Agosto

Tungod kay iyang nabatasan ang pagsugot kang Jehova bisan sa daw gagmayng butang, napalig-on ni Abraham ang iyang panaghigala sa Diyos. Dali ra niyang nasulti kang Jehova kon unsay iyang gibati, nga nangayog tabang dihang may mga butang nga wala niya masabti. Pananglitan, dihang nahibaloan niya nga laglagon sa Diyos ang mga siyudad sa Sodoma ug Gomora, nabalaka si Abraham nga ang mga matarong maapil ug kalaglag sa mga daotan. Tingali nabalaka siya sa iyang pag-umangkong si Lot ug sa pamilya niini, kinsa nagpuyo sa Sodoma. Si Abraham nangutana nga may dakong pagpaubos ug pagsalig sa Diyos, “ang Maghuhukom sa tibuok yuta.” Mapailobong gitudloan ni Jehova si Abraham kon unsa Siya ka maluluy-on, nga makabasa sa kasingkasing ug nangitag mga matarong nga luwason, bisan panahon sa paghukom. (Gen. 18:22-33) Klaro nga ang tanang kahibalo ug kasinatian ni Abraham nakatabang niya sa pagpalig-on sa iyang panaghigala kang Jehova. w16.02 1:11, 12

Sagad makadayeg kita sa tawong maunongon. Apan, duna tay masayloan nga hinungdanong leksiyon kon magpokus kita sa pagkamaunongon ni Jonatan kang David nga dili konsiderahon ang iyang pagkamaunongon sa Diyos. Nganong giisip man ni Jonatan si David ingong higala imbes karibal? Ang pagkamaunongon sa Diyos maoy panguna diha sa kasingkasing ni Jonatan. Gani, ang iyang pagkamaunongon kang Jehova maoy hinungdan nga nagmaunongon siya kang David. Ug silang duha nagtuman sa ilang panumpa. Ingong mga Kristohanon, wala lang kita makadayeg sa pagkamaunongon sa uban; kita usab nagmaunongon sa atong pamilya, mga higala, ug isigkamagsisimba. (1 Tes. 2:10, 11) Pero labaw sa tanan, kinahanglan tang magmaunongon kang Jehova kay siya ang naghatag natog kinabuhi. (Pin. 4:11) Ang maong pagkamaunongon maghatag kanatog tinuod nga kalipay ug katagbawan. Pero aron mapamatud-an nato ang atong pagkamaunongon sa Diyos, kinahanglang dili ta mobiya kaniya bisan pa sa mga kalisdanan. w16.02 3:3, 4

Ang usa ka hamtong nga batan-on lig-on ug baroganan. Dili siya mogawi nga higala sa Diyos diha sa Kingdom Hall pero higala sa kalibotan diha sa eskuylahan. Magpabiling lig-on ang iyang pagtuo bisan panahon sa pagsulay. (Efe. 4:14, 15) Siyempre, walay tawong hingpit. Ang mga batan-on ingon man ang mga hamtong masayop matag karon ug unya. (Eccl. 7:20) Bisan pa niana, kon nagplano kang magpabawtismo, maayong susihon nimo kon unsa ka lig-on ang imong determinasyon nga mosunod sa mga sukdanan ni Jehova. Pangutan-a ang imong kaugalingon, ‘Ako na bang gipakita nga nagsunod ko sa mga sukdanan sa Diyos?’ Hunahunaa kon giunsa nimo pag-atubang ang dili pa dugayng mga pagsulay. Imo bang gipakita nga makahimo ka sa pag-ila kon unsay husto ug sayop? Komosta kon, sama kang Daniel, giisip kang espesyal diha sa kalibotan ni Satanas tungod sa imong mga katakos? Padayon ba nimong ‘sabton kon unsa ang kabubut-on ni Jehova’ bisag lahi kini sa imong gustong buhaton?—Efe. 5:17. w16.03 1:7-9

Kita nagkinabuhi sa gitawag sa Bibliya nga “kataposang mga adlaw,” ug hapit na natong masinati ang kasakitan nga wala pa mahitabo sukad. (2 Tim. 3:1) Dugang pa, si Satanas ug ang iyang mga demonyo gipapahawa sa langit ug gitambog sa yuta, nga miresultag grabeng pag-antos sa katawhan. (Pin. 12:9, 12) Kita gisugo usab nga makigbahin sa buluhatong pagsangyaw nga karon nakaabot na sa mas daghang tawo ug pinulongan kay sukad masukad! Aron padayong madawat ang mga panalangin sa Diyos, kinahanglan tang mosunod sa tanang instruksiyon nga gitagana pinaagi sa Kristohanong kongregasyon. Kon magmasinugtanon kita karon, mas sayon na alang kanato ang pagsunod sa mga instruksiyon panahon sa “dakong kasakitan,” dihang laglagon na ang daotang sistema ni Satanas. (Mat. 24:21) Human niana, kita magkinahanglag bag-ong mga instruksiyon alang sa pagkinabuhi sa bag-ong kalibotan. w16.03 4:16, 18

