Oktubre

Si Jehova misugod pagpilig mga dinihogan human sa pagkabanhaw ni Jesus, ug mopatim-aw nga ang tanan sa unang siglong kongregasyon maoy mga dinihogan. Sukad sa unang siglo hangtod sa sinugdanan sa kataposang mga adlaw, ang kadaghanan niadtong nag-angkong sumusunod ni Kristo maoy mini nga mga Kristohanon; gipakasama sila ni Jesus sa “mga bunglayon.” Bisan pa niana, si Jehova padayong nagdihog sa pipila ka matinumanong tawo sulod nianang panahona, ug sila nahisama sa “mga trigo” nga gihubit ni Jesus. (Mat. 13:24-30) Panahon sa kataposang mga adlaw, si Jehova padayong nagpili niadtong maglangkob sa 144,000. Kon mohukom si Jehova nga ang uban pilion niya sulod sa hinapos nga bahin sa kataposang mga adlaw, kinsa man ta nga mokuwestiyon sa iyang kaalam? (Isa. 45:9; Dan. 4:35; Roma 9:11, 16) Magbantay ta nga dili mahisama sa diskontentong mga mamumuo nga nagreklamo sa paagi nga ang ilang agalon nakiglabot niadtong misugod pagtrabaho sa ika-11ng takna.—Mat. 20:8-15. w16.01 4:15

Ang Diyos dili mosugo natog sama niana karon. Pero kita iyang giawhag sa pagsugot kaniya bisag malisdan kita sa pagsunod sa iyang mga sugo o dili nato masabtan ang rason niana. May mahunahunaan ka bang sugo sa Diyos nga nalisdan ka sa pagsugot? Alang sa pipila, malisdan sila sa pagsangyaw. Tingali maulawon sila, maong malisdan sila sa pagpakig-estorya sa mga dili nila kaila. Sa uban usab, lisod ang pagpabiling lahi, tingali diha sa eskuylahan o trabahoan. (Ex. 23:2; 1 Tes. 2:2) Mibati ka bag sama sa gibati ni Abraham, nga daw nagtungas ka sa bukid sa Moria, nga gipabuhat sa usa ka butang nga daw lisod kaayong himoon? Kon mao, palandonga ang pagtuo ni Abraham! Ang pagpamalandong sa mga ehemplo sa matinumanong mga alagad sa Diyos magpalihok kanato sa pagsundog kanila ug pagpakigsuod kang Jehova ingong atong Higala.—Heb. 12:1, 2. w16.02 1:3, 14

Tungod kay determinado si Saul nga patyon si David, kinahanglang mopili si Jonatan kon kang kinsa siya magmaunongon. Bisag may pakigsaad siya kang David, si Jonatan mapinasakopon usab sa iyang amahan. Apan nahibalo si Jonatan nga ang Diyos nag-uban kang David, dili kang Saul. Busa, mipili siya nga magmaunongon kang David imbes kang Saul. Iyang giingnan si David nga motago ug dayon misulti siya kang Saul ug maayong mga butang bahin kang David. (1 Sam. 19:1-6) Kon dili ta magbantay, ang atong pagkamaunongon sa nasod, eskuylahan, o team sa sport mahimo nang mas importante kanato kay sa pagkamaunongon sa Diyos. Pananglitan, si Henry ganahang magdulag chess. Ang ilang eskuylahan pirmeng kampeyon sa chess, ug gusto pod niyang modaog. Apan siya miangkon: “Anam-anam kong nahimong mas maunongon sa eskuylahan kay sa Diyos. Pirme ming may dula sa chess kada hinapos sa semana, maong wala na koy panahon sa pagsangyaw o sa mga tigom. Busa midesisyon ko sa pagbiya sa among team.”—Mat. 6:33. w16.02 3:10, 12

Ingong batan-on, dunay mga paagi aron imong mahibaloan kon kinasingkasing ba ang imong desisyon nga magpabawtismo. Pananglitan, madayag diha sa imong mga pag-ampo kon kinasingkasing ka bang nagtinguha sa pag-alagad kang Jehova. Kon regular ug espesipiko ang imong mga pag-ampo, magpakita kana nga suod ang imong relasyon kang Jehova. (Sal. 25:4) Ang usa ka importanteng paagi nga si Jehova motubag sa atong mga pag-ampo maoy pinaagi sa iyang Pulong. Nan kon atong paningkamotan nga tun-an ang Bibliya, magpakita usab kana nga gusto gyod natong mas masuod kang Jehova ug kinasingkasing nga moalagad kaniya. (Jos. 1:8) Busa pangutan-a ang imong kaugalingon: ‘Espesipiko ba ang akong mga pag-ampo? Regular ba ang akong personal nga pagtuon sa Bibliya?’ Ug kon duna moy Pamilyahanong Pagsimba, pangutan-a ang imong kaugalingon: ‘Kinabubut-on ba kong nakigbahin sa maong kahikayan?’ Ang imong tubag niining mga pangutanaha makatabang sa pagseguro kon personal ba nimong desisyon ang pagpabawtismo. w16.03 1:11, 13

