Disyembre

Si Abraham tulo ka higayon nga gitawag nga higala sa Diyos. (2 Cron. 20:7; Isa. 41:8; Sant. 2:23) Gani, ang maong matinumanong tawo mao ray espesipikong gitawag sa Bibliya nga higala sa Diyos. Nan, angay ba tang mohinapos nga si Abraham lang ang tawo nga nahimong higala ni Jehova? Dili, kay ang Bibliya nagpakita nga ang matag usa kanato puwedeng mahimong higala sa Diyos. Sa Bibliya, dunay daghang asoy bahin sa matinumanong mga lalaki ug babaye nga nahadlok kang Jehova, nagtuo kaniya, ug nahimong suod niyang mga higala. Si apostol Pablo misulat bahin sa ‘bagang panganod sa mga saksi.’ (Heb. 12:1) Kining tanang lainlaing indibiduwal maoy mga higala sa Diyos. Ilang natagamtam ang maanindot nga pribilehiyo nga mahimong higala sa Diyos. Hinaot nga padayon natong sundogon ang maong mga pananglitan sa pagtuo. (Heb. 6:11, 12) Samtang buhaton nato kana, makalaom kita ug usa ka dakong ganti—ang pagkahimong suod nga higala ni Jehova hangtod sa hangtod! w16.02 2:1, 2, 19

Hunahunaa nga giregalohan kag awto sa imong higala. Iyang gihatag nimo ang mga papeles ug siya miingon: “Akoy magkupot sa yawi. Ug akoy modrayb sa awto, dili ikaw.” Unsa kahay imong bation? Karon, hunahunaa kon unsay gidahom ni Jehova sa usa nga nagpahinungod kaniya, kinsa nanaad: “Akong ihatag nimo ang akong kinabuhi. Ikaw nay tag-iya nako.” Komosta man kon ang maong tawo mosupak kang Jehova, tingali tinagotagong makigdeyt sa usa ka dili magtutuo? O kaha modawat siyag trabaho nga makalimite sa iyang panahon alang sa ministeryo o sa pagtambong sa tigom? Dili ba morag siya lang gihapon ang nagkupot sa yawi sa awto? Ang tawong nagpahinungod kang Jehova, sa diwa, nag-ingon: “Ikaw nay tag-iya sa akong kinabuhi. Kon magkasumpaki ang imong gusto ug ang akong gusto, ikaw maoy masunod.” Mao kanay panghunahuna ni Jesus, sumala sa giingon sa teksto karong adlawa. w16.03 1:16, 17

Mga 3,000 ka tuig kanhi, ang manalagnang si Elias nagdapit sa batan-ong si Eliseo nga mahimong iyang tig-alagad. Gidawat dayon kana ni Eliseo ug matinumanon siyang naghimo sa ubos nga mga buluhaton alang sa tigulang nga manalagna. (2 Hari 3:11) Dayon, human sa mga unom ka tuig nga pagbansay, nasayran ni Eliseo nga talitapos na ang buluhaton ni Elias sa Israel. Nianang higayona, giawhag ni Elias ang iyang nabansay pag-ayo nga kauban nga dili na mosunod kaniya, apan si Eliseo determinadong mounong sa iyang magtutudlo. Kon ikaw usa ka batan-ong brader, sa unsang paagi masundog nimo si Eliseo karon? Dawata dayon ang mga asaynment, lakip na ang ubos nga mga buluhaton. Isipa ang imong magtutudlo ingong higala, ug ipakita kaniya nga imong giapresyar ang iyang paningkamot. Labaw sa tanan, magmatinumanon sa paghimo sa bisan unsang asaynment nga ihatag kanimo. Nganong importante kana? Kay kon mapamatud-an nimo nga ikaw matinumanon ug kasaligan, makaseguro gayod ang mga ansiyano nga gusto ni Jehova nga hatagan kag dugang responsabilidad sa kongregasyon.—Sal. 101:6; 2 Tim. 2:2. w15 4/15 2:13, 14

Si Saul nag-awhag kang Jonatan nga unahon ang iyang kaugalingong kaayohan. (1 Sam. 20:31) Apan ang pagkamaunongon ngadto sa Diyos nagpalihok kang Jonatan sa pagpakighigala kang David imbes ipamugos ang iyang katungod nga mahimong hari. Maingon nga si Jonatan mituman sa iyang saad kang David, kita usab angayng motuman sa atong mga saad. Pananglitan, kon maglisod na tag tuman sa usa ka kasabotan sa negosyo, ang atong pagkamaunongon sa Diyos ug pagtamod sa Bibliya angayng magpalihok kanato sa pagtuman sa atong saad. Ug komosta kon may problema kita sa atong kaminyoon? Ang atong gugma sa Diyos seguradong magpalihok kanato nga magmaunongon sa atong kapikas. (Mal. 2:13-16) Hinaot pamatud-an nato ang atong pagkamaunongon kang Jehova pinaagi sa pagpakitag pagkamaunongon sa iyang katawhan, bisan niadtong nakapahiubos kanato. Dihang magmaunongon kita kang Jehova bisan sa malisod nga mga kahimtang, atong mapalipay ang iyang kasingkasing. (Prov. 27:11) Kon magmaunongon kita kang Jehova, makaseguro ta nga buhaton gyod niya kon unsay makaayo kanato. w16.02 3:16, 17

