Nobyembre

Sumala kang Satanas, walay nag-alagad kang Jehova tungod sa dili mahakogong gugma. (Job 2:4, 5) Nausab ba si Satanas human niya himoa ang maong pangangkon? Wala gayod! Dihang gitambog siya gikan sa langit, si Satanas gitawag gihapon nga “magsusumbong sa atong mga igsoon . . . kinsa nagsumbong kanila adlaw ug gabii atubangan sa atong Diyos!” (Pin. 12:10) Wala malimot si Satanas sa isyu sa integridad. Naghinamhinam siyang makita kita nga mosurender tungod sa pagsulay ug motalikod sa pagkasoberano sa Diyos. Busa, kon nag-antos kag kalisdanan, hinumdomi kining dili makita nga esena. Si Satanas ug ang iyang mga demonyo anaa sa usa ka kiliran, nga nagtan-aw kon unsay imong buhaton ug nagtuo nga mosurender ka. Sa pikas kiliran anaa si Jehova, iyang nagamandong Anak, ang nabanhawng mga dinihogan, ug ang libolibong manulonda. Sila nagdasig nimo sa pagpadayon, ug nalipay sa imong paglahutay ug pagpaluyo sa pagkasoberano ni Jehova. Puwede nimong palandongon ang inspiradong hangyo ni Jehova nga makita sa teksto karong adlawa. w16.04 2:8, 9

Kon mahusay ang problema uban sa ilang tabang, “nakabig mo ang imong igsoon.” Ayha pa nimo ipahibalo sa mga ansiyano ang problema kon wala gyod molampos ang balikbalik nga paningkamot sa pagtabang sa nakasala. Talagsa rang mahitabo nga kinahanglan pang himoon ang ikatulong lakang nga gihisgotan sa Mateo 18:15-17. Makapadasig kini, kay nagpasabot ni nga sagad, mahusay ra ang problema una moabot sa punto nga ang dili mahinulsolong makasasala ipalagpot sa kongregasyon. Kasagaran, makita ra sa nakasala ang iyang sayop ug tul-iron kini. Makita tingali sa nasakitang igsoon nga wala na siyay rason nga moreklamo pa ug tingali pasayloon na niya ang nakasala. Bisag unsa may kahimtang, ang mga pulong ni Jesus nagpakita nga dili angayng ilangkit dayon ang kongregasyon sa mga dili pagsinabtanay. Ayha pa mangilabot ang mga ansiyano kon nahimo na ang unang duha ka lakang ug kon may lig-ong ebidensiya nga duna gyoy sala nga nahimo. w16.05 1:15, 16

Kinahanglan kitang magpabiling neyutral aron mahimong maunongong mga sakop sa Gingharian sa Diyos. Kay kon dili, makabaton kaha kitag hinlo nga konsensiya dihang isangyaw nato nga ang Gingharian lamang sa Diyos ang makasulbad sa mga problema sa tawo? Dugang pa, dili sama sa bakak nga mga relihiyon diin nagkabahinbahin ang mga membro niini tungod sa pag-apil-apil sa politika, ang matuod nga pagsimba nagpreserbar sa atong tibuok kalibotang panag-igsoonay pinaagi sa pagtabang kanato nga magpabiling neyutral. (1 Ped. 2:17) Samtang magkaduol ang kataposan sa sistema ni Satanas, makadahom kita nga mahimong hagit ang pagpabiling neyutral. Ang kalibotan karon punog mga tawo nga “dili-ikasabot” ug “gahig ulo,” busa mas mosamot pa ang pagkabahinbahin ug panagsumpaki. (2 Tim. 3:3, 4) Sa pipila ka nasod, ang atong mga igsoon nakasinati nag wala damhang mga hagit sa ilang neyutralidad tungod sa kalit nga kausaban sa politikal nga kahimtang. Nasabtan ba nimo kon nganong kinahanglan natong palig-onon ang atong determinasyon nga magpabiling neyutral? Kon ayha pa nato kana palig-onon dihang mag-atubang na kitag malisod nga kahimtang, basig ikompromiso nato ang atong neyutralidad. w16.04 4:3, 4