Makapalipay gayod nga mabasa sa Tinuig nga Basahon ang resulta sa atong buluhaton sa tibuok kalibotan! Hunahunaa usab ang atong panaghiusa sa rehiyonal, espesyal, ug internasyonal nga mga kombensiyon, samtang atong madungog ang makapadasig nga binase sa Bibliyang mga pakigpulong ug makita ang mga drama ug mga pasundayag. Kini nga mga bahin sa programa sagad nagpasiugda sa mahigugmaong hangyo sa Diyos nga alagaron siya kutob sa atong maarangan. Ang paghandom sa kamatayon ni Jesus makapahiusa usab kanato. Agig apresasyon sa dili takos nga kalulot sa Diyos ug pagsugot sa sugo ni Jesus, kita magtigom alang nianang tinuig nga okasyon, human sa pagsalop sa adlaw sa Nisan 14. (1 Cor. 11:23-26) Ug sa mga semana una ang Memoryal, atong kobrehan ang teritoryo sa kongregasyon kutob sa atong mahimo, nga magdapit sa uban sa pagduyog kanato nianang importanteng okasyon. Ang atong tagsatagsa ka paningkamot wala tingali kaayoy epekto. Apan pinaagi sa pagtinabangay, atong matabangan ang minilyong mga tawo nga makaila sa usa nga takos sa tanang pagdayeg ug pasidungog, si Jehova! w16.03 3:4, 6, 7

Ang mga brader nga ginabansay aron sa pag-alagad diha sa kongregasyon angayng tudloan sa paghunahuna pinasukad sa mga prinsipyo sa Bibliya. Pananglitan, ibutang ta nga gihangyo sa ansiyano ang usa ka brader sa pagmentinar sa entrada sa Kingdom Hall aron kini hinlo ug dili makadisgrasya. Mahimo niyang hisgotan ang Tito 2:10 ug ipatin-aw kaniya kon sa unsang paagi ang iyang pagpanghinlo sa Kingdom Hall “makadayandayan sa pagtulon-an sa atong Manluluwas, ang Diyos.” Mahimong awhagon sab sa ansiyano ang tinun-an sa paghunahuna sa mga tigulang diha sa kongregasyon ug kon sa unsang paagi ang pagtuman sa iyang asaynment makabenepisyo kanila. Ang maong mga panaghisgot maoy bahin sa pagbansay sa tinun-an ug makatabang kaniya nga magmahunahunaon sa mga tawo imbes sa mga lagda. Siya magmalipayon kon iyang makita nga ang mga igsoon sa kongregasyon nakabenepisyo sa iyang gihimo. Dugang pa, angayng komendahan sa ansiyano ang tinun-an sa iyang paningkamot nga ipadapat ang mga sugyot. Maingon nga ang tubig makapalambo sa tanom, ang sinserong komendasyon makatabang sa tinun-an nga mouswag sa iyang pag-alagad. w15 4/15 2:7, 8

Gibati ba nimo usahay nga nag-inusara ka sa pagsagubang sa usa ka lisod nga kahimtang? Lagmit ikaw nawad-ag trabaho, gipit-os sa eskuylahan, nasakit, o nakasinatig ubang kalisdanan. Tingali nangayo kag tabang sa uban, pero nahigawad ka kay wala nila matagana ang imong gikinahanglan. Oo, ang pipila ka problema dili masulbad sa tabang lang sa tawo. Sa maong mga kahimtang, kawang ba ang tambag sa Bibliya nga ‘mosalig kang Jehova’? (Prov. 3:5, 6) Dili gayod! Ang tabang gikan sa Diyos tinuod gayod ingon sa gipakita sa daghang asoy sa Bibliya. Busa imbes mahiubos nga limitado lang ang tabang nga mahatag sa tawo, isipa ang maong mga kahimtang sama sa gibuhat ni apostol Pablo—ingong mga kahigayonan sa pagsalig kang Jehova sa bug-os ug pagtagamtam sa iyang mahigugmaong pag-atiman. Kini magpalig-on sa imong pagsalig kang Jehova ug sa imong relasyon kaniya. w15 4/15 4:3-5

Pinaagi lang sa pagpanglimbong nga mapatalikod ni Satanas ang mga tawo gikan sa mahigugmaong Diyos, si Jehova. (1 Juan 4:8) Limbongan ni Satanas ang mga tawo aron dili sila ‘magmahunahunaon sa ilang espirituwal nga panginahanglan.’ (Mat. 5:3) Sa ingon, siya “nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.” Ang usa sa kinadak-ang panglimbong ni Satanas mao ang bakak nga relihiyon. Seguradong malipay siyang makita ang mga tawo nga magsimba sa ilang katigulangan, o sa kinaiyahan, o sa mga hayop—bisan kinsa o bisan unsa gawas kang Jehova, kinsa “nagapangayo ug bug-os nga pagkamahinalaron”! (Ex. 20:5) Bisan kadtong naghunahuna nga sila nagsimba sa Diyos sa hustong paagi nagapos sa bakak nga mga pagtulon-an ug sa walay kapuslanang mga rituwal. Makaluluoy kaayo ang ilang kahimtang, sama niadtong giingnan ni Jehova: “Nganong gastoon man ninyo ang inyong kuwarta nianang . . . dili makabusog? Pamati kamo kanako . . . ug matagbaw kamo.”—Isa. 55:2, Maayong Balita Biblia. w15 5/15 1:14, 15

