Disyembre

Si apostol Pedro misulat niana aron dasigon ang mga Kristohanon sa paglahutay sa mga kalisdanan nga gipahinabo ni Satanas. Ang mga kasinatian niadtong nakalahutay nagtudlo kanato kon sa unsang paagi makapabiling matinumanon, nagpasalig kanato nga kita magmalamposon, ug nagpahinumdom kanato nga kita pagagantihan sa atong pagkamatinumanon. (Sant. 5:11) Nakasinati ka bag grabeng pagsupak, paglutos pa gani, gikan sa mga kaaway sa matuod nga pagsimba? Ikaw ba ansiyano o tigdumala sa sirkito kinsa nabug-atan sa daghang responsabilidad? Palandonga ang ehemplo ni Pablo. Siya nakasinatig grabeng paglutos ug nabug-atan tungod sa iyang kabalaka sa mga kongregasyon. (2 Cor. 11:23-29) Bisan pa niana, wala siya mosurender, ug ang iyang ehemplo nakapalig-on sa uban. (2 Cor. 1:6) Dihang nag-antos kag kalisdanan, hinumdomi nga ang imong ehemplo lagmit nakadasig sa uban sa paglahutay. w16.04 2:11, 14

Mosanong man o mosupak ang mga tawo sa atong mensahe, pipila lang ang dili mouyon nga ingong grupo ang mga Saksi ni Jehova ilado kaayo sa ilang buluhatong pagsangyaw. Basin ganig nakahibalag tag mga tawo diha sa atong pagsangyaw nga miingon nga bisan tuod supak sila sa atong mga pagtulon-an, sila nagtahod kanato tungod sa atong buluhaton. Sa ato nang nasayran, gitagna ni Jesus nga ang maayong balita sa Gingharian igawali sa tibuok gipuy-ang yuta. (Mat. 24:14) Daghang relihiyon ang nangangkon nga sila nagsangyaw sa Ebanghelyo, o maayong balita. Apan, gihimo lang nila kana pinaagig personal nga mga testimonya, serbisyo sa simbahan, o mga programa nga isibya sa media​—pinaagi man sa telebisyon o sa Internet. Ang uban miingon nga gihimo nila kana pinaagi sa pagtabang sa mga pobre o pinaagi sa ilang medikal nga mga misyon ug programa sa edukasyon. Apan, mao ba ni ang buluhatong pagsangyaw nga gisugo ni Jesus sa iyang mga tinun-an? w16.05 2:1, 2

Sukad sa 1914, ang mga gobyerno sa tawo nahimong karibal sa Gingharian sa Diyos, nga hapit nang maglaglag sa maong mga gobyerno. (Sal. 2:2, 7-9) Gitugotan sa Diyos nga magpabilin ang politikal nga sistema sa kalibotan kay nakatabang kini sa pagpatunhay sa kalinaw ug kahusay, nga sa baylo, nakatabang nato sa pagsangyaw sa maayong balita sa Gingharian. (Roma 13:3, 4) Gani, ang Diyos nagsugo kanato sa pag-ampo alang niadtong anaa sa awtoridad, ilabina kon ang ilang mga desisyon mahimong makaapektar sa atong pagsimba. (1 Tim. 2:1, 2) Kita moapelar sa mga awtoridad sa gobyerno alang sa patas nga pagtratar, sama sa gibuhat ni apostol Pablo. Bisag nagtudlo ang Bibliya nga ang kaaway sa Diyos, si Satanas, may awtoridad ibabaw sa politikal nga mga sistema, wala kini mag-ingon nga siya direktang nagkontrolar sa matag lider o opisyal. (Luc. 4:5, 6) Busa, dili ta angayng mohatag ug ideya kang bisan kinsa nga ang usa ka opisyal gikontrolar sa Yawa. Hinunoa, dihang makiglabot kita sa “mga kagamhanan ug sa mga awtoridad,” kita “dili magsultig daotan mahitungod kang bisan kinsa.”​—Tito 3:1, 2. w16.04 4:5, 6

Tingali mangutana ka, ‘Unsaon nato pagkahibalo kon unsay giuyonan ni Jehova dihang ang iyang Pulong wala maghatag ug espesipikong balaod bahin sa usa ka butang?’ Kon walay espesipikong balaod sa Bibliya, sa unsang paagi nato masabtan ang kabubut-on sa Diyos? Masabtan nato kana pinaagi sa pag-ampo ug pagpagiya sa iyang balaang espiritu. Tagda kon giunsa pagsabot ni Jesus kon unsay gustong ipabuhat sa iyang Amahan kaniya. Sa duha ka narekord nga higayon, si Jesus miampo una ug dayon milagrosong nagtaganag pagkaon sa mga panon sa katawhan. (Mat. 14:17-20; 15:34-37) Bisan pa niana, midumili siya nga himoong tinapay ang mga bato dihang siya gigutom ug gitental sa Yawa didto sa kamingawan. (Mat. 4:2-4) Tungod kay sinati kaayo siya sa panghunahuna sa iyang Amahan, si Jesus nahibalo nga dili niya angayng himoon nga tinapay ang mga bato. Oo, naamgohan ni Jesus nga dili kabubut-on sa Diyos nga gamiton niya ang iyang gahom para sa iyang kaugalingong kaayohan. Pinaagi niana, iyang gipakita nga siya misalig kang Jehova alang sa giya ug pagkaon. w16.05 3:7, 8

