Marso

Tungod sa gugma ug kahingawa alang sa mga karnero ni Jehova, ang mga ansiyano naningkamot sa paggahig panahon nga ipaambit sa mas batang mga brader ang ilang mga kasinatian sulod sa daghang katuigan nga matinumanong pag-alagad. (Sal. 71:17, 18) Ang mga ansiyano nga nagbansay sa uban usa ka panalangin sa panon. Sila nagpalig-on sa kongregasyon. Nganong makaingon ta niana? Tungod sa paningkamot sa mga ansiyano sa pagbansay sa uban, mas daghang brader ang nahimong andam sa pagtabang sa kongregasyon nga magpabiling lig-on ug nahiusa, dili lang karon apan ilabina pag-abot sa magubot nga mga yugto sa dakong kasakitan. (Ezeq. 38:10-12; Miq. 5:5, 6) Busa, minahal nga mga ansiyano, kami naghangyo kaninyo nga ilakip kanunay sa inyong ministeryo karon ang pagbansay sa uban. Siyempre, kami nakasabot nga gigugol na ninyo ang halos tanan ninyong panahon sa pag-atiman sa hinungdanong mga kalihokan sa kongregasyon. Busa, kinahanglan tingali ninyong kuhaan ang pipila niana nga panahon ug gamiton kana sa pagbansay. (Eccl. 3:1) Ang paghimo niana maoy maalamong paggamit sa panahon. w15 4/15 1:8-10

Seguradong mouyon ka nga ang Bibliya naundan sa mensahe sa Diyos alang sa tanang tawo. Pero gipakita ba usab sa Bibliya kon sa unsang paagi mas masuod ka kang Jehova? Oo. Sa unsang paagi? Samtang regular kang magbasa ug magtuon sa Bibliya, tagda kon unsay imong sanong sa giingon niini ug pamalandonga kon unsaon nimo kini pagpadapat. Nianang paagiha, imong gitugotan si Jehova nga makig-estorya kanimo pinaagi sa iyang Pulong. Kini mas makapasuod nimo kaniya. (Heb. 4:12; Sant. 1:23-25) Pananglitan, basaha ug pamalandonga ang giingon ni Jesus nga “hunong na kamo sa pagtigom ug mga bahandi alang kaninyo dinhi sa yuta.” Kon gihimo na nimo ang imong maarangan sa pag-una sa intereses sa Gingharian, imong bation nga nalipay si Jehova. Sa laing bahin, kon imong nakita nga kinahanglang pasimplehon ang imong kinabuhi ug mas magpokus sa intereses sa Gingharian, gitabangan ka niya sa pagkahibalo kon unsay angay nimong pauswagon aron mas masuod ka kaniya.—Mat. 6:19, 20. w15 4/15 3:3-5

Samtang kita magmapuliki sa buluhatong pagsangyaw sama kang Pablo, makasalig kita nga “igadugang ra” kanato ni Jehova ang tanan natong gikinahanglan. (Mat. 6:33) Ingong magsasangyaw sa Gingharian, ‘gipiyal kanato ang maayong balita,’ ug giisip kita ni Jehova ingong iyang “mga isigkamagbubuhat.” (1 Tes. 2:4; 1 Cor. 3:9) Kon aktibo kita sa buluhaton sa Diyos, mas sayon ang pagpaabot sa tubag sa atong pag-ampo. Nan, gamiton nato ang atong panahon sa pagpalig-on sa atong relasyon sa Diyos. Kon nabalaka kita tungod sa usa ka kahimtang, isipa kini ingong kahigayonan nga mas masuod kang Jehova. Oo, kon kita magtuon ug mamalandong sa Pulong sa Diyos, kanunayng mag-ampo, ug magmapuliki sa espirituwal nga mga kalihokan, kita makasalig nga si Jehova motabang kanato sa paglahutay sa mga pagsulay karon ug sa umaabot. w15 4/15 4:17, 18

Ang pagkagarboso makatugaw sa kalinaw sa kongregasyon. Kon kita magdumot sa uban ug maghunahuna nga mas labaw ta kanila, mahimong makasulti ta ug makabuhat ug mga butang nga makapasakit pag-ayo kanila. (Prov. 12:18) Kon kita may tendensiya nga mobating labaw sa uban, kinahanglan natong hinumdoman nga “ang tagsatagsa nga garboso sa kasingkasing maoy dulumtanan kang Jehova.” (Prov. 16:5) Angay usab natong susihon ang atong panglantaw niadtong lahi ug rasa, nasyonalidad, o kultura. Kon mobati kitang labaw ang atong rasa ug nasod, gibalewala nato ang kamatuoran nga “gihimo [sa Diyos] gikan sa usa ka tawo ang tanang nasod sa katawhan.” (Buh. 17:26) Sa maong diwa, usa ray rasa sa tawo kay kitang tanan gikan kang Adan. Busa, binuang gayod ang paghunahuna nga natural lang nga may pipila ka rasa nga labaw o ubos. Ang maong panghunahuna maoy paagi ni Satanas sa pagdaot sa atong Kristohanong gugma ug panaghiusa. (Juan 13:35) Aron masuklan si Satanas ug magmadaogon, kinahanglan natong isalikway ang tanang matang sa sayop nga garbo.—Prov. 16:18. w15 5/15 2:8, 9