Hinapos sa unang siglo C.E., si Juan nakakita diha sa panan-awon ug pito ka manulonda, nga ang matag usa naghuyop ug trompeta. Dihang ang ikalimang manulonda mihuyop sa iyang trompeta, nakita ni Juan ang “usa ka bituon” nga nahulog gikan sa langit. Ang “bituon” nagkupot ug yawi nga maoy iyang giabli sa kahiladman. Miutbo ang mabagang aso, ug gikan niini nanggula ang mga dulon. Imbes daoton ang mga tanom, ang simbolikong mga dulon mihugpa sa “mga tawo . . . nga walay timbre sa Diyos diha sa ilang mga agtang.” (Pin. 9:1-4) Walay duhaduha nga si Juan nahibalo kon unsa ka dako ang kadaot nga mahitabo kon mohugpa ang mga dulon. Dili ba mihugpa ang mga dulon sa Ehipto sa adlaw ni Moises? (Ex. 10:12-15) Ang mga dulon nga nakita ni Juan nag-ilustrar sa dinihogang mga Kristohanon nga nagmantala sa masakit nga mensahe sa paghukom. Miduyog kanila ang minilyon nga may yutan-ong paglaom. Kay nahiusa ta sa pagsangyaw, mihuyang ang impluwensiya sa bakak nga relihiyon nga gikontrolar ni Satanas. w16.03 3:3

Aron matino kon unsa ka dako ang impluwensiya sa kamatuoran diha sa hunahuna ug panggawi sa dili kaayo eksperyensiyadong brader, mahimo siyang pangutan-on sa ansiyano, ‘Sa unsang paagi ang imong dedikasyon kang Jehova nakapabag-o sa imong paagi sa pagkinabuhi?’ Kana mahimong motultol sa panaghisgot bahin sa kon unsaon pag-alagad kang Jehova nga bug-os kalag. (Mar. 12:29, 30) Tingali sa kataposan sa maong panaghisgot, mahimong mag-ampo ang ansiyano uban sa brader, nga maghangyo kang Jehova nga hatagan ang brader ug balaang espiritu nga gikinahanglan sa iyang pagbansay. Makapalig-on sa brader nga madungog ang pag-ampo sa ansiyano alang kaniya! Sa sinugdan, puwedeng maghisgot ang ansiyano ug mga asoy sa Bibliya nga makatabang sa tinun-an nga masabtan nga siya kinahanglang kasaligan, mapainubsanon, ug andam modawat ug responsabilidad. (1 Hari 19:19-21; Neh. 7:2; 13:13; Buh. 18:24-26) Ang maong mga hiyas hinungdanon sa tinun-an sama nga ang abono hinungdanon sa yuta. Kini makapadali sa iyang pag-uswag ug makatabang nga ‘mabuka ang iyang mata’ sa “katingalahang mga butang” sa Pulong sa Diyos. w15 4/15 2:3, 4

Ang regular nga pagpakigkomunikar kang Jehova importante sa pagpakigsuod kaniya. Sa unsang paagi nimo kini himoon? Imong maestorya si Jehova pinaagi sa kanunayng pag-ampo. (Sal. 142:2) Ug imong gitugotan si Jehova nga makig-estorya nimo dihang regular kang magbasa sa iyang sinulat nga Pulong ug mamalandong niini. (Isa. 30:20, 21) Kon espesipiko ang imong pag-ampo, mas makita nimo ang tubag ni Jehova, bisag dili kaayo kini dayag. Dihang matubag ang imong mga pag-ampo, mas tinuod si Jehova kanimo. Dugang pa, kon imong ipahayag kang Jehova ang imong mga kabalaka, mas masuod ka kaniya. Maugmad nato ang mas suod nga relasyon kang Jehova sa tibuok natong kinabuhi. Mohimo gayod kitag mga paagi sa pagpakigsuod sa Diyos aron mohimo usab siyag mga paagi sa pagpakigsuod kanato. Hinaot nga regular kitang makigkomunikar sa Diyos pinaagi sa pagtuon sa Bibliya ug pag-ampo. Kon buhaton nato kini, ang atong mas lig-ong relasyon kang Jehova makatabang nato sa paglahutay sa mga pagsulay. w15 4/15 3:3, 14, 16

Pagkahaom kana nga kahubitan sa mabangis nga kinaiya ni Satanas! Bisag ang tibuok kalibotan nailalom na sa iyang gahom, gusto pa niyang mamiktima. Gusto gayong tukbon ni Satanas ang katawhan ni Jehova. Ang mga paglutos nga gipahamtang niya sa mga sumusunod ni Jesus sukad sa unang siglo ug hangtod karon maoy ebidensiya sa mabangis niyang kinaiya. Ang gutom kaayong leyon walay kaluoy sa iyang tukbonon. Kini dili maluoy inigtukob sa biktima, ni makonsensiya kini pagkahuman niana. Sa susama, si Satanas walay kaluoy sa iyang tukbonon. Pananglitan, unsa kahay gibati ni Satanas matag higayon nga makita niyang nahaylo ang mga Israelinhon sa paghimog sala sama sa seksuwal nga imoralidad ug kadalo? Mahanduraw ba nimo si Satanas nga naglipay dihang naagoman sa imoral nga si Zimri ug sa dalo nga si Gehazi ang makapasubong resulta sa ilang gihimo?—Num. 25:6-8, 14, 15; 2 Hari 5:20-27. w15 5/15 1:8, 9

