Kon Giunsa Nako Pagbuntog ang Pintas nga Kinaiya

Sumala sa giasoy ni Jose Antonio Nebrera

NGANONG mahimong pintas ang usa ka tawo? Nahimo kong pintas kay ako nagdako sa maong palibot. Ang akong amahan membro sa guwardiya sibil sa Spain, usa ka tropa sa kasundalohan nga grabeng modisiplina. Ang akong Lolo pirmeng mamunal kang Papa, ug nakopya niya kana. Si Papa kanunay sab nga mamunal nako gamit ang iyang baga nga bakos. Gawas pa niana, sagad tawgon ko niyag buang, apan pinangga niya ang akong manghod nga babaye. Ang akong inahan, nga nahadlok kasuk-an ni Papa, wala kaayoy nahimo sa paghupay sa akong kahiubos niining dili-makiangayong pagtratar o sa pagpakita kanakog pagmahal.

Samtang tua ko sa eskuylahan kauban sa akong mga eskolmet, ako maghanduraw ug usa ka kalibotan, diin ako malipayon. Ug sa tan-aw sa uban, lagmit malipayon ko ug may kompiyansa sa kaugalingon. Apan ang tinuod, ako rang giluom ang akong kahadlok ug kasuko. Mahigmata ko sa kamatuoran kada uli nako sa balay kay segurado gyod nga insultohon o bunalan na sab ko.

Sa edad nga 13, nakalingkawas ko niining walay-gugmang palibot pinaagi sa pagpaenrol sa usa ka boarding school sa mga Heswita. Dihay higayon nga nangandoy kong magpari. Apan ang maong tunghaan wala makahatag kanakog kahulogan sa kinabuhi. Kinahanglan ming mobangon ug alas singko sa buntag aron maligo ug bugnawng tubig. Dayon, sa tibuok adlaw kami magtuon, mangadye, ug maghimo sa mga buluhaton sa simbahan, nga diyutay ra kaayog pahulay.

Bisan tuod pabasahon mig estorya bahin sa “mga santos,” wala gyod namo tun-i ang Bibliya. Diha lamay usa ka Bibliya nga gisulod sa salamin nga butanganan, ug kinahanglang mananghid una mi aron makabasa niana.

Sa akong ikatulong tuig sa boarding school, nahimong bahin sa among rutina ang pagbunal sa kaugalingon—nga gitawag ug “espirituwal nga mga ehersisyo.” Aron makalikay niini, akong ihamon ang akong pagkaon para madaot ang akong tiyan. Apan, wala kini molampos. Human sa duolag tulo ka tuig, wala na ko makaagwanta. Milayas ko ug mipauli sa amo. Nag-edad ko niadto ug 16 anyos.

Nangitag Kulbahinam nga Kasinatian

Sa dihang nakapauli na ko, akong gihimong karera ang boksing ug wrestling. Kay kanunay man kong makadaog, mibilib ko sa akong kaugalingon. Apan, tungod sa akong kamaayong laki niini naaghat ko sa paggamit sa akong kusog aron makuha ang akong gusto, sama gayod sa gibuhat sa akong amahan.

Apan sa nag-edad kog 19, dihay panghitabo nga medyo nakapalukmay nako. Akong nahimamat si Encarnita, nga siyam ka bulan sa ulahi nahimo nakong asawa. Ang iya lang nakita kanako mao ang akong kamatinahoron, kabuotan, ug kamalipayon. Wala siyay kalibotan sa kapait nga nag-omido sa akong dughan. Nadayag kining pagbatia sa dihang gipareport ko aron magsundalo, wala madugay human matawo ang among unang anak.

Aron dili matupihan nga sama nianang sa mga sundalo ug aron makasulay ug kulbahinam nga mga kasinatian, miapil dayon ko sa Spanish Foreign Legion. Akong gihanduraw nga maangkon nako ang kagawasan diha sa desyerto sa Morocco ug sa pag-apil sa peligrosong mga misyon. Gawas pa niana, morag paagi kini nga makalikay ko sa akong mga responsibilidad sa pamilya. Apan sa pagkatinuod, nakapasamot lang kadto sa akong kapintas.