Ang pipila naghunahuna tingali nga dili hinungdanon kon unsay ilang desisyon. Apan aron makahimog maalamong mga desisyon nga makapahimuot kang Jehova, kinahanglan natong palandongon ang mga balaod ug prinsipyo diha sa iyang Pulong ug sundon kini. Pananglitan, aron mabatonan ang pag-uyon sa Diyos, kinahanglan natong sundon ang iyang balaod labot sa dugo. (Gen. 9:4; Buh. 15:28, 29) Ang pag-ampo makatabang nato sa paghimog mga desisyon nga nahiuyon sa mga prinsipyo ug balaod sa Kasulatan. Ang dagkong personal nga desisyon mahimong makaapektar sa atong espirituwalidad. Ang matag desisyon nga atong himoon mahimong makaapektar sa atong relasyon kang Jehova​—sa ikaayo man o ikadaot. Ang maayong desisyon makapalig-on sa atong relasyon sa Diyos, samtang ang dili maayo makadaot niana. Dugang pa, ang dili maayong desisyon makadaot sa espirituwalidad sa uban. Kini makatugaw o makapandol pa gani kanila, o makabungkag sa panaghiusa sa kongregasyon. Sa pagkatinuod, hinungdanon gayod ang atong personal nga mga desisyon.​—Roma 14:19. w16.05 3:4, 5

Makaseguro kita nga gipabilhan ni Jehova ang atong mga paningkamot sa ‘pagpalit sa nahiangay nga panahon’ pinaagi sa regular nga pagbasa ug pagtuon sa Bibliya. (Efe. 5:15, 16) Tinuod, dili tingali kanunayng managsama ang gidaghanon sa panahon nga atong magugol alang sa tanang espirituwal nga pagkaon. Pero, angay tang mag-amping sa kapeligrohan. Unsa kini? Dunay kapeligrohan nga basin dili kita makapahimulos sa pipila ka espirituwal nga tagana kay naghunahuna ta nga dili kana mapadapat kanato. Pananglitan, komosta kon ang usa ka bahin sa Bibliya morag dili praktikal sa atong kahimtang? O komosta kon dili para nato pangunang gisulat ang usa ka publikasyon? Dalidalion ra ba nato kanag basa o kaha dili na lang gyod basahon? Kon mao, atong gihikawan ang atong kaugalingon sa impormasyon nga dako untag ikatabang kanato. Angay natong hinumdoman nga ang Diyos mao ang Tinubdan sa tanan natong espirituwal nga pagkaon. w16.05 5:5, 6

Si Jehova naggamit sa kongregasyon ug sa mga ansiyano aron umolon ang matag usa kanato. Pananglitan, kon mamatikdan sa mga ansiyano nga kita may problema sa espirituwal, sila maningkamot sa pagtabang kanato​—pero dili pinaagi sa tawhanong kaalam. Hinunoa, sila mapainubsanong moduol sa Diyos, nga mangayog kaalam ug pagsabot. Sila molihok uyon sa ilang mga pag-ampo pinaagig pagpanukiduki sa Pulong sa Diyos ug sa atong mga publikasyon. Pinaagi niini, sila makahatag kanatog tabang nga haom sa atong kahimtang. Kon masabtan nato kon sa unsang paagi kita ginaumol ni Jehova, kini makatabang nato sa pagbaton ug maayong relasyon sa mga igsoon ug positibong tinamdan sa mga tawo sa atong teritoryo, apil na sa atong mga Bible study. Dili pugson sa Diyos ang usa ka tawo sa paghimog kausaban, pero ipadayag niya ang iyang matarong nga mga sukdanan aron sila kinabubut-ong mohimog mga kausaban sa ilang kinabuhi. w16.06 1:13, 14

Si apostol Juan nagpasidaan nga kon si bisan kinsa mahigugma sa mga butang sa kalibotan​—“ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa”​—nan “ang gugma sa Amahan wala diha kaniya.” (1 Juan 2:15, 16) Nagpasabot kana nga kinahanglang susihon nato kanunay ang atong kasingkasing kon kini ba nadani na sa mga tawo, kalingawan, ug estilo sa sinina ug pamostura sa kalibotan. O kaha ang paghigugma sa kalibotan maglakip sa paningkamot nga makab-ot ang “dagkong mga butang,” pananglitan, pinaagi sa pagkuhag taas nga edukasyon. Hapit na kitang mosulod sa gisaad nga bag-ong kalibotan. Busa, importante gayod nga atong hinumdoman ang puwersadong mga pulong ni Moises sa Deuteronomio 6:4! Kon kita nakasabot ug nagtuo gayod nga “si Jehova nga atong Diyos maoy usa lamang ka Jehova,” buhaton nato ang atong maarangan sa paghatag kaniya sa bug-os nga debosyon, nga mag-alagad kaniya sa paagi nga iyang giuyonan.​—Heb. 12:28, 29. w16.06 3:14

