Hunyo

Bisag may mosulti kanatog makapasakit, ang pagtubag pinaagig madanihong mga pulong dunay maayong mga resulta. (Prov. 15:1) Pananglitan, ang tin-edyer nga anak sa usa ka nag-inusarang ginikanan may dobleng pagkinabuhi. Usa ka maayog intensiyon nga sister ang miingon sa inahan: “Kaluoy sab nimo oy. Napakyas man ka sa pagmatuto sa imong anak.” Ang inahan naghunahuna sa makadiyot ug mitubag: “Bitaw, dili maayo ang kahimtang niya karon, pero nagpadayon pa ang iyang pagbansay. Tan-awon na lang nato inigkahuman sa Armagedon.” Tungod niining kalmadong tubag, nahuptan ang kalinaw tali sa maong mga sister, ug nakadasig kini sa anak, kinsa nakadungog sa maong panag-estorya. Naamgohan sa anak nga wala mawad-ig paglaom ang iyang inahan. Kini nagpalihok kaniya sa pagbiya sa dili maayong mga kauban. Sa ngadtongadto, siya nabawtismohan, ug sa ulahi nag-alagad sa Bethel. Busa, kauban man kita sa atong mga igsoon, pamilya, o dili kaila, angay nga ang atong sinultihan kanunayng “madanihon, tinimplahan ug asin.”—Col. 4:6. w15 12/15 3:15, 17

Kon usa ka sa mga tinun-an ni Jesus nga nakaeksperyensiya niadtong maong panghitabo, dili gyod nimo makalimtan kanang adlawa. Dili ka magduhaduha nga gidihogan ka sa balaang espiritu, ilabina kon nakadawat sab ka ug milagrosong gasa sa pagsultig laing pinulongan. (Buh. 2:6-12) Pero ang tanan bang gidihogan sa balaang espiritu nahimong dinihogan sa talagsaong paagi sama nianang sa unang grupo sa mga 120 ka tinun-an? Dili. Ang uban niadtong presente sa Jerusalem niadtong adlawa nahimong dinihogan dihang sila nabawtismohan. (Buh. 2:38) Walay samag dila sa kalayo nga mipatong sa ilang ulo. Dugang pa, dili tanang dinihogang Kristohanon ang nahimong dinihogan panahon sa ilang bawtismo. Ang mga Samarianhon gidihogan sa balaang espiritu pipila pa ka panahon human sa ilang bawtismo. (Buh. 8:14-17) Sa laing bahin, sa talagsaong kahimtang, si Cornelio ug ang iyang panimalay gidihogan sa balaang espiritu sa wala pa sila mabawtismohi.—Buh. 10:44-48. w16.01 3:3, 5

Ang mga dinihogan wala maghunahuna nga kay dinihogan sila, mas daghan ang balaang espiritu nga ilang nadawat kay niadtong may yutan-ong paglaom. Wala sila mangangkon nga duna silay linaing kahibalo; ni maghunahuna nga mas labaw sila sa uban. Ang mga dinihogan dili pod modiktar sa uban nga sila gidihogan usab ug kinahanglang makig-ambit sa mga emblema, kondili mapainubsanon nilang ilhon nga si Jehova ang nagdapit sa mga dinihogan. Ang mga dinihogan wala magdahom ug linaing pasidungog gikan sa uban. (Efe. 1:18, 19; Filip. 2:2, 3) Dihang gidihogan sila ni Jehova, wala niya kini ipahibalo sa tanan. Busa dili sila matingala kon ang uban dili dayon motuo nga sila tinuod nga gidihogan sa balaang espiritu. Gani, ang Kasulatan nagpasidaan nga dili ta angayng motuo dayon kon dunay moingon nga nakadawat siyag linaing asaynment gikan sa Diyos.—Pin. 2:2. w16.01 4:6, 7

Duha ka higayon nga si Jehova nangilabot ug nanalipod kang Abraham ug Sara sa milagrosong paagi. (Gen. 12:10-20; 20:2-7, 10-12, 17, 18) Ang maong mga kasinatian nagpalig-on sa pagtuo ni Abraham. Mahimo ba natong suod nga higala si Jehova? Oo! Ang kahibalo ug kasinatian nga atong gikinahanglan dali na natong mabatonan. Sa iyang panahon, si Abraham diyutay lag nahibaloan sa dagayang bahandi ug kaalam nga makita karon sa Bibliya. (Dan. 12:4) Ang Pulong sa Diyos puno sa bahandi nga makapalalom sa atong kahibalo bahin sa “Magmumugna sa langit ug sa yuta” ug makatabang nato sa pagbaton ug lalom nga pagtahod ug gugma kaniya. (Gen. 14:22) Samtang ang maong mga pagbati magpalihok nato sa pagsugot sa Diyos, kita makabatog kasinatian kay nakita nato kon unsay resulta sa pagsugot kaniya. Atong makita nga ang iyang tambag manalipod kanato ug siya magpanalangin ug magpalig-on kanato. Atong makat-onan nga ang tibuok kasingkasing nga pag-alagad sa Diyos moresultag katagbawan, kalinaw, ug kalipay. (Sal. 34:8; Prov. 10:22) Samtang modako ang atong kahibalo ug kasinatian, ang atong pagtuo ug panaghigala kang Jehova molig-on usab. w16.02 1:7, 8

