Mayo

Masundog nato ang madanihong sinultihan ni Jesus pinaagi sa pagsulti nga mabination, matinahoron, ug mahunahunaon sa pagbati sa uban. Kay nakita ni Jesus ang paningkamot sa panon aron makapaminaw kaniya, siya giabot ug kaluoy ug “misugod sa pagtudlo kanila ug daghang butang.” (Mar. 6:34) Bisan dihang giinsulto siya, si Jesus wala mobalos. (1 Ped. 2:23) Lisod tingali ang pagsulti sa malumo ug mataktikanhong paagi kon kaila kaayo nato ang atong kaestorya. Basin prangka ra kaayo kitang makigsulti kanila. Tinuod kana kon ang atong kaestorya mga membro sa pamilya o suod nga higala diha sa kongregasyon. Gibati ba ni Jesus nga tungod sa iyang suod nga relasyon sa iyang mga tinun-an puwede na siyang mangasaba nila? Wala gayod! Dihang ang iyang kinasuorang mga sumusunod nagpadayon sa paglalis kon kinsa kanila ang labaw, gitul-id sila ni Jesus pinaagig mabinationg mga pulong ug ilustrasyon bahin sa usa ka bata. (Mar. 9:33-37) Masundog sa mga ansiyano ang ehemplo ni Jesus pinaagi sa paghatag ug tambag diha sa “espiritu sa kalumo.”—Gal. 6:1. w15 12/15 3:15, 16

Nganong importante nga padayon natong ipakita ang inigsoong gugma? Simple lang ang tubag: Gusto ni Jehova nga ato kanang ipakita. Dili kita makaingon nga atong gihigugma ang Diyos kon wala nato higugmaa ang atong mga igsoon. (1 Juan 4:7, 20, 21) Dugang pa, gikinahanglan nato ang usag usa, ilabina sa malisod nga mga panahon. Dihang gisulatan ni Pablo ang Hebreohanong mga Kristohanon, nahibalo siya nga hapit nang biyaan sa pipila kanila ang ilang mga balay ug kabtangan. Gihubit ni Jesus kon unsa ka lisod kanang panahona. (Mar. 13:14-18; Luc. 21:21-23) Busa, sa dili pa kana mahitabo, kinahanglang palig-onon sa mga Kristohanon ang ilang gugma sa usag usa. (Roma 12:9) Sa dili madugay, moabot na ang kinadak-ang kasakitan sa kasaysayan sa tawo. (Mar. 13:19; Pin. 7:1-3) Ug dili lang igo ang regular nga pagtambog tigom. Gipahinumdoman ni Pablo ang Hebreohanong mga Kristohanon nga angay nilang gamiton ang maong kahigayonan sa pagdasig sa usag usa sa pagpakitag gugma ug pagbuhat ug maayo.—Heb. 10:24, 25. w16.01 1:6-8

Kadto maoy tuig 33 C.E., ug adlaw sa Pentekostes. Sa usa ka itaas nga lawak sa Jerusalem, usa ka grupo sa 120 ka Kristohanon ang nagtigom, nga “nagpadayon sa pag-ampo.” (Buh. 1:13-15) Hapit nang mahitabo kanila ang butang nga gitagna ni Joel. (Joel 2:28-32; Buh. 2:16-21) Ang balaang espiritu sa Diyos gibubo sa maong grupo sa mga Kristohanon nga nagtigom sa lawak sa itaas. (Buh. 1:8) Sila nagsugod sa pagpanagna, o pagpamatuod, bahin sa kahibulongang mga butang nga ilang nakita ug nadungog. Ngadto sa panon sa katawhan nga misugod pagpangabot, gisaysay ni apostol Pedro ang kahulogan sa maong panghitabo. Dayon, siya miingon kanila: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” Niadtong adlawa, mga 3,000 ang misanong sa maong awhag, nagpabawtismo, ug nakadawat sa gisaad nga balaang espiritu.—Buh. 2:37, 38, 41. w16.01 3:1-3

Unsay buot ipasabot ni apostol Pablo dinhi? Ang usa ka dinihogan dili takos nga makig-ambit kon wala niya mahupti ang maayong relasyon kang Jehova. (Heb. 6:4-6; 10:26-29) Ang maong pasidaan magpahinumdom sa mga dinihogan nga wala pa nila madawat ang ganti. Kinahanglan silang magpadayon sa pagpangagpas sa “tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.” (Filip. 3:13-16) Si Pablo nag-awhag sa dinihogang mga Kristohanon sa “paglakaw nga takos sa pagtawag nga alang niana [sila] gipanagtawag.” Sa unsang paagi buhaton nila kini? Si Pablo miingon nga buhaton nila kini “uban ang bug-os nga pagpaubos sa hunahuna ug kalumo, uban ang hataas-nga-pailob, nga mag-inantosay sa usag usa diha sa gugma, sa matinuoron manlimbasog nga mosunod sa pagkausa sa espiritu sa nagahiusang bugkos sa pakigdait.” (Efe. 4:1-3) Ang espiritu ni Jehova makatabang sa usa nga mahimong mapainubsanon, dili garboso.—Col. 3:12. w16.01 4:5, 6

