Kinsay Manalipod sa Atong mga Anak?

MAKAPADASIG ang pagkahibalo nga ang pag-abuso sa bata sa pagkakaron giila ingong tibuok-kalibotang suliran. Ang mga paningkamot sama sa Stockholm Congress Against Commercial Sexual Exploitation of Children, nga gitambongan sa mga hawas gikan sa 130 ka nasod, naghatag ug pagtagad niining sulirana.

Dugang pa, ang ubang mga nasod sa pagkakaron nagpasaka ug pamalaod nga nagdili sa turismo sa sekso ug pornograpiya sa bata. Ang uban naghimo ganig listahan sa iladong mga tig-among-among ug bata, nga nagkuto sa ilang daling pagduol sa kabataan.

Unya anaa kadtong nagtinguha ug mas maayong kinabuhi alang sa kabataan pinaagi sa paghatag ug pamalaod aron sa pagpanalipod kanila. Ug ang pipila pa ka nasod ug mga tawo dili mopalit sa mga produkto nga gigama pinaagi sa pagpatrabaho sa bata.

Bisan tuod sa walay duhaduha modayeg kita sa maong mga paningkamot nga wagtangon sa katilingban ang pag-abuso sa bata, kita kinahanglang magmarealistikanhon ug moila nga ang pag-abuso sa bata nakagamot pag-ayo diha sa tawhanong katilingban. Dili realistikanhon ang paghunahuna nga ang yanong solusyon sama sa pamalaod magtagana ug bug-os nga panalipod sa atong mga anak. Daghan nang balaod ang gihatag, ug bisan pa niana nagpadayon ang suliran. Ang pagkadelingkuwente sa mga hamtong sa kalibotan tatawng gipadayag sa makapasubong kamatuoran nga ang kinaiyanhong katungod sa pagkabata kinahanglang panalipdan sa daghan kaayong balaod.

Ang mga balaod dili mao ang kataposang panalipod sa kabataan. Motan-aw lamang kita sa mga resulta sa dagkong pamalaod sama sa Kombensiyon sa mga Katungod sa Bata sa HK, nga niana daghang gobyerno ang mipirma. Daghag pamatuod nga daghan gani niining mga gobyernoha, kay nabug-atan pag-ayo sa ekonomikanhong mga restriksiyon, wala kaayoy nahimo sa paghunong sa pagpahimulos sa ilang kabataan. Ang pag-abuso sa bata nagpadayon nga usa ka pangunang internasyonal nga suliran.

Dakog Mahimo ang mga Ginikanan

Ang malamposong pagkaginikanan maoy tahas nga daghag kinahanglanon. Nagkinahanglan kinig sakripisyo. Apan ang nagtagad nga mga ginikanan kinahanglang magtino nga dili ang ilang mga anak ang gisakripisyo. Ang magasing Maclean’s nag-ingon nga kasagaran “ang pagkaginikanan gilantaw nga daw usa kini ka pasatiempo.” Ang usa ka dulaan mahimong ilabay o ang usa ka pasatiempo mahimong hunongon, apan ang pagkaginikanan maoy hinatag-Diyos nga responsabilidad.

Ang imong pagkahimong maayong ginikanan maoy usa sa labing bililhong mga gasa nga imong ikahatag sa imong anak, sanglit motabang kini kaniya nga makabaton ug malipayon, may kasegurohang pagkabata. Ang maong kasegurohan wala magdepende sa katilingbanon o ekonomikanhong kahimtang sa kinabuhi. Ang imong anak nagkinahanglan kanimo—sa imong gugma ug pagmahal, sa imong mga pasalig sa dihang siya mibating nameligro, ug sa imong panahon. Ang imong anak buot mamati sa imong tingog nga nag-asoy ug mga sugilanon, nagkinahanglan kanimo ingong sumbanan, ug nagkinahanglan sa imong mahigugmaong disiplina.

Bahin sa ulohan sa seksuwal nga moralidad—mga ginikanan, dumalaha ang inyong mga relasyon sa pamilya uban ang pagkamakasaranganon ug pagtahod sa hunahuna ug lawas sa inyong mga anak. Ang mga bata dali rang mahibalo kon unsang mga buhata ang molapas sa moral nga mga utlanan nga gipahiluna sa ilang mga ginikanan uban kanila. Kinahanglang tudloan sila kon unsaon nila paggawi sa sulod ug gawas sa balay. Kon mapakyas ka sa paghimo niini, lain ang mohimo niini alang kanimo, ug lagmit dili nimo maangayan ang resulta. Tudloi ang mga bata kon unsaon pagsanong kon nameligro sila sa moral. Pahibaloa sila kon para sa unsa ang ilang pribadong mga bahin sa lawas, ug tudloi sila nga kini dili pagaamong-amongan. Sultii sila kon unsaon pagsanong kon duolon sila ni bisan kinsa nga buot mopahimulos kanila.

