Septiyembre

Sa wala pa motungas si Abraham ug Isaac, giingnan ni Abraham ang mga sulugoon nga miuban kanila: “Pabilin kamo dinhi uban sa asno, apan ako ug ang bata buot moadto didto ug mosimba ug mobalik kaninyo.” (Gen. 22:5) Unsay gipasabot ni Abraham? Namakak ba siya sa iyang mga sulugoon sa pag-ingon nga si Isaac mobalik, nga nahibalo man siya nga iyang ihalad si Isaac? Wala. Gipakita sa Bibliya kon unsay hunahuna ni Abraham. (Heb. 11:19) Nahibalo si Abraham nga “ang Diyos makahimo sa pagbangon [kang Isaac] bisan gikan sa mga patay.” Oo, si Abraham mituo sa pagkabanhaw. Siya nahibalo nga gipasig-uli ni Jehova ang katakos niya ug ni Sara sa pagsanay bisan sa ilang katigulangon. (Heb. 11:11, 12, 18) Naamgohan ni Abraham nga walay imposible kang Jehova. Busa masaligon siya nga bisag unsay mahitabo nianang adlawa, ang iyang minahal nga anak mahibalik kaniya aron matuman ang tanang saad ni Jehova. Kanay hinungdan nga si Abraham gitawag nga “amahan sa tanan nga nagbatog pagtuo”!—Roma 4:11. w16.02 1:3, 13

Bisag gidihogan sa Diyos si Saul nga mahimong hari, siya sa ulahi nagmasinupakon ug gisalikway ni Jehova. (1 Sam. 15:17-23) Bisan pa niana, wala dayon tangtanga sa Diyos si Saul sa pagkahari. Busa nalisdan ang iyang mga sakop ug kadtong anaa sa iyang palibot nga magmaunongon sa Diyos kay si Saul, nga naglingkod sa “trono ni Jehova,” naghimog daotang mga butang. (1 Cron. 29:23) Apan ang iyang anak nga si Jonatan nagmaunongon kang Jehova. Kita usab makapamatuod sa atong pagkamaunongon kang Jehova pinaagi sa relatibong pagpasakop sa labaw nga mga awtoridad, ingon sa gisugo sa Diyos, bisan pag ang pipila tingali kanila dili takos sa pagtahod. Pananglitan, ang usa ka opisyal sa gobyerno tingali korap, apan tahoron gihapon nato ang iyang posisyon kay kita gisugo sa pagpakitag relatibong pagpasakop sa “labaw nga mga awtoridad.” (Roma 13:1, 2) Busa, kitang tanan makapamatuod usab sa atong pagkamaunongon kang Jehova pinaagi sa pagtahod niadtong iyang gihatagag awtoridad.—1 Cor. 11:3; Heb. 13:17. w16.02 3:5, 6, 8

Ang Bibliya nag-ingon nga ang katawhan ni Jehova, lakip na ang mga batan-on, “magatanyag sa ilang kaugalingon nga kinabubut-on” sa pag-alagad kaniya. Busa, ang usa nga nagplanong magpabawtismo kinahanglang segurado nga iya kining personal nga desisyon. Kana tingali nagkinahanglag pagsusi sa kaugalingon, ilabina kon nagdako ka diha sa pamilya nga Saksi. Latas sa katuigan, lagmit daghan na kag nakita nga nabawtismohan—apil ang pipila nimo ka higala ug tingali ang imong mga igsoon pa gani. Kon mao nay imong kahimtang, unsay angay nimong hinumdoman? Pagbantay nga dili nimo bation nga kinahanglan ka nang magpabawtismo tungod lang kay miabot ka na sa espesipikong edad o tungod lang kay nagpabawtismo na ang uban. Unsay imong mahimo aron maseguro nga husto ang imong panglantaw sa kahikayan ni Jehova sa bawtismo? Paggahin kanunay ug panahon sa pagpamalandong sa mga rason kon nganong importante kaayo ang pagpabawtismo. w16.03 1:11, 12

Ingong mga membro sa kongregasyon, sa unsang paagi kita molampos sa pagpaambit niini nga imbitasyon? Pinaagi lamang sa panaghiusa ug pagtinabangay. (Efe. 4:16) Aron mapaambit nato ang maayong balita sa Gingharian ngadto sa daghang tawo kutob sa mahimo, kinahanglang himoon nato ang atong pagsangyaw sa organisadong paagi. Busa, gihatagan kitag mga instruksiyon. Ang giya nga gihatag pinaagi sa mga kongregasyon sa tibuok kalibotan nakatabang kanato nga magkahiusa sa pagsangyaw. Human kita magtigom alang sa pagsangyaw, kita moadto sa mga tawo aron imantala ang mensahe sa Gingharian. Pinaagi sa pagpakigsulti sa mga tawo ug pinaagi sa minilyong kopya sa binase sa Bibliyang mga publikasyon, atong gipakaylap ang mensahe. Naningkamot ka ba sa pagsunod sa instruksiyon nga makigbahin sa espesyal nga mga kampanya sa pagsangyaw? Sa paghimo niana, ikaw nahiusa sa minilyong uban pa sa pagmantala sa mensahe sa “manulonda nga naglupad sa kinatung-an sa langit,” nga gihisgotan sa Pinadayag 14:6. w16.03 3:4, 5