Ang maong mga pulong nagpakita nga si Maria sinati kaayo sa Kasulatan. Ang iyang gisulti susama sa pag-ampo ni Ana, nga inahan sa manalagnang si Samuel. (1 Sam. 2:1-10) Gibanabana nga si Maria mikutlo sa Kasulatan ug mga 20 ka beses nianang higayona. Klaro nga siya usa ka babaye nga ganahang maghisgot sa espirituwal nga mga butang. Gipagawas niya gikan sa iyang kasingkasing ang iyang gitipigang espirituwal nga mga bahandi—bililhong mga kamatuoran nga iyang nakat-onan gikan sa iyang kinasuorang Higala, si Jehova nga Diyos. Sama kang Maria, makadawat tingali kitag mga asaynment gikan kang Jehova nga daw lisod himoon. Sama kaniya, mapainubsanon kitang mosalig kang Jehova nga Siya motabang kanato. Masundog nato ang pagtuo ni Maria pinaagi sa pagpaminaw pag-ayo sa atong madunggan bahin kang Jehova ug sa iyang mga katuyoan, pagpamalandong sa espirituwal nga mga kamatuoran, ug pinaagi sa malipayong pagsulti sa uban bahin niana.—Sal. 77:11, 12; Luc. 8:18; Roma 10:15. w16.02 2:17, 18

Kada tuig linibo ka batan-on sa tibuok kalibotan ang magpabawtismo. (Eccl. 12:1) Gustong seguroon sa Kristohanong mga ginikanan ug sa mga ansiyano nga ang pagpabawtismo sa maong mga batan-on maoy kinabubut-on ug nasabtan nila ang kahulogan niana. Ang pahinungod ug bawtismo maoy sinugdanan sa bag-ong kinabuhi alang sa usa ka Kristohanon, diin iyang masinati ang mga panalangin ni Jehova maingon man ang mga pagsupak ni Satanas. (Prov. 10:22; 1 Ped. 5:8) Busa, ang Kristohanong mga ginikanan kinahanglang mogahin ug panahon sa pagtudlo sa ilang mga anak kon unsay nalangkit sa pagkahimong tinun-an ni Kristo. Sa mga batan-on nga dili Saksi ang ginikanan, ang mga ansiyano mahigugmaong motabang nila nga masabtan kon unsay kahulogan sa pagkahimong tinun-an. (Luc. 14:27-30) Maingon nga gikinahanglan ang pagplano aron mahuman ang usa ka bilding, gikinahanglan usab ang pagpangandam aron makaalagad kang Jehova nga matinumanon “hangtod sa kataposan.”—Mat. 24:13. w16.03 1:1, 2

Ang Moisesnong Balaod gihatag ngadto sa usa ka nasod—ang kinaiyanhong Israel. Sa kasukwahi, ang espirituwal nga Israel langkoban sa katawhan gikan sa daghang kanasoran ug kagikan. Ang Moisesnong Balaod, nga naggiya sa kinaiyanhong Israel didto sa Yutang Saad, gikulit sa bato. Sa espirituwal nga Israel, ang “balaod ni Kristo” gipasukad sa mga prinsipyo nga gikulit sa ilang kasingkasing. Ang “balaod ni Kristo” makagiya ug makahatag ug kaayohan sa mga Kristohanon bisag asa sila nagpuyo. (Gal. 6:2) Ang espirituwal nga Israel makabenepisyog dako sa paggiya sa Diyos pinaagi sa iyang Anak. Sa wala pa maestablisar ang bag-ong pakigsaad, si Jesus naghatag ug duha ka importanteng sugo. Ang usa niini maoy bahin sa buluhatong pagsangyaw. Ang lain maoy bahin sa panggawi sa mga sumusunod ni Jesus ug kon unsaon nila pagtratar ang mga isigkamagtutuo. Kini nga mga lagda maoy alang sa tanang Kristohanon; busa mapadapat kini sa tanang matuod nga mga magsisimba karon, langitnon man o yutan-on ang ilang paglaom. w16.03 4:10, 11

