Nobyembre

Dihang mabasa nato nga si Abraham “tigulang ug tagbaw,” dili ta angayng mohinapos nga wala na siya mangandoyng mabuhi sa umaabot. Ang Bibliya nag-ingon bahin kaniya: “Siya nagpaabot sa siyudad nga may tinuod nga mga patukoranan, nga ang magtutukod ug magbubuhat niini nga siyudad mao ang Diyos.” (Heb. 11:10) Hunahunaa lang kon unsa ka malipayon unya si Abraham nga mabuhi sa Paraiso ug padayong magpalig-on sa iyang panaghigala kang Jehova. Seguradong malipay siya sa pagkahibalo nga ang iyang pagtuo nakatabang sa mga alagad ni Jehova sulod sa linibo ka katuigan human sa iyang kamatayon. Sa Paraiso, mahibaloan pa gani niya nga ang paagi nga nahibalik kaniya si Isaac duna diay mas dakong gihulagwayan. (Heb. 11:19) Ug iyang masayran nga ang kasakit nga iyang gibati samtang nangandam siya sa paghalad kang Isaac nakatabang sa minilyong matinumanong mga tawo sa pagsabot sa kasakit nga gibati ni Jehova dihang gihatag niya, si Jesu-Kristo, ingong lukat.—Juan 3:16. w16.02 1:15, 16

Malisdan tingali kita nga magmaunongon kang Jehova kon gitratar kita nga dili makataronganon sa usa nga may katungdanan. Lagmit giatubang kana ni Jonatan. Si Haring Saul, ang dinihogan sa Diyos, nahibalo nga ang iyang anak nakighigala kang David, apan wala siya makasabot kon ngano. Nasuko si Saul ug gipakaulawan niya si Jonatan. Pero wala mobalos si Jonatan. Nagmaunongon siya sa Diyos ug kang David, kinsa maoy mahimong sunod nga hari sa Israel. (1 Sam. 20:31-41) Sa kongregasyon sa katawhan ni Jehova karon, lagmit walay motratar kanato nga dili makataronganon. Apan, ang nagapanguna kanato mga dili hingpit ug mahimong masaypan nilag sabot ang atong gibuhat. (1 Sam. 1:13-17) Kon kita gitratar nga dili makataronganon o masaypag sabot, kinahanglang magmaunongon kita kang Jehova. w16.02 3:14, 15

Ang pipila tingali maglibog kon unsay kalainan sa pahinungod ug sa bawtismo. Pananglitan, ang ubang batan-on moingon nga sila nagpahinungod na kang Jehova pero dili pa andam magpabawtismo. Posible ba god na? Ang pagpahinungod nagpasabot nga ang usa nanaad nga moalagad kang Jehova hangtod sa hangtod. Panahon sa bawtismo, gipakita niya sa uban nga siya nakapahinungod na. Busa, ang bawtismo maoy publikong pagpahayag sa imong pribadong pagpahinungod kang Jehova nga gihimo nimo pinaagig pag-ampo. Una ka magpabawtismo, kinahanglang masabtan nimo kon unsay kahulogan sa pagpahinungod. Sa simpleng pagkasulti, dihang magpahinungod ka kang Jehova, dili na ikaw ang tag-iya sa imong kinabuhi. Nanaad ka kang Jehova nga kanunay nimong unahon ang iyang kabubut-on. Angayng seryosohon ang tanang panaad, ilabina ang panaad kang Jehova!—Mat. 5:33. w16.03 1:14, 15

Gigamit ni Pablo ang lawas sa tawo ingong pananglitan sa pagpatin-aw nga ang matag usa makatabang nga padayong mahiusa ang kongregasyon ilalom sa ulo niini, si Jesu-Kristo. Siya naghisgot bahin sa pagtinabangay “pinaagi sa matag lutahan nga naghatag sa gikinahanglan.” (Efe. 4:16) Sa unsang paagi ang matag usa kanato, bata man o tigulang, kusgan o luya, makapalambo sa panaghiusa ug espirituwalidad sa kongregasyon? Ang usa ka paagi mao ang pagpasakop ug pagtahod niadtong gitudlo ni Jesus nga mohatag ug instruksiyon sa kongregasyon, ang mga ansiyano. (Heb. 13:7, 17) Dili tingali kini kanunayng sayon. Apan, makapangayo tag giya sa Diyos. Ang iyang aktibong puwersa makatabang nato nga kinasingkasing nga paluyohan ang mga kahikayan sa kongregasyon. Busa kon usahay malisdan kita sa pagsunod sa instruksiyon nga gihatag, angay natong palandongon kon sa unsang paagi ang atong mapainubsanong pagkooperar makapalambo sa panaghiusa sa kongregasyon. Dugang pa, kon kita makigkooperar, molig-on ang atong gugma sa usag usa. w16.03 3:8, 9

