Hulyo

Ang orihinal nga pulong nga gihubad ug “pagkamaabiabihon” nagpasabot ug “pagpakitag kaayo sa mga estranyo.” Kini magpahinumdom kanato sa ehemplo ni Abraham ug Lot. Silang duha nagpakitag kaayo sa mga bisita nga wala nila mailhi. Kadto mga manulonda diay. (Gen. 18:2-5; 19:1-3) Nagpakita ba usab kitag pagkamaabiabihon sa atong mga igsoon pinaagi sa pag-imbitar kanila sa atong balay aron mangaon, magkaubanay, ug magdinasigay? Dili kinahanglang magkombira ta o mogastog dako aron isipon tang maabiabihon. Dili sab maayo nga kadto lang makahimo sa pagbalos sa atong pagkamaabiabihon ang atong imbitahon. (Luc. 10:42; 14:12-14) Ang atong tumong mao ang pagdasig, dili ang pagpasigarbo! Bisag wala kaayo nato mailhi ang atong circuit overseer ug ang iyang asawa, ato bang gipakita kanila ang pagkamaabiabihon? (3 Juan 5-8) Daghan kitag buluhaton ug problema sa adlaw-adlaw, apan dili gyod nato ‘kalimtan ang pagkamaabiabihon’! w16.01 1:11, 12

Kining talagsaong paglihok sa balaang espiritu nahisamag garantiya kon unsay mahitabo sa umaabot. Ang usa ka dinihogang Kristohanon kombinsido gayod tungod niining timaan. (2 Cor. 1:21, 22; 5:5) Segurado siya nga gidapit siya. Apan madawat lang niya ang iyang ganti kon magmatinumanon siya kang Jehova. Gipatin-aw kini ni Pedro: “Tungod niini, mga igsoon, buhata ang kutob sa inyong maarangan aron maseguro ang inyong pagkatinawag ug pagkapinili; kay kon kamo magpadayon sa pagbuhat niining mga butanga kamo dili gayod mangapakyas. Sa pagkatinuod, sa ingon dagayang itagana kaninyo ang pagsulod ngadto sa walay kataposang gingharian sa atong Ginoo ug Manluluwas nga si Jesu-Kristo.” (2 Ped. 1:10, 11) Busa, ang matag dinihogan kinahanglang maningkamot sa pagpabiling matinumanon, kay kon dili, ang iyang langitnong pagkatinawag, o pagkadinapit, mahimong walay kapuslanan.—Heb. 3:1; Pin. 2:10. w16.01 3:6, 7

Sayop gayod ang pagbayaw ug mga indibiduwal, bisan pag sila maoy dinihogang mga igsoon ni Kristo. Sa paghisgot bahin sa mga ansiyano, ang Bibliya nagdasig kanato sa pagsundog sa pagtuo niadtong nagapanguna, apan wala gayod kini magsugo kanato nga ituboy si bisan kinsang tawo ingong atong pangulo. (Heb. 13:7) Tinuod, ang Kasulatan naghisgot nga may pipila nga “takos sa doble nga pasidungog.” Hinunoa, sila nahimong takos sa dobleng pasidungog, dili tungod kay sila dinihogan, kondili tungod kay sila “nagdumala sa maayong paagi” ug “naghago sa pagpanulti ug sa pagpanudlo.” (1 Tim. 5:17) Busa, mobatig kaulaw kadtong may langitnong pagkatinawag kon ang uban maghatag kanilag sobrang pagdayeg ug atensiyon. Mas grabe pa, kon hatagan silag espesyal nga pagtagad, basin malisdan ang mga dinihogan sa pagpabiling mapainubsanon. (Roma 12:3) Dili nato gustong mahimong hinungdan nga makasala ang usa sa mga igsoon ni Kristo!—Luc. 17:2. w16.01 4:9

Ang panaghigala ikatandi sa usa ka bililhong bahandi. Apan dili kini samag usa ka butang nga atong paliton ug dayon hiposon ug maabog-abogan ra. Ang panaghigala samag buhing butang nga kinahanglang atimanon aron motubo ug molambo. Gipabilhan ug gipalig-on ni Abraham ang iyang panaghigala kang Jehova. Sa unsang paagi? Si Abraham wala gyod mobati nga igo na ang iyang kanhing pagpakitag diyosnong kahadlok ug pagkamasinugtanon. Samtang siya ug ang iyang dakong panimalay nagpanaw paingon sa Canaan, siya padayong nagpagiya kang Jehova sa paghimog mga desisyon, gagmay man o dagko. Usa ka tuig una matawo si Isaac, dihang si Abraham 99 anyos, si Jehova nagsugo kaniya nga tulion ang tanang lalaki sa iyang panimalay. Gikuwestiyon ba ni Abraham ang maong sugo o nangita ba siyag pasangil aron dili kana masunod? Wala. Siya misalig ug misugot sa Diyos niana “mismong adlawa.”—Gen. 17:10-14, 23. w16.02 1:9, 10