May pipila ka bahin sa Bibliya nga sa sinugdan nagtumong sa usa ka indibiduwal o grupo. Kanay rason kon nganong sa dili pa ta magbasa sa Pulong sa Diyos, angay tang moampo alang sa bukas nga hunahuna ug kaalam aron masabtan ang mga leksiyon nga gusto ni Jehova nga atong makat-onan. (Esd. 7:10; Sant. 1:5) Samtang magbasa ka sa Bibliya, paggahig panahon sa pagpamalandong, ug pangutan-a ang imong kaugalingon: ‘Unsay gisulti niini kanako bahin kang Jehova? Unsaon nako pagpadapat kini nga impormasyon? Unsaon nako ni paggamit sa pagtabang sa uban?’ Dihang atong pamalandongon ang maong mga pangutana, seguradong mas makabenepisyo ta sa atong pagbasa sa Bibliya. Ingong pananglitan, hunahunaa ang Kasulatanhong mga kuwalipikasyon para sa mga ansiyano. (1 Tim. 3:2-7) Tungod kay ang kadaghanan kanato dili man mga ansiyano, maghunahuna tingali kita nga kini dili kaayo mapadapat kanato. Pero kitang tanan daghan ug makat-onan gikan niini nga mga kuwalipikasyon. w16.05 5:7, 8

Pagsulod sa Hudiyong mga binihag sa karaang Babilonya, ilang nakita nga ang siyudad napunog mga idolo ug ang mga tawo naulipon sa daotang mga espiritu. Bisan pa niana, ang matinumanong mga Hudiyo, sama kang Daniel ug sa iyang tulo ka kauban, wala magpaumol sa Babilonya. (Dan. 1:6, 8, 12; 3:16-18) Si Daniel ug ang iyang mga kauban determinado nga ihatag ang ilang bug-os nga debosyon kang Jehova ingong ilang Magkukulon. Ug milampos sila! Bisag gigugol ni Daniel ang halos tibuok niyang kinabuhi sa Babilonya, ang manulonda sa Diyos nag-ingon nga siya “tawong tilinguhaon kaayo.” (Dan. 10:11, 19) Sa kapanahonan sa Bibliya, iduot sa magkukulon ang yutang kulonon sa hulmahan aron nga makuha ang gusto niya nga porma. Giila sa matuod nga mga magsisimba karon nga si Jehova ang Soberano sa tibuok uniberso, ang usa nga may awtoridad sa pag-umol sa mga tawo ug kanasoran. (Jer. 18:6) Ang Diyos may awtoridad usab sa pag-umol sa matag usa kanato. Apan, iyang giila ang atong kagawasan sa pagpili ug gusto niya nga kinabubut-on tang magpaumol. w16.06 2:1, 2

Gigamit ni Satanas ang komersiyal nga sistema sa kalibotan aron patuohon kita nga magmalipayon lang kon daghan tag materyal nga mga butang. Hanas kaayo siyang mogamit sa “tinguha sa mga mata.” (1 Juan 2:15-17; Gen. 3:6; Prov. 27:20) Ang kalibotan nagtanyag sa tanang butang, gikan sa kinanindotan hangtod sa katingad-an, nga ang pipila makapadani kaayo. May napalit ka bang butang tungod lang kay nakita nimo kini sa advertisement o displey sa tindahan? Nakita ba nimo sa ulahi nga puwede ra kang mabuhi bisag wala kana? Ang maong dili kinahanglanong mga butang makapakomplikado lang sa kinabuhi ug makapabug-at. Kini makalit-ag nato ug makabalda sa atong espirituwal nga rutina sa pagtuon sa Bibliya, pagpangandam ug pagtambong sa mga tigom, ug regular nga pagsangyaw. Hinumdomi ang pasidaan ni apostol Juan: “Ang kalibotan nagakahanaw ingon man ang tinguha niini.” w16.07 1:3, 4

Ang unang siglong Kristohanong kongregasyon gilangkoban sa mga Hudiyo, Grego, Romano, ug mga tawo sa ubang nasyonalidad. Sila lainlaig namat-an nga relihiyon, kostumbre, ug gusto. Tungod niana, ang pipila nalisdan sa pagdawat sa bag-ong paagi sa pagsimba o sa pagbiya sa ilang kanhing mga binuhatan. Busa, kinahanglan silang pahinumdoman ni apostol Pablo nga ang mga Kristohanon dunay usa lamang ka Diyos, si Jehova. Komosta sa Kristohanong kongregasyon karon? Ang propetang si Isaias nagtagna nga “sa kaulahiang bahin sa mga adlaw,” ang katawhan sa tanang kanasoran mangadto sa tinuboy nga dapit sa matuod nga pagsimba. Sila moingon: “[Si Jehova] magatudlo kanato bahin sa iyang mga dalan, ug kita magalakaw sa iyang mga alagianan.” (Isa. 2:2, 3) Malipayon gayod kita nga makitang nagakatuman karon kining tagnaa! Tungod niana, daghang kongregasyon ang gilangkoban sa mga igsoon nga lainlaig rasa, kultura, ug pinulongan, nga nagdayeg kang Jehova. w16.06 3:15, 16

