Enero

Kay hapit nang matapos ang kataposang mga adlaw, ang pagkadaotan magpadayon sa ‘pagturok ingon sa katanoman.’ (Sal. 92:7) Busa dili ikatingala nga daghan ang wala magsunod sa moral nga mga sukdanan. Niini nga palibot, sa unsang paagi mahimo tang ‘bata sa pagkadaotan’ pero ‘hingkod sa [atong] gahom sa pagsabot’? (1 Cor. 14:20) Ang tubag niana naa sa atong teksto karong adlawa, nga sa bahin nag-ingon: “Kadtong nagapangita kang Jehova makasabot sa tanang butang”​—ang tanang gikinahanglan aron malipay siya. Gihisgotan sab kana sa Proverbio 2:7, 9, nga nag-ingong si Jehova “magatipig ug praktikal nga kaalam alang sa mga matul-id.” Tungod niana, ang mga matul-id “makasabot sa pagkamatarong ug sa paghukom ug sa katul-id, ang kinatibuk-ang dalan kon unsay maayo.” Si Noe, Daniel, ug Job nakabaton niana nga kaalam. (Ezeq. 14:14) Mao man usab ang katawhan sa Diyos karon. Komosta sa imong bahin? ‘Nasabtan [ba nimo] ang tanang butang’ nga gikinahanglan aron malipay si Jehova? Importante ang pagbatog tukmang kahibalo bahin kaniya. w18.02 8 ¶1-3

Dili angayng pugson sa ginikanan, sa nagtudlo sa Bibliya, o ni bisan kinsa sa kongregasyon ang mga Bible study nga magpabawtismo. Dili kana gusto ni Jehova. (1 Juan 4:8) Hinunoa, samtang tudloan nato sila, kinahanglan natong ipasiugda ang kaimportante sa pag-ugmad ug personal nga relasyon sa Diyos. Kon ilang gipabilhan ang kamatuoran ug gusto nilang isangon ang yugo sa pagka-Kristohanon, makadesisyon silang magpabawtismo. (2 Cor. 5:14, 15) Walay gitakdang edad nga angayng magpabawtismo ang usa. Lainlain ang gikusgon sa pag-uswag ug paghamtong sa matag Bible study. Malipayon kaayo ang adlaw sa bawtismo. Panahon sab kana sa seryosong pagpamalandong. Ang pagtuman sa pahinungod nagkinahanglag paningkamot. Kanay rason nga gikomparar ni Jesus ang pagka-Kristohanon sa usa ka yugo. Ang mga tinun-an ni Jesus kinahanglang “magkinabuhi dili na alang sa ilang kaugalingon, kondili alang kaniya nga namatay alang kanila ug gibangon.”​—2 Cor. 5:15; Mat. 16:24. w18.03 6-7 ¶14-17

Nagduhaduha ba ka sa pag-abiabi? Kon mao, gipalabay nimo ang kahigayonan sa malipayong panag-ubanay ug walay kataposang panaghigalaay. Pangontra sa kamingaw ang pag-abiabi. Pero makapangutana tingali ka, ‘Nganong naay magduhaduha sa pag-abiabi?’ Dunay pipila ka rason. Ang usa mao nga ang mga alagad ni Jehova daghan kaayog buluhaton ug responsibilidad. Para sa pipila, wala na silay panahon ug kusog sa pag-abiabi. Kon kanay imong situwasyon, basig kinahanglan nimong susihon ang imong eskedyul. Puwede ba kang mohimog kausaban para naa kay panahon ug kusog sa pagpangimbitar o sa pagdawat ug imbitasyon? Ang Bibliya nagdasig sa mga Kristohanon sa pag-abiabi. Dili sayop nga mogahin ug panahon para niana; kana gani ang angayng buhaton. Siyempre, kinahanglan tingali nimong limitahan ang dili kaayo importanteng buluhaton. w18.03 16 ¶13-14

Sa tanang tawo nga nabuhi sukad, kinsa ang kinamaayohang ehemplo sa usa ka tawong espirituwal? Siyempre, si Jesus. Gipakita sa tibuok niyang kinabuhi ug ministeryo nga gusto niyang sundogon ang iyang Amahan, si Jehova. Ang iyang hunahuna, pagbati, ug mga buhat sama nianang kang Jehova. Nagkinabuhi sab siya uyon sa kabubut-on ug sukdanan sa Diyos. (Juan 8:29; 14:9; 15:10) Pananglitan, matikdi kon giunsa paghubit ni Isaias ang pagkamaluluy-on ni Jehova, ug itandi kana sa giingon sa magsusulat sa Ebanghelyo nga si Marcos bahin sa pagbati ni Jesus. (Isa. 63:9; Mar. 6:34) Sama ba ta kang Jesus, nga andam magpakitag kaluoy sa mga tawong nanginahanglag tabang? Dugang pa, si Jesus nagkugi sa pagsangyaw ug pagtudlo sa maayong balita. Kanang tanang pagbati ug buhat maoy timailhan sa tawong espirituwal. w18.02 21 ¶12