Sa bata pa sila, ang pipila ka brader wala dasiga sa pagkab-ot ug espirituwal nga mga tumong. Ang kamatuoran dili gayod maoy panguna sa ilang kinabuhi. (Mat. 10:24) Busa, ang usa ka ansiyano kinahanglang mogahig panahon sa pagpakighigala sa brader nga gusto niyang bansayon alang sa pribilehiyo sa kongregasyon ug sultihan siya nga gikinahanglan siya sa kongregasyon. Dayon, matag karon ug unya, ang ansiyano makig-estorya sa brader ug hisgotan uban niya ang espesipikong mga teksto nga makatabang sa brader sa paghunahuna bahin sa iyang dedikasyon kang Jehova. (Eccl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Ang ansiyano mahimong mangutana kaniya, ‘Unsay imong gisaad kang Jehova dihang imong gipahinungod ang imong kaugalingon kaniya?’ Matandog sa ansiyano ang kasingkasing sa brader pinaagi sa pagsukna, ‘Unsa kahay gibati ni Jehova dihang nabawtismohan ka?’ (Prov. 27:11) ‘Unsay gibati ni Satanas?’ (1 Ped. 5:8) Dili gayod angayng pakamenoson sa mga ansiyano ang epekto sa pagbasag maayong pagkapili nga mga teksto. w15 4/15 2:9, 11

Nganong may mga higayon nga dili dayon ihatag ni Jehova ang atong gipangayo? Hinumdomi nga gipakasama niya ang atong relasyon kaniya nianang sa amahan ug anak. (Sal. 103:13) Dili angayng damhon sa anak nga mahatag dayon sa iyang amahan ang tanan niyang pangayoon. Tingali ang pipila ka hangyo sa anak maoy mga kapritso lang. Ang ubang hangyo tingali ihatag ra sa hustong panahon. May mga hangyo usab nga dili makaayo sa anak o sa uban. Kon ihatag dayon sa amahan ang matag hangyo sa iyang anak, ang ilang relasyon mahisama na nianang sa agalon ug ulipon, nga ang anak maoy agalon. Sa samang paagi, mahimong tugotan usab ni Jehova nga molabay ang panahon una niya tubagon ang atong mga pag-ampo. Nahibalo siya kon unsay makaayo kanato kay siya ang atong maalamong Maglalalang, mahigugmaong Agalon, ug langitnong Amahan. Kon tubagon dayon niya ang tanan natong gihangyo, morag kita na ang agalon.—Isa. 29:16; 45:9. w15 4/15 4:6, 7

Samtang nagakaduol ang kataposan niining sistemaha sa mga butang, gusto ni Satanas nga dili kita magmabinantayon, nga “magmaluloton” kita sa atong kaugalingon pinaagi sa pagpaningkamot nga mahimong malamposon niining kalibotana, sa ingon, mawala ang atong pagbati sa pagkadinalian. Ayawg tugoting mahitabo kana kanimo! Hinunoa, “magpadayon sa pagbantay.” (Mat. 16:22, 23; 24:42) Ayawg palimbong sa propaganda ni Satanas nga dugay pa ang kataposan—o nga dili kini moabot. Si Satanas naningkamot nga patuohon ta nga para sa Diyos, kita dili angayng higugmaon ug ang atong mga sala dili mapasaylo. Bahin kana sa malimbongong propaganda ni Satanas. Sa pagkatinuod, kinsa ang dili gayod angayng higugmaon ni Jehova? Si Satanas. Kinsa ang dili gayod mapasaylo? Si Satanas gihapon. Ang Bibliya nagpasalig: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Heb. 6:10) Gipabilhan ni Jehova ang tanan natong paningkamot nga pahimut-an siya, ug ang atong pag-alagad kaniya dili makawang. (1 Cor. 15:58) Busa dili gayod kita magpalingla sa propaganda ni Satanas. w15 5/15 1:16-19