Si Abel lagmit namalandong sa maong saad ug nakaamgo nga dunay usa nga ‘samaran sa tikod’ aron ang katawhan mahibalik sa kahingpitan sama sa natagamtam ni Adan ug Eva sa wala pa sila makasala. Si Abel may pagtuo nga gibase sa saad sa Diyos, ug busa gidawat ni Jehova ang iyang halad. (Gen. 4:3-5; Heb. 11:4) Si Noe naluwas sa Lunop tungod sa iyang pagtuo. (Heb. 11:7) Human sa Lunop, ang iyang pagtuo nagpalihok kaniya sa paghalad ug mga hayop. (Gen. 8:20) Sama kang Abel, si Noe nagtuo gayod nga ang katawhan mahigawas ra gikan sa pagkaulipon sa sala ug kamatayon. Siya padayong naghupot ug pagtuo ug paglaom bisag nahimong daotan pag-usab ang kalibotan dihang si Nimrod mirebelde kang Jehova. (Gen. 10:8-12) Lagmit, nadasig gayod si Noe sa paghanduraw sa panahon nga ang katawhan mahigawas na sa madaogdaogong pagmando, napanunod nga sala, ug kamatayon. Kita usab mahimong “makakita” nianang maanindot nga panahon—ug hapit na kana!—Roma 6:23. w15 5/15 3:4, 6

Ang dili makontrolar nga kabalaka mahimong makadaot kanato sa pisikal ug espirituwal. Busa mosalig kita kang Jehova ug hinumdoman nato ang mga pulong sa teksto karong adlawa. Ang maayong mga pulong sa pagdasig gikan sa usa nga nakasabot kanato makapalipay sa atong kasingkasing. Ang pagpakig-estorya sa atong ginikanan, kapikas, o kasaligang higala nga may panglantaw nga susama sa Diyos mahimong makahupay sa atong kabalaka. Walay labawng makasabot sa atong kabalaka gawas kang Jehova. “Ayaw kabalaka sa bisan unsang butang,” misulat si Pablo, “apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filip. 4:6, 7) Hunahunaa kadtong nanalipod kanato batok sa espirituwal nga kadaot—mga isigkamagtutuo, ansiyano, matinumanong ulipon, manulonda, si Jesus, ug si Jehova mismo. w15 5/15 4:16, 17

Sa amihanang bahin sa templo sa Jerusalem, dihay linaw nga gitawag ug Bethzatha. Daghang masakiton ug baldado ang magtapok didto, nga naglaom nga sila milagrosong maayo. Tungod sa kaluoy, si Jesus miduol sa usa ka tawo nga dugay nang nasakit, mas dugay pa kay sa pagkinabuhi ni Jesus sa yuta. (Juan 5:6-9) Si Jesus nangutana sa masakiton kon gusto ba niyang maayo. Mitubag kini nga gusto niyang maayo apan wala siya mahibalo kon unsaon, kay walay makatabang niya sa pagtuslob sa linaw. Gisugo ni Jesus ang tawo nga buhaton ang imposible—alsahon ang iyang teheras ug molakaw. Gisunod sa tawo ang giingon ni Jesus. Gialsa niya ang iyang teheras ug milakaw. Makapalipay gayod kadto nga pasiuna sa pagabuhaton ni Jesus sa bag-ong kalibotan! Sa maong milagro, makita usab ang kaluoy ni Jesus sa mga tawo. Iyang gipangita ang mga nanginahanglan. Ang ehemplo ni Jesus angayng magtukmod kanato sa padayong pagpangita sa mga tawo sa atong teritoryo nga nagmagul-anon tungod sa daotang mga panghitabo sa kalibotan. w15 6/15 2:8-10

Ang ekspresyong “Amahan namo,” dili “Amahan nako,” nagpahinumdom kanato nga kita bahin sa “kapunongan sa mga igsoon” kinsa tinuod nga nahigugma sa usag usa. (1 Ped. 2:17) Pagkanindot kana nga pribilehiyo! Ang dinihogang mga Kristohanon, kinsa gipanganak ingong mga anak sa Diyos ug may paglaom nga mabuhi sa langit, haom nga makatawag kang Jehova nga “Amahan” sa bug-os nga diwa. (Roma 8:15-17) Ang mga Kristohanon nga may paglaom nga mabuhi sa walay kataposan sa yuta makatawag usab kang Jehova nga “Amahan.” Siya ang ilang Maghahatag ug Kinabuhi, ug siya mahigugmaong nagtagana sa panginahanglan sa tanang matuod nga mga magsisimba. Kadtong may paglaom nga mabuhi sa yuta mahimong mga anak sa Diyos sa bug-os nga diwa dihang sila mahingpit na ug makapamatuod sa ilang pagkamaunongon panahon sa kataposang pagsulay. (Roma 8:21; Pin. 20:7, 8) Ang mga ginikanan naghatag sa ilang mga anak ug maayong gasa dihang tudloan nila kini sa pag-ampo ug sa paglantaw kang Jehova ingong usa ka mahigugmaon nga langitnong Amahan. Ang mga ginikanan makatabang sa ilang mga anak nga maugmad ang suod nga relasyon kang Jehova ug kana ang labing maayong gasa nga ikahatag nila. w15 6/15 4:4-6