Handurawa ang usa ka tigulang nga lalaki nga nagtungas sa bukid. Lagmit kini ang kinalisdang panaw sa iyang kinabuhi. Dili ang iyang edad ang nakapalisod niini, kay bisag siya mga 125 anyos na, siya baskog pa. Nagsunod niya ang bata-bata pang lalaki nga tingali nag-edad ug 25. Mao kana ang iyang anak nga si Isaac, kinsa nagpas-an ug sugnod. Si Abraham nagdalag kutsilyo ug panghaling. Si Jehova nagsugo kaniya sa paghalad sa iyang anak! (Gen. 22:1-8) Si Abraham nag-atubang sa lagmit kinadak-ang pagsulay sa iyang pagtuo. Dili binuta ang pagsugot ni Abraham sa Diyos. Hinunoa, siya misugot kay siya nakakita. Tungod sa iyang lig-ong pagtuo, iyang nakita nga ang iyang langitnong Amahan, si Jehova, dili gayod magsugo sa Iyang matinumanong mga alagad sa pagbuhat ug bisan unsa nga moresultag permanenteng kadaot. Si Abraham nahibalo nga kon siya mosugot kang Jehova, ang iyang Diyos magpanalangin kaniya ug sa iyang minahal nga anak. Sa unsa gipasukad ang maong pagtuo? Sa kahibalo ug kasinatian. w16.02 1:3, 4

Si Maria manamkon, manganak, ug magpadako sa bugtong Anak sa Diyos! Sagad, ang ato lang mahunahunaan mao ang talagsaong pribilehiyo nga nadawat ni Maria ug dili nato makonsiderar ang pipila ka butang nga tingali iyang gikabalak-an. Giingnan siya sa manulondang si Gabriel nga siya manamkon sa milagrosong paagi—nga walay seksuwal nga relasyon uban sa usa ka lalaki. Wala moingon si Gabriel nga iyang adtoon ang pamilya ug mga silingan ni Maria aron ipatin-aw kanila kon nganong magmabdos siya. Unsa kahay ilang hunahunaon? Lagmit nabalaka si Maria bahin sa iyang pamanhonon, si Jose. Unsaon man niya pagkombinsir si Jose nga, bisag siya nagmabdos, siya wala magluib kaniya? Dugang pa, usa ka dakong responsabilidad ang pagpadako, pag-atiman, ug pagbansay sa bugtong Anak sa Labing Hataas! Wala ta mahibalo sa tanang butang nga lagmit gikabalak-an ni Maria dihang nakigsulti si Gabriel kaniya. Apan nahibalo kita nga siya mitubag pinaagi sa mga pulong sa atong teksto karong adlawa.—Luc. 1:26-37. w16.02 2:13, 14

Si Husai nagkinahanglag kaisog aron magmaunongon sa Diyos. Siya usa ka maunongong higala ni Haring David. Apan nasulayan ang iyang pagkamaunongon dihang daghan ang nagpaluyo sa anak ni David nga si Absalom sa pag-ilog sa Jerusalem ug sa trono. (2 Sam. 15:13; 16:15) Miikyas si David gikan sa siyudad, apan unsa may buhaton ni Husai? Modapig ba siya kang Absalom, o mosunod sa tigulang nga hari nga naningkamot sa pagluwas sa iyang kinabuhi? Kay determinado nga magmaunongon sa hari nga gitudlo sa Diyos, gisugat ni Husai si David sa Bukid sa mga Olibo. (2 Sam. 15:30) Gihangyo ni David si Husai nga mobalik sa Jerusalem, magpakaaron-ingnong higala ni Absalom, ug kombinsihon kini nga sundon ang iyang tambag imbes ang kang Ahitopel. Bisag nameligro ang iyang kinabuhi, si Husai nagmaunongon kang Jehova ug misunod sa sugo ni David. Ingon sa giampo ni David, si Absalom namati kang Husai imbes kang Ahitopel.—2 Sam. 15:31; 17:14. w16.02 4:15, 16

Ingong mga Kristohanon, kita makabenepisyo sa Balaod nga gihatag ngadto sa Israel. Sa unsang paagi? Kita mahimong mohunong ug motan-aw, o mosusi, sa mga prinsipyo nga gibasehan sa Balaod. Bisag wala na kita mailalom sa maong mga balaod, mahimong isipon nato kana ingong kasaligang mga giya sa atong adlaw-adlawng pagkinabuhi ug sa atong pagsimba sa balaang Diyos, si Jehova. Iyang gipasulat sa Bibliya ang maong mga balaod aron kita makakat-on niana, magiyahan sa mga prinsipyo, ug magpabili sa taas nga moral nga mga sukdanan alang sa mga Kristohanon. Pamati sa giingon ni Jesus: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” Busa, kinahanglang likayan nato dili lang ang aktuwal nga pagpanapaw kondili ang imoral usab nga mga hunahuna ug tinguha.—Mat. 5:27, 28. w16.03 4:6, 8