Si Jehova nahibalo gayod sa atong mga limitasyon. (Sal. 103:14) Busa, dili siya magdahom nga makalahutay kita sa mga pagsulay sa kaugalingon natong kusog, hinunoa mahigugmaon siyang motabang nato. Tinuod, may mga higayon nga morag dili na nato maantos ang mga problema. Pero nagpasalig si Jehova nga dili niya itugot nga ang iyang mga alagad mag-antos nga labaw sa ilang maarangan. Oo, siya “magtaganag kalingkawasan.” (1 Cor. 10:13) Busa, makasalig ta nga si Jehova nahibalo kon unsa ray atong maantos. Kon wala dayon dungga ang atong pag-ampo alang sa tabang, angay tang maghulat kang Jehova kay siya nahibalo sa hustong panahon nga tubagon niya kana. Hinumdomi nga siya nagmapailobon usab, kay buot gayod niya nga tabangan ta. “Si Jehova magpadayon sa pagpaabot nga pakitaan kamog pabor, ug busa siya motindog aron pakitaan kamog kaluoy. Kay si Jehova usa ka Diyos sa paghukom.” w15 4/15 4:8, 9

Panahon sa Pamilyahanong Pagsimba, kita pangunang maghisgot bahin sa espirituwal nga mga butang, ug kini makapalambo sa panaghiusa sa pamilya. Ang pag-ensayog mga presentasyon makatabang sa pamilya nga mahimong epektibo sa pagsangyaw. Ug dihang ang mga membro sa pamilya mopahayag sa ilang komento bahin sa Pulong sa Diyos, sila masuod sa usag usa kay sila parehong nahigugma kang Jehova ug gustong mohimo sa iyang kabubut-on. Sa unsang paagi magkatinabangay ang mga magtiayon alang sa kadayeganan ni Jehova? Kon ang magtiayon parehong matinumanon nga mga alagad ni Jehova, sila magmalipayon ug magkahiusa. Si Abraham ug Sara, Isaac ug Rebeca, Elkana ug Ana parehong nagpahayag ug gugma alang sa ilang kapikas. Kinahanglang himoon usab nato kana. (Gen. 26:8; 1 Sam. 1:5, 8) Kana makapahiusa kanato sa atong kapikas ug makapasuod nato sa atong langitnong Amahan.—Eccl. 4:12. w16.03 3:12, 13

Si Satanas nakiggubat sa dinihogang nanghibilin ug sa “ubang mga karnero.” (Juan 10:16) Gusto sa Yawa nga daghang alagad ni Jehova ang iyang matukob kutob sa iyang mahimo tungod kay gamay na lang ang nahibilin niyang panahon. (Pin. 12:9, 12) Magmadaogon ba kita batok kang Satanas? Oo! Ang Bibliya nag-ingon: “Sukli ang Yawa, ug siya mokalagiw gikan kaninyo.” (Sant. 4:7) Daghan ang nagtamay sa ideya nga naglungtad si Satanas. Para nila, si Satanas ug ang mga demonyo maoy tinumotumo lang nga mga karakter sa nobela, makahahadlok nga salida, ug video game. Sila miingon nga walay intelihenteng tawo nga motuog daotang espiritu. Pero, importante ba kang Satanas kon maghunahuna ang mga tawo nga siya ug ang iyang mga demonyo dili tinuod? Dili! Mas dali hinuon kang Satanas ang pagbuta sa hunahuna sa mga tawong nagduhaduha nga siya naglungtad. (2 Cor. 4:4) Ang pagpasiugda sa ideya nga wala maglungtad ang daotang mga espiritu maoy usa sa mga paagi ni Satanas sa pagpahisalaag sa mga tawo. w15 5/15 2:1, 2

Dayag nga pinaagi sa iyang tinuod nga mga ginikanan, nakat-onan ni Moises ang mahitungod kang Jehova ug sa Iyang katuyoan sa pagpahigawas sa mga Hebreohanon gikan sa pagkaulipon ug sa paghatag kanila sa Yutang Saad. (Gen. 13:14, 15; Ex. 2:5-10) Samtang gipamalandong ni Moises ang mga saad ni Jehova, milig-on ang iyang pagtuo ug midako ang iyang gugma sa Diyos. Sama sa ubang mahinadlokon sa Diyos nga mga tawo, siya lagmit naghanduraw sa panahon nga ipahigawas ni Jehova ang katawhan gikan sa kamatayon. (Job 14:14, 15; Heb. 11:17-19) Mao diay nga gihigugma ni Moises ang Diyos, kinsa mibatig kaluoy sa mga Hebreohanon ug sa tanang tawo. Ang pagtuo ug gugma mao ang nagpalihok kang Moises sa pag-alagad kang Jehova sa tibuok niyang kinabuhi. (Deut. 6:4, 5) Bisan dihang siya gihulga ni Paraon nga patyon, ang iyang pagtuo, gugma sa Diyos, ug lagmit ang paghanduraw sa masanag nga kaugmaon nakapalig-on niya sa pag-atubang nga maisogon sa maong hulga.—Ex. 10:28, 29. w15 5/15 3:11-13

