Abril

Dihay higayon nga siya may maayong baroganan uban kang Jehova. Apan kining espiritu nga linalang nagsugod sa pagtinguha nga simbahon sa mga tawo. Imbes patyon ang maong sayop nga tinguha, iya kining giugmad, gipatubo hangtod nga kini namungag sala. (Sant. 1:14, 15) Atong nailhan ang maong linalang ingong si Satanas, kinsa “wala mobarog nga lig-on diha sa kamatuoran.” Siya mirebelde kang Jehova ug nahimong “amahan sa bakak.” (Juan 8:44) Sukad sa iyang pagrebelde, si Satanas nahimong pangunang kaaway ni Jehova, ug dili gayod siya higala sa katawhan. Ang mga titulong gihatag kang Satanas nagpakita kon unsa siya ka daotan. Ang Satanas nagkahulogang “Magsusukol,” nga nagpaila nga kining daotang espiritu nga linalang wala magpaluyo sa pagkasoberano sa Diyos; hinunoa, iya kining gidumtan ug gisuklan. Gusto gayod ni Satanas nga matapos ang pagkasoberano ni Jehova. w15 5/15 1:1, 2

Ang pagtuon sa Kasulatan dili lang magbutyag kon unsay angay natong pauswagon sa espirituwal. Kini magpalalom usab sa atong apresasyon sa hiligugmaong mga paagi ni Jehova, nga magtukmod kanato nga mas higugmaon siya. Ug dihang modako ang atong gugma sa Diyos, modako usab ang iyang gugma kanato, sa ingon molig-on ang atong relasyon kaniya. Apan aron masuod kang Jehova, kinahanglang magtuon kita uban ang hustong motibo. Si Jesus miingon: “Ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesu-Cristo nga imong pinadala.” (Juan 17:3, Ang Bibliya, PBS) Busa, ang atong motibo dili lang ang pagkuhag kahibalo. Angay nga mas ‘mailhan’ nato si Jehova ingong Persona. (Ex. 33:13; Sal. 25:4) Kon mas mailhan nato si Jehova, dili kita matugaw dihang may mga asoy sa Bibliya nga wala magpatin-aw kon nganong gibuhat niya ang usa ka butang. w15 4/15 3:6-8

Di pa dugay, usa ka grupo sa mga ansiyano nga nagmalamposon sa pagtabang sa mga brader nga mohamtong sa espirituwal ang gipangutana kon giunsa nila pagbansay ang uban. Bisag lainlain ang kahimtang niini nga mga brader, ang ilang tambag managsama. Unsay gipakita niini? Ang pagbansay nga binase sa Bibliya mapadapat sa mga tinun-an “sa tanang dapit . . . diha sa tanang kongregasyon”—sama nianang sa panahon ni apostol Pablo. Kinahanglang andamon sa usa ka magtutudlo ang kasingkasing sa iyang bansayon. Maingon nga ang usa ka hardinero kinahanglang mag-andam, o magbugwal, sa yuta sa dili pa ipugas ang binhi, ang usa ka magtutudlo kinahanglan sab nga mag-andam sa kasingkasing sa tinun-an sa dili pa kini tudloag bag-ong mga kahanas. Busa sa unsang paagi ang mga magtutudlo mag-andam sa kasingkasing sa iyang bansayon? Pinaagi sa pagsundog sa gibuhat ni Samuel dihang iyang giandam si Saul sa pagpanguna sa Israel.—1 Sam. 9:15-27; 10:1. w15 4/15 1:11, 12

Ang sagad nga gipasiugda niining kalibotana sukwahi sa sukdanan sa Bibliya. Siyempre, dili tanang gitanyag sa kalibotan daotan. Apan, angay natong dahomon nga gamiton ni Satanas ang iyang kalibotan aron pahimuslan ang atong mga tinguha ug tentalon ta sa pagpakasala o sa pag-ugmad sa gugma sa kalibotan aron mapasagdan ang atong pagsimba kang Jehova. (1 Juan 2:15, 16) Dayag nga ang gugma sa kalibotan nakaapektar sa unang siglong mga Kristohanon. Pananglitan, si Pablo misulat: “Si Demas mibiya kanako tungod kay iyang gihigugma kini nga sistema sa mga butang.” (2 Tim. 4:10) Walay espesipikong giingon ang Bibliya kon unsang bahina sa kalibotan ang gihigugma ni Demas, nga tungod niana iyang gibiyaan si Pablo. Basig mas gihigugma ni Demas ang materyal nga mga butang kay sa espirituwal nga mga butang. Kon mao nay nahitabo, nawad-an si Demas ug nindot kaayong pribilehiyo—ug para sa unsa? Duna bay ikatanyag ang kalibotan kang Demas nga mas labaw pa sa mga panalangin nga ihatag ni Jehova kaniya tungod sa iyang pag-uban kang Pablo?—Prov. 10:22. w15 5/15 2:10, 11