Angayng sugdan sa ansiyano ang pagbansay sa usa ka brader pinaagi sa paggahig panahon nga masuod kaniya ug mobati kini nga relaks. Ang espesipikong mga lakang nga himoon sa ansiyano mahimong managlahi, depende sa lokal nga kahimtang ug kostumbre. Apan, bisan asa ka man nagpuyo, kon mogahin kag panahon alang sa tinun-an bisag puliki ka, sama rag giingnan nimo siya, “Importante ka nako.” Kana nga mensahe bisag dili nimo isulti masabtan ug pabilhan gayod sa mga tinun-an nga andam magpabansay. Ang malamposong magtutudlo gustong mobansay sa uban ug siya usab nahigugma sa tawo nga iyang gibansay. (Itandi ang Juan 5:20.) Kana nga tinamdan mamatikdan dayon sa tinun-an ug dakog epekto sa paagi sa iyang pagsanong sa pagbansay nga iyang nadawat. Busa, minahal nga mga ansiyano, dihang magbansay kamo, paningkamoti ninyo nga dili lang kamo mahimong mga magtutudlo, kondili mahimong mga higala usab.—Prov. 17:17; Juan 15:15. w15 4/15 1:19, 20

Ibutang ta nga wala ihatag sa Pulong sa Diyos ang tanang detalye bahin kang Haring Azarias (Haring Uzzias), sama sa mugbong asoy sa Bibliya. (2 Hari 15:7, 32; 2 Cron. 26:3-5, 16-21) Kuwestiyonon ba nimo ang pagkamatarong sa Diyos? O mangatarongan ka nga ang Bibliya naundan ug igong impormasyon nga magpasalig kanato nga kanunayng himoon ni Jehova kon unsay husto ug nga kini, sa pagkatinuod, mao ang sukdanan sa kon unsay husto ug sayop? (Deut. 32:4) Samtang mas mailhan nato si Jehova ingong Persona, molalom ang atong gugma ug apresasyon sa iyang mga paagi ug dili na ta magkinahanglag katin-awan sa tanan niyang gibuhat. Magmasaligon nga ang maong apresasyon molalom kon ikaw maningkamot sa pagtuon ug pagpamalandong sa gisulti sa Diyos diha sa iyang sinulat nga Pulong. (Sal. 77:12, 13) Sa baylo, kini magpalig-on sa imong relasyon kang Jehova ug siya mahimong mas tinuod alang kanimo. w15 4/15 3:8, 10

Ang espiritung mga linalang nga gitawag ug mga manulonda maoy “gamhanan sa kusog.” Sila mas gamhanan sa mga tawo ug busa sila mas makinaadmanon ug mas kusgan. Siyempre, ang matinumanong mga manulonda naggamit sa ilang gahom sa maayong paagi. Pananglitan, dihay higayon nga ang usa ka manulonda ni Jehova mipatayg 185,000 ka kaaway nga Asiryanhong sundalo—imposibleng himoon sa usa ka tawo ug lisod himoon bisan sa tibuok panon sa kasundalohan. (2 Hari 19:35) Sa laing higayon, usa ka manulonda ang migamit sa iyang gahom ug katakos sa pagpagawas sa mga apostoles ni Jesus gikan sa bilanggoan. Ang maong espiritu nga linalang dali rang nakasulod sa bilanggoan. Iyang gibuksan ang mga pultahan, gipagula ang mga apostoles, ug gitrangkahag balik ang mga pultahan, bisan pag may mga guwardiya diha sa duol! (Buh. 5:18-23) Ang matinumanong espiritung mga linalang naggamit sa ilang gahom sa maayong paagi, apan si Satanas sa daotang paagi. Ug pagkadako sa iyang gahom ug impluwensiya! Ang Kasulatan nagtawag kaniyang “magmamando niining kalibotana.”—Juan 12:31. w15 5/15 1:5, 6

Minyo man o tagsaanon, paningkamotan gayod natong likayan ang tanang matang sa seksuwal nga imoralidad. Sayon ba kini? Dili! Pananglitan, kon ikaw batan-on, kanunay tingali nimong madunggan ang imong mga eskolmet nga manghambog nga sila nakigsekso kang bisan kinsa nga gusto nila. Basin manghambog pod sila bahin sa sexting, usa ka buhat nga sa pipila ka lugar giisip nga sama ra sa child pornography. Ang Bibliya nag-ingon: “Siya nga nagapakighilawas nagapakasala batok sa iyang kaugalingong lawas.” (1 Cor. 6:18) Ang mga sakit nga mapasa pinaagig pagpakigsekso miresulta sa pag-antos ug kamatayon. Ug daghang dili minyong batan-on nga nawad-an sa ilang pagkaulay ang miingon nga nagbasol sila sa ilang gihimo. Ang realidad sa seksuwal nga imoralidad lahi gayod sa gipakita diha sa mga salida, nga nagpatuo kanato nga ang paglapas sa balaod sa Diyos wala ray daotang resulta. Tungod sa maong panghunahuna, ang mga tawo nabiktima sa “malimbongong gahom sa sala.” w15 5/15 2:14