Sa usa ka kombira sa kasal sa Cana sa Galilea, gihimo ni Jesus ang iyang unang milagro. Tingali mas daghan ang bisita kay sa gidahom. Pero bisag unsa pay hinungdan, nahurot ang bino. Lakip sa mga bisita si Maria, ang inahan ni Jesus. Sulod sa katuigan, seguradong gipamalandong niya ang tanang matagnaong saad maylabot sa iyang anak, nga iyang nahibaloan nga pagatawgong “Anak sa Labing Hataas.” (Luc. 1:30-32; 2:52) Nagtuo ba siya nga makahimo si Jesus sa maong milagro? Ang atong maseguro mao nga sa Cana, si Maria ug Jesus naluoy sa bag-ong magtiayon ug dili nila gusto nga maulawan kini. Nahibalo si Jesus nga usa ka obligasyon ang pagkamaabiabihon. Busa milagroso niyang gihimong “maayong bino” ang 380 litros nga tubig. (Juan 2:6-11) Obligado ba si Jesus nga himoon ang maong milagro? Dili. Apan may kahingawa siya sa mga tawo ug iyang gisundog ang pagkamanggihatagon sa iyang langitnong Amahan. w15 6/15 1:3

Sa wala pa mosaka si Jesus sa langit, gisukna sa iyang mga apostoles ang pangutana nga atong mabasa sa teksto karong adlawa. Ang tubag ni Jesus nagpakita nga dili pa panahon nga mahibalo sila kon kanus-a magsugod ang pagmando sa Gingharian sa Diyos. Giingnan niya sila sa pagpokus sa importanteng buluhaton nga kinahanglan nilang himoon—ang pagsangyaw. (Buh. 1:7, 8) Bisan pa niana, gitudloan ni Jesus ang iyang mga sumusunod sa pagpaabot sa Gingharian sa Diyos. Busa sukad sa mga adlaw sa mga apostoles, ang mga Kristohanon nag-ampo nga moabot unta kana. Dihang hapit nang magsugod si Jesus sa pagmando sa Gingharian sa Diyos, gitabangan ni Jehova ang iyang katawhan nga masabtan kon kanus-a kana mahitabo. Niadtong 1876, usa ka artikulo nga gisulat ni Charles Taze Russell ang gipatik sa magasing Bible Examiner. Ang artikulong “Panahon sa mga Hentil: Kanus-a Kini Matapos?” nagpunting sa 1914 ingong hinungdanong tuig. Ang maong artikulo naglangkit sa “pito ka panahon” nga gitagna ni Daniel ug sa “tinudlong mga panahon” nga gihisgotan ni Jesus.—Dan. 4:16; Luc. 21:24. w15 6/15 4:11, 12

Natandog si Jesus sa pag-antos sa uban. Kay grabeng natandog sa reaksiyon sa uban tungod sa kamatayon sa iyang higalang si Lazaro, si Jesus “miagulo” ug “naguol.” Gibati gihapon niya kadto bisag nahibalo siya nga hapit na niyang banhawon si Lazaro. (Juan 11:33-36) Si Jesus wala maulaw nga ipakita ang iyang emosyon. Makita sa tanan ang pagmahal ni Jesus kang Lazaro ug sa pamilya niini. Pagkadako sa kaluoy nga gipakita ni Jesus dihang iyang gigamit ang hinatag sa Diyos nga gahom aron banhawon ang iyang higala! (Juan 11:43, 44) Ang Bibliya naghubit kang Jesus ingong “tukma nga larawan” sa Maglalalang. (Heb. 1:3) Busa, pinaagi sa iyang mga milagro, gipamatud-an ni Jesus nga siya ug ang iyang Amahan nagtinguha nga wagtangon ang sakit ug kamatayon. Sa dili madugay, mas daghan pa ang ilang banhawon kay sa niadtong narekord sa Bibliya. Si Jesus miingon: “Ang takna nagsingabot nga ang tanan nga anaa sa handomanang mga lubnganan . . . manggula.”—Juan 5:28, 29. w15 6/15 2:13, 14

