Enero

Namatikdan sa mga circuit overseer sa tibuok kalibotan nga sa daghang kongregasyon, dako pa ang panginahanglan sa pagbansay sa mga brader​—batan-on ug edaran​—sa pag-atiman sa panon. Pero dili kini sayon. Ngano? Kon ikaw usa ka ansiyano, mouyon gyod ka nga hinungdanon ang pagbansay sa uban. Nahibalo ka nga mas daghang brader ang gikinahanglan sa pagpalig-on sa mga kongregasyon ug pagpormag bag-ong mga kongregasyon. (Isa. 60:22) Nahibalo sab ka nga ang Pulong sa Diyos nag-awhag kanimo sa ‘pagtudlo sa uban.’ Pero tingali nalisdan ka sa paghimo niana. Tungod kay ikaw dunay trabaho ug nag-atiman sa panginahanglan sa pamilya, sa kongregasyon, ug sa ubang importanteng butang, lagmit wala ka nay panahon sa pagbansay sa uban diha sa kongregasyon. Pero ang pagbansay gikinahanglan aron sila makaabag sa mga responsabilidad sa kongregasyon. Sa ingon, ang tanan makabenepisyo. w15 4/15 1:2, 3

Ang bag-ong natudlo nga brader dili angayng maghunahuna nga kon makadawat siyag dugang responsabilidad sa kongregasyon, gamiton niya kana aron bag-ohon ang naandang pamaagi. Ang pagbag-o nagdepende, dili sa tinguha sa usa, kondili sa panginahanglan sa kongregasyon ug sa direksiyon gikan sa organisasyon ni Jehova. Busa kon ikaw matudlo, padayong gamita ang binase sa Bibliya nga pamaagi sa imong mga magtutudlo aron ang mga igsoon mosalig kanimo ug ikapakita nimo nga ikaw nagtahod sa eksperyensiyadong mga ansiyano. Apan, sa magkadaghan ang imong kasinatian, seguradong makatabang ka sa kongregasyon sa pagpadapat sa mga kausaban ug sa pagpasignunot sa nagauswag nga organisasyon ni Jehova. Sa ngadtongadto, gamiton ni Jehova kamong tanan nga matinumanong mga tinun-an sa paghimog mga buluhaton nga labaw pa kay nianang sa inyong mga magtutudlo.​—Juan 14:12. w15 4/15 2:17

Kon lisod kaayo ang imong kahimtang, tingali mobati ka sama kang Pablo​—nga morag duol kaayo ka o anaa ka “sa baba sa leyon.” (2 Tim. 4:17) Niining mga higayona, importante kaayo nga mosalig ka kang Jehova. Pananglitan, ibutang ta nga nag-atiman kag minahal nga membro sa pamilya nga dunay laygay nga sakit. Tingali nangayo kag kaalam ug kusog kang Jehova. Kay nahimo na nimo ang imong maarangan, dili ba nakasinati kag kalinaw sa hunahuna sa pagkahibalo nga si Jehova nagtan-aw kanimo ug nagtagana sa imong gikinahanglan aron makalahutay? Pero basin mobati ka nga wala ka tabangi ni Jehova. Tingali magkalahi ang opinyon sa mga doktor. O kaha ang imong mga paryente nga imong gidahom nga mopalig-on nimo mao na hinuon ang nagpalisod sa situwasyon. Pangayog kusog kang Jehova. Paningkamot nga masuod kaniya. (1 Sam. 30:3, 6) Sa dihang tabangan ka ni Jehova, mas molig-on ang imong relasyon kaniya. w15 4/15 4:10, 11

Ingong alagad ni Jehova, dili ta apil niadtong mga nalimbongan sa ideyang si Satanas wala maglungtad. Kita nahibalo nga naglungtad ang Yawa, kay siya ang nakig-estorya kang Eva pinaagi sa halas. (Gen. 3:1-5) Si Satanas ang nagtamay kang Jehova. (Job 1:9-12) Si Satanas ang nagtental kang Jesus. (Mat. 4:1-10) Ug human sa pagkatukod sa Gingharian niadtong 1914, si Satanas ang “nakiggubat” sa dinihogang nanghibilin. (Pin. 12:17) Nagpadayon ang maong pagpakiggubat kay gusto ni Satanas nga bungkagon ang pagtuo sa nahibilin sa 144,000 ug sa ubang mga karnero. Aron makadaog, kita kinahanglang mobarog batok kang Satanas ug magpabiling lig-on sa pagtuo. Si Satanas dili gayod mapainubsanon. Kini nga espiritung linalang nangahas sa paghagit sa pagkasoberano ni Jehova ug nagpakadiyos. Siya mao gayod ang larawan sa pagkagarboso ug pagkamapangahason. Busa, ang usa ka paagi nga kita makabarog batok kang Satanas mao ang pagsalikway sa garbo ug pag-ugmad sa pagkamapainubsanon.​—1 Ped. 5:5. w15 5/15 2:3, 4