Dili nato mahunahunaan kon unsa gyod ka talagsaon ang giandam ni Jehova para sa dinihogang mga Kristohanon iniglingkod nila sa ilang mga trono aron magmando kauban ni Kristo sa langit. (Luc. 22:28-30; Filip. 3:20, 21; 1 Juan 3:2) Sila ang maglangkob sa “Bag-ong Jerusalem,” ang pangasaw-onon ni Kristo. (Pin. 3:12; 17:14; 21:2, 9, 10) Motabang sila kang Jesus sa ‘pagtambal sa kanasoran,’ nga magtabang sa matinumanong katawhan nga mahigawas sa sala ug kamatayon, ug mahimong hingpit. (Pin. 22:1, 2, 17) Ang usa sa kinadak-ang pasundayag sa pagkamaayo ni Jehova dinhi sa yuta mao ang pagbanhaw sa mga tawo gikan sa “handomanang mga lubnganan.” (Job 14:13-15; Juan 5:28, 29) Ang matinumanong mga tawo nga namatay sa wala pa ang halad ni Kristo, apil ang “ubang mga karnero” nga mamatayng matinumanon panahon sa kataposang mga adlaw, buhion ug balik aron makapadayon sa pag-alagad kang Jehova.​—Juan 10:16. w16.07 4:13-15

Dili igo ang maayong intensiyon aron ‘makapadayon sa pagtukaw’ sa espirituwal. Pipila ka adlaw una ang panghitabo sa tanaman sa Getsemane, giingnan ni Jesus ang mao gihapong mga tinun-an nga padayong mag-ampo kang Jehova. (Luc. 21:36) Busa aron makapabiling nagtukaw, kinahanglan usab kitang padayon nga mag-ampo. (1 Ped. 4:7) Sanglit miingon si Jesus nga ang kataposan moabot “sa takna nga wala [nato] hunahunaa,” dili kini panahon nga magduka sa espirituwal. Dili sab kini panahon sa pagpangagpas sa mga butang nga gitanyag ni Satanas ug sa iyang kalibotan nga maoy gitinguha sa atong unod. (Mat. 24:44) Pinaagi sa Bibliya, gipahibalo kita sa Diyos ug ni Kristo kon unsay ilang gitagana sa umaabot ug kon sa unsang paagi kita makapadayon sa pagbantay. Kinahanglan natong hatagag pagtagad ang atong espirituwalidad, relasyon kang Jehova, ug ang Gingharian. Kinahanglang nahibalo kita sa panahon ug mga panghitabo aron mahimo kitang andam sa hapit nang mahitabo. (Pin. 22:20) Nagdepende niana ang atong kinabuhi! w16.07 2:15-17

Mahimong lig-on ang kaminyoon kon ang magtiayon magmasinabtanon sa pagkadili-hingpit sa usag usa. Sila ‘magpadayon sa pag-antos sa usag usa ug kinabubut-ong magpasaylo sa usag usa.’ Oo, masayop gyod ang bana ug asawa. Pero kon mahitabo kini, sila makakat-on sa ilang mga sayop, makakat-on sa pagpasaylo, ug makapakitag gugma nga maoy “hingpit nga bugkos sa panaghiusa.” (Col. 3:14) Dugang pa, “ang gugma hataas-ug-pailob ug maluloton. . . . Kini dili maghupot ug talaan sa kadaot.” (1 Cor. 13:4, 5) Kinahanglang husayon dayon ang dili pagsinabtanay. Busa, angayng maningkamot ang magtiayon sa paghusay sa problema sa dili pa matapos ang adlaw. (Efe. 4:26, 27) Ang sinserong pag-ingon, “Pasensiya na nga napasakitan ti ka” nagkinahanglag pagkamapainubsanon ug kaisog, apan kana makatabang sa pagsulbad sa mga problema ug mas makapasuod sa magtiayon. w16.08 2:6

Ang pagwali sa maayong balita sa Gingharian mao ang pangunang asaynment ni Jesus. Bisan pa niana, migahin siyag panahon sa pagbansay sa uban aron mahimong mga magbalantay ug magtutudlo. (Mat. 10:5-7) Bisag puliki si Felipe ingong ebanghelisador, walay duhaduha nga gitabangan niya ang iyang upat ka anak nga babaye nga mahimong epektibo sa pagpaambit sa kamatuoran sa Kasulatan. (Buh. 21:8, 9) Unsa ka importante ang maong pagbansay karon? Sa tibuok kalibotan, nagkadaghan ang midawat sa maayong balita. Ang mga bag-ohan nga dili pa bawtismado kinahanglang makakat-on sa kaimportante sa personal nga pagtuon sa Bibliya. Angay usab silang bansayon sa pagsangyaw ug sa pagpanudlo bahin sa kamatuoran. Sa atong mga kongregasyon, kinahanglang dasigon ang mga brader nga maningkamot aron mokuwalipikar ingong ministeryal nga alagad ug ansiyano. Pinaagi sa “maayong pagtudlo,” matabangan sa hamtong nga mga Kristohanon ang mga bag-ohan nga mouswag sa espirituwal. w16.08 4:1, 2