Lisod ang pagmatutog mga anak ilabina niining panahona. (2 Tim. 3:1-5) Siyempre, ang mga bata wala ipanganak nga nakahibalo na kon unsay husto ug sayop. Duna silay konsensiya, pero kinahanglan pa ning tudloan, o disiplinahon. (Roma 2:14, 15) Ang usa ka reperensiya sa Bibliya nag-ingon nga ang Gregong pulong nga gihubad ug “disiplina” mahimong magkahulogag pagmatuto sa anak aron mahimong responsable inigkadako. Ang mga bata nga mahigugmaong gidisiplina sagad mobating luwas. Ilang makat-onan nga may mga limitasyon ang kagawasan ug ang mga desisyon ug panggawi may mga resulta​—maayo o daotan. Maong importante gyod nga ang mga ginikanan magpagiya kang Jehova. Hinumdomi nga lainlain ang paagi sa pagmatuto sa mga anak depende sa kultura ug sa dagan sa panahon. Kon ang mga ginikanan mamati sa Diyos, ang pagmatuto sa ilang anak dili tira pasagad ug wala magdepende sa kaugalingong eksperyensiya o panghunahuna. w18.03 30 ¶8-9

Ingong batan-on nga bawtismadong Kristohanon, ikaw na ang responsable sa imong kaluwasan, bisag naa pa ka sa poder sa imong ginikanan. Nganong importanteng hinumdoman kana? Kay makaeksperyensiya kag kausaban sa emosyon o presyur dihang tin-edyer na. Usa ka dalaga ang miingon: “Dili maguol ang usa ka bata nga Saksi ni Jehova siya tungod lang kay wala siya makakaon ug birthday cake sa eskuylahan. Pero paglabay sa pipila ka tuig diin mag-anam ka kusog ang tinguha sa pagpakigsekso, kinahanglang kombinsido kaayo siya nga ang pagsunod sa mga balaod ni Jehova mao gyod ang kinamaayohang desisyon.” Bisag kadtong hamtong na nga nabawtismohan nakasinatig daghang wala damhang pagsulay. Kana nga mga pagsulay maylabot tingali sa kaminyoon, panglawas, o trabaho. Sa tinuod lang, bisag unsa pay atong edad, makaatubang tag mga situwasyon diin kinahanglan tang magmatinumanon kang Jehova.​—Sant. 1:12-14. w17.12 24 ¶4-5

Daghan ang wala pa makasulay sa naagoman ni David. Bisan pa niana, ang maong higala sa Diyos wala magpadala sa iyang kasuko. Hinunoa, siya misulat: “Likayi ang kasuko [o, hunong na sa pagkasuko] ug biyai ang kaaligutgot; ayaw pagpanginit nga mosangko lamang sa pagbuhat ug daotan.” (Sal. 37:8) Dunay labing importanteng rason nga mohunong ta sa pagkasuko. Gusto natong sundogon si Jehova, kinsa ‘wala magpahamtang kon unsay angay kanato pinasukad sa atong kasaypanan.’ (Sal. 103:10) Apan may praktikal usab nga mga kaayohan kon mohunong ta sa pagkasuko. Pananglitan, ang kasuko makapataas sa presyon sa dugo ug makapahinabog problema sa respiratoryo. Makaapektar usab kini sa atay ug sa hagorila (pancreas), ug makapahinabog problema sa paghilis sa pagkaon. Kon masuko ta, dili ta makahunahunag tarong. Ug usahay ang pagsilaob sa kasuko mahimong sundan sa dugayng depresyon. Sa laing bahin, “ang kalmado nga kasingkasing mao ang kinabuhi sa unod,” matod sa Bibliya. (Prov. 14:30) Nan, unsaon man nato pagwagtang ang kahiubos, ug sa ingon makig-uli sa atong igsoon? Mahimo nato kana pinaagi sa pagpadapat sa maalamong tambag sa Bibliya. w18.01 10 ¶14-15

Wala moingon si David nga siya dili gayod mamatay o moadto sa komon nga lubnganan sa katawhan. Ang Pulong sa Diyos klarong nag-ingon nga si David natigulang ug namatay, ug siya “natulog uban sa iyang mga katigulangan ug gilubong sa Siyudad ni David.” (1 Hari 2:1, 10) Nan, unsa may gipasabot sa Salmo 16:10? Pipila ka semana human sa kamatayon ug pagkabanhaw ni Jesus, si Pedro nagpakigpulong bahin sa Salmo 16:10 atubangan sa linibo ka Hudiyo ug mga kinabig. (Buh. 2:29-32) Siya miingon nga si David namatay ug gilubong. Ang mamiminaw ni Pedro nahibalo niana. Ug walay giingon ang Bibliya nga may mikuwestiyon sa gisulti ni Pedro nga si David “nakapanglantaw nang daan ug misulti mahitungod sa pagkabanhaw” sa umaabot nga Mesiyas. Gisuportahan ni Pedro ang iyang punto pinaagi sa pagkutlo sa giingon ni David sa Salmo 110:1. (Buh. 2:33-36) Ang pangatarongan ni Pedro nakatabang sa pagkombinsir sa dakong panon sa katawhan nga si Jesus mao ang “Ginoo ug Kristo.” Gidawat sa mga tawo nga ang Salmo 16:10 natuman dihang gibanhaw si Jesus. w17.12 10 ¶10-12