Gisundog ni Jesus ang kalulot sa Diyos. Unsay nakatabang kang Jesus sa pagbuhat niana? Iyang gitratar ang uban sa malulotong paagi. Iyang gihunahuna kon unsay bation sa uban sa iyang isulti ug buhaton. Pananglitan, usa ka babaye nga nailhang makasasala ang miduol kaniya. Siya mihilak ug gihumod niya ang mga tiil ni Jesus pinaagi sa iyang mga luha. Nakita ni Jesus nga siya mahinulsolon, ug nahibalo siya kon unsay bation niini kon iya kining abogon. Busa, iya kining gikomendahan ug gipasaylo. Dihang mitutol niana ang usa ka Pariseo, si Jesus maluloton usab nga nakigsulti kaniya. (Luc. 7:36-48) Sa unsang paagi nato masundog ang kalulot sa Diyos? Si apostol Pablo misulat: “Ang ulipon sa Ginoo dili kinahanglang makig-away, kondili kinahanglang magmalumo [o, magmataktikanhon] sa tanan.” (2 Tim. 2:24) Pinaagi sa pagbutang sa atong kaugalingon sa kahimtang sa uban ug sa paghunahuna kon unsay ilang bation sa atong isulti, mahibalo kita kon unsay angay natong isulti ug makalihok kita sa paagi nga nagsundog sa kalulot ni Jehova.—Prov. 15:28. w15 5/15 4:8, 9

Dihang ang atong mga igsoon makaagom ug kalisdanan, kita makahupay ug makatabang kanila sa pisikal, emosyonal, ug espirituwal. (Prov. 17:17) Pananglitan, makatabang ta nila sa pagbangon human sa katalagman. Tagda ang kinasingkasing nga pasalamat sa usa ka biyuda human maguba ang iyang balay sa bagyo: “Mapasalamaton kaayo ko nga ania ko sa organisasyon ni Jehova, dili lang tungod sa pisikal nga tabang kondili sa espirituwal usab.” Ug matikdi ang komento sa usa ka tagsaanong sister kinsa nawad-ag paglaom ug naguol dihang nakita niya nga naguba ang iyang balay sa bagyo. Dihang gitabangan, siya miingon: “Dili nako bug-os mapahayag ang akong gibati . . . Salamat, Jehova!” Kita malipayon nga nahimo tang bahin sa panag-igsoonay nga tinuod nga nagtagana sa panginahanglan sa usag usa. Ug mas labaw ang atong kalipay kay si Jehova ug Jesu-Kristo tinuod nga nahingawa sa katawhan sa Diyos. w15 6/15 1:17

Ang Bibliya makatabang nato sa pagsalikway sa sayop nga mga tinguha pinaagi sa tambag niini bahin sa pagpakiglabot sa kaatbang nga sekso. Ang maong tambag tin-awng nagdili sa pagbirigbirig. Ang pipila naghunahuna nga walay daotan sa pagkahimong romantiko basta hangtod lang sa pulong, pasiplat, o pipila ka lihok ug walay pisikal nga kontak. Apan ang pagbirigbirig, o ang pagtugot niana, mahimong makapukaw sa mahugawng mga hunahuna nga motultol sa seksuwal nga imoralidad. Kini nahitabo na kaniadto—ug puwedeng mahitabo pag-usab. Si Jose milihok nga maalamon niining bahina. Dihang gitental siya sa asawa ni Potipar nga iyang agalon, siya mibalibad. Pero wala mosurender ang asawa ni Potipar. Adlaw-adlaw kining naghaylo kang Jose sa pagpabilin uban kaniya. (Gen. 39:7, 8, 10) Pero determinado si Jose nga dili paundayonan o konsentihon ang panghaylo niini, maong nalikayan niyang makagamot ang sayop nga tinguha diha sa iyang kasingkasing. w15 6/15 3:10, 11

Gusto ni Jehova nga kita magmahunahunaon dili lang sa atong espirituwal nga kaayohan kondili nianang sa uban usab, lakip na niadtong nakasala kanato. Sagad, ang maong mga sala ginagmay ra ug maghatag natog kahigayonan sa pagpakita nga kita tinuod nga nahigugma sa atong mga igsoon ug andam mopasaylo, maingon nga ang Diyos nagpasaylo kanato. (Col. 3:13) Ikasubo nga ingong dili hingpit nga mga tawo, kita usahay maghambin ug kayugot sa uban. (Lev. 19:18) Kon ato kanang ipanabi, ang uban tingali modapig nato, nga magpahinabog pagkabahinbahin sa kongregasyon. Kon atong tugotan nga magpadayon ang maong kahimtang, magpakita kanag kawalay-pagpabili sa kaluoy sa Diyos ug sa lukat. Dili ipadapat sa Amahan kanato ang bili sa halad sa iyang Anak kon dili kita magmapinasayloon. (Mat. 18:35) Gipatin-aw kini ni Jesus human niya ihatag ang modelong pag-ampo. (Mat. 6:14, 15) Ug aron pasayloon sa Diyos, kinahanglang maningkamot kita nga likayan ang pagbatasan sa paghimog seryosong sala.—1 Juan 3:4, 6. w15 6/15 5:9-11