Bisan kon ang usa bata pa, siya makasabot na kon unsay kahulogan sa pagbuhat ug matarong ug sa pagpahinungod sa iyang Maglalalang. Busa, ang bawtismo maoy importante ug haom nga desisyon alang sa usa ka batan-on nga nagpakitag pagkahamtong ug nagpahinungod na kang Jehova. (Prov. 20:7) Unsay kahulogan sa pagkahimong hamtong? Kini dili lang pisikal nga pagkahamtong. Ang Bibliya nag-ingon nga ang mga tawong hamtong ‘nagbansay sa ilang mga gahom sa pagsabot aron sa pag-ila sa maayo ug sa daotan.’ (Heb. 5:14) Busa, ang mga tawong hamtong nahibalo kon unsay matarong sa panglantaw ni Jehova ug determinadong mobuhat niana. Ingong resulta, dili sila daling mahaylo sa pagbuhat ug daotan; ni kinahanglan pa silang awhagon pirme sa pagbuhat ug matarong. Sa pagkatinuod, makataronganon lang nga dahomon nga ang usa ka batan-ong magpabawtismo mosunod sa mga sukdanan sa Diyos bisan pag wala ang iyang ginikanan o ubang hamtong.—Filip. 2:12. w16.03 1:4, 5

Si Jonatan seguradong nahingangha kon giunsa pagpildi ni David si Goliat. Karon si David nagtindog atubangan sa amahan ni Jonatan, si Haring Saul sa Israel, nga “nagbitbit sa ulo sa Filistehanon.” (1 Sam. 17:57) Lagmit nakadayeg si Jonatan kang David tungod sa iyang kaisog. Tin-aw nga ang Diyos nag-uban kang David, ug “ang kalag ni Jonatan nalanggikit sa kalag ni David.” Gani, sila “naghimog usa ka pakigsaad” tungod kay gihigugma ni Jonatan si David sama sa iyang kaugalingon. (1 Sam. 18:1-3) Sa tibuok niyang kinabuhi, siya maunongon kang David. Nagmaunongon si Jonatan kang David bisan pag gipili sa Diyos si David nga mahimong sunod nga hari sa Israel. Nabalaka siya dihang si Saul nagtinguha sa pagpatay kang David. Aron palig-onon ang iyang higala, si Jonatan miadto sa kamingawan sa Judea, sa Hores. Didto, gipalig-on ni Jonatan si David ug gidasig nga mosalig kang Jehova pinaagi sa mga pulong sa atong teksto karong adlawa.—1 Sam. 23:16. w16.02 3:1, 2

Sukad sa sinugdan sa kalalangan, dayag gayod ang panaghiusa sa Amahan ug Anak. Sila nagtinabangay, ug ilang gipatungha ang lainlaing linalang nga atong makita karon. Ang pagtinabangay makita usab diha sa mga alagad sa Diyos. Makita nato kanang hiyasa panahon sa pagtukod sa arka sa adlaw ni Noe; sa pagpatindog, pagbungkag, ug pagbalhin sa tabernakulo samtang ang katawhan sa Diyos nagpanaw sa kamingawan; ug bisan sa pagpatugtog ug musika ug pag-awit ug mga pagdayeg kang Jehova sa templo. Kanang tanan nagkinahanglag pagtinabangay. (Gen. 6:14-16, 22; Num. 4:4-32; 1 Cron. 25:1-8) Makita usab ang pagtinabangay diha sa unang Kristohanong kongregasyon ubos sa ulo niini, si Jesu-Kristo. Gipatin-aw ni apostol Pablo nga bisag ang matag dinihogang Kristohanon may “nagkadaiyang mga gasa” ug nakigbahin sa “nagkadaiyang mga pag-alagad” ug ‘nagkadaiyang mga kalihokan,’ silang tanan maoy bahin sa ‘usa ka lawas.’—1 Cor. 12:4-6, 12. w16.03 3:1, 2

Tagda ang pagsangyaw sa maayong balita nga gisugo ni Jesus sa iyang mga sumusunod. Bag-o ang paagi ug mas dako ang teritoryo nga ilang sangyawan. Sa milabayng mga siglo, ang katawhan sa kanasoran kinahanglang moadto sa Israel aron sa pag-alagad kang Jehova. (1 Hari 8:41-43) Mao nay kahimtang sa wala pa ihatag ni Jesus ang sugo nga atong makita sa teksto karong adlawa. Ang mga tinun-an ni Jesus gisugo sa “pag-adto” sa tanang tawo. Sa adlaw sa Pentekostes 33 C.E., dihay ebidensiya nga nausab ang pamaagi ni Jehova. Gusto niya nga masangyaw ang maayong balita sa tibuok kalibotan. Gibubo niya ang iyang balaang espiritu sa mga 120 ka membro sa bag-ong kongregasyon, ug sila milagrosong nakasultig lainlaing pinulongan ngadto sa mga Hudiyo ug sa mga kinabig. (Buh. 2:4-11) Dayon, gisugo sila sa pagsangyaw sa mga Samarianhon. Unya, sa tuig 36 C.E., ang ilang teritoryo naglakip na sa dili tinuling mga Hentil. Tingali makaingon ka nga ang teritoryo nga sangyawan midako gikan sa usa ka “linaw” ngadto sa “kadagatan” sa katawhan. w16.03 4:12

