Usa ka Walay-Suliran nga Paraiso—Sa Dili Madugay Usa ka Kamatuoran

“IKAW mahiuban kanako sa Paraiso.” Pagkamapasaligon nianang mga pulonga sa tawong may kriminal nga kagahapon! Wala, wala siya maghunahuna nga siya makalikay sa kalayonhong impiyerno ug mahilangit kon siya mamatay. Hinunoa, ang kawatan nga tupad ni Jesus nahupayan sa paglaom nga siya banhawon sa dihang ipasig-uli na sa yuta ang Paraiso. Matikdi, palihog, kon kinsay nagsulti nianang talagsaong pahayag bahin sa Paraiso​—ang kaugalingong Anak sa Diyos, si Jesu-Kristo.​—Lucas 23:43.

Unsay nag-aghat kang Kristo sa pagsaad ug Paraiso? Ang kawatan nangamuyo: “Jesus, hinumdomi ako sa dihang mahiadto ka na sa imong gingharian.” (Lucas 23:42) Unsa kining Gingharian, ug unsay koneksiyon niana ug sa yutan-ong paraiso? Giunsa pagpasalig niini nga ang Paraiso unya walay suliran?

Ang Gahom nga Magdalag Paraiso

Mouyon ka nga ang tinuod nga paraiso moabot lamang sa yuta kon mahanaw ang tanang presenteng-adlaw nga mga suliran. Sa pagkakaron ang tawhanong mga paningkamot sa pagwagtang niini napakyas, ingon sa gipamatud-an pag-ayo sa kasaysayan. Ang Hebreohanong manalagna nga si Jeremias miadmitir: “Ako nasayod, Oh Jehova, nga . . . wala diha sa tawo nga nagalakaw ang pagtultol sa iyang lakang.” (Jeremias 10:23) Nan, kinsa ang makawagtang sa tanang presenteng-adlawng mga suliran?

Paghinobra sa Klima ug Polusyon. Sa dihang ang mabangis nga unos sa Dagat sa Galilea mipatunghag dagkong mga balod nga nagpameligro sa sakayan nga malunod, gipukaw sa mga tripulante ang ilang nagapanawng kauban gikan sa iyang pagkatulog. Sa baylo, siya yanong miingon sa dagat: “Paglinaw! Hilom!” Ang rekord sa Ebanghelyo ni Marcos miasoy kon unsay nahitabo: “Ang hangin milurang, ug ang dakong kalinaw miabot. (Marcos 4:39) Ang maong nagapanawng kauban walay lain kondili si Jesus. Siya may gahom sa pagkontrolar sa klima.

Samang Jesus ang mitagna pinaagi kang apostol Juan nga moabot ang panahon sa dihang ang Diyos ‘magagun-ob niadtong nagagun-ob sa yuta.’ (Pinadayag 1:1; 11:18) Dili kini imposibleng katakos alang sa Usa nga nagwagtang sa tibuok kalibotan sa dili-diyosnong katawhan sa Lunop sa adlaw ni Noe.​—2 Pedro 3:5, 6.

Krimen ug Kapintasan. Ang Bibliya nagsaad: “Ang mga mamumuhat ug daotan pagaputlon, apan kadtong nagalaom kang Jehova maoy magapanunod sa yuta. Apan ang mga maaghop mismo makapanunod sa yuta, ug sila makakaplag sa ilang tumang kalipay diha sa kadagaya sa pakigdait.” (Salmo 37:9, 11) Lain pa, ang Diyos, si Jehova, ang nagsaad nga mawagtang ang tanang krimen ug kapintasan, nga nag-andam sa Paraiso alang sa maaghop.

Kakabos ug Kagutmanan. Ang presenteng-adlaw nga inhustisya nagtugot sa mga gobyerno sa usa ka dapit sa kalibotan nga magtipig ug mga kalan-on nga sobra ka daghan samtang sa samang panahon ang pobreng mga nasod nakigbisog sa kakabos. Ang mga ahensiya nga nanghatag ug hinabang, nga gisuportahan sa nabalakang mga tawo sa tibuok-kalibotan, naningkamot sa pagtagana sa pangunang mga panginahanglan apan sagad napakyas sa dihang ang mga plano sa pag-apod-apod mabungkag tungod sa kawalay balaod ug kalinaw. Itandi kini sa girekord sa manalagnang si Isaias: “Si Jehova sa mga panon magahimo gayod alang sa tanang katawhan, niining bukira, ug usa ka kombira sa matambok nga mga pagkaon, usa ka kombira sa bino nga pinalugdang, sa matambok nga mga pagkaon nga puno sa utok, sa bino nga pinalugdang, nga sinala.” (Isaias 25:6) Dili ba wala unya niana ang kanihit sa pagkaon ug kagutmanan? Tino gayod.