Si Samuel nagpanuko sa pagbuhat sa gipangayo sa katawhan mao nga tulo ka beses siyang giawhag ni Jehova sa pagpamati kanila. (1 Sam. 8:7, 9, 22) Bisan pa niana, si Samuel wala masina o masuko sa tawong mopuli niya. Dihang giingnan siya ni Jehova nga dihogan si Saul, ang manalagna kinabubut-ong misugot, dili tungod sa obligasyon kondili tungod sa gugma. Sama kang Samuel, ang eksperyensiyadong mga ansiyano karon mahigugmaong nagbansay sa uban. (1 Ped. 5:2) Ang maong mga ansiyano wala magpanuko sa pagbansay sa uban ug wala mahadlok nga basig mabalhin sa mga tinun-an ang pipila nila ka pribilehiyo sa kongregasyon. Sila nag-isip sa ilang mga tinun-an, dili ingong kakompetensiya, kondili ingong “mga isigkamagbubuhat”—ingong bililhong mga gasa sa kongregasyon. (2 Cor. 1:24; Heb. 13:16) Mibati gayod ug katagbawan ang maong dili hakog nga mga magtutudlo samtang ilang nakita nga gigamit sa mga tinun-an ang ilang mga katakos sa pagtabang sa kongregasyon.—Buh. 20:35. w15 4/15 1:16, 17

Si Haring Azarias “nagpadayon pagbuhat kon unsay matul-id sa mga mata ni Jehova.” Pero “gihampak ni Jehova ang hari, ug siya nagpabiling usa ka sanlahon hangtod sa adlaw sa iyang kamatayon.” (2 Hari 15:1-5) Ngano? Ang asoy wala magsulti. Kita ba matugaw niini o maghunahuna nga gisilotan ni Jehova si Azarias nga walay pasikaranan? Dili, kon kita nakaila pag-ayo kang Jehova. Si Haring Azarias nailhan usab ingong Haring Uzzias. (2 Hari 15:7, 32) Sa kaamgid nga asoy sa 2 Cronicas 26:3-5, 16-21, atong mahibaloan nga bisag dihay higayon nga gihimo ni Uzzias kon unsay matarong sa mga mata ni Jehova, sa ulahi “ang iyang kasingkasing nagmapahitas-on hangtod nga kini nagpahinabog kadaot.” Sa pagkamapangahason, iyang gisulayan paghimo ang buluhaton nga iya lamang sa mga saserdote. Otsentay uno ka saserdote ang mibadlong ug misulay pagpugong kaniya. Unsay reaksiyon ni Uzzias? Iyang gipakita kon unsa siya ka garboso. Siya “napungot” sa mga saserdote. Mao diay nga gihampak siya ni Jehova ug sanla! w15 4/15 3:8, 9

Ingon sa gihisgotan sa teksto karong adlawa, si Satanas gitawag ug Yawa, nga nagkahulogang “Tigbutangbutang.” Kini magpahinumdom kanato nga gipasipalahan ni Satanas si Jehova pinaagi sa pagtawag Kaniyang bakakon. Ang terminong “orihinal nga halas” magpahinumdom kanato sa makapasubong panghitabo sa Eden dihang gigamit ni Satanas ang halas sa paglimbong kang Eva. Ang ekspresyong “dakong dragon” magpahinumdom kanato sa usa ka makalilisang nga mangtas ug haom nga naghubit sa daotang tinguha ni Satanas sa pagbabag sa katuyoan ni Jehova ug sa paglaglag sa Iyang katawhan. Klaro nga si Satanas mao ang kinadak-ang hulga sa atong pagkamatinumanon. Haom lang nga ang Bibliya nagpasidaan kanato: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” (1 Ped. 5:8) Si Satanas seguradong malipay dihang ang usa ka alagad sa Diyos makahimog grabeng sala ug mahimong gamiton niya kana sa pagtamay kang Jehova.—Prov. 27:11. w15 5/15 1:3, 4, 10

Gusto ni Jehova nga komportable kitang magkinabuhi—usa ka kamatuoran nga dayag natong makita sa nindot nga puy-anang gitagana kang Adan ug Eva. (Gen. 2:9) Pero mahimong pahimuslan ni Satanas ang atong tinguha pinaagi sa “malimbongong gahom sa mga bahandi.” (Mat. 13:22) Daghan ang naghunahuna nga ang kuwarta makahatag ug kalipay o ang materyal nga kabtangan makahatag ug kalamposan. Kana maoy panglimbong, ug makawala kana sa labing bililhong butang nga atong nabatonan—ang atong pagpakighigala kang Jehova. Si Jesus nagpasidaan: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.” (Mat. 6:24) Kon kita magpaulipon sa Bahandi, dili na ta makaalagad kang Jehova, ug mao gyod nay gusto ni Satanas nga atong buhaton! Hinaot dili nato tugotan nga ang kuwarta o ang mga butang nga mapalit niini mahimong mas importante pa kay sa atong pagpakighigala kang Jehova. Aron masuklan si Satanas, kita kinahanglang magmabalanse sa atong panglantaw sa materyal nga mga butang.—1 Tim. 6:6-10. w15 5/15 2:12