Gikaingon nga diyutay lang ang panginahanglan sa tawo, pero daghan kaayo ang iyang gusto. Morag daghan ang wala makaila sa kalainan tali sa materyal nga mga panginahanglan ug sa mga gusto. Unsay kalainan niana? Ang “panginahanglan” mao ang mga butang nga angay nimong mabatonan aron mabuhi. Kini mao ang pagkaon, sinina, ug puy-anan. Ang “gusto” mao ang mga butang nga buot nimong mabatonan, pero puwede kang mabuhi nga wala kini. Magkalahi ang gusto sa mga tawo, depende kon asa sila magpuyo. Sa pobreng mga nasod, ang mga tawo gusto lang tingaling makapalit ug cellphone, motor, o gamayng lote. Sa datong mga nasod, daghan tingali ang gustong makabatog mahalong mga sinina, mas dakong balay, o mas mahal nga sakyanan. Bisan unsa pa man, anaa ang kapeligrohan​—malit-agan sa materyalismo, nga gustong makabaton ug mas daghang butang, gikinahanglan man kini o wala ug maarangan man kini o dili.​—Heb. 13:5. w16.07 1:1-3

Daghan ang puliki kaayo sa adlaw-adlawng kalihokan maong wala na sila ‘maghunahuna sa ilang espirituwal nga panginahanglan.’ (Mat. 5:3) Sila nalinga sa makapadani nga mga butang sa kalibotan nga nagpukaw sa ‘tinguha sa unod ug sa tinguha sa mata.’ (1 Juan 2:16) Imbes magpaimpluwensiya sa espiritu sa kalibotan, nagpagiya kita sa espiritu sa Diyos nga pinaagi niana si Jehova naghatag kanatog tin-awng pagsabot sa mahitabo sa umaabot. (1 Cor. 2:12) Bisan pa niana, nahibalo kita nga bisan ang ordinaryong mga butang sa kinabuhi makapaduka usab kon tugotan nato kana nga mosapaw sa atong espirituwal nga mga kalihokan. (Luc. 21:34, 35) Ang uban magbugalbugal tingali kanato tungod sa atong pagkamabinantayon, apan dili kana rason nga mawala ang atong pagbati sa pagkadinalian. (2 Ped. 3:3-7) Hinunoa, kinahanglang regular kitang makig-uban sa atong mga igsoon diha sa mga tigom, diin anaa ang espiritu sa Diyos. w16.07 2:13, 14

Daghan ang moampo para lang mogaan ang ilang gibati, pero wala gyod sila nagtuo nga dunggon sa Diyos ang ilang pag-ampo. Kinahanglan silang mahibalo nga si Jehova ang “Tigpatalinghog sa pag-ampo.” Giingnan ni Jesus ang iyang mga tinun-an: “Kon kamo mangayo ug bisan unsa sa akong ngalan, kini akong pagabuhaton.” (Juan 14:14) Klaro, ang “bisan unsa” nagpasabot sa tanang butang nga kaharmonya sa kabubut-on ni Jehova. Si Juan nagpasalig kanato: “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:14) Makapalipay gayong itudlo sa uban nga ang pag-ampo dili lang panghupay sa gibati kondili usa kini ka talagsaong paagi sa pagduol sa “trono sa dili-takos nga kalulot” ni Jehova! (Heb. 4:16) Pinaagi sa pagtudlo kanila sa hustong paagi sa pag-ampo, ngadto sa hustong Persona, ug para sa hustong mga butang, ato silang gitabangan nga masuod kang Jehova ug mahupayan dihang sila anaa sa kasakitan.​—Sal. 4:1; 145:18. w16.07 4:11, 12

Kana sab ang gibati sa tanang maunongong Saksi ni Jehova. Pero, komosta kon malimitahan ang imong ministeryo tungod sa sakit ug pagkatigulang? Hinumdomi kanunay nga dihang imong sangyawan ang mga nars o doktor, ang imong sagradong pag-alagad naghimaya sa atong kahibulongang Diyos. Kon napriso ka tungod sa imong pagtuo, lagmit gipaambit nimo ang kamatuoran kon itugot sa kahimtang, ug kana makapalipay kang Jehova. (Prov. 27:11) Tinuod usab kana kon ang imong pamilya lainlain ug relihiyon pero nagpadayon ka sa imong espirituwal nga rutina. (1 Ped. 3:1-4) Bisag anaa sa lisod nga kahimtang, makadayeg ka kang Jehova ug mouswag sa espirituwal. Seguradong panalanginan ka ni Jehova samtang imong ipaambit ang kamatuoran ngadto sa mga tawong nanginahanglag paglaom. w16.08 3:19, 20