Kadungganan gayod nato nga gitugotan kita ni Jehova sa pagtabang kaniya nga mas mapatahom ang atong espirituwal nga paraiso. Gibuhat nato kana pinaagi sa masibotong pagsangyaw sa maayong balita sa Gingharian ug sa paghimog dugang mga tinun-an. Matag higayon nga gitabangan nato ang usa ka tawo nga mahimong alagad sa Diyos, kita nakatabang sa pagpalapad sa espirituwal nga paraiso. (Isa. 26:15; 54:2) Mas mapatahom usab nato ang atong espirituwal nga paraiso pinaagi sa padayong pagpauswag sa atong Kristohanong personalidad. Nianang paagiha, gihimo nato ang paraiso nga mas makapadani sa uban. Labaw pa sa kahibalo bahin sa Bibliya, sagad ang atong kahinlo ug pagkamakigdaiton ang unang makadani sa mga tawo ngadto sa organisasyon ug dayon sa Diyos ug kang Kristo. Malipay gayod si Jehova ug si Jesus nga makita ang atong matahom nga espirituwal nga paraiso karon! Ang atong kalipay sa pagtabang nga mas mapatahom kini maoy pasiuna sa kalipay nga atong bation sa ulahi dihang motabang kita sa paghimo sa yuta nga usa ka literal nga paraiso. w15 7/15 1:18-20

Karon, ang tanan kinahanglang modesisyon kon kang kinsang pagmando ang mas maayo—sa Diyos ba o kang Satanas. Midapig ba gyod ka kang Jehova pinaagi sa pagtuman sa iyang mga balaod ug sukdanan imbes sundon ang imong kaugalingong mga pamaagi? Nagtuo ba ka nga ang iyang Gingharian ra ang makasulbad sa mga problema sa tawo? O nagtuo ba ka nga magmalamposon ang pagmando sa tawo? Makita sa imong tubag niining mga pangutanaha kon unsay imong reaksiyon dihang pangutan-on ka sa mga tawo bahin sa kontrobersiyal nga mga isyu. Dugay nang naningkamot ang mga politiko, aktibista, ug repormador sa pagsulbad sa mga isyu nga makapabahinbahin sa katawhan. Tingali sila sinsero ug maayog motibo. Apan, giila sa mga Kristohanon nga ang Gingharian ra sa Diyos ang makasulbad sa mga problema sa tawo ug makahatag ug tinuod nga hustisya. Angay natong itugyan kang Jehova ang tanan. Kay kon iendorso sa usa ka Kristohanon ang solusyon nga iyang gihunahuna nga mao ang labing maayo, dili ba magkabahinbahin ang kongregasyon? w15 7/15 3:7, 8

Makita ba nato ang way paglubad nga gugma ni Jehova kanato diha sa iyang kalalangan? Oo, kay ang mismong paglalang maoy pamatuod sa gugma sa Diyos. (Roma 1:20) Iyang gidisenyo ang ekosistema sa yuta sa paagi nga kita padayong mabuhi. Pero, dili lang kay gusto niya nga kita mabuhi. Gihatagan ta ni Jehova sa tanan natong gikinahanglan aron kita magmalipayon. Giseguro niya nga ang yuta makapatunghag lainlaing tanom nga mahimong kaonon aron kita malipay ug matagbaw. (Eccl. 9:7) Gilalang kita ni Jehova uban ang katakos nga makahimog mabungahon ug mapuslanong buluhaton nga makadugang sa atong kalipay. (Eccl. 2:24) Katuyoan niya nga pun-on ug gamhan sa tawo ang yuta ug pagabut-an ang mga isda, langgam, ug ubang buhing linalang. (Gen. 1:26-28) Ug pagkamahigugmaon ni Jehova nga gihatagan niya kitag mga katakos aron masundog nato siya!—Efe. 5:1. w15 8/15 1:4, 5

Ang mga panghitabo sa kalibotan klarong nagpakita nga nagakatuman na ang mga tagna sa Bibliya ug nagkaduol na ang kataposan niining daotang sistema sa mga butang. Busa, dili ta angayng maghunahuna nga modagan pag taas nga panahon una moabot sa punto nga “ang napulo ka sungay” ug “ang mapintas nga mananap” sa Pinadayag 17:16 moatake sa Dakong Babilonya, ang tibuok kalibotang imperyo sa bakak nga relihiyon. Atong hinumdoman nga aron mahitabo kana, ang Diyos ‘magbutang niini diha sa ilang mga kasingkasing’—ug kini mahimong mahitabo nga kalit ug bisan unsang orasa! (Pin. 17:17) Duol na kaayo ang kataposan niining tibuok sistema sa mga butang. Dunay maayong rason nga atong sundon ang pasidaan ni Jesus nga maoy atong teksto karong adlawa. (Pin. 16:15) Busa, magmadeterminado kita sa pag-alagad kang Jehova uban ang pagkadinalian, nga masaligon nga siya “naglihok alang sa usa nga nagpadayon pagpaabot kaniya.”—Isa. 64:4. w15 8/15 2:17