Ingong Kristohanon, kita gidasig sa paghanduraw sa atong paglaom, langitnon man kini o yutan-on. Makita ba nimo ang imong kaugalingon nga nagtagamtam sa mga saad sa Diyos? Ang pagpamalandong sa imong pagabuhaton dihang tumanon na sa Diyos ang iyang mga saad seguradong makapalipay nimo. Lagmit imong “makita” ang imong kaugalingon nga nagpuyo sa yuta sa walay kataposan. Hunahunaa nga nakigkooperar ka sa uban sa paghimo sa yuta nga paraiso. Ikaw ug ang imong mga silingan nahigugma kang Jehova. Ikaw himsog, lagsik, ug walay gikabalak-an. Kadtong nagdumala sa buluhatong pagpasig-uli nakaamot sa kalipay kay sila may tinuod nga kahingawa kanimo. Ug ikaw malipayong naggamit sa imong mga talento kay ang tanan nimong ginabuhat naghatag ug kaayohan sa uban ug nagpasidungog sa Diyos. Tingali, ikaw nagtabang sa mga binanhaw nga makaila kang Jehova. (Juan 17:3; Buh. 24:15) Kini dili damgo lamang. Kini nga paghanduraw gibase sa giingon sa Kasulatan bahin sa umaabot.​—Isa. 11:9; 33:24; 35:5-7; 65:22. w15 5/15 3:15

Si Jesus milagrosong nagtaganag daghang maayong bino, nga igo alang sa dakong grupo sa katawhan. (Juan 2:6-11) Makapainteres nga dihang gitental sa Yawa si Jesus nga himoong tinapay ang mga bato, wala gamita ni Kristo ang iyang gahom sa pagtagbaw sa iyang kagutom. (Mat. 4:2-4) Hinunoa, gigamit niya ang iyang gahom sa pagtagana sa panginahanglan sa uban. Sa unsang paagi nato masundog ang pagkamanggihatagon ni Jesus? Iyang giawhag ang mga alagad sa Diyos nga ‘batasanon ang paghatag.’ (Luc. 6:38) Ikapakita ba nato ang pagkamanggihatagon pinaagi sa pagdapit sa uban alang sa materyal ug espirituwal nga pagpangaon? Makagahin ba kitag panahon human sa tigom sa pagtabang sa uban, sama sa pagpaminaw sa usa ka igsoon nga magpraktis sa iyang bahin? Unsay atong ikatabang sa uban diha sa ministeryo? Atong ikapakita nga kita nagsundog kang Jesus pinaagi sa pagtaganag materyal ug espirituwal nga tabang kutob sa atong mahimo. w15 6/15 1:3, 4, 6

Kon kita magmatinumanon, atong masaksihan ang usa sa kinadak-ang mga milagro sa kasaysayan​—ang paglabang buhi sa dakong kasakitan. Sa dili madugay, human sa gubat sa Armagedon, daghan pang milagro ang mahitabo nga magpasig-uli sa mga tawo sa maayong panglawas. (Isa. 35:5, 6; Pin. 21:4) Handurawa nga gipanglabay na sa mga tawo ang ilang antiyohos, sungkod, wheelchair, hearing aid, ug uban pa nga sama niana. Ang mga makalabang sa Armagedon daghan unyag pagabuhaton. May kusog na sila sa paghimo sa tibuok yuta, ang gasa sa Diyos, nga paraiso. (Sal. 115:16) Ang pagpang-ayo ni Jesus kaniadto nagdasig karon sa “dakong panon,” nga nagpalig-on sa ilang makapalipayng paglaom nga mamaayo sa tanang sakit. (Pin. 7:9) Ang maong pagpang-ayo nagpakita sa dakong gugma sa panganay nga Anak sa Diyos alang sa mga tawo. (Juan 10:11; 15:12, 13) Ang kaluoy ni Jesus nagpasundayag sa dakong gugma ni Jehova sa matag usa sa Iyang mga alagad.​—Juan 5:19. w15 6/15 2:16, 17

Pagka-1914, mibuto ang gubat sa Europe​—gubat nga milukop sa tibuok kalibotan. Pagkatapos niini sa 1918, nahitabo ang grabeng kakulang sa pagkaon ug may epidemya sa trangkaso nga mas daghag napatay kay sa nakalas sa gubat. Busa, nagsugod pagkatuman ang “ilhanan” nga gihatag ni Jesus nga magtimaan sa iyang dili makitang presensiya ingong bag-ong Hari sa yuta. (Mat. 24:3-8; Luc. 21:10, 11) Daghang ebidensiya ang nagpakita nga sa 1914 “gihatag [kang Ginoong Jesu-Kristo] ang usa ka korona.” Siya “miasdang nga nagapangdaog ug sa pagtapos sa iyang pagpangdaog.” (Pin. 6:2) Iyang gihinloan ang mga langit dihang nakiggubat siya kang Satanas ug sa mga demonyo, kinsa gipangtambog sa yuta. Sukad niadto, ang katawhan nakasinati sa katumanan sa inspiradong mga pulong sa teksto karong adlawa. w15 6/15 4:13

