Usa ka Awit nga Wala Gayod Niya Malimti

“SA ESKUYLAHAN nakaawit ako ug usa ka alawiton nga may mga pulong, ‘ang halangdong Jehova naentrono sa iyang himaya.’ Ako kanunayng nahibulong, ‘Kinsa kining Jehova?’”

Kanang maong pamulong ni Gwen Gooch, usa sa mga Saksi ni Jehova ug kansang estorya sa kinabuhi gipatik diha sa Ang Bantayanang Torre, nakapukaw ug samang pagbati sa labing menos usa ka magbabasa.a Si Vera, nga taga-Seattle, Washington, T.B.A., nahinumdom, “Nakaagi usab ako niini sa hayskul.”

Human makadungog ug usa ka awit, si Vera, sama kang Gwen, naikag kaayo kon kinsa kaha kini si Jehova. Ang kaikag ni Vera natubag balik sa 1949 sa dihang gisultihan siya sa iyang igsoong lalaki bahin kang Jehova, ang personal nga ngalan sa Diyos diha sa Bibliya.

Si Vera maoy usa sa mga Saksi ni Jehova duolan na sa kalim-an ka tuig karon. Apan wala gayod siya makalimot nianang alawitona sa iyang panahon sa pagtungha sa hayskul. “Sa daghang katuigan,” matod pa niya, “misulay ako sa pagpangita sa tuboran niini.” Sa kataposan, uban sa tabang sa usa ka tindahan sa musika, siya milampos. Ang awit maoy gikan sa 1825 nga komposisyon ni Franz Schubert. Ang mga pulong nga nagduyog sa musika tinuod gayod nga nagdayeg kang Jehova. Pananglitan, ang pipila sa mga pulong mao ang mosunod:

“Halangdon si Jehova, ang Ginoo! kay ang Langit ug Yuta nagmantala sa iyang katingalahang gahom. . . . Imong madunggan kini sa makusog, naghaguros nga bagyo, sa daganas sa nagbuhagay nga suba . . . Imong madunggan kini sa kanaas sa kakahoyan ug kalasangan, makita kini sa nagbalodbalod nga dalag nga kamaisan; sa sanag nga mga lumbay sa humot nga kabulakan, sa kabituonan nga nagpuntikpuntik sa asul nga Langit . . . Makalilisang ang mga pagdaguok sa Iyang mga dalugdog, ug ang mga kalayong gikan sa Iyang mga kilat nga mokilab sa kapanganoran. Apan labaw na gayod ang nagapitik nimong kasingkasing nagmantala gihapon sa gahom ni Jehova, . . . ang walay kataposang Ginoong Diyos. Tan-awa Siya sa Kahitas-an ug laomi ang grasya ug kaluoy. . . . Halangdon si Jehova, ang Ginoo!”

Si Vera miingon: “May mga panahon nga gamiton ko ang mga pulong niining awita sa pagpakita sa mga tawo nga sa katuigan sa 1800 may mga tawo nga nahibalo sa ngalan sa Diyos ug nagdayeg kaniya usab.” Ang tinuod mao nga gikan sa kinaunahang panahon ang mga lalaki ug mga babaye sa pagtuo napukaw sa pagdayeg kang Jehova pinaagig mga awit. Kini maoy usa ka batasan nga magpadayon sa walay kataposan, kay walay kataposan ang mga katarongan sa pagdayeg sa Maglalalang sa langit ug yuta.

[Footnote]

[Hulagway sa panid 25]

Vera