Uban ang pag-ampo ug pagpamalandong, naningkamot ang Nagamandong Lawas nga mahimong matinumanon ug maalamon sa paggamit sa pondo sa organisasyon. (Mat. 24:45) Ang mga donasyon nga nadawat gibadyet ug gigasto sa maalamong paagi. (Luc. 14:28) Si apostol Pablo nangolektag donasyon aron sa pagtabang sa mga igsoon sa Judea. Mihatag siyag mga instruksiyon aron kadtong magdala sa donasyon mohimog “matinud-anong pagtagana, dili lamang sa panan-aw ni Jehova, kondili usab sa panan-aw sa mga tawo.” (2 Cor. 8:18-21) Agig pagsundog kang Esdras ug Pablo, ang atong organisasyon nagsunod gayod sa mga kahikayan kon unsaon paggamit ang mga donasyon. (Esd. 8:24-33) Di pa dugay, daghang nindot ug bag-ong mga proyekto ang organisasyon. Ang organisasyon nangitag mga paagi sa pagpamenos sa galastohan ug pagpasimple sa buluhaton aron magamit pag-ayo ang imong mga donasyon. w18.01 19-20 ¶12-13

Ang gugma ug pagkamaayo makatabang nato sa pagpasaylo sa usag usa. Pananglitan, kon nasakitan ta sa gisulti o gibuhat sa usa ka igsoon, puwede natong hunahunaon ang mga panahon nga nakasulti ug nakabuhat sab tag dili maayo. Dili ba naapresyar nato ang gugma ug kaayo niadtong mga igsoon nga nagpalabay ra sa atong sayop? (Eccl. 7:21, 22) Ilabinang atong gipasalamatan ang pagkamaayo ni Kristo sa paghiusa sa tinuod nga mga magsisimba. Kita nahigugma sa mao rang Diyos, nagsangyaw sa mao rang mensahe, ug halos parehas rag giatubang nga mga problema. Pinaagi sa pagkamaayo, gugma, ug pagpasaylo sa usag usa, nakaamot ta sa panaghiusa ug naghunahuna kanunay sa ganti. Ang dili maayong mga ehemplo sa Bibliya magpahinumdom nato nga ang kasina mahimong makapugong nato sa pagdawat sa ganti. Pananglitan, si Cain nasina sa iyang igsoong si Abel, ug iya kining gipatay. Si Kore, Datan, ug Abiram nasina ug misupak kang Moises. Dugang pa, si Haring Saul nasina sa kalamposan ni David, ug misulay pagpatay kaniya. w17.11 27 ¶9-10

Kon ang mga ansiyano apil sa hudisyal nga komite, kinahanglan nilang seguroon kon mahinulsolon ba ang usa nga nakahimog seryosong sala. Dili daling mailhan kon mahinulsolon ba o dili ang usa ka tawo. Apil nga konsiderahon ang iyang panglantaw, panggawi, ug pagbati. (Pin. 3:3) Kinahanglang mahinulsolon ang makasasala aron pakitaag kaluoy. Dili sama kang Jehova ug Jesus, ang mga ansiyano dili makabasa sa kasingkasing. Kon ansiyano ka, unsaon nimo pagseguro kon tinuod bang mahinulsolon ang nakasala? Una, pag-ampo para sa kaalam ug pagsabot. (1 Hari 3:9) Ikaduha, konsultaha ang Pulong sa Diyos ug ang mga publikasyon sa matinumanong ulipon aron mailhan nimo ang kalainan sa “kasubo sa kalibotan” ug sa “kasubo sa diyosnong paagi,” o tinuod nga paghinulsol. (2 Cor. 7:10, 11) Tan-awa kon giunsa pagpaila sa Kasulatan ang tawong mahinulsolon ug kadtong dili. Giunsa pagpakita sa Bibliya ang ilang pagbati, paghunahuna, ug paggawi? w17.11 17 ¶16-17

Bisag ang maong panggawi dalawaton usahay ug ginadasig pa gani diha sa mga libro, pelikula, ug programa sa TV, kini nakadaot sa labing importanteng yunit sa katilingban​—ang pamilya. Kini nga prinsipyo dugay nang nasabtan. Makapainteres nga sa karaang Greece, kon dagmalan sa usa ang iyang ginikanan, mawad-an siya sa tanan niyang sibil nga katungod; sa balaod sa Roma, kon dapatan sa usa ang iyang amahan, sama ra siyag nakapatay. Ang Hebreohanong Kasulatan ug Kristohanon Gregong Kasulatan parehong nagsugo sa mga anak nga pasidunggan ang ilang ginikanan. (Ex. 20:12; Efe. 6:1-3) Ang mga anak dili maimpluwensiyahan sa pagkamasinupakon karon kon ilang hunahunaon ang nahimo sa ilang ginikanan para nila. Mahimo sab silang mas mapasalamaton kon ilang masabtan nga ang pagkamasinugtanon sugo sa Diyos, ang Amahan natong tanan. Pinaagi sa pagsultig maayo bahin sa ilang ginikanan, ang mga batan-on makatabang sa ubang batan-on sa pagtahod sa kaugalingon nilang ginikanan. w18.01 29 ¶8-9

