Usa ka Talagsaong Panag-uliay
SINULAT SA KORESPONSAL SA PAGMATA! SA BRITANYA
SI Bruce dos anyos niadtong 1945 sa dihang si Marie, nga iyang inahan, ulahing nakakita kaniya. Human makigdiborsiyo si Marie, ang amahan ni Bruce ang gihatagan ug legal nga katungod sa pag-atiman kaniya. Nagpukgo sa iyang kinaiyanhong mga pagbati, mihukom si Marie nga kadto maoy alang sa kaayohan sa iyang anak nga ang iyang amahan ug iyang bag-ong asawa ang magpadako kaniya, nga walay bisan unsang emosyonal nga pagpanghilabot gikan kaniya. Human niadto, wala na siyay kontak kang Bruce sa bug-os.
Pila ka tuig sa ulahi naminyo pag-usab si Marie ug nakabaton ug laing anak lalaki, apan siya naghunahuna gihapon kang Bruce. Asa na kaha siya? Unsa na kahay nahitabo kaniya?
Sa dihang namatay ang amahan ni Bruce niadtong 1976, mitambong si Marie sa iyang lubong. Si Bruce, nga niadtong tungora usa na ka buotang batan-on nga mga 30 anyos ang edad, diha uban sa iyang inaina. Sanglit si Marie nagtuo gihapon nga si Bruce nagdahom nga ang iyang inaina maoy iyang tinuod nga inahan, gibati niyang dili maluloton nga magpaila siya ngadto kaniya, ilabina niadtong tungora. Lahi unta gayod ang buhaton ni Marie kon nahibaloan pa niya nga si Bruce gisalikway sa iyang amahan human siya maminyo pag-usab ug gipadako sa iyang apohan nga babaye.
Halos niining panahona nahibalag ni Marie si Sue, nga usa sa mga Saksi ni Jehova, ug miuyon dayon nga magpatuon sa Bibliya sa balay. Sa samang panahon, nga nagkaatol, si Bruce ug iyang asawa nagsugod pagtuon sa Bibliya uban sa bana ni Sue, nga si Alan. Apan, wala magdugay tungod sa mga suliran sa panglawas, giundang ni Marie ang iyang pagtuon ug mibalhin.
Si Marie nakontak na usab sa mga Saksi ni Jehova niadtong 1995. Gipadayon niya ang iyang pagtuon sa Bibliya ug mihimog kusog nga pag-uswag. Samtang hapit na siyang mabawtismohan, misugilon si Marie sa usa ka Kristohanong ansiyano bahin kang Bruce. Ang ansiyano mihimog mga pakisayod ug nakadiskobreng dili lamang si Bruce ug iyang pamilya maoy mga Saksi ni Jehova kondili si Bruce maoy usa ka ansiyano sa usa ka kongregasyon sa lungsod nga gipuy-an ni Marie!
Ang ubang mga ansiyano sa kongregasyon ni Bruce nabalaka. Kon sultihan nila si Bruce nga ang iyang inahan mabawtismohan sa sunod espesyal nga adlaw nga asembliya, unsa kahay iyang reaksiyon? Nahibalo ba kaha siya nga ang iyang inahan naglungtad? Apan, sa dihang nahibaloan ni Bruce ang mga kamatuoran, siya nagdalidali uban sa iyang pamilya sa paghimamat kang Marie. “Dili hinungdanon ang nangagi; ang umaabot maoy hinungdanon nga diha sa kamatuoran!” mao ang makapahupay nga mga pulong ni Bruce samtang gigakos niya ang iyang inahan.
Sa Marso 1996, si Marie, nga niadto 78 anyos na, gibawtismohan sa Assembly Hall sa mga Saksi ni Jehova sa East Pennine sa Inglattera—ni Bruce. Pagkadako sa kalipay ni Bruce nga nakita niya ang iyang inahan ingong usa ka espirituwal nga igsoong babaye!
[Hulagway sa panid 24]
Si Bruce, uban sa iyang inahan