Ang Bibliya nagtug-an kanato nga may mga linukot nga basahon nga pagabuksan nga maghatag kanatog mga instruksiyon sa pagkinabuhi sa bag-ong kalibotan. Pinaagi sa pagtuon niini, ang tanan, lakip na ang mga binanhaw, mahibalo kon unsay kabubut-on sa Diyos alang kanila. Kini nga mga linukot nga basahon motabang nato nga mas masabtan ang panghunahuna ni Jehova. Kay gigiyahan sa mas tin-awng pagsabot sa inspiradong Pulong sa Diyos lakip na sa ipadayag sa mga linukot nga basahon, kadtong magpuyo sa Paraiso seguradong magtratar sa ilang isigkatawo uban ang gugma, pagtahod, ug dignidad. (Isa. 26:9) Hunahunaa lang kon unsa ka dako ang programa sa pagpanudlo nga himoon ubos sa pagdumala sa Hari, si Jesu-Kristo! Kinabuhing walay kataposan ang nagpaabot niadtong mosanong sa “mga butang nga nahisulat sa mga linukot nga basahon.” Alang niadtong magpabiling maunongon panahon sa kataposang pagsulay, ang ilang mga ngalan permanenteng isulat ni Jehova diha sa “linukot nga basahon sa kinabuhi.” Mahimong mao sab nay atong palaaboton! w16.03 4:19, 20

Ang eksperyensiyadong mga ansiyano magpasiugda sa kahinungdanon sa pagbansay sa mga brader samtang sila tin-edyer pa pinaagi sa paghatag kanilag mga asaynment sa kongregasyon nga haom sa ilang pangedaron. Kon ang pagbansay himoon samtang sila batan-on pa, sila matabangan sa pagpokus sa espirituwal nga mga tumong dihang sila mag-20 anyos na ug makaatubag daghang butang nga makapalinga kanila. (Sal. 71:17) Mapukaw sa ansiyano ang tinguha sa tinun-an nga moalagad pinaagi sa pagpatin-aw kaniya dili lang kon unsay himoon kondili kon nganong himoon usab kana. Pinaagi sa paghatag ug mga rason, masundog sa mga ansiyano ang Dakong Magtutudlo, si Jesus. Pananglitan, sa wala pa sugoa ang iyang mga apostoles sa paghimog mga tinun-an, si Jesus naghatag kanilag rason kon nganong angay silang motuman. Siya miingon: “Ang tanang awtoridad gihatag na kanako sa langit ug sa yuta.” Dayon siya midugang: “Busa panglakaw kamo ug paghimog mga tinun-an sa katawhan sa tanang kanasoran.”—Mat. 28:18, 19. w15 4/15 2:5, 6

Peligroso nga mahimong Kristohanon kaniadto sa Roma. Kay gipasanginlan nga maoy nagpahinabog sunog sa siyudad niadtong 64 C.E., ang mga sumusunod ni Kristo gilutos pag-ayo. Lagmit niining malisod nga panahon nga si apostol Pablo napriso sa Roma sa ikaduhang higayon. Tabangan kaha siya sa ubang Kristohanon? Tingali nakapangutana niana si Pablo, kay siya misulat kang Timoteo: “Sa akong unang depensa walay usa nga midapig kanako, apan silang tanan namiya kanako.” (2 Tim. 4:16) Bisan pa niana, giila ni Pablo nga wala siya pasagdi. Misalig siya nga si Jehova mohatag kaniyag kusog sa paglahutay sa presenteng mga pagsulay ug sa mga kalisdanan nga mahimong motungha sa umaabot. Gani, siya midugang: “Ang Ginoo magpalingkawas kanako gikan sa tanang buhat nga daotan.” (2 Tim. 4:18) Oo, nakat-onan ni Pablo nga bisan sa mga higayon nga dili makatabang ang mga igsoon kaniya, makasalig gayod siya sa tabang ni Jehova ug sa iyang Anak! w15 4/15 4:1-3