Dili sama sa relihiyosong mga tawo, kinsa may sayop nga panghunahuna nga ilang dayegon ang Diyos inigsaka na nila sa langit, ang tanang Saksi ni Jehova nahibalo nga kinahanglan siyang dayegon karon ug dinhi sa yuta. Pinaagi niana, atong gisundog ang ehemplo sa matinumanong mga alagad ni Jehova nga gihubit sa Salmo 99:1-3, 5. Sumala sa maong salmo, si Moises, Aaron, ug Samuel bug-os nga misuportar sa kahikayan sa matuod nga pagsimba. (Sal. 99:6, 7) Karon, una mahimong mga saserdote kauban ni Jesus sa langit, ang nahibilin sa iyang dinihogang mga igsoon matinumanong nag-alagad diha sa yutan-ong sawang sa espirituwal nga templo. Milyonmilyong “ubang mga karnero” ang maunongong nagsuportar kanila. (Juan 10:16) Bisag magkalahig paglaom, ang duha ka grupo nagkahiusa sa pagsimba kang Jehova dinhi sa tumbanan sa iyang tiil. Pero ingong indibiduwal, angay natong pangutan-on ang kaugalingon, ‘Bug-os ba kong nagsuportar sa kahikayan ni Jehova alang sa putli nga pagsimba?’ w15 7/15 1:4, 5

Ang mga alagad ni Jehova dugay nang nagpaabot sa katumanan sa inspiradong mga tagna. Si Isaias, kinsa nagtagna nga si Jehova magpahinabog kapasig-ulian human malaglag ang Juda, miingon: “Malipayon kadtong tanan nga nagapaabot kaniya.” (Isa. 30:18) Si Miqueas, kinsa nagtagna usab bahin sa katawhan sa Diyos kaniadto, nakahukom: “Magpakita ako ug mahulatong tinamdan sa Diyos sa akong kaluwasan.” (Miq. 7:7) Sulod sa kasiglohan, ang mga alagad sa Diyos nagpaabot usab sa katumanan sa mga tagna maylabot sa Mesiyas, o Kristo. (Luc. 3:15; 1 Ped. 1:10-12) Ang mga alagad sa Diyos karon nagpaabot usab kay ang mga tagna bahin sa Mesiyas padayon pang nagakatuman. Pinaagi sa Mesiyanikong Gingharian, taposon ni Jehova sa dili madugay ang pag-antos sa tawo pinaagi sa paglaglag sa mga daotan ug pagluwas sa iyang katawhan gikan niining peligrosong kalibotan nga gimandoan ni Satanas. (1 Juan 5:19) Busa, padayon kitang magbantay ug maghunahuna nga kining sistemaha hapit nang matapos. w15 8/15 2:1, 2

Si Jehova nagsugo sa mga Israelinhon sa paghimog tabernakulo. (Ex. 25:8) Sa ulahi, sila nagtukod ug templo alang sa pagsimba kang Jehova. (1 Hari 8:27, 29) Human mamalik gikan sa pagkabihag sa Babilonya, ang mga Hudiyo regular nga nagtigom diha sa mga sinagoga. (Mar. 6:2; Juan 18:20; Buh. 15:21) Ang unang mga Kristohanon nagtigom diha sa balay sa mga membro sa kongregasyon. (Buh. 12:12; 1 Cor. 16:19) Karon, ang katawhan ni Jehova magtigom diha sa tinagpulo ka libong Kingdom Hall diin sila makakat-on bahin kang Jehova ug mosimba kaniya. Dako kaayo ang gugma ug apresasyon ni Jesus alang sa templo ni Jehova sa Jerusalem maong gipadapat ngadto kaniya sa usa ka magsusulat sa Ebanghelyo ang tagna nga mabasa sa teksto karong adlawa. (Sal. 69:9) Ang Kingdom Hall dili matawag nga “balay ni Jehova” sa samang paagi nga gigamit kining mga pulonga sa paghubit sa templo sa Jerusalem. (2 Cron. 5:13; 33:4) Bisan pa niana, ang Bibliya dunay mga prinsipyo nga nagpakita kanato kon sa unsang paagi angayng gamiton ug tahoron ang atong mga dapit sa pagsimba karon. w15 7/15 4:1, 2

Magmahigugmaon ba kita sa usag usa panahon sa Usa ka Libo ka Tuig nga Pagmando ni Kristo? Kon atong ugmaron karon ang pagkamapinasayloon ug likayan ang dili pagsinabtanay, mahimong mas sayon para nato ang paghimo niini sa bag-ong kalibotan. (Col. 3:12, 13) Sa bag-ong kalibotan, dili tingali nato kanunayng makuha dayon ang atong gusto. Hinunoa, kinahanglan kitang magmapabilhon ug magmakontento bisag unsay atong kahimtang samtang nagatagamtam kita sa mga kaayohan sa pagpasakop sa mahigugmaong pagmando ni Jehova. Nagpasabot kana nga atong ipakita ang mga hiyas nga gitudlo ni Jehova kanato nga ugmaron. Pinaagi sa pagkinabuhi karon nga daw tua na ta sa bag-ong kalibotan, atong maugmad ang mga hiyas nga kinahanglan natong ipakita hangtod sa kahangtoran. Mapalig-on nato ang atong pagtuo sa “puloy-anang yuta sa umaabot.” (Heb. 2:5; 11:1) Dugang pa, mapakita nato nga naghinamhinam gyod kita sa matarong nga kahimtang nga maglungtad sa yuta. Oo, kita nagapangandam alang sa kinabuhing walay kataposan sa bag-ong kalibotan sa Diyos. w15 8/15 3:11, 12