Aron magkinabuhing kaharmonya sa hangyo nga “luwasa kami gikan sa usa nga daotan,” kinahanglang maningkamot kita nga dili mahimong “bahin sa kalibotan [ni Satanas].” Kinahanglang dili nato ‘higugmaon ang kalibotan [ni Satanas] o ang mga butang nga anaa sa kalibotan.’ (Juan 15:19; 1 Juan 2:15-17) Ang pagbuhat niana nagkinahanglag padayong pakigbisog. Pagkamakapahupay unya kon dunggon na ni Jehova kini nga hangyo pinaagi sa pagwagtang kang Satanas ug paglaglag sa daotang kalibotan niini! Pero angay natong hinumdoman nga dihang gitambog si Satanas gikan sa langit, siya nahibalo nga mubo na lang ang iyang panahon. Kay napungot, buhaton niya ang tanan aron mabungkag ang atong integridad. Busa kinahanglang magpadayon kita sa pag-ampo nga luwason kita gikan kaniya. (Pin. 12:12, 17) Gusto ba nimo kanang malipayong kahimtang? Nan magpadayon sa pag-ampo nga balaanon sa Gingharian ang ngalan sa Diyos ug matuman ang iyang kabubut-on dinhi sa yuta. Magmasaligon nga itagana ni Jehova ang imong espirituwal ug pisikal nga mga panginahanglan. Oo, magmadeterminado nga magkinabuhing kaharmonya sa modelong pag-ampo.—Mat. 6:9-13. w15 6/15 5:12, 17, 18

Bisag dili nato bug-os masabtan ang tanang mahitabo sulod niining panahon sa pagsulay, kita makadahom nga kini maglangkit ug mga sakripisyo. Sa unang siglo, ang mga Kristohanon kinahanglang mobiya sa ilang kabtangan ug moantos sa mga kalisdanan aron maluwas. (Mar. 13:15-18) Aron makapabiling matinumanon, andam ba natong isakripisyo ang atong materyal nga mga butang? Andam ba kitang mobuhat sa bisan unsa nga ipahimo kanato aron pamatud-an ang atong pagkamaunongon kang Jehova? Hunahunaa kini! Nianang panahona, kita lamang ang magsunod sa ehemplo ni manalagnang Daniel pinaagi sa pagpadayon sa pagsimba sa Diyos bisag unsa pay mahitabo. (Dan. 6:10, 11) Kini dili ang panahon sa pagsangyaw sa “maayong balita sa gingharian.” Natapos na kana. “Ang kataposan” moabot na! (Mat. 24:14) Sa walay duhaduha ang katawhan sa Diyos magmantala ug bug-at nga mensahe sa paghukom. Mahimong maglakip kini ug mensahe nga ang daotang kalibotan ni Satanas hapit nang taposon. w15 7/15 2:3, 8, 9

Dili ta angayng matingala kon ang kalibotan magdumot kanato tungod kay kita neyutral; gipasidan-an na ta ni Jesus bahin niana. Kadaghanan sa mga magsusupak wala makasabot kon nganong importante ang isyu bahin sa Kristohanong neyutralidad. Apan alang kanato, kini ang labing hinungdanon. Ang pagkamaunongon kang Jehova nagpasabot nga kinahanglan kitang magmalig-on bisag hulgaon. (Dan. 3:16-18) Ang kahadlok sa tawo makaapektar sa tanan, bata o tigulang, apan ang mga batan-on maoy ilabinang malisdan sa pagpalahi. Kon may problema ang inyong mga anak bahin sa isyu sa pagsaludar sa bandera o nasyonalistikong mga selebrasyon, ayaw pagpanuko sa pagtabang kanila. Gamita ang Pamilyahanong Pagsimba sa pagtabang sa inyong mga anak nga masabtan ang mga isyu nga nalangkit aron maisogon nila kanang maatubang. Tabangi silang ipahayag ang ilang baroganan sa tin-aw ug matinahorong paagi. (Roma 1:16) Pakigsulti sa ilang mga magtutudlo bahin niini kon gikinahanglan. w15 7/15 3:15, 16