Gibati ni Jesus ang kasakit nga gibati sa uban, bisan pag wala niya kana masinatii. Pananglitan, ang ordinaryong mga tawo nahadlok sa mga lider sa relihiyon, kinsa naglimbong ug nagpabug-at kanila pinaagig daghang hinimog tawo nga mga lagda. (Mat. 23:4; Mar. 7:1-5; Juan 7:13) Si Jesus wala gayod mahadlok o malimbongi, apan nasabtan niya ang ilang kahimtang. Busa, “sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mat. 9:36) Sama sa iyang Amahan, si Jesus mahigugmaon ug mabination. Dihang nakita ni Jesus nga nag-antos ang mga tawo, napalihok siya sa pagpakitag gugma kanila. Sa ingon, hingpit niyang gisundog ang gugma sa iyang Amahan. Human sa ilang pagsangyaw sa layong lugar, gusto unta ni Jesus ug sa iyang mga apostoles nga moadto sa usa ka mingawng dapit aron mopahulay. Apan naluoy siya sa panon sa katawhan nga nagpaabot niya, busa migahin siyag panahon “sa pagtudlo kanila ug daghang butang.”—Mar. 6:30, 31, 34. w15 5/15 4:3, 4

Ang panganayng Anak sa Diyos mao ang una ug labing maayong pananglitan sa dili matugkad nga kaalam ni Jehova. Siya mao ang personipikasyon sa kaalam, usa ka “batid nga magbubuhat,” tupad sa iyang Amahan. Handurawa ang iyang kalipay ug katagbawan dihang ang iyang Amahan ‘nag-andam sa kalangitan’ ug ‘naglagda sa mga patukoranan sa yuta.’ Apan bisag gipabilhan niya kining walay kinabuhing butang, ang panganayng Anak sa Diyos ‘nahinangop sa mga anak sa mga tawo.’ (Prov. 8:22-31) Oo, si Jesus nahinangop, o nagmahal, sa mga tawo bisan sa wala pa siya moanhi sa yuta. Sa ulahi, ingong pamatuod sa iyang pagkamaunongon ug gugma sa iyang Amahan, ingon man sa iyang dakong gugma sa “mga anak sa mga tawo,” ang panganayng Anak sa Diyos kinabubut-ong mibiya sa langit ug nahisama sa mga tawo. Gihimo niya kadto aron itagana ang “usa ka lukat baylo sa daghan.” (Filip. 2:5-8; Mat. 20:28) Dako gayod ang iyang gugma sa mga tawo! w15 6/15 2:1, 2

Giapresyar ba nimo ang nahimo ni Jehova alang kanimo? Kon mao, haom lang nga imong ipahinungod ang imong kinabuhi kang Jehova ug magpabawtismo. Hinumdomi, ang pahinungod maoy usa ka seryosong panaad kang Jehova nga buhaton ang iyang kabubut-on sa walay kataposan, bisag unsa pay mahitabo. Angay ka bang mahadlok sa paghimo niana nga panaad? Dili gayod! Hinumdomi nga si Jehova naghunahuna sa imong kaayohan, ug siya ang “tigganti sa mga matinuorong nagapangita kaniya.” (Heb. 11:6) Ang pagpahinungod sa imong kinabuhi kang Jehova ug pagpabawtismo dili makadaot kanimo. Hinunoa, ang pag-alagad kang Jehova makahatag nimog kaayohan. Lahi ra gyod si Jehova kang Satanas, kinsa hakog ug wala maghunahuna sa imong kaayohan! Si Satanas walay ikahatag nga ganti niadtong modapig niya. Wala siyay maayong balita nga mapaabot ug walay masanag nga kaugmaon. Nan, unsaon man niya paghatag sa usa ka butang nga wala niya mabatoni? w16.03 2:16, 18, 19