Dihang susihon nimo ang hinog nga mga prutas sa merkado, imong mamatikdan nga dili kini parehas. Bisan pa niana, dunay susamang mga timailhan nga kini hinog na. Sa samang paagi, ang hamtong nga mga Kristohanon managlahi tingalig nasyonalidad, kagikan, panglawas, edad, ug kasinatian. May kalainan pa gani sa personalidad o kultura. Bisan pa niana, ang tanan nga mouswag sa espirituwal makaugmad ug mga hiyas nga magpaila nga sila hamtong. Sa unsang paagi? Ang hamtong nga alagad ni Jehova nagsundog kang Jesus, kinsa naghatag ug sulondan kanato ‘aron kita managsunod pag-ayo sa iyang mga tunob.’ (1 Ped. 2:21) Unsay gipasiugda ni Jesus ingong labing importante? Ang paghigugma kang Jehova uban ang tibuok kasingkasing, kalag, ug hunahuna, ug ang paghigugma sa uban sama sa kaugalingon. (Mat. 22:37-39) Ang hamtong nga Kristohanon maningkamot sa pagkinabuhi nga kaharmonya sa maong tambag. Ang iyang pagkinabuhi nagpamatuod nga prayoridad niya ang iyang relasyon kang Jehova ug siya nagpakitag nagsakripisyong gugma sa uban. w15 9/15 1:3-5

Ang maayong tanlag dili lang magpasidaan batok sa pagbuhat ug daotan. Kini magtukmod kanato sa pagbuhat ug maayo. Ang panguna niini mao ang pagpakigbahin sa pagsangyaw sa balay ug balay ug ang pagpangitag kahigayonan sa pagsangyaw nga di pormal. Ang tanlag ni Pablo nagtukmod kaniya sa pagbuhat niana. Siya misulat: “Ang panginahanglan gikapatong ibabaw kanako. Sa pagkatinuod, alaot ako kon dili ko ipahayag ang maayong balita!” (1 Cor. 9:16) Kon ato siyang sundogon, ang atong tanlag magpasalig kanato nga husto ang atong ginabuhat. Ug pinaagi sa pagwali sa maayong balita, atong gipalihok ang tanlag niadtong atong gisangyawan. Oo, ang tanlag dako gayod ug ikatabang. Pinaagi sa regular nga pagtuon sa Pulong sa Diyos, pagpamalandong sa atong nakat-onan, ug pagpadapat niana, atong ginabansay ang atong tanlag. Sa ingon, kini mahimong kasaligang giya sa atong kinabuhi! w15 9/15 2:16, 18

Ang mga asoy bahin kang Jose, Moises, ug David maoy pipila sa labing detalyadong rekord sa mga karakter sa Bibliya. Dihang mabasa nato kon giunsa sila pagtabang ni Jehova panahon sa mga pagsulay ug kon giunsa sila pagbansay alang sa mas dagkong responsabilidad, bation gyod nato nga si Jehova nahingawa ug nahigugma sa iyang mga alagad. Ang disiplina ni Jehova makatabang kanato sa pagkakita sa laing bahin sa iyang gugma. Sa dihang ang mga nakasala disiplinahon ni Jehova ug sila mosanong ug maghinulsol, “siya magpasaylo sa madagayaon gayod.” (Isa. 55:7) Unsay buot ipasabot niana? Gihubit ni David sa makapatandog nga paagi ang pagkamapinasayloon ni Jehova: “Siya nga nagapasaylo sa tanan mong kasaypanan, nga nagaayo sa tanan mong balatian, nga nagabawi sa imong kinabuhi gikan sa gahong, nga nagapurongpurong kanimo sa mahigugmaong-kalulot ug sa mga kaluoy.” (Sal. 103:3, 4) Hinaot nga dawaton nato ang tambag ni Jehova, bisan ang iyang disiplina, ug mohimo dayog kausaban, ug hinumdoman nga kana maoy pamatuod sa iyang dakong gugma kanato.—Sal. 30:5. w15 9/15 4:13, 14

Si Marta puliki kaayo sa pag-andam ug espesyal nga pagkaon alang kang Jesus ug siya nasuko kang Maria. Namatikdan ni Jesus nga daghan ra kaayog gibuhat si Marta, busa siya mabinationg miingon: “Marta, Marta, ikaw nabalaka ug napuliki bahin sa daghang butang.” Dayon, misugyot siya nga igo na ang usa ka potahe. Unya iyang gidayeg si Maria tungod sa pagpamati kaniya: “Sa iyang bahin, gipili ni Maria ang maayong bahin, ug dili kini pagakuhaon gikan kaniya.” (Luc. 10:38-42) Tingali makalimtan ra ni Maria ang iyang gikaon nianang espesyal nga okasyon, apan dili gyod niya makalimtan ang maong komendasyon ug ang espirituwal nga pagkaon nga iyang nadawat pinaagi sa pagpamati pag-ayo kang Jesus. Kapig 60 ka tuig sa ulahi, si apostol Juan misulat: “Gihigugma ni Jesus si Marta ug ang iyang igsoong babaye.” (Juan 11:5) Kining inspiradong mga pulong nagpakita nga gidawat ni Marta ang mahigugmaong pagtul-id ni Jesus ug nagmatinumanon siya kang Jehova sa tibuok niyang kinabuhi. w15 10/15 3:3, 4