Kini nga kahikayan wala magpakamenos sa asawa. Hinunoa, makatabang kini sa asawa sa pagtuman sa papel nga gihatag sa Diyos kaniya dihang Siya miingon: “Dili maayo alang sa tawo [Adan] nga magpadayon nga mag-inusara. Buhatan ko siyag katabang, ingon nga iyang katimbang.” (Gen. 2:18) Ingon nga si Kristo, ang “ulo sa kongregasyon,” nagpakitag gugma, ang Kristohanong bana kinahanglang magpakita usab ug mahigugmaong pagkaulo. Kon buhaton niya kana, ang iyang asawa mobatig kasegurohan ug pagkakontento, ug dili siya malisdan sa pagtahod, pagtabang, ug pagpasakop sa iyang bana. Ingong pagsundog kang Jesus, ang iyang mga sumusunod kinahanglang maghigugmaay sama sa iyang paghigugma kanila. (Juan 13:34, 35; 15:12, 13; Efe. 5:25) Busa, ang paghigugmaay sa magtiayon kinahanglang lig-on kaayo nga ang matag usa andam mamatay alang sa iyang kapikas, kon gikinahanglan. w16.08 2:3, 4

Ang imong positibong mga pulong makadasig sa uban. Sa ingon, matabangan nimo sila sa pag-alagad kang Jehova nga mas bug-os pa. Ug diha sa mga tigom, ayawg kalimti nga mapalig-on nimo ang uban pinaagi sa pag-isa sa imong kamot ug paghatag ug makapadasig nga mga komento. Sa tabang ni Jehova, napalig-on ang mga kamot ni Nehemias ug sa iyang mga kauban. Nahuman nila ang mga paril sa Jerusalem sulod lang sa 52 ka adlaw! (Neh. 2:18; 6:15, 16) Si Nehemias wala lang magdumala sa buluhaton kondili nangamot usab siya sa pagtukod sa mga paril sa Jerusalem. (Neh. 5:16) Sa susama, daghang mahigugmaong ansiyano ang nagsundog kang Nehemias pinaagi sa pagtabang diha sa mga proyekto sa pagpanukod o paglimpiyo ug pagmentinar sa ilang Kingdom Hall. Pinaagi sa pagsangyaw uban sa mga igsoon ug pag-shepherding, gipalig-on usab nila ang luya nga mga kamot niadtong nagmabalak-on.​—Isa. 35:3, 4. w16.09 1:15, 16

Ang katawhan sa Diyos naningkamot sa pagpadapat sa tambag sa Bibliya: “Patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana.” (Col. 3:2, 5) Dili nato gustong malisdan ang atong mga isigkamagtutuo sa pagsunod nianang tambaga. Ang mga igsoon nga mibiya na sa imoral nga pagkinabuhi tingali padayon pang nakigbisog sa makasasalang hilig. (1 Cor. 6:9, 10) Dili nato gustong malisdan sila sa ilang pagpakigbisog. Dihang kauban nato ang atong mga igsoon sa pagtuo, ang atong sininaan kinahanglang makatampo sa moral nga kahinlo sa kongregasyon. May kagawasan kitang mamili kon unsay atong isul-ob. Bisan pa niana, kitang tanan dunay responsabilidad sa pagsul-ob ug sinina nga makapasayon sa uban sa pagpabiling putli ug paghupot sa sukdanan sa Diyos sa pagkabalaan diha sa hunahuna, pulong, ug buhat.​—1 Ped. 1:15, 16. w16.09 3:9, 10

“Nagtuo mi kang Jehova, apan wala kana magpasabot nga motuo sab ang among mga anak,” matod sa usa ka magtiayon sa France. Sila miingon: “Ang pagtuo dili mapanunod. Kinahanglan kining ugmaron sa among mga anak.” Usa ka brader sa Australia misulat: “Ang pagtabang sa imong anak nga maugmad ang pagtuo diha sa iyang kasingkasing lagmit mao ang kinadak-ang hagit nga imong maatubang. . . . Tingali bation nimo nga natubag na nimo ang pangutana sa imong anak. Pero ipangutana na sab na niya sa ulahi! Tingali karon natagbaw siya sa tubag apan pagkaugma dili na siya kontento ana. Basin kinahanglan nimong balikbalikon paghisgot ang maong topiko.” Kon ginikanan ka, bation ba nimo usahay nga dili nimo matuman ang responsabilidad sa pagtudlo ug pagpalig-on sa pagtuo sa imong mga anak? Tinuod, kon sa ato lang kaugalingong kaalam, walay usa kanato ang makatuman niana! (Jer. 10:23) Apan molampos ta kon magpagiya ta sa Diyos. w16.09 5:1, 2