Dili kanunayng sayon nga masabtan ang kasakit nga nasinati sa uban. Daghan ang nag-atubang ug kalisdanan nga wala pa gayod nato masinatii. Ang uban nag-antos tungod sa pagkaangol, sakit, o pagkatigulang. Ang pipila nagsagubang ug emosyonal nga mga problema tungod sa depresyon, pag-atake sa nerbiyos, o mga epekto sa pag-abuso. Ang uban may mga membro sa pamilya nga dili Saksi o kaha nag-inusarang ginikanan. Ang tanan nag-atubang ug mga problema, ug tingali ang pipila niini wala pa nato masinatii. Sa maong mga kahimtang, sa unsang paagi nato masundog ang gugma sa Diyos? Pinaagi sa pagpaminaw pag-ayo aron atong masabtan ang ilang gibati. Kini magpalihok kanato sa pagsundog sa gugma ni Jehova ug sa paghatag sa gikinahanglang tabang. Managlahi ang panginahanglan sa matag indibiduwal, pero makatagana kita ug espirituwal nga pagdasig ug ubang praktikal nga tabang.—Roma 12:15; 1 Ped. 3:8. w15 5/15 4:6, 7

Ang Tuboran sa gahom ni Kristo mao si Jehova mismo, busa may katarongan kitang motuo nga ang Labing Gamhanang Diyos makahimo gayod sa pagkontrolar sa mga puwersa sa kinaiyahan. Tagda ang pipila ka pananglitan. Sa wala pa ang Lunop, si Jehova miingon: “Pito na lamang ka adlaw ako magpaulan diha sa yuta kap-atan ka adlaw ug kap-atan ka gabii.” (Gen. 7:4) Mabasa usab nato sa Exodo 14:21: “Si Jehova nagpabalik sa dagat pinaagi sa usa ka makusog nga hangin nga timog.” Ug ang Jonas 1:4 nag-ingon: “Si Jehova nagpadalag usa ka makusog nga hangin ibabaw sa kadagatan, ug miabot ang usa ka kusog kaayong bagyo sa dagat; ug bahin sa barko, kini hapit na maguba.” Makapadasig ang pagkahibalo nga si Jehova makakontrolar sa mga puwersa sa kinaiyahan. Tin-aw nga ang kaugmaon sa planetang Yuta anaa sa maayong mga kamot. Pagkanindot palandongon sa panahon diin wala nay kinaiyanhong puwersa nga makapatay o makaangol, kay “ang tolda sa Diyos anaa [na] uban sa mga tawo”! (Pin. 21:3, 4) Makaseguro ta nga ang gahom sa Diyos nga gipasundayag pinaagi kang Kristo magkontrolar sa mga puwersa sa kinaiyahan panahon sa Milenyo. w15 6/15 1:15, 16

Ang kapeligrohan sa pagbalewala niining tambaga giilustrar diha sa Proverbio kapitulo 7, diin atong mabasa ang bahin sa batan-ong lalaki nga misuroy duol sa balay sa usa ka imoral nga babaye. Sila nakahimog seksuwal nga imoralidad. Kon nagpahilayo lang unta siya sa maong babaye! (Prov. 7:6-27) Kita ba usahay nagpakitag susamang kakulang sa maayong panghukom, nga tingali nagbutang sa atong kaugalingon sa mga situwasyon nga makapukawg sayop nga mga tinguha? Pananglitan, sa gabii, ang mga estasyon sa TV wala na kaayoy restriksiyon sa ilang mga programa. Komosta kon magbalhinbalhin tag channel? O tingali magpataka ra tag click sa mga link sa Internet o mosulod sa mga chat room ug Website nga dunay imoral nga mga advertisement ug link sa pornograpiya. Sa maong mga kahimtang, dili kaha ang atong makita makapukawg sayop nga mga tinguha ug makapahuyang sa atong pagpakigbisog sa pagpabiling putli? w15 6/15 3:8, 9