Sa unsang paagi nato masuklan si Satanas ug magmadaogon? Giingnan ni Jesus ang iyang mga tinun-an: “Pinaagi sa paglahutay sa inyong bahin mabatonan ninyo ang inyong mga kalag.” (Luc. 21:19) Dili makapahinabog permanenteng kadaot ang bisan unsa nga buhaton sa tawo kanato. Walay makabungkag sa atong bililhong pagpakighigala sa Diyos gawas kon tugotan nato kanang mahitabo. (Roma 8:38, 39) Bisan pag mamatay ang pipila ka alagad ni Jehova, wala kini magpasabot nga nagmadaogon si Satanas, kay banhawon sila ni Jehova! (Juan 5:28, 29) Sa laing bahin, dulom ang kaugmaon ni Satanas. Human sa kalaglagan sa iyang dili diyosnong sistema, si Satanas bilanggoon sa kahiladman sulod sa 1,000 ka tuig. (Pin. 20:1-3) Sa kataposan sa Usa ka Libo ka Tuig nga Pagmando ni Jesus, si Satanas “pagabuhian [sa makadiyot] gikan sa iyang bilanggoan” aron himoon ang kataposang pagpahisalaag sa hingpit nga katawhan. Human niana, ang Yawa pagalaglagon. (Pin. 20:7-10) Si Satanas wala nay paglaom, pero ikaw naa! Barog batok kang Satanas, lig-ona ang imong pagtuo. (1 Ped. 5:9) Makasukol ka kang Satanas ug magmadaogon! w15 5/15 2:1, 18

Ang maalamong tawo nahibalo nga ang paghanduraw mahimong samag kalayo. Kon gamiton ang kalayo sa hustong paagi, kini mapuslanon. Pananglitan, kini makalutog pagkaon. Pero kon dili makontrolar ang kalayo, kini makasunog sa tibuok balay ug makapatay sa mga nagpuyo niana. Sa susama, ang paghanduraw mapuslanon kon makatabang kini kanato sa pagsundog kang Jehova. Apan, kini makadaot kon sugnoran niini ang imoral nga mga tinguha. Pananglitan, kon nabatasan nato ang paghunahuna bahin sa daotang mga butang, mahimong motultol kini sa pagpakasala. Sa pagkatinuod, ang paghanduraw bahin sa imoral nga mga butang mahimong makamatay sa espirituwal! (Sant. 1:14, 15) Si Jesus nagpasidaan batok sa paghanduraw sa imoral nga panggawi. Siya miingon: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.”—Mat. 5:28. w15 5/15 4:11, 12, 14

Sa iyang pagwali, makita nato ang tinuod nga kahingawa ni Jesus sa mga tawo. Sa usa ka higayon, nahibalag ni Jesus ang usa ka tawo nga makaluluoy kaayong tan-awon. (Mar. 1:39, 40) Kini may grabeng sakit nga sanla. Sa pagpamatuod kon unsa ka grabe ang sakit sa maong tawo, ang doktor nga si Lucas naghubit kaniya ingong “punog sanla.” (Luc. 5:12) “Sa nakakita [ang sanlahon] kang Jesus mihapa siya ug nagpakiluoy kaniya, nga nag-ingon: ‘Ginoo, kon buot mo lamang, ikaw makahinlo kanako.’” Masaligon ang tawo nga may gahom si Jesus sa pag-ayo kaniya, pero gusto niyang mahibaloan kon buot ba ni Jesus nga ayohon siya. Unsay tubag ni Jesus sa maong kinasingkasing nga hangyo? Gituy-od ni Jesus ang iyang kamot, gihikap ang sanlahon, ug pinaagi sa malumong tingog, iya kining gipasaligan: “Buot ko. Mamahinlo ka.” Dihadiha “nahanaw ang sanla gikan kaniya.” (Luc. 5:13) Oo, gipakita ni Jesus kon unsa ka dako ang iyang gugma sa mga tawo.—Luc. 5:17. w15 6/15 2:3-5