Ang pag-alagad kauban sa atong mga igsoon magpatunhay sa panaghiusa. Makapasuod usab kini sa usag usa ug makapalig-on sa atong pagsalig sa mga panalangin ubos sa Gingharian sa Diyos. Samtang atong palig-onon ang mga kamot sa uban, matabangan nato sila sa pagsagubang sa makapaluyang mga kahimtang ug sa paghupot ug positibong panglantaw sa umaabot. (Isa. 35:4) Dugang pa, kon buhaton nato kana, mahimong tinuod alang kanato ang gitagana sa Diyos sa umaabot. Oo, makapalig-on usab kana sa atong mga kamot. Dihang atong makita kon sa unsang paagi si Jehova nagtabang ug nanalipod sa iyang matinumanong mga alagad kaniadto, mapalig-on ang atong pagtuo ug pagsalig kaniya. Busa, kon mag-atubang kag mga presyur ug problema, ‘ayaw ihuyhoy ang imong mga kamot’! (Sof. 3:16) Hinunoa, duol kang Jehova pinaagi sa pag-ampo, ug tugoti ang iyang gamhanang kamot nga mopalig-on kanimo ug moagak kanimo ngadto sa mga panalangin sa Gingharian.​—Sal. 73:23, 24. w16.09 1:16-18

Dihang mamili kon unsay isul-ob, angayng tagdon sa mga alagad sa Diyos ang teksto karong adlawa. Tinuod nga ang lainlaing klima ug pag-usab-usab sa panahon makaapektar sa atong isul-ob, maingon man ang lainlaing situwasyon. Bisan pa niana, ang sukdanan ni Jehova dili mag-usab-usab. (Mal. 3:6) Sa init nga klima, mas lisod ang pagpilig estilo sa sinina nga desente ug makasaranganon ug nagpakitag maayong panghukom. Busa, pabilhan gayod sa atong mga igsoon sa pagtuo kon dili ta mosul-ob ug sinina nga fitting o luag kaayo nga madayag na ang pribadong mga parte sa lawas. (Job 31:1) Dugang pa, dihang mangaligo sa dagat o sa swimming pool, ang atong pangkaligo kinahanglang makasaranganon. (Prov. 11:2, 20) Bisag daghan sa kalibotan ang magsul-ob ug seksi kaayong pangkaligo, kita nga nag-alagad kang Jehova kinahanglang magmahunahunaon sa paghatag ug pasidungog sa balaang Diyos nga atong gihigugma. w16.09 3:11, 12

Si Jesus wala magduhaduha sa pagpangutana sa iyang mga sumusunod kon unsay ilang gituohan. Sundoga siya. Labing maayo nga samtang nag-estorya-estorya o nagbuhatbuhat mo uban sa inyong mga anak, dasigon ninyo sila sa pagsulti sa ilang pagbati. Kon nagduhaduha ang imong anak bahin sa usa ka pagtulon-an sa Bibliya, ayaw kasuko o pakiglalis. Magmapailobon ug tabangi siya sa pagpangitag tubag sa iyang mga pangutana. Maayong isipon ang sinserong mga pangutana sa imong anak ingong timailhan nga gusto niyang masabtan kana. Gani si Jesus, dihang 12 anyos, misukna nag seryosong mga pangutana. (Luc. 2:46) Sinatia pag-ayo ang inyong mga anak​—ilang panghunahuna, pagbati, ug gikabalak-an. Ayaw dayon paghunahuna nga duna na silay pagtuo tungod lang kay nagtambongan sila sa mga tigom ug mosangyaw uban ninyo. Ilakip ang paghisgot sa espirituwal nga mga butang diha sa inyong adlaw-adlawng kalihokan. Pag-ampo uban sa inyong mga anak ug alang kanila. Sayra kon unsang mga pagsulay ang ilang giatubang, ug tabangi sila sa pagsagubang niana. w16.09 5:3-5

Libolibo ka Saksi ni Jehova karon ang aktibong nakigbahin sa katumanan sa panan-awon nga imantala ang maayong balita “ngadto sa matag nasod ug tribo ug pinulongan ug katawhan.” (Pin. 14:6) Apil ka ba niadtong nagtuon ug laing pinulongan? Ikaw ba nag-alagad ingong misyonaryo o need-greater sa laing nasod, o nagtambongan sa langyawg pinulongan nga kongregasyon sa inyong nasod? Ingong mga alagad sa Diyos, kinahanglang himoon natong prayoridad ang pag-atiman sa atong espirituwal nga kahimsog ug nianang sa atong pamilya. Galing lang, malisdan ta usahay sa paggahig panahon para sa personal nga pagtuon tungod sa kadaghan sa atong buluhaton. Pero ang mga nag-alagad sa langyawng teritoryo may lain pang mga hagit nga giatubang. Gawas sa pagkat-og bag-ong pinulongan, kinahanglang seguroon niadtong nag-alagad sa langyawng teritoryo nga regular nilang matagan-an ang ilang kasingkasing ug gahing espirituwal nga pagkaon.​—1 Cor. 2:10. w16.10 2:1-3