Ang gasa nga halad lukat ni Jesus gitagana aron “kita makabaton ug kinabuhi.” (1 Juan 4:9) Sa paghisgot niining kinalabwang ekspresyon sa gugma sa Diyos, si apostol Pablo misulat: “Si Kristo . . . namatay alang sa dili-diyosnong mga tawo sa tinudlong panahon. Kay makuli nga magpakamatay ang si bisan kinsa alang sa tawong matarong; sa pagkatinuod, alang sa maayong tawo, tingali, aduna pay mangahas pagpakamatay. Apan ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:6-8) Kining kinalabwang ekspresyon sa gugma sa Diyos naghatag sa katawhan ug kahigayonan nga mahimong inuyonan ni Jehova. Pinaagi sa lukat, gipakita ni Jehova ang iyang gugma alang sa katawhan. Kon kita naglaom nga mabuhi sa walay kataposan sa yuta ug magmatinumanon sa pag-alagad kang Jehova, makasalig ta nga ihatag niya kanato ang labing maayong kinabuhi sa bag-ong kalibotan. Busa, haom gayod nga atong isipon ang lukat ingong kinalabwang pamatuod sa way paglubad nga gugma sa Diyos kanato! w15 8/15 1:13, 15

Ang pribilehiyo nga magkinabuhi ilalom sa pagmando sa Gingharian takos sa atong paningkamot nga makigkooperar sa organisasyon ni Jehova ug mag-atiman sa teokratikanhong mga asaynment. Siyempre, ang atong kahimtang mahimong mausab. Pananglitan, ang pipila ka Bethelite sa United States giasayn sa kanataran ug karon malipayong nagtagamtam sa dagayang mga panalangin sa laing matang sa bug-os panahong pag-alagad. Tungod sa katigulangon o ubang hinungdan, ang pipila diha sa nagapanawng buluhaton giasayn ingong mga espesyal payunir. Kon kita magmakontento, mag-ampo sa Diyos alang sa tabang, ug magbuhat sa atong maarangan diha sa pag-alagad, kita magmalipayon ug makadawat ug daghang panalangin bisan niining malisod nga kataposang mga adlaw. (Prov. 10:22) Komosta sa umaabot? Tingali duna tay nahunahunaang dapit nga gusto natong puy-an sa bag-ong kalibotan, pero basig pabalhinon ta sa laing lugar. Bisan asa man kita mag-alagad ug bisan unsa man ang atong buluhaton nianang panahona, makaseguro ta nga kita magmapasalamaton, magmakontento, ug magmalipayon nga tua ta didto. w15 8/15 3:8

Si Noe nagkinabuhi sa daotang kalibotan pero wala siya makigsuod sa mga molupyo niini. Wala siya makig-uban sa mga tawong dili diyosnon. Siya ug ang pito ka membro sa iyang pamilya puliki sa paghimo sa gipabuhat sa Diyos kanila, nga naglakip sa pagtukod ug arka. Sa samang higayon, si Noe “usa [usab] ka magwawali sa pagkamatarong.” (2 Ped. 2:5) Ang pagsangyaw ni Noe, iyang pagtukod ug arka, ug iyang pagpakig-uban sa iyang pamilya nakapahimo niyang puliki sa pagbuhat sa mga butang nga makapahimuot sa Diyos. Tungod niana, si Noe ug ang iyang pamilya naluwas sa Lunop. Angay tang magpasalamat kanila kay kitang tanan karon maoy mga kaliwat niadtong nag-alagad kang Jehova—ang matinumanong si Noe, iyang asawa, iyang mga anak, ug ilang mga asawa. Sa susama, ang maunongon ug matinumanong mga Kristohanon sa unang siglo nagpabiling bulag sa dili diyosnong katawhan ug naluwas sa kalaglagan sa Jerusalem ug sa Hudiyong sistema sa mga butang niadtong 70 C.E.—Luc. 21:20-22. w15 8/15 4:17, 18

Dili tanang lingawlingaw mapuslanon, makarelaks, o makapalagsik; ug dili pod maayo ang sobra o kanunayng paglingawlingaw. Sa unsang paagi makatabang ang atong tanlag aron kita malipay ug makabenepisyo sa dalawatong kalingawan? Ang Kasulatan nagpasidaan batok sa “mga buhat sa unod.” Kana naglakip sa “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay, panag-away, pangabugho, mga pagsinta sa kasuko, mga pakigtigi, mga pagkabahinbahin, mga sekta, mga kasina, mga paghuboghubog, mga hudyaka, ug mga butang nga sama niini.” Si Pablo misulat nga “kadtong nagabuhat sa maong mga butang dili makapanunod sa gingharian sa Diyos.” (Gal. 5:19-21) Busa, pangutan-on nato ang kaugalingon: ‘Ang ako bang tanlag nagtukmod nako sa paglikay sa mga esport nga peligroso, maindigon, nasyonalistiko, o bayolente? Ang ako bang tanlag nagpasidaan nako dihang mosulay ko pagtan-awg salida nga dunay pornograpikong mga esena o nagkonsentir sa imoralidad, paghuboghubog, o espiritismo?’ w15 9/15 2:11, 12