Si Abraham daghag pamatuod nga si Jehova motuman gayod sa Iyang mga saad mao nga sama rag nakita niya ang mga butang nga wala pa mahitabo. Ang pagtuo ni Abraham sa mga saad sa Diyos nagpalig-on sa iyang determinasyon nga buhaton ang kabubut-on sa Diyos. Tungod sa pagtuo, siya mibiya sa siyudad sa Ur ug wala mopuyo nga permanente sa bisan unsang siyudad sa Canaan. Sama sa Ur, ang maong mga siyudad huyang ug pundasyon tungod kay ang mga magmamando niini dili mga alagad ni Jehova. (Jos. 24:2) Sa tibuok kinabuhi ni Abraham, siya “nagpaabot sa siyudad nga may tinuod nga mga patukoranan, nga ang magtutukod ug magbubuhat niini nga siyudad mao ang Diyos.” (Heb. 11:10) Siya “nakakita” sa iyang kaugalingon nga permanenteng nagpuyo sa yuta nga gimandoan ni Jehova. Si Abel, Enoc, Noe, Abraham, ug ang ubang sama nila nagtuo sa pagkabanhaw ug naglaom nga mabuhi sa yuta ubos sa pagmando sa Gingharian sa Diyos, ang “siyudad nga may tinuod nga mga patukoranan.” Ang pagpamalandong sa maong mga panalangin nagpalig-on sa ilang pagtuo kang Jehova.—Heb. 11:15, 16. w15 5/15 3:8, 9

Si Jehova nagpasundayag sa iyang gahom pinaagi kang Jesu-Kristo sa talagsaong mga paagi. Ang upat ka Ebanghelyo nagtaganag makapalig-on sa pagtuo nga mga detalye bahin sa pipila sa mga milagro nga gihimo ni Kristo. Lagmit, mihimo siyag uban pang milagro. (Mat. 9:35; Luc. 9:11) Oo, ang gahom sa Diyos nakita diha kang Jesus. Busa, si apostol Pablo nakaingon: “Si Kristo ang gahom sa Diyos.” Apan, unsay epekto sa mga milagro ni Jesus sa atong kinabuhi? Si apostol Pedro miingon nga si Jesus mihimog mga milagro, o “gamhanang mga buhat.” (Buh. 2:22) Ang gamhanang mga buhat nga gihimo ni Jesus sa yuta maoy mga pasiuna sa mas daghang panalangin nga moabot ubos sa iyang pagmando. Kini naglandong sa mga milagro nga himoon ni Jesus sa bag-ong kalibotan sa Diyos! Ang iyang mga milagro motabang usab kanato sa pagsabot bahin sa iyang mga hiyas ug nianang sa iyang Amahan. w15 6/15 1:1, 2

Kay naamgohan ni Jesus nga ang iyang Amahan, si Jehova, maoy nag-ayo sa babaye, mabination siyang miingon: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.” (Mar. 5:34) Pagkamabination ni Jesus! Atong makita nga gimahal niya ang mga masakiton. Apan lahi si Satanas. Gusto ta niyang patuohon nga wala kita higugmaa ug dili ta bililhon. Pinaagi sa mga milagro ni Jesus, klaro niyang gipamatud-an nga siya mahunahunaon kanato ug sa atong mga problema. Maluluy-on gayod siya nga Hari ug Hataas nga Saserdote! (Heb. 4:15) Lagmit dili sayon para nato nga masabtan ang pagbati sa mga nag-antos ug laygay nga sakit, ilabina kon wala pa nato kini masinatii. Pero hinumdoman nato nga si Jesus naluoy sa mga masakiton bisag wala gayod siya masakit. Hinaot nga atong sundogon ang ehemplo ni Jesus, kutob sa atong maarangan.—1 Ped. 3:8. w15 6/15 2:11, 12

Pagkadako sa atong pribilehiyo nga mahibalo sa personal nga ngalan sa Diyos ug magdala niana ingong “katawhan alang sa iyang ngalan.” (Buh. 15:14; Isa. 43:10) Kita naghangyo sa atong langitnong Amahan: “Pagabalaanon unta ang imong ngalan.” (Mat. 6:9) Ang imong paghangyo niana magpalihok kanimo sa pagpangayog tabang kang Jehova nga makalikay sa pagbuhat o pagsultig bisan unsa nga makapasipala sa iyang balaang ngalan. Sama sa giingon sa teksto karong adlawa, dili nato gustong mahisama niadtong pipila sa unang siglo nga wala magkinabuhi nga kaharmonya sa ilang gisangyaw. Unsay gikinahanglan aron ang ngalan sa Diyos bug-os nga mabalaan ug mahinloan sa tanang pasipala? Aron mahitabo kana, kinahanglang molihok si Jehova sa pagwagtang sa tanan nga tinuyong mosalikway sa iyang pagkasoberano. (Ezeq. 38:22, 23) Ang katawhan anam-anam nga mahimong hingpit. Naghinamhinam gayod kita sa panahon dihang ang tanang intelihenteng linalang mag-isip sa ngalan ni Jehova nga balaan! Sa kataposan, ang atong mahigugmaong langitnong Amahan “mahimong tanang butang ngadto sa tanan.”—1 Cor. 15:28. w15 6/15 4:7, 10