Walay duhaduha, kita nalipay nga ang Diyos nagsaad ug imortal nga kinabuhi sa langit ngadto sa matinumanong mga dinihogan ug walay kataposang kinabuhi sa yuta ngadto sa maunongon nga “ubang mga karnero” ni Jesus. (Juan 10:16; 17:3; 1 Cor. 15:53) Siyempre, mawala na nianang panahona ang pag-antos. Bisan pa niana, makasabot si Jehova sa kasakit nga atong bation karon, sama nga iyang nasabtan ang pag-antos sa mga Israelinhon dihang sila naulipon sa Ehipto. Gani, “sa panahon sa tanan nilang kasakit kadto nakapasakit kaniya.” (Isa. 63:9) Kasiglohan sa ulahi, ang mga Hudiyo nahadlok dihang gisupak sa mga kaaway ang pagtukod pag-usab sa templo, pero giingnan sila sa Diyos: “Siya nga nagahilabot kaninyo nagahilabot sa kalimutaw sa akong mata.” (Zac. 2:8) Maingon nga ang usa ka inahan nagmahal sa iyang anak, si Jehova mahigugmaong motabang sa iyang katawhan. (Isa. 49:15) Busa, mahimong masabtan ni Jehova ang usa ka situwasyon bisag wala niya kini masinatii, ug gihatagan ta niya sa maong katakos.—Sal. 103:13, 14. w15 5/15 4:2

Buot bang ipasabot ni Jesus nga kanunayng may mga kabos sa yuta? Dili. Iyang gipasabot nga kanunayng may mga kabos samtang ania pa kining daotang sistema sa mga butang. Karon, ang pangunang panginahanglan sa gatosan ka milyong katawhan wala matagbaw tungod sa dili matarong nga pagmando sa tawo. Pero, hapit nang moabot ang kahupayan! (Sal. 72:16) Ang mga milagro ni Jesus nagpasalig kanato sa iyang katakos ug tinguha nga gamiton sa dili madugay ang iyang awtoridad alang sa atong kaayohan. (Mat. 14:14-21) Bisag dili kita makahimog milagro, makasulti kita sa mga tawo bahin sa gitagna sa Bibliya nga mas maayong panahon sa umaabot. Ingong dedikadong mga Saksi ni Jehova nga nakabaton niining bililhong kahibalo bahin sa umaabot, dili ba obligasyon usab nato nga isulti kini sa uban? (Roma 1:14, 15) Hinaot nga ang pagpamalandong niini magpalihok kanato sa pagsulti sa uban bahin sa maayong balita sa Gingharian sa Diyos.—Sal. 45:1; 49:3. w15 6/15 1:7, 10, 11

Kon gipabilhan nato ang atong relasyon kang Jehova, maningkamot kita nga pahimut-an siya sa tanang bahin sa atong kinabuhi, lakip na sa atong hunahuna. Buot natong mabatonan ang ‘hinlong kasingkasing’ pinaagi sa pagpokus sa atong hunahuna sa mga butang nga putli, hamili, ug dalayegon. (Sal. 24:3, 4; 51:6; Filip. 4:8) Tinuod, si Jehova mokonsiderar sa atong pagkadili-hingpit. Siya nahibalo nga kita makiling sa sayop nga mga tinguha. Apan nahibalo kita nga maguol siya kon ugmaron nato ang sayop nga tinguha imbes isalikway kana. (Gen. 6:5, 6) Kon ato ning pamalandongon, mas madeterminado kita nga huptang putli ang atong hunahuna. Ang usa ka hinungdanong paagi sa pagpakita sa atong bug-os nga pagsalig kang Jehova maoy pinaagi sa pag-ampo bahin sa atong pagpakigbisog sa mahugawng mga hunahuna. Kon makigsuod kita kang Jehova pinaagi sa pag-ampo, siya makigsuod kanato. Siya madagayaong maghatag kanato sa iyang balaang espiritu, nga makapalig-on sa atong determinasyon nga suklan ang imoral nga mga hunahuna ug makapabiling putli. w15 6/15 3:4, 5