Wala ray usa ka siglo human matukod ang Kristohanong kongregasyon, ang gitagnang apostasya mitungha. (Buh. 20:28-30; 2 Tes. 2:3, 4) Human niadto, nag-anam ka lisod ang pag-ila kon kinsa ang tinuod nga nag-alagad sa Diyos sa iyang espirituwal nga templo. Paglabay sa gatosan ka tuig, gitin-aw kana ni Jehova pinaagi sa bag-ong naentronong Hari, si Jesu-Kristo. Pagka-1919, klarong nailhan ang mga inuyonan ni Jehova ug ang nag-alagad sa iyang espirituwal nga templo. Sila kinahanglang lunsayon sa espirituwal aron mahimong mas dalawaton ang ilang pag-alagad sa Diyos. (Isa. 4:2, 3; Mal. 3:1-4) Ang nakita ni apostol Pablo sa panan-awon gatosan ka tuig ang milabay nagsugod pagkatuman sa limitadong paagi. Mabasa nato ang panan-awon ni Pablo sa 2 Corinto 12:2-4. Ang panan-awon ni Pablo gitawag ug usa ka pinadayag. Bahin kadto sa mahitabo sa umaabot, dili sa nagakahitabo sa iyang adlaw. w15 7/15 1:6-8

Nagpasabot ba kini nga dunay “rapture” o pagsakgaw sa mga dinihogan? Daghan diha sa Kakristiyanohan ang nagtuo niini nga pagtulon-an nga kuno ang mga Kristohanon dad-on sa langit sa tawhanong lawas. Unya, nagdahom sila nga ilang makita si Jesus nga mobalik aron magmando sa yuta. Pero ang Bibliya tin-awng nagpakita nga “ang ilhanan sa Anak sa tawo” makita didto sa langit ug si Jesus moanhi “diha sa mga panganod sa langit.” (Mat. 24:30) Ang maong mga ekspresyon nagpaila ug pagkadili-makita. Dugang pa, ang “unod ug dugo dili makapanunod sa gingharian sa Diyos.” Busa kadtong dad-on sa langit kinahanglan unang “mangausab, sa daklit, sa pagpamilok sa mata, sa panahon sa kataposan nga trompeta.” (1 Cor. 15:50-53) Busa, bisan tuod dili kita mogamit dinhi sa terminong “rapture” tungod sa sayop nga kahulogan niini, ang nahibiling matinumanon nga mga dinihogan pagatigomon sa usa ka pagpamilok. w15 7/15 2:14, 15

Ang Kingdom Hall mao ang sentro sa putli nga pagsimba diha sa lokal nga komunidad. Lakip sa mga tagana ni Jehova sa pagpalig-on sa atong espirituwalidad mao ang senemanang panagkatigom diha sa Kingdom Hall. Diha niana, kita makadawat ug hinungdanong espirituwal nga pagpalig-on ug giya pinaagi sa iyang organisasyon. Bisan pag kanunay kitang gidapit nga mokaon diha sa “lamesa ni Jehova,” dili gayod nato pakamenoson ang maong imbitasyon. (1 Cor. 10:21) Hinungdanon kaayo kang Jehova ang maong mga okasyon sa pagsimba ug pagdinasigay maong iyang giinspirar si apostol Pablo sa pag-awhag kanato nga dili talikdan ang atong panagkatigom. (Heb. 10:24, 25) Nagpakita ba kitag pagtahod kang Jehova kon mopalta kita sa tigom bisag walay bug-at nga rason? Ikapakita nato ang atong apresasyon kang Jehova ug sa iyang mga tagana pinaagi sa pagpangandam alang sa mga tigom ug kinasingkasing nga pagpakigbahin niini. w15 7/15 4:3, 4

Kana nga pasidaan maoy maayong rason nga magpadayon sa pagpaabot​—giingnan kita ni Jesus nga buhaton kana! Maylabot niini, ang organisasyon ni Jehova nagpakitag ehemplo. Ang mga publikasyon niini kanunayng nag-awhag kanato sa ‘pagpaabot ug pagbutang kanunay sa hunahuna sa presensiya sa adlaw ni Jehova’ ug pagsentro sa atong pagtagad sa gisaad sa Diyos nga bag-ong kalibotan. (2 Ped. 3:11-13) Hinungdanon alang sa mga Kristohanon nga nagkinabuhi kasiglohan kanhi ang padayong pagpaabot, pero ilabinang hinungdanon kini sa atong panahon. Ngano? Tungod kay kita nagkinabuhi sa panahon sa presensiya ni Kristo. Ang ilhanan sa iyang presensiya nakita sukad sa 1914. Ug ang daghag bahin nga ilhanan, nga naglakip sa nagkagrabeng kahimtang sa kalibotan ug sa tibuok yutang pagsangyaw sa Gingharian, nagpamatuod nga kita nagkinabuhi na sa “kataposan sa sistema sa mga butang.” (Mat. 24:3, 7-14) Sanglit wala moingon si Jesus kon unsa ka dugay kana nga yugto sa panahon una moabot ang kataposan, kinahanglan gayod kitang magtukaw ug magmabinantayon. w15 8/15 2:4, 5