Karon, ang usa ka Kristohanon nga nakahimog seryosong sala kinahanglang magpatabang sa mga ansiyano aron maulian. Nganong importante kini? Una, gikan kang Jehova ang kahikayan nga husayon sa mga ansiyano ang mga kaso sa seryosong sala. Gibase kini sa iyang Pulong. (Sant. 5:14-16) Ikaduha, kini nga kahikayan makatabang niadtong mahinulsolon nga maangkon pag-usab ang pag-uyon sa Diyos ug malikayan ang balikbalik nga pagbuhat ug sala. (Gal. 6:1; Heb. 12:11) Ikatulo, ang mga ansiyano gisugo ug gibansay nga pasaligan ang mga mahinulsolon ug hupayon ang gibating kasakit ug kahasol sa konsensiya sa nakasala. Si Jehova nagtawag sa mga ansiyano ingong “salipdanang dapit gikan sa bagyo.” (Isa. 32:2) Kini nga kahikayan nagpakita gyod sa kaluoy ni Jehova. Daghang alagad sa Diyos ang nahupayan kay sila miduol sa mga ansiyano ug midawat sa tabang niini. w17.11 9-10 ¶8-9

Bisag sakit kini, kinahanglang likayan nato ang naandang pagpakigkontak sa napalagpot nga membro sa pamilya pinaagi sa telepono, text, sulat, e-mail, o social media. Hinunoa, ayawg wad-a ang imong paglaom. Ang gugma “molaom sa tanang butang,” apil na ang paglaom nga makabalik ra kadtong mibiya kang Jehova. (1 Cor. 13:7) Kon makakita kag ebidensiya nga nagbag-o ang usa ka suod nga membro sa pamilya, puwede kang moampo nga makabaton siyag kusog gikan sa Bibliya ug dawaton niya ang awhag ni Jehova: “Balik kanako.” (Isa. 44:22) Si Jesus nag-ingon nga kon ang atong gugma sa usa ka tawo molabaw sa atong gugma kaniya, dili ta takos niya. Pero, masaligon siya nga ang iyang mga tinun-an magmaisogon ug magmaunongon kaniya bisan pa sa pagsupak sa pamilya. Kon ang pagsunod kang Jesus nagdalag “espada” diha sa imong pamilya, salig kang Jehova aron makalahutay ka sa mga pagsulay. (Isa. 41:10, 13) Malipay ka nga imong gipahimut-an si Jehova ug Jesus ug nga ilang gantihan ang imong pagkamatinumanon. w17.10 16 ¶19-21

Dihang atong makita nga nag-antos ang uban tungod sa epekto sa sala ni Adan, mapalihok ta sa pagpakitag pagkamabination. Nangandoy gyod ta sa panahon nga wala nay masakit ug matigulang. Busa, mag-ampo ta nga moabot na ang Gingharian sa Diyos. Sa pagkakaron, buhaton nato ang tanan sa pagtabang niadtong nanginahanglan. Konsideraha ang gisulat sa usa ka awtor bahin sa iyang tigulang nga inahan nga naay Alzheimer’s disease. Kas-a, nahugaw ang sinina sa tigulang. Samtang gilabhan sa tigulang ang sinina, mitingog ang doorbell. Duha ka Saksi nga tigduawan sa tigulang ang miabot. Miingon ang mga sister kon may ikatabang ba sila. Ang tigulang mitubag: “Maulaw man ko, pero sige.” Gitabangan siya sa mga sister. Dayon gitimplahan nilag tsa ang tigulang ug nag-estoryahanay. Mapasalamaton gyod ang iyang anak. “Bilib kaayo ko sa mga Saksi,” miingon ang anak. “Ilang gipadapat ang ilang gitudlo.” Gihimo ba nimo ang tanan sa pagtabang sa mga masakiton ug tigulang aron mamenosan ang ilang pag-antos?​—Filip. 2:3, 4. w17.09 9 ¶5; 12 ¶14

