Ang Hunahuna sa Bibliya

Ang Pagkaermitanyo ba Mao ang Yawi sa Kaalam?

“ANG mga ermitanyo nagsul-ob ug mga puthawng tanikala, mga kadena, nagbakos ug sinimaang mga alambre ug tunokong mga kuwelyo . . . Ang uban moligid diha sa mga sampinit ug mga tunok, nga nagpapaak sa mga insekto, nagsunog sa ilang kaugalingon ug nagsigeg tandog sa ilang mga samad aron magnana. Ang makapagutom nga diyeta maoy naandan, gipagrabe pa kini sa pipila pinaagig pagkaon lamag pan-os o kaha makaluod nga pagkaon.”​—The Saints, ni Edith Simon.

Kini ang mga ermitanyo. Nganong gilisodlisod nila pag-ayo ang ilang kaugalingon? Sa librong For the Sake of the World​—The Spirit of Buddhist and Christian Monasticism, ang mga awtor misaysay nga “sukad pa sa panahon ni Socrates (ikalimang siglo W.K.P.) labing menos, kaylap nang nasabtan nga ang gipayano pag-ayong kinabuhi, nga wala mabug-ati sa lawasnon ug materyal nga mga kaluho, maoy gikinahanglan alang sa lunsay nga kaalam.” Ang mga ermitanyo naghunahuna nga ang pagsakit sa lawas magpausbaw sa ilang espirituwal nga pagbati ug motultol ngadto sa tinuod nga kalamdagan.

Lisod ang pagbadbad sa pagkaermitanyo sa tukmang paagi. Alang sa pipila, kini nagkahulogan lamag pagdisiplina sa kaugalingon o pagdumili sa kaugalingon. Ang unang mga Kristohanon nagpabili sa maong mga hiyas. (Galacia 5:22, 23; Colosas 3:5) Si Jesu-Kristo mismo nagrekomendar sa usa ka yanong kinabuhi nga wala mababagi sa mga kabalaka nga ipatungha sa materyalistikanhong paagi sa kinabuhi. (Mateo 6:19-​33) Apan, kasagaran, ang pagkaermitanyo nalangkit sa mas dugang pang kapig-ot ug kasagaran naghinobrang mga pamaagi, sama nianang gihubit sa ibabaw. Kini bang mga kalihokan sa ermitanyo, ilabina ang mas grabeng mga matang niini, mao gayod ang yawi sa kaalam?

Pinasukad sa Sayop nga mga Pagtuo

Lakip sa mga pilosopiya nga nagpatungha sa pagkaermitanyo mao ang ideya nga ang materyal nga mga butang ug pisikal nga mga kalipay maoy kinaiyanhong daotan ug busa mga babag sa espirituwal nga pag-uswag. Ang laing ideya nga nagbukas sa dalan alang sa pagkaermitanyo mao ang kaylap ug dinawat nga pagtuo nga ang tawo nalangkoban sa usa ka lawas ug usa ka kalag. Ang mga ermitanyo nagtuo nga ang materyal nga lawas mao ang bilanggoan sa kalag ug ang unod mao ang kaaway niini.

Unsay giingon sa Bibliya? Ang Kasulatan nagpakita nga sa dihang ang Diyos nagkompleto sa iyang kalalangan sa yuta, iyang gipahayag nga ang tanang butang nga iyang gihimo​—ang tanan niyang pisikal, materyal nga kalalangan​—maoy “maayo kaayo.” (Genesis 1:31) Katuyoan sa Diyos nga ang lalaki ug babaye nga diha sa tanaman sa Eden makatagamtam sa materyal nga mga butang. Ang ngalan mismong Eden nagkahulogag “Kalipay” o “Kahimuot.” (Genesis 2:8, 9) Hingpit si Adan ug Eva ug nagpahimulos sa usa ka maayong relasyon uban sa ilang Maglalalang hangtod sila nakasala. Sukad niadto, ang pagkadili-hingpit nahimong babag tali sa Diyos ug sa tawo. Apan, ang pagtagbaw sa tukmang mga tinguha sa tawo o ang pagtagamtam sa hinatag sa Diyos nga pisikal nga mga kalipay kon buhaton uyon sa mga balaod sa Diyos sa moral dili gayod makahimog babag sa komunikasyon tali sa Diyos ug sa iyang mga magsisimba!​—Salmo 145:16.

Dugang pa, ang Bibliya tin-awng nagtudlo nga ang tawo, nga gilalang gikan sa abog ug hinimo sa unod, maoy usa ka kalag. Ang Kasulatan wala gayod magpaluyo sa ideya nga ang kalag maoy samag dili-materyal ug dili mamatay nga butang nga ginapos sulod sa pisikal nga lawas ni sa ideya nga sa usa ka paagi ang unod nagpugong sa usa gikan sa pagbaton ug suod nga relasyon uban sa Diyos.​—Genesis 2:7.