Aron mahimong tinuod ang imong relasyon kang Jehova, kinahanglang kombinsido ka nga dunggon niya ang mga pag-ampo. Tagda kini: Sa wala pa moanhi si Jesus sa yuta, iyang nakita nga gitubag ni Jehova ang mga pag-ampo sa Iyang mga alagad dinhi sa yuta. Dayon, panahon sa iyang ministeryo sa yuta, si Jesus miampo sa iyang Amahan sa langit bahin sa iyang mga pagbati. Buhaton ba niya kana—mogahin pa ganig tibuok gabii sa pag-ampo—kon naghunahuna siya nga si Jehova dili mamati? (Luc. 6:12; 22:40-46) Tudloan ba niya ang iyang mga tinun-an sa pag-ampo kon naghunahuna siya nga ang pag-ampo maoy panghupay lang sa gibati? Klaro nga si Jesus nahibalo nga ang pag-ampo maoy tinuod nga pagpakigkomunikar kang Jehova. Kita usab makasalig nga si Jehova ang “Tigpatalinghog sa pag-ampo.”—Sal. 65:2. w15 4/15 3:11, 13

Dihang madungog sa mga anak ang imong mapainubsanong pag-ampo, sila makakat-on sa pagsalig kang Jehova. Si Ana, nga taga-Brazil, nag-ingon: “Kon may mga problema, sama niadtong nasakit ang akong mga apohan, ang akong ginikanan mangayog kusog kang Jehova sa pagsagubang sa maong kahimtang ug kaalam sa paghimog maayong mga desisyon. Bisag mapresyur sila pag-ayo, ilang itugyan kang Jehova ang ilang mga problema. Maong nakakat-on ko sa pagsalig kang Jehova.” Kon mag-ampo ka uban sa imong mga anak, dili kay sila lang ang imong iampo. Hangyoa si Jehova nga tabangan sab ka—tingali sa pagpananghid sa imong amo nga mobakasyon ka aron motambog kombensiyon, nga hatagan kag kaisog sa pagsangyaw sa imong silingan, o tabangan ka sa laing paagi. Salig sa Diyos, ug ang imong mga anak makakat-on usab sa pagbuhat niana. w15 11/15 1:7, 8

Usa sa kinamaayohang mga paagi aron molalom ang imong gugma kang Jehova mao ang pagpamalandong sa iyang kinalabwang gasa—ang halad lukat. (2 Cor. 5:14, 15; 1 Juan 4:9, 19) Kon imong pamalandongon ang lukat ug ang kahulogan niini alang kanimo, madasig ka sa pag-apresyar niini. Ang imong apresasyon ikailustrar niining paagiha: Hunahunaa nga hapit ka nang malumos, ug may miluwas nimo. Igo ra ba kang mouli sa balay, mag-ilis, ug kalimtan ang iyang gihimo? Siyempre dili! Seguradong mobati kag utang kabubut-on sa tawo nga nagluwas nimo. Ang tinuod, utang nimo sa maong tawo ang imong kinabuhi! Apan labaw pa niana ang atong utang kang Jehova ug kang Jesu-Kristo. Tungod sa ilang dakong gugma, atong nabatonan ang paglaom nga mabuhi sa walay kataposan sa paraiso! w16.03 2:16, 17

Si Jehova may bug-os nga pagsalig sa iyang Anak, kinsa nagmatinumanon kaniya sa langit sa dugayng panahon. Sa dinhi pa sa yuta, si Jesus nagmaunongon ug nagpaluyo sa pagkasoberano ni Jehova bisan sa kinagrabehang pagsulay, nga nagmatinumanon hangtod sa kamatayon. Mapasalamaton gayod kita nga tungod sa iyang kamatayon, gibayran usab ni Jesus ang bili sa lukat nga gikinahanglan aron maluwas ang katawhan ug makabatog kinabuhing walay kataposan sa bag-ong kalibotan! Si Juan misulat: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.”—1 Juan 4:9, 10. w15 11/15 3:13, 14

Ingong mga kaliwat ni Adan, kitang tanan nakapanunod ug sala ug kamatayon. Walay makaingon, “Wala ko magkinahanglan sa lukat.” Bisan ang labing matinumanong alagad sa Diyos nagkinahanglan sa dili takos nga kalulot ni Jehova pinaagi kang Kristo. Angayng ilhon nato nga kita napasaylo sa usa ka dakong utang. Ang gugma ug kaluoy ni Jehova angayng magpalihok kanato sa pagbuhat sa unsa? Kon naghambin tag kasuko sa atong igsoon, kini maoy maayong higayon sa pagsundog kang Jehova, kinsa “andam sa pagpasaylo.” (Neh. 9:17; Sal. 86:5) Kon atong pabilhan ang nahimo ni Jehova alang kanato sa pagpapas sa atong dakong utang, nan pasayloon nato ang uban nga kinasingkasing. Dili kita makadahom nga higugmaon ug pasayloon ta sa Diyos kon dili nato higugmaon ug pasayloon ang uban. (Mat. 6:14, 15) Tinuod nga kon atong pasayloon ang uban, dili mausab ang kamatuoran nga ila kitang gipasakitan, apan makatabang kini kanato nga magmalipayon sa umaabot. w16.01 2:5, 15-17