Ang mga bag-ong namalhin maningkamot sa pagpasibo sa kultura sa ilang bag-ong nasod. Si Ruth nagpakitag maayong ehemplo niining bahina. Una, gitahod niya ang kostumbre sa iyang bag-ong nasod pinaagi sa pagpananghid nga manghagdaw. (Ruth 2:7) Wala siya moderetsog panghagdaw bisag iya kining katungod ug wala siya maghunahuna nga obligasyon sa uban nga tagan-an siya. Ikaduha, mapasalamaton siya sa kaayo nga gipakita kaniya. (Ruth 2:13) Kon ipakita sa mga bag-ong namalhin kanang maayong mga hiyas, lagmit maangkon nila ang pagtahod sa lokal nga mga residente ug sa mga isigkamagtutuo. Malipayon kita nga tungod sa dili takos nga kalulot ni Jehova, gitugotan niya ang mga tawo nga lainlaig kagikan nga makadungog sa maayong balita. Sa ilang nasod, wala tingali sila makahigayon sa pagtuon sa Bibliya o sa pagpakig-uban sa katawhan ni Jehova. Apan karon nga may kahigayonan na sila sa pagpakig-uban kanato, di ba angay nato silang tabangan aron dili na sila mobating samag mga estranyo sa atong taliwala? w16.10 1:17-19

Milyonmilyong alagad sa Diyos karon ang nagsundog sa ehemplo ni Jesus pinaagi sa paghunahuna kanunay sa ilang paglaom ug sa pagpabiling lig-on bisan pa sa mga pagsulay. Tagda ang ehemplo ni Rudolf Graichen, nga natawo sa Germany niadtong 1925. Nahinumdom siya sa mga letrato sa mga esena sa Bibliya diha sa mga bungbong sa ilang balay. Misulat siya, “Makita sa usa ka letrato ang lobo ug karnero, nating kanding ug leopardo, nating baka ug leyon​—ang tanan malinawon, ug usa ka gamayng bata ang nangulo kanila. . . . Wala gyod nako malimti ang maong mga letrato.” (Isa. 11:6-9) Bisan pa sa grabeng paglutos sa daghang katuigan, una gikan sa Nazi Gestapo ug sa ulahi pinaagi sa Komunistang Stasi sa East Germany, nagpabiling lig-on ang pagtuo ni Rudolf sa paraiso. Ang lain pang grabeng mga pagsulay nga naatubang ni Rudolf mao ang pagkamatay sa iyang minahal nga inahan, nga nasakit ug typhus sa kampo konsentrasyon sa Ravensbrück, ug ang pagkakita niya sa iyang amahan nga mihuyang ang pagtuo ug mikompromiso ingong Saksi ni Jehova. w16.10 3:12-14

Ang mga alagad ni Jehova nagpabili pag-ayo sa balaang basahon sa Diyos, ang Bibliya. Kay dili man hingpit, usahay makadawat tag tambag gikan sa Kasulatan. Unsay atong reaksiyon niini? Konsideraha ang unang siglong mga Kristohanon nga si Euodia ug Sintique. Nagkalalis ning duha ka dinihogang sister. Ang panaglalis ni Euodia ug Sintique lagmit nakatugaw sa kalinaw sa kongregasyon. Wala maghisgot ang Bibliya kon unsay nahitabo sa ulahi, pero lagmit gipadapat niining mga igsoona ang mahigugmaong tambag ni apostol Pablo. (Filip. 4:2, 3) Ang susamang situwasyon mahitabo usahay sa mga kongregasyon sa katawhan ni Jehova karon. Pero, ang maong mga problema masulbad o malikayan pa gani kon ipadapat nato ang tambag sa Pulong sa Diyos, ang Bibliya. Ug kon gipabilhan nato pag-ayo ang Basahon ni Jehova, magkinabuhi ta uyon sa mga instruksiyon niini.​—Sal. 27:11. w16.11 3:1-3

Kitang tanan nagkinahanglag pagdasig. Ilabina gyod samtang magkahingkod ta. “Ang mga bata . . . nagkinahanglag pagdasig sama rang ang mga tanom nagkinahanglag tubig,” miingon ang maestro nga si Timothy Evans. “Kon dasigon, ang bata mobating mapuslanon ug gipabilhan.” Apan nagkinabuhi kita sa malisod nga mga panahon. Ang mga tawo mahunahunaon lang sa kaugalingon, wala na kaayoy pagtagad, ug nihit kaayo ang pagdasig. (2 Tim. 3:1-5) Gusto ni Satanas nga Yawa nga mahigawad ta kay nahibalo siya nga makapaluya kana kanato sa espirituwal ug sa ubang paagi. Gigamit ni Satanas ang mga kalamidad ug akusasyon aron paluyahon ang matarong nga si Job, apan napakyas ang maong daotang estratehiya. (Job 2:3; 22:3; 27:5) Masuklan nato ang mga buhat sa Yawa pinaagi sa pagdasig sa mga membro sa pamilya ug sa kongregasyon. Pinaagi niini, ang atong panimalay ug Kingdom Hall mahimong dapit sa kalipay ug kasegurohan. w16.11 1:4, 6