Dugay nang nasabtan sa mga alagad sa Diyos nga ang pagbansay makaamot sa kalamposan. Ang patriarkang si Abram “nagtigom sa iyang binansay nga mga tawo” sa pagluwas kang Lot—ug sila milampos. (Gen. 14:14-16) Sa adlaw ni Haring David, ang mga mag-aawit sa balay sa Diyos maoy mga “binansay sa awit alang kang Jehova” ug nagdayeg sa Diyos. (1 Cron. 25:7) Karon, kita may espirituwal nga pakiggubat kang Satanas ug sa iyang mga sumusunod. (Efe. 6:11-13) Kita usab naningkamot sa pagdayeg kang Jehova. (Heb. 13:15, 16) Busa, sama sa karaang mga alagad sa Diyos, kinahanglan kitang mabansay aron magmalamposon. Sa kongregasyon, gipiyal ni Jehova sa mga ansiyano ang responsabilidad sa pagbansay sa uban. Sa dili pa magtudlog mga kahanas sa dili kaayo eksperyensiyadong brader, tingali ang usa ka ansiyano kinahanglan unang magpaambit kaniyag makapalig-on nga Kasulatanhong mga prinsipyo aron maandam ang iyang kasingkasing sa pagbansay.—1 Tim. 4:6. w15 4/15 2:1, 2

Wala kini magkahulogan nga direktang patyon sa Yawa ang mga tawo. Apan, ang iyang pagkamamumuno nakaimpluwensiya sa tibuok kalibotan. Dugang pa, sanglit si Eva mituo sa bakak ni Satanas ug si Adan misupak sa Diyos, ang sala ug kamatayon mikaylap sa tanang tawo. (Roma 5:12) Sa maong diwa, ang Yawa may “gahom sa pagpahinabog kamatayon.” Haom lang ang pagtawag ni Jesus kaniya nga “mamumuno.” (Juan 8:44) Pagkagamhanan nga kaaway si Satanas! Dihang supakon nato si Satanas, misupak usab kita sa tanang midapig kaniya sa isyu sa unibersohanong pagkasoberano. Naglakip kana sa dakong grupo sa ubang espiritung rebelde, o mga demonyo. (Pin. 12:3, 4) Sa makadaghan, gipakita sa mga demonyo nga mas gamhanan sila sa mga tawo pinaagi sa pagpahinabog grabeng kasakit sa ilang mga biktima. (Mat. 8:28-32; Mar. 5:1-5) Ayaw gayod pakamenosa ang gahom nianang daotang mga manulonda o sa “magmamando sa mga demonyo.” (Mat. 9:34) Kon walay tabang ni Jehova, dili gayod kita magmadaogon batok kang Satanas. w15 5/15 1:6, 7

Kon matental ka sa pagbuhat ug seksuwal nga imoralidad, unsay imong mahimo? Ilha ang imong kahuyangan. (Roma 7:22, 23) Pag-ampo sa Diyos alang sa kusog. (Filip. 4:6, 7, 13) Likayi ang mga situwasyon nga mahimong motultol sa imoralidad. (Prov. 22:3) Ug dihang motungha ang tentasyon, isalikway dayon kini. (Gen. 39:12) Si Jesus maoy maayo kaayong ehemplo sa paglikay sa tentasyon. Wala siya magpalimbong sa mga saad ni Satanas. Wala gani niya timbangtimbanga ang bentaha ug disbentaha niana. Hinunoa, siya mitubag dayon: “Kini nahisulat.” (Mat. 4:4-10) Si Jesus pamilyar sa Pulong sa Diyos, ug kana nagtabang niya sa paglihok dayon ug sa pagkutlog mga teksto dihang gisulayan. Aron masuklan si Satanas ug magmadaogon, dili gayod kita magpatental sa paghimog seksuwal nga imoralidad. w15 5/15 2:15, 16

Ang katakos sa pagsabot sa mga panghitabo nga wala pa nato masinatii makatabang nato sa pagsundog sa kaalam ni Jehova ug sa pagkakitang daan sa posibleng mga resulta sa atong pagabuhaton. Kon buot ni Jehova, iyang makitang daan ang resulta sa usa ka binuhatan. Wala kita niana nga katakos, pero maayong hunahunaon nato kon unsay mahimong resulta sa atong pagabuhaton. Aron masundog ang kaalam sa Diyos, maayong hunahunaon o handurawon pa gani ang posibleng mga resulta sa atong pagabuhaton. Pananglitan, kon kita nakigdeyt atong hinumdoman nga lisod ang pagkontrolar sa atong pagbati ug seksuwal nga tinguha. Dili gayod kita mohimog mga plano o bisan unsang butang nga magpameligro sa atong bililhong relasyon kang Jehova! Hinunoa, kinahanglang molihok kita nga kaharmonya niining inspiradong mga pulong: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot.”—Prov. 22:3. w15 5/15 4:10, 11