Nganong gigamit man ni Jesus ang pulong nga “mga utang,” samtang sa laing higayon, siya naghisgot bahin sa “mga sala”? (Mat. 6:12; Luc. 11:4) Kapig 60 ka tuig kanhi, ang The Watchtower nagpatin-aw: “Kon kita molapas sa balaod sa Diyos, kita utangan niya. . . . Tungod sa atong sala, mahimong pangayoon ug kuhaon sa Diyos ang atong kinabuhi. . . . Mahimong kuhaon niya ang iyang kalinaw gikan kanato, nga magbugto sa atong maayong relasyon kaniya. . . . Utang nato kaniya ang gugma, nga gipadayag sa pagkamasinugtanon; ug kon kita makasala mapakyas ta sa pagbayad sa atong utang niya nga gugma, sanglit ang sala maoy pagkawalay gugma ngadto sa Diyos.” (1 Juan 5:3) Ang atong adlaw-adlawng panginahanglan alang sa kapasayloan nagpasiugda sa bugtong legal nga basehanan sa pagpapas sa Diyos sa atong mga sala—ang halad lukat ni Jesus. Bisag kini nga lukat nabayran duolan nag 2,000 ka tuig kanhi, angay nato kining pabilhan nga sama rag karon nato kini nadawat. “Ang bili nga pangtubos” alang sa atong kinabuhi “bililhon kaayo” nga bisag unsay himoon sa dili hingpit nga tawo dili arang makabayad niini.—Sal. 49:7-9; 1 Ped. 1:18,19. w15 6/15 5:9, 10

Makapalipay gayod ang pagtanyag ug praktikal, makapadani, ug maanindot nga mga basahon diha sa ministeryo! Ug dihang gigamit nato ang bag-ong teknolohiya sa pagpakaylap sa kamatuoran, sama sa jw.org nga website, atong gipakita nga gusto gayod ni Jehova nga itagana sa tanang tawo ang giya nga ilang gikinahanglan. Dili sab nato kalimtan ang kaayohan sa gihimong kausaban aron kita makagahig panahon para sa Pamilyahanong Pagsimba o sa personal nga pagtuon. Gipabilhan usab nato ang mga kausaban maylabot sa mga programa sa asembliya ug kombensiyon. Nagkanindot kini matag tuig! Ug mapasalamaton gayod kita sa pagbansay nga gitagana sa atong teokratikanhong mga tunghaan. Niining tanang kausaban, klaro nga si Jehova ang naggiya sa iyang organisasyon ug mas gipatahom niya ang espirituwal nga paraiso nga atong natagamtam karon! w15 7/15 1:16, 17

Kon dili ka segurado sa angay nimong buhaton sa usa ka situwasyon, maayong pangutan-on ang kaugalingon, ‘Unsa kahay buhaton ni Jesus?’ Ang nasod nga gipuy-an ni Jesus may mga tawo nga lainlaig kagikan—Judea, Galilea, Samaria, ug uban pa. Gipakita sa Bibliya nga may panagbangi taliwala sa mga tawo niining mga dapita. (Juan 4:9) May panagbangi usab tali sa mga Pariseo ug Saduseo (Buh. 23:6-9), sa mga tawo ug sa mga maniningil ug buhis (Mat. 9:11), ug tali sa mga Hudiyo nga naedukar sa Balaod ug niadtong wala. (Juan 7:49) Sa unang siglo, ang Israel gimandoan sa mga Romano, kinsa gikayugtan sa lokal nga mga tawo. Bisag gidepensahan ni Jesus ang kamatuoran ug giila nga ang kaluwasan naggikan sa mga Hudiyo, wala niya dasiga ang iyang mga tinun-an nga makig-indig sa uban. (Juan 4:22) Sa kasukwahi, giawhag niya sila sa paghigugma sa tanang tawo. w15 7/15 3:5

Ang mga tawo gilalang uban ang panginahanglan nga mahigugma ug higugmaon. Dali rang mahigawad ang usa kon dili kini matagbaw tingali tungod sa wala damhang mga panghitabo o kapakyasan, sakit, problema sa pinansiyal, o dili kaayo mabungahong ministeryo. Kon bation nato nga wala na mahigugma si Jehova kanato, maayong hinumdoman nga kita bililhon kaniya ug siya anaa ra, ‘nga naghawid sa atong tuong kamot’ ug nagtabang kanato. Dili gayod siya malimot kanato kon kita magmatinumanon kaniya. (Isa. 41:13; 49:15) Si Brigitte, kinsa nag-inusarang nagpadako sa duha ka anak human mabiyuda, miingon: “Lisod kaayo ang pagpadakog mga anak niining sistema ni Satanas, ilabina para sa nag-inusarang ginikanan. Pero kombinsido ko sa gugma ni Jehova kay siya naggiya kanako bisan pa sa kagul-anan ug kasakit, ug wala gyod niya itugot nga masinati nako ang labaw sa dili nako maantos.”—1 Cor. 10:13. w15 8/15 1:1-3