Matikdi nga kini maoy personal nga hangyo dili lamang alang sa “akong” tinapay niining adlawa kondili sa “among” tinapay niining adlawa. Si Victor, usa ka circuit overseer sa Africa, miingon: “Kanunay kong magpasalamat kang Jehova nga kami sa akong asawa dili kaayo mabalaka kon unsay kan-on, ni mabalaka mi kon kinsay mobayad sa abang sa balay. Ang mga igsoon maoy nagtagana sa among adlaw-adlawng panginahanglan. Apan nag-ampo ko nga kadtong nagtabang namo makasagubang unta sa kalisod sa kinabuhi.” Kon daghan tag pagkaon, mahimong hinumdoman nato ang pobreng mga igsoon o kadtong naapektohan sa mga kalamidad. Dili kay moampo lang ta alang kanila kondili molihok usab kita nga kaharmonya niana. Pananglitan, makapaambit kita sa atong nabatonan ngadto sa atong mga igsoon nga nanginahanglan. Regular usab kitang makahatag ug amot sa tibuok kalibotang buluhaton, kay nasayod kita nga ang maong mga amot gamiton sa maalamong paagi.—1 Juan 3:17. w15 6/15 5:4-6

Ang talagsaong kausaban maylabot sa yutan-ong bahin sa organisasyon ni Jehova gitagna sa Isaias 60:17. Ang mga batan-on o bag-ohan nakabasa bahin sa ebidensiya niana nga mga kausaban o nakadungog bahin niana. Apan dako gayong pribilehiyo alang sa mga igsoon nga nakasinati mismo niana! Dili ikatingala nga kombinsido sila nga pinaagi sa iyang naentronong Hari, si Jehova nagagiya sa Iyang organisasyon! Sila nahibalo nga may basehanan ang ilang pagsalig, ug nabatonan usab nato ang maong pagsalig. Ang pagpamati sa ilang mga eksperyensiya magpalig-on sa atong pagtuo ug pagsalig kang Jehova. Kita man dugay na sa kamatuoran o bag-ohan pa, kinahanglan natong isulti sa uban ang bahin sa organisasyon ni Jehova. Milagro gayod ang paglungtad sa espirituwal nga paraiso taliwala niining daotan, korap, ug walay gugmang kalibotan! w15 7/15 1:12, 13

Ang gubat sa Armagedon mosangpot sa paghimaya sa balaang ngalan ni Jehova. Nianang panahona, ang tanang samag kanding nga mga tawo makaagom sa “walay kataposang kalaglagan.” (Mat. 25:31-33, 46) Ang yuta mahinloan na sa tanang pagkadaotan, ug ang dakong panon maluwas sa kataposang bahin sa dakong kasakitan. Kay haduol na kining kulbahinam nga mga panghitabo, unsay angayng buhaton sa matag usa kanato? Si apostol Pedro giinspirar sa pagsulat: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova . . . Busa, mga hinigugma, sanglit nagapaabot kamo niining mga butanga, buhata ang kutob sa inyong maarangan nga sa kataposan makaplagan kamo niya nga walay buling ug walay lama ug anaa sa pakigdait.” (2 Ped. 3:11, 12, 14) Hinaot nga magmadeterminado kita sa pagpabiling hinlo sa espirituwal ug sa pagpaluyo sa Hari sa Pakigdait. w15 7/15 2:17, 18

Ang organisasyon ni Jehova naningkamot sa pagtaganag simpleng mga Kingdom Hall ug paghatag ug pinansiyal nga tabang sa pagtukod niini. Ang pagdisenyo, pagtukod, ug pagremodel niana gihimo sa walay suweldong mga boluntaryo. Sukad sa Nobyembre 1, 1999, kapig 28,000 ka nindot ug bag-ong mga sentro sa putli nga pagsimba ang gitagana sa mga kongregasyon sa tibuok kalibotan. Nagpasabot kana nga sulod sa 15 ka tuig, sa aberids, lima ka bag-ong Kingdom Hall ang matukod matag adlaw. Gihimo ang mga paningkamot aron masuportahan ang pagpanukod ug mga Kingdom Hall sa mga dapit diin kini gikinahanglan. Kining mahigugmaong tagana gibase sa prinsipyo sa Kasulatan nga ang sobra sa pipila makahulip sa kakulangan sa uban, aron “adunay pag-angay-angay.” (2 Cor. 8:13-15) Ingong resulta, ang nindot ug bag-ong mga sentro sa putli nga pagsimba gitagana sa mga kongregasyon nga dili makaarang sa pagtukod ug kaugalingong Kingdom Hall. w15 7/15 4:9-11