Kon andam tang magpatambag sa usa ka hamtong nga Kristohanon, malikayan nato nga ipakamatarong ang bisan unsang sayop nga tinguha. (Heb. 3:12, 13) Ang pagpakig-estorya bahin sa atong kahuyangan ngadto sa hamtong nga igsoon makatabang nato nga makit-an kon unsay angayng bag-ohon sa atong kaugalingon. Kini makatabang nato sa pagpabilin diha sa gugma ni Jehova. Ang mga ansiyano ilabinang kuwalipikado nga motabang kanato. (Sant. 5:13-15) Importante ang pagpangayog tabang kon ang hinungdan sa imoral nga mga tinguha mao ang mahugawng bisyo sa pagtan-awg pornograpiya. Kon dili ka dayon mangayog tabang, mas dako ang purohan nga ang mahugawng mga tinguha ‘manamkon ug manganak ug sala’ nga moresultag kasakit sa uban ug makapasipala sa ngalan ni Jehova. Ang tinguha nga pahimut-an si Jehova ug magpabilin diha sa Kristohanong kongregasyon nakapalihok sa daghang alagad niya nga dawaton ang mahigugmaong tabang.—Sant. 1:15; Sal. 141:5; Heb. 12:5, 6. w15 6/15 3:15-17

Ang kalaglagan ba sa mga relihiyon sa Dakong Babilonya moresulta sa kamatayon sa tanang membro niini? Dayag nga dili. Ang pipila ka klero mobiya sa ilang relihiyon ug molimod nga bahin sila niana kaniadto. (Zac. 13:5, 6) Unsay mahitabo sa katawhan sa Diyos nianang panahona? Si Jesus nagsaysay: “Sa pagkatinuod, gawas kon kanang mga adlawa pamub-on, walay unod nga maluwas; apan tungod sa mga pinili kanang mga adlawa pagapamub-on.” (Mat. 24:22) Niadtong 66 C.E., ang kasakitan ‘gipamubo.’ Kini nagtugot sa “mga pinili,” ang dinihogang mga Kristohanon, sa pagkalagiw gikan sa siyudad ug sa palibot niini. Sa susama, ang sinugdanan sa dakong kasakitan “pagapamub-on” tungod sa “mga pinili.” Ang politikal nga “napulo ka sungay” dili tugotan sa paglaglag sa katawhan sa Diyos. (Pin. 17:16) Hinunoa, adunay daklit nga paghunong. w15 7/15 2:5, 6

Anaa ra sa matag indibiduwal kon tugotan ba niya ang iyang kaugalingon nga matental o dili. (Mat. 6:13; Sant. 1:13-15) Kon bahin kang Jesus, gisalikway dayon niya ang matag tentasyon sa Yawa pinaagi sa paggamit ug haom nga mga teksto gikan sa Pulong sa Diyos. Sa ingon, midapig siya sa pagkasoberano sa Diyos. Pero wala mosurender si Satanas. Siya nangitag “laing angay nga higayon.” (Luc. 4:13) Padayong gisuklan ni Jesus ang mga paningkamot ni Satanas sa pagbungkag sa iyang integridad. Apan, si Satanas naningkamot sa paglit-ag sa mga sumusunod ni Jesus, lakip kanimo. Tungod kay wala pa mahusay ang isyu maylabot sa pagkasoberano sa Diyos, gitugotan ni Jehova ang Maninental sa paggamit niining kalibotana sa pagtental kanato. Ang Diyos dili magdala kanato ngadto sa tentasyon. Sa kasukwahi, siya may pagsalig kanato ug buot niya nga tabangan kita. Pero agig pagtahod sa atong kagawasan sa pagpili, si Jehova dili awtomatikong mopugong kanato sa pagpakasala. Kinahanglang himoon nato ang duha ka butang—magtukaw sa espirituwal ug magpadayon sa pag-ampo. w15 6/15 5:13, 14

Kinahanglang bansayon sa mga Kristohanon ang ilang hunahuna ug konsensiya aron kanunay silang makapabiling neyutral. (Roma 14:19) Hunahunaa pananglitan si Mirjeta nga gikan sa rehiyon sa kanhing nasod sa Yugoslavia. Nagdako siya nga nagdumot sa mga taga-Serbia. Pagkahibalo niya nga dili mapihigon si Jehova ug nga si Satanas ang responsable sa panag-away sa rasa, siya naningkamot nga wagtangon ang iyang pagkanasyonalistiko. Apan dihang may nahitabong away sa rasa sa ilang lugar, mibalik ang iyang kayugot sa mga taga-Serbia, ug dili na gani siya ganahang mosangyaw nila. Apan naamgohan niyang dili igo nga maghulat lang siya nga mawala ang sayop nga pagbati. Busa, gihangyo niya si Jehova nga tabangan siya sa pagsagubang niana. “Akong nadiskobrehan nga dakog tabang ang pagpokus diha sa ministeryo,” siya miingon. “Diha sa ministeryo, naningkamot ko sa pagsundog sa mahigugmaong personalidad ni Jehova, ug anam-anam nga nawala ang akong negatibong pagbati.” w15 7/15 3:11-13