Tin-aw, ang ideya sa pagkaermitanyo naghatag ug tinuis nga hulagway sa relasyon sa tawo uban sa Diyos. Si apostol Pablo nagpahimangno nga ang pipila ka nag-angkong mga Kristohanon mas gusto pa sa malimbongon tawhanong mga pilosopiya kay sa paninugdang mga kamatuoran sa Bibliya. (1 Timoteo 4:1-5) Maylabot sa pipila nga naghupot niining hunahunaa, ang usa ka relihiyosong historyador nag-ingon: “Ang pagtuo nga daotan ang materya . . . ug nga ang kalag sa tawo kinahanglang ipahigawas gikan sa pagkagapos sa materya, nagdasig sa hilabihang pagkaermitanyo nga nagdili sa pagkaon ug karne, seksuwal nga panagluon ug uban pa, nga masunod lamang sa pinili nga ‘mga hingpit’ o perfecti nga mipailalom sa linaing tulumanon.” Kining paagiha sa panghunahuna walay Kasulatanhong pagpaluyo ug dili maoy pagtuo sa unang mga Kristohanon.​—Proverbio 5:15-​19; 1 Corinto 7:4, 5; Hebreohanon 13:4.

Walay Panginahanglan sa Pagkaermitanyo

Si Jesus ug ang iyang mga tinun-an dili mga ermitanyo. Ilang giagwanta ang nagkalainlaing mga pagsulay ug mga kasakitan, apan kini nga mga kasakitan wala gayod nila ipahamtang sa ilang kaugalingon. Si apostol Pablo nagpahimangno sa mga Kristohanon nga magmabinantayon kay basig ang malimbongon tawhanong mga pilosopiya maghaylo kanila gikan sa kamatuoran sa Pulong sa Diyos ug magtultol kanila ngadto sa dili-makataronganon, naghinobrang mga panggawi. Tino nga gihisgotan ni Pablo ang “usa ka mapig-ot nga pagtratar sa lawas.” Siya miingon: “Kadto mismong mga butanga, sa pagkatinuod, nagbaton sa panagway sa kaalam sa gisangon-kaugalingon nga paagi sa pagsimba ug pakaaron-ingnon nga pagpaubos, usa ka mapig-ot nga pagtratar sa lawas; apan kini sila walay bili sa pagpakigbugno sa pagtagbaw sa unod.” (Colosas 2:8, 23) Ang pagkaermitanyo dili motultol ngadto sa linaing pagkabalaan o tinuod nga pagkanalamdagan.

Tinuod, ang dalan sa Kristohanong pagkamasinundanon nagpasabot ug tininuod nga paningkamot ug pagdisiplina sa kaugalingon. (Lucas 13:24; 1 Corinto 9:27) Ang usa kinahanglang maningkamot sa pagbaton ug kahibalo sa Diyos. (Proverbio 2:1-6) Usab, ang Bibliya kusganong nagpahimangno batok sa pagkaulipon ngadto sa “mga tinguha ug mga kalipayan” ug pagkahimong “mga mahigugmaon sa kalipayan inay nga mga mahigugmaon sa Diyos.” (Tito 3:3; 2 Timoteo 3:4, 5) Bisan pa niana, kining Kasulatanhong mga teksto wala mag-endosar sa tulumanon sa pagkaermitanyo. Si Jesu-Kristo, usa ka hingpit nga tawo, nagpahimulos ug makapalipayng mga okasyon nga naglakip sa pagkaon, ilimnon, musika, ug sayaw.​—Lucas 5:29; Juan 2:1-​10.

Ang tinuod nga kaalam maoy makataronganon, dili maghinobra. (Santiago 3:17) Gilalang ni Jehova nga Diyos ang atong pisikal nga mga lawas uban ang katakos sa pagtagamtam sa mga kalipay sa kinabuhi. Buot niyang kita magmalipayon. Ang iyang Pulong nag-ingon kanato: “Akong nasayran nga wala nay mas maayo pa alang kanila kay sa pagkalipay ug sa pagbuhat ug maayo samtang buhi pa ang usa; ug usab ang tagsatagsa ka tawo kinahanglang mokaon ug moinom gayod ug magkalipay sa tanan niyang paghago. Kini maoy gasa sa Diyos.”​—Ecclesiastes 3:12, 13.

[Picture Credit Line sa panid 20]

Saint Jerome in the Cavern/The Complete Woodcuts of Albrecht Dürer/Dover Publications, Inc.