Gawas nga kini nagtumong sa yuta, ang terminong “tumbanan sa tiil” gigamit usab sa simbolikong paagi diha sa Hebreohanong Kasulatan sa paghubit sa karaang templo nga gigamit sa mga Israelinhon. (1 Cron. 28:2; Sal. 132:7) Ang templo nahimutang sa yuta ug matahom gayod sa mga mata ni Jehova kay kini nagsilbing sentro sa matuod nga pagsimba. Busa kini naghimaya sa dapit sa mga tiil ni Jehova. (Isa. 60:13) Karon, ang sentro sa matuod nga pagsimba dili na ang literal nga templo sa yuta. Hinunoa, may espirituwal nga templo nga labawng naghimaya kang Jehova kay sa bisan unsang tinukod. Usa kini ka kahikayan nga nagpaposible nga mapasig-uli ang mga tawo ngadto sa Diyos pinaagi sa pagkasaserdote ug halad ni Jesu-Kristo. Nagsugod kini niadtong 29 C.E. dihang gibawtismohan si Jesus ug gidihogan ingong Hataas nga Saserdote sa dakong espirituwal nga templo ni Jehova.—Heb. 9:11, 12. w15 7/15 1:1-3

Kini maoy panahon sa pagganti sa mga matinumanon ug pagsilot niadtong wala magmatinumanon. (Mat. 24:46, 47, 50,51; 25:19, 28-30) Sumala sa Mateo, gitapos ni Jesus ang iyang gisulti bahin sa mga ilhanan pinaagi sa pag-asoy sa ilustrasyon sa mga karnero ug kanding: “Inig-abot sa Anak sa tawo diha sa iyang himaya, ug ang tanang manulonda uban kaniya, nan siya molingkod sa iyang mahimayaong trono. Ug ang tanang kanasoran pagatigomon sa iyang atubangan, ug iyang pagalainon ang katawhan gikan sa usag usa, ingon sa usa ka magbalantay nga magalain sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.” (Mat. 25:31-33) Unsang paghukom ang ipahayag ngadto sa mga karnero ug kanding? Ang ilustrasyon natapos niining mga pulonga: “Kini sila [mga kanding] mamahawa ngadto sa walay kataposang kalaglagan, apan ang mga matarong ngadto sa kinabuhing walay kataposan.”—Mat. 25:46. w15 7/15 2:11, 12

Sagad ganahan ta sa talan-awon, kultura, pinulongan, ug pagkaon sa nasod diin kita nagdako. Apan, angay natong likayan ang tinamdan nga ang ato ang labing maayo. Alang sa atong kalipay, si Jehova naglalang ug lainlaing butang. (Sal. 104:24; Pin. 4:11) Busa nganong moinsistir nga ang usa ka paagi sa pagbuhat sa mga butang mas maayo kay sa lain? Gusto sa Diyos nga ang tanang matang sa tawo makadangat sa tukmang kahibalo sa kamatuoran ug makabaton ug kinabuhing walay kataposan. (Juan 3:16; 1 Tim. 2:3, 4) Ang pagkaandam mamati sa mga ideya sa uban makapalipay kanato ug makapanalipod sa atong panaghiusa. Samtang magmaunongon kita kang Jehova, dili kita angayng mag-apil-apil sa mga kontrobersiya sa kalibotan. Wala tay gidapigan. Pagkamapasalamaton nato kang Jehova nga iya tang gipahigawas sa makapabahin, mapahitas-on, ug maindigong mga buhat nga kaylap kaayo sa kalibotan ni Satanas! w15 7/15 3:17, 18

Daghan kaayo ang mga paagi nga ikapadayag nato ang atong gugma kang Jehova. Pananglitan, atong ikapakita ang atong gugma sa Diyos ug sa mga tawo pinaagi sa masibotong pagpakigbahin sa pagsangyaw sa Gingharian. (Mat. 24:14; 28:19, 20) Atong ikapakita nga gihigugma gayod nato si Jehova pinaagi sa paglahutay sa mga pagsulay. (Sal. 84:11; Sant. 1:2-5) Kon makasinati tag grabeng kalisdanan, makaseguro kita nga ang Diyos nahibalo sa atong pag-antos ug motabang kanato, kay kita bililhon kaniya. (Sal. 56:8) Ang atong gugma kang Jehova magtukmod kanato sa pagpamalandong sa iyang kalalangan ug sa ubang kahibulongang mga buhat. Atong ikapakita nga atong gihigugma ang Diyos ug gipabilhan ang iyang Pulong pinaagi sa makugihong pagtuon sa Bibliya. Ang atong gugma kang Jehova magpalihok kanato sa pag-ampo kanunay ug sa pagpalig-on sa atong relasyon kaniya. Ug mas molalom ang atong gugma sa Diyos kon atong palandongon ang halad lukat nga iyang gitagana alang sa atong mga sala. (1 Juan 2:1, 2) Kini maoy pipila lang sa mga paagi nga atong ikapakita ang atong gugma kang Jehova agig pagpabili sa iyang way paglubad nga gugma kanato. w15 8/15 1:6, 17, 18