Wala madugay naengkuwentro nako ang usa ka dakog lawas ug bagis nga tenyente nga daogdaogan kaayo sa mga bag-ohan. Gidumtan nako ang inhustisya, ug andam kong makig-away alang sa kon unsay akong gituohan nga matarong. Usa ka buntag niana, panahon sa pagpanawag sa among ngalan, nangomedya ko apan nasaypan kinig sabot sa tenyente. Sa dihang mihana siya sa iyang kamot, ako dayon kanang gilubag ug naglayog mi hangtod nga napatumba nako siya. Ako siyang gikuptag maayo, kay basig pusilon ko niya kon ako siyang buhian.

Tungod sa maong hitabo, tulo ka bulan kong gibalhog sa bilanggoan alang sa mga sundalong nakasala. Ang lawak nga gibutangan namong 30 ka lalaki gamay kaayo ug walay mga gamit. Sulod sa maong panahon, dili gani ko mahimong mag-ilis. Ang among grupo gipangulohan sa usa ka bagis kaayong tenyente nga ganahang manglatigo kanamo. Apan usa ka higayon niana, sa dihang ako siyang gibaharan nga patyon kon iya kong hilabtan, iyang gimenosan ang paglatigo nako gikan sa 30 ka lapdos ngadto sa 3. Nakakat-on ko sa pagbinagis sama sa mga tigdaogdaog kanako.

Sekretong mga Misyon

Panahon sa pagbansay kanako diha sa Spanish Foreign Legion, miboluntaryo dayon ko sa pag-apil sa mas peligrosong mga misyon. Sa makausa pa, wala ko masayod kon unsay akong dangatan. Ako gibansay ingong komando, nga naglakip sa paggamit ug tanang matang sa hinagiban ug mga bomba. Aron makompleto nako ang maong pagbansay, gipadala ko sa Langley, Virginia, sa United States, diin ako gibansay uban sa mga secret agent sa CIA.

Wala madugay, nahimo kong membro sa undercover nga komando. Sa katuigan sa 1960, ako nakigbahin sa daghang sekretong misyon. Mitabang ko sa mga operasyon batok sa mga tigbaligyag droga ug tigpayuhot ug armas sa Central ug South America. Kami gimandoan nga sa dihang masakpan namo kining mga tawhana, amo silang “likidahon.” Ulaw kaayong isulti nga nakigbahin ko sa maong mga operasyon. Among patyon ang tanan namong maengkuwentro, gawas lang niadtong makuhaan namog impormasyon.

Sa ulahi, giasayn ko nga mangespiya sa mga dakodako sa sundalo sa Spain aron akong masakpan kon kinsay wala mosuportar sa diktadorya ni Heneral Franco. Mangespiya sab mi sa mga namuyo sa France nga supak sa pagmando ni Franco. Ang tuyo mao ang pagkidnap sa lider sa mga rebelde ug pagdala kanila sa Spain, lagmit aron sila patyon.

Sa akong kataposang misyon kinahanglan kong mag-organisar ug grupo sa mersenaryong mga sundalo aron magkudeta diha sa usa ka gamayng nasod sa Africa. Ang instruksiyon kanamo mao ang pagsulong sa baraks sa militar diha sa kaulohan ug dayon ilogon ang palasyo sa presidente. Sumala sa plano, among gisulong ang nasod sa tungang gabii ug natapos ang among misyon sulod lang sa upat ka oras. Tulo sa akong mga kauban ang nangamatay, lakip na ang daghang sundalo nga among gikakombate. Nakigbahin ko sa pagpatay kanila.