Bisag gusto natong magmaluloton niadtong wala magsunod sa mga balaod sa Diyos, dili kita angayng makigsuod kanila. Busa, sayop gayod alang sa usa ka tagsaanong Saksi ni Jehova ang pagpakigdeyt sa usa nga dili dedikado ug dili matinumanon sa Diyos ug walay pagtahod sa Iyang taas nga mga sukdanan. Ang paghupot sa Kristohanong integridad mas labawng hinungdanon kay sa pagkahimong dalawaton sa mga tawo nga wala magsunod sa mga balaod ni Jehova. Angay nga makigsuod lamang kita niadtong nagbuhat sa kabubut-on sa Diyos. Nasinati sa mga Israelinhon ang makapasubong resulta sa daotang panagkauban. (Ex. 23:24, 25; Sal. 106:35-39) Kay wala sila magmatinumanon sa Diyos, sa ulahi si Jesus miingon kanila: “Tan-awa! Ang inyong balay mabiniyaan kaninyo.” (Mat. 23:38) Gisalikway ni Jehova ang Israel, ug gibalhin ang iyang panalangin ngadto sa bag-ong natukod nga Kristohanong kongregasyon.—Buh. 2:1-4. w15 8/15 4:7, 8

Gilalang ni Jehova nga Diyos ang tawo nga may kagawasan sa pagpili. Gihatagan sa Diyos ug bililhong giya ang unang magtiayon ug ang ilang umaabot nga kaliwat. Kana mao ang tanlag o konsensiya—ang katakos sa pag-ila sa husto ug sayop. Kon gamiton sa hustong paagi, ang tanlag makatabang nato sa paghimog maayo ug sa paglikay sa pagbuhat ug daotan. Busa, ang atong tanlag maoy ebidensiya sa gugma sa Diyos ug sa iyang tinguha nga ang mga tawo mahiusa sa pagbuhat ug maayo. Ang mga tawo karon duna gihapoy tanlag. (Roma 2:14, 15) Bisag daghan ang wala magsunod sa mga sukdanan sa Bibliya, atong makita nga may pipila nga sagad nagbuhat ug maayo ug nagdumot sa daotan. Ang tanlag nakapugong sa daghan sa pagbuhat ug grabeng pagkadaotan. Handurawa lang ang kahimtang sa kalibotan kon walay tanlag! Mapasalamaton gayod kita sa Diyos nga gihatagan ta niyag tanlag! w15 9/15 2:1, 2

Kining giingon ni apostol Juan takos gayod natong palandongon. Pinaagi sa mga pulong nga “tan-awa kon unsang matanga sa gugma ang gihatag kanato sa Amahan,” giawhag ni Juan ang mga Kristohanon sa paghunahuna bahin sa matang ug gidak-on sa gugma sa Diyos kanila, sa pagpamalandong kon giunsa sila paghigugma sa Diyos. Kon atong masabtan ang gugma ni Jehova nianang paagiha, seguradong modako ang atong gugma kaniya ug mas masuod ta kaniya. Apan wala masabti sa pipila kon sa unsang paagi sila higugmaon sa Diyos. Para nila, ang Diyos angayng kahadlokan ug sugton. O tungod tingali sa nakagamot nang bakak nga mga pagtulon-an, ilang gibati nga ang Diyos dili mahigugmaon, ug lisod higugmaon. Sa laing bahin, duna say nagtuo nga higugmaon sila sa Diyos bisag unsay ilang buhaton. Samtang tun-an nimo ang Bibliya, imong makat-onan nga ang gugma mao ang pangunang hiyas ni Jehova ug kana nagtukmod kaniya sa paghatag sa iyang Anak ingong lukat alang kanato.—Juan 3:16; 1 Juan 4:8. w15 9/15 4:1, 2

Sa pag-ingon niana, wala pakamenosa ni Pablo ang importansiya o bili sa disiplina, kay siya mipadayon: “Apan pagkahuman niini alang kanila nga nabansay niini kini magpatunghag madaitong bunga, nga mao, ang pagkamatarong.” Kon atong gihigugma si Jehova, dili nato angayng balewalaon o kayugtan ang iyang tambag. Sa kalibotan karon diin ang mga tawo mapahitas-on ug kaugalingon ray gihunahuna, dili sayon ang paghisgot bahin sa tambag ug disiplina, labi na gyod ang pagdawat niana. Bisan kadtong midawat ug tambag o disiplina sagad naghimo niana nga kontra gusto. Apan ang mga Kristohanon gitambagan nga ‘mohunong na sa pagpaumol sumala niining sistemaha sa mga butang.’ Kinahanglan natong sabton ug sundon ang “hingpit nga kabubut-on sa Diyos.” (Roma 12:2) Pinaagi sa iyang organisasyon, si Jehova naghatag natog tukma sa panahong tambag maylabot sa lainlaing bahin sa kinabuhi—atong panggawi uban sa kaatbang nga sekso, pakig-uban, ug kalingawan. Pinaagi sa kinabubut-ong pagdawat ug pagpadapat sa maong giya, atong gipakita nga kita mapasalamaton ug tinuod nga nahigugma kang Jehova.—Juan 14:31; Roma 6:17. w15 9/15 5:13, 15