Gisulti ni Jesus ang maong mga pulong aron tabangan si Pedro ug ang ubang tinun-an sa paghanduraw sa umaabot. Busa, sila nakahimo sa paghanduraw sa ilang papel diha sa gobyerno nga magmando sa tibuok yuta ug magpanalangin sa masinugtanong katawhan. Ang mga alagad ni Jehova sa yuta kanunayng nakabenepisyo sa paghunahuna sa mga katumanan sa mga saad sa Diyos. Si Abel may igong kahibalo bahin sa katuyoan sa Diyos maong iyang nahanduraw ang usa ka maayong kaugmaon, nabatonan ang lig-ong pagtuo, ug nahuptan ang tinuod nga paglaom. Si Abraham nakahimo ug talagsaong mga buhat sa pagtuo kay may “nakita” siya bahin sa katumanan sa tagna sa Diyos labot sa gisaad nga “binhi.” (Gen. 3:15) Si Moises ‘nagtutok sa pagbayad sa ganti,’ maong siya milihok nga may pagtuo ug midako ang iyang gugma kang Jehova. (Heb. 11:26) Ang atong pagtuo ug gugma sa Diyos makatabang kanato sa paghanduraw sa gisaad ni Jehova. w15 5/15 3:17, 18

Agig pagsundog sa ehemplo ni Jesus, ang usa ka Kristohanon nga gustong mouswag sa espirituwal dili matagbaw sa mabaw nga kahibalo sa Bibliya. Siya kanunayng mosusi sa laglom nga mga kamatuoran niini, kay nahibalo siya nga “ang gahing pagkaon maoy alang sa mga tawong hamtong.” (Heb. 5:14) Dayag, ang hamtong nga Kristohanon gustong makabaton ug “tukmang kahibalo sa Anak sa Diyos.” (Efe. 4:13) Nag-eskedyul ka bag adlaw-adlawng pagbasa sa Bibliya? Ikaw ba may personal nga pagtuon ug naningkamot sa paggahig panahon matag semana alang sa pamilyahanong pagsimba? Dihang tun-an nimo ang Pulong sa Diyos, tagda ang mga prinsipyo nga makatabang nimo sa pagkahibalo kon unsay hunahuna ug pagbati ni Jehova. Dayon, paningkamoting ipadapat ang mga prinsipyo sa Bibliya, nga mosalig niana dihang mohimog mga desisyon, sa ingon mas masuod ka kang Jehova. w15 9/15 1:5, 9, 10

Nasabtan pag-ayo ni Jesus ang ekolohiya sa yuta. Nahibalo siya kon unsaon paggamit, pagdumala, ug pag-apod-apod sa mga kahinguhaan sa yuta sa makiangayon ug hustong paagi. Sa dinhi pa si Jesus sa yuta, iyang gipakita nga siya “ang gahom sa Diyos” pinaagi sa pagkontrolar sa mga puwersa sa kinaiyahan. Handurawa ang esena: Si Kristo gikapoy kaayo gikan sa iyang ministeryo. Ang sakayan gilambalamba sa balod, mao nga nasudlan kinig tubig. Apan, bisan pa sa kasaba sa unos ug sa grabeng pagtuyatuya sa sakayan, si Jesus nahinanok sa pagkatulog. Nagkinahanglan siyag pahulay. Ang nalisang nga mga tinun-an mipukaw kaniya ug mituaw: “Mangamatay na kami!” (Mat. 8:25) Si Jesus mibangon ug gibadlong ang hangin ug dagat: “Hilom! Magmalinawon!” ug ang unos milurang. (Mar. 4:39) Unsay resulta? “Miabot ang dakong kalinaw.” Pagkatalagsaong gahom ang gipakita ni Jesus! w15 6/15 1:12-14

Sa paghisgot sa tinapay sa matag adlaw, lagmit ang gipasabot ni Jesus mao ang atong adlaw-adlawng panginahanglan. Mao nga iyang gihisgotan kon sa unsang paagi ang Diyos nagbesti sa ihalas nga mga bulak, ug dayon siya miingon: “Dili ba kamo labaw pa nga iyang pagabestihan, kamo nga diyutay ug pagtuo?” Unya iyang gisubli kining hinungdanong tambag: “Ayaw gayod kamo kabalaka bahin sa sunod nga adlaw.” (Mat. 6:30-34) Kini nagpakita nga imbes mahimong materyalistiko, angay tang magmakontento sa atong adlaw-adlawng panginahanglan. Mahimong maglakip kana sa puy-anan, trabaho aron matagan-an ang pamilya, ug kaalam aron masagubang ang dili maayong panglawas. Apan kon mag-ampo lang ta alang sa maong pisikal nga panginahanglan, magpakita kana nga kita dili timbang. Duna kitay espirituwal nga panginahanglan nga labawng hinungdanon. Miingon ang atong Agalon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Busa angay kitang mag-ampo nga si Jehova padayong magtagana kanato ug espirituwal nga pagkaon sa hustong panahon. w15 6/15 5:4, 7, 8