Hinumdomi kon unsay nahitabo kang Haring David. “Gikan sa atop nakita niya ang usa ka babaye nga naligo.” (2 Sam. 11:2) Siya padayong nagtan-aw ug naghunahuna niini. Bisan pag minyo kini, iya kining gitinguha ug nakapanapaw siya uban niini. Aron masuklan ang imoral nga hunahuna, kinahanglan kitang ‘mohimog pakigsaad sa atong mga mata,’ sama sa matinumanong si Job. (Job 31:1, 7, 9) Kinahanglang desidido kitang kontrolahon ang atong mga mata ug dili kini tugotang motan-aw nga may kaulag sa laing tawo. Apil niana ang pagtan-aw sa mahilas nga mga hulagway, sa computer man, sa billboard, sa hapin sa magasin, o bisan asa. Aron makasukol sa sayop nga mga tinguha, kinahanglan kang molihok dayon. Sunda ang tambag sa Pulong sa Diyos nga makatabang nimo sa paglikay sa pagpakasala ug sa ingon makapabiling putli.—Sant. 1:21-25. w15 6/15 3:12-14

Ang pagkonsiderar sa nahitabo wala madugay human mabawtismohi si Jesus makatabang nato sa pagsabot kon nganong kinahanglan kitang mohangyo: “Ayaw kami dad-a ngadto sa tentasyon.” Si Jesus gidala sa espiritu sa Diyos ngadto sa kamingawan. Ngano? “Aron tentalon sa Yawa.” (Mat. 4:1) Matingala ba kita niana? Dili, kon atong nasabtan ang pangunang rason kon nganong gipadala sa Diyos ang iyang Anak sa yuta. Kana mao ang paghusay sa isyu nga gipatungha dihang gisalikway ni Adan ug Eva ang pagkasoberano sa Diyos. May mga pangutana nga nagkinahanglag panahon aron matubag. Pananglitan, duna bay sayop sa paagi sa paglalang sa Diyos sa tawo? Posible ba alang sa usa ka hingpit nga tawo ang pagdapig sa pagkasoberano sa Diyos bisan pa sa mga pagpit-os gikan “sa usa nga daotan”? Ug mas maayo ba ang kahimtang kon ang tawo magmaindependente sa pagmando sa Diyos, ingon sa gipatuo ni Satanas? (Gen. 3:4, 5) Kon matubag na ang maong mga pangutana, mahibaloan sa tanang intelihenteng linalang nga ang paagi sa pagmando ni Jehova mao ang kinamaayohan. w15 6/15 5:12

Sa unsang paagi magsugod ang dakong kasakitan? Ang basahon sa Pinadayag nagtubag niana pinaagi sa paghubit sa kalaglagan sa “Dakong Babilonya.” (Pin. 17:5-7) Haom gayod nga ang tanang bakak nga relihiyon gipakasama sa pampam! Ang klero nakigrelasyon sa mga lider niining daotang kalibotan. Imbes maunongong magpaluyo kang Jesus ug sa iyang Gingharian, sila nagpaluyo sa tawhanong mga magmamando ug nagsalikway sa mga prinsipyo sa Diyos aron lang makabatog impluwensiya sa politika. Lahi gayod sila sa hinlo, samag ulay nga mga dinihogan sa Diyos. (2 Cor. 11:2; Sant. 1:27; Pin. 14:4) Pero kinsay molaglag sa samag bigaon nga organisasyon? Si Jehova magbutang sa “iyang hunahuna” diha sa kasingkasing sa “napulo ka sungay” sa “sanag-pulang bulok nga mapintas nga mananap.” Kini nga mga sungay nagrepresentar sa tanang politikal nga gahom nga nagpaluyo sa United Nations, usa ka organisasyon nga gihulagwayan sa “sanag-pulang bulok nga mapintas nga mananap.”—Pin. 17:3, 16-18. w15 7/15 2:3, 4

Unsay solusyon nianang makapabahin nga isyu? Si Pablo nagtambag sa mga Kristohanon: “Ako magaawhag kaninyo, mga igsoon, . . . nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna.” (1 Cor. 1:10, 11, 13) Dili sab angay nga magkabahinbahin ang Kristohanong kongregasyon karon. (Roma 16:17, 18) Giawhag ni Pablo ang dinihogang mga Kristohanon nga magpokus sa ilang langitnong pagkalungsoranon imbes sa mga butang sa yuta. (Filip. 3:17-20) Sila angayng mag-alagad ingong mga embahador kapuli ni Kristo. Ang mga embahador dili mag-apil-apil sa mga kalihokan sa nasod diin sila naasayn. Tua sa laing lugar ang ilang pagkamaunongon. (2 Cor. 5:20) Ang mga Kristohanon nga may yutan-ong paglaom maoy mga sakop usab sa Gingharian sa Diyos, busa dili sila angayng mag-apil-apil sa mga panagbangi niining kalibotana. w15 7/15 3:9, 10