Sa bag-ong kalibotan, may mga higayon tingali nga kinahanglan tang magmapailobon. Pananglitan, mabalitaan tingali nato nga ang pipila nalipay kaayo kay ang ilang mga paryente ug higala nabanhaw na. Pero, kita tingali kinahanglan pang maghulat sa pagkabanhaw sa atong mga minahal. Kon kana ang kahimtang, magmalipayon ba kita para sa uban ug magmapailobon? (Roma 12:15) Ang atong pagkamapailobon sa katumanan sa mga saad ni Jehova karon makatabang kanato nga magmapailobon sa umaabot. Makapangandam sab kita sa kinabuhi sa bag-ong kalibotan pinaagi sa atong pagkamapailobon maylabot sa mga kausaban sa atong pagsabot sa kamatuoran. Kita ba makugihong nagtuon ug nagmapailobon samtang nagakatin-aw ang atong pagsabot sa mga kamatuoran sa Bibliya karon? Kon mao, lagmit dili kita malisdan sa pagpakitag pagkamapailobon sa bag-ong kalibotan sa matag higayon nga ipadayag ni Jehova ang iyang kinahanglanon alang sa katawhan.—Prov. 4:18; Juan 16:12. w15 8/15 3:9, 10

Si apostol Pablo nagsulat sa mga Kristohanon sa Efeso bahin sa panginahanglan nga mouswag sa espirituwal. Siya nagdasig kanila sa pagpangab-ot aron “makadangat sa pagkausa sa pagtuo ug sa tukmang kahibalo sa Anak sa Diyos, sa pagkahingkod nga tawo, sa gidak-on nga iya sa kabug-osan ni Kristo.” (Efe. 4:13) Sa dihang gisulat kana ni apostol Pablo, ang kongregasyon sa Efeso taudtaod nang natukod. Daghan sa mga tinun-an didto ang hamtong na sa espirituwal. Apan, ang pipila kinahanglan pang mouswag ngadto sa pagkahamtong. Susama niana ang situwasyon sa mga Saksi ni Jehova karon. Daghang igsoon ang dugay nang nag-alagad sa Diyos ug hamtong na sa espirituwal. Pero dayag nga duna pay dili hamtong. Pananglitan, linibo ang mabawtismohan kada tuig, busa duna pay kinahanglang mangab-ot sa pagkahamtong. Komosta sa imong bahin?—Col. 2:6, 7. w15 9/15 1:2, 3

Daghan ang mibati nga ang kasarangan ug regular nga ehersisyo makaayo sa panglawas ug makapalagsik sa lawas ug hunahuna. Kon gusto tang mag-ehersisyo nga uban sa grupo, himoon ba nato kana uban kang bisan kinsa na lang? Ang Proverbio 13:20 nagtambag: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” Dili ba nagsugyot kini nga angay natong gamiton ang atong nabansay sa Bibliya nga tanlag dihang mamilig kalingawan? Maayo sab nga palandongon kon kanus-a maglingawlingaw. Giuna ba nimo ang paglingawlingaw inay ang teokratikanhong mga kalihokan, sama sa tigom, pagsangyaw, ug personal nga pagtuon? O gisal-ot lang nimo ang teokratikanhong mga kalihokan samtang naglingawlingaw? Unsay imong mga prayoridad? Si Jesus miingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mat. 6:33) Ang imo bang tanlag nagtukmod nimo sa pagtakdag mga prayoridad nga nahiuyon sa tambag ni Jesus? w15 9/15 2:13, 15

Kana maoy tukma sa panahon nga tambag nga may positibong giya. Gipasidan-an ni Jehova si Cain dihang nakita niya nga may kiling kini sa pagbuhat ug daotan. Ikasubo, si Cain wala mamati sa pasidaan, ug siya nag-antos tungod niana. (Gen. 4:11-13) Dihang ang sekretaryo ni Jeremias nga si Baruk mibatig kakapoy ug kahigawad, gitambagan siya ni Jehova aron makita niya kon unsa gayoy hinungdan sa iyang problema. Dili sama kang Cain, si Baruk midawat sa tambag ni Jehova, ug busa naluwas ang iyang kinabuhi. (Jer. 45:2-5) “Ang gihigugma ni Jehova iyang ginadisiplina; sa pagkatinuod, iyang ginakastigo ang matag usa nga iyang gidawat ingong anak,” misulat si Pablo. (Heb. 12:6) Pero ang disiplina wala lamang maglangkit ug silot. Kini adunay lainlaing matang. Sa Bibliya, dunay daghang pananglitan sa matinumanong mga alagad nga nakasinatig grabeng mga pagsulay nga lagmit naglangkit ug disiplina, ug kana nagbansay kanila. w15 9/15 4:12, 13

