Pebrero

Ikaw ba usa ka dedikado, bawtismadong Saksi ni Jehova? Kon mao, nabatonan nimo ang usa ka bililhong butang​—usa ka personal nga relasyon sa Diyos. Pero ang maong relasyon mahimong mohuyang tungod sa mga pagpit-os sa kalibotan ni Satanas ug sa atong pagkadili-hingpit. Giatubang kini sa tanang Kristohanon. Busa, kinahanglan nga huptang lig-on ang atong relasyon kang Jehova. Unsa ka tinuod kanimo ang imong personal nga relasyon kang Jehova? Gusto ba nimo kining palig-onon? Ang Santiago 4:8, nga maoy atong teksto karong adlawa, nagtug-an kanimo kon unsaon kini paghimo. Matikdi nga ikaw ug si Jehova ang nalangkit niini. Samtang mohimo kitag mga paagi sa pagpakigsuod sa Diyos, siya mohimo usab ug mga paagi sa pagpakigsuod kanato. Kon kanunay nimo kining buhaton, inanayng molig-on ang imong relasyon kang Jehova. Ingong resulta, ang maong relasyon mahimong tinuod kaayo kanato. Atong maugmad ang matang sa pagsalig nga nabatonan ni Jesus dihang siya miingon: “Siya nga nagpadala kanako maoy tinuod, ug . . . ako nakaila kaniya.”​—Juan 7:28, 29. w15 4/15 3:1, 2

Ibutang ta nga napalagpot ang usa ka minahal nga membro sa pamilya. Nakat-onan nimo sa Bibliya kon unsaon pagpakiglabot sa mga napalagpot. (1 Cor. 5:11; 2 Juan 10) Bisan pa niana, ang pagsunod niini usahay lisod kaayo o imposible pa gani. Makasalig ka ba nga ang imong langitnong Amahan maghatag kanimog kusog nga gikinahanglan sa pagsunod sa sugo sa Bibliya bahin sa pagpalagpot? Giisip ba nimo kini ingong kahigayonan sa pagpakigsuod kang Jehova ug sa pagpalig-on sa imong relasyon kaniya? Nagpasabot ba kini nga dili nato higugmaon ang atong pamilya? Wala! Pero angay nga mas labaw ang atong gugma kang Jehova. (Mat. 22:37, 38) Kini maoy alang sa kaayohan sa atong pamilya, nag-alagad man sila kang Jehova o wala. Ug kon naguol ka pag-ayo kay napalagpot ang usa ka membro sa imong pamilya, iampo kana kang Jehova.​—Filip. 4:6, 7. w15 4/15 4:14, 16

Kon mapasigarbohon kita sa maayong nahimo sa uban ug magbatog nahiangayng garbo sa kaugalingon, kini makaayo. Siyempre, dili nato angayng ikaulaw ang atong pamilya, kultura, o ang rehiyon nga gigikanan. (Buh. 21:39) Apan, dunay matang sa garbo nga makabungkag ug mga relasyon ug makadaot sa atong pagpakighigala kang Jehova. Ang maong garbo mahimong magtukmod kanato sa pagkasuko ug sa pagsalikway sa gikinahanglang tambag imbes mapainubsanon kining dawaton. (Sal. 141:5) Ang maong garbo gihubit ingong “sobrang pagtamod sa kaugalingon” o “pagkahambogiro nga gipakita sa mga tawong nagtuo, bisag walay basehan, nga mas maayo sila kay sa uban.” Si Jehova nagdumot sa pagkagarboso. (Ezeq. 33:28; Amos 6:8) Pero gusto ni Satanas nga makitang manghambog ang mga tawo kay kini magbanaag sa iyang pagkagarboso. Hunahunaa kon unsa ka malipayon si Satanas dihang nakita niya ang pagpanghambog ni Nimrod, Paraon, ug Absalom​—mga biktima sa sayop nga matang sa garbo!​—Gen. 10:8, 9; Ex. 5:1, 2; 2 Sam. 15:4-6. w15 5/15 2:5, 6