Dihang si Jesus natawo, nahibalo si Satanas nga kining bataa mao ang mahimong gisaad nga Mesiyas. Maghunahuna kaha si Satanas nga dili siya makaako sa pagpatayg bata? Siya walay gisunod nga sukdanan sa kon unsay husto ug sayop. Kon bahin sa batang si Jesus, si Satanas milihok dayon. Sa unsang paagi? Nasuko pag-ayo si Haring Herodes dihang ang mga astrologo nangutana bahin sa “usa nga natawong hari sa mga Hudiyo,” ug gusto gayod niyang patyon kini. (Mat. 2:1-3, 13) Aron maseguro nga mapatay gayod ang bata, iyang gimando nga patyon ang tanang batang lalaki nga nag-edad ug dos anyos paubos nga nagpuyo sa Betlehem ug sa mga distrito niini. (Mat. 2:13-18) Naluwas si Jesus sa maong ngilngig nga pagpamatay. Pero unsay gipakita niini bahin sa atong kaaway, si Satanas? Dayag nga ang Yawa walay pagpabili sa kinabuhi sa tawo, ni maluoy siya sa mga bata. Siya “usa [gayod] ka leyon nga nagangulob.” (1 Ped. 5:8) Ayaw gayod kalimot kon unsa siya ka bangis! w15 5/15 1:10, 12, 13

Ang atong katakos sa paghanduraw sa mga butang nga wala pa nato makita maoy gasa gikan sa Diyos. Motabang kini kanato sa paghimog maalamong mga plano ug sa pagpaabot sa maayong mga butang. Si Jehova nahibalo kon unsay mahitabo sa umaabot, ug abante niya kitang gisultihan bahin niana diha sa Kasulatan. Mahimo natong mahanduraw kon unsay mahitabo. Gani, ang atong katakos sa paghanduraw sa mga butang nga dili makita motabang nato sa pagbatog pagtuo. (2 Cor. 4:18) Dihang si Ana naghunahuna bahin sa adlaw nga iyang dad-on ang iyang anak nga si Samuel sa tabernakulo aron moalagad didto, siya may basehanan sa iyang paghanduraw. Kana gibase sa kon unsay iyang nahukmang buhaton, ug kini nakatabang niya sa pagtuman sa iyang gisaad kang Jehova. (1 Sam. 1:22) Kon kita maghanduraw sa mga saad sa Diyos, kita naghunahuna bahin sa mga butang nga seguradong mahitabo. (2 Ped. 1:19-21) Walay duhaduha, daghang matinumanong tawo sa kapanahonan sa Bibliya ang naghanduraw sa mga saad sa Diyos. w15 5/15 3:1-3

Peligroso ang paghanduraw nga madato pag-ayo ug sa ingon diyutay na lag panahon alang sa Diyos. Si Jesus nag-asoy ug sugilanon aron ipakita ang makapasubong kahimtang sa usa ka tawo nga ‘nagatigom ug bahandi alang sa iyang kaugalingon apan dili dato ngadto sa Diyos.’ (Luc. 12:16-21) Si Jehova malipay kon buhaton nato ang mga butang nga makapahimuot kaniya. (Prov. 27:11) Pagkamalipayon nato kon atong mabatonan ang iyang pag-uyon tungod sa atong pagtigom ug ‘mga bahandi sa langit’! (Mat. 6:20) Ug ang maayong relasyon kang Jehova mao gayod ang labing bililhong bahandi nga atong mabatonan. Handurawa kon unsa ka dako ang atong kabalaka kon kita maningkamot sa pagtigom ug ‘mga bahandi sa yuta.’ (Mat. 6:19) Si Jesus migamit ug ilustrasyon sa pagpakita nga “ang kabalaka niining sistema sa mga butang ug ang malimbongong gahom sa mga bahandi” makatuok sa pulong sa Gingharian.—Mat. 13:18, 19, 22. w15 5/15 4:15, 16

Tungod sa gahom sa Diyos, si Jesu-Kristo nakahimog daghang katingalahan nga mga milagro. Siya nag-ayo dili lang sa sanla kondili usab sa tanang matang sa sakit ug balatian. Sa paghimo niana nga mga buhat sa kaluoy, si Jesus wala magkinahanglag donor aron ilisan ang mga organo sa lawas. Iyang giayo ang mismong mga organo o parte sa lawas nga may depekto! Ug dihadiha niyang giayo ang mga tawo, nga usahay bisag layo siya. (Juan 4:46-54) Unsay gipakita niana nga pagpang-ayo? Nagpakita kana nga si Jesus, kinsa naentrono na ingong langitnong Hari, adunay gahom ug tinguha nga permanenteng ayohon ang sakit sa mga tawo. Ang pagkakat-on sa paagi sa pagtratar ni Jesus sa mga tawo naghatag kanatog pagsalig nga sa bag-ong kalibotan, matuman ang tagna: “Maluoy siya sa timawa ug sa kabos.” (Sal. 72:13) Nianang panahona, tabangan ni Jesus ang tanang nag-antos kay buot niyang buhaton kana. w15 6/15 2:6