Atong nakat-onan sa Bibliya nga ang tawo wala lalanga nga may katungod nga modesisyon para sa kaugalingon o magmaindependente sa Diyos, ug nga ang pagsalikway niining hinungdanong kamatuoran moresulta sa kadaot. Importante kaayo kini alang sa atong kaayohan. Pinaagi lamang sa pag-ila sa awtoridad sa Diyos nga atong matagamtam ang kalinaw ug kaharmonya. Pagkamahigugmaon ni Jehova nga iyang gipadayag kining hinungdanong kamatuoran! Ang usa ka mahigugmaong amahan naghunahuna gayod sa kaugmaon sa iyang mga anak, nga nagtinguha nga makabaton silag tinuod ug mapuslanong katuyoan sa kinabuhi. Ikasubo, kadaghanan sa mga tawo nabalaka sa ilang kaugmaon, o naggugol sa ilang kinabuhi sa pagpangagpas sa mga tumong nga walay dumalayong kaayohan. (Sal. 90:10) Ingong mga anak sa Diyos, gibati nato nga gihigugma gayod kita ni Jehova kay siya nagsaad kanato ug usa ka maanindot nga kaugmaon. Kana naghatag ug tinuod nga kahulogan ug katuyoan sa atong kinabuhi. w15 9/15 4:10, 11

Sa sayong bahin sa kasaysayan sa Israel, ang mga tawo may kahigayonan nga makita ug madungog kon giunsa pagtabang sa Diyos ang Israel. Si Jehova milagrosong nagluwas sa iyang katawhan gikan sa Ehipto, ug nagpildi sa daghang hari. (Jos. 9:3, 9, 10) Ang mga kaaway sa Israel wala moila nga ang Diyos mao ang nakiggubat alang sa Israel, ug busa napildi sila. Sa ulahi, ang daotang hari nga si Ahab may mga kahigayonan unta nga makita ang kamot sa Diyos. Nakita ni Ahab ang kalayo nga nahulog gikan sa langit dihang miampo si Elias nga lamyon unta ang iyang halad. Dayon, gipaila ni Elias nga taposon ni Jehova ang hulaw nga ilang nasinati, nga miingon kang Ahab: “Lugsong aron dili makahawid kanimo ang pagbundak sa ulan!” (1 Hari 18:22-45) Nakita ni Ahab nga nahitabo kining tanan pero wala gihapon niya ilha nga kadto nagpasundayag sa gahom sa Diyos. Kini ug ang ubang mga pananglitan nagtudlo kanatog importanteng leksiyon—kinahanglang makita nato ang paglihok sa kamot ni Jehova. w15 10/15 1:4, 5

Dili gyod ta magduhaduha nga kon atong sundon ang sugo sa Diyos, siya motabang kanato. Importante nga magbutang kitag pagtuo sa Usa nga tinuod nga makatabang kanato. Si Pablo nagpahinumdom kanato nga ang Diyos mao ang “usa kinsa, sumala sa iyang gahom nga nagalihok sulod kanato, makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.” (Efe. 3:20) Ang mga alagad ni Jehova maghimo sa ilang maarangan sa pagtuman sa iyang kabubut-on, pero kay nahibalo sila sa ilang limitasyon, sila masaligon nga panalanginan ni Jehova ang ilang paningkamot. Dili ba makapalipay nga ang Diyos nagauban kanato? Makadahom ba sab ta nga tubagon ang atong hangyo alang sa dugang pa nga pagtuo? Ang Bibliya nagpasalig nga makadahom kita niana kon ang ‘atong pangayoon maoy sumala sa kabubut-on sa Diyos.’ (1 Juan 5:14) Klaro, si Jehova malipay gayod niadtong bug-os nga nagsalig kaniya. Tubagon ni Jehova ang atong hangyo alang sa dugang pa nga pagtuo, molig-on pag-ayo ang atong pagtuo, ug mahimo kitang “takos sa gingharian sa Diyos.”—2 Tes. 1:3, 5. w15 10/15 2:16-18

Ang pagpamalandong sa espirituwal nga mga butang motabang sa usa sa pag-uswag ngadto sa pagkahamtong. (Heb. 5:14; 6:1) Mohuyang ang pagtuo sa usa kon diyutay rang panahon ang iyang igahin sa paghunahuna bahin kang Jehova ug Jesus. Ang maong tawo mameligrong maanod o mahilayo sa kamatuoran. (Heb. 3:12) Si Jesus nagpasidaan nga kon dili nato pamation o dawaton ang Pulong sa Diyos “uban ang maputli ug maayong kasingkasing,” kini dili nato ‘mahuptan.’ Hinunoa, kita dali rang ‘malinga sa mga kabalaka ug sa mga bahandi ug sa mga kalipayan niining kinabuhia.’ (Luc. 8:14, 15) Busa, magpadayon kita sa pagpamalandong sa Pulong sa Diyos. Kini magtukmod kanato sa pagsumbalik-silaw sa himaya ni Jehova ug sa pagsundog sa iyang mga hiyas ug personalidad nga gipadayag sa Bibliya. (2 Cor. 3:18) May molabaw pa ba niana nga kadungganan? Ang pag-uswag sa atong kahibalo sa Diyos ug pagsumbalik-silaw sa iyang himaya maoy talagsaong mga pribilehiyo, ug kini dili matapos samtang kita magpadayon sa pagsundog sa atong mahigugmaong langitnong Amahan.—Eccl. 3:11. w15 10/15 4:13, 14