Aron matuman ang katuyoan sa ilhanan sa presensiya ni Kristo, kinahanglan nga ang katumanan niini klarong makita niadtong nagsunod sa tambag ni Jesus nga “magpadayon sa pagbantay.” (Mat. 24:27, 42) Ug kanay nahitabo sukad sa 1914. Sugod nianang tuiga, padayong nagakatuman ang mga bahin sa ilhanan. Klaro nga kita nagkinabuhi karon sa “kataposan sa sistema sa mga butang”—usa ka mubong yugto sa panahon nga mosangpot sa kalaglagan niining daotang sistema. (Mat. 24:3) Nan, nganong kinahanglang magpadayon sa pagpaabot ang mga Kristohanon karon? Kita kinahanglang magpaabot ingong pagsunod kang Jesu-Kristo. Dugang pa, atong nakita ang ilhanan sa iyang presensiya. Kita nagpaabot dili tungod kay dali ra tang patuohon kondili tungod kay kombinsido kita sa lig-ong ebidensiya sa Kasulatan. Tungod niana, kita nagpabiling alerto, nagtukaw, nagmabinantayon, ug nagpaabot sa kalaglagan niining daotang sistema. w15 8/15 2:8, 9

Sa bag-ong kalibotan, may panahon kita alang sa mga butang nga gusto natong himoon ug sa paglingawlingaw. Kon buot hunahunaon, nganong gilalang man kita ni Jehova nga may ingon niini nga tinguha kon dili pa niya katuyoan nga tagbawon kini? (Eccl. 2:24) Niini ug sa uban pang paagi, si Jehova kanunayng ‘nagtagbaw sa tinguha sa tanang buhing butang.’ Kinahanglan tang maglingawlingaw ug magpahulay, pero mas magmalipayon kita kon unahon nato ang atong relasyon kang Jehova. Ingon usab niana sa Paraiso. Maalamon gayod ang pagkat-on nga ibutang sa hustong dapit ang mga butang nga gusto natong himoon samtang atong gipangita pag-una ang Gingharian ug gisentro ang atong pagtagad sa espirituwal nga mga panalangin nga ginatagamtam sa katawhan ni Jehova karon! (Mat. 6:33) Sa umaabot nga Paraiso, atong bation ang kalipay nga wala pa nato masinati sukad. Hinaot nga atong ipakita kon unsa ka dako ang atong tinguha alang sa tinuod nga kinabuhi pinaagi sa pagpangandam karon alang niana. w15 8/15 3:17, 18

Sa iyang pagkinabuhi sa yuta ingong hingpit nga tawo, nakauban ni Jesus ang dili hingpit nga mga tawo. Siya gipadako sa dili hingpit nga ginikanan, ug nakauban niya ang dili hingpit nga mga membro sa pamilya. Bisan ang iyang suod kaayong mga sumusunod naimpluwensiyahan sa pagkaambisyoso ug pagkamahariharion nga komon sa ilang palibot. Pananglitan, sa gabii una mamatay si Jesus, dihay “mainit nga panaglalis sa ilang taliwala bahin sa kon kinsa kanila ang labing dako.” (Luc. 22:24) Apan siya masaligon nga ang iyang dili hingpit nga mga sumusunod mahimong mouswag sa espirituwal ug makatukod ug nahiusang kongregasyon. Nianang gabhiona usab, si Jesus miampo nga magkahiusa unta ang iyang mga apostoles, nga nangamuyo sa iyang langitnong Amahan: “[Hinaot] nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato, . . . aron nga sila mahimong usa ingon nga kita usa.”—Juan 17:21, 22. w15 9/15 1:10, 11

Ang hangin ug balod nga naglibot kang Pedro samtang siya naglakaw sa tubig mahimong ikatandi sa mga pagsulay ug tentasyon nga atong maatubang ingong Kristohanon. Bisan pag grabe kaayo kini, kita makabarog nga malig-on sa tabang ni Jehova. Hinumdomi nga si Pedro miunlod dili tungod sa paghuros sa hangin o paghapak sa balod. Handurawa ang nahitabo: “Sa pagkakita sa unos, siya nahadlok.” (Mat. 14:24-32) Nawala ang pokus ni Pedro kang Jesus, ug dayon mihuyang ang iyang pagtuo. Kita mahimong magsugod pag-unlod kon kita motan-aw sa “unos,” nga magpokus sa puwersa niini ug magduhaduha sa tabang ni Jehova. Angay natong hinumdoman nga posibleng mohuyang ang atong pagtuo, kay ang Bibliya nag-ingon nga ang paghuyang o pagkawala sa pagtuo maoy “sala nga daling makasabod kanato.” (Heb. 12:1) Ingon sa gipakita sa kasinatian ni Pedro, ang atong pagtuo dali rang mohuyang kon magpokus ta sa mga pagsulay. w15 9/15 3:1, 6, 7