Kon imong palandongon kanang tekstoha, imong maapresyar nga si Jehova nahigugma ug nahingawa gayod kanimo. Makasalig ka nga bililhon ka kang Jehova. (1 Ped. 5:6, 7) Angay natong pabilhan pag-ayo ang Bibliya kay ang Diyos pangunang nakigkomunikar kanato pinaagi niana. Ang mapuslanon ug mabinationg komunikasyon tali sa ginikanan ug mga anak hinungdanon aron molig-on ang pagsalig ug gugma sa usag usa. Unsay atong madahom kang Jehova? Bisag wala pa gayod nato siya makita o madungog, siya “nakigsulti” kanato pinaagi sa iyang inspiradong Pulong, ug kinahanglan tang mamati. (Isa. 30:20, 21) Gusto ni Jehova nga giyahan kita, ang iyang dedikadong katawhan, ug panalipdan kita batok sa kadaot. Buot usab niya nga kita makaila ug mosalig kaniya.—Sal. 19:7-11; Prov. 1:33. w15 8/15 1:6, 7

Gusto gayod natong mabuhi sa Paraiso, pero ang pangunang panalangin sa bag-ong kalibotan maoy espirituwal. Makapalipay gayod ang pagkahibalo nga nabalaan ang ngalan ni Jehova ug nabindikar ang iyang pagkasoberano! (Mat. 6:9, 10) Maghinamhinam kitang makita nga natuman ang orihinal nga katuyoan ni Jehova alang sa yuta ug sa katawhan. Ug handurawa nga samtang anam-anam kitang mahingpit, mahimong mas sayon alang kanato ang pagpakigsuod kang Jehova! (Sal. 73:28) Matagamtam nato kining maong mga panalangin kay si Jesus nagpasalig nga “sa Diyos ang tanang butang posible.” (Mat. 19:25, 26) Apan kon kita nangandoy nga mopuyo sa bag-ong kalibotan—ug padayong mabuhi human sa Usa ka Libo ka Tuig nga Pagmando ni Kristo—kinahanglan kitang molihok karon aron “makapangupot pag-ayo” sa kinabuhing walay kataposan. (1 Tim. 6:19) Kita kinahanglang magkinabuhi nga nagpaabot sa kataposan niining daotang kalibotan, ug angay tang mohimog positibong mga lakang karon aron makapangandam alang sa kinabuhi sa bag-ong kalibotan. w15 8/15 3:2, 3

Kadaghanan sa materyal diha sa media makadaot sa espirituwalidad. Ang maong materyal dili makatabang sa mga Kristohanon sa pagpalig-on sa ilang pagtuo kang Jehova ug sa iyang mga saad. Hinunoa, nagdasig kana sa mga tawo sa pagsalig sa daotang kalibotan ni Satanas ug sa mga pangagpas niini. Busa, kinahanglan tang mag-amping pag-ayo aron malikayan ang materyal nga makapukaw sa “kalibotanong mga tinguha.” (Tito 2:12) Dili sama sa kalibotan, ang materyal nga gitagana sa organisasyon ni Jehova niining kataposang mga adlaw nagpasiugdag panggawi nga motultol sa kinabuhing dayon. Pagkabulahan nato nga duna kitay mga magasin, brosyur, libro, video, ug mga Web page nga nagpasiugda sa matuod nga pagsimba! Ang organisasyon sa Diyos naghikay usab ug regular nga mga tigom diha sa kapig 110,000 ka kongregasyon sa tibuok kalibotan. Sa maong mga tigom ug sa mga asembliya ug kombensiyon, kita maghisgot ug base sa Bibliya nga mga materyal nga magpalig-on sa atong pagtuo sa Diyos ug sa iyang mga saad.—Heb. 10:24, 25. w15 8/15 4:9, 11

Ang mga alagad ni Jehova nagbansay sa ilang tanlag. Gusto nila nga ang ilang tanlag molihok uyon sa mga sukdanan sa husto ug sayop, maayo ug daotan, ingon sa gipakita sa Pulong sa Diyos. Ang maayong pagkabansay nga tanlag dakog ikatabang diha sa kongregasyon. Pero ang pagbansay ug paggamit sa atong tanlag dili lang kutob sa hunahuna. Ang Bibliya naglangkit sa maayong tanlag ngadto sa pagtuo ug gugma. Si Pablo misulat: “Ang tuyo niini nga sugo mao ang gugma gikan sa hinlong kasingkasing ug gikan sa maayong tanlag ug gikan sa pagtuo nga walay pagkasalingkapaw.” (1 Tim. 1:5) Samtang ginabansay nato ang atong tanlag ug molihok uyon niini, molalom ang atong gugma kang Jehova ug molig-on ang atong pagtuo. Gani, ang atong paagi sa paggamit sa atong tanlag magpadayag sa kalig-on sa atong espirituwalidad, kahimtang sa atong kasingkasing, ug sa kadako sa atong tinguha nga pahimut-an si Jehova. Sa pagkatinuod, ang atong tanlag magpadayag kon unsa tang matanga sa pagkatawo. w15 9/15 2:2, 3