Ang mga Saksi ni Jehova nagmalipayon sa ilang paglaom bisan sa grabe ug nagapadayong mga paglutos. Pananglitan, daghan sa atong mga igsoon, babaye ug lalaki, ang nangapriso sa Eritrea, Singapore, ug South Korea. Kasagaran, tungod kana sa ilang pagsunod sa giingon ni Jesus nga dili mobakyaw ug espada. Kadaghanan sa katawhan ni Jehova wala makaagom ug grabeng paglutos. Lahi ang mga pagsulay nga ilang giatubang. Daghan ang nag-antos sa kakabos, sibil nga mga gubat, o sa kinaiyanhong mga katalagman. Ang uban nagsundog kang Moises ug sa mga patriarka sa pagkaagi nga ilang gibiyaan ang haruhayng kinabuhi o pagkainila sa kalibotan. Nakigbisog silag maayo aron dili madani sa materyalistiko ug hakog nga pagkinabuhi. Unsay nakatabang nila sa paghimo niana? Ang ilang gugma kang Jehova ug ang ilang lig-ong pagtuo sa saad nga iyang tul-iron ang tanang inhustisya ug gantihan ang iyang matinumanong mga alagad ug kinabuhing walay kataposan diha sa matarong nga bag-ong kalibotan.​—Sal. 37:5, 7, 9, 29. w16.10 3:15, 16

Dihang ang matinumanong propeta nga si Jeremias nahadlok ug nahigawad, si Jehova nagdasig kaniya. (Jer. 1:6-10) Ug seguradong nadasig ang tigulang nga propetang si Daniel dihang ang Diyos nagpadalag manulonda sa pagpalig-on kaniya. Ang maong manulonda nagtawag kang Daniel nga “tilinguhaon kaayo,” o gipabilhan pag-ayo! (Dan. 10:8, 11, 18, 19) Madasig ba sab nimo ang mga magmamantala, payunir, ug edarang mga igsoon nga nagkaluya na? Bisag dugay kaayong nagkauban ang Diyos ug ang iyang minahal nga Anak, wala hunahunaa sa Diyos nga dili na kinahanglang dasigon si Jesus dihang dinhi siya sa yuta. Gani, kaduha nadunggan ni Jesus ang iyang Amahan nga misulti gikan sa langit: “Kini mao ang akong Anak, ang hinigugma, nga akong giuyonan.” (Mat. 3:17; 17:5) Busa, gikomendahan sa Diyos si Jesus ug gipasaligan kini nga maayo ang gibuhat niini. Nagpadala sab si Jehova ug manulonda aron palig-onon si Jesus dihang kini naguol pag-ayo sa gabii una sa iyang kamatayon.​—Luc. 22:43. w16.11 1:7, 8

Lisod kontrolahon ang atong emosyon dihang kita giinsulto o gitratar nga dili patas. Makapaguol kaayo kon kita wala tratarag tarong tungod sa atong rasa, kolor sa panit, o hitsura. Labaw na gyod kon isigkamagtutuo ang mibuhat niana! Maalamon gyod ang pagpadapat sa tambag sa Bibliya nga kontrolahon ang atong pagbati ug likayan nga masuko dayon! (Prov. 16:32) Klaro, kitang tanan kinahanglang maningkamot nga mahimong mas mapinasayloon ug dili sobra ka sensitibo. Importante kaayo kang Jehova ug Jesus ang atong pagkamapinasayloon. (Mat. 6:14, 15) Kinahanglan ba nimong pauswagon ang imong pagkamapinasayloon o pagkontrolar sa emosyon? Ang mga tawong dili makakontrolar sa ilang emosyon sagad mahimong masuk-anon. Tungod niana, ang uban dili gustong makig-uban nila. Ang tawong masuk-anon mahimong makaimpluwensiya sa kongregasyon.​—Lev. 19:17, 18. w16.11 3:4-6