Daghan ang makamemorya sa Pag-ampo sa Ginoo. Sa atong pagpamalaybalay, sagad gamiton nato kini aron masabtan sa tagbalay nga ang Gingharian sa Diyos maoy usa ka tinuod nga gobyerno nga magdalag maanindot nga mga kausaban sa yuta. O tingali gamiton nato ang unang bahin sa maong pag-ampo aron ipakita nga dunay personal nga ngalan ang Diyos, nga angayng balaanon, o isipong balaan. (Mat. 6:9) Tuyo ba ni Jesus nga pulong por pulong kining balikbalikon paglitok matag higayon nga kita mag-ampo, sama sa gihimo sa kadaghanan sa Kakristiyanohan? Dili. Sa wala pa ihatag ni Jesus kini nga pag-ampo ingong sumbanan, siya miingon: “Dihang mag-ampo, ayaw balikbalika pagsulti ang samang mga butang.” (Mat. 6:7) Sa laing higayon, gisulti pag-usab ni Jesus ang maong pag-ampo pero migamit siyag laing mga pulong. (Luc. 11:1-4) Busa, gitudloan ta ni Jesus kon unsay angayng pangayoon ug kon unsay angayng unahon. Maong haom lang nga tawgon kini nga modelong pag-ampo. w15 6/15 4:1, 2

Si Jehova maghatag kanato sa iyang gamhanang balaang espiritu, nga makapalig-on ug makatabang nato sa pagsukol sa tentasyon. Ang Diyos nagpasidaan usab kanato pinaagi sa iyang Pulong ug sa kongregasyon maylabot sa mga situwasyon nga angay natong likayan, sama sa paggugol ug sobrang panahon, kuwarta, ug kusog alang sa materyal nga mga butang nga wala nato kinahanglana. Ang kanhing mga payunir nga si Espen ug Janne may duha ka anak nga kinahanglang atimanon. Miingon si Espen: “Kanunay ming mag-ampo kang Jehova nga dili kami mahulog sa tentasyon karon nga dili na mi makagugol ug daghang panahon alang sa teokratikanhong mga kalihokan sama kaniadto. Naghangyo mi kang Jehova nga tabangan ming mahuptan ang among espirituwalidad ug kasibot sa ministeryo.” Ang laing tentasyon nga komon sa atong panahon mao ang pagtan-awg pornograpiya. Ang uban natental niini kay wala nila isalikway ang sayop nga mga hunahuna. Pero makasukol kita, sama sa gibuhat sa daghan natong mga igsoon.—1 Cor. 10:13. w15 6/15 5:15, 16

Unsay mahitabo human sa kalaglagan sa bakak nga relihiyon? Panahon kini nga madayag kon unsa gayoy anaa sa atong kasingkasing. Ang kadaghanan sa katawhan modangop sa tawhanong mga organisasyon nga gipakasamag “dagkong-bato sa kabukiran.” Pero sa mahulagwayong pagkasulti, ang katawhan sa Diyos modangop sa salipdanan nga gitagana ni Jehova. Sa unang siglo, ang daklit nga paghunong dili panahon alang sa tanang Hudiyo nga mobalhin sa Kristiyanidad. Panahon kadto alang sa mga Kristohanon nga molihok ug mosunod sa instruksiyon ni Jesus. Sa susama, panahon sa dakong kasakitan, dili kita makadahom nga ang daklit nga paghunong moresultag kalit nga pagbalhin sa mga tawo ngadto sa Kristiyanidad. Hinunoa, kana maoy kahigayonan alang sa tanang matuod nga mga magsisimba sa pagpamatuod sa ilang gugma kang Jehova ug sa pagpaluyo sa mga igsoon ni Kristo.—Mat. 25:34-40. w15 7/15 2:7

Ang imo bang gidak-an o palibot nag-impluwensiya nimo nga magmaunongon sa imong nasod o rehiyon? Gibati pa ba gihapon nimo kini? Dili angayng tugotan sa mga Kristohanon ang nasyonalismo nga makaimpluwensiya sa ilang panglantaw sa uban. Apan, unsay imong buhaton kon naamgohan nimo nga duna kay negatibong panglantaw sa mga tawo sa laing nasod, kultura, pinulongan, o rasa? Maayo gayong pamalandongon ang panglantaw ni Jehova sa nasyonalismo ug pagpihig. Mapuslanon ang pagpanukiduki bahin niini ug sa susamang mga topiko. Dayon, pag-ampo kang Jehova nga tabangan kang masundog ang iyang panglantaw bahin niini. (Roma 12:2) Angay nato ning himoon tungod kay sa madugay o sa madali, ang tanang alagad ni Jehova makaatubag mga situwasyon diin ang ilang konsensiya magtukmod nila sa pagpakita nga sila lahi—sa kauban man sa trabaho, klasmet, silingan, paryente, o uban pa. Apan angay gyod tang malahi! w15 7/15 3:14, 15