Maalamong giila sa mga Gabaonhon nga ang matuod nga Diyos maoy nagpaluyo sa mga Israelinhon. Si Rahab usab nakakita sa kamot sa Diyos. Human mahibaloi kon giunsa pagluwas ni Jehova ang iyang katawhan, giingnan niya ang duha ka Israelinhong espiya: “Nahibalo ako nga ihatag gayod ni Jehova kaninyo ang yuta.” Bisag mameligro ang iyang kinabuhi, siya nagpakitag pagtuo nga luwason siya ni Jehova ug ang iyang pamilya. (Jos. 2:9-13; 4:23, 24) Kini ug ang daghan pang pananglitan sa Bibliya makatabang nato sa pagsabot sa kahulogan sa pagkakita sa Diyos o sa iyang kamot. Samtang kita makaila kaniya, kita usab makakita sa iyang kamot kay atong makita ang iyang mga hiyas ug gibuhat pinaagi sa “mga mata sa [atong] kasingkasing.” (Efe. 1:18) Seguradong gusto natong mahisama niadtong klarong nakakita kaniadto ug karon sa pagpaluyo ni Jehova sa iyang katawhan. w15 10/15 1:6, 7, 9

Bisag si Marta lang ang babayeng ginganlan sa Bibliya nga gihigugma ni Jesus, may lain pang diyosnong mga babaye nga gipakitaan usab ni Jesus ug putli ug dili mahakogong gugma, sama sa iyang minahal nga inahan, si Maria, ug ang igsoon ni Marta nga si Maria. (Juan 19:25-27) Nan, nganong ingon man niana ang paghisgot kang Marta diha sa Ebanghelyo? Gihigugma ni Jesus si Marta dili lang tungod sa iyang pagkamaabiabihon ug pagkakugihan kondili tungod usab sa iyang espirituwalidad. Siya nagtuo gayod sa gitudlo ni Jesus. Si Marta wala magduhaduha nga si Jesus ang gisaad nga Mesiyas. (Juan 11:21-27) Ug sama natong tanan, siya dili hingpit. Sa usa ka higayon, samtang giabiabi nila si Jesus sa ilang panimalay, giingnan niya si Jesus nga tul-iron ang usa ka situwasyon nga iyang gituohang sayop. Si Marta miingon: “Ginoo, walay bale ba kanimo nga gipasagdan ako sa akong igsoong babaye nga nag-inusara sa pag-atiman sa mga butang? . . . Sultihi siya nga motabang kanako.”—Luc. 10:38-42. w15 10/15 3:1, 2

Kon kita padayong mamalandong sa espirituwal nga mga butang, magpabilin ang atong kadasig sa kamatuoran. Sa ingon, kita makadasig sa atong mga igsoon ug sa mga interesado nga atong mahibalag sa kanataran. Ang pagpamalandong sa kinadak-ang gasa sa Diyos, ang halad lukat ni Jesus, motabang kanato sa pagpabili sa pribilehiyo nga makabatog suod nga relasyon sa atong Balaang Amahan, si Jehova. (Roma 3:24) Si Mark, nga taga-South Africa, kinsa nabilanggo sulod sa tulo ka tuig tungod sa neyutralidad, miingon: “Ang pagpamalandong ikatandi sa usa ka kulbahinam nga panaw. Kon kanunay tang mamalandong sa espirituwal nga mga butang, mas daghan tag mahibaloan bahin sa atong Diyos, si Jehova. Usahay kon medyo mahigawad ko o mabalaka sa akong kaugmaon, akong basahon ang Bibliya ug pamalandongon ang usa ka teksto. Kini makapagaan sa akong gibati.” w15 10/15 4:15