Gubat. Ang mga pagsulay sa pagmando niining yutaa pinaagi sa usa ka awtoridad nga saylo sa nasodnong utlanan napamatud-ang wala molampos. Ang Liga sa mga Nasod, nga gitukod niadtong 1920, napakyas nga mapugngan ang pagbuto sa Gubat sa Kalibotan II ug nahugno. Ang Hiniusang Kanasoran, nga subsob gibayaw ingong kinamaayohang paglaom alang sa pakigdait, nanlimbasog nga ilayo ang magkaatbang nga mga partido sa mga dapit nga giawayan. Luyo sa namantalang mga paningkamot niini sa pakigdait, nagdaghan ang mga gubat, sibil man, etniko, o katilingbanon. Ang Ginghariang kagamhanan sa Diyos nagsaad sa pagwagtang sa presenteng-adlawng naggubatayng mga pundok ug nag-edukar sa mga sakop niini diha sa mga dalan sa pakigdait.​—Isaias 2:2-4; Daniel 2:44.

Pamilya ug Pagkahugno sa Moral. Kaylap ang pagkabungkag sa pamilya. Nagdaghan ang delingkuwensiya sa mga kabataan. Ang imoralidad kaylap sa tanang hut-ong sa tawhanong katilingban. Bisan pa niana, ang mga sukdanan sa Diyos nagpabiling wala mausab gikan sa sinugdan. Si Jesus nagpamatuod nga “ang usa ka lalaki mobiya sa iyang amahan ug sa iyang inahan ug motapot sa iyang asawa, ug ang duha mahimong usa ka unod . . . Busa, kon unsay giusag yugo sa Diyos ayaw ipabulag ni bisan kinsang tawo.” (Mateo 19:5, 6) Si Jehova nga Diyos dugang nagsugo: “Pasidunggi ang imong amahan ug ang imong inahan . . . aron magmauswagon ka ug ikaw motunhay sa taas nga panahon sa yuta.” (Efeso 6:2, 3) Ang maong mga sukdanan mangibabaw sa yuta ubos sa Gingharian sa Diyos.

Sakit ug Kamatayon. “Si Jehova . . . magluwas kanato,” misaad ang manalagnang si Isaias, “ug walay molupyo ang moingon: ‘Ako may sakit.’” (Isaias 33:22, 24) “Ang suhol nga ginabayad sa sala maoy kamatayon,” miadmitir ang Kristohanong apostol Pablo, “apan ang gasa nga ginahatag sa Diyos maoy kinabuhing walay-kataposan pinaagi ni Kristo Jesus.”​—Roma 6:23.

Si Jehova nga Diyos magwagtang niining tanang suliran pinaagi sa iyang langitnong kagamhanan diha sa mga kamot sa iyang Anak, si Kristo Jesus. Ugaling, ikaw tingali moingon, ‘Kini nga kahubitan daw samag usa ka Utopianong damgo. Segurado, kini makapahimuot gayod kon kini matuman, apan matuman kaha kini?’

Usa ka Presenteng Kamatuoran

Alang sa daghan, ang posibilidad sa pagkinabuhi sa usa ka walay-suliran nga paraiso dinhi mismo sa yuta daw dili-tinuod nga pagkamalaomon. Kon ingon niana ang imong gibati, susiha ang kamatuoran nga kini mismo mahitabo.

Ang mga Saksi ni Jehova sa pagkakaron maoy internasyonal nga komunidad sa kapin sa lima ka milyong mga tawo kinsa aduna nay relatibong palibot nga walay-suliran diha sa ilang 82,000 ka kongregasyon nga nakatag sa 233 ka kayutaan. Ikaw mahimong mobisita sa bisan hain sa ilang mga panagkatigom, sa dagko o gagmay, ug unsay imong makaplagan?

(1) Usa ka Maayo, Hinlong Atmospera. Nagkomento sa usa ka kombensiyon sa mga Saksi ni Jehova sa Norwich, Inglaterra, ang manedyer sa potbol nga estadyum miingon: “Ang malinawong atmospera sa upat ka adlaw . . . maoy mananakod. Masinati nimo ang personal nga kalinaw nga bug-os lahi nianang sa ubang upat ka adlaw diha sa may tensiyong kalihokan sa kalibotan ug sa inadlaw nga kinabuhi palibot kanato. Ang mga Saksi maoy lahi gayod ug kini lisod nga ikapatin-aw.”