Sa tanang panahon sayra kon asa ang inyong mga anak ug kinsay ilang kauban. Kinsa ang suod nga mga higala sa imong anak? Kinsa ang mga tig-atiman sa imong anak kon wala ka? Kasaligan ba sila? Siyempre, wala kana magpasabot nga ang usa ka ginikanan kinahanglang magduda sa tanan. Himoa ang hustong pagtimbangtimbang sa mga hamtong sa kinabuhi sa imong anak, nga naglantaw dili lang sa panggawas nga mga panagway.

Hunahunaa ang kaguol sa mga ginikanan kinsa nakadiskobre, nga ulahi na kaayo, nga ang ilang mga anak giabusohan sa sinaligang mga klerigo, mga magtutudlo, o bisan sa suod nga mga membro sa pamilya. Maayo alang kanimo ingong usa ka ginikanan nga pangutan-on ang imong kaugalingon, ‘Ang ako bang iglesya motugot o motabon sa pag-abuso sa bata? Ang ako bang relihiyon nangupot pag-ayo sa hataas nga moral nga mga prinsipyo?’ Ang mga tubag sa maong mga pangutana makatabang kanimo sa paghimog maalamong mga pagpili sa pagpanalipod sa imong mga anak.

Apan labaw sa tanan, paningkamoti nga tabangan sila nga mahibalo ug mahigugma sa mga prinsipyo sa Maglalalang, nga motabang sa pagpanalipod kanila gikan sa kadaot. Kon ang mga bata makakita nga nagtahod ang ilang mga ginikanan sa hataas nga moral nga mga prinsipyo, sila mas daling mosunod niining maayong panig-ingnan.

Ang Bugtong Tinuod nga Solusyon

Siyempre, dili ang mga balaod ni ang bug-at nga mga hukom mismo ang manalipod sa atong mga anak. Ang Maglalalang mismo pinaagi sa iyang dinasig nga Pulong, ang Bibliya, ang epektibong makapahinabo ug putli nga panggawi, pinaagi sa pagbag-o sa panghunahuna sa mananapong mga tawo ngadto nianang sa mahigugmaon ug moral nga mga membro sa bisan unsang komunidad.

Gipakita na nga posible kini. Daghan ang mitalikod sa ilang kanhing law-ay nga mga estilo sa kinabuhi. Sa pagkakaron sila nagtagana ug buhing pamatuod sa gahom sa Pulong sa Diyos. Apan bisan tuod kini maoy lakang padulong sa hustong direksiyon, ang kadaghanan sa mahilayong mga mamumuhat ug daotan dili magbag-o. Mao kini ang hinungdan kon nganong si Jehova nga Diyos misaad nga ang tanan nga nagpahimulos sa atong mga anak sa dili madugay paphaon gikan sa yuta—duyog sa ilang mga pilosopiya, ilang kaulag, ug ilang kadalo.—1 Juan 2:15-17.

Unya, sa bag-ong kalibotan sa Diyos, sa dihang ang kakabos mawala na, ang tanang bata makapahimulos sa dili-dinalidali ug walay-mag-among-among nga pagkabata, nga maoy ilang hinatag-Diyos nga katungod. Magpasabot kini dili lamang sa kataposan sa pag-abuso sa bata kondili usab sa kataposan sa tanang masakit nga mga handomanan nga nagdaot sa kinabuhi sa mga tawo karon: “Ang kanhing mga butang dili na pagahinumdoman, ni motungha pa kini sa hunahuna.”—Isaias 65:17.

Busa, sa bag-ong kalibotan sa Diyos, sa dakong paagi ang mga pulong ni Jesu-Kristo makabaton ug tinuod nga kahulogan: “Pasagdi lang ang mga bata, ug hunong sa pagbabag kanila sa pagduol kanako, kay ang gingharian sa mga langit [nga magmando ibabaw sa yuta, ang Paraisong pinuy-anan sa tawo] ilaha sa mga ingon kanila.”—Mateo 19:14.

[Hulagway sa panid 9]

Mataktikanhong tudloi ang inyong mga anak kon unsaon pagsanong kon gihulga sa seksuwal nga paagi

[Hulagway sa panid 9]

Ang imong pagkahimong maayong ginikanan maoy bililhong gasa alang sa inyong mga anak

[Hulagway sa panid 9]

Tabangi ang inyong mga anak sa pagkahibalo sa mga katuyoan ug mga prinsipyo sa Maglalalang

[Mga hulagway sa panid 10]

Sa bag-ong kalibotan sa Diyos, ang tanang bata makapahimulos sa ilang pagkabata sa bug-os