Agig pagsundog sa iyang Amahan, ‘si Kristo, ang gahom sa Diyos,’ subsob nga nagbukhad sa iyang kamot ug nagtagbaw sa tinguha o panginahanglan sa iyang mga sumusunod. (1 Cor. 1:24) Wala niya buhata kini aron lang ipakita ang iyang gahom. Siya gipalihok sa iyang kinasingkasing nga kahingawa sa uban. Konsideraha ang Mateo 14:14-21. Ang mga tinun-an ni Jesus miduol kaniya, tingali dili lang kay sila gigutom kondili nabalaka usab sila sa gigutom ug gikapoy nga panon sa katawhan nga nagbaktas ug nagsunod kang Jesus gikan sa mga siyudad. (Mat. 14:13) Unsay iyang buhaton? Pinaagi sa lima ka tinapay ug duha ka isda, gipakaon ni Jesus ang mga 5,000 ka lalaki, maingon man ang mga babaye ug mga bata! Ang panon sa katawhan “nangaon ug nangabusog.” Nagpakita kini nga abunda ang pagkaon. Si Jesus maluluy-ong nagtagana, dili lang aron makatilawg tinapay ang mga tawo, kondili aron sila mabusog ug makalahutay sa layo nga panaw sa pagpauli. (Luc. 9:10-17) Ug diha pay 12 ka bukag nga salin sa pagkaon! w15 6/15 1:8, 9

Ang imoralidad nahimong kaylap kaayo nga tingali makapangutana ka, ‘Posible ba nga magkinabuhing putli?’ Oo, sa tabang ni Jehova. Apan, aron magkinabuhing putli, kinahanglang isalikway nato ang imoral nga mga tinguha. Maingon nga ang paon makadani sa isda, ang imoral nga mga hunahuna ug tinguha​—kon dili dayon isalikway​—mahimong makadani ug makahaylo sa usa ka Kristohanon. Kini makapukaw sa atong makasasalang unod ug motultol sa paghimog imoral nga mga buhat. Sa ngadtongadto, ang pangdani sa sala mahimong kusganon kaayo nga bisan ang usa ka alagad ni Jehova dali nang mobuhat niana kon may kahigayonan. Oo, “ang tinguha . . . manganak ug sala.” (Sant. 1:14, 15) Angayng hinumdoman nga ang sayop nga tinguha mahimong motubo ug moresulta sa seryosong sala. Pero makapadasig ang pagkahibalo nga kon dili nato tugotan nga makagamot ang mahugawng tinguha, malikayan nato ang imoral nga buhat ug ang mapait nga mga sangpotanan niini!​—Gal. 5:16. w15 6/15 3:1-3

Mga 6,000 ka tuig kanhi, ang kabubut-on sa Diyos hingpit nga natuman sa yuta. Maong miingon si Jehova nga ang tanan “maayo kaayo.” (Gen. 1:31) Dayon mirebelde si Satanas, ug sukad niadto, pipila na lang ka tawo ang nagtuman sa kabubut-on sa Diyos dinhi sa yuta. Pero karon, kita nakapribilehiyo nga mabuhi sa panahon diin kapig walo ka milyong Saksi ang nag-ampo nga matuman unta ang kabubut-on sa Diyos dinhi sa yuta ug naningkamot nga magkinabuhing kaharmonya sa maong pag-ampo. Gibuhat nila kana pinaagi sa ilang paagi sa pagkinabuhi ug sa ilang madasigong pagpakigbahin sa buluhatong paghimog mga tinun-an. Samtang wala pa malaglag ang mga kaaway sa Gingharian sa Diyos dinhi sa yuta, kita padayong mag-ampo nga matuman unta ang kabubut-on sa Diyos. Sa umaabot, atong masaksihan nga matuman ang kabubut-on sa Diyos sa mas bug-os pa dihang binilyon ang banhawon sa paraisong yuta. (Juan 5:28, 29) Pagkanindot nga mabuhi sa panahon dihang atong abiabihon ang nabanhaw natong mga minahal! w15 6/15 4:15, 17

Ang ekspresyong “espirituwal nga paraiso” nahimo nang bahin sa atong teokratikanhong bokabularyo. Kini naghubit sa atong talagsaon, dagaya sa espirituwal nga kahimtang nga pinaagi niana atong natagamtam ang malinawong relasyon uban sa Diyos ug sa atong mga igsoon. Siyempre, dili kita angayng mohinapos nga parehas ra ang “espirituwal nga paraiso” ug “espirituwal nga templo.” Ang espirituwal nga templo mao ang kahikayan sa Diyos sa matuod nga pagsimba. Ang espirituwal nga paraiso tin-awng nagpaila kon kinsa ang inuyonan sa Diyos ug nag-alagad kaniya sa espirituwal nga templo karon. (Mal. 3:18) Makapalipay ang pagkahibalo nga sukad sa 1919, gitugotan ni Jehova ang dili hingpit nga mga tawo sa pagtabang kaniya sa pag-ugmad, pagpalig-on, ug pagpalapad sa espirituwal nga paraiso sa yuta! Nakigbahin ka ba niining maanindot nga buluhaton? Nagpalihok ba kini kanimo sa pagpadayon sa pagtabang kang Jehova sa paghimaya o pagpatahom sa ‘dapit sa iyang mga tiil’? w15 7/15 1:10, 11