Dili nato maugmad ang atong pagtuo nga kita-kita lang. Ang pagtuo maoy bahin sa bunga sa balaang espiritu sa Diyos. (Gal. 5:22) Busa, maalamon kita kon atong sundon ang tambag ni Jesus bahin sa pagpangayog dugang nga balaang espiritu kay siya nagpasalig nga ang Amahan “mohatag ug balaang espiritu niadtong nagapangayo kaniya.” (Luc. 11:13) Dihang molig-on na ang atong pagtuo, kinahanglan nato kining mentinahon. Ang atong pagtuo ikakomparar sa kalayo. Dihang mahaling na ang kalayo, kini mahimong mosilaob. Apan, kon dili nimo ni sugnoran, kini anam-anam nga mapalong ug maabo. Pero kon pirme nimo ning sugnoran, kini padayong magsiga. Busa, ang atong pagtuo usab magpadayong buhi kon regular kitang magtuon sa Pulong sa Diyos. Kon ato kanang buhaton, atong maugmad ang dakong gugma sa Bibliya ug sa Awtor niini. Ingong resulta, padayong molig-on ang atong pagtuo. w15 10/15 2:6, 7

Gipakita sa pag-research sa mga siyentipiko nga ang pagbasag kusog sa mga pulong panahon sa pagtuon makatabang sa paghinumdom niana. Ang Maglalalang sa atong utok nahibalo niini. Mao nga iyang gisugo si Josue sa pagbasa sa basahon sa Balaod “sa hinayng tingog.” (Jos. 1:8) Lagmit, imong mamatikdan nga ang pagbasag hinay sa Bibliya makapatisok niana sa imong kaisipan. Makatabang usab kini kanimo sa pagpokus diha sa imong ginabasa. Samtang ang pagbasa mahimong himoon nga wala kaayoy paningkamot, ang pagpamalandong nagkinahanglag konsentrasyon. Kanay hinungdan kon nganong ang dili hingpit nga utok may tendensiya nga mopili sa paghunahuna sa mas sayon, dili hago nga buluhaton. Busa, labing maayo nga mamalandong ka kon dili ka kapoy ug diha sa hilom nga dapit nga diyutay rag kabaldahan. Nakita sa salmista nga ang maayong higayon sa pagpamalandong mao kanang sa kagabhion samtang nagmata siya. (Sal. 63:6) Si Jesus, kansang hunahuna hingpit, mipilig hilom nga mga dapit aron sa pagpamalandong ug pag-ampo.—Luc. 6:12. w15 10/15 4:4, 6, 7

Sa usa ka higayon, ang pipila sa mga mamiminaw ni Jesus sa Galilea morag gustong mosunod kaniya. (Juan 6:22-24) Apan, si Jesus, kinsa makabasa sa kasingkasing, nakasabot nga ang mga tawo mas interesado sa pisikal nga pagkaon kay sa iyang gitudlo. Nakita niya nga sayop ang ilang gibati, busa mapailobon niyang gitul-id sila ug gipatin-aw kanila kon unsang mga kausaban ang angay nilang himoon. (Juan 6:25-27) Bisag dili ka makabasag kasingkasing, makapakita sab kag pagsabot ug masayran ang gibati sa imong anak labot sa pagsangyaw. Daghang ginikanan ang mohunong kadali sa ilang pagsangyaw aron makapahulay ang ilang mga anak ug makameryenda. Apan, maayong pangutan-on nimo ang kaugalingon, ‘Ganahan ba gyod ang akong anak sa pagsangyaw o meryenda ray iyang giapas?’ Kon imong nasuta nga wala kaayoy gana ang imong anak sa pagsangyaw, himoa kanang mas makapainteres kaniya. Pagtakdag mga tumong. Pangitag mga paagi aron mobati siyang mapuslanon ingong partner nimo sa pagsangyaw. w15 11/15 1:10, 11