Kinahanglang andam tang mohimog mga buhat sa gugma para sa atong mga igsoon diha “sa tago,” o dili makita sa uban, kon posible. (Mat. 6:1-4) Kinahanglan sab tang manguna sa pagpasidungog sa uban. (Roma 12:10) Si Jesus nagpakitag ehemplo sa pagpasidungog sa uban pinaagi sa paghimo sa ubos kaayong mga trabaho. (Juan 13:3-5, 12-15) Basin kinahanglan tang maningkamot aron mahimong mapainubsanon ug makaalagad sa uban. Gani, ang mga apostoles bug-os lang nakasabot sa gipangbuhat ni Jesus dihang nadawat nila ang balaang espiritu. (Juan 13:7) Mapasidunggan nato ang uban kon dili ta mobating labaw tungod sa atong edukasyon, kabtangan, o pribilehiyo sa pag-alagad kang Jehova. (Roma 12:3) Ug imbes masina niadtong nakadawat ug pagdayeg, malipay ta uban nila bisag gibati nato nga angayan pod ta sa maong pasidungog o nakaamot ta sa ilang kalamposan. w17.10 9 ¶9-10

Nakita sa daghan nga ang paggamit sa Pulong sa Diyos diha sa ministeryo nakapainteres sa ilang gisangyawan. Pananglitan, giduaw sa brader ang usa ka edarang lalaki kinsa dugay nang tigbasahan sa atong magasin. Imbes ihatag lang ang bag-ong Bantayanang Torre, gibasa sa brader ang usa ka teksto nga makita sa maong magasin. Iyang gibasa ang 2 Corinto 1:3, 4, nga nag-ingon: “Ang Amahan sa malumong mga kaluoy ug ang Diyos sa tanang paghupay . . . nagahupay kanamo sa tanan namong kasakitan.” Kay natandog pag-ayo ang tagbalay sa maong teksto, gipabasa niya kinig otro. Ang lalaki miingon nga sila sa iyang asawa nanginahanglan gyod ug paghupay, ug karon gusto na siyang makakat-on pag dugang sa Bibliya. Gamhanan gyod ang paggamit sa Pulong sa Diyos diha sa ministeryo!​—Buh. 19:20. w17.09 26 ¶9-10

Tungod sa gihimo ni Satanas, seguradong nasuko ug naglagot ang maunongong mga linalang sa langit. Pero si Jehova nagpugong sa iyang kaugalingon. Siya milihok sa kontrolado ug hustong paagi. Wala dayon siya masuko ug balanse ang iyang paagi sa paghusay sa isyu. (Ex. 34:6; Job 2:2-6) Ngano? Gipalabay ni Jehova ang panahon kay dili niya gustong naay malaglag. Siya “nagtinguha nga ang tanan makakab-ot sa paghinulsol.” (2 Ped. 3:9) Ang pagpugong ni Jehova sa iyang kaugalingon nagtudlo nato nga kinahanglan natong hunahunaon pag-ayo ang atong isulti ug buhaton. Dili sab ta angayng magdalidali. Sa dili pa modesisyon, gahinig panahon ang paghunahuna kon unsay maayong himoon. Pag-ampo para sa kaalam aron husto ang imong masulti ug mabuhat. (Sal. 141:3) Kon naglagot ka, dali ra kang madala sa emosyon. Daghan ang nagbasol tungod sa wala hunahunaang mga pulong o buhat!​—Prov. 14:29; 15:28; 19:2. w17.09 4 ¶6-7

Nahimo bang hari ang Hataas nga Saserdoteng si Josue dihang gikoronahan siya? Wala. Si Josue dili gikan sa harianong kaliwat ni David ug busa dili kuwalipikadong mahimong hari. Ang pagkorona kaniya nagsimbolo sa umaabot ug walay kataposang hari ug saserdote. Ang hataas nga saserdote nga himoong hari gitawag ug Turok. Klarong gihisgotan sa Kasulatan nga ang Turok mao si Jesu-Kristo. (Isa. 11:1; Mat. 2:23) Ingong Hari ug Hataas nga Saserdote, si Jesus ang manguna sa langitnong kasundalohan ni Jehova. Naningkamot siya nga magpabiling luwas ang katawhan sa Diyos bisag nagkinabuhi niining daotang kalibotan. (Jer. 23:5, 6) Sa dili madugay, si Kristo ang manguna sa paglaglag sa mga nasod aron suportahan ang pagmando sa Diyos ug sa pagdepensa sa katawhan ni Jehova. (Pin. 17:12-14; 19:11, 14, 15) Pero, sa dili pa ipahamtang ang paghukom, naa pay dakong buluhaton ang Turok. w17.10 28-29 ¶12-14

Unsay imong buhaton kon magkahugaw ang imong sinina, tingali manimaho pa gani? Seguradong imo dayon kining hukason. Sa susama, kinahanglang sundon dayon nato ang sugo nga hukason ang mga panggawi nga supak sa personalidad sa Diyos. Tumanon nato ang klarong instruksiyon ni Pablo sa mga Kristohanon sa iyang panahon: “Isalikway gayod kining tanan gikan kaninyo.” Ang usa sa makasasalang panggawi nga gisulat ni Pablo mao ang pakighilawas. (Col. 3:5-9) Ang kahulogan sa orihinal nga pulong sa Bibliya nga gihubad ug “pakighilawas” naglakip sa homoseksuwalidad ug sa seksuwal nga relasyon tali sa mga tawo nga dili minyo. Si Pablo nagsugo sa mga isigka-Kristohanon nga ‘patyon’ ang ilang “mga sangkap sa lawas”​—sa ato pa, wagtangon ang tanang tinguha​—“maylabot sa pakighilawas.” Sa paggamit niana nga ilustrasyon, klarong gipakita ni Pablo nga gikinahanglan ang dakong paningkamot aron mawagtang kanang daotang tinguha. Pero posible tang makadaog! w17.08 18 ¶5-6