Dihang makadawat kag regalo, unsay imong buhaton? Lagmit, pabilhan nimo kana. Tingali, gamiton nimo ang maong regalo, ug dili balewalaon. Si Jehova kanunayng nagtagana sa atong gikinahanglan aron mabuhi ug malipay. Dili ba kana magtukmod kanato sa paghigugma usab kaniya? Ang mga Israelinhon mahigugmaong giatiman ni Jehova sulod sa gatosan ka tuig ug dagayang gipanalanginan sa materyal ug espirituwal. (Deut. 4:7, 8) Apan padayon lang nilang madawat ang maong mga panalangin kon sila magmasinugtanon sa Balaod sa Diyos, nga naglakip sa regular nga pagtanyag kang Jehova sa “labing maayo sa unang hinog nga mga bunga” sa yuta. (Ex. 23:19) Busa, angayng ipakita sa mga Israelinhon nga ilang gipabilhan ang gugma ug mga panalangin ni Jehova.—Deut. 8:7-11. w15 9/15 5:5, 6

Sa unsang paagi tingali nato makita ang kamot ni Jehova diha sa atong kinabuhi? Hunahunaa kini: Tingali mibati kang gitabangan ka sa Diyos aron makaplagan ang kamatuoran. May higayon bang mitambong kag tigom, nakapaminawg pakigpulong, ug miingon: “Mao gyod nay akong gikinahanglan”? O tingali gitubag ang imong pag-ampo. Lagmit midesisyon ka sa pagpalapad sa imong ministeryo ug imong nakita kon giunsa ka pagtabang ni Jehova sa pagkab-ot sa imong tumong. O nakasulay ka ba nga gibiyaan nimo ang imong trabaho kay makaapektar sa imong pag-alagad ug dayon nakita nimo nga natuman ang saad sa Diyos: “Dili ko gayod ikaw . . . pagatalikdan”? (Heb. 13:5) Pinaagi sa pagpabiling nagtukaw sa espirituwal ug “putli sa kasingkasing,” atong makita nga si Jehova nagtabang kanato sa daghang paagi. Sa unsang paagi kita mahimong “putli sa kasingkasing”? Kinahanglan kitang magmahinlo sa hunahuna ug hunongon ang sayop nga panggawi. (2 Cor. 4:2) Samtang atong pauswagon ang atong espirituwalidad ug ipakita ang maayong panggawi, kita mahiapil niadtong makakita sa Diyos. w15 10/15 1:17, 19

Apil sa panon sa katawhan nga didto sa Jerusalem mao ang pipila ka Gregong kinabig kinsa nakadayeg kaayo sa gibuhat ni Jesus mao nga ilang gihangyo si apostol Felipe kon puwede ba silang makigkita kang Jesus. Apan si Jesus wala magpalinga niana kondili giuna niya ang mas importanteng butang. Dili niya gustong mangitag mga tawo nga mopaluyo ug modepensa kaniya batok sa mga kaaway sa Diyos. Nahibalo siya nga labawng hinungdanon ang paghalad sa iyang kinabuhi. Busa, human niya ipatin-aw nga hapit na siyang patyon, siya miingon kang Andres ug Felipe: “Siya nga magamahal sa iyang kalag magalaglag niini, apan siya nga magadumot sa iyang kalag niining kalibotana magatipig niini alang sa kinabuhing walay kataposan.” Inay makigkita sa maong mga Grego, iyang gipasiugda ang pagsundog sa iyang nagsakripisyo sa kaugalingon nga pagkinabuhi ug gisulti ang mga pulong sa teksto karong adlawa. Sa walay duhaduha, gisulti ni Felipe kining positibong mensahe ngadto sa maong mga Grego. (Juan 12:20-25) Bisag dili gusto ni Jesus nga mabalda sa iyang pangunang katuyoan, ang pagsangyaw sa maayong balita, dili puro trabaho na lang ang iyang gihunahuna. w15 10/15 3:13, 14

Bisag ang mga tinun-an ni Jesus kadaghan maglalis kon kinsay labaw kanila, si Jesus nagmapailobon. Kon mapakyas sila sa pagsanong sa iyang tambag, siya mahigugmaon ug malumong nagtul-id kanila sa hustong panahon ug dapit. (Mar. 9:33-37) Ipakita ang imong gugma sa imong mga anak pinaagi sa pagdisiplina kanila. Usahay, igo na ang pagpatin-aw kon nganong husto o sayop ang usa ka butang. May mga higayon nga ang imong anak mapakyas sa pagsunod sa imong gisulti. (Prov. 22:15) Kon mahitabo kana, sundoga si Jesus. Sa hustong panahon ug dapit, disiplinaha ang imong anak uban ang gugma ug kalumo pinaagi sa mapailobong paggiya, pagbansay, ug pagtul-id. Si Elaine, usa ka sister sa South Africa, miingon: “Ang akong ginikanan dili gayod modisiplina nga may kasuko o nga dili ipatin-aw kon nganong gidisiplina ko. Maong mibati kog kasegurohan. Nahibalo ko sa akong mga limitasyon, ug akong nasabtan kon unsay ilang gidahom kanako.” w15 11/15 1:5, 6