Uhaw sa kamatuoran sa Bibliya, gisugdan ni Charles Taze Russell ug sa iyang mga kauban ang sistematikong pagtuon sa Bibliya niadtong mga 1870. Sa sinugdan, ang tumong ni Brader Russell mao ang pagseguro kon unsa nga relihiyon ang nagtudlo sa kamatuoran. Mainampingon niyang gikomparar ang gitudlo sa Bibliya ug ang mga doktrina sa nagkalainlaing relihiyon, apil na nianang sa mga dili Kristiyano. Wala madugay, naamgohan niya nga walay bisan usa niining mga relihiyona ang bug-os nga nagsunod sa Pulong sa Diyos. Dihay higayon nga nakigkita siya sa pipila ka lider sa relihiyon sa ilang dapit ug nagdahom nga dawaton nila ang mga kamatuoran gikan sa Bibliya nga nakat-onan ni Russell ug sa iyang mga kauban, ug itudlo kini sa ilang mga membro. Dili interesado ang mga lider sa relihiyon. Kinahanglang dawaton sa mga Estudyante sa Bibliya ang kamatuoran: Dili gyod puwedeng makig-uban niadtong gustong magpabilin sa bakak nga relihiyon. w16.11 4:14

Ang atong pagpabili sa dili takos nga kalulot sa Diyos naglangkit ug labaw pa kay sa paglikay sa pagpanapaw, paghuboghubog, o ubang sala nga gihimo kaniadto sa pipila sa Corinto. (1 Cor. 6:9-11) Ang pagdawat sa dili takos nga kalulot sa Diyos wala lamang magpasabot ug paglikay sa seksuwal nga imoralidad kondili sa pagpakigbisog usab sa tendensiya nga motan-awg law-ayng kalingawan. Ang pagtugyan sa atong mga sangkap ingong mga ulipon sa pagkamatarong dili lang magpugong kanato sa paghuboghubog kondili magpalihok usab kanato sa paglikay nga moinom hangtod sa punto nga hapit nang mahubog. Nagkinahanglan tingalig dakong paningkamot ang pagpakigbisog nianang sayop nga mga buhat; bisan pa niana, posibleng magmadaogon ta. Angay nga ang atong tumong mao ang paglikay sa seryosong mga sala maingon man sa mga sayop nga dili ingon niana ka seryoso. Dili nato kana hingpit nga matuman. Bisan pa niana, angay tang maningkamot sa pagbuhat niana, sama sa gihimo ni Pablo. Giawhag niya ang iyang mga igsoon: “Ayaw tugoti nga magpadayon sa pagmando ang sala ingong hari sa inyong may-kamatayong mga lawas nga inyong sugton ang ilang mga tinguha.”​—Roma 6:12; 7:18-20. w16.12 1:16, 19-21

Si Jesus nagsaad nga ang atong Amahan sa langit mohatag ug balaang espiritu niadtong mangayo niana. (Luc. 11:10-13) Ang bunga sa espiritu, positibong mga hiyas nga ipatungha sa aktibong gahom sa Diyos, nagpakita sa mismong personalidad sa labing gamhanang Diyos. (Col. 3:10) Samtang ginaugmad nimo ang bunga sa espiritu, mahimong mas maayo ang imong relasyon sa uban. Sa ingon, malikayan nimo ang mga situwasyon nga makapahinabo untag kabalaka. Tinuod, gikinahanglan ang pagpaubos aron mailalom sa “gamhanang kamot sa Diyos” ug ‘matugyan kaniya ang tanan nimong mga kabalaka.’ (1 Ped. 5:6, 7) Apan samtang ugmaron nimo ang pagkamapainubsanon, makasubay ka sa dalan nga motultol sa pag-uyon ug pagpaluyo sa Diyos. (Miq. 6:8) Kon imong ilhon ang imong pisikal, mental, ug emosyonal nga mga limitasyon, mamenosan ang imong kabalaka, kay mosalig man ka sa Diyos. w16.12 3:7, 12

Ingong “magwawali sa pagkamatarong,” si Noe matinumanong nagpahibalo sa pasidaan nga gihatag kaniya. Seguradong nakatabang kana kang Noe sa pagpabiling lig-on sa pagtuo. Gawas sa pagsangyaw, gigamit usab niya ang iyang pisikal ug mental nga mga katakos aron molampos sa hinatag sa Diyos nga buluhaton sa pagtukod ug arka. (Heb. 11:7) Sama kang Noe, naningkamot sab kita nga mahimong “puliki diha sa buluhaton sa Ginoo.” (1 Cor. 15:58) Kana nga buluhaton naglakip sa pagtukod ug pagmentinar sa mga dapit sa pagsimba, pagboluntaryo sa mga asembliya o kombensiyon, o pag-atiman sa mga asaynment diha sa sangang buhatan o sa remote translation office. Labaw sa tanan, kanunay tang puliki sa pagsangyaw kay kita nahibalo nga kini magpalig-on sa atong paglaom sa umaabot. Oo, ang pagsangyaw magpalig-on sa atong determinasyon nga magpabilin diha sa lumba sa kinabuhi.​—1 Cor. 9:24. w17.01 1:8, 9