Sa bag-ong kalibotan, mas dako ang atong kalipay kay matagbaw ang atong espirituwal nga panginahanglan. (Mat. 5:3) Ang espirituwal nga mga kalihokan mao unya ang atong prayoridad, ug magmalipayon kita sa pag-alagad kang Jehova. Pinaagi sa pag-una sa espirituwal nga mga butang karon, kita nagapangandam alang sa tinuod nga kinabuhi sa umaabot. (Mat. 6:19-21) Sa unsang paagi nato madugangan ang atong kalipay sa teokratikanhong mga kalihokan? Ang usa ka paagi mao ang pagtakdag espirituwal nga mga tumong. Kon ikaw usa ka batan-on ug gihatagan nimog seryosong pagtagad ang karera sa pag-alagad kang Jehova, nganong dili nimo repasohon ang pipila ka artikulo nga naghisgot bahin sa lainlaing matang sa bug-os panahong ministeryo ug magtakdag usa niini ingong tumong? Mahimo kang makig-estorya sa pipila nga dugay nang nag-alagad nga bug-os panahon. Pinaagi sa paghimo sa ministeryo nga imong karera, ikaw nangandam alang sa padayong pag-alagad sa Diyos sa bag-ong kalibotan, diin makatabang nimog dako ang imong teokratikanhong pagbansay ug kasinatian. w15 8/15 3:13, 14

Ang ubang bahin sa bunga sa balaang espiritu​—sama sa kalumo, pagpugong sa kaugalingon, ug pailob​—importante usab. (Gal. 5:23) Kini makatabang sa usa ka hamtong nga Kristohanon sa pag-atubang sa lisod nga mga situwasyon nga dili mapikal ug sa pagsagubang sa mga kapakyasan nga dili mawad-ag paglaom. Sa iyang personal nga pagtuon, padayon niyang ginasusi ang Kasulatanhong mga prinsipyo nga makatabang niya sa pag-ila sa kalainan tali sa husto ug sayop. Dayon, dihang mohimo siyag mga desisyon, mapamatud-an niya nga siya hamtong sa espirituwal. Pananglitan, sundon niya ang iyang nabansay sa Bibliya nga tanlag. Ang hamtong nga Kristohanon magpakitag pagkamapainubsanon pinaagi sa pag-ila nga ang paagi ni Jehova ug ang Iyang mga sukdanan mas maayo gayod kay sa iyaha. Siya madasigong magsangyaw sa maayong balita ug motabang sa pagpalambo sa panaghiusa sa kongregasyon. Bisag unsa na kita ka dugayng nag-alagad kang Jehova, ang matag usa kanato makapangutana, ‘May mga bahin ba sa akong kinabuhi nga angayng usbon aron mas masundog nako si Jesus, ug padayong mouswag sa espirituwal?’ w15 9/15 1:6, 7

Nakita sa mga tinun-an nga si Jesus naglakaw sa Dagat sa Galilea. Nangutana si Pedro kang Jesus kon puwede ba sab siyang molakaw sa tubig paingon sa iyang Agalon. Dihang giingnan siya ni Jesus sa pag-adto kaniya, si Pedro mikawas sa sakayan ug milagrosong milakaw sa balorong dagat paingon kang Jesus. Apan pagkataudtaod, si Pedro misugod pag-unlod. Ngano? Siya mitan-aw sa unos ug nahadlok. Nagpakitabang siya kang Jesus, kinsa migunit dayon kaniya ug misulti sa mga pulong nga narekord sa teksto karong adlawa. (Mat. 14:24-32) Si Pedro mikawas sa sakayan ug milakaw sa tubig tungod sa iyang pagtuo. Dihang si Jesus mitawag niya, siya misalig nga siya tabangan sa gahom sa Diyos maingon nga si Jesus gitabangan niini. Sa susama, dihang nagpahinungod kita kang Jehova ug nabawtismohan, gihimo nato kana tungod sa pagtuo. Gitawag kita ni Jesus aron mahimong iyang sumusunod. Kinahanglan tang magpakitag pagtuo kang Jesus ug sa Diyos, nga mosalig nga tabangan ta nila.​—Juan 14:1; 1 Ped. 2:21. w15 9/15 3:1, 3