Ingong ginikanan, gusto nimo nga ang imong tin-edyer magpabiling himsog sa espirituwal. Ug gusto sa Diyos nga padak-on nimo ang imong anak “sa disiplina ug sa pagdumala-sa-kaisipan [o, pahimangno] ni Jehova.” (Efe. 6:4) Busa, gamita ang imong hinatag sa Diyos nga responsabilidad sa paghimog regular nga espirituwal nga rutina. Sa pag-ilustrar: Seguroon nimo nga makaeskuyla ang imong anak kay importante ang iyang edukasyon ug gusto nimo nga maganahan siya sa pagtuon. Sa susama, seguroon sa mahigugmaong mga ginikanan nga makabenepisyo ang ilang mga anak sa pahimangno ni Jehova diha sa tigom ug sa ubang espirituwal nga mga programa. Tungod kay hinungdanon ang edukasyon gikan kang Jehova, paningkamotan nimong maugmad sa imong anak ang gugma alang sa espirituwal nga mga butang ug apresasyon sa kaalam. Maingon nga gitabangan ni Jesus ang iyang mga tinun-an, tabangan sab nimo ang imong tin-edyer nga makaugmad ug gugma sa pagtudlo sa Pulong sa Diyos ug makabatog maayong rutina sa pagsangyaw. w15 11/15 2:6

Tungod sa prinsipyo sa pagkaulo diha sa kahikayan sa Diyos, hinungdanon kaayo ang gugma. Pero ang pagkaulo kinahanglang dili ipasundayag sa maharihariong paagi. Bisag ang bana maoy ulo sa asawa, gisugo sa Bibliya ang bana nga ‘hatagan ug kadungganan’ ang iyang asawa. (1 Ped. 3:7) Ang usa ka paagi nga mapasidunggan sa bana ang iyang asawa maoy pinaagi sa pagkamahunahunaon sa panginahanglan niini ug pag-una sa gusto niini diha sa pipila ka butang. Sa pagkatinuod, ang Pulong sa Diyos nag-ingon: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efe. 5:25) Oo, gihatag ni Jesus ang iyang kinabuhi para sa iyang mga sumusunod. Kon sundogon sa bana ang mahigugmaong pagkaulo ni Jesus, mas sayon para sa asawa ang paghigugma, pagtahod, ug pagpasakop kaniya.—Tito 2:3-5. w15 11/15 4:6, 7

Sa pagkaylap sa Kristiyanidad, ang mga Kristohanon sagad makigkomunikar gamit ang Grego. Gani, ang Ebanghelyo ni Mateo, Marcos, Lucas, ug Juan, nga naundan sa inspiradong mga rekord sa gitudlo ug gibuhat ni Jesus, kaylap nga gipanagtag sa Gregong pinulongan. Busa, Grego ang pinulongan sa kadaghanan sa mga tinun-an imbes Hebreohanon. Ang mga sulat ni apostol Pablo ug ang ubang inspiradong mga basahon gisulat usab sa Grego. Makapainteres nga dihang ang mga magsusulat sa Kristohanon Gregong Kasulatan nagkutlo sa Hebreohanong Kasulatan, sagad gihimo nila kana gikan sa Septuagint. Ang maong mga pangutlo, nga usahay may diyutayng kalainan sa pagkahan-ay sa mga pulong sa Hebreohanon, bahin na karon sa inspiradong Kasulatan. Busa ang nahimo sa dili hingpit nga mga maghuhubad nahimong bahin sa inspiradong Pulong sa Diyos, usa ka Diyos nga walay gidapigang kultura o pinulongan.—Buh. 10:34. w15 12/15 1:8, 9

Ang pagsulti maoy bahin sa atong adlaw-adlawng pagkinabuhi, apan dili kinahanglang magsige na lang tag sulti. Gani, ang Bibliya nag-ingon nga dunay “panahon sa paghilom.” (Eccl. 3:7) Ang paghilom dihang nagsulti ang uban maoy timailhan sa pagtahod. (Job 6:24) Ang dili pagsulti sa kompidensiyal nga butang magpamatuod nga kita may kaalam ug pagsabot. (Prov. 20:19) Ang pagpugong sa atong dila dihang kita hagiton magpakita nga kita maalamon. (Sal. 4:4) Sa laing bahin, ang Bibliya nag-ingon usab nga dunay “panahon sa pagsulti.” (Eccl. 3:7) Kon hatagan ka sa imong higala ug nindot nga regalo, dili nimo kana tagoan. Hinunoa, ipakita nimo ang imong apresasyon pinaagi sa paggamit niana. Ikapakita nato ang atong pagkamapasalamaton sa gasa ni Jehova nga katakos sa pagsulti pinaagi sa maalamong paggamit niana. Magamit nato kana sa pagpahayag sa atong pagbati, pagsulti kon unsay atong gikinahanglan, pagdasig sa uban, ug pagdayeg sa Diyos. w15 12/15 3:4, 5