Ang pagtahod sa kagawasan sa uban sa paghimog kaugalingong mga desisyon maoy laing limitasyon sa atong kagawasan. Ngano? Tungod kay kitang tanan dunay kagawasan sa pagpili, dili kanunayng pareho ang atong desisyon. Tinuod kini bisan sa mga butang nga may kalabotan sa atong panggawi ug pagsimba. Kon atong hinumdoman nga ang matag Kristohanon “magpas-an sa iyang kaugalingong luwan,” atong tahoron ang katungod sa uban sa paggamit sa ilang kagawasan sa pagpili, lakip na ang paghimog personal nga desisyon sa dili kaayo importanteng butang. (1 Cor. 10:32, 33) Gihatagan ta ni Jehova ug kagawasan sa pagpili, nga makahatag ug tinuod nga kagawasan. (2 Cor. 3:17) Gipabilhan nato kini nga gasa kay pinaagi niini makahimo tag mga desisyon nga magpakita sa kadako sa atong gugma kang Jehova. Hinaot nga padayon natong pabilhan kini nga gasa pinaagi sa paggamit niini sa paagi nga magpasidungog sa Diyos ug pinaagi sa pagtahod sa kagawasan sa uban sa paggamit niini. w17.01 2:15, 17, 18

Madani nato ang mga tawo, dili pinaagi sa pagpanghambog o pagpasikat, kondili pinaagi sa “malinawon ug malumong espiritu.” (1 Ped. 3:3, 4; Jer. 9:23, 24) Ang pagkagarboso nga naa sa atong kasingkasing sa ulahi madayag sa atong mga buhat. Pananglitan, ipabati seguro nato sa uban nga duna tay espesyal nga pribilehiyo, o naa tay impormasyong wala sa uban, o suod nato ang usa ka iladong brader. O tingali, mag-estorya ta sa paagi nga kita ra ang madayeg sa ideya o kalamposan bisag duna pay uban nga nakatampo niini. Si Jesus naghatag ug talagsaong ehemplo. Kadaghanan sa iyang gisulti maoy kinutlo o binase sa Hebreohanong Kasulatan. Siya makasaranganong misulti niining paagiha aron ang iyang mamiminaw mahibalo nga ang iyang gipanulti maoy gikan kang Jehova ug dili sa iyang kaugalingong panghunahuna o kaalam. w17.01 4:12

Dili lisod para kang Adan ug Eva nga sabton ang maong balaod; dili sab to lisod tumanon. Kon buot hunahunaon, dili nila maato ang gitaganang pagkaon. Si Satanas nga Yawa migamit ug halas sa paglimbong kang Eva aron supakon ang iyang Amahan, si Jehova. (Gen. 3:1-5; Pin. 12:9) Gipatungha ni Satanas ang isyu nga ang tawhanong mga anak sa Diyos wala tugoting mokaon “gikan sa tanang kahoy sa tanaman.” Sama rag siya miingon: ‘Dili diay mo makahimo kon unsay inyong gusto?’ Dayon, misulti siyag klarong bakak: “Dili gayod kamo mamatay.” Unya, iyang gikombinsir si Eva nga dili kini angayng maminaw sa Diyos: “Nasayod ang Diyos nga sa mismong adlaw nga kamo mokaon gikan niini ang inyong mga mata mangabuka.” Miingon si Satanas nga dili ipakaon ni Jehova ang bunga sa kahoy kay makahatag kini kanilag espesyal nga kahibalo. Dugang pa, si Satanas mihimog bakak nga saad: “Kamo mahisama sa Diyos, nga mahibalo sa maayo ug sa daotan.” w17.02 1:8, 9

Gitagna ni Isaias nga kining Usa mahimong “pangulo ug komandante.” (Isa. 55:4) Ug si Daniel giinspirar sa pagsulat bahin sa pag-abot sa “Mesiyas nga Pangulo.” (Dan. 9:25) Sa ulahi, gipaila ni Jesu-Kristo ang iyang kaugalingon ingong “Pangulo” sa katawhan sa Diyos. (Mat. 23:10) Ang mga tinun-an ni Jesus kinabubut-ong nagsunod kaniya, ug sila nagtuo nga siya ang pinili ni Jehova. (Juan 6:68, 69) Unsay nakapakombinsir kanila? Panahon sa bawtismo ni Jesus, nakita ni Juan nga Tigbawtismo “ang mga langit nga nabahin, ug, ingon sa usa ka salampati, ang espiritu mikunsad diha kaniya.” (Mar. 1:10-12) Sa tibuok ministeryo ni Jesus dinhi sa yuta, ang balaang espiritu sa Diyos naghatag niyag gahom sa paghimog mga milagro ug sa pagsulti nga may awtoridad gikan sa Diyos. (Buh. 10:38) Dugang pa, ang balaang espiritu nagpatungha diha kang Jesus ug hingpit nga bunga, nga naglakip sa gugma, kalipay, ug lig-ong pagtuo. (Juan 15:9; Heb. 12:2) Walay laing lider ang nakabaton nianang makapakombinsir nga ebidensiya. Klaro nga si Jesus ang pinili ni Jehova. w17.02 3:15, 16