Sa dili pa dad-on sa langit ang nahibilin sa 144,000, atakehon ni Gog ang katawhan sa Diyos. Unsay reaksiyon sa katawhan sa Diyos? Dinhi sa yuta, sila daw walay panalipod. Ilang sundon ang mga instruksiyon nga gihatag sa adlaw ni Haring Jehosapat: “Dili kamo kinahanglan nga makig-away niining higayona. Pahimutang kamo, barog nga walay lihok ug tan-awa ang kaluwasan ni Jehova alang kaninyo. Oh Juda ug Jerusalem, ayaw kahadlok o kalisang.” (2 Cron. 20:17) Apan sa langit, lahi ang reaksiyon. Sa paghisgot sa panahon dihang ang tanang dinihogan tua na sa langit, ang Pinadayag 17:14 nag-ingon bahin sa mga kaaway sa katawhan sa Diyos: “Kini sila makiggubat sa Kordero, apan, tungod kay siya Ginoo man sa mga ginoo ug Hari sa mga hari, sila pagadag-on sa Kordero. Dugang pa, kadtong mga tinawag ug pinili ug matinumanon kaniya mobuhat usab sa ingon.” Uban sa 144,000 nga kauban niyang magmamando sa langit, si Jesus moanhi aron luwason ang katawhan sa Diyos dinhi sa yuta. w15 7/15 2:16

Ang atong pagtahod sa Diyos kinsa nagdapit kanato sa mga tigom angayng madayag sa atong panggawi, sininaan, ug pamostura. Apan likayan nato ang paghinobra. Namatikdan nga samtang ang uban sobra ka estrikto labot sa kon unsay hustong panggawi dihang motambong sa mga tigom, ang uban tingali sobra ka kaswal nga morag naa ra sa balay. Siyempre, gusto ni Jehova nga ang iyang mga alagad ug ang ubang bisita mobating komportable sa Kingdom Hall. Apan dili maayo nga ang nanambong magpakitag kawalay-pagtahod sa mga tigom pinaagi sa pagsul-ob ug kaswal ra kaayo nga sinina, pag-text, pag-estoryahanay, o pagkaon panahon sa tigom. Angayng tudloan sa mga ginikanan ang ilang mga anak nga ang Kingdom Hall dili dapit diin sila magdagandagan o magdula. Dihang nakita ni Jesus nga may pipila nga nagnegosyo diha sa templo, siya nasuko ug giabog sila. (Juan 2:13-17) Ang atong mga Kingdom Hall usab maoy dapit alang sa putli nga pagsimba ug espirituwal nga edukasyon. Busa dili maayong magnegosyo samtang atua kita didto.​—Itandi ang Nehemias 13:7, 8. w15 7/15 4:7, 8

Gipakita sa Bibliya nga mograbe ang pagkadaotan “sa kataposang mga adlaw.” (2 Tim. 3:13; Mat. 24:21; Pin. 12:12) Busa makadahom kita nga ang kahimtang sa kalibotan mograbe pa. Pero sa imong hunahuna, unsa kaha ka grabe ang kahimtang sa dili pa mahitabo ang “dakong kasakitan”? (Pin. 7:14) Pananglitan, nagdahom ka ba nga duna unyay gubat sa matag nasod, mahurot ang pagkaon, ug may masakiton sa matag panimalay? Ubos sa maong kahimtang, bisan ang mga maduhaduhaon lagmit mapugos sa pagtuo nga nagakatuman ang mga tagna sa Bibliya. Apan, si Jesus miingon nga kadaghanan sa mga tawo ‘dili magtagad’ sa iyang presensiya, nga magpadayon sa ilang naandang mga kalihokan hangtod nga ulahi na ang tanan. (Mat. 24:37-39) Busa, gipakita sa Kasulatan nga ang kahimtang sa kalibotan panahon sa kataposang mga adlaw dili mograbe pag-ayo nga tungod niana mapugos ang mga tawo sa pagtuo nga duol na ang kataposan.​—Luc. 17:20; 2 Ped. 3:3, 4. w15 8/15 2:6, 7