Karon, walay si bisan kinsa sa atong mga igsoon ang may “gasa sa pagpang-ayo.” (1 Cor. 12:9) Apan, ang pipila ka maayog intensiyon nga mga igsoon naghatag ug sugyot bahin sa panglawas bisag wala nato kana pangayoa. Tinuod, ang uban mohatag ug praktikal nga mga sugyot. Gibuhat kana ni Pablo dihang pirmeng magsakit ang tiyan ni Timoteo, lagmit tungod sa hugawng tubig. Apan lahi kana sa pagkombinsir sa isigka-Saksi sa paggamit ug herbal nga medisina o ubang tambal o diyeta nga lagmit dili epektibo o tingali makadaot pa. Usahay, ang pipila mangombinsir pinaagi sa pag-ingon: ‘Parehas gyod mog sakit sa akong paryente, ug mitomar siyag . . . Ug naayo siya.’ Bisan unsa pa ka sinsero ang sugyot, angay natong hinumdoman nga posibleng may dili maayong epekto ang maong tambal o paagi sa pagtambal bisan pag daghan na ang naggamit niana.—Prov. 27:12. w15 12/15 4:13

Tungod sa napanunod nga sala, kitang tanan nag-atubang sa silot nga kamatayon. (Roma 5:12) Sa kamahigugmaon, gihikay ni Jehova nga si Jesus moanhi sa yuta ug ‘makatilawg kamatayon alang sa matag tawo.’ (Heb. 2:9) Wala lang luwasa ni Jehova ang atong presenteng kinabuhi kondili naghimo siyag kahikayan aron mawagtang sa dayon ang hinungdan sa kamatayon. (Isa. 25:7, 8; 1 Cor. 15:22, 26) Ang tanan nga magpakitag pagtuo kang Jesus makadawat ug kinabuhing walay kataposan diha sa kalinaw ug kalipay ingong yutan-ong mga sakop sa Gingharian sa Diyos ubos sa pagmando ni Kristo o, para sa mga dinihogan, ingong kaubang mga magmamando ni Kristo. (Roma 6:23; Pin. 5:9, 10) Unsang ubang panalangin ang nalakip niining maong gasa gikan kang Jehova? Ang gasa ni Jehova naglakip sa pag-ayo sa tanang sakit, paghimo sa yuta nga paraiso, ug pagbanhaw sa mga patay. (Isa. 33:24; 35:5, 6; Juan 5:28, 29) Gihigugma gayod nato si Jehova ug ang iyang minahal nga Anak tungod sa paghatag kanato sa “dili-mahubit nga walay bayad nga gasa.”—2 Cor. 9:15. w16.01 2:5, 6

Sa wala pa nila madawat ang pamatuod gikan sa espiritu sa Diyos, ang dinihogang mga Kristohanon naglaom nga mabuhi sa Paraiso. Sila nangandoy sa panahon dihang hinloan na ni Jehova ang yuta, ug gusto nilang matagamtam ang mga panalangin sa umaabot. Lagmit ila pa ganing gihanduraw ang ilang kaugalingon nga nag-abiabi sa ilang nabanhawng mga minahal. Sila naghinamhinam nga mopuyo sa mga balay nga ilang gitukod ug mokaon sa mga bunga sa kahoy nga ilang gitanom. (Isa. 65:21-23) Nganong nausab man ang ilang hunahuna? Dili tungod kay nawad-an na silag gana sa maong paglaom. Dili sab tungod kay daghan silag problemang giantos dinhi sa yuta. Dili kay wala na silay ganang mabuhi dinhi, nga mora bag makapuol ang pagkinabuhi sa yuta sa walay kataposan; ni gusto lang nilang sulayan ang kinabuhi sa langit. Hinunoa, nausab ang ilang hunahuna tungod sa paglihok sa espiritu sa Diyos nga nagtawag, o nagdapit, kanila ug nag-usab sa ilang hunahuna ug paglaom. w16.01 3:11, 13

Si Jehova mao ang Usa nga Supremo, ang Maglalalang sa tanang butang, ang Usa nga nakabaton ug walay kinutobang kaalam ug gahom. Nasabtan kana ni Job. Human pangutan-a ni Jehova si Job bahin sa Iyang mga buhat sa paglalang, si Job mitubag: “Nahibaloan ko na nga ikaw makahimo sa tanang butang, ug walay hunahuna nga dili nimo makab-ot.” (Job 42:2) Mahimo ni Jehova ang bisan unsa nga gusto niyang buhaton nga walay tabang sa uban. Bisan pa niana, sukad sa sinugdan, iyang gihatagag kahigayonan ang iyang mga linalang sa pagbuhat uban kaniya aron matuman ang iyang katuyoan. Ang unang linalang sa Diyos mao ang iyang bugtong Anak. Iyang gihatagag kahigayonan ang iyang Anak sa pagtabang kaniya sa pagbuhat sa tanang ubang butang, sa langit ug sa yuta. (Juan 1:1-3, 18) Busa, gipasidunggan ni Jehova ang iyang Anak pinaagi sa paghatag niinig kahigayonan sa pagtabang kaniya sa paglalang ug pinaagi sa pagsulti sa uban bahin sa importanteng papel sa iyang Anak.—Col. 1:15-17. w16.01 5:1, 2