Kanunay ba kitang mangayog tabang sa Diyos aron kita magmatinumanon dihang makaatubang ug tentasyon? Tungod sa atong gidak-an o nangaging binuhatan, lagmit ganahan kita sa mga panggawi nga gidumtan ni Jehova. Bisan pa niana, si Jehova makatabang nato sa paghimog mga kausaban aron padayon kitang makaalagad kaniya sa dalawatong paagi. Si Haring David nahibalo niini. Human siya makapanapaw uban kang Bat-seba, siya nangamuyo kang Jehova: “Buhati ako ug putli nga kasingkasing, . . . ug ibutang sa akong kahiladman ang usa ka bag-ong espiritu, usa nga malig-on.” (Sal. 51:10, 12) Ang imoral nga panggawi mahimong makapukaw sa atong makasasalang unod, apan si Jehova makapukaw diha kanato ug andam nga kasingkasing, ang tinguha nga mosunod kaniya. Bisan pag ang sayop nga mga tinguha nakagamot pag-ayo ug milambo sa atong hunahuna, si Jehova makagiya nato aron kita makatuman sa iyang mga sugo ug magkinabuhi sumala niana. Mapugngan niya nga kontrolahon kita sa bisan unsang butang nga makadaot.—Sal. 119:133. w15 6/15 3:5, 6

Ang mga edaran sa atong taliwala makahinumdom dihang ang mga kongregasyon may alagad sa kongregasyon imbes lawas sa mga ansiyano, dihang ang mga nasod may alagad sa sangang buhatan inay Branch Committee, ug dihang ang direksiyon naggikan sa presidente sa Watch Tower Society imbes sa Nagamandong Lawas sa mga Saksi ni Jehova. Bisag kining tanang debotadong mga brader gipaluyohan sa matinumanong mga asistant, usa lang ka tawo ang mohimog mga desisyon sa kongregasyon, sa mga branch office, ug sa world headquarters. Human sa 1970, gihimo ang mga kausaban aron grupo sa mga ansiyano ang may responsabilidad sa pagdumala imbes usa ra ka tawo. Kini nga mga kausaban gibase sa mas tin-awng pagsabot bahin sa sumbanan diha sa Kasulatan. Imbes usa lang ka tawo ang mohimog mga desisyon, ang maayong mga hiyas sa tanang “gasa nga mga lalaki” nga gitagana ni Jehova naghatag ug kaayohan sa organisasyon.—Efe. 4:8. w15 7/15 1:14, 15

Ang matuod nga mga Kristohanon kanunayng nalangkit sa isyu sa pagkamaunongon ug neyutralidad, dili lang panahon sa gubat. Ngano? Tungod kay ang tanang dedikadong alagad ni Jehova nanaad nga sila mahigugma, magmaunongon, ug magmatinumanon kaniya. (1 Juan 5:3) Kita mosunod sa matarong nga sukdanan sa Diyos bisan asa kita nagpuyo ug bisan unsa ang atong kagikan, nasyonalidad, o kultura. Ang atong pagkamaunongon kang Jehova ug sa iyang Gingharian mas importante kay sa bisan unsa pa man. (Mat. 6:33) Tungod niini, ang mga Kristohanon kinahanglang dili mag-apil-apil sa mga panagbangi ug kontrobersiya niining kalibotana. (Isa. 2:4; Juan 17:11, 15, 16) Ang mga tawo nga dili nato samag tinuohan lagmit maunongon sa ilang nasod, tribo, o kultura o bisag sa team sa sports sa ilang nasod. Kini miresultag kompetisyon ug pag-indigay ug, mas grabe pa, pagpinatyanay ug pagpuo sa rasa. Sa maong mga kahimtang, kita ba magpabiling neyutral o may dapigan? w15 7/15 3:1, 2