Ang paggahin bag panahon sa pagpangandam alang sa bag-ong kalibotan nagpasabot nga way lami ang atong kinabuhi karon? Wala! Ang pag-alagad kang Jehova mao ang labing maayong paagi sa pagkinabuhi. Wala kita mag-alagad kaniya kay gipugos kita o aron lang maluwas sa dakong kasakitan. Gidisenyo kita nga moalagad sa Diyos, ug mao kana ang maghatag ug kinalabwang kalipay. Ang pagpagiya kang Jehova ug pagtagamtam sa iyang maunongong gugma mas labaw pa kay sa bisan unsa. (Sal. 63:1, 2) Siyempre, dili na ta kinahanglang magpaabot sa bag-ong kalibotan aron matagamtam ang espirituwal nga mga panalangin nga resulta sa atong kinasingkasing nga pag-alagad kang Jehova​—ato na kining matagamtam bisan karon! Gani, ang pipila kanato dugay nang nagtagamtam sa maong mga panalangin, ug nasayod kita base sa atong kasinatian nga kini lang ang makahatag ug dakong katagbawan.​—Sal. 1:1-3; Isa. 58:13, 14. w15 8/15 3:16

Ginatabangan kita sa atong pagtuo nga mahimo ang mga butang nga daw imposible. (Mat. 21:21, 22) Pananglitan, daghan kanato ang mihimog dakong kausaban sa atong kinaiya ug panggawi nga halos dili na ta mailhan niadtong nakaila kanato kanhi. Gitabangan kita ni Jehova kay naningkamot tang buhaton ang mga kausaban tungod sa atong pagtuo kaniya. (Col. 3:5-10) Dihang gipalihok kita sa pagtuo nga magpahinungod kang Jehova, nahimo tang iyang higala, nga dili gayod nato mahimo kon wala ang iyang tabang. Ang atong pagtuo padayong nagpalig-on kanato. Tungod sa pagtuo, nakasukol ta sa mga pag-atake sa Yawa. (Efe. 6:16) Dugang pa, ang pagsalig kang Jehova nakatabang nato nga dili kaayo mabalaka panahon sa kalisdanan. Si Jehova nag-ingon nga kon kita mosalig kaniya ug unahon ang Gingharian, iyang itagana ang atong materyal nga panginahanglan. (Mat. 6:30-34) Ug labaw pa niana, tungod sa atong pagtuo, kita makadawat ug regalo nga dili mabatonan ni bisan kinsa sa kaugalingong paningkamot​—ang kinabuhing walay kataposan.​—Juan 3:16. w15 9/15 3:4, 5

Sa unsang paagi ang Diyos “unang nahigugma kanato”? Si Pablo miingon: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Ang gugma ang pangunang hiyas ni Jehova, busa atong masabtan kon nganong giingnan ni Jesus ang nangutana niya kon unsa ang unang sugo sa Diyos: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Mar. 12:30) Sa gipamulong ni Jesus, atong makat-onan nga, una sa tanan, ang paghigugma sa Diyos naglangkit sa atong kasingkasing. Malipay si Jehova kon bug-os kasingkasing ang atong paghigugma kaniya. Pero kini naglangkit sab sa atong tibuok kalag, hunahuna, ug kusog. Kini nagpasabot nga ang tinuod nga paghigugma sa Diyos dili lang pagbati sa kasingkasing. Kini kinahanglang maglangkit sa tanan natong espirituwal ug pisikal nga katakos. Sumala ni Miqueas, kana ang gipangayo ni Jehova kanato.​—Miq. 6:8. w15 9/15 5:1-3

Unsa ang pipila ka rason kon nganong dili nato klarong makita ang kamot sa Diyos diha sa atong kinabuhi? Mahimong mabug-atan ta sa mga problema. Kon mahitabo kini, mahimong makalimot tang kadaghan na tang gitabangan ni Jehova. Dihang gihulga si Elias ni Raynang Jezebel, siya nakalimot sa makadiyot nga gitabangan siya sa Diyos kaniadto. Maylabot kang Elias, ang Bibliya nag-ingon: “Siya mihangyo nga ang iyang kalag mamatay unta.” (1 Hari 19:1-4) Unsay solusyon sa problema ni Elias? Kinahanglan siyang modangop kang Jehova alang sa pagdasig. (1 Hari 19:14-18) Si Job naghunahuna pag-ayo sa iyang mga problema maong wala niya makita ang mga butang sumala sa panglantaw sa Diyos. (Job 42:3-6) Sama ni Job, kinahanglan tingali tang maningkamot aron makita ang Diyos. Unsaon nato kana paghimo? Kinahanglan natong palandongon ang giingon sa Kasulatan bahin sa atong mga problema. Samtang makita nato kon giunsa ta pagtabang ni Jehova, siya mahimong mas tinuod kanato. w15 10/15 1:15, 16