Ang pipila ka maisogong tawo sa sayong bahin sa ika-16 nga siglo nagsugod sa paghubad sa Pulong sa Diyos ngadto sa mga pinulongang masabtan sa ordinaryong mga tawo. Ug dihang nabatonan na ang Bibliya, gibasa gayod kini sa mga tawo. Dihang nabasa nila ang Bibliya, sila nakapangutana: ‘Asa makita sa Bibliya ang bahin sa purgatoryo? sa pagbayad sa misa alang sa patay? sa mga papa ug kardinal?’ Nakapasuko kini sa simbahan. Kinsa man sila nga mokuwestiyon sa mga lider sa simbahan! Mibalos ang simbahan. Daghang lalaki ug babaye ang gihukman ingong erehes tungod sa ilang pagsupak sa doktrina sa simbahan. Ang simbahan maoy nagsentensiyag kamatayon; ang Estado maoy nagpahamtang niini. Gusto nilang pahunongon ang mga tawo sa pagbasa sa Bibliya ug sa pagkuwestiyon sa simbahan. Sagad, misaler ang ilang plano. Bisan pa niana, ang pipila ka maisogong tawo wala magpakontrolar sa Dakong Babilonya. May nasabtan na sila sa Pulong sa Diyos​—ug gusto pa nilag dugang! w16.11 4:13

Ang pagkamatinud-anon maoy hinungdanong bahin sa Kristiyanidad. (Efe. 4:25) Si Satanas “ang amahan sa bakak.” Si Ananias ug ang iyang asawa namatay tungod sa pagpamakak. Dili nato gustong sundogon sila​—likayan nato ang pagpamakak. (Juan 8:44; Buh. 5:1-11) Apan, mao ra ba nay nalangkit sa pagkamatinud-anon? Sa pagkatinuod, ang atong pagkamatinud-anon angayng magpakita sa atong dakong pagpabili sa dili takos nga kalulot sa Diyos. Ang pagpamakak maoy pagsultig dili tinuod. Pero, gusto ni Jehova nga dili lang ang direktang pagpamakak ang likayan sa iyang katawhan. Giawhag niya ang mga Israelinhon kaniadto: “Kamo magmabalaan, tungod kay ako si Jehova nga inyong Diyos balaan.” Dayon gihatag niya ang mga pananglitan sa pagkahimong balaan. Sa bahin, ang Diyos miingon: “Dili kamo mangawat, ug dili kamo manglimbong, ug ang bisan kinsa kaninyo dili makiglabot nga binakak sa iyang isigkatawo.” (Lev. 19:2, 11) Ikasubo, ang usa nga naningkamot nga dili gayod direktang mamakak mahimong manglimbong gihapon sa uban, nga makiglabot nga binakak kanila. w16.12 1:17, 18

Sa Bibliya, atong mabasa ang makapahupayng mga pulong ni Jesus. Ang iyang gisulti ug gitudlo nakapadasig sa iyang mga mamiminaw. Daghan ang nadani kaniya tungod kay iyang gihupay ang natugaw nga mga kasingkasing, gipalig-on ang mga maluya, ug gihupay ang mga nagmagul-anon. (Mat. 11:28-30) Nagpakita siyag mahigugmaong pagtagad sa espirituwal, emosyonal, ug pisikal nga panginahanglan sa uban. (Mar. 6:30-32) Mapadapat gihapon karon ang gisaad ni Jesus nga tabang. Mahimong tinuod kini alang kanimo sama sa nasinati sa mga apostoles nga nagpanaw uban kang Jesus. Dili kinahanglang makauban nimo si Jesus sa personal aron ka makabenepisyo. Ingong langitnong Hari, si Jesus padayong nagbaton ug nagpakitag empatiya. Busa, dihang ikaw mabalaka, siya maluoy ug ‘motabang kanimo sa hustong panahon.’ Oo, si Jesus makatabang nimo sa pagsagubang sa kagul-anan ug makahatag kanimog paglaom ug kaisog.​—Heb. 2:17, 18; 4:16. w16.12 3:4, 6

Si Noe nagkinabuhi sa kalibotan nga “napuno sa kapintasan” ug imoralidad. (Gen. 6:4, 9-12) Bisag matinumanong gisangyaw ni Noe ang pasidaan ni Jehova, dili niya mapugos ang mga daotan sa pagdawat sa maong mensahe. Dili sab niya mapadali ang pag-abot sa Lunop. Kinahanglang mosalig si Noe nga tumanon ni Jehova ang Iyang saad nga taposon ang pagkadaotan, ug motuo nga himoon kana sa Diyos sa hustong panahon. (Gen. 6:17) Nagkinabuhi sab kita sa kalibotan nga puno sa pagkadaotan, ug nahibalo ta nga si Jehova nagsaad nga iya kining taposon. (1 Juan 2:17) Dili nato mapugos ang mga tawo sa pagdawat sa “maayong balita sa gingharian.” Ug dili pod nato mapadali ang pagsugod sa “dakong kasakitan.” (Mat. 24:14, 21) Sama kang Noe, nagkinahanglan tag lig-ong pagtuo, nga masaligong sa dili madugay ang Diyos makiglabot. (Sal. 37:10, 11) Kombinsido ta nga dili tugotan ni Jehova nga kining daotang kalibotan molapas bisag usa lang ka adlaw sa Iyang gitakdang panahon.​—Hab. 2:3. w17.01 1:5-7