Ang kahimtang nato karon susama nianang sa mga adlaw ni propetang Miqueas. Nabuhi siya panahon sa pagmando ni Haring Ahaz, diin kaylap kaayo ang pagkadaotan. Gani, ang mga tawo nahimong hanas sa pagbuhat ug ‘daotan.’ (Miq. 7:1-3) Nahibalo si Miqueas nga dili niya mausab ang kahimtang. Kon may pagtuo ta nga sama nianang kang Miqueas, andam tang maghulat kang Jehova. Ang atong situwasyon dili sama nianang piniriso diha sa iyang selda nga naghulat sa iyang kamatayon. Napugos siya sa paghulat, ug wala siya maghinamhinam niana. Lahi ang atong kahimtang. Andam tang maghulat kang Jehova kay nahibalo ta nga tumanon niya ang iyang saad kanato nga kinabuhing walay kataposan sa takdang panahon, sa kinamaayohang panahon! Busa, kita ‘moantos sa bug-os ug magpakitag hataas nga pailob uban ang kalipay.’ (Col. 1:11, 12) Sa laing bahin, kon kita maghulat apan magreklamo ug magbagulbol nga si Jehova wala pa molihok, siya dili malipay.​—Col. 3:12. w17.08 4 ¶6-7

Sa unsang paagi makabenepisyo ta sa tabang ni Jehova? Kinahanglang naa tay maayong relasyon kaniya. Aron mahimo nato kana, kinahanglan tang magpaubos. (Sof. 2:3) Ang mapainubsanong mga tawo maghulat sa Diyos nga motul-id sa mga sayop ug maghupay sa ilang kaguol. Maangkon nianang mga tawhana ang pag-uyon ni Jehova. Sa laing bahin, ang Diyos “nagapaubos sa mga daotan ngadto sa yuta.” (Sal. 147:6b) Prangka kini nga mga pulong! Aron makabenepisyo ta sa maunongong gugma ni Jehova ug makalikay sa iyang kasuko, kinahanglan natong dumtan ang iyang gidumtan. (Sal. 97:10) Pananglitan, angay natong dumtan ang seksuwal nga imoralidad. Nagkahulogan kini nga likayan nato ang bisan unsa nga makatental nato nianang daotang buhat, apil ang pornograpiya. (Sal. 119:37; Mat. 5:28) Dili tingali kini sayon, pero dili masayang ang atong paningkamot kay si Jehova magpanalangin kanato. Sa atong pagpakigbisog, kinahanglang mosalig ta kang Jehova, dili sa atong kaugalingon. Kinahanglang modangop ta kang Jehova ug mangayog tabang kaniya. w17.07 19-20 ¶11-13

Mahimong gamiton nato ang materyal nga mga butang sa pagsuportar sa buluhaton sa Gingharian. Kadtong dato pero dili makaalagad nga bug-os panahon o dili makabalhin sa laing nasod malipay sa pagkahibalo nga ang ilang mga donasyon nagsuportar sa ministeryo sa uban. Ang mga donasyon makatabang sa pagtaganag mga literatura ug sa pagsuportar sa buluhatong pagsangyaw sa mga teritoryo nga daghag pobre pero dako ang pag-uswag sa espirituwal. Sulod sa daghang katuigan, sa mga nasod sama sa Congo, Madagascar, ug Rwanda, ang mga igsoon sagad mopili kon unsay paliton​—pagkaon para sa pamilya o Bibliya. Usahay ang presyo sa Bibliya motumbas sa usa ka semana o usa ka bulang suweldo. Karon, tungod sa mga donasyon ug sa “pag-angay-angay” sa pondo, ang organisasyon ni Jehova naghubad ug nagtaganag Bibliya sa matag membro sa pamilya, apil sa gigutom sa espirituwal nga mga Bible study.​—2 Cor. 8:13-15. w17.07 9 ¶11