Daghang panghitabo sa ministeryo ni Jesus ang mahimong makabalda kaniya, pero wala siya magpalinga. Sa sayong bahin sa iyang ministeryo, human siya makasangyaw sa panon sa katawhan ug makahimog mga milagro sa Capernaum, gihangyo siya sa mga tawo sa pagpabilin una sa ilang siyudad. Apan unsay sanong ni Jesus niining maayo unta nga hangyo? Siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:42-44) Tuod man, gilibot ni Jesus ang Palestina aron sa pagsangyaw ug pagpanudlo. Siya hingpit, pero may panginahanglan gihapon sama kanato ug usahay mobati siyag grabeng kakapoy tungod sa iyang buluhaton sa pag-alagad sa Diyos. (Luc. 8:23; Juan 4:6) Sa ulahi, samtang nagtudlo si Jesus sa iyang mga sumusunod kon unsaon pag-atubang ang pagsupak, usa ka tawo ang misagbat: “Magtutudlo, sultihi ang akong igsoon nga bahinan niya ako sa panulondon.” Apan wala mangilabot si Jesus sa ilang problema.​—Luc. 12:13-15. w15 10/15 3:10, 11

Ang gugma mao ang panguna ug labing importanteng hiyas sa Diyos. Si Jehova wala lamang makabaton ug gugma​—siya ang personipikasyon niini. Pagkamapasalamaton nato sa pagkahibalo nga ang Maglalalang sa uniberso ug sa tanang buhing butang maoy Diyos sa gugma! Ang tanan niyang ginahimo gipasukad sa gugma. Ang mabinationg gugma sa Diyos sa iyang mga linalang nagpasalig kanato nga ang tanan niyang katuyoan para sa katawhan matuman sa labing maayong paagi ug makahatag ug dakong kaayohan sa tanang magpasakop sa iyang pagmando. Pananglitan, tungod sa gugma, si Jehova ‘nagtakda ug adlaw aron iyang pagahukman ang gipuy-ang yuta subay sa pagkamatarong pinaagi sa usa ka tawo nga iyang gitudlo,’ si Jesu-Kristo. (Buh. 17:31) Makasalig kita nga mahitabo gayod kini. Alang sa masinugtanong katawhan, ang maong paghukom moresulta sa maanindot ug dumalayong kaugmaon. w15 11/15 3:1, 2

Sa atong pagsangyaw, lainlain ang reaksiyon sa mga tawo​—ang pipila maminaw, ang uban masuko. Pero, bisag unsa pay ilang reaksiyon, ang Pulong sa Diyos naghatag ug sukdanan nga angayng sundon sa iyang mga alagad. Dihang mohimo kitag pagdepensa atubangan niadtong nangayog katarongan sa atong paglaom, buhaton nato kini “uban ang kalumo sa buot ug halawom nga pagtahod” tungod sa atong gugma sa silingan. (1 Ped. 3:15) Kita magpakitag gugma sa silingan bisan pag isalikway sa masuk-anong tagbalay ang atong mensahe. Gisundog nato si Jesus: “Sa gisultihan siya ug pasipala, wala siya mobalos sa pagsultig pasipala. Sa nag-antos siya, wala siya manghulga, apan nagpadayon sa pagpiyal sa iyang kaugalingon ngadto sa usa [si Jehova] nga nagahukom sa pagkamatarong.” (1 Ped. 2:23) Kauban man sa mga isigkamagtutuo o dili, kita magmapainubsanon ug atong ipadapat ang tambag: “Dili magabalos ug kadaot sa kadaot o magasultig pasipala sa pasipala, kondili, sa kasukwahi, manghinaot ug kaayohan.”​—1 Ped. 3:8, 9. w15 11/15 4:17, 18