Unsa kahay kahimtang kon wala pay gugma ang Diyos sa katawhan? Ang mga tawo magpadayon sa pagmando ug maimpluwensiyahan sa dili mahigugmaon ug masuk-anong diyos, si Satanas nga Yawa. (2 Cor. 4:4; 1 Juan 5:19; Pin. 12:9, 12) Busa, makahahadlok gayod ang atong kaugmaon kon wala pay gugma ang Diyos sa katawhan. Dihang mirebelde ang Yawa sa pagmando ni Jehova, iyang gikuwestiyon ang katungod ug pagkamatarong sa pagmando sa Diyos sa uniberso. Sama rag giangkon ni Satanas nga mas maayo ang iyang pagmando kay nianang sa Maglalalang. (Gen. 3:1-5) Bisag gitugotan ni Jehova si Satanas nga pamatud-an ang iyang pangangkon, kana temporaryo lamang. Sa iyang dakong kaalam, gitugotan ni Jehova nga molabay ang igong panahon aron mayagyag pag-ayo nga pakyas ang bisan unsang pagmando gawas sa iyaha. Ang miserableng kasaysayan nagpakita nga ang mga tawo ug si Satanas dili maayong mga magmamando. w15 11/15 3:3, 4

Pinaagi sa pagkamapainubsanon, gisunod sa katawhan ni Jehova ang importanteng prinsipyo nga gihatag ni Jesus. Sa iyang Wali sa Bukid, siya miingon: “Nadungog ninyo nga kini giingon, ‘Higugmaon mo ang imong silingan ug dumtan ang imong kaaway.’ Apan, ako magaingon kaninyo: Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit, sanglit siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mat. 5:43-45) Oo, ingong mga alagad sa Diyos, kinahanglan tang makakat-on sa ‘paghigugma sa atong mga kaaway,’ bisag unsa pay ilang tinamdan kanato. Sa tanang bahin sa kinabuhi, kinahanglang ipakita sa katawhan ni Jehova pinaagi sa tinamdan ug binuhatan nga ilang gihigugma si Jehova ug ang ilang silingan. Pananglitan, bisag ang pipila dili maminaw sa mensahe sa Gingharian, kita magpakita gihapog gugma dihang sila manginahanglan. w15 11/15 4:17, 19, 20

Ang katawhan sa Diyos kanunayng naggamit sa ilang katakos sa pagpakigkomunikar—ang paggamit ug pinulongan—sa pagdayeg kang Jehova ug pagpahibalo sa uban bahin sa iyang kabubut-on. Di pa dugay, gigamit sa katawhan sa Diyos ang maong katakos sa paghubad sa Bibliya aron sa pagpalambo sa putling pagsimba. Dunay linibo ka hubad sa Bibliya, pero may pipila nga dili kaayo tukma ang paghubad sa orihinal nga mensahe. Sa katuigan sa 1940, ang New World Bible Translation Committee naghimog mga sukdanan sa paghubad nga gisunod sa kapig 130 ka pinulongan. Kini ang mosunod: (1) Balaanon ang ngalan sa Diyos pinaagi sa pagpasig-uli niini sa hustong dapit diha sa Kasulatan. (Mat. 6:9) (2) Hubaron nga literal ang orihinal nga inspiradong mensahe kon posible, pero kon ang literal nga hubad makahatag ug sayop nga kahulogan, hubaron kini sumala sa diwa. (3) Gamiton ang sayon sabtong mga pulong aron daling basahon.—Neh. 8:8. w15 12/15 2:1, 2

Ang dili klaro nga tingog sa trompeta mahimong magpameligro sa miasdang nga kasundalohan. Sa samang paagi, kon ang atong sinultihan dili klaro o dili direkta sa punto, kini mahimong makapalibog o masaypag sabot. (1 Cor. 14:9) Siyempre, bisag gusto natong himoong tin-aw ang atong isulti, dili nato gustong mahimong sobra ka prangka o dili matinahoron. Si Jesus naghatag sa kinamaayohang ehemplo sa paggamit ug hustong pulong. Tagda ang iyang mubo apan puwersadong pakigpulong nga narekord sa Mateo kapitulo 5 ngadto sa 7. Si Jesus wala mogamit ug bulakbulak o dili tin-awng mga pulong; ni migamit siyag sakit nga mga pulong. Hinunoa, siya mipilig tin-aw ug simpleng mga ekspresyon aron maabot ang kasingkasing sa iyang mamiminaw. Pananglitan, aron mahupayan ang kabalaka sa mga tawo sa ilang adlaw-adlawng panginahanglan sa pagkaon, iyang gihisgotan kon sa unsang paagi gitagan-an ni Jehova ang mga langgam sa kalangitan. Dayon, nga nagtandi sa iyang mamiminaw ngadto sa mga langgam, siya nangutana: “Dili ba kamo labaw pa ug bili kay kanila?” (Mat. 6:26) Pinaagi nianang simple ug sayon sabtong mga pulong, natandog ni Jesus ang ilang kasingkasing! w15 12/15 3:13, 14