Tagda ang kahimtang ni Haring Jehosapat sa Juda. Sa usa ka higayon, si Jehosapat nakahimo ug sayop nga desisyon pinaagi sa pagduyog kang Haring Ahab sa Israel sa pagpakiggubat. Bisag 400 ka mini nga manalagna ang nagpasalig sa daotang si Ahab nga siya modaog, ang matuod nga manalagna ni Jehova nga si Micaias nagtagna ug seguradong kapildihan. Si Ahab namatay sa panggubatan, ug si Jehosapat hapit mamatay. Pagbalik ni Jehosapat sa Jerusalem, gibadlong siya tungod sa iyang pagpakig-alyansa kang Ahab. Bisan pa niana, si Jehu, nga anak ni Hanani nga bisyonaryo, miingon kang Jehosapat: “Adunay maayong mga butang nga nakaplagan diha kanimo.” (2 Cron. 18:4, 5, 18-22, 33, 34; 19:1-3) Oo, si Jehosapat nakahimog sayop nga desisyon, pero wala malimot si Jehova sa maayong mga butang nga iyang nahimo. (2 Cron. 17:3-10) Kini nga asoy magpahinumdom kanato nga bisan pa sa atong pagkadili-hingpit, dili molubad ang gugma ni Jehova kanato kon kita maningkamot sa pagpahimuot kaniya. w15 8/15 1:8, 9

Unsaon nato pagpangandam karon alang sa kinabuhi sa bag-ong kalibotan sa Diyos? Aw, ibutang ta nga nagplano tang mobalhin sa laing nasod. Sa unsang paagi kita mangandam? Tingali magsugod kita pinaagi sa pagkat-on sa pinulongan ug kostumbre sa mga tawo nga nagpuyo didto. Puwede natong tilawan ang pipila sa ilang mga pagkaon. Sa usa ka sukod, mahimo tang magkinabuhi nga daw tua na didto. Kay pag-abot nato didto, ingon man gyod niana ang atong buhaton. Sa susama, makapangandam kita karon alang sa kinabuhi sa bag-ong kalibotan kon karon pa lang magkinabuhi na kita nga daw tua na didto. Gipalabi sa pipila ang pagkaindependente ug dili makataronganong pag-insistir sa gusto, pero unsay resulta? Ang ilang pagsalikway sa giya sa Diyos miresultag pag-antos, kasakit, ug trahedya pa gani. (Jer. 10:23) Pagkanindot unya sa panahon dihang ang tanang tawo magpasakop sa mahigugmaong pagmando ni Jehova! w15 8/15 3:4, 5

Ang mga Kristohanon nga gustong magminyo angay gayong mag-amping sa ilang pagpilig pakig-ubanan. Ang Bibliya nagtambag sa mga alagad sa Diyos kinsa nangitag kapikas nga magminyo ‘diha lamang sa Ginoo,’ sa ato pa, makigminyo lamang sa dedikado, bawtismadong magsisimba ni Jehova kinsa nagkinabuhi sumala sa mga pagtulon-an sa Kasulatan. (1 Cor. 7:39) Kon ang usa maminyog isigkamagtutuo, siya makabatog kapikas nga dedikado kang Jehova ug motabang kaniya sa paghupot sa iyang integridad. Si Jehova nahibalo kon unsay labing maayo alang sa iyang mga alagad, ug wala mausab ang iyang panglantaw bahin sa kaminyoon. Matikdi ang iyang klarong sugo sa Israel pinaagi kang Moises. Maylabot sa mga molupyo sa palibot nga mga nasod—mga tawo nga wala mag-alagad kang Jehova—ang mga Israelinhon gisugo: “Dili ka makig-alyansa sa kaminyoon uban kanila. . . . Kay [ilang] italikod ang imong anak sa pagsunod kanako, ug sila tinong moalagad ug laing mga diyos.”—Deut. 7:3, 4. w15 8/15 4:12, 13

Unsaon man nato pagbansay ang atong tanlag? Ang hinungdanong mga paagi mao ang regular nga pagtuon sa Bibliya, pagpamalandong niana, ug pagpadapat sa atong nakat-onan. Klaro nga labaw pa kini sa pagtigom ug impormasyon ug pagkat-on sa mga lagda. Ang atong pagtuon sa Bibliya kinahanglang anam-anam nga maghatag natog tukmang kahibalo bahin kang Jehova, sa iyang personalidad, mga hiyas, gusto, ug dili gusto. Sa ngadtongadto, ang atong tanlag mopahiuyon sa pamaagi ni Jehova. Kini motandog sa atong kasingkasing ug mopalihok kanato sa pagsundog pa kaniya. Pero kon dili nato masabtan ang binase sa tanlag nga desisyon sa usa ka igsoon maylabot sa personal nga mga butang, dili nato siya angayng hukman dayon o pugson sa pag-usab sa iyang hunahuna. Tingali ang iyang tanlag “maluya” pa ug nagkinahanglag dugang pagbansay o sensitibo ra kaayo.—1 Cor. 8:11, 12. w15 9/15 2:4, 8, 10