Si Jehova ang atong Maglalalang. (Sal. 100:3-5) Kanay hinungdan nga gitawag sa Bibliya si Adan nga “anak sa Diyos,” ug gitudloan ni Jesus ang iyang mga sumusunod nga sangpiton ang Diyos ingong “Amahan namo nga anaa sa mga langit.” (Luc. 3:38; Mat. 6:9) Kay siya ang Maghahatag ug Kinabuhi, si Jehova ang atong Amahan; ang relasyon tali kaniya ug kanato susama nianang sa amahan ug sa iyang mga anak. Sa simpleng pagkasulti, si Jehova nahigugma kanato maingon nga ang usa ka maayong amahan nahigugma sa iyang mga anak. Siyempre, ang tawhanong mga amahan dili hingpit. Bisag unsaon ug paningkamot, dili nila bug-os masundog ang paagi ni Jehova sa pagpakita sa iyang amahanong gugma. Gani, ang pipila may mapait nga mga kasinatian samtang sila nagdako ug kini nagbilin diha kanila ug dakong kadaot sa emosyon ug hunahuna. Kana sakit ug makapaguol kaayo. Siyempre, si Jehova dili ingon niana nga amahan. (Sal. 27:10) Ang pagkahibalo kon sa unsang paagi si Jehova nahigugma ug nag-atiman kanato seguradong mas makapasuod nato kaniya.—Sant. 4:8. w15 9/15 4:3, 4

Kon mohimo kitag mga desisyon nga dili una konsiderahon ang kabubut-on sa Diyos, kana magpakita nga kita walay gugma ug pagsalig kaniya. Kas-a, sa panahon ni Samuel, ang mga Israelinhon napildi sa gubat batok sa mga Filistehanon. Ang katawhan sa Diyos nanginahanglan gayod ug tabang ug proteksiyon. Unsay ilang gihimo? Sila nakahukom: “Atong kuhaon gikan sa Shilo ang arka sa pakigsaad ni Jehova, aron mahianhi kini sa atong taliwala ug magluwas kanato gikan sa kamot sa atong mga kaaway.” Unsay resulta? “Grabe kaayo ang pagpamatay, mao nga sa Israel dihay napukan nga katloan ka libong sundalo nga nagbaktas. Ug nailog ang arka sa Diyos.” (1 Sam. 4:2-4, 10, 11) Ang pagdala nila sa Arka morag nagpakita nga midangop sila kang Jehova alang sa tabang. Apan, sa pagkatinuod wala sila mangayo sa iyang giya; gisunod nila ang ilang kaugalingong ideya, ug sila nag-antos tungod niana.—Prov. 14:12. w15 9/15 5:16, 17

Unsay imong mahimo aron magpabiling lig-on ang imong pagtuo? Ayaw pagkakontento sa imo lang nakat-onan sa wala pa ka mabawtismohi. (Heb. 6:1, 2) Tun-i ang natumang mga tagna sa Bibliya kay kana makahatag nimog lig-ong mga rason sa pagbatog pagtuo. Puwede sab nimong gamiton ang Pulong sa Diyos ingong sukdanan sa pagtino kon lig-on ba gyod ang imong pagtuo. (Sant. 1:25; 2:24, 26) Giingnan ni apostol Pablo ang mga isigka-Kristohanon nga puwede silang ‘magdinasigay pinaagi sa pagtuo sa tagsatagsa.’ (Roma 1:12) Samtang kita makig-uban sa mga isigkamagsisimba, kita maglinig-onay sa pagtuo sa usag usa, ilabina kon makig-uban ta niadtong nakapakita nag “sinulayang kalidad” sa ilang pagtuo. (Sant. 1:3) Ang daotang panagkauban makapahuyang sa pagtuo, pero ang maayong panagkauban makapalig-on niana. (1 Cor. 15:33) Kana ang usa ka rason kon nganong gitambagan ta nga dili talikdan “ang atong mga panagkatigom.”—Heb. 10:24, 25. w15 10/15 2:2, 8, 9