Segurado nga ang usa ka mahigugmaong amahan manalipod sa iyang pamilya batok sa bisan unsang kadaot o kapeligrohan. Si Jehova, ang atong langitnong Amahan, naghimo usab niana. Tagda ang usa ka pananglitan. Bililhon gayod kanimo ang imong mga mata! Ingon niana ang pagbati ni Jehova sa iyang katawhan. (Zac. 2:8) Bililhon gayod sa Diyos ang iyang katawhan! Usahay, tugotan ni Jehova nga ang iyang matinumanong alagad mamatay sa kamot sa mga kaaway, sama kang Esteban. Bisan pa niana, gipanalipdan sa Diyos ang iyang katawhan ingong pundok pinaagi sa pagtagana kanilag tukma sa panahong mga pasidaan batok sa malipatlipatong mga buhat ni Satanas. (Efe. 6:10-12) Pinaagi sa iyang Pulong ug binase sa Bibliyang mga publikasyon gikan sa iyang organisasyon, kita gitabangan sa pagkahibalo sa kamatuoran maylabot sa malimbongong mga bahandi, imoral ug mapintas nga mga kalingawan, sayop nga paggamit sa Internet, ug uban pa. Klaro, ingong mahigugmaong Amahan, si Jehova nanalipod ug nag-atiman sa iyang katawhan. w15 9/15 4:15, 17

Ang kamatuoran nga ang mga Saksi ni Jehova nagmalamposon sa “pagdepensa ug sa pagtukod sa legal nga paagi” sa maayong balita maoy laing pamatuod sa gamhanang kamot ni Jehova. (Filip. 1:7) Ang pipila ka gobyerno misulay sa pagpahunong sa bug-os sa buluhaton sa katawhan sa Diyos. Apan ang mga Saksi ni Jehova nakadawat ug labing menos 268 ka kadaogan sa korte suprema, lakip na ang 24 nga nadaog diha sa European Court of Human Rights sukad lang sa tuig 2000. Klaro nga walay makapugong sa kamot sa Diyos. (Isa. 54:17) Ang tibuok kalibotang pagsangyaw sa maayong balita milampos tungod sa tabang sa Diyos. (Mat. 24:14; Buh. 1:8) Lakip niana ang panaghiusa karon sa katawhan ni Jehova gikan sa lainlaing kanasoran​—butang nga dili masundog sa kalibotan​—ug bisan ang wala mag-alagad kang Jehova nakaingon: “Ang Diyos anaa gayod sa inyong taliwala.” (1 Cor. 14:25) Busa, daghan kitag pamatuod nga ang Diyos nagatabang sa iyang katawhan.​—Isa. 66:14. w15 10/15 1:13, 14

Peligroso ang paggamit sa bug-os sa gitanyag sa kalibotan. (1 Cor. 7:29-31) Mahimong mausik ang panahon sa usa ka Kristohanon diha sa mga butang nga dili unta sayop, sama sa mga hilig, pagbasag sekular nga mga basahon, pagtan-awg TV, pagsuroysuroy, paglaaglaag sa mall, ug pagpangitag kinabag-ohang gadyet o mahalong mga butang. Ang social networking, pag-text, pag-email, ug pagsigeg susi sa kinabag-ohang balita ug mga sports event makausik usab sa atong panahon ug makaadik pa gani. (Eccl. 3:1, 6) Kon dili nato limitahan ang panahon nga atong gigugol diha sa dili importanteng mga butang, mahimong mapasagdan ang labing hinungdanong buluhaton​—ang atong pagsimba kang Jehova. (Efe. 5:15-17) Gihimo ni Satanas kining kalibotana nga makapadani ug makabalda kanato. Tinuod kana sa unang siglo, ug ilabina gayod karon. (2 Tim. 4:10) Busa, kinahanglang sundon nato ang tambag sa teksto karong adlawa. w15 10/15 3:7, 8

Si Manoa ug ang iyang asawa makabatog anak! Walay duhaduha nga nalipay si Manoa, apan nahibalo usab siya nga duna siyay dakong responsabilidad. Sa nasod nga punog pagkadaotan, sa unsang paagi sila molampos sa pagmatuto sa ilang anak sa pag-alagad sa Diyos? Si Manoa “nangaliyupo kang Jehova,” nga nag-ingon: “Ang tawo sa matuod nga Diyos [ang manulonda] nga bag-o lang nimong gipadala, palihog, paanhia pag-usab kanamo ug tudloan kami kon unsay angay namong buhaton sa bata nga ipanganak.” (Maghu. 13:1-8) Kon ginikanan ka, lagmit makasabot ka sa gibati ni Manoa. Ikaw usab may bug-at nga responsabilidad sa pagtabang sa imong anak nga makaila ug mahigugma kang Jehova. (Prov. 1:8) Aron mahimo kana, ang mga ginikanan angayng maghikayg mapuslanon ug mauswagong Pamilyahanong Pagsimba. Siyempre, aron matisok sa hunahuna sa bata ang kamatuoran sa Bibliya, kinahanglang mohimo kag labaw pa kay sa pagdumalag senemanang pagtuon sa pamilya. (Deut. 6:6-9) Molampos ka ba sa pagpatisok sa kamatuoran diha sa imong anak? w15 11/15 1:1, 2