Si Jehova mamati sa atong mga hangyo ug makasabot kanato bisan pag ang uban dili. Ang iyang tubag sa atong mga pag-ampo maoy maanindot nga pamatuod sa iyang way paglubad nga gugma kanato. Daghan tag makat-onan sa mga pag-ampo nga narekord sa Pulong sa Diyos. Busa, may mga higayon nga mapuslanon ang pagkonsiderar sa maong mga pag-ampo diha sa pamilyahanong pagsimba. Ang pagpamalandong kon sa unsang paagi ang mga alagad ni Jehova kaniadto nagpahayag sa ilang pagbati sa Diyos makatabang kanato sa pagpauswag sa kalidad sa atong mga pag-ampo. Pananglitan, tagda ang mapainubsanong pag-ampo ni Jonas gikan sa tiyan sa dakong isda. (Jon. 1:17–2:10) Repasoha ang kinasingkasing nga pag-ampo ni Solomon kang Jehova sa inagurasyon sa templo. (1 Hari 8:22-53) Palandonga ang modelong pag-ampo nga gihatag ni Jesus alang sa atong kaayohan. (Mat. 6:9-13) Labaw sa tanan, kanunayng “ipahibalo ang inyong mga pangaliya sa Diyos.” Ingong resulta, “ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.”—Filip. 4:6, 7. w15 8/15 1:11, 12

Sa bag-ong kalibotan, ikalipay gayod nato ang pagsunod sa mga kahikayan ni Jehova samtang magtinabangay kita sa paghimo sa yuta nga usa ka paraiso, pagtudlo sa mga binanhaw, ug pagbuhat sa kabubut-on ni Jehova alang sa katawhan. Pero komosta kon dili ta ganahan sa gisugo kanato nga buhaton? Magmasinugtanon ba kita pinaagi sa paghimo sa atong kinamaayohan sa pagtuman niana ug magmalipayon sa atong asaynment? Kadaghanan kanato seguradong motubag ug oo! Nan, nagmasinugtanon ba usab kita karon sa instruksiyon gikan sa organisasyon ni Jehova? Kon gihimo nato kana, kita nangandam alang sa kinabuhing walay kataposan ilalom sa pagmando ni Jehova. Makapangandam kita alang sa kinabuhi sa bag-ong kalibotan dili lang pinaagi sa pagkamasinugtanon sa mga kahikayan ni Jehova karon kondili sa pagkat-on usab sa pagkakontento ug pagtinabangay. Kon kita mokooperar niadtong nagapanguna kanato karon, tingali magmakontento ug magmalipayon sa bag-ong mga asaynment, lagmit ingon usab niana ang atong tinamdan sa bag-ong kalibotan. w15 8/15 3:6, 7

Ang daotang panagkauban nakapahimo kang Solomon nga dili maalamon ug nag-impluwensiya kaniya sa pagbiya sa matuod nga pagsimba. (1 Hari 11:1-6) Usa gayod kana ka pasidaan alang sa mga Kristohanon nga naghunahuna sa pagpakigminyo sa usa nga wala mahigugma kang Jehova! Komosta kon ang usa minyo na ayha pa nahimong magsisimba sa Diyos? Ang Bibliya nag-ingon: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa.” (1 Ped. 3:1) Ang maong mga pulong gitumong sa Kristohanong mga asawa, pero mapadapat usab kana sa usa ka bana nga nahimong magsisimba ni Jehova. Tin-aw ang tambag sa Bibliya: Mahimong maayong kapikas, ug sunda ang hataas nga sukdanan sa Diyos alang sa kaminyoon. Daghang dili magtutuong kapikas ang midawat sa kamatuoran kay ilang nakita ang kausaban sa ilang kapikas dihang gisunod niini ang mga sugo sa Diyos. w15 8/15 4:15, 16

May mga sakit nga wala pay nadiskobrehang tambal. Busa, kinahanglan kitang mag-amping maylabot sa mga paagi sa pagtambal nga nag-angkong makaayo apan walay lig-ong pamatuod. Si Pablo giinspirar sa pagsulat: “Ipaila ang inyong pagkamakataronganon sa tanang tawo.” (Filip. 4:5) Ang pagkamakataronganon mopugong kanato sa paggugol ug dakong panahon sa pag-atiman sa panglawas nga mapasagdan na ang espirituwal nga mga butang. Kon atong tugotan nga mahimong panguna sa kinabuhi ang pag-atiman sa panglawas, posible nga mahimo tang mahunahunaon lang sa kaugalingon. (Filip. 2:4) Ang espirituwal nga mga butang ang labing importante, ug kon bahin sa panglawas, kinahanglang magmakataronganon kita sa atong mga pagdahom. (Filip. 1:10) Kon bahin sa pag-atiman sa panglawas, kinahanglang andam ang matag usa kanato sa paghimog personal nga desisyon ug sa pagdawat sa sangpotanan niana. w15 9/15 2:8, 10