Si propetang Habacuc gisugo sa pagtagna sa kalaglagan sa Jerusalem. Dihang nagsugod siya sa pagpanagna, dugay nang gipahayag ang maong pasidaan. Miabot sa punto nga ang ‘daotan naglibot sa matarong ug ang hustisya gibaliko.’ Maong dili ikatingala nga si Habacuc nangutana: “Hangtod kanus-a, Oh Jehova, nga ako magatuaw alang sa tabang?” Gipasaligan ni Jehova ang matinumanong propeta nga ang maong kalaglagan “dili maulahi.” (Hab. 1:1-4) Ibutang ta nga si Habacuc naluya ug naghunahuna: ‘Dugay na kong nakadungog nga laglagon ang Jerusalem. Basig dugay pa kaayo ning mahitabo. Morag dili makataronganon nga magsige kog tagna nga daw laglagon na ang siyudad. Ako na lang nang itugyan sa uban.’ Kon naghunahuna pa niana si Habacuc, lagmit nawala niya ang pag-uyon ni Jehova ug posibleng namatay siya dihang gilaglag sa mga Babilonyanhon ang Jerusalem! w15 8/15 2:12, 13

Aron dili madaot ang atong mapuslanon o maayong pamatasan, dili ta angayng makigsuod niadtong naghimog daotang mga butang. Kini mapadapat dili lamang niadtong dili magtutuong mga mamumuhat ug daotan kondili usab niadtong nag-angkong nagsimba kang Jehova apan tinuyong naglapas sa iyang mga balaod. Kon kanang nag-angkong Kristohanon naghimog seryosong sala ug wala maghinulsol, mohunong kita sa pagpakig-uban kanila. (Roma 16:17, 18) Kon makig-uban ta niadtong wala magsunod sa mga balaod sa Diyos, lagmit matental kita sa pagsundog kanila aron mahimo tang dalawaton nila. Pananglitan, kon makigsuod ta sa mga tawong imoral, lagmit matental kita sa paghimog imoralidad. Nahitabo kana sa pipila ka dedikadong Kristohanon, ug ang pipila kanila napalagpot kay wala maghinulsol. (1 Cor. 5:11-13) Gawas kon sila maghinulsol, ang ilang kahimtang mahisama nianang gihubit ni Pedro.—2 Ped. 2:20-22. w15 8/15 4:4-6

Mainampingon si Jesus sa pagpilig suod nga mga higala. Siya mipilig mga higala taliwala niadtong maunongong nagsunod kaniya ug kinasingkasing nga nag-alagad kang Jehova. Ikaw ba usab mainampingong nagpilig suod nga mga higala taliwala niadtong bug-os kasingkasing nga nag-alagad kang Jehova? Nganong importante kini? Ang kainit sa panag-igsoonay makatabang nimo nga mouswag ngadto sa pagkahamtong. Tingali ikaw usa ka batan-on nga naghunahuna kon unsay imong himoon sa kinabuhi. Maalamon gayod kon makigsuod ka sa mga igsoon nga taastaas nag kasinatian sa pag-alagad kang Jehova ug nakatabang sa pagpalambo sa panaghiusa sa kongregasyon. Latas sa katuigan, sila tingali nakasinatig kalisdanan ug nakaatubang pa ganig mga hagit sa pag-alagad sa Diyos. Sila makatabang nimo sa pagpili sa labing maayong paagi sa pagkinabuhi. Ang mainiton ug makapalig-ong pagpakig-uban sa maong mga igsoon makatabang nimo sa paghimog maalamong mga desisyon ug sa pag-uswag ngadto sa pagkahamtong.—Heb. 5:14. w15 9/15 1:14, 15

Pinaagi sa pulong ug buhat, gipalig-on ni Jesus ang pagtuo sa iyang mga tinun-an. (Mar. 11:20-24) Angay natong sundogon ang iyang ehemplo kay kon atong tabangan ang uban sa pagpalig-on sa ilang pagtuo, molig-on usab ang atong pagtuo. (Prov. 11:25) Sa imong pagsangyaw ug pagpanudlo, ipasiugda ang ebidensiya nga ang Diyos naglungtad, nga siya nahingawa kanato, ug nga ang Bibliya mao ang iyang inspiradong Pulong. Tabangi usab ang mga igsoon sa pagpalig-on sa ilang pagtuo. Kon dunay magduhaduha, tingali nagreklamo batok sa tinudlong mga brader, ayaw silag likayi dayon. Hinunoa, tabangi sila sa mataktikanhong paagi aron molig-on pag-usab ang ilang pagtuo. (Jud. 22, 23) Kon ikaw nag-eskuyla pa ug gihisgotan ang teoriya sa ebolusyon diha sa klase, maisogong depensahi ang imong pagtuo sa paglalang. Tingali malipay ka sa wala damhang epekto sa imong gisulti ngadto sa uban. Si Jehova motabang kanatong tanan nga makabarog nga malig-on sa pagtuo. (1 Ped. 5:10) Ang atong paningkamot sa pagpalig-on sa atong pagtuo dili gayod makawang, kay ang ganti niini walay katumbas. w15 9/15 3:20, 21