Kon nahiangay, ipatin-aw ngadto sa imong anak kon nganong gihimo nimo ang usa ka lagda o desisyon. Dihang masabtan sa imong tin-edyer ang imong panghunahuna bahin niana, mas dakog purohan nga kinabubut-on siyang mosunod kanimo. “Kon mohatag kag mga rason, matukmod ang mga tin-edyer sa pagsalig kanimo kay ilang nakita nga ang imong mga desisyon makataronganon, dili mahariharion,” miingon si Barry, nga may upat ka anak. Ang usa ka tin-edyer mohingkod usab, nga makaugmad ug “gahom sa pagpangatarongan.” (Roma 12:1) Si Barry miingon: “Ang mga tin-edyer kinahanglang makakat-on sa paghimog maayong mga desisyon nga binase sa rason imbes sa emosyon.” Kon mapainubsanon kang mohatag ug rason sa imong mga desisyon, masabtan sa imong tin-edyer nga giila nimo nga nagkahamtong na siya, ug makakat-on siya sa pagdesisyon gamit ang iyang “gahom sa pagpangatarongan.” w15 11/15 2:11

Sa tibuok kalibotan, minilyon ang nagasimba kang Jehova ug nagapamatuod bahin sa iyang ngalan ug katuyoan. Unsay angayng panglantaw sa matag magsisimba ni Jehova sa iyang isigka-Saksi? (Roma 12:10) Si apostol Pedro misulat: “Karon nga nalunsay na ninyo ang inyong mga kalag pinaagi sa inyong pagkamasinugtanon sa kamatuoran uban sa dili-salingkapaw nga inigsoong pagbati ingong sangpotanan, mainiton nga maghigugmaay sa usag usa gikan sa kasingkasing.” Giingnan sab niya ang iyang isigkamagtutuo: “Labaw sa tanang butang, batoni ang mainit nga gugma alang sa usag usa.” (1 Ped. 1:22; 4:8) Tungod kay duna kitay mainitong gugma sa atong isigkaalagad ni Jehova, kita maoy usa ka talagsaon nga tibuok kalibotang organisasyon. Dugang pa, kay kita nahigugma kang Jehova ug nagsunod sa iyang mga sugo, gitabangan ta niya pinaagi sa labing puwersadong gahom sa uniberso, ang iyang balaang espiritu, o aktibong puwersa. Kini nakatabang kanato nga matagamtam ang talagsaong panaghiusa ingong tinuod nga internasyonal nga panag-igsoonay.—1 Juan 4:20, 21. w15 11/15 4:8, 9

Si Jehova dili moinsistir nga magtuon tag espesipikong pinulongan aron mailhan siya ug mahibaloan ang iyang katuyoan. (Pin. 7:9, 10) Makapugong ba sa Diyos sa pagpakigkomunikar sa mga tawo ang lainlaing pinulongan ug diyutayng kalainan sa paghubad? Dili. Pananglitan, tingali pipila lang ka pulong ang atong nahibaloan sa orihinal nga pinulongang gigamit ni Jesus. (Mat. 27:46; Mar. 5:41; 7:34; 14:36) Pero giseguro ni Jehova nga mahubad ang mensahe ni Jesus sa Grego ug, sa ngadtongadto, sa ubang pinulongan. Sa ulahi, ang mga manuskrito sa Bibliya balikbalik nga gikopya sa mga Hudiyo ug mga Kristohanon, nga nagpreserbar sa balaang mga sinulat. Gihubad kini sa mas daghan pang pinulongan. Si John Chrysostom niadtong ikaupat/ikalimang siglo C.E. miingon nga sa iyang adlaw, ang mga pagtulon-an ni Jesus gihubad sa mga pinulongan sa mga taga-Sirya, Ehipto, India, Persia, Etiopia, ug uban pang katawhan. w15 12/15 1:10, 11

Tingali makapadasig ang atong mga pulong, apan kon isulti nato kana sa sayop nga panahon, basin mahimo kanang walay kapuslanan. Pananglitan, niadtong Marso 2011 usa ka linog ug tsunami ang mihapak sa sidlakang Japan, ug daghang siyudad ang nawala sa mapa. Kapig 15,000 ang nangamatay. Bisag naapektohan usab ang mga Saksi ni Jehova, ilang gipahimuslan ang kahigayonan sa paggamit sa Bibliya aron hupayon ang mga nagbangotan. Apan, daghan kanila ang debotadong mga Budhista ug diyutay rag nahibaloan sa Bibliya. Nasabtan sa mga igsoon nga dili kadto ang hustong panahon nga sultian ang mga biktima bahin sa pagkabanhaw. Hinunoa, gigamit nila ang ilang gasa sa pagsulti sa paghupay sa mga tawo ug pagpatin-aw pinasukad sa Bibliya kon nganong nahitabo ang dili maayong mga butang sa inosenteng mga tawo. w15 12/15 3:7