Unsay kahulogan sa pagpakitag inigsoong gugma? Ang Gregong pulong nga gigamit ni Pablo, ang phi·la·del·phiʹa, literal nga nagkahulogang “pagmahal alang sa usa ka igsoon.” Ang inigsoong gugma maoy kusganon, mainiton, suod nga pagbati, sama nianang bation nimo sa membro sa pamilya o suod nga higala. (Juan 11:36) Wala kita magpakaaron-ingnon nga managsoon—kita gayod managsoon. (Mat. 23:8) Ang atong lalom nga pagmahal sa usag usa gisumaryo niining mga pulonga: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Kini nga inigsoong gugma, lakip ang gugmang gipasukad sa prinsipyo (o, a·gaʹpe), makatabang nga magkasuod ug magkahiusa ang katawhan sa Diyos. Para sa mga Kristohanon, ang tanang isigkamagtutuo giisip nila ingong igsoon, bisag unsa pay ilang rasa. (Roma 10:12) Gitudloan kita ni Jehova nga magpakitag inigsoong gugma sa usag usa.—1 Tes. 4:9. w16.01 1:5, 6

Ang atong gugma kang Jesus magpalihok kanato nga magmadasigon diha sa pagsangyaw ug paghimog mga tinun-an. (Mat. 28:19, 20; Luc. 4:43) Panahon sa Memoryal, kita may kahigayonan sa pag-oksilyare payunir, nga mogugol ug 30 o 50 ka oras sa pagsangyaw. Mapasibo ba nimo ang imong eskedyul aron mahimo kana? Usa ka 84 anyos nga biyudo ang mibati nga dili siya makaoksilyare payunir tungod sa iyang edad ug dili maayong panglawas. Bisan pa niana, gitabangan siya sa mga payunir sa ilang lugar. Gitagan-an nila siyag transportasyon ug nahiangayng teritoryo aron makab-ot niya ang iyang tumong nga 30 ka oras. Makahimo ka ba sa pagtabang sa usa ka igsoon aron siya makaoksilyare payunir panahon sa Memoryal? Siyempre, dili tanan ang makaoksilyare payunir. Bisan pa niana, magamit nato ang atong panahon ug kusog sa pagpauswag sa atong halad sa pagdayeg kang Jehova. w16.01 2:7, 11

Kon dili posibleng mahibaloan ang ngalan sa tanang espirituwal nga mga Israelinhon nga ania sa yuta karon, sa unsang paagi ang membro sa ubang mga karnero “mouban” kanila? Matikdi kon unsay giingon sa tagna ni Zacarias bahin sa simbolikong 10 ka tawo. Kini sila “mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” Bisag usa lang ka Hudiyo ang gihisgotan dinhi, ang pulong nga “kaninyo” nagpakita nga dili usa ra ka tawo ang gitumong. Nan, kining espirituwal nga Hudiyo maoy usa ka grupo, dili usa lang ka indibiduwal! Busa, dili kinahanglang mailhan ang matag espirituwal nga Hudiyo ug dayon mouban kita kaniya. Hinunoa, kinahanglang mailhan nato sila ingong grupo ug dayon paluyohan nato sila. Ang Kasulatan wala gayod mag-awhag kanato sa pagsunod sa usa ka indibiduwal. Si Jesus ang atong Pangulo.—Mat. 23:10. w16.01 4:4

Gikan sa duyan ngadto sa lubnganan, gugma ang atong labing dakong panginahanglan. Ang mga tawo nagkinahanglag gugma ug nangandoy nga higugmaon. Dili lang romantikong gugma ang atong gikinahanglan. Gusto natong makighigala ug masuod sa uban. Pero dunay matang sa gugma nga labaw natong gikinahanglan—ang gugma ni Jehova. Daghan ang dili makatuo nga ang mga tawo mahimong makabaton ug suod, mahigugmaong panaghigala uban sa Labing Gamhanang Diyos. Ingon ba sab niana ang atong pagbati? Dili gayod! Gipakita sa Bibliya nga dunay dili hingpit nga mga tawo nga nahimong higala sa Diyos. Ang ilang ehemplo takos pamalandongon, kay ang pag-ugmad sa maong panaghigala mao ang labing hinungdanong tumong nga atong makab-ot. Ang usa ka talagsaong pananglitan niadtong nakaugmad niana mao si Abraham. (Sant. 2:23) Nganong nasuod pag-ayo si Abraham kang Jehova? Usa ka pangunang rason mao ang iyang pagtuo. Gani, ang Bibliya nagtawag kang Abraham nga “amahan sa tanan nga nagbatog pagtuo.”—Roma 4:11. w16.02 1:1, 2