Daghan kitag rason sa pagtuo nga si Jehova nagtabang sa mga tawo karon. Kanunay natong madunggan ang mga eksperyensiya bahin sa mga indibiduwal nga nag-ampo alang sa espirituwal nga tabang ug dayon nakadawat niana. (Sal. 53:2) Samtang namalaybalay sa usa ka gamayng isla sa Pilipinas, nahibalag ni Allan ang usa ka babaye kinsa misugod paghilak. Si Allan miingon: “Nianang buntaga, miampo siya kang Jehova nga unta makaplagan siya sa mga Saksi. Dali ra kaayong gitubag sa Diyos ang iyang pag-ampo maong siya mihilak.” Wala pay usa ka tuig, siya nagpahinungod sa iyang kinabuhi kang Jehova. Daghang alagad sa Diyos ang nakakita sa iyang tabang dihang gihunong nila ang mga bisyo sama sa pagpanigarilyo, pag-abuso sa droga, o pagtan-awg pornograpiya. Ang pipila miingon nga kadaghan nilang gisulayan ang paghunong niana sa kaugalingong paningkamot pero napakyas sila. Apan, dihang midangop sila kang Jehova alang sa tabang, siya naghatag kanilag “gahom nga labaw sa kasarangan,” ug nabuntog ra nila ang ilang kahuyangan.—Sal. 37:23, 24. w15 10/15 1:10, 11

Ang uban mobangon ug sayo sa buntag aron magbasa, mamalandong, ug mag-ampo. Ang uban nagbuhat niana sa tingpaniudto. Tingali mahimo nimo kini sa sayong kagabhion o sa dili ka pa matulog. Ang pipila ganahang mobasa sa Bibliya sa buntag ug sa dili pa matulog. Busa, sila ‘nagbasa niini . . . adlaw ug gabii,’ o sa makanunayon. (Jos. 1:8) Ang hinungdanon mao ang pagkuhag panahon gikan sa dili kaayo importanteng mga butang ug igahin kini sa adlaw-adlawng pagpamalandong sa Pulong sa Diyos. Ang Pulong sa Diyos nagsaad nga panalanginan kadtong namalandong niana ug naningkamot sa pagpadapat sa ilang nakat-onan. (Sal. 1:1-3) “Malipayon kadtong nagapatalinghog sa pulong sa Diyos ug nagasunod niini,” miingon si Jesus. (Luc. 11:28) Labaw sa tanan, ang pagpamalandong sa espirituwal nga mga butang kada adlaw motabang kanato sa pagpasidungog sa Dakong Maglalalang sa atong kahibulongang utok, ug siya magaganti kanatog kalipay karon ug kinabuhing walay kataposan sa iyang matarong nga bag-ong kalibotan.—Sant. 1:25; Pin. 1:3. w15 10/15 4:17, 18

Maayog tuyo si apostol Pedro dihang giingnan niya si Jesus nga magmaluloton sa kaugalingon aron dili patyon. Apan nahibalo si Jesus nga sayop ang panghunahuna ni Pedro. Aron tabangan si Pedro ug ang ubang tinun-an, si Jesus mihatag ug prangkang tambag, nga naghisgot sa resulta kon ang usa maghunahuna ra sa kaugalingon ug sa mga panalanging madawat tungod sa pagsakripisyo. (Mat. 16:21-27) Nasabtan kini ni Pedro. (1 Ped. 2:20, 21) Pag-ampo kang Jehova alang sa pagsabot aron masabtan nimo kon unsang tabang ang gikinahanglan sa imong tin-edyer. (Sal. 32:8) Pananglitan, unsa tingaliy ilhanan nga nagkahuyang ang pagtuo sa imong anak? Basig siya dili na kaayo malipayon, manaway sa mga igsoon, o maghilomhilom na lang. Ayaw dayon paghunahuna nga siya may dobleng pagkinabuhi nga nakahimog seryosong sala. Sa laing bahin, ayawg ibalewala ang maong mga timailhan ni maghunahuna nga molabay ra kana. w15 11/15 2:12, 13

Ang tinuod nga gugma ug panaghiusa nagpaila nga ang mga alagad ni Jehova nagsunod sa matuod nga relihiyon, kay si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Ug si apostol Juan misulat: “Ang mga anak sa Diyos ug ang mga anak sa Yawa dayag niining butanga: Ang matag usa nga wala magpadayon sa pagbuhat ug pagkamatarong wala magagikan sa Diyos, ni siya nga wala mahigugma sa iyang igsoon. Kay kini mao ang mensahe nga inyong nadungog sukad pa sa sinugdan, nga kita kinahanglang magbaton ug gugma alang sa usag usa.” (1 Juan 3:10, 11) Ang gugma nga miresultag talagsaon kaayong panaghiusa nagpaila sa mga Saksi ni Jehova ingong matuod nga mga sumusunod ni Kristo, ang gigamit sa Diyos sa pagsangyaw sa maayong balita sa Gingharian sa tibuok yuta.—Mat. 24:14. w15 11/15 4:10, 11