Dihang mahuman ang usa ka bag-ong Kingdom Hall, kinahanglan kining mahuptang hinlo ug hapsay aron mabanaag niini ang mga hiyas ug personalidad sa Diyos nga atong gisimba—ang Diyos sa kahusay. (1 Cor. 14:33) Sa Bibliya, ang pagkabalaan ug espirituwal nga kahinlo gilangkit sa pisikal nga kahinlo. (Pin. 19:8) Busa, aron dawaton kita ni Jehova, kinahanglan usab kitang magmahinlo sa pisikal. Kon gisunod nato ang maong mga prinsipyo, dili ta maulawng mangimbitar sa mga interesado sa pagtambong sa atong mga tigom, kay makasalig ta nga ang kahimtang sa atong tigomanan kaharmonya sa maayong balita nga atong gipaambit kanila. Ilang makita nga kita nagsimba sa usa ka Diyos nga balaan kinsa sa dili madugay maghimo sa yuta nga usa ka matahom nga paraiso. (Isa. 6:1-3; Pin. 11:18) Bisan unsa may kahimtang sa inyong lugar, ang atong Kingdom Hall kinahanglang panig-ingnan sa kahinlo ug kahapsay, kay kana nagdala sa ngalan ni Jehova ug maoy dapit sa putli nga pagsimba.—Deut. 23:14. w15 7/15 4:13-15

Dihang nasabtan sa mga sumusunod ni Jesus nga ang iyang presensiya nagsugod sa 1914, sila nangandam alang sa posibleng pag-abot dayon sa kataposan. Gibuhat nila kana pinaagi sa mas madasigong pagsangyaw sa Gingharian. Si Jesus miingon nga basig dili siya moabot dayon—mahimong moabot siya sa kadlawon o “sayo sa buntag.” Kon mahitabo kana, unsay buhaton sa iyang mga sumusunod? Siya miingon: “Magpadayon sa pagbantay.” Busa, bisan pag gibati nato nga dugay na tang nagpaabot, wala kini magpasabot nga layo pa ang kataposan o dili kini moabot sa atong panahon. Sa bag-ong kalibotan, kita may katarongan sa pagpamalandong nga natuman gayod ang tanang gitagnang panghitabo bahin sa kataposan sa sistema sa mga butang. Ang pagpamalandong kon sa unsang paagi kana natuman makapalig-on sa atong pagtuo kang Jehova ug sa mga saad nga iya pang tumanon. (Jos. 23:14) Magmapasalamaton gayod kita nga ang Diyos, kinsa ‘nagtudlo sa mga panahon ug sa mga yugto sa panahon diha sa iyang kaugalingong kamandoan,’ nag-awhag kanato sa paghunahuna nga “ang kataposan sa tanang butang haduol na.”—Buh. 1:7; 1 Ped. 4:7. w15 8/15 2:10, 11, 14

Alang sa kalingawan, daghan ang motan-aw o mohimo sa mga butang nga giisip sa Bibliya nga mapintas, imoral, espiritistiko, o dili diyosnon. Pananglitan, ang Internet, mga programa sa TV, pelikula, nobela, ug magasin sagad naghimo sa kapintasan ug imoralidad nga dalawaton. Ang panggawi nga giisip kaniadtong dili dalawaton gihimo pa ganing legal sa pipila ka dapit. Pero wala na magpasabot nga giuyonan kana sa Diyos. (Roma 1:28-32) Sa unang siglo, ang mga sumusunod ni Jesus nagsalikway sa mahugaw nga kalingawan. Tungod niini ug sa ilang diyosnong panggawi, sila gipasipalahan ug gilutos. Si apostol Pedro misulat: “Tungod kay kamo [mga Kristohanon] wala magpadayon sa pagpakig-uban kanila niining samang paglunang sa unodnong pagpatuyang, sila . . . nagpadayon sa pagsulti nga mapasipalahon kaninyo.”—1 Ped. 4:4. w15 8/15 4:2, 3

Ang usa ka hamtong nga alagad ni Jehova motabang sa pagpalambo sa panaghiusa sulod sa kongregasyon. (Efe. 4:1-6, 15) Tumong nato nga ang katawhan sa Diyos magkahiusa ug nga ang tanang sakop niini magtinabangay. Sumala sa Pulong ni Jehova, makab-ot ang panaghiusa kon kita magmapainubsanon. Ang hamtong nga igsoon mapainubsanong maningkamot sa pagpalambo sa panaghiusa sa kongregasyon bisan pag naapektohan siya sa pagkadili-hingpit sa uban. Unsay imong reaksiyon dihang makahimog sayop ang usa ka igsoon? O unsay imong buhaton kon may nakapasakit nimo diha sa kongregasyon? Naandan ba nimo ang pagpakigbungol sa nakapasakit nimo? O naningkamot ka bang makig-uli niya? Ang hamtong nga Kristohanon gustong mosulbad sa problema imbes mahimong problema sa uban. Tumong ba nimo ang pagtabang sa pagpalambo sa panaghiusa sa kongregasyon? w15 9/15 1:12, 13