Kita nagkinahanglag panahon sa pagpamalandong samtang mangandam sa pagdumalag pagtuon sa Bibliya. Hunahunaa ang imong gitun-an sa Bibliya ug pangitag pangutana o ilustrasyon nga makatabang niya nga mouswag. Ang panahon nga gigugol nianang paagiha mapuslanon kaayo, kay ang pagpamalandong niining mga butanga makapalig-on sa atong pagtuo ug motabang kanato nga mahimong epektibo ug madasigon sa atong pagdumalag mga pagtuon sa Bibliya. Makabenepisyo usab kita kon atong andamon ang atong kasingkasing sa dili pa mosangyaw. (Esd. 7:10) Ang pagbasag usa ka kapitulo sa Mga Buhat ‘makasugnib’ sa atong kadasig sa ministeryo. Ang pagpamalandong sa mga teksto nga gusto natong gamiton nianang adlawa ug sa mga publikasyon nga atong itanyag motabang kanato sa pagtuman sa atong pribilehiyo sa pag-alagad. (2 Tim. 1:6) Hunahunaa ang mga tawo sa inyong teritoryo ug kon unsay lagmit makapainteres kanila. Ang maong pagpangandam makatabang kanato nga mahimong epektibo sa pagsangyaw “pinaagig pagpasundayag sa espiritu ug sa gahom” gikan sa Pulong sa Diyos.—1 Cor. 2:4. w15 10/15 4:9

Pangutan-a ang imong kaugalingon: ‘Unsay lagmit makahaylo sa akong anak sa pagtan-awg pornograpiya? Nahibalo ba siya kon nganong peligroso kaayo kana? Dali ba kong duolon aron dili siya magpanuko sa pagpangayog tabang kanako kon ugaling matental siya sa pagtan-awg pornograpiya?’ Bisag bata pa ang imong anak, makaingon ka kaniya: “Kon makakita kag imoral nga website ug morag matental ka sa pagtan-aw ana, ayaw pagduhaduha sa pagduol ug pagpakigsulti nako. Ayawg kaulaw. Gusto kong motabang nimo.” Ang pagsabot motabang usab kanimo nga magmaalamon sa pagpilig kalingawan. “Ang gipili namo nga musika, pelikula, o mga basahon mao poy gipili sa among mga anak,” miingon ang usa ka amahan nga si Pranas. “Daghan kag ikasulti bahin sa lainlaing butang, apan ang imong mga anak maniid kon unsay imong ginabuhat ug sila mosundog nimo.” Kon makita sa imong mga anak nga maampingon kang nagpili ug hinlong kalingawan, lagmit matukmod sila sa pagsundog kanimo.—Roma 2:21-24. w15 11/15 1:12-14

Karon, gihatagag dakong pagtagad ang publikong pagsangyaw: diha sa mga hunonganag bus, estasyon sa tren, parkinganan, plasa, ug merkado. Kon mahadlok kang makigbahin niini nga pamaagi sa pagsangyaw, iampo kini ug palandonga ang giingon sa dugay nang nagapanawng magtatan-aw nga si Angelo Manera, Jr.: “Among giisip ang matag bag-ong pamaagi sa pagsangyaw ingong laing paagi sa pag-alagad kang Jehova, laing paagi sa pagpamatuod sa among pagkamaunongon kaniya, laing pagsulay sa among integridad, ug mahinamon namong gipamatud-an nga andam ming moalagad kaniya sa bisan unsang paagi nga gusto niya.” Ang pagpakigbahin sa usa ka bag-ong pamaagi sa pagsangyaw, nga tingali lahi sa atong naandan, makatabang nato sa pagbatog pagtuo ug pagsalig kang Jehova, nga makapauswag sa atong espirituwalidad. (2 Cor. 12:9, 10) Daghang magmamantala ang malipayng mopahibalo sa mga tawo sa atong website nga jw.org. Kini nakatabang aron masangyawan ang mga tawo sa maayong balita, bisan sa hilit nga mga dapit. w15 11/15 5:12, 13, 15

Kaniadto, ang New World Translation nagsunod sa sumbanan sa ubang Iningles nga mga Bibliya nga naggamit sa Hebreohanong ekspresyon nga “Sheol” diha sa mga teksto sama sa Ecclesiastes 9:10. Kini ang problema sa mga maghuhubad sa ubang pinulongan: Ang terminong “Sheol” dili masabtan sa kadaghanang magbabasa, dili makita sa diksiyonaryo, ug masaypan ingong ngalan sa usa ka lugar. Busa, alang sa 2013 nga edisyon, giaprobahan nga himoong tin-aw ang kahulogan sa “Sheol” ug sa katumbas nga Gregong terminong “Hades” pinaagi sa tukmang paghubad niini ingong “the Grave,” o lubnganan. Giilisan usab ang karaang Iningles nga mga ekspresyon, ug gipaningkamotan nga mahimong mas klaro ug daling masabtan ang mga teksto, pero tukma gihapon. Ang gihimo sa ubang pinulongan nakapahait, o nakapahimo, sa Iningles nga teksto nga daling masabtan. w15 12/15 2:10, 12