Usa ka magtatambag sa pagbansay sa industriya sa konstruksiyon nga miduaw sa mga buhatan sa mga Saksi ni Jehova sa London miingon: “Ako nakadayeg gayod sa akong nakita ug nadungog ug nahupngan kaayo sa atmospera sa bug-os nga pakigdait ug kalinaw nga naglungtad dili lamang sa inyong mga tinukod kondili usab taliwala sa [mga lalaki ug mga babaye]. Gibati ko nga ang inyong paagi sa kinabuhi ug kalipay daghag ikatudlo sa uban niining magubtanong kalibotan.”

(2) Kasegurohan ug Pakigdait. Usa ka kolumnista sa Journal de Montréal sa Canada misulat: “Dili ako usa ka Saksi. Apan ako mismo nahibalo sa kamatuoran nga ang mga Saksi nagpamatuod sa kaepisyente ug sa maayong pamatasan. . . . Kon sila lamang ang mga tawo sa kalibotan, inigkagabii dili na kita magtrangka sa atong mga pultahan ug magtaod ug alarma sa kawatan.”

(3) Ang pagkamaunongon sa Ginghariang kagamhanan sa Diyos nagpaila sa mga Saksi. Ang ilang neyutral nga baroganan nakapalagot sa uban, bisag kana dili kinahanglan. Ang ilang dili pag-apil-apil sa presenteng-adlaw nga pag-ayom-ayom sa politikanhong mga laraw wala magsumikad sa kawalay interes sa pagpauswag sa katilingban. Hinunoa, sila naningkamot nga molihok sa paagi nga makapahimuot sa usa nga nagmando pinaagi sa usa ka langitnong kagamhanan, sa ato pa, ang Maglalalang sa yuta, si Jehova nga Diyos.

Ang mga pagtulon-an sa mga Saksi, nga gipasukad sa katibuk-an diha sa Pulong sa Diyos, ang Bibliya, nagpugong kanila gikan sa pagkahulog ngadto sa lit-ag sa pagkahimong usa ka sekta o kulto. Sila may malulotong kaikag sa tanang ubang katawhan, bisag unsa pa ang relihiyosong pagpangdani. Dili, sila dili mosulay sa pagpugos niining mga tawhana sa pag-usab sa ilang panglantaw. Naningkamot sila sa pagsundog sa ilang Lider, si Kristo Jesus, pinaagi sa pagpresentar sa ebidensiya sa Kasulatan bahin sa walay-suliran nga Paraiso nga sa dili madugay tukoron sa yuta.​—Mateo 28:19, 20; 1 Pedro 2:21.

(4) Espirituwal nga Kahimsog ug Kalipay. Sa pagkatinuod, wala mangangkon ang mga Saksi ni Jehova nga bug-os walay suliran niining panahona. Imposible kini taliwala sa mga tawong may timaan sa napanunod nga sala gikan kang Adan. Apan pinaagi sa tabang sa balaang espiritu sa Diyos, sila naningkamot sa pag-ugmad sa personal nga mga hiyas sama sa “gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Ang ilang pagsimba kang Jehova pinaagi ni Kristo Jesus ang nagpahiusa kanila ug naghupot nga buhi sa ilang mga paglaom.

Masaligon kami nga ang imong pagduaw sa lokal nga tigomanan sa mga Saksi mokombinsir kanimo nga ang Diyos magbag-o sa yuta ngadto sa usa ka literal nga paraiso.

Mawala na ang presenteng-adlaw nga mga suliran. Bisan ang nagpabiling pagkadili-hingpit inanay nga mawala samtang ikapadapat ang mga kaayohan sa halad lukat ni Kristo ngadto sa masinugtanong katawhan. Oo, imong mabatonan ang hingpit nga panglawas ug kalipay.

Ang yanong mga pagpangandam motabang kanimo sa pagpahimulos sa maong palaaboton. Hangyoa ang mga Saksi alang sa imong personal nga kopya sa librong Kahibalo nga Motultol sa Kinabuhing Walay Kataposan.a Pinaagi niini ikaw, sa mubong panahon, makakat-on kon unsa ang gikinahanglan sa Diyos kanimo aron ikaw usab makatagamtam sa kinabuhi sa usa ka walay-suliran nga paraiso sa walay kataposan.

[Footnote]

[Blurb sa panid 10]

Ang mga pagtulon-an sa mga Saksi, nga gipasukad sa katibuk-an diha sa Bibliya, nagpugong kanila gikan sa pagkahimong usa ka sekta o kulto

[Mga hulagway sa panid 8, 9]

Ang pundasyon gipahimutang na karon alang sa usa ka walay-suliran nga paraiso

Sa dili madugay, usa ka pisikal nga paraiso ang maglungtad sa tibuok yuta