Karon, daghan ang nag-abuso sa ilang kagawasan sa pagpili ug mihimog mga desisyon nga nakadaot sa uban. Sama gayod kana sa gitagna sa Bibliya nga “sa kataposang mga adlaw” ang mga tawo “dili-mapasalamaton.” (2 Tim. 3:1, 2) Hinaot nga dili gayod nato abusohan o balewalaon kining bililhong gasa ni Jehova. Apan, sa unsang paagi malikayan nato ang pag-abuso sa atong kagawasan sa pagpili? Kitang tanan may kagawasan sa pagpili maylabot sa pakig-uban, sinina ug pamostura, ug kalingawan. Apan, ang atong kagawasan mahimong “takoban sa pagkadaotan” kon magpaulipon ta sa atong unodnong mga tinguha o kon sundogon nato ang kalibotanong mga uso. (1 Ped. 2:16) Imbes gamiton ang atong kagawasan “ingon nga panghaylo alang sa [tinguha sa] unod,” determinado tang mohimog mga desisyon nga motabang nato sa pagsunod sa tambag: “Himoa ang tanang butang alang sa kahimayaan sa Diyos.”​—Gal. 5:13; 1 Cor. 10:31. w17.01 2:12-14

Ang ehemplo ni Nehemias nagtudlo nato kon sa unsang paagi ang pagkamakasaranganon motabang nato sa paglikay nga mosalig sa kaugalingon dihang makadawat ug bag-ong asaynment o dugang responsabilidad. Kon ang usa ka ansiyano mosalig sa iyang kaugalingong kasinatian, sugdan niya ang usa ka buluhaton sa kongregasyon nga dili una moampo kang Jehova. Ang uban tingali modesisyon daan ayha pa moampo kang Jehova nga panalanginan ang ilang desisyon. Hinunoa, nagpakita ba kanag pagkamakasaranganon? Ang makasaranganong tawo kanunayng mahinumdom sa iyang dapit atubangan sa Diyos ug sa iyang papel sa kahikayan sa Diyos. Ang atong mga katakos dili mao ang importante. Ilabina dihang makaatubang kitag pamilyar nga kahimtang o problema, angay tang mag-amping nga dili mosalig sa kaugalingon. (Prov. 3:5, 6) Ingong mga membro sa panimalay sa Diyos, naghunahuna kita sa pagtuman sa atong responsabilidad sa pamilya o sa kongregasyon imbes sa pagkab-ot ug ranggo o taas nga posisyon.​—1 Tim. 3:15. w17.01 4:7, 8

Orihinal nga katuyoan ni Jehova nga ang katawhan mabuhi sa yuta sa walay kataposan. (Gen. 1:28; Sal. 37:29) Dagaya niyang gihatagan si Adan ug Eva ug lainlaing bililhong gasa aron mabuhi nga malipayon. (Sant. 1:17) Si Jehova naghatag nilag kagawasan sa pagpili, katakos sa pagpangatarongan, ug katakos sa paghigugma ug pagpakighigala. Ang Maglalalang nakig-estorya kang Adan ug naghatag ug instruksiyon kon sa unsang paagi ipakita ang pagkamatinumanon. Si Adan nakakat-on usab sa pagtagana sa iyang panginahanglan ug sa pag-atiman sa mga hayop ug sa yuta. (Gen. 2:15-17, 19, 20) Si Jehova naglalang sab kang Adan ug Eva nga may katakos sa pagtilaw, paghikap, pagtan-aw, pagpamati ug pagpanimaho. Tungod niana, bug-os nilang matagamtam ang kanindot ug kadagaya sa ilang Paraisong puy-anan. Para sa unang magtiayon, daghan kaayo ang kahigayonan alang sa makapatagbawng trabaho, kalamposan, ug pagkat-on. Si Jehova naglalang kang Adan ug Eva nga may katakos sa pagpatunghag hingpit nga mga anak. Ang yuta, nga puno sa mga tagana, mahimo unta nilang permanenteng puy-anan. w17.02 1:6, 7