Karon, nakapribilehiyo ta sa pagbatog dakong kahibalo bahin sa kalalangan ug katuyoan ni Jehova. Ang kalibotan nagpasiugda sa pagkuhag taas nga edukasyon. Bisan pa niana, gipakita sa kasinatian sa daghan nga ang pagpangagpas niana sagad moresultag pagkawala sa pagtuo ug gugma sa Diyos. Apan, ang Bibliya nagdasig kanato dili lang sa pagkuhag kahibalo kondili sa pagbaton usab ug kaalam ug pagsabot. Kana nagkahulogan nga angay natong makat-onan ang paggamit sa kahibalo nga gihatag sa Diyos kanato aron makabenepisyo kita ug ang uban. (Prov. 4:5-7) Ang “kabubut-on [sa Diyos] mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Atong gipakita nga gihigugma nato si Jehova kon maningkamot kita sa pagsulti sa uban sa maayong balita sa Gingharian ug pagtabang kanila nga masabtan ang katuyoan sa Diyos alang sa katawhan.—Sal. 66:16, 17. w15 9/15 5:10, 11

Handurawa ang mosunod nga mga esena nga nagpakita sa dakong pagsalig ni Elias kang Jehova. Dihang gipahibalo ni Elias si Haring Ahab nga ipahinabo ni Jehova ang hulaw, si Elias masaligong miingon: “Ingon nga buhi si Jehova . . . walay yamog ni ulan nga moabot, gawas kon imando sa akong pulong!” (1 Hari 17:1) Si Elias may pagtuo nga itagana ni Jehova ang iyang panginahanglan ug nianang sa uban panahon sa hulaw. (1 Hari 17:4, 5, 13, 14) Masaligon siya nga makabanhaw si Jehova sa usa ka bata. (1 Hari 17:21) Wala siya magduhaduha nga magpadala si Jehova ug kalayo aron lamyon ang iyang halad didto sa Bukid sa Carmelo. (1 Hari 18:24, 37) Dihang miabot na ang panahon nga taposon ni Jehova ang hulaw, bisag wala pay timailhan nga moulan, giingnan ni Elias si Ahab: “Lakaw, kaon ug inom; kay adunay dinaguok sa pagbundak sa ulan.” (1 Hari 18:41) Dili ba ang maong mga asoy magtukmod kanato sa pagsusi sa kaugalingon kon ingon ba niana ka lig-on ang atong pagtuo? w15 10/15 2:4, 5

Ang katakos sa tawo sa paggamit ug pinulongan maoy katingalahang gasa gikan sa Diyos. (Sal. 139:14; Pin. 4:11) Ang atong utok talagsaon usab sa laing bahin. Dili sama sa mga mananap, ang tawo gilalang “sa larawan sa Diyos.” Sila may kagawasan sa pagpili ug makagamit ug pinulongan sa paghimaya sa Diyos. (Gen. 1:27) Sa tanang nagtinguha sa pagpasidungog sa Maglalalang sa pinulongan, ang Diyos naghatag ug usa ka kahibulongang gasa, ang Bibliya. Kini mabatonan sa katibuk-an o sa bahin niini diha sa kapig 2,800 ka pinulongan. Kon imong pamalandongon kining balaang mga sinulat, imong gipuno ang imong kaisipan sa mga hunahuna sa Diyos. (Sal. 40:5; 92:5; 139:17) Busa makapamalandong ka sa mga butang nga “makahimo kanimong maalamon alang sa kaluwasan.” (2 Tim. 3:14-17) Ang pagpamalandong nagkahulogan ug pagpokus sa imong hunahuna o paghunahuna pag-ayo sa usa ka butang, maayo man o daotan. (Sal. 77:12; Prov. 24:1, 2) Ang duha sa labing maayong pamalandongon mao si Jehova nga Diyos ug ang iyang Anak, si Jesu-Kristo.—Juan 17:3. w15 10/15 4:2-4

Pinaagi sa pulong ug ehemplo, gibansay ni Jesus ang iyang mga tinun-an sa pag-alagad sa uban nga mapainubsanon. (Luc. 22:27) Gitudloan niya ang iyang mga apostoles sa pagsakripisyo diha sa pag-alagad kang Jehova ug sa pagpakiglabot sa mga isigkamagtutuo. Pinaagi sa imong ehemplo sa mapainubsanong pagsakripisyo, matudloan usab nimo ang imong mga anak. “Wala gyod ko mobatig kasina dihang ang akong bana mogugol ug panahon sa uban ingong ansiyano,” matod ni Debbie nga may duha ka anak. “Nahibalo ko nga kon kinahanglanon namo ang pagtagad sa akong bana, ihatag niya kana.” Ang iyang bana, si Pranas, midugang: “Sa ulahi, ang among mga anak gustong moboluntaryo sa mga asembliya ug teokratikanhong mga proyekto. Sila miuswag, nakabatog mga higala, ug nasuod sa mga igsoon!” Karon, ang tibuok pamilya nag-alagad kang Jehova diha sa bug-os panahong ministeryo. Pinaagi sa imong pagkamapainubsanon ug pagsakripisyo, ang imong mga anak lagmit makakat-on kon unsaon pag-alagad sa uban. w15 11/15 1:9