Kon kita masakit, kita makalaom sa Diyos alang sa kahupayan, kaalam, ug tabang, sama sa matuod nga mga magsisimba kaniadto. Nahibalo sab ta nga ang usa ka tawo sa adlaw ni David nga mahunahunaon sa timawa namatay ra gihapon. Busa, sa dihang gisulat ni David ang teksto karong adlawa, wala siya magpasabot nga ang maong mahunahunaong tawo padayong mabuhi sa milagrosong paagi, ug mabuhi sa walay kataposan. Ang maong inspiradong mga pulong nagkahulogan nga ang Diyos motabang sa maunongon ug mahunahunaong tawo. Sa unsang paagi? Si David nagpatin-aw: “Si Jehova magpalig-on kaniya sa ibabaw sa higdaanan sa balatian; ang tibuok niyang higdaanan imong bag-ohon gayod sa panahon sa iyang pagkasakit.” (Sal. 41:3) Oo, ang tawo nga nagmahunahunaon sa mga timawa makaseguro nga nakita sa Diyos ang iyang kahimtang ug ang iyang pagkamatinumanon. Ug ang hinatag sa Diyos nga lawas, nga may kapasidad nga maulian, mahimong makatabang niya nga maayo sa iyang sakit. w15 12/15 4:7

Ang gitumong ni Pablo dinhi mao ang mga igsoon nga gibilanggo tungod sa ilang pagtuo. Dihang gisulat niya kini ngadto sa Hebreohanong mga Kristohanon, mga upat ka tuig na siyang nabilanggo. (Filip. 1:12-14) Iyang gikomendahan ang mga igsoon kay sila “nagpahayag ug simpatiya kanila nga anaa sa bilanggoan.” (Heb. 10:34) Kadtong maong Hebreohanong mga Kristohanon layo kaniya. Busa giunsa nila siya paghinumdom? Pinaagi sa ilang sinserong mga pag-ampo alang kaniya. (Heb. 13:18, 19) Karon, daghan kanato ang layo sa atong mga igsoon nga nabilanggo. Tingali dili nato mahatag ang praktikal nga tabang nga nahimo sa mga Saksi nga nagpuyo duol sa prisohan. Pero atong ikapakita ang simpatiya ug inigsoong gugma pinaagi sa kanunayng paghinumdom niining matinumanong mga igsoon ug paglakip kanila sa atong mga pag-ampo, nga mangamuyo kang Jehova para kanila. w16.01 1:13, 14

Ang katuyoan sa Diyos sa katawhan mao nga sila mabuhi sa walay kataposan sa yuta. (Gen. 1:28; Sal. 37:29) Usa ka talagsaong kahikayan ang pagpilig pipila ka tawo aron mahimong mga hari ug saserdote sa langit. Kini nga pagkatinawag magpahinabog dakong kausaban sa panghunahuna, tinamdan, ug paglaom sa maong tawo dihang siya mahimong dinihogan. (Efe. 1:18) Sa unsang paagi mahibaloan sa usa nga duna siyay langitnong pagkatinawag, ug nga siya nakadawat niining talagsaong timaan? Ang tubag tin-awng makita sa gipamulong ni Pablo sa dinihogang mga igsoon sa Roma, kinsa “gitawag aron mahimong mga balaan.” Siya miingon: “Kamo wala makadawat ug espiritu sa pagkaulipon nga nagpahinabog kahadlok pag-usab, apan kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’” (Roma 1:7; 8:15) Sa simpleng pagkasulti, pinaagi sa balaang espiritu, tin-awng gipakita sa Diyos sa maong tawo nga siya gidapit nga mahimong manununod sa Gingharian.—1 Tes. 2:12. w16.01 3:8, 9

Unsaon nato pagpakitag nahiangayng pagtahod niadtong gidihogan ni Jehova? Dili ta mangutana nila kon sa unsang paagi sila nahimong dinihogan. Sa ingon, malikayan nato ang pagpanghilabot sa mga butang nga wala tay labot. (2 Tes. 3:11) Dili ta angayng maghunahuna nga dinihogan usab ang ginikanan, kapikas, o ubang paryente sa usa nga dinihogan. Kini nga paglaom dili mapanunod ni mabatonan pinaagig kaminyoon. (1 Tes. 2:12) Likayan sab nato ang pagpangutana sa kapikas sa mga dinihogan kon unsay ilang gibati sa pagkahibalo nga dili na nila makauban sa Paraiso ang ilang kapikas. Imbes mosuknag mga pangutana nga tingali makapasakit, kitang tanan makasalig nga si Jehova magbukhad sa iyang kamot ug ‘magtagbaw sa tinguha sa tanang buhing butang.’ (Sal. 145:16) Kon atong trataron ang mga dinihogan sa hustong paagi, kita mapanalipdan gikan sa mga ‘mini nga mga igsoon’ nga nagpakaaron-ingnong dinihogan, nga posibleng makasulod sa kongregasyon.—Gal. 2:4, 5; 1 Juan 2:19. w16.01 4:10, 11