Tungod kay managlahi ang mga kultura ug relihiyon, kinahanglang tinoon nato kon kanus-a ang hustong panahon sa pagsulti. Ug dunay daghang higayon nga kinahanglan natong tinoon kana. Pananglitan, nasilo tingali kita sa gisulti sa usa, bisan pag maayo ang iyang intensiyon. Mas maayo kon hunahunaon una nato pag-ayo kon angay ba nato siyang tubagon. Kon motubag man ugaling ta, dili maalamong moduol ta sa nakapasilo kanato dihang kita suko pa kay basig makasulti tag dili maayo. (Prov. 15:28) Sa susama, kinahanglang tinoon nato ang hustong panahon sa pagsulti bahin sa kamatuoran ngadto sa atong dili magtutuong mga paryente. Gusto natong makaila sila kang Jehova, apan angay tang magmapailobon ug magmataktikanhon. Ang pagsulti sa hustong mga pulong sa hustong panahon basin makapukaw sa ilang interes. w15 12/15 3:6, 8, 9

Ang “maayong panghunahuna,” o maayong panghukom, makatabang dihang ang eksplinasyon sa usa ka paagi sa pagdayagnos sa sakit o pagtambal katingad-an o misteryoso. Makapatin-aw ba pag-ayo ang usa nga mohimo sa maong pagtambal o ang nag-endorso niana kon nganong epektibo kana? Nahiuyon ba kana sa mga resulta sa pagtuon, ug daghan bang doktor ang miuyon nga makaayo kana? (Prov. 22:29) O nadala lang ta sa emosyon? Lagmit ang pangangkon mao nga kana nadiskobrehan ug gigamit sa layong dapit, nga wala pa masayri sa mga doktor. Kana ba nga pangangkon igo na nga pamatuod o kaha makataronganon? Ang pipila ka paagi sa pagdayagnos o pagtambal gikaingon nga naggamit ug ‘sekretong sangkap’ o ‘puwersa sa lawas.’ Kinahanglan gyod tang mag-amping kay ang Diyos nagpasidaan batok sa “paggamit ug mahikanhong gahom” ug sa espiritismo.—Isa. 1:13; Deut. 18:10-12. w15 12/15 4:16

Sa tibuok Kasulatan, atong mabasa ang daghang ehemplo sa matinumanong mga tawo nga gipalihok sa balaang espiritu, pero dili langitnon ang ilang paglaom. Si Juan Bawtista usa kanila. Si Jesus nagdayeg kaniya pero siya nag-ingon nga si Juan dili mahimong bahin sa langitnong Gingharian. Si David usab gipalihok sa balaang espiritu. (1 Sam. 16:13) Siya lig-on ug pagtuo ug giinspirar pa gani sa pagsulat sa pipila ka bahin sa Bibliya. (Mar. 12:36) Apan, sa adlaw sa Pentekostes, si Pedro nag-ingon nga si David “wala mosaka ngadto sa mga langit.” (Buh. 2:34) Ang balaang espiritu nagpalihok sa maong mga tawo sa paghimog katingalahang mga butang, pero wala kini maghatag kanilag talagsaong pamatuod nga sila gipili aron mopuyo sa langit. Wala kana magpasabot nga dili sila takos nga moadto sa langit. Nagpakita lang kana nga banhawon sila ni Jehova sa paraisong yuta.—Juan 5:28, 29; Buh. 24:15. w16.01 3:16

Dihang magbuhat ta uban niadtong atong gimahal, kita mas masuod nila ug mas mailhan nato sila. Mahibaloan nato dili lang kon unsay gusto nilang malampos kondili kon unsaon sab nila kana paghimo. Si Jesus nagbuhat uban kang Jehova lagmit sulod sa bilyonbilyong katuigan, busa ilang naugmad ang lig-on, dili mabugto nga bugkos sa gugma ug pagmahal sa usag usa. Sila tinuod nga nagkahiusa ug nagtinabangay. Sa iyang pag-ampo, gihangyo ni Jesus si Jehova sa pagpanalipod sa iyang mga tinun-an. Ngano? Siya miampo: “Aron nga sila mahimong usa nga sama kanato.” (Juan 17:11) Dihang magkinabuhi ta sumala sa sukdanan sa Diyos ug makigbahin sa pagsangyaw, atong maapresyar ang iyang nindot nga mga hiyas. Atong makat-onan kon nganong maalamon ang pagsalig kaniya ug pagsunod sa iyang mga sugo. Samtang makigsuod ta sa Diyos, siya makigsuod usab kanato. (Sant. 4:8) Masuod kita sa atong mga igsoon kay susama ang atong mga problema, kalipay, ug tumong. w16.01 5:9, 10