Unsay epekto sa Pulong sa Diyos diha sa mga tawo nga nanguna? Tagda ang pananglitan ni Haring Josias. Dihang nakit-an ang usa ka dokumento nga naundan sa Balaod ni Moises, gibasa kini sa sekretaryo atubangan ni Josias. Ang Pulong sa Diyos nagpalihok kaniya sa pagwagtang sa idolatriya ug paghikay ug kinadak-ang pagsaulog sa Paskuwa. (2 Hari 22:11; 23:1-23) Kay gigiyahan sa Pulong sa Diyos si Josias ug ang ubang matinumanong lider, andam silang usbon ug klarohon ang sugo nga ilang gihatag sa katawhan sa Diyos. Ang maong mga kausaban nakatabang sa katawhan sa Diyos sa pagtuman sa iyang kabubut-on. Bisan pa niana, dili tanang hari nga nagmando sa katawhan sa Diyos kaniadto ang nagsunod sa mga instruksiyon sa Diyos. Sa pipila ka kahimtang, gidisiplina o gipulihag lain ni Jehova ang maong mga lider. (1 Sam. 13:13, 14) Sa iyang gitakdang panahon, nagtudlo siyag lider nga labaw kaayo kay kang bisan kinsang tawo nga iyang gigamit sukad. w17.02 3:11, 12, 14

Ang mga tawo gilalang “sa larawan sa Diyos.” (Gen. 1:27) Busa, kadaghanan kanila nagpakitag diyosnong mga hiyas, apan sa lainlaing paagi. Ang mga tawo may katakos sa pagpakitag gugma, kaayo, ug pagkamabination. Kay gilalang nga may konsensiya, ang mga tawo may kinaiyanhong katakos sa pag-ila kon unsay husto o sayop, tinuod o bakak, angay o dili angay​—bisag usahay dili tukma o hiwi ang idiktar niini. (Roma 2:14, 15) Kadaghanan ganahan sa mga butang nga hinlo ug nindot. Sagad gusto nilang magkinabuhing malinawon. Naamgohan man nila kini o wala, ilang gisundog si Jehova sa pipila ka paagi, ug tungod niini, takos silang pasidunggan ug tahoron. Apan, kinahanglang magmabalanse sa pagtino kon unsang matanga sa pasidungog ug kon unsa ka dakong pasidungog ang angayng ihatag ngadto sa uban. w17.03 1:5, 6

Dili sama sa kadaghanan, ang Diyos dili magpatakag desisyon bisan pag nasuko siya. Human maobserbahi ang paghinulsol ug pagbag-o sa mga taga-Nineve, giusab ni Jehova ang iyang desisyon. Sa pagbuhat niana, gipakita niya nga siya makataronganon, mapainubsanon, ug maluluy-on. Sa susama, may mga higayon tingali nga maayong konsiderahon pag-usab ang atong desisyon. Lagmit tungod kini kay nausab ang kahimtang. Usahay, bag-ohon ni Jehova ang iyang desisyon dihang mausab ang mga kahimtang. (1 Hari 21:20, 21, 27-29; 2 Hari 20:1-5) O kaha may bag-ong impormasyon nga maghatag ug balidong rason sa pagbag-o sa usa ka desisyon. Si Haring David gihatagag sayop nga impormasyon bahin sa apo ni Saul nga si Mepiboset. Dihang sa ulahi nakadawat si David ug tukmang impormasyon, gibag-o niya ang iyang desisyon.​—2 Sam. 16:3, 4; 19:24-29. w17.03 2:14, 15

Kon motungha ang problema, angay natong susihon kon unsang mga prinsipyo sa Bibliya ang nalangkit ug ipadapat kana sa balanseng paagi. Pananglitan, ang usa ka sister nahibalo nga responsabilidad niya ang pagsangyaw sa maayong balita. (Buh. 4:20) Bisan pa niana, ibutang ta nga nagplano siyang mosangyaw sa usa ka espesipikong adlaw, pero gusto sa iyang dili magtutuong bana nga magpabilin siya sa balay. Miingon ang bana nga taudtaod na silang wala mag-date, ug gusto niyang manuroy sila. Lagmit konsiderahon sa sister ang pipila ka teksto sa Bibliya, sama sa pagsunod sa Diyos ug paghimog tinun-an. (Mat. 28:19, 20; Buh. 5:29) Apan kinahanglan sab niyang tagdon ang iyang pagpasakop ingong asawa ug ang pagkamakataronganon. (Efe. 5:22-24) Dili ba gyod siya pasangyawon sa iyang bana, o mihangyo lang kini nga manuroy sila nianang adlawa? Kinahanglan tang magmabalanse samtang buhaton nato ang kabubut-on sa Diyos ug maningkamot sa pagbaton ug maayong konsensiya. w17.03 4:17