Nganong makapahupay ang pagpamalandong sa pagkabililhon sa atong pagkamatinumanon? Tungod kay ang mga pagsulay wala magpasabot nga nasuko si Jehova kanato. Naghatag na natog kahigayonan sa pagpakita sa atong pagpaluyo sa pagkasoberano sa Diyos. Ang atong paglahutay moresulta sa “inuyonang kahimtang” ug magpalig-on sa atong paglaom. (Roma 5:3-5) Ang kasinatian ni Job nagpakita nga “si Jehova malumo kaayo sa pagmahal ug maluluy-on.” (Sant. 5:11) Busa makaseguro ta nga siya magganti kanato ug sa tanang magpaluyo sa iyang pagkasoberano. Ang pagkahibalo niini makatabang nato nga “makaantos sa bug-os ug magpakitag hataas-nga-pailob uban ang kalipay.” (Col. 1:11) Tinuod, lisod tingali ang pagpokus sa atong mata diha sa pagbindikar sa pagkasoberano ni Jehova. Busa, maayong pahinumdoman nato kanunay ang atong kaugalingon sa kaimportante sa pagpaluyo sa pagkasoberano sa Diyos dihang nag-atubang tag malisod nga mga kahimtang. w17.06 25-26 ¶15-16

Daghan karon ang naningkamot nga mosunod sa uso, makabatog kinabag-ohang gadyet, ug uban pa. Busa, angayng susihon kanunay sa matag Kristohanon ang iyang tinguha pinaagi sa pagpangutana sa kaugalingon: ‘Nahimo bang importante kaayo nako ang materyal nga mga butang maong mogahin kog mas daghang panahon sa pagsusi ug paghunahuna bahin sa kinabag-ohang modelo sa sakyanan o mga uso kay sa pagpangandam sa tigom? Nahimo ba kong puliki sa adlaw-adlawng kalihokan maong diyutay na lang kog panahon sa pag-ampo o pagbasa sa Bibliya?’ Kon atong maamgohan nga ang atong gugma sa materyal nga mga butang misapaw na sa atong gugma kang Kristo, angay natong palandongon ang giingon ni Jesus nga makita sa teksto karong adlawa. Si Jesus miingon nga “walay usa nga mahimong ulipon sa duha ka agalon.” Siya midugang: “Dili kamo mahimong ulipon sa Diyos ug sa Bahandi.” Tungod kana kay ang maong ‘mga agalon’ mangayog bug-os nga debosyon. (Mat. 6:24) Kay dili man ta hingpit, kinahanglan natong suklan ang “mga tinguha sa atong unod,” lakip na ang materyalismo.​—Efe. 2:3. w17.05 25-26 ¶15-16

Bisag sama tag huyang nga yutang kulonon, ang mensahe nga atong gisangyaw maghatag ug kinabuhing walay kataposan​—kanato ug niadtong maminaw kanato. Ang gugma ni apostol Pablo sa ministeryo nagpalihok niya nga magmakugihon sa paghimog mga tinun-an. (Roma 1:14, 15; 2 Tim. 4:2) Kana nakatabang niya sa paglahutay sa grabeng paglutos. (1 Tes. 2:2) Unsaon nato pagpakita ang ingon niana nga gugma? Ang usa ka paagi nga gipakita ni Pablo ang apresasyon sa ministeryo mao ang pagkahimong alerto sa mga kahigayonan nga makasangyaw sa uban. Sama sa mga apostoles ug sa unang mga Kristohanon, kita nagsangyaw sa impormal, sa publiko, ug sa balay ug balay. (Buh. 5:42; 20:20) Kon itugot sa atong kahimtang, mangita tag paagi sa pagpauswag sa atong ministeryo, lagmit pinaagi sa pag-aplay ingong oksilyare o regular payunir. Puwede pod tang mokat-on ug laing pinulongan, mobalhin sa ubang dapit sa atong nasod, o mobalhin sa laing nasod.​—Buh. 16:9, 10. w17.06 10-11 ¶8-9

Sagad, ang hinungdan sa grabeng pagkadaotan karon dili ang mga indibiduwal kondili ang mga organisasyon. Hunahunaa ang relihiyosong mga organisasyon nga naglimbong sa minilyong tawo bahin sa kinaiyahan sa Diyos, sa pagkakasaligan sa Bibliya, sa kaugmaon sa yuta ug tawo​—ug daghan pang topiko. O unsay imong hunahuna sa mga gobyerno nga nagsuportar sa gubat ug panag-away sa rasa, nagdaogdaog sa mga pobre ug sa dili makadepensa sa kaugalingon, ug nagpadato pinaagig panghiphip ug paboritismo? Unsay imong ikaingon sa hakog nga mga korporasyon nga naghugaw sa palibot, sobrang nagdaot sa kahinguhaan sa yuta (natural resources), ug nagpahimulos sa pagkadaling motuo sa mga mamalitay aron madato ang pipila samtang ang minilyon nag-antos sa kapobre? Ang Pulong sa Diyos nagtagna nga pagalumpagon ang mga gobyerno, ang tanang organisasyon nga nagdepende niini, ug ang tanang organisasyon nga wala modapig sa Gingharian sa Diyos.​—Jer. 25:31-33. w17.04 11 ¶7-8