Si Jesus wala magpanuko sa pagsulti sa iyang mga tinun-an nga gihigugma niya sila. (Juan 15:9) Gipakita usab niya ang iyang gugma pinaagi sa kanunayng pagpakig-uban kanila. (Mar. 6:31, 32; Juan 2:2; 21:12, 13) Sa susama, sultii ang imong mga anak nga gihigugma nimo sila, ug kanunayng ipakita kanila nga bililhon sila kanimo. (Prov. 4:3) Si Samuel, nga taga-Australia, nag-ingon: “Sa bata pa ko, basahan ko ni Papa sa Akong Basahon sa mga Estorya sa Bibliya kada gabii. Tubagon niya ang akong mga pangutana, ug iya kong gakson ug hagkan sa dili pa mi mangatulog. Nakurat ko dihang akong nahibaloan sa ulahi nga si Papa wala diay magdako sa pamilya diin naandan ang paggakos ug paghalok! Bisan pa niana, naningkamot siya sa pagpakita sa iyang gugma kanako. Maong nasuod kaayo ko niya ug mibati kog katagbawan ug kasegurohan.” Tabangi ang imong anak nga mobatig ingon niana pinaagi sa kanunayng pagsulti kaniyag “Gimahal tika.” Ipakita ang imong pagmahal sa imong mga anak. Paggahin ug panahon sa pagpakigsulti, pagkaon, ug pagdula uban kanila. w15 11/15 1:3, 4

Niadtong 1919, dihang ang gamayng grupo sa mga estudyante sa Bibliya gitudlo ingong “matinumanon ug maalamong ulipon,” sagad makigkomunikar sila sa “mga sulugoon sa panimalay” gamit ang Iningles. Ang maong “ulipon” naningkamot pag-ayo aron mabatonan ang espirituwal nga pagkaon sa mas daghang pinulongan; sa pagkakaron kapin nag 700. Tin-aw nga gikinahanglan usab ang hubad sa Bibliya nga tukma ug sayon sabton. Busa, giporma ang New World Bible Translation Committee, ug sulod sa 10 ka tuig gikan sa 1950 hangtod sa 1960, ang ilang hubad giluwatan sa unom ka tomo. Dihang giluwatan ang unang tomo niadtong Agosto 2, 1950 panahon sa usa ka kombensiyon, si Brader N. H. Knorr naglaom nga kini nga hubad makatabang sa milyonmilyon nga makaila kang Jehova. w15 12/15 1:15, 17

Nalisdan ka ba sa pagpilig “makapahimuot nga mga pulong”? Kon mao, kinahanglan tingali nimong pauswagon ang imong bokabularyo. Ang usa ka paagi sa paghimo niini mao ang pagtimaan kon giunsa paggamit ang mga pulong diha sa Bibliya ug sa atong mga publikasyon. Sayra ang kahulogan sa dili pamilyar nga mga ekspresyon ug kon unsaon paggamit ang mga pulong sa pagtabang sa uban. Maylabot sa relasyon tali kang Jehova ug sa iyang panganayng Anak, atong mabasa: ‘Si Jehova naghatag kanako [si Jesus] sa dila sa mga tinudloan, aron ako mahibalo kon unsaon pagtubag sa gikapoy pinaagig [hustong] pulong.’ (Isa. 50:4) Ang paggahig panahon sa pagpamalandong sa atong isulti makatabang nato sa pagpangitag hustong mga pulong. (Sant. 1:19) Mahimong pangutan-on nato ang kaugalingon, ‘Kon ako ning isulti, masabtan kaha sa akong kaestorya kon unsay gusto nakong ipasabot? Unsay epekto niini diha sa akong kaestorya?’ w15 12/15 3:12

Sa pagkakita nga gilibotan na ang Jerusalem sa “nagkampong kasundalohan,” ingon sa gitagna ni Jesus, kinahanglang molihok dayon ang mga Kristohanon sa Judea, ilabina kadtong nagpuyo sa Jerusalem. Gipasidan-an sila ni Jesus nga inigkakita nila nga malibotan na ang Jerusalem sa mga sundalo, kinahanglan silang mobiya dayon. (Luc. 21:21-24) Sulod sa 28 ka tuig sukad isulti ni Jesus ang maong tagna, daghan nang pagsulay ug paglutos ang malamposong nasagubang sa matinumanong Hudiyong mga Kristohanon. (Heb. 10:32-34) Pero nahibalo si Pablo nga hapit na nilang atubangon ang usa sa kinadak-ang pagsulay sa ilang pagtuo. (Mat. 24:20, 21; Heb. 12:4) Gusto niya nga maandam sila sa kon unsay posibleng mahitabo. Gikinahanglan gyod nila ang paglahutay ug lig-ong pagtuo​—pagtuo nga makaluwas sa ilang kinabuhi. (Heb. 10:36-39) Busa gipalihok sa espiritu ni Jehova si Pablo nga sulatan ang maong minahal nga mga igsoon aron palig-onon sila. Kana nga sulat nailhan karon ingong basahon sa Hebreohanon. w16.01 1:1, 2