Ang yuta lahi gayod sa tanang planeta nga gilalang sa Diyos. Hunahunaa lang, sa dili maihap nga mga planeta sa Milky Way ug sa ubang galaksiya, ang yuta lang ang gilalang ni Jehova nga kapuy-an ug mahimong komportable, matahom, ug luwas nga puy-anan sa tawo! (Isa. 45:18) Nagpakita kini sa kadako sa gugma ni Jehova kanato. (Job 38:4, 7; Sal. 8:3-5) Bisag gilalang ni Jehova ang usa ka matahom nga puy-anan alang kanato, siya nahibalo nga aron kita malipay ug matagbaw, nagkinahanglan tag labaw pa kay sa materyal nga mga tagana. Ang usa ka bata mobati gayong luwas kon iyang makita nga siya gihigugma ug giatiman sa iyang ginikanan. Gilalang ni Jehova ang tawo sa iyang larawan, nga naghatag kanilag katakos nga mobati ug mosanong sa iyang gugma ug pag-atiman. (Gen. 1:27) Dugang pa, si Jesus miingon: “Malipayon kadtong mahunahunaon sa ilang espirituwal nga panginahanglan.” (Mat. 5:3) Ingong mahigugmaong Amahan, si Jehova “dagayang naghatag kanato sa tanang butang [pisikal ug espirituwal] aron atong pagakalipayan.”—1 Tim. 6:17; Sal. 145:16. w15 9/15 4:6, 7

Ang salmista nagpakitag hustong tinamdan dihang siya misulat: “Paghulat sa Diyos, kay pagadayegon ko pa siya ingon nga akong dakong kaluwasan. Oh Diyos ko, nawad-an ug paglaom ang akong kalag sa sulod nako. Busa nahinumdom ako kanimo.” (Sal. 42:5, 6) Pagkadako sa iyang gugma ug pagsalig kang Jehova! Nakaugmad ka ba usab ug samang gugma ug pagsalig sa atong langitnong Amahan? Bisag motubag kag oo, mapadako pa nimo ang imong pagsalig kaniya sumala sa giingon sa Bibliya: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Prov. 3:5, 6) Kay si Jehova unang nahigugma kanato, gipakita niya kon unsaon nato siya paghigugma. (1 Juan 4:19) Hinaot nga kanunay natong hinumdoman ang iyang kinalabwang panig-ingnan. Ug hinaot nga padayon pa natong ipakita nga ato siyang gihigugma ‘sa tibuok natong kasingkasing, kalag, kaisipan, ug kusog.’—Mar. 12:30. w15 9/15 5:17-19

Dihang kita mosangyaw, dili lang ang pagtuo sa uban ang atong ginapalig-on kondili ang atoa usab. Sama sa unang mga Kristohanon, kita nakakat-on sa pagsalig kang Jehova sa bug-os ug sa pagsangyaw nga maisogon bisag unsa pay kahimtang. (Buh. 4:17-20; 13:46) Dihang atong makita kon giunsa ta pagtabang ni Jehova ug kon giunsa pagtubag ang atong mga pag-ampo, molig-on ang atong pagtuo. Tinuod kini kang Caleb ug Josue. Sila nagpakitag pagtuo kang Jehova dihang nangespiya sila sa Yutang Saad. Human niadto, mas milig-on pa ang ilang pagtuo matag higayon nga makita nila ang paggiya ni Jehova sa ilang kinabuhi. Dili ikatingala nga si Josue puwersadong miingon sa mga Israelinhon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas.” Sa ulahi, siya midugang: “Kahadloki si Jehova ug mag-alagad kaniya sa paaging walay-ikasaway ug sa kamatuoran.” (Jos. 23:14; 24:14) Dihang atong masulayan ang kaayo ni Jehova, maugmad usab nato ang susamang kombiksiyon.—Sal. 34:8. w15 10/15 2:10, 11

Magnota ka ba panahon sa pakigpulong publiko, asembliya, ug kombensiyon? Ang pagrepaso sa maong mga nota maghatag ug maayong kahigayonan sa pagpamalandong sa imong nakat-onan gikan sa Pulong sa Diyos ug sa iyang organisasyon. Dugang pa, ang matag gula sa Bantayanang Torre ug Pagmata! ug ang kinaulahiang giluwatan nga mga publikasyon panahon sa kombensiyon maghatag kanatog bag-ong mga impormasyon nga atong mabasa ug mapamalandong. Dihang magbasa ka sa Tinuig nga Basahon, makabenepisyo ka kon mohunong una ka ug mamalandong sa imong nabasa ug itisok kana sa imong kasingkasing. Basin gusto nimong badlisan ang importanteng mga punto o magnota sa daplin, nga mahimong makatabang nimo dihang mangandam sa pagbalikduaw, pag-shepherding, o sa pakigpulong. Labawng hinungdanon, ang paghunong ug pagpamalandong matag karon ug unya—samtang nagbasag mga publikasyon nga binase sa Bibliya—maghatag nimog kahigayonan nga masabtan ang impormasyon ug magpasalamat kang Jehova sa maayong mga butang nga imong nakat-onan. w15 10/15 4:9, 10

