Brooklyn, New York. Ang modernong adlaw nga organisasyon sa mga Saksi ni Jehova naugmad gikan sa usa ka klase sa pagtuon sa Bibliya nga giporma niadtong 1870 ni Charles Taze Russel sa Pittsburgh, Pennsylvania. Ang organisasyon midangat sa Rusya niadtong 1887. Ang usa sa unang Ruso nga Saksi ni Jehova, si Semyon Kozlitsky, gidestiyero gikan sa Moscow ngadto sa Siberia sa 1891. Bisan pa sa paglutos nga giantos sa organisasyon, sa 1956 adunay 17,000 ka Saksi ni Jehova sa Unyon Sobyet. Maoy sa Marso 1991 lamang nga ang mga Saksi ni Jehova giila sa Rusya, human ang pagpasar sa balaod nga ‘Bahin sa Kagawasan sa Relihiyon.’ Karon adunay kapin sa 500 ka grupo nga adunay duolag 70,000 ka membro nga aktibo sa Rusya. Ang organisasyon nag-apod-apod ug mga kopya sa ‘Bantayanang Torre’ (gipatik sa 125 ka pinulongan, nga may sirkulasyon nga 20 milyones) ug ang ‘Pagmata!’ (sa 81 ka pinulongan, nga may sirkulasyon nga 18 milyones).”

[Hulagway sa panid 23]

Bahin sa mga tinukod sa sangang buhatan sa Rusya

[Hulagway sa panid 24]

Ang Kingdom Hall diin ang pamilya sa sangang buhatan sa Rusya magtigom aron magtuon sa Bibliya

[Mga hulagway sa panid 25]

Ang mga pamilyang Saksi tingob nga magtuon ug magpahimulos sa lingawlingaw

[Mga hulagway sa panid 26]

Ilang gipaambit ang kahibalo sa Bibliya ngadto sa uban