Si Jehova mao ang “Diyos sa kamatuoran.” (Sal. 31:5) Siya nahigugma sa iyang mga anak ug malipay sa pagpadan-ag sa kahayag sa kamatuoran aron giyahan sila sa tanang bahin sa ilang kinabuhi, ilabina maylabot sa pagsimba. Unsa nga kamatuoran ang gipadayag ni Jehova, ug giunsa pagpakita niini nga siya nahigugma kanato? Una sa tanan, gipadayag ni Jehova ang kamatuoran bahin kaniya. Iyang gipadayag ang iyang ngalan, nga mas daghang beses nga makita sa Bibliya kay sa ubang ngalan. Niining paagiha, si Jehova nakigsuod kanato, ug gusto niya nga makaila kita kaniya. (Sant. 4:8) Gipadayag usab ni Jehova ang iyang mga hiyas, kon unsa siyang matanga sa pagkadiyos. Samtang ang uniberso nagpasundayag sa iyang gahom ug kaalam, si Jehova nagpadayag usab pinaagi sa Kasulatan sa iyang hustisya ug ilabina sa iyang dakong gugma. (Roma 1:20) Sama siya sa usa ka amahan kinsa dili lamang kusgan ug maalamon kondili makiangayon ug mahigugmaon usab, nga tungod niana ang iyang mga anak dali rang masuod kaniya. w15 9/15 4:8, 9

Daghan ang naghunahuna nga dili hinungdanon sa Diyos ang ilang ginabuhat. Gani, ang uban nagtuo nga ang Diyos dili kaayo interesado sa nagakahitabo sa mga tawo. Human makapahinabog dakong kadaot ang Super Typhoon Yolanda sa Visayas niadtong Nobyembre 2013, ang mayor sa usa ka dakong siyudad miingon: “Lagmit tua sa laing dapit ang Diyos.” Ang uban naghunahuna nga dili makita sa Diyos ang ilang ginabuhat. (Isa. 26:10, 11; 3 Juan 11) Sama sila sa gihubit ni apostol Pablo dihang siya miingon: “Sila wala mouyon nga ilhon ang Diyos.” Ang maong mga tawo “napuno sa tanang pagkadili-matarong, pagkadaotan, hakog nga pangibog, [ug] kangil-ad.” (Roma 1:28, 29) Komosta sa atong bahin? Dili sama niadtong gihisgotan sa ibabaw, nasayod kita nga si Jehova nakakita sa tanan natong gibuhat. Pero, nagtuo ba sab ta nga ang Diyos interesado kanato? w15 10/15 1:1-3

Ang labing maayong paagi sa pagpakita sa atong pagtuo mao ang pagpakigbahin sa pagsangyaw. Ngano? Tungod kay niining buluhatona nagkinahanglan kitag pagtuo nga hapit nang taposon sa Diyos kining sistemaha sa mga butang, ug nga “kini dili maulahi”! (Hab. 2:3) Ang usa ka paagi nga masukod nato ang atong pagtuo mao ang pagsusi kon unsa ka dako ang atong tinguha nga makigbahin sa ministeryo. Gibuhat ba nato ang atong maarangan, tingali sa pagpangitag mga paagi sa pagpalapad sa atong ministeryo? (2 Cor. 13:5) Oo, ang “pagpahayag sa dayag alang sa kaluwasan” magpakita nga lig-on ang atong pagtuo. (Roma 10:10) Makapakita usab kitag pagtuo samtang nakigbisog ta sa adlaw-adlawng mga problema. Nag-antos man kita sa sakit, kaluya sa buot, depresyon, kapobrehon, o ubang lisod nga problema, masaligon ta nga si Jehova ug ang iyang Anak ‘motabang sa hustong panahon.’ (Heb. 4:16) Ikapakita nato ang maong pagsalig pinaagi sa pag-ampo dili lang para sa atong espirituwal nga panginahanglan. w15 10/15 2:12-14