Sa Pentekostes 33 C.E., ang mga apostoles nagsugod pagpanguna diha sa Kristohanong kongregasyon. Nianang higayona, “si Pedro mibarog uban sa napulog-usa” ug nagpaambit sa makaluwas ug kinabuhing mga kamatuoran ngadto sa panon sa mga Hudiyo ug mga kinabig. (Buh. 2:14, 15) Daghan kanila nahimong mga magtutuo. Human niadto, ang bag-ong mga Kristohanon “nagpadayon sa pagdeboto sa ilang kaugalingon sa ginatudlo sa mga apostoles.” (Buh. 2:42) Gidumala sa mga apostoles ang pondo sa kongregasyon. (Buh. 4:34, 35) Sila nag-atiman sa espirituwal nga panginahanglan sa katawhan sa Diyos, nga nag-ingon: “Among ideboto ang among kaugalingon sa pag-ampo ug sa pagministeryo sa pulong.” (Buh. 6:4) Ug ilang gipadala ang eksperyensiyadong mga Kristohanon aron masangyawan ang bag-ong mga teritoryo. (Buh. 8:14, 15) Sa ngadtongadto, ang ubang dinihogang mga ansiyano miduyog sa mga apostoles sa pagdumala sa kalihokan sa mga kongregasyon. Ingong nagamandong lawas, sila naghatag ug instruksiyon sa tanang kongregasyon.​—Buh. 15:2. w17.02 4:4

Kadaghanan sa dili hingpit nga mga tawo naimpluwensiyahan pag-ayo sa espiritu sa kalibotan ni Satanas. Kanay hinungdan kon nganong daghan ang may tendensiya nga idolohon ang pipila ka tawo imbes pakitaan lang silag nahiangayng pasidungog ug pagtahod. Ilang giidolo ang mga lider sa relihiyon ug sa politika, atleta, artista, ug ubang sikat nga mga tawo, nga daw gipakadiyos kini. Busa, ang mga bata ug tigulang nag-isip kanila ingong mga sulondan, tingali nagsundog sa ilang linihokan, sininaan, o panggawi. Likayan sa matuod nga mga Kristohanon kanang sayop nga paagi sa pagpasidungog ug mga tawo. Sa tanang tawo nga nabuhi sukad, si Kristo lang ang nagpakitag hingpit nga sulondan. (1 Ped. 2:21) Dili malipay ang Diyos kon pakitaan natog pasidungog ang mga tawo nga labaw sa nahiangay kanila. Kinahanglang hinumdoman nato kini nga kamatuoran: “Ang tanan nakasala ug wala makaabot sa himaya sa Diyos.” (Roma 3:23) Sa pagkatinuod, wala gayoy tawo nga angayng idolohon. w17.03 1:6-8

Mahimong susihon sa matag usa ang iyang kasingkasing aron matino kon kini ba bug-os ngadto sa Diyos. Pangutan-a ang kaugalingon, ‘Determinado ba ko nga pahimut-an si Jehova, depensahan ang matuod nga pagsimba, ug protektahan ang iyang katawhan batok sa makadaot nga impluwensiya?’ Pananglitan, komosta kon dunay suod nimo nga napalagpot? Determinado ka ba nga dili makig-uban kaniya? Unsay diktar sa imong kasingkasing? Sama kang Asa, ikapakita nimo nga bug-os ang imong kasingkasing pinaagi sa pagsalig sa Diyos bisag mag-atubang ug grabeng paglutos. Tingali bugalbugalan ka sa eskuylahan tungod sa pagbarog nimo ingong Saksi ni Jehova. O biaybiayon ka sa mga kauban sa trabaho kon mobakasyon ka aron motambong ug asembliya o kon dili ka moobertaym. Sa maong mga kahimtang, pag-ampo sa Diyos, sama sa gibuhat ni Asa. (2 Cron. 14:11) Magpadayon sa pagbuhat kon unsay matarong ug maalamon. Hinumdomi nga gipalig-on ug gitabangan sa Diyos si Asa, ug Siya magpalig-on kanimo. w17.03 3:6-8

Ang Pulong sa Diyos nagtambag nato nga dili magdalidali dihang mohimog hinungdanong desisyon. Kon mogahin tag panahon sa pagtimbangtimbang sa tanang bahin o impormasyon maylabot sa usa ka desisyon, lagmit makahimo tag maalamong desisyon. (1 Tes. 5:21) Sa dili pa modesisyon, ang ulo sa pamilya mogahig panahon sa pagsusi sa Kasulatan ug sa atong mga publikasyon, ug sa pagkonsiderar sa mga opinyon o sugyot sa uban diha sa pamilya. Hinumdomi nga ang Diyos nagdasig kang Abraham sa pagpamati sa gisulti sa iyang asawa. (Gen. 21:9-12) Ang mga ansiyano angayng mogahin usab ug panahon sa pagpanukiduki. Ug kon sila makataronganon ug makasaranganon, dili sila mahadlok nga mawad-ag pagtahod ang uban kanila dihang may makaplagan silang bag-o ug importanteng impormasyon nga magpaila nga kinahanglang usbon ang ilang desisyon. Kinahanglang andam silang usbon ang ilang hunahuna ug desisyon kon nahiangay, ug maayong sundogon nato ang maong ehemplo. Kini magpatunhay sa kalinaw ug kahusay sa kongregasyon.​—Buh. 6:1-4. w17.03 2:16