Aron higugmaon ta sa Diyos, kinahanglang ilhon nato ang atong obligasyon sa paghigugma sa atong mga igsoon. (1 Juan 3:16) Sa unsang paagi nato mapasundayag ang atong gugma sa praktikal nga mga paagi? Tagda ang ehemplo ni Jesus. Panahon sa iyang ministeryo dinhi sa yuta, iyang gihatagag linaing pagtagad ang ubos nga mga tawo. Iyang giayo ang mga bakol, buta, bungol, ug amang. (Mat. 11:4, 5) Si Jesus nalipay sa pagtudlo niadtong gigutom sa espirituwal, kadtong giisip sa Hudiyong mga lider sa relihiyon ingong “tinunglong katawhan.” (Juan 7:49) Iyang gimahal kining ubos nga mga tawo ug naghago siya sa pagtabang kanila. (Mat. 20:28) Gihunahuna ba usab nimo ang mga igsoon sa inyong kongregasyon? Sa walay duhaduha, ang pipila makabenepisyo sa imong ipakitang gugma. Tingali adunay mga tigulang nga nanginahanglag tabang. Ang gugma sa Diyos angayng magpalihok kanato sa pagtabang ug pagpakitag gugma sa atong mga igsoon. w16.01 2:12-14

Kinahanglan bang mahibaloan sa ubang mga karnero ang ngalan sa tanang dinihogan karon? Dili. Ngano? Tungod kay bisag ang usa nakadawat ug langitnong pagkatinawag, siya gidapit pa lang, wala pa niya madawat ang ganti. Kanay rason kon nganong si Satanas nagpatunghag “mini nga mga manalagna . . . aron sa pagpahisalaag, kon mahimo, bisan sa mga pinili.” (Mat. 24:24) Ayha pa maseguro nga ang usa ka dinihogan makadawat sa iyang langitnong ganti kon mohukom na si Jehova nga ang maong tawo takos niana. Si Jehova ang mohukom niini ug mohatag kaniya sa kataposang pagtimbre sa dili pa siya mamatay nga matinumanon o kaha sa dili pa magsugod ang “dakong kasakitan.” (Pin. 2:10; 7:3, 14) Nan, walay kapuslanan ang pagsusi karon kon kinsa gyod sa mga alagad sa Diyos ang mahimong bahin sa 144,000. w16.01 4:2, 3

Hunahunaa kon sa unsang paagi ang pagsangyaw sa maayong balita nalangkit sa katuyoan ni Jehova sa katawhan. Katuyoan niya nga ang mga tawo magpuyo sa yuta nga dili gayod mamatay, ug bisag nakasala si Adan, wala mausab ang hunahuna ni Jehova. Hinunoa, mihimo siyag kahikayan sa pagluwas sa katawhan gikan sa sala ug kamatayon. Sa pagtuman sa maong katuyoan, si Jesus mianhi sa yuta ug mihalad sa iyang kinabuhi alang sa masinugtanong katawhan. Pero aron mahimong masinugtanon, kinahanglang makasabot sila kon unsay gisugo sa Diyos kanila. Busa gitudloan ni Jesus ang katawhan bahin sa mga sugo sa Diyos, ug gisugo niya ang iyang mga tinun-an sa paghimo usab niana. Pinaagi sa pagtabang sa mga tawo nga mapasig-uli sa Diyos, kita direktang nakigbahin sa iyang mahigugmaong kahikayan sa pagluwas sa katawhan gikan sa sala ug kamatayon. Kini usab nagpakita nga atong gihigugma ang atong isigkatawo ug si Jehova, “kansang kabubut-on mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.”​—1 Tim. 2:4. w16.01 5:15, 16

Ang anak ni Ahaz nga si Ezequias puwede untang masuko o mayugot sa Diyos. Ang uban nga dili kaayo ingon niana ang kalisod nga naagian ‘naaligutgot kang Jehova’ o nayugot sa iyang organisasyon. (Prov. 19:3) Ug ang pipila mibati nga tungod sa ilang dili maayong kagikan, lagmit mahimo silang daotan o masundog nila ang kasaypanan sa ilang ginikanan. (Ezeq. 18:2, 3) Husto ba ang maong panghunahuna? Ang kinabuhi ni Ezequias nagpamatuod nga sayop gayod kana. Wala gayoy maayong katarongan nga mayugot kang Jehova, kay dili siya ang hinungdan sa kadaot nga nahitabo sa mga tawo niining daotang kalibotan. (Job 34:10) Tinuod, ang mga ginikanan makaimpluwensiya sa ilang mga anak sa paghimog maayo o daotan. (Prov. 22:6; Col. 3:21) Apan wala kini magpasabot nga ang kagikan sa usa maoy magtino kon unsay iyang kinabuhi inigkadako niya. Sa kasukwahi, si Jehova naghatag kanatong tanan ug bililhong gasa​—ang katakos nga mopili kon unsay atong buhaton ug kon mahimong unsa kita inigkahamtong na.​—Deut. 30:19. w16.02 2:8-10

