Gikan sa Among mga Magbabasa
Atake sa Kasingkasing Ako nagpasalamat nga nahimong bahin sa usa ka organisasyon nga, gawas nga naggiya kanamo sa espirituwal, nagpakabana sa among pisikal nga kaayohan. Ang seryeng “Atake sa Kasingkasing—Unsay Mahimo?” (Disyembre 8, 1996) nagtudlo kanamo kon unsaon pag-ila sa mga simtoma sa atake sa kasingkasing. Sa dihang ang akong ugangang-lalaki nagpadayag niini nga mga simtoma, among naamgohan nga tingalig kuyaw ang iyang kahimtang ug gidala siya sa ospital. Giatake siya sa kasingkasing; apan human sa 24 ka adlaw sa ospital, siya naluwas sa kapeligrohan.
E. S., Brazil
Ang akong amahan namatay gumikan sa aortic aneurysm niadtong 1995, busa sa dihang una nakong nakita kini nga isyu, wala akoy kaisog nga basahon kini. Apan, gibasa ko kini usa ka bulan sa ulahi, ug ang mga artikulo nakapahupay kanako, nga nahibalo nga ang uban nakasinati sa kaguol nga ipahinabo sa sakit sa kasingkasing diha sa pamilya.
S. J., Canada
Sa miaging Hulyo ang akong bana nalup-og samtang nagsangyaw sa balay-ug-balay ug kinahanglang dalidaling dad-on sa ospital. Ikalipay, siya naluwas. Ang inyong mga artikulo migula sa tukmang panahon alang kanamo. Nakapahilak kanamo ang bahin nga “Mga Pamilya Nagkinahanglag Pagpaluyo,” tungod kay ingon gayod niana ang among gibati.
M. A., Hapon
Sa miaging Dominggo mibati akog pagngulngol sa akong walang bukton ug pagpaminhod sa tumoy sa akong mga tudlo. Akong gihunahuna nga normal lamang kini nga mga pagngulngol ug mga sakit. Sa dihang nabasa nako ang inyong mga artikulo bahin sa atake sa kasingkasing, ako nakamatikod nga nag-antos ako sa maong mga simtoma! Miadto ako sa emerhensiyang lawak sa ospital, ug ang mga doktor nakakaplag nga ang usa sa pangunang mga ugat sa akong kasingkasing naabongan. Sila naghimog operasyon pagkasunod adlaw. Kon wala masulat ang inyong mga artikulo, posible kaayo nga wala ako dinhi karon nga nagsulat niini nga pasalamat!
N. S., Tinipong Bansa
Labaw ko gayod nga gipabilhan ang kahon nga “Mga Simtoma sa Atake sa Kasingkasing.” Kini nakapaamgo kanako nga kamo nagbaton ug dulot nga interes sa among mga suliran ug kamo naghatag kanamo kon unsay among gikinahanglan aron sa pagsagubang niini.
M. B., Senegal
Sukad nga giatake sa kasingkasing ang akong amahan, nausab pag-ayo ang kinabuhi sa among panimalay. Sulod niining lisod nga mga panahon, ang mga artikulo nakapahupay ug dako kanamo.
P. G., Italya
Pagpasakop sa Asawa Ako gayod nga gipabilhan ang artikulong “Ang Hunahuna sa Bibliya: Pagpasakop sa Asawa—Unsay Kahulogan Niini?” (Disyembre 8, 1996) Ang akong bana dili-magtutuo, ug lisod magpasakop kaniya usahay. Buot kong ipakita ang kinamaayohang panig-ingnan nga akong maarangan aron makabig ko siya. (1 Pedro 3:1) Apan, buot kong mobarog nga lig-on sa akong pag-alagad kang Jehova. Ang inyong artikulo nakapadasig kanako, ug nakapalipay kanako ang pagkahibalo nga ang akong Diyos nagbantay kanako.
M. S., Tinipong Bansa
Akong nakaplagan ang artikulo nga matulon-anon kaayo. Tungod kay ang mga pagpit-os gikan kang Satanas nagakadaghan, among gikinahanglan ang sama niini nga matang sa impormasyon aron makapabilin diha sa pagtuo. Ilabina akong nalipay sa panig-ingnan ni Abigail sa Bibliya ug ang punto kabahin sa asawa nga angayng magpakita ug pagkamailahon ug dili pabationg sad-an tungod sa paghimog kinaugalingong paglihok sa pipila ka kahimtang.
D. M., Tinipong Bansa
Louis Pasteur Ako 12 anyos ug buot kong pahibaloon kamo nga akong gipabilhan ang artikulong “Si Louis Pasteur—Kon Unsay Gipadayag sa Iyang Kalihokan.” (Disyembre 8, 1996) Kami nagtuon bahin kaniya sa akong klase sa siyensiya. Akong gigamit kini nga artikulo sa pag-andam ug usa ka sinulat nga taho ug nakadawat ug dugang nga napulo ka puntos sa akong mga grado!
A. P., Tinipong Bansa