Usa sa labing makapalipay nga hitabo para sa mga ginikanan mao ang pagpabawtismo sa ilang anak. “Nalipay kaayo mi. Siyempre, mapasalamaton mi nga ang among mga anak gustong moalagad kang Jehova,” miingon si Berenice, kansang upat ka anak nabawtismohan sa wala pay 14 anyos. “Pero,” siya midugang, “nahibalo sab mi nga ingong mga tin-edyer ang among mga anak mag-atubag daghang problema.” Usa ka eksperto sa child psychology miingon: “Ang pagkabatan-on dili panahon sa ‘pagbinuang’ o ‘pagbinata.’ Kini maoy hinungdanong yugto sa pagbatog lalom nga mga pagbati, pagpakig-uban sa mga higala, ug pagmugnag mga butang.” Samtang tin-edyer pa sila, ang imong mga anak makaugmad ug suod nga relasyon kang Jehova, makatakda ug makapangab-ot ug mga tumong sa ministeryo, ug makadesisyon sa pagpahinungod ug pag-alagad kang Jehova. Sila mahimong mouswag sa espirituwal, sama sa gibuhat ni Jesus sa bata pa siya. w15 11/15 2:1, 2

Ang gugma sa Diyos sa katawhan madayag diha sa kahikayan nga iyang gihimo alang sa Mesiyanikong Gingharian. Si Jehova nakatudlo nag kuwalipikadong magmamando nga nahigugma sa katawhan, si Jesu-Kristo. (Prov. 8:31) Sa ilang pagkabanhaw, madala sa 144,000 nga kaubang magmamando ni Jesus sa langit ang ilang kasinatian ingong tawo. (Pin. 14:1) Ang Gingharian mao ang pangunang tema sa pagpanudlo ni Jesus, ug gitudloan niya ang iyang mga tinun-an nga iampo kana ug ang mga panalanging ipatungha niana. Ang tagna sa Bibliya nagpakita nga ang langitnong Gingharian sa Diyos natukod dihang nagsugod ang presensiya ni Kristo niadtong 1914. Sukad niadto, gitigom ang nahibilin sa kaubang mga magmamando ni Jesus sa langit ug ang “dakong panon” sa katawhan nga makalabang buhi sa kataposan niining sistemaha ug papuy-on sa bag-ong kalibotan.—Pin. 7:9, 13, 14. w15 11/15 3:16, 18

Si apostol Juan nagtawag sa unang kauban sa Diyos ingong “Pulong” ug “sinugdan sa kalalangan sa Diyos.” (Juan 1:1; Pin. 3:14) Gisulti ni Jehova nga Diyos ang iyang hunahuna ug pagbati ngadto niining panganayng Anak. (Juan 1:14, 17; Col. 1:15) Si apostol Pablo naghisgot bahin sa ‘pinulongan sa mga manulonda,’ usa ka langitnong matang sa komunikasyon nga mas labaw sa pinulongan sa tawo. (1 Cor. 13:1) Si Jehova nahibalo sa tanan maylabot sa bilyonbilyong intelihenteng linalang sa yuta ug sa langit. Siya makahimo sa pagpamati sa mga pag-ampo sa milyonmilyong tawo sa samang higayon, ug makasabot sa ilang mga pag-ampo bisag unsang pinulongan ang ilang gamiton. Samtang mamati siya sa maong mga pag-ampo, makigkomunikar sab siya sa langitnong mga linalang ug maghatag kanilag direksiyon. Aron mahimo kini, ang iyang hunahuna, pinulongan, ug paagi sa pagpakigkomunikar kinahanglang mas labaw kay nianang sa tawo. (Isa. 55:8, 9) Klaro nga si Jehova mogamit ug simpleng pinulongan dihang makigkomunikar sa mga tawo aron ilang masabtan ang iyang mensahe. w15 12/15 1:1, 2

Sa daghang nasod, ang Bibliya mahal ug pangitaòn kaayo, busa panalangin gayod kon makadawat ug Bibliya. Usa ka report sa Rwanda nag-ingon: “Sa dugayng panahon, daghang Bible study ang wala mouswag kay wala silay Bibliya. Dili sila makaarang sa pagpalit sa lokal nga edisyon sa simbahan. Ug sagad, dili kaayo sila makasabot sa kahulogan sa pipila ka bersikulo, nga nakapugong sa ilang pag-uswag.” Nausab ang kahimtang dihang nahubad ang New World Translation sa ilang pinulongan. Usa ka pamilya sa Rwanda nga may upat ka tin-edyer miingon: “Nagpasalamat gyod mi kang Jehova ug sa matinumanon ug maalamong ulipon sa paghatag namo niini nga Bibliya. Pobre kaayo mi ug dili mi makapalit ug Bibliya para sa matag membro sa pamilya. Pero karon, tagsatagsa na mig Bibliya. Aron ipakita ang among pagkamapasalamaton kang Jehova, ginabasa namo ang Bibliya kada adlaw ingong pamilya.” w15 12/15 2:15, 16