Gipaluyohan ni Abner ang plano ni Saul sa pagpatay kang David bisan pag nasayod siya nga gipili sa Diyos si David nga mahimong hari sa Israel. (1 Sam. 26:1-5) Human mamatay si Saul, si Abner makapakita untag pagkamapainubsanon ug pagkamaunongon sa Diyos pinaagi sa pagpaluyo kang David, dili sa anak ni Saul nga si Is-boset. Sa ulahi, dihang nakigrelasyon si Abner sa puyopuyo ni Haring Saul, lagmit nagtinguha sab siya nga mahimong hari. (2 Sam. 2:8-10; 3:6-11) Sa susama, si Absalom nga anak ni David, wala magmaunongon sa Diyos kay siya dili mapainubsanon. Gani, “si Absalom nagpahimog usa ka karo alang sa iyang kaugalingon, nga may mga kabayo ug kalim-an ka tawo nga magadagan una kaniya.” (2 Sam. 15:1) Giilog sab niya ang pagkamaunongon sa mga tawo. Sama kang Abner, gusto niyang patyon si David bisag nahibalo siya nga gitudlo ni Jehova si David ingong hari sa Israel. (2 Sam. 15:13, 14; 17:1-4) Ang mga pananglitan ni Abner ug Absalom nagpakita nga ang sobrang ambisyon makapahimo sa usa nga dili maunongon sa Diyos. Seguradong walay matinumanong alagad ni Jehova ang gustong mosunod nianang hakog ug daotang buhat. w16.02 4:9-11

Kon lig-on ang imong pagtuo, makataronganong dahomon nga ipakita nimo kana sa imong binuhatan. Ang mga batan-on kinahanglang magpakita ug “balaang mga buhat sa panggawi.” (2 Ped. 3:11) Aron mahimo kana, kinahanglang magmahinlo ka sa moral. Komosta ka nianang bahina? Pananglitan, hunahunaa ang milabayng unom ka bulan. Giunsa nimo pagpakita nga ang imong “gahom sa pagsabot” nabansay sa pag-ila sa maayo ug sa daotan? (Heb. 5:14) May mahunahunaan ka bang higayon nga nasuklan nimo ang tentasyon o pagpangdani sa imong isigkabatan-on? Maayo ba ang imong panggawi sa eskuylahan? Mibarog ka ba sa imong pagtuo imbes mopahiuyon sa imong mga klasmet aron dili ka bugalbugalan? (1 Ped. 4:3, 4) Tinuod, walay tawong hingpit. Bisan ang dugay nang mga alagad ni Jehova usahay maulaw ug mahadlok nga mosangyaw. Apan ang usa ka tawo nga napahinungod kang Jehova mapasigarbohon gayod sa pagdala sa ngalan sa Diyos, ug ipakita niya kini sa iyang panggawi. w16.03 2:10, 11

Latas sa kasaysayan, si Jehova naghatag ug espesipikong mga instruksiyon. Pananglitan, sa tanaman sa Eden, siya naghatag ug tin-aw nga mga instruksiyon nga makagiya sa tawhanong pamilya ngadto sa walay kataposang kinabuhi ug kalipay. (Gen. 2:15-17) Kon misunod pa si Adan ug Eva, dili unta nila maagoman ang mapait nga sangpotanan​—kinabuhing punog kasakit nga mosangpot sa kamatayon ug walay paglaom. Pero imbes mosunod, si Eva namati sa tambag nga daw naggikan sa usa ka halas. Sa baylo, si Adan namati sa tingog sa iyang asawa. Silang duha mitalikod sa mahigugmaong paggiya sa ilang Amahan. Sukad niadto, ang tibuok tawhanong pamilya nagsubay na sa dalan nga mosangpot sa kamatayon. Karon, si Jehova nagbarog atubangan sa iyang katawhan nga nagtudlo kanila sa dalan padulong sa kinabuhing walay kataposan, nga layo sa kapeligrohan. Labaw pa niana, siya samag mahigugmaong magbalantay, nga naghatag ug instruksiyon ug pasidaan sa mga karnero aron ilang malikayan ang peligrosong mga agianan. w16.03 4:2, 3