Kanunayng buhaton sa atong mahigugmaong Diyos kon unsay makaayo sa iyang matinumanong mga alagad. Ang Bibliya nag-ingon: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.” Pagkanindot nga kaugmaon ang naghulat kanatong tanan nga nagpabili sa gugma ni Jehova ug nagsunod kaniya ingong Magmamando! Ang Pulong ni Jehova nag-ingon: “Bantayi ang walay-ikasaway ug tan-awa kanunay ang matul-id, kay ang kaugmaon nianang tawhana maoy malinawon. Apan pagapuohon sa tingob ang mga malapason.” (Sal. 37:37, 38) “Ang walay-ikasaway” nakaila kang Jehova ug sa iyang Anak ug matinumanong nagbuhat sa kabubut-on sa Diyos. (Juan 17:3) Kombinsido siya sa giingon sa 1 Juan 2:17: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” Samtang nagkaduol na ang kataposan niining kalibotana, kinahanglan kitang ‘molaom kang Jehova ug [mosubay] sa iyang dalan.’—Sal. 37:34. w15 11/15 3:11, 12

Ang katawhan sa Diyos naggamit ug lainlaing pamaagi aron makaabot ang maayong balita sa daghang tawo kutob sa mahimo. Importante kaayo kini dihang “diyutay ra ang mga mamumuo.” Sa sayong bahin sa ika-20ng siglo, ang mga mantalaan gigamit aron masangyawan ang daghang tawo sa mga lugar diin diyutay ra ang Saksi. Kada semana, magtelegramag sermon si Charles Taze Russell sa usa ka news agency. Dayon, itelegrama sa news agency ang sermon ngadto sa mga mantalaan sa United States, Canada, ug Europe. Gibanabana nga pagka-1913, ang mga sermon ni Brader Russell nabasa sa 15,000,000 ka tawo pinaagig 2,000 ka mantalaan! Human sa kamatayon ni Brader Russell, laing epektibong pamaagi sa pagpakaylap sa maayong balita ang gisugdan paggamit. Niadtong Abril 16, 1922, si Joseph F. Rutherford mihimo sa usa sa iyang unang mga sibya sa radyo, nga nadunggan sa mga 50,000 ka tawo. Dayon, niadtong Pebrero 24, 1924, ang unang estasyon sa radyo sa organisasyon, ang WBBR, nagsugod pagsibya. w15 11/15 5:10, 11

Si Jehova usab nagpahinabo nga ang iyang kalalangan mahimong bisan unsa sumala sa iyang gusto. Kaharmonya sa kahulogan sa iyang ngalan, gipahinabo sa Diyos nga si Noe mahimong magbubuhat ug arka, si Bezalel mahimong hanas nga artesano, si Gideon mahimong madaogong manggugubat, ug si Pablo mahimong apostol sa mga nasod. Oo, ang ngalan sa Diyos dakog kahulogan sa iyang katawhan. Ug dili gayod balewalaon sa New World Bible Translation Committee ang kaimportante sa maong ngalan pinaagig pagtangtang niana. Ang mga edisyon sa New World Translation diha sa kapig 130 ka pinulongan nagpasidungog sa ngalan sa Diyos pinaagi sa pagpasig-uli niini sa hustong dapit diha sa sagradong basahon. (Mal. 3:16) Sa kasukwahi, daghang hubad sa Bibliya karon ang nagtangtang sa balaang ngalan, ug gipulihan kanag mga titulo sama sa “Ginoo” o ngalan sa usa ka lokal nga diyos. Kini ang pangunang rason kon nganong gibati sa Nagamandong Lawas sa mga Saksi ni Jehova nga importante gayod nga daghang tawo kutob sa mahimo ang makabatog Bibliya nga nagpasidungog sa ngalan sa Diyos. w15 12/15 2:7-9

Walay duhaduha nga ang Diyos may gahom sa paghatag o pag-ayog sakit. Gipamatud-an kana sa Bibliya. Usahay, siya mosilot pinaagig sakit, sama sa nahitabo kang Paraon sa adlaw ni Abraham ug sa ulahi, sa igsoon ni Moises nga si Miriam. (Gen. 12:17; Num. 12:9, 10; 2 Sam. 24:15) Gipasidan-an sa Diyos ang mga Israelinhon nga kon dili sila magmatinumanon, siya magpadangat kanilag mga ‘sakit ug hampak.’ (Deut. 28:58-61) Sa laing bahin, puwedeng kuhaon ni Jehova ang sakit o panalipdan ang iyang katawhan batok niana. (Ex. 23:25; Deut. 7:15) Makaayo sab siyag sakit. Dihang grabeng nasakit si Job nga gusto na niyang mamatay, giayo siya sa Diyos! (Job 2:7; 3:11-13; 42:10, 16) Oo, ang Diyos may gahom gayod sa pag-ayog mga masakiton. Mao man usab ang iyang Anak. Mabasa nato nga si Jesus milagrosong nag-ayo sa mga sanlahon, patolon, buta, ug paralitiko. (Mat. 4:23, 24; Juan 9:1-7) Makapalig-on gayod ang paghunahuna nga ang pagpang-ayo ni Jesus maoy pasiuna lang sa iyang pagabuhaton sa bag-ong kalibotan. w15 12/15 4:3, 4