Si Noemi determinadong mopauli sa Israel. Kauban niya si Ruth, kinsa nag-atubang sa lagmit labing importanteng desisyon sa iyang kinabuhi. Puwede siyang mobalik sa Moab o mounong sa iyang ugangang si Noemi ug mopanaw paingon sa Betlehem. (Ruth 1:1-8, 14) Puwede untang mangatarongan si Ruth nga may pamilya siya sa Moab—ang iyang inahan ug ubang paryente kinsa makaatiman sa usa ka batan-ong biyuda ug makatagana sa iyang panginahanglan. Ang Moab ang iyang yutang natawhan. Sinati na siya sa kultura, pinulongan, ug mga tawo niini. Si Noemi dili makasaad niya sa maong mga bentaha didto sa Betlehem. Gani, iyang gitambagan si Ruth sa pagpabilin sa Moab. Nahadlok si Noemi nga dili na siya makataganag bana o puy-anan sa iyang mga umagad. Unsay buhaton ni Ruth? Matikdi ang kalainan niya ug ni Orpa, kinsa ‘mipauli sa iyang katawhan ug sa iyang mga diyos.’ (Ruth 1:9-15) Gusto bang mobalik ni Ruth sa bakak nga mga diyos? Dili gayod. w16.02 2:4, 5

Sa kagabhion, si David ug Abisai hilom nga misulod sa kampo ug gilabyan ang 3,000 ka nangatulog nga sundalo. Sa tunga sa kampo, ilang nakita si Haring Saul nga nahinanok. Nakaabot siya sa kamingawan sa Judea sa pagpangita kang David aron patyon kini. Si Abisai mihunghong: “Tugoti ako, palihog, sa pagpaod [kang Saul] sa yuta pinaagi sa bangkaw sa makausa lamang, ug dili ko kini buhaton kaniya sa makaduha.” Makapatingala ang tubag ni David! “Ayaw siya pagpatya, kay kinsa ba ang makabakyaw sa iyang kamot batok sa dinihogan ni Jehova ug makapabiling walay sala? . . . Halayo ra alang kanako, gikan sa panglantaw ni Jehova, nga ako mobakyaw sa akong kamot batok sa dinihogan ni Jehova!” (1 Sam. 26:8-12) Nakasabot siya kon unsay nalangkit sa pagkamaunongon sa Diyos. Dili niya gustong mobuhat ug daotan kang Saul. Ngano? Kay si Saul gidihogan sa Diyos nga maghari sa Israel. Ang maunongong mga alagad ni Jehova nagtahod niadtong gihatagan niyag awtoridad. Oo, buot ni Jehova nga ang tanan niyang alagad ‘magmaunongon.’ w16.02 4:1, 2

Ikaw ba usa ka batan-on nga nagplanong magpabawtismo? Kon mao, matagamtam nimo ang kinadak-ang pribilehiyo nga puwedeng mabatonan. Bisan pa niana, ang bawtismo usa ka seryosong desisyon. Kini nagsimbolo sa imong pahinungod—usa ka seryosong panaad kang Jehova nga alagaron siya sa walay kataposan pinaagi sa pag-una sa iyang kabubut-on. Makataronganon lang nga ayha ka pa magpabawtismo kon kuwalipikado ka nang mohimo sa maong desisyon, kon personal nimo kana nga desisyon, ug kon nasabtan na nimo ang kahulogan sa pagpahinungod. Komosta kon gibati nimo nga dili ka pa andam magpabawtismo? O komosta kon gusto ka nang magpabawtismo pero gibati sa imong ginikanan nga angay ka pang maghulat, tingali hangtod nga mas daghan ka nag kasinatian sa Kristohanong pagkinabuhi? Bisan unsa may kahimtang, ayawg kaluya. Hinunoa, gamita kini nga kahigayonan nga mouswag aron, sa dili madugay, puwede ka nang magpabawtismo. w16.03 2:1, 2

Ang pipila nga nag-alagad karon sa Diyos minyo na dihang nakakat-on sa kamatuoran, ug dili Saksi ang ilang kapikas. Bisan pa niana, ang pagpadapat sa mga prinsipyo sa Bibliya makapalambo sa panaghiusa diha sa pamilya. Naglakip kana sa pagkooperar kutob sa mahimo basta walay malapas nga prinsipyo. Lisod tingali kana, apan hunahunaa ang ganti nga imong madawat. Dugang pa, tungod kay giatake ni Satanas ang mga pamilya karon, hinungdanon alang sa mga magtiayong nag-alagad sa Diyos nga magtinabangay. Bisag unsa na mo ka dugayng naminyo, hunahunaa kon unsay inyong isulti o buhaton aron mapalig-on ang inyong kaminyoon. Ang mga gulanggulang na makatabang gani sa bata-batang mga membro sa kongregasyon niining bahina. Mahimo ninyong imbitahon sa balay ang bata-batang mga magtiayon aron moapil sa inyong pamilyahanong pagsimba. Sa maong pag-ubanay, ilang makita nga importante ang panaghiusa ug pagpakitag pagmahal bisag unsa na ka dugayng naminyo ang magtiayon.—Tito 2:3-7. w16.03 3:14, 15