Mga Hiyas nga Nakapalahi Kanato

USA ka 50-anyos nga trabahador sa konstruksiyon ang naghulat ug tren diha sa usa ka estasyon sa subwey sa New York City. Dili layo sa iyang nahimutangan, usa ka batan-ong lalaki ang kalit nga natumba diha sa tampi sa platform ug nahulog sa riles sa dihang nagsingabot ang tren. Sa walay langan, ang trabahador sa konstruksiyon milukso sa riles ug gihap-an ang tawo samtang milabay ang tren sa ibabaw nila nga wala ra sila maunsa.

Panahon sa mga Nazi, ang mga Saksi ni Jehova sa Europe midumili sa pag-ingon ug “Heil Hitler!” tungod kay ang German nga pulong nga heil nagkahulogan ug “kaluwasan.” Sila hugot nga nagtuo nga si Jesu-Kristo ang ilang Manluluwas ug “walay kaluwasan diha kang bisan kinsa pang lain.” (Buhat 4:12) Tungod sa ilang pagdumili sa pag-idolo kang Hitler, daghan ang gibalhog sa kampo konsentrasyon, diin padayon nilang gihuptan ang ilang Kristohanong prinsipyo.

Kini nga mga pananglitan nagpakita nga mahimong unahon sa usa ka tawo ang kaayohan sa uban—bisan sa usa ka estranyo—inay sa kaugalingon ug ang pagtamod sa mga prinsipyo inay sa personal nga kagawasan. Ang mao bang mga hiyas nagpakita nga ang tawo maoy taas lang nga matang sa hayop? O nagpakita kana nga kita gilalang nga mas labaw kanila? Hunahunaa kana samtang imong palandongon ang mosunod nga mga pangutana:

● Nganong duna kitay konsensiya, ang katakos sa pag-ila sa husto ug sayop?

● Nganong mahingangha kita sa dihang atong palandongon ang kahibulongang mga linalang?

● Nganong ganahan kitag musika, mga dibuho, balak, ug uban pang matang sa arte? Kon buot hunahunaon, wala kana kinahanglana aron mabuhi.

● Nganong ang mga tawo sa halos tanang kultura dunay tinguha nga makaila sa Diyos?

● Nganong kita mangutana: ‘Nganong ako ania dinhi?’ ‘Unsay katuyoan sa kinabuhi?’

● Sa dihang dunay mamatay, nganong mohimo man kitag lainlaing seremonyas ug rituwal?

● Nganong daghan ang nagtuo nga dunay kinabuhi luyo sa kamatayon? Ang ato bang kinaiyanhong tinguha nga mabuhi sa walay kataposan maoy usa lamang ka panglingla sa ebolusyon?

Asa Makaplagi ang Tubag?

Ang labing makataronganong tubag niining mga pangutanaha makita diha sa labing kaylap mabatonan nga sagradong basahon—ang Bibliya. Tagda kon unsay gisulti niini bahin sa mosunod:

Kinaiyahan sa tawo. Ang tawo gilalang sumala sa “larawan sa Diyos,” nga nagpasabot nga kita makahimo sa pagpasundayag sa mga hiyas sa atong Maglalalang. (Genesis 1:27) Busa, ang unang tawo maoy “anak sa Diyos.”—Lucas 3:38.

Atong panginahanglan nga mahigugma ug higugmaon. “Ang Diyos gugma,” nag-ingon ang 1 Juan 4:8. Kay gilalang man kita sumala sa larawan sa Diyos, kita nagkinahanglag gugma gikan sa pagkahimugso hangtod sa pagkamatay. Kon ako “walay gugma, ako walay kapuslanan,” misulat ang Kristohanong apostol nga si Pablo. (1 Corinto 13:2) Siya midugang: “Mahimong mga tigsundog sa Diyos, ingon nga hinigugmang mga anak.”—Efeso 5:1.

Atong espirituwal nga panginahanglan. “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Ang pulong sa Diyos nga narekord sa Bibliya nagpadayag sa iyang personalidad ug sa iyang katuyoan alang kanato. Ang atong kinabuhi walay kahulogan kon kita walay relasyon sa Diyos.

Kon nganong kita mamatay. “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan.” (Roma 6:23) Ang sala maoy pagkapakyas sa pagsunod sa moral ug espirituwal nga sukdanan sa Diyos. Apan, katuyoan sa Diyos nga wad-on ang sala, ipasig-uli sa kahingpitan ang tanang nahigugma ug nagsunod kaniya, ug hatagan silag kinabuhing walay kataposan sa Paraiso sa yuta.—Salmo 37:10, 11, 29; Lucas 23:43.

Gusto ka bang matagbaw sa imong kinabuhi, tingali mag-ugmad ug mga katakos nga wala nimo damhang mahimo nimo? Gusto ka bang makakat-on ug dugang bahin sa imong Maglalalang ug sa iyang kahibulongang katuyoan alang kanimo? Kon mao, dapiton ka namo sa pagtuon sa Bibliya, ang tuboran sa kamatuoran bahin sa Diyos. Pinaagi lamang niana nga ikaw makabatog labawng kalipay karon ug sa umaabot.—Mateo 5:3; Juan 17:3.

[Kahon/Hulagway sa panid 9]

KITA NAGKINAHANGLAG GUGMA SUKAD SA PAGKABATA

“Ang mga bata nagkinahanglag pagdasig ug gugma,” nag-ingon ang siyentipikong si Gerald L. Schroeder. Busa, hinungdanon nga sundon sa mga ginikanan ang sugo sa Bibliya, nga gihatag ilabina sa mga inahan, nga ‘higugmaon ang ilang mga anak’!—Tito 2:4.

[Hulagway sa panid 8, 9]

Atong natagamtam ang daghang makalilipayng butang nga wala kinahanglana aron mabuhi

[Hulagway sa panid 9]

Kita wala lamang magkinahanglag pagkaon ug tubig. Nagkinahanglan usab kita ug giya sa atong Maglalalang