Bisag did-an ka sa pagbaton ug Bibliya, pero dili ka mapugngan sa pagpamalandong sa mga butang nga imong namemorya, sama sa imong paboritong mga teksto ug awit sa Gingharian. (Buh. 16:25) Ug ang espiritu sa Diyos makatabang nimo sa paghinumdom sa maayong mga butang nga imong nakat-onan. Busa pangandam na karon pinaagi sa paggahin ug panahon alang sa pagbasa ug pagpamalandong sa senemanang pagbasa sa Bibliya. Paggahin sab ug panahon alang sa pagpamalandong sa gisulti ug gibuhat ni Jesus. Mouyon ka gayod nga lakip sa iladong mga basahon sa Bibliya mao ang mga asoy sa Ebanghelyo bahin sa kinabuhi ug ministeryo ni Jesus. (Roma 10:17; Heb. 12:2; 1 Ped. 2:21) Ang katawhan sa Diyos gitagan-an pa ganig publikasyon nga naghubit sa kinabuhi ni Jesus dinhi sa yuta sumala sa pagkasunodsunod niini. Kini maoy maanindot nga tabang, ilabina kon atong basahon pag-ayo ug pamalandongon ang susamang mga teksto sa Ebanghelyo nga gihisgotan sa matag kapitulo sa maong publikasyon.—Juan 14:6. w15 10/15 4:11, 12

Si Jesus usa ka mahigugmaon ug maunongong higala. Sa kapanahonan sa Bibliya, ang agalon sagad dili mosulti sa iyang hunahuna ug pagbati ngadto sa iyang ulipon. Apan, gipakita ni Jesus nga siya agalon ug higala sa iyang matinumanong mga apostoles. Siya migahig panahon kanila, misulti sa iyang gibati, ug namati pag-ayo dihang misulti sila sa ilang hunahuna ug pagbati. (Mar. 6:30-32) Tungod sa maong mahigugmaong komunikasyon, nahimo silang suod nga managhigala ug naandam ang mga apostoles alang sa umaabot nga mga responsabilidad sa pag-alagad sa Diyos. Gusto ni Jesus nga maeksperyensiyahan sa iyang minahal nga mga tinun-an ug higala ang kalipay nga bation tungod sa pagkapuliki diha sa pag-alagad kang Jehova. Busa, gusto niya nga madasigon silang makigbahin sa espirituwal nga mga kalihokan. Oo, gusto ni Jesus nga magmasiboton sila sa paghimog mga tinun-an! Ug mahigugmaon niyang gipasaligan ang iyang mga tinun-an nga motabang siya kanila.—Mat. 28:19, 20. w15 11/15 2:3, 5

Ang gugma mao ang pangunang hiyas ni Jehova. (1 Juan 4:16) Ang iyang unang linalang mao si Jesus, kinsa nakauban niya sa langit sa bilyonbilyong katuigan ug nakakat-on sa iyang mahigugmaong mga paagi. (Col. 1:15) Sa tibuok kinabuhi ni Jesus, lakip na sa iyang kinabuhi sa yuta, iyang gipakita nga bug-os niyang nasabtan kon unsa ka mahigugmaon si Jehova, ug iyang gisundog ang maong gugma. Busa, makaseguro kita nga ang pagmando ni Jehova ug Jesus kanunayng giniyahan sa gugma. Dihang gipangutana kon unsa ang kinadak-ang sugo sa Balaod, si Jesus mitubag: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’” (Mat. 22:37-39) Matikdi nga miingon si Jesus nga ang gugma sa silingan ikaduha lang sa gugma kang Jehova. Kini nagpasiugda sa kaimportante sa pagpakitag gugma ngadto sa tanan. w15 11/15 4:1-3

Dili lang pinaagig Hebreohanong pinulongan nga nakigkomunikar ang Diyos sa mga tawo. Human makabatog kagawasan ang mga Israelinhon gikan sa Babilonya, nahimong adlaw-adlawng pinulongan sa pipila kanila ang Aramaiko. Tingali, sa pagpakita kon unsay mahitabo sa umaabot, giinspirar ni Jehova ang manalagnang si Daniel ug Jeremias ug ang saserdoteng si Esdras sa pagrekord ug mga bahin sa basahon sa Bibliya sa Aramaiko. Sa ulahi, gisakop ni Alejandrong Bantogan ang dakong bahin sa kalibotan kaniadto, ug ang komon, o Koine, nga Grego nahimong internasyonal nga pinulongan. Daghang Hudiyo ang misugod paggamit niana, ug sa ngadtongadto gihubad ang Hebreohanong Kasulatan ngadto sa Grego. Kini nga hubad, nga gituohang gihimo sa 72 ka maghuhubad, gitawag ug Septuagint. Kini ang unang hubad sa Bibliya ug usa sa labing importante. Lainlain ang estilo sa mga maghuhubad, ang uban literal, ang uban dili. Bisan pa niana, ang mga Hudiyo nga nagsultig Grego ug sa ulahi ang mga Kristohanon nag-isip sa Septuagint ingong Pulong sa Diyos. w15 12/15 1:4-6