Kombinsido si Jesus nga ang Bibliya maoy Pulong sa Diyos, nga nagtagana sa labing maayong giya sa kinabuhi. Sa pagsundog sa ehemplo ni Jesus, angay natong basahon ang Bibliya kada adlaw, tun-an kini, ug pamalandongon ang atong nakat-onan. Pag-research sa mga topiko nga imong gikalibgan. Sa pag-ilustrar, mahimo kang mas kombinsido nga ang kataposan niining sistemaha haduol na kon imong tun-an ang detalyadong pamatuod sa Kasulatan nga nagkinabuhi na kita sa kataposang mga adlaw. Palig-ona ang imong pagsalig sa mga saad sa Bibliya pinaagi sa pagtuon sa daghang tagna nga nangatuman na. Palig-ona ang imong pagtuo sa praktikal nga bili sa Bibliya pinaagi sa pagkonsiderar sa mga pananglitan kon giunsa pagbag-o sa Bibliya ang kinabuhi sa mga tawo. (1 Tes. 2:13) Masundog sab nimo si Jesus pinaagi sa pagpamalandong sa nindot nga mga saad ni Jehova kanimo. (Heb. 12:2) Isipa kini ingong mga saad sa Diyos dili lang para sa katawhan sa katibuk-an kondili para kanimo mismo. w15 9/15 3:16, 17

Unsa ang pipila ka paagi nga mapakita nato ang atong gugma sa Diyos? Puwede natong gamiton ang atong materyal nga mga butang sa pagsuportar sa buluhaton sa Gingharian sa lokal ug sa tibuok kalibotan. Maayo kining paagi sa pagpakita sa atong gugma kang Jehova, dato man o pobre. (2 Cor. 8:12) Apan, may lain pang mga paagi nga atong ikapakita ang gugma kang Jehova. Gipahinumdoman ni Jesus ang iyang mga sumusunod nga dili sila angayng mabalaka kon unsay kaonon ug isul-ob kondili magpadayon sa pag-una sa Gingharian. Siya miingon nga nahibalo ang Amahan sa atong mga panginahanglan. (Mat. 6:31-33) Ang kadako sa atong pagsalig sa maong saad magpaila sa kalalom sa atong gugma kang Jehova tungod kay kanunayng mag-uban ang gugma ug pagsalig. Dili ta tinuod nga nahigugma sa usa kon wala ta mosalig kaniya. (Sal. 143:8) Busa makapangutana tingali kita: ‘Ang ako bang mga tumong ug paagi sa pagkinabuhi nagpakita nga gihigugma gyod nako si Jehova? Matag adlaw, ako bang gipakita ang akong pagsalig nga itagana niya ang akong panginahanglan?’ w15 9/15 5:7, 8

Nakahunahuna ka na ba sukad, ‘Luwason kaha ko ni Jehova sa dakong kasakitan ug papuy-on sa bag-ong kalibotan?’ Ang usa ka importante kaayong kinahanglanon mao ang atong pag-ugmad ug lig-ong pagtuo. Si Pedro nagpasiugda sa kahinungdanon sa pagtuo dihang siya naghisgot sa “sinulayang kalidad” niini nga mahimong “usa ka hinungdan sa pagdayeg ug himaya ug dungog sa pagpadayag ni Jesu-Kristo.” (1 Ped. 1:7) Sanglit nagkaduol ang dakong kasakitan, dili ba nato seguroon nga atong nabatonan ang matang sa pagtuo nga maglakip kanato niadtong pagadayegon sa atong mahimayaong Hari dihang siya ipadayag na? Seguradong gusto nato nga mahimong “ang matang nga adunay pagtuo ngadto sa pagtipig nga buhi sa kalag.” (Heb. 10:39) Kay kana ang atong tumong, mangamuyo tingali kita sama sa tawo nga miingon: “Tabangi ako kon asa ako nakulangan ug pagtuo!” (Mar. 9:24) O sama sa mga apostoles, matukmod tingali kita sa pag-ingon: “Hatagi kami ug dugang pa nga pagtuo.”—Luc. 17:5. w15 10/15 2:1, 2