Dili ka makabasag kasingkasing sama kang Jesus, apan ang Diyos makatabang nimo sa pagpakitag pagsabot. Gamiton ba nimo kana sa pagpangitag maayong hiyas diha sa imong tin-edyer? Walay gustong tawgog “badlongon.” Ayaw gyod hunahunaa o tawga ang imong anak nga “rebelyoso” o “buluyagon.” Bisag ingon ana ang imong anak, sultihi siya nga nakita nimo ang iyang maayong mga hiyas ug tinguha nga mobuhat ug matarong. Matikdi ang bisan unsang ilhanan sa iyang pag-uswag ug komendahi siya. Tabangi siya nga maugmad ang iyang maayong mga hiyas pinaagi sa paghatag kaniyag dugang responsabilidad kon posible. Gihimo kana ni Jesus sa iyang mga tinun-an. Mga usa ka tuig ug tunga human niya mahimamat si Natanael, gipili siya ni Jesus nga mahimong usa sa iyang mga apostoles, ug nahimong madasigong Kristohanon si Natanael. (Luc. 6:13, 14; Buh. 1:13, 14) Ang imong komendasyon ug pagdasig makatabang sa imong anak nga dili mobating kanunay na lang siyang pakyas, kondili mobati siya nga usa siya ka kuwalipikadong Kristohanon nga magamit ni Jehova. w15 11/15 2:15, 16

Dihang nagsugod ang kataposang mga adlaw niadtong 1914, pipila ka libo lang ang alagad ni Jehova sa tibuok kalibotan. Tungod sa gugma sa silingan ug sa tabang sa espiritu sa Diyos, usa ka gamayng nahibilin sa dinihogang mga Kristohanon ang milahutay sa pagsangyaw sa Gingharian. Ingong resulta, natigom karon ang dakong panon nga may yutan-ong paglaom. Dunay kapin sa 8,000,000 ka Saksi diha sa kapig 115,400 ka kongregasyon sa tibuok yuta, ug nagkadaghan pa kita. Pananglitan, sa 2014 nga tuig sa pag-alagad, kapig 275,500 ang nabawtismohan​—nga nag-aberids ug mga 5,300 kada semana. Ang talagsaong pag-uswag nga atong nakita karon maoy resulta sa atong pagtuo sa Diyos ug bug-os nga pagdawat sa Bibliya​—ang inspiradong Pulong ni Jehova. (1 Tes. 2:13) Ilabinang talagsaon ang espirituwal nga kadagaya sa katawhan ni Jehova​—bisan pag gidumtan ug gisupak ni Satanas, “ang diyos niini nga sistema sa mga butang.”​—2 Cor. 4:4. w15 11/15 4:12, 14, 16

Linibo ka tipik, manuskrito, ug karaang mga hubad ang gikomparar ug gitun-an pag-ayo sa mga eskolar sa Bibliya. Kini nga pagtuon nagpamatuod nga pipila ra ka bersikulo ang may diyutayng kalainan ug wala kini makapausab sa katibuk-ang mensahe sa Bibliya. Ang pagtuon sa karaang mga manuskrito nakapakombinsir sa sinserong mga estudyante sa Bibliya nga ilang nabatonan ang orihinal nga mensahe nga gipasulat ni Jehova. Bisan pa sa grabeng pagsupak sa mga kaaway, gipaneguro ni Jehova nga ang iyang Pulong mahubad sa kinadaghanang pinulongan kay sa bisan unsang basahon sa tibuok kasaysayan. Bisag ang kadaghanan diyutay ra o walay pagtuo sa Diyos, ang Bibliya halinon gihapon kaayo ug mabatonan karon, sa tibuok o sa bahin, diha sa kapig 2,800 ka pinulongan. Bisan ug ang pipila ka hubad sa Bibliya dili sama ka tin-aw o ka kasaligan sa ubang hubad, posible gihapong makat-onan ang paninugdang mensahe sa Bibliya bahin sa paglaom ug kaluwasan gikan sa halos tanang hubad. w15 12/15 1:13, 14

Ang atong isulti mahimong makaayo o makadaot. Ang pagsultig sakit nga mga pulong komon kaayo sa kalibotan ni Satanas. Ang mga kalingawan karon nagdasig sa mga tawo sa ‘pagbaid sa ilang dila samag espada’ ug sa ‘pagpunting sa mapait nga mga pulong samag pana.’ (Sal. 64:3) Kinahanglang likayan kana sa usa ka Kristohanon. Ang usa ka pananglitan sa ‘mapait nga mga pulong’ mao ang sarkastikong sinultihan​—masakit nga mga pulong nga nagpakamenos o nagsaway sa uban. Kini sagad isulti aron magpakatawa, apan dali ra kining moresulta sa walay tahod ug makapainsultong sinultihan. Ang sarkastikong sinultihan maoy usa ka matang sa mapasipalahong sinultihan nga angayng “hukason” sa mga Kristohanon. Maayong magpakatawa, apan kinahanglang likayan nato ang masakit, sarkastikong mga pulong nga makapasilo o makapakaulaw sa uban. Ang Bibliya nagtambag kanato: “Kinahanglang walay mangil-ad nga mga sulti nga mogula gikan sa inyong baba, kondili kanang bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog.”​—Efe. 4:29, 31. w15 12/15 3:10