Ang punto sa ilustrasyon ni Santiago gipatin-aw sa bersikulo 6. “Ang dila usa [usab] ka kalayo.” Ang dila nagrepresentar sa atong katakos sa pagsulti. Sama sa kalayo, ang atong sinultihan mahimong makapahinabog dakong kadaot. Gani, miingon ang Bibliya nga ang “kamatayon ug kinabuhi anaa sa gahom sa dila.” (Prov. 18:21) Siyempre, dili ta mohunong sa pagsulti tungod lang kay nabalaka ta nga makasulti tag dili maayo. Sama ra nga dili ta mohunong sa paggamit ug kalayo tungod lang kay nahadlok ta sa kadaot nga ipahinabo niana. Ang sekreto mao ang pagkontrolar. Kon atong kontrolahon ang kalayo, magamit nato kini sa paglutog pagkaon, paghatag ug kainit sa lawas, ug pagdan-ag sa kagabhion. Sa susama, kon atong kontrolahon ang atong dila, magamit nato ang gahom niini sa pagpasidungog sa Diyos ug sa paghatag ug kaayohan sa uban. (Sal. 19:14) Kita man mosulti o mosenyas, ang katakos sa pagkomunikar sa atong hunahuna ug pagbati maoy kahibulongang gasa gikan sa Diyos. Kining maong gasa magamit nato sa pagpalig-on, dili sa pagpaluya sa uban.—Sant. 3:9, 10. w15 12/15 3:1-3

Makataronganong hunahunaon nga si Lucas mihatag ug medikal nga tambag ug tabang kang Pablo ug sa uban panahon sa ilang misyonaryong panaw. Nganong kinahanglan kanang buhaton ni Lucas? Kay bisan si Pablo nasakit samtang nagpanaw. (Gal. 4:13) Si Lucas makahatag ug medikal nga tabang nga kaharmonya sa giingon ni Jesus: “Kadtong mga himsog wala magkinahanglan ug mananambal, kondili kadtong mga masakiton.” (Luc. 5:31) Wala hisgoti sa Bibliya kon diin ug kon kanus-a nabansay si Lucas ingong doktor. Pero kini nag-ingon nga gihisgotan ni Pablo sa mga Kristohanon sa Colosas ang pagkadoktor ni Lucas kay nakaila sila niini. Makapainteres, dihay eskuylahan sa medisina sa Laodicea, usa ka siyudad nga duol sa Colosas. Bisan unsa pa man, si Lucas kuwalipikadong mosugyot bahin sa panglawas kay siya usa ka doktor. Dayag kana sa espesipikong medikal nga mga termino nga gigamit ni Lucas sa iyang Ebanghelyo ug sa basahon sa Mga Buhat, maingon man sa iyang detalyadong paghisgot sa pagpang-ayo ni Jesus. w15 12/15 4:11, 12

Dihang gipadala ni Jehova ang iyang bugtong Anak dinhi sa yuta, Iyang gihatag kanato ang kinadak-ang gasa sa gugma! (Juan 3:16; 1 Juan 4:9, 10) Si apostol Pablo nagtawag niini ingong “dili-mahubit nga walay bayad nga gasa” sa Diyos. Nahibalo si Pablo nga ang tanang nindot nga mga saad sa Diyos gigarantiyahan sa hingpit nga halad ni Kristo. (2 Cor. 1:20) Busa, ang “dili-mahubit nga walay bayad nga gasa” naglakip sa tanang kaayo ug maunongong gugma nga gipakita ni Jehova kanato pinaagi kang Jesus. Sa pagkatinuod, ang maong gasa kahibulongan kaayo nga dili kana mahubit sa paagi nga bug-os natong masabtan. Unsay angayng epekto kanato nianang talagsaong gasa? Ug sa unsang praktikal nga mga paagi nga kining maong gasa magpalihok kanato? Nagpalihok ba kini kanato aron bantayan o bag-ohon ang atong mga paagi sa pagkinabuhi? Natukmod ba kita niini nga mahimong mahinatagon ug mahigugmaon sa uban, ug magpasaylo sa mga nakasala kanato? Hinumdomi, ang gihatag ni Jehova kanato pinaagi kang Kristo mao ang kinadak-ang gasa nga nahatag sukad.—1 Ped. 3:18. w16.01 2:1, 2, 4, 5

Kadtong gidapit sa maong paagi maghunahuna tingali: ‘Nganong ako man ang napili ug dili ang uban?’ Sila tingali magduhaduha kon takos ba gyod sila. Pero dili sila magduhaduha nga sila gidapit. Ang ilang kasingkasing napuno sa kalipay ug apresasyon. Sila mibatig sama sa gibati ni Pedro dihang siya giinspirar sa pag-ingon: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy kita iyang gipahimugso pag-usab ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulondon. Gitagana kini sa mga langit alang kaninyo.” (1 Ped. 1:3, 4) Dihang mabasa kini sa mga dinihogan, dili gyod sila magduhaduha nga ang ilang langitnong Amahan personal nga nakigsulti kanila. w16.01 3:11, 12