Usa ka Propesor sa Financial Accounting Nagpatin-aw sa Iyang Pagtuo

Estoryahi mi bahin sa imong kinabuhi.

Gimatuto ko sa ginikanan nga hinimba, matinud-anon, ug kugihan. Ila kong gidasig sa pagkuhag taas nga edukasyon maong commerce ang akong gikuha sa University of New South Wales. Kay interesado kog research, kini ang gipangagpas kong karera.

Bahin sa unsa ang imong gi-research?

Gusto kong makasabot sa dagan sa stock market.a Sa stock market, ang mga tawo makapalit ug makabaligyag mga share sa kompaniya ug ang kita gamiton sa pagpadagan sa ilang negosyo. Apil sa akong research ang mga butang nga makaapektar sa balor sa mga share sa kompaniya.

Makahatag ba kag pananglitan?

Ang mga kompaniya kinahanglang regular nga moreport sa ilang kita. Kini nga mga report maoy basehan sa mga tigpamuhonan sa pagtino sa pinansiyal nga kahimtang sa usa ka kompaniya. Apan ang pipila ka paagi sa pagreport sa kita dili subay sa sukdanan. Para sa mga kritiko, gihimo kini sa mga kompaniya sa paglilong sa ilang tinuod nga kahimtang ug kita. Sa unsang paagi mahibaloan sa mga tigpamuhonan ang tinuod ug kompletong impormasyon? Unsay angayng mahibaloan sa mga ahensiyang nagkontrolar sa dagan sa mga financial market sa pagtino nga walay mahitabong panglimbong? Kami sa akong mga kauban nangita sa mga tubag niana.

Unsay imong relihiyon kaniadto?

Tigsimba ko uban sa akong ginikanan sa Presbyterian Church, pero nawad-an kog interes sa relihiyon pagkatin-edyer nako. Nagtuo kog Maglalalang ug nagtahod sa Bibliya pero wa ko magtuo nga ang relihiyon makasulbad sa mga problema sa kinabuhi. Para nako, ang relihiyon daw mga social club lang. Sa Europe, nakaadto kog dagkong simbahan ug nahibulong kon nganong dato kaayo sila samtang daghan nag-ilaid sa kakabos. Busa, nawalag samot ang akong gana sa relihiyon.

Unsay nakapausab sa imong panglantaw?

Ang akong asawa, si Jennifer, nagsugod pagtuon sa Bibliya uban sa mga Saksi ni Jehova ug pagtambong sa ilang mga tigom, busa nakahunahuna ko sa pag-uban niya sa pagpaniid kanila. Nakita nakong wala diay koy hanaw sa Bibliya. Busa nagsugod ko pagtuon sa Bibliya uban sa mga Saksi.

Nakadayeg ko sa ilang paagi sa pagtuon sa Bibliya. Sila magbangon ug mga pangutana, mangitag ebidensiya ug analisahon kini, ug dayon maghimog rasonableng mga konklusyon—pamaagi nga gigamit nako sa pag-research! Sa 1999, pipila ka tuig human sa bawtismo ni Jennifer, nagpabawtismo sab ko ingong Saksi ni Jehova.

Ang imo bang kahibalo sa economics nakapalig-on sa imong pagsalig sa Bibliya?

Oo. Pananglitan, ang Balaod sa Diyos para sa karaang Israel naghisgot ug mga solusyon sa mga problema sa ekonomiya nga mao gihapoy gikalibgan sa mga ekonomista karon. Sumala sa Balaod, ang mga Israelitas gisugo sa paggahig abot sa uma para sa mga kabos (matang sa pamuhis ug insyurans), pagpahulam ug kuwarta nga walay tubo sa mga timawa (paghatag ug higayon nga makautang), ug pagbalik sa mga yutang napanunod ngadto sa mga tag-iya niini kada 50 ka tuig (pagpanalipod sa katungod sa pagpanag-iyag propidad). (Levitico 19:9, 10; 25:10, 35-37; Deuteronomio 24:19-21) Kini ug ang ubang probisyon nakatabang sa mga tawo (1) sa panahong mausab ang ilang pinansiyal nga kahimtang, (2) sa pagkahaw-as gikan sa kakabos, ug (3) sa pagkawala sa dakong gintang sa dato ug kabos—kanang tanan naglungtad na kapig 3,000 ka tuig sa wala pay natad sa economics!

Ang Bibliya nagpasiugda usab ug mga tinamdan ug pamatasan nga makatabang sa pagbaton ug pinansiyal nga kasegurohan. Pananglitan, kini nagtudlo sa mga tawo nga mahimong matinud-anon, kasaligan, maluluy-on, ug mahinatagon. (Deuteronomio 15:7-11; 25:15; Salmo 15) Makaiikag, human sa dili pa dugayng krisis sa ekonomiya sa kalibotan, may mga organisasyon ug business school nga nangawhag sa mga propesyonal sa natad sa negosyo ug panalapi sa pagpanumpa sa pagsunod sa mga prinsipyo sa ilang propesyon. Pero para nako, ang mga prinsipyo sa Bibliya mas labaw kay sa mga prinsipyo sa negosyo.

Sa unsang paagi natabangan ka sa imong pagtuo?

Si Jennifer miingon nga ako makataronganon na karon. Kaniadto, medyo perpeksiyonista ko ug dili makapailin-ilin. Tingali mao nay rason nga maayo ko sa accounting! Ang pagpadapat sa mga prinsipyo sa Bibliya nakatabang kanako sa pagkahimong makataronganon. Ako ug ang akong pamilya mas malipayon na karon. Kami usab malipayon sa pagpaambit sa praktikal nga kaalam sa Bibliya. Ang pagtuon sa Bibliya mao ang akong kinamaayohang “pagpamuhonan.”