Si Jehova, “ang tig-usisa sa mga kasingkasing,” nagpakitag kaluoy kang Ahab. (Prov. 17:3) Sa unsang paagi ang maong desisyon nakaapektar niadtong nahibalo sa krimen ni Ahab? Kining daw kausaban sa paghukom lagmit nagsulay sa pagtuo sa pamilya ug mga higala ni Nabot. Kon mao, ang pagpaubos makahatag nilag proteksiyon. Kana makatabang nila nga magmatinumanon sa ilang pagsimba kang Jehova, nga masaligong ang ilang Diyos dili makahimog inhustisya. (Deut. 32:3, 4) Si Nabot, iyang mga anak, ug ang ilang mga pamilya makaeksperyensiyag hingpit nga hustisya dihang banhawon na ni Jehova ang mga matarong. (Job 14:14, 15; Juan 5:28, 29) Dugang pa, ang tawong mapainubsanon nahinumdom nga “pagadad-on sa matuod nga Diyos ang tanang matang sa buhat ngadto sa paghukom maylabot sa tagsatagsa ka tinagong butang, maayo man kini o daotan.” (Eccl. 12:14) Oo, dihang mohukom si Jehova, iyang konsiderahon ang mga detalye nga wala nato mahibaloi. Busa, ang pagpaubos makatabang sa mga inosente nga makalikay sa espirituwal nga kadaot. w17.04 24-25 ¶8-9

Tungod sa kahimtang sa kalibotan, daghan sa atong mga igsoon ang nahimong bakwet. Lisod tingali ang maong kausaban. Hunahunaa lang, dunganon nimo pagtuon ang bag-ong pinulongan, bag-ong kostumbre, ug bag-ong mga balaod maylabot sa buhis ug mga bayranan, pag-eskuyla, ug pagdisiplina sa bata! Ikaw ba mapailobon ug matinahorong motabang sa mga igsoon nga nag-atubang sa maong hagit? (Filip. 2:3, 4) Dugang pa, may mga higayon nga lisodlisoron sa mga awtoridad ang mga igsoon sa pagkontak sa kongregasyon. Ang pipila ka ahensiya nanghulga nga hunongon ang tabang o dili papuy-on ang mga igsoon sa maong nasod kon dili sila modawat ug trabaho nga makapugong nila sa pagtambong sa mga tigom. Kay nahadlok ug walay mahimo, ang pipila ka igsoon nadala sa maong mga hulga. Busa, maayong pakigkitaan dayon ang atong mga igsoong bakwet inig-abot nila. Kinahanglang makita nila nga gimahal nato sila. Ang atong pagkamabination ug praktikal nga tabang makapalig-on sa ilang pagtuo.​—Prov. 12:25. w17.05 5 ¶9-10

Ang usa ka bahin sa ilhanan nga gihatag ni Jesus maylabot sa “kataposan sa sistema sa mga butang” mao ang ‘pagbugnaw sa gugma sa kadaghanan.’ (Mat. 24:3) Ang mga Hudiyo sa unang siglo nangangkon nga katawhan sa Diyos apan gitugotan nila nga mobugnaw ang ilang gugma sa Diyos. Sa laing bahin, kadaghanan sa mga Kristohanon niadtong panahona puliki “sa pagpahayag sa maayong balita bahin kang Kristo” ug sa pagpakitag gugma sa Diyos, sa isigka-Kristohanon, ug sa mga dili magtutuo. (Buh. 2:44-47; 5:42) Apan gitugotan sa pipila ka sumusunod ni Jesus sa unang siglo nga mobugnaw ang ilang gugma. Giingnan sa nabanhawng si Jesus ang unang siglong mga Kristohanon sa Efeso: “Ako adunay ikasulti batok kanimo, nga imong gibiyaan ang gugma nga imong nabatonan sa sinugdan.” (Pin. 2:4) Unsa kahay rason niini? Lagmit, ang maong mga sumusunod ni Kristo naimpluwensiyahan sa kalibotanong panghunahuna.​—Efe. 2:2, 3. w17.05 17 ¶1-3

Si Jepte usa ka banggiitang lider ug maisogong manggugubat. Si Ana usa ka mapinasakopon ug mapainubsanong asawa. Gawas nga nagsimba sila sa mao rang Diyos, sa unsa managsama si Maghuhukom Jepte ug ang asawa ni Elkana nga si Ana? Matag usa kanila may panaad sa Diyos, ug matinumanon nilang gibayran ang ilang panaad. Maayo silang ehemplo para sa mga lalaki ug babaye karon nga mihimog mga panaad kang Jehova. Ingon sa pagkagamit diha sa Bibliya, ang panaad maoy seryosong saad ngadto sa Diyos. Ang usa ka tawo nanaad sa paghimog usa ka buhat, paghatag ug regalo, pagsulod sa usa ka matang sa pag-alagad, o sa paglikay sa pipila ka butang. Ang mga panaad gihimo nga kinabubut-on, gamit ang kagawasan sa pagpili. Bisan pa niana, sa mata sa Diyos kini sagrado ug kinahanglang tumanon kay kini naglakip ug panumpa​—usa ka gipanumpaang pahayag​—nga nagsaad nga ang usa ka tawo mobuhat o dili mobuhat sa usa ka butang.​—Gen. 14:22, 23; Heb. 6:16, 17. w17.04 3 ¶1-2