Bisag si Ezequias anak sa usa sa labing daotang mga hari sa Juda, siya nahimong usa sa kinamaayohang mga hari. (2 Hari 18:6) Gitul-id ni Ezequias ang daotang mga buhat nga gihimo sa iyang amahan. Gibuhat niya kini pinaagi sa paghinlo sa templo, paghangyo sa Diyos nga pasayloon ang sala sa katawhan, ug pagwagtang sa paganong mga idolo sa tibuok Juda. (2 Cron. 29:1-11, 18-24; 31:1) Dihang nag-atubang siyag lisod nga mga kahimtang, sama sa hulga nga atakehon ang Jerusalem sa Asiryanhong hari nga si Senakerib, si Ezequias nagpakitag dakong kaisog ug pagtuo. Siya misalig nga luwason sila sa Diyos ug iyang gipalig-on ang mga tawo pinaagi sa pulong ug buhat. (2 Cron. 32:7, 8) Sa ulahi, dihang kinahanglang tul-iron si Ezequias kay siya nagmapahitas-on, siya nagpaubos ug naghinulsol. (2 Cron. 32:24-26) Klaro nga wala tugoti ni Ezequias nga ang iyang kaagi magdaot sa iyang presenteng kinabuhi o maghikaw kaniya sa iyang kaugmaon. Hinunoa, gipakita niya nga siya higala ni Jehova ug usa ka maayong ehemplo kanato. w16.02 2:11

Ang kalulot makatabang nimo dihang maglisod ka pagpili kon kang kinsa magmaunongon. Pananglitan, tingali nahibalo ka nga ang usa ka igsoon nakahimog seryosong sala. Tingali gusto nimong magmaunongon kaniya, ilabina kon siya suod nimo nga higala o paryente. Pero kon imong tabonan ang iyang sala, wala ka magmaunongon sa Diyos. Siyempre, kinahanglang unahon nimo ang imong pagkamaunongon kang Jehova. Busa, magmaluloton apan magmalig-on. Dasiga ang nakasala nga mangayo ug tabang sa mga ansiyano. Kon dili niya kana himoon sa igoigong panahon, ang imong pagkamaunongon sa Diyos magpalihok nimo sa pagsulti niini ngadto sa mga ansiyano. Kon imo ning himoon, ikaw nagmaunongon kang Jehova ug nagmaluloton sa imong higala o paryente, kay ang mga ansiyano magtul-id sa maong indibiduwal uban ang kalumo.—Lev. 5:1. w16.02 4:14

Ang “mga buhat sa diyosnong pagkamahinalaron” naglakip sa imong mga kalihokan sa kongregasyon, sama sa pagtambong sa mga tigom ug pagsangyaw. Lakip usab niini ang espirituwal nga mga kalihokan nga dili makita sa uban, sama sa imong pribadong mga pag-ampo ug personal nga pagtuon. Ang usa nga nagpahinungod sa iyang kaugalingon kang Jehova dili gyod mag-isip niini nga mga buhat ingong kabug-at. Hinunoa, ang iyang tinamdan susama nianang kang Haring David, kinsa miingon: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.” (Sal. 40:8) Hinumdomi, ingong dedikado ug bawtismadong Kristohanon, ikaw mismo ang moatubang kang Jehova. Ang imong pag-alagad kaniya dili angayng magdepende sa uban, bisan sa imong ginikanan. Ang imong balaang mga buhat sa panggawi ug mga buhat sa diyosnong pagkamahinalaron magpamatuod nga ikaw nagkinabuhi subay sa kamatuoran ug mahimo nang kuwalipikado sa bawtismo. w16.03 2:10, 12, 15

Ang Moisesnong Balaod nagsilbing proteksiyon batok sa imoralidad ug bakak nga mga relihiyon sa palibot nga mga nasod. Dihang ang Israel namati sa Diyos, sila gipanalanginan. Dihang wala nila sunda ang Diyos, nakaagom silag mapait nga resulta. (Deut. 28:1, 2, 15) May lain pang rason kon nganong gikinahanglan ang bag-ong mga instruksiyon. Ang Balaod nagpunting sa importante nga kaugmaran maylabot sa kabubut-on ni Jehova. Kana mao ang pag-abot sa Mesiyas, si Jesu-Kristo. Ang Balaod nagpahinumdom sa mga Israelinhon nga sila dili hingpit. Nakatabang usab kini kanila sa pagsabot nga gikinahanglan ang lukat, usa ka hingpit nga halad nga bug-os magtabon sa sala. (Gal. 3:19; Heb. 10:1-10) Dugang pa, ang Balaod nakatabang sa pagpreserbar sa linya sa kaliwat nga maoy mopatungha sa Mesiyas ug sa pagpaila kaniya dihang moabot na siya. Oo, ang Balaod nagsilbing “magtutudlo,” nga nagatultol ngadto kang Kristo. w16.03 4:6, 7