Gipakita ni Jehova ang iyang dakong gugma sa daghang paagi. Pananglitan, matikdi ang katahom sa uniberso. Kini adunay bilyonbilyong galaksiya, nga ang matag usa may bilyonbilyong bituon ug planeta. Sa atong galaksiyang Milky Way, usa sa mga bituon mao ang adlaw, nga kon wala kini, walay kinabuhi dinhi sa yuta. Kining tanang linalang nagpamatuod sa pagka-Diyos ni Jehova ug sa iyang mga hiyas, sama sa gahom, kaalam, ug gugma. Gilalang ni Jehova ang tanang butang nga anaa sa yuta aron mabuhi ang mga nagpuyo niini. Alang sa mga tawo, siya naghimog matahom nga paraiso ug naghatag kanilag hingpit nga hunahuna ug lawas nga puwedeng mabuhi sa walay kataposan. (Pin. 4:11) Dugang pa, siya “nagahatag ug pagkaon sa tanan nga unod: kay ang iyang mahigugmaong-kalulot maoy hangtod sa panahong walay tino.”—Sal. 136:25. w15 11/15 3:7, 8

Latas sa katuigan ang atong Hari naghatag kanatog mga himan nga magamit aron maandam ang kasingkasing sa milyonmilyong katawhan sa pagdawat sa mensahe sa Gingharian. Ang pipila ka himan nahimong mapuslanon sulod sa mubong panahon, samtang ang uban gigamit gihapon karon. Pero kining tanang himan nagtabang kanato sa pagpauswag sa atong kahanas sa pagsangyaw. Ang usa ka himan nga nakatabang sa mga magmamantala sa pagsugod ug sangyaw mao ang testimony card, nga gigamit sukad sa 1933. Ang card dunay mubong mensahe sa Bibliya. Nakatabang ang testimony card sa lainlaing paagi. Bisag gusto kaayong mosangyaw, ang pipila ka magmamantala maulawon ug wala mahibalo kon unsay isulti. Ang uban mosulti sa tagbalay sa tanan nilang nahibaloan sulod sa pipila ka minutos, pero ang ilang presentasyon dili kanunayng mataktikanhon! Sa kasukwahi, sa pipila lang ka maayong pagkapili nga mga pulong, ang testimony card “maoy mosulti” para sa magmamantala. w15 11/15 5:3-6

Daghang teksto ang nagpakita sa kaimportante sa ngalan sa Diyos ug sa pagbalaan niini. (Ex. 3:15; Sal. 83:18; Isa. 42:8; 43:10; Juan 17:6, 26; Buh. 15:14) Si Jehova nga Diyos—ang Awtor sa Bibliya—nag-inspirar sa mga magsusulat niini nga gamiton gayod ang iyang ngalan. (Ezeq. 38:23) Kanang ngalana makitag linibo ka beses diha sa karaang mga manuskrito. Busa, ang pagtangtang niana nagpakitag kawalay-pagtahod sa Awtor. Karon, nagkadaghan ang ebidensiya nga angay natong gamiton ang ngalan sa Diyos. Sa 2013 nga rebisyon sa New World Translation, ang maong ngalan makitag 7,216 ka beses, nga nadugangag 6 kon ikomparar sa 1984 nga edisyon. Ang lima nga gidugang makita sa 1 Samuel 2:25; 6:3; 10:26; 23:14, 16. Gipasig-uli ang maong ngalan kay makita kini sa Linukot nga mga Basahon sa Patayng Dagat, nga gisulat kapig 1,000 ka tuig nga mas una kay sa Hebreohanong Masoretikong teksto. Gibalik sab kana diha sa Maghuhukom 19:18 tungod sa gihimong dugang nga pagtuon sa karaang mga manuskrito. w15 12/15 2:5, 6

Karon na ang panahon nga angay natong palig-onon ang atong inigsoong gugma, kay kini makatabang kanato sa paglahutay sa bisan unsang pagsulay sa umaabot. Bisan karon nga wala pa magsugod ang dakong kasakitan, kinahanglan gyod natong ipakita ang inigsoong gugma. Daghan kitag mga igsoon nga grabeng naapektohan sa mga linog, baha, bagyo, tsunami, o ubang natural nga mga kalamidad. Ang uban nag-antos sa mga pagsupak ug paglutos. (Mat. 24:6-9) Anaa pa ang adlaw-adlawng kalisod sa panginabuhi tungod niining daotang sistema sa mga butang. (Pin. 6:5, 6) Samtang nagkadaghan ang problema, nagkadaghan sab ang atong kahigayonan sa pagpakita kon unsa ka lalom ang atong inigsoong gugma. Bisag “mobugnaw ang gugma sa kadaghanan,” kinahanglang padayon natong ipakita ang inigsoong gugma.—Mat. 24:12. w16.01 1:8, 9