Ikasubo, niining hakog nga kalibotan, gipahimuslan sa pipila ang pagkasakit sa uban aron manguwarta. Ang ubang indibiduwal o kompaniya nag-awhag sa paggamit ug mahalong mga produkto aron makaganansiya silag dako. Para sa tawong nasakit kinsa gusto gayong maayo o mabuhi pag dugay, kini nga “tambal” morag makapadani. “Ang usa nga maalamon” ilabinang mag-amping kon ang “pulong,” o sugyot, naggikan sa usa nga kuwestiyonableg kuwalipikasyon. “Ang usa nga maalamon” mangatarongan tingali: ‘Miingon siya nga epektibo kuno ning maong bitamina, herbal nga tambal, o diyeta, pero duna bay igong pamatuod ana? Kon epektibo ni sa uban, segurado bang makaayo ni nako? Kinahanglan bang mag-research pa kog dugang o mokonsultag espesyalista?’—Deut. 17:6. w15 12/15 4:14, 15

Nahibalo si Pablo nga kon atong dawaton ang talagsaong gugma ni Kristo, kini magtukmod, o magpalihok, kanato sa pagkinabuhi alang kaniya. Dihang bug-os natong masabtan kon unsay nahimo ni Jehova alang kanato ug ang atong kasingkasing mapalihok sa iyang gugma, gusto natong tibuok kalag nga magkinabuhi alang kang Kristo Jesus. Unsaon nato kana pagpakita? Kadtong nahigugma kang Jehova napalihok sa pagsundog kang Kristo, nga nagsunod pag-ayo sa iyang mga tunob. (1 Ped. 2:21; 1 Juan 2:6) Pinaagi sa atong pagkamasinugtanon, atong gipamatud-an ang atong gugma alang sa Diyos ug kang Kristo. Si Jesus miingon: “Siya nga nakabaton sa akong mga sugo ug nagsunod niini, siya mao ang nahigugma kanako. Sa ingon usab siya nga nahigugma kanako higugmaon sa akong Amahan, ug ako mahigugma kaniya.” (Juan 14:21; 1 Juan 5:3) Maong pangutan-a ang imong kaugalingon: ‘Sa unsang mga paagi nga ako nagasunod sa tunob ni Kristo Jesus? Unsa pay kinahanglan nakong pauswagon?’ Hinungdanon ang maong pagsusi kay kanunay kitang ginaimpluwensiyahan sa kalibotan sa pagsundog kanila.—Roma 12:2. w16.01 2:7-9

Gibati ba nimo nga dasig kaayo ka sa ministeryo? Ikaw ba kugihang estudyante sa Pulong sa Diyos nga gustong mosusi sa “lawom nga mga butang sa Diyos”? (1 Cor. 2:10) Nakita ba nimo nga gipanalanginan pag-ayo ni Jehova ang imong ministeryo? Duna ka bay nagdilaab nga tinguha sa pagbuhat sa kabubut-on ni Jehova? Gibati ba nimo nga duna gyod kay dakong responsabilidad sa pagtabang sa uban sa espirituwal nga paagi? Imo bang nasinati nga personal kang gitabangan ni Jehova? Kon oo ang imong tubag niining mga pangutanaha, nagpasabot ba kini nga gidapit ka na nga moadto sa langit? Wala. Ngano? Tungod kay gibati usab kini sa mga dili dinihogan. Ang espiritu ni Jehova nagalihok usab niadtong may yutan-ong paglaom. Sa pagkatinuod, kon dili ka segurado nga duna kay langitnong pagkatinawag, kana nagpasabot nga wala ka dapita. w16.01 3:14, 15

Si Jesus malipayong nagbuhat uban sa iyang Amahan, nga nagakalipay tungod sa iyang mga nahimo ug sa pagkahibalo nga siya gikahinangpan ni Jehova. Komosta sa atong bahin? Si Jesus miingon nga dunay kalipay sa paghatag ug pagdawat. (Buh. 20:35) Nalipay kita sa pagdawat sa kamatuoran, maingon man sa pagpaambit niana sa uban. Samtang ginapaambit nato sa uban ang kamatuoran sa Bibliya, atong makita ang kalipay nga gibati niadtong gutom sa espirituwal dihang ilang nasabtan ug giapresyar ang atong Diyos ug ang bililhong kamatuoran diha sa iyang Pulong. Nalipay kitang makita nga sila nag-usab sa ilang hunahuna ug paagi sa pagkinabuhi. Atong nasabtan nga importante kaayo ang pagpaambit sa maayong balita. Pinaagi niini, kadtong napasig-uli ngadto sa Diyos makabaton ug kinabuhing walay kataposan. (2 Cor. 5:20) Duna pa bay mas makapalipay ug makapatagbawng buluhaton kay sa pagtabang sa uban nga makabaton ug kinabuhing walay kataposan? w16.01 5:6, 7