Kining ngilngig nga kasinatian naghasol sa akong konsensiya. Wala koy maayong kinatulgan kay madamgohan nako ang akong pagluba sa mga kaaway. Diha sa akong ngil-ad nga mga damgo, akong makita ang kalisang sa mga tawo nga akong patyon.

Nakadesisyon ko nga dili na gyod mouban sa laing misyon. Busa, gisurender nako sa militar ang tanan nakong papeles ug nangayo kog permiso nga mohunong sa serbisyo. Apan, tulo ka bulan sa ulahi gipatawag ko sa akong mga labaw aron mangespiya na sab. Mikalagiw ko sa Switzerland, ug pipila ka bulan sa ulahi, ang akong asawa nga si Encarnita—nga wala gayoy kalibotan sa akong trabaho ingong secret agent—miduyog nako sa Basel.

Lisod Wagtangon ang Pintas nga Kinaiya

Sulod sa tulo ka tuig nga ako nagsundalo, si Encarnita misugod pagtuon sa Bibliya uban sa mga Saksi ni Jehova sa Spain. Iya kong giingnan nga nakaplagan niya ang kamatuoran bahin sa Diyos, ug makatakod ang iyang kadasig. Amo dayong gikontak ang mga Saksi sa Switzerland ug dungan ming nagtuon sa Bibliya.

Nalipay ko sa pagkasayod bahin sa katuyoan sa Diyos. Bisag nagtinguha ko sa pagpahiuyon sa akong kinabuhi sa mga prinsipyo sa Bibliya, nalisdan ko sa paghimog kausaban—ilabina maylabot sa akong pintas nga kinaiya. Bisan pa niana, akong gipabilhan ang akong bag-ong pagtuo. Human sa pipila ka bulang pagtuon, ako miingon nga andam na kong makigbahin sa balaybalay nga pagsangyaw sa mga Saksi ni Jehova.

Sa tabang ni Jehova, nakakat-on ra ko sa pagpugong sa kaugalingon, ug sa ngadtongadto, nabawtismohan mi ni Encarnita. Sa edad nga 29, natudlo ko ingong ansiyano sa kongregasyon.

Pagka-1975, nakadesisyon mi sa pagbalik sa Spain. Apan wala ko makalimti sa militar, ug gipatawag ko nila aron motabang sa lain na usab nga misyon. Aron makalikay, mikalagiw na sab ko sa Switzerland. Ang akong pamilya nanimuyo didto hangtod nga namalik mi sa Spain niadtong 1996.

Karon duna na koy minyo nga anak nga lalaki ug babaye ug duha ka apo, nga ang tanan nag-alagad kang Jehova. Dugang pa, latas sa katuigan, nakatabang kog 16 ka tawo nga makaila kang Jehova, lakip na ang usa ka batan-ong lalaki nga miapil kanhi sa pintas nga mga protesta sa kadalanan sa amihanang Spain. Kini nakahatag kanakog dakong katagbawan.

Balikbalik kong nag-ampo sa Diyos nga tabangan ko niya sa pagsalikway sa akong pintas nga kagahapon ug sa pagkalingkawas sa akong ngil-ad nga mga damgo. Sa akong pagpakigbisog sa pagbuhat kon unsay matarong, akong gisunod ang tambag sa Salmo 37:5: “Itugyan kang Jehova ang imong dalan, ug salig kaniya, ug siya molihok.” Gituman gayod ni Jehova ang iyang saad. Gitabangan ko niya sa pagbuntog sa akong pintas nga kinaiya. Kini maoy dako kaayong panalangin alang kanako ug sa akong pamilya.

[Hulagway sa panid 21]

Sa dihang nagpaenrol ko sa usa ka boarding school sa mga Heswita sa edad nga 13

[Hulagway sa panid 23]

Mibiya sa opisina sa foreign legion human ko tugoti nga mohunong sa pagsundalo niadtong 1968

[Hulagway sa panid 23]

Karon uban kang Encarnita nga akong asawa