Lagmit kana gisulat ni David dihang gisulayag ilog ni Absalom ang trono samtang si David nasakit ug walay mahimo sa pagpugong niana. Bisag napasaylo na sa Diyos, wala malimot si David sa iyang sala uban kang Bat-seba ug sa mga sangpotanan niini. (2 Sam. 12:7-14) Bisan pa niana, segurado ang hari nga palig-onon siya sa Diyos panahon sa iyang pagkasakit. Si David wala moampo nga ayohon siya sa Diyos sa milagrosong paagi. Gipakita sa konteksto nga mihangyo si David nga tabangan siya ni Jehova sama sa pagtabang Niya sa tawong mahunahunaon sa timawa. Kana naglakip sa pagpalig-on kaniya sa “higdaanan sa balatian.” (Sal. 41:3) Kay si David napasaylo na sa iyang sala, siya makahangyo nga hupayon ug tabangan siya sa Diyos. Makahangyo sab siya nga ang iyang lawas, nga may natural nga kapasidad nga maulian, motabang niya nga maayo sa iyang sakit. (Sal. 103:3) Mahimo usab nato kana. w15 12/15 4:8, 9

Kadtong nakadawat niining talagsaong pagdapit gikan sa Diyos wala magkinahanglag pamatuod gikan sa uban nga gidihogan sila. Ipahinabo ni Jehova nga dili sila magduhaduha sa ilang pagkatinawag. Gisultihan ni apostol Juan ang dinihogang mga Kristohanon: “Kamo gidihogan sa usa nga balaan; kamong tanan adunay kahibalo.” Siya midugang: “Bahin kaninyo, ang pagdihog nga inyong nadawat gikan kaniya magpabilin diha kaninyo, ug kamo wala magkinahanglan ni bisan kinsa nga magtudlo kaninyo; hinunoa, ingon nga ang pagdihog gikan kaniya nagtudlo kaninyo bahin sa tanang butang, ug maoy tinuod ug dili bakak, ug ingon nga kini nagtudlo kaninyo, magpabilin kamo nga nahiusa kaniya.” (1 Juan 2:20, 27) Sama sa uban, sila nagkinahanglag espirituwal nga instruksiyon. Pero wala sila magkinahanglan kang bisan kinsang tawo nga mopamatuod sa ilang pagkadinihogan. Ang labing gamhanang puwersa sa uniberso maoy nagpamatuod niana kanila! w16.01 3:9, 10

Ang pagsalig kang Jehova makatabang aron kita magmakontento. Ang pagkakontento motabang nato sa pagbaton ug balanseng panglantaw sa materyal nga mga butang. (1 Tim. 6:6-8) Makatabang kini kanato nga masabtan nga ang atong relasyon kang Jehova ug sa mga igsoon mas importante pa kay sa bisan unsa nga mapalit sa kuwarta. Ang tawong kontento dili reklamador, bagulbolan, o hinawayon. Dili sab siya magpadala sa kasina ug kahakog—mga pagbati nga makapugong sa pagpakitag inigsoong gugma. Hinunoa, siya mahinatagon. (1 Tim. 6:17-19) Dugang pa, ang atong pagsalig kang Jehova mohatag nato ug kaisog sa pag-atubang sa bisan unsang kalisdanan. (Heb. 13:6) Kini nga kaisog, sa baylo, motabang nato sa pagbaton ug positibong tinamdan ug atong mapalig-on ug mahupay ang atong mga igsoon. (1 Tes. 5:14, 15) Bisan panahon sa dakong kasakitan, kita ‘makatindog nga tul-id ug makahangad sa atong mga ulo,’ kay nahibalo kita nga duol na ang atong kaluwasan.—Luc. 21:25-28. w16.01 1:16, 17

Sa di pa dugayng katuigan, miuswag ang gidaghanon niadtong nakig-ambit panahon sa Memoryal sa kamatayon ni Kristo, samtang sa miaging mga dekada mius-os ang ilang gidaghanon. Angay ba tang mabalaka niini? Dili. Atong hisgotan ang pipila ka butang nga angay natong hinumdoman. Kadtong nag-ihap sa nakig-ambit panahon sa Memoryal dili makahukom kon kinsa gyod ang may langitnong paglaom. Ang gidaghanon sa nakig-ambit naglakip niadtong sayop nga naghunahuna nga sila dinihogan. Ang pipila nga nakig-ambit kaniadto miundang ra sa ulahi. Ang uban tingali dunay mga problema sa pangisip ug sa emosyon maong nagtuo sila nga magmando sila uban kang Kristo sa langit. Busa, ang gidaghanon sa mga nakig-ambit dili tukmang magpaila sa gidaghanon sa mga dinihogan nga nahibilin sa yuta. Apan, wala mag-ingon ang Bibliya kon pila ang mahibilin inigsugod sa dakong kasakitan. w16.01 4:12-14