Si Pablo nagpokus sa “mas hinungdanong mga butang” ug nagmakugihon sa pag-alagad, nga nagbalikbalik ug biyahe sa Sirya, Asia Minor, Macedonia, ug Judea. Si Pablo misulat: “Ginakalimtan ang mga butang sa luyo ug nagapangab-ot sa mga butang sa unahan, ako nagapangagpas sa tumong alang sa ganti.” (Filip. 1:10; 3:8, 13, 14) Kay gipahimuslan ni Pablo ang iyang pagkatagsaanon, siya nakapadayon sa “pag-alagad sa Ginoo nga walay pagkalinga.” (1 Cor. 7:32-35) Sama kang Pablo, ang pipila ka alagad sa Diyos mipili sa pagpabiling tagsaanon aron diyutay ra ang ilang responsabilidad sa pamilya ug makapokus sa pag-alagad. (Mat. 19:11, 12) Ang minyong mga alagad sagad mas daghag responsabilidad sa pamilya. Pero tagsaanon man o minyo, ang tanan makahimo ‘sa pagtangtang sa tanang kabug-at’ ug makaalagad nga diyutay rag kabaldahan. Magkinahanglan tingali kini nga undangon ang mga kalihokan nga makausik sa panahon ug himoong tumong ang pagpauswag sa panahon nga gigugol diha sa pag-alagad. w15 10/15 3:15, 16

Gipamatud-an sa kasaysayan nga tinuod gayod ang giingon sa Bibliya: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jer. 10:23) Wala lalanga ni Jehova ang tawo uban ang katakos o katungod nga magmandong independente kaniya. Gawas nga gipakita niini nga pakyas ang pagmando sa tawo, may laing katuyoan ang temporaryong pagtugot sa Diyos sa pagkadaotan. Gipamatud-an niini nga ang pagmando lamang sa Diyos ang magmalamposon. Sa umaabot, wagtangon ni Jehova ang pagkadaotan ug kadtong nagahimo niini. Human niana, kon dunay mokuwestiyon pag-usab sa iyang mahigugmaong pagmando, siya molihok dayon. Magamit niya ang nahitabo sa kasaysayan ingong rason nga laglagon dayon ang mga rebelde, nga dili na sila tugotan sa paghimog daotan. w15 11/15 3:5, 6

Si Jesus ganahan kaayong maghisgot bahin sa Gingharian sa Diyos. Sumala sa Bibliya, mas daghang beses siyang naghisgot sa Gingharian kay sa bisan unsang topiko. Kapig 100 ka beses niya kining gihisgotan panahon sa iyang ministeryo. Ang Gingharian importante gayod kaniya. (Mat. 12:34) Wala madugay human sa iyang pagkabanhaw, si Jesus nakigkita sa kapig 500 ka potensiyal nga magmamantala sa Gingharian. (1 Cor. 15:6) Lagmit sa maong okasyon nga iyang gihatag ang sugo nga isangyaw ang mensahe sa Gingharian sa “katawhan sa tanang kanasoran”—usa ka lisod nga buluhaton kaniadto! Gitagna ni Jesus nga kining dakong buluhaton magpadayon hangtod sa “kataposan sa sistema sa mga butang,” ug natuman gayod kana. Lagmit nakatampo ka sa katumanan sa maong sugo ug tagna. (Mat. 28:19, 20) Ug ang atong Diyos nagsangkap kanato sa “matag maayong butang” aron tabangan kitang matuman ang maong sugo. w15 11/15 5:1-3

Kadtong nagtuon sa karaang Hebreohanong mga manuskrito sa Bibliya, sama sa Linukot nga mga Basahon sa Patayng Dagat, nahingangha kay daghang beses nilang nakita ang Tetragrammaton—ang upat ka Hebreohanong letra nga nagrepresentar sa ngalan sa Diyos. Ang balaang ngalan makita dili lang sa karaang Hebreohanong mga manuskrito kondili diha usab sa pipila ka kopya sa Gregong Septuagint nga gikan sa ikaduhang siglo B.C.E. ngadto sa unang siglo C.E. Bisan pa sa klarong ebidensiya nga ang personal nga ngalan sa Diyos makita gayod diha sa Bibliya, daghang hubad ang nagtangtang niana. Niadtong 1952, gipatik ang Revised Standard Version. Ang maong bersiyon nagtangtang sa ngalan sa Diyos, nga wala magsunod sa palisiya sa mga editor sa American Standard Version sa 1901. Ngano? Gibati sa mga maghuhubad niini nga “dili gayod husto” nga ang Kristohanong mga relihiyon mogamit ug bisan unsang ngalan sa pagtawag sa Diyos. Nahimo kanang sumbanan sa misunod nga mga hubad, sa Iningles ug sa ubang pinulongan. w15 12/15 2:3-5