Kining pangataposang mga pulong diha sa sulat nga gipadala sa nagamandong lawas ngadto sa unang siglong kongregasyon mahimong hubaron usab nga “magmalig-on.” Gusto gyod natong makabatog “maayong panglawas” ug magmalig-on samtang nag-alagad sa Diyos. Samtang anaa pa kining presenteng sistema sa mga butang ug dili pa kita hingpit, dili nato malikayan ang sakit. Dili kita makadahom karon nga maayo sa milagrosong paagi. Apan, gihisgotan sa Pinadayag 22:1, 2 ang panahon dihang bug-os na tang maayo sa sakit. Nakita ni apostol Juan sa panan-awon ang “usa ka suba sa tubig sa kinabuhi” ug “mga kahoy sa kinabuhi” nga ang mga dahon “maoy tambal alang sa kanasoran.” Wala kini magtumong sa bisan unsang herbal nga tambal karon o sa umaabot. Hinunoa, nagtumong kini sa tagana ni Jehova pinaagi ni Jesus sa paghatag ug kinabuhing walay kataposan sa masinugtanong katawhan​—nga mao gyoy atong gipaabot.​—Isa. 35:5, 6. w15 12/15 4:17, 18

Bahin sa panahon diin kita nagkinabuhi, si Jehova nagtagna: “Mahitabo unya niadtong mga adlawa nga napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zac. 8:23) Sama sa simbolikong 10 ka tawo, kadtong dunay yutan-ong paglaom “mokupot sa sidsid sa tawo nga usa ka Hudiyo.” Sila mapasigarbohong makig-uban sa dinihogan sa espiritu nga “Israel sa Diyos,” kay nahibalo sila nga si Jehova nagpanalangin sa mga dinihogan. (Gal. 6:16) Sama kang manalagnang Zacarias, gipasiugda ni Jesus ang makapadasig nga panaghiusa nga nasinati sa katawhan sa Diyos. Iyang gihisgotan nga ang iyang mga sumusunod gilangkoban sa duha ka grupo, ang “gamayng panon” ug “ubang mga karnero,” pero siya miingon nga sila mahimong “usa ka panon” nga may “usa ka magbalantay.”​—Luc. 12:32; Juan 10:16. w16.01 4:1, 2

Kinahanglan natong panalipdan ang atong espirituwalidad. Kay nagpuyo kita sa kalibotan nga gimandoan ni Satanas nga Yawa ug dili kita hingpit, dali ra natong masundog ang sayop nga panghunahuna ug panggawi sa kalibotan. Ang espiritu sa kalibotan ikatandi sa sulog sa suba nga nagbitad nato sa direksiyon nga dili nato gusto. Aron dili maanod, kinahanglang maningkamot ta sa paglangoy paingon sa laing direksiyon. Sa susama, gikinahanglan ang paningkamot aron dili madala sa espiritu sa kalibotan ni Satanas. Dihang magsangyaw ta, ang atong hunahuna nasentro sa importante ug mapuslanong espirituwal nga mga butang, dili sa mga butang nga makapahuyang sa atong pagtuo. Ang pagsangyaw makapalig-on sa atong pagtuo, nga magpahinumdom nato sa mga saad sa Diyos ug sa iyang mahigugmaong sukdanan. Makatabang sab kini aron mahuptan nato ang espirituwal nga armadura. (Efe. 6:14-17) Kon puliki kita sa espirituwal nga kalihokan, wala tay panahon sa pagsigeg hunahuna sa atong mga problema, ug kana makapanalipod kanato. w16.01 5:12, 13

Matikdi ang gugma ni Ruth alang kang Jehova. Sa ulahi, ang tag-iyag yuta nga si Boaz nagdayeg kang Ruth kay siya midangop ilalom sa mga pako ni Jehova. (Ruth 2:12) Makapahinumdom ni nato sa usa ka kuyabog nga midangop ilalom sa mga pako sa inahan niini aron maprotektahan. (Sal. 36:7; 91:1-4) Si Jehova nahimong ingon niana nga ginikanan kang Ruth. Gigantihan ni Jehova si Ruth tungod sa iyang pagtuo, ug wala gayod siyay rason nga magmahay sa iyang desisyon. Daghan karon ang nakakat-on bahin kang Jehova apan nagpanuko sa pagdangop kaniya. Wala sila magpahinungod ug magpabawtismo. Kon nagpanuko ka sa pagpahinungod kang Jehova, gipangutana na ba nimo ang imong kaugalingon kon ngano? Ang matag usa nga buhi nag-alagad sa usa ka diyos o sa uban pa. (Jos. 24:15) Nganong dili modangop sa Diyos nga takos alagaron? Ang pagpahinungod kang Jehova maoy labing maayong paagi sa pagpakitag pagtuo kaniya. Tabangan ka niya sa pagtuman sa maong desisyon ug sa pag-atubang sa bisan unsang kalisdanan nga motungha. Mao kanay gihimo sa Diyos kang Ruth. w16.02 2:6, 7

Dihang hilom nga misulod si Abisai sa kampo ni Saul, una sa iyang kasingkasing ang pagkamaunongon kang David. Tungod niana, gusto niyang patyon si Haring Saul, apan gipugngan siya ni David kay nahibalo kini nga sayop ang pagbakyaw sa kamot “batok sa dinihogan ni Jehova.” (1 Sam. 26:9-11) Duna kitay makat-onan sa maong hitabo: Kon kinahanglan tang modesisyon kon kang kinsa kita unang magmaunongon, angay natong hunahunaon kon unsa nga mga prinsipyo sa Bibliya ang makatabang kanato. Ang pagkamaunongon naggikan sa kasingkasing, pero ang kasingkasing malimbongon. (Jer. 17:9) Kanay hinungdan nga ang usa nga maunongon sa Diyos posibleng mobatig pagkamaunongon sa suod niyang higala o paryente bisan pag kini nagbuhat ug daotan. Busa kon ang usa nga suod kanato mobiya sa kamatuoran, angay natong hinumdoman nga kang Jehova kita unang magmaunongon.​—Mat. 22:37. w16.02 4:5, 6

Nganong kinahanglang pamatud-an sa mga Kristohanon sa Roma sa ilang kaugalingon ang butang nga ila nang gidawat? Tagda ang usa ka pananglitan sa Bibliya. Si Timoteo sinati kaayo sa Kasulatan. Gitudloan siya sa iyang inahan ug apohan “sukad pa sa pagkamasuso.” Bisan pa niana, si Pablo nag-awhag kang Timoteo: “Magpadayon ka sa mga butang nga imong nakat-onan ug nakakombinsir kanimo sa pagtuo.” (2 Tim. 3:14, 15) Sumala sa usa ka reperensiya, ang orihinal nga pulong alang sa ‘nakombinsir’ nagkahulogan nga ang usa “kombinsido ug segurado nga tinuod ang usa ka butang.” Si Timoteo kombinsido nga iyang nakaplagan ang kamatuoran. Iya kining gidawat, dili tungod kay giingnan siya sa iyang inahan ug apohan nga buhaton kana, kondili tungod kay gisusi niya ang mga katarongan niini ug nakombinsir. (Roma 12:1) Sa susama, ang makugihong personal nga pagtuon makatabang nimo sa pagtubag sa mga pangutana, pagwagtang sa mga pagduhaduha, ug pagpalig-on sa imong pagtuo.​—Buh. 17:11. w16.03 2:3, 4, 7

Handurawa ang mga Israelinhon sa kapanahonan sa Bibliya nga nagdayeg kang Jehova panahon sa usa ka pista diha sa templo sa Jerusalem. Sila mangandam pag-ayo, mag-atiman sa panginahanglan sa usag usa samtang nagpanaw, ug magkahiusa sa pagsimba didto sa templo. Kining tanan nagkinahanglag kooperasyon. Samtang magpadayon kita sa atong panaw paingon sa bag-ong kalibotan, kinahanglan usab kitang magkahiusa ug magtinabangay. Hunahunaa ang mga panalangin nga naghulat kanato! Ato nang gitalikdan ang kagubot ug kalibog nga komon kaayo niining sistemaha sa mga butang. Atong makita karon nga nagakatuman ang gitagna ni Isaias ug Miqueas​—ang katawhan sa Diyos nagkahiusa sa pagtungas “sa bukid ni Jehova.” (Isa. 2:2-4; Miq. 4:2-4) Sa pagkatinuod, pagkalabaw sa atong matang sa pagsimba niining “kaulahiang bahin sa mga adlaw.” Apan pagkadako unya sa atong kalipay kon magkinabuhi na kita sa panahon diin ang tanang katawhan magkahiusa ug magtinabangay! w16.03 3:16, 17

Ang pipila ka ansiyano nalisdan tingali sa paggahig panahon sa pagbansay sa uban. Lagmit naghunahuna sila: ‘Ang pagbansay hinungdanon, pero dili kini sama ka dinalian sa ubang atimanonon sa kongregasyon nga kinahanglang hatagan dayog pagtagad. Kon dili una nako himoon ang pagbansay, dili ra maapektohan ang kongregasyon.’ Tinuod, daghang butang ang kinahanglang atimanon dayon sa mga ansiyano, pero kon unyaunyaon ang pagbansay mahimong madaot ang espirituwalidad sa kongregasyon. Ang mga ansiyano nag-atiman ug daghang hinungdanong butang nga angay dayong lihokon. Pero kon unyaunyaon gihapon sa mga ansiyano ang gikinahanglang pagbansay, sa kadugayan ang kongregasyon mahutdag kuwalipikadong mga brader nga mag-akatar sa tanang atimanonon. Nan, dayag nga angay natong likayan ang paghunahuna nga dili kaayo hinungdanon ang pagbansay. Ang mga ansiyano nga naglantaw sa kaugmaon sa kongregasyon ug naggahig panahon sa pagbansay sa dili kaayo eksperyensiyadong mga brader maoy maalamong mga piniyalan ug tinuod nga panalangin sa tibuok kongregasyon.​—1 Ped. 4:10. w15 4/15 1:4, 6, 7