Pebrero

Si Noe wala pa makatukod sukad ug arka. Busa kinahanglan siyang mosalig kang Jehova, nga buhaton ang “ingon gayod,” o sumala sa gisugo ni Jehova. Unsay resulta? Milampos si Noe sa paghimo sa arka ug naluwas siya ug ang iyang pamilya! Milampos usab si Noe ingong amahan, tungod sa samang rason​—misalig siya sa kaalam sa Diyos. Busa gitudloan niya pag-ayo ang iyang mga anak ug nagpakita siyag maayong ehemplo kanila, nga lisod buhaton nianang daotang kalibotan una ang Lunop. (Gen. 6:5) Mga ginikanan, unsaon ninyo paghimo ang “ingon gayod” sa panan-aw sa Diyos? Pamati kang Jehova. Sa pagmatuto sa inyong mga anak, patudlo niya pinaagi sa iyang Pulong ug sa giya gikan sa iyang organisasyon. Hinunoa, bisan pa sa paningkamot sa mga ginikanan, may pipila ka anak nga mobiya kang Jehova. Pero kon ang mga ginikanan maningkamot sa pagtisok sa kamatuoran diha sa kasingkasing sa ilang anak, sila makabatog hinlong konsensiya. Makalaom sab sila nga moabot ra ang adlaw nga ang ilang anak mobalik kang Jehova. w18.03 30 ¶10-11

Mibati ba ka sukad nga gusto nimong moabiabi pero morag dili nimo mahimo? Ang pipila maulawon, ug sila mabalaka nga basig mahutdan silag estorya o laayon ang mga bisita. Ang uban apeke sa kuwarta ug naghunahuna nga dili mahatag ang kayang ihatag sa uban diha sa kongregasyon. Dili kinahanglang nindot kaayo ang balay aron makaabiabi. Ang importante mao nga kini hapsay, hinlo, ug presentable. Kon mag-abiabi ka tungod sa gugma, dili ka angayng mabalaka. Hinumdomi nga makaayo gyod ang pagpakitag personal nga interes sa mga bisita. (Filip. 2:4) Halos kitang tanan gustong mosulti sa atong eksperyensiya. Panahon lang tingali sa tapoktapok nga makapangutana ang uban sa atong eksperyensiya. Usa ka ansiyano ang misulat: “Ang pagpangimbitar sa mga igsoon sa kongregasyon sa among balay nakatabang nako nga mas masabtan ug mailhan sila, ilabina kon sa unsang paagi sila na-Saksi.” Kon may personal nga interes ta sa atong mga bisita, mahimong malipayon nang okasyona. w18.03 17 ¶15-17

Gustong tabangan sa mga ginikanan ang ilang mga anak sa paghimog maalamong desisyon. Ang tinuyong paglangaylangay sa pagpabawtismo may espirituwal nga kapeligrohan. (Sant. 4:17) Pero, gusto pong segurohon sa maalamong mga ginikanan nga ayha mabawtismohan ang ilang mga anak, andam na sila sa mga responsibilidad sa pagka-Kristohanon. Nabalaka ang pipila ka tigdumala sa sirkito kay may mga anak ug Saksi nga mag-20 anyos na o kapin pa, pero dili pa bawtismado. Sagad, motambong silag tigom ug mosangyaw. Para nila, mga Saksi ni Jehova sila. Pero, nagduhaduha sila sa pagdedikar sa ilang kinabuhi kang Jehova ug pagpabawtismo. Ngano? Sa pipila ka kahimtang, ingnan sila sa ilang ginikanan nga dili usa magpabawtismo. w18.03 8 ¶1-2

Aron mahisama kang Kristo, kinahanglang mahibaloan nato ang iyang panghunahuna ug personalidad. Dayon sundon nato ang iyang mga tunob. Si Jesus nagpokus sa iyang relasyon sa Diyos. Busa, kon mahisama ta kang Jesus mahisama sab ta kang Jehova. Maong importante nga makakat-on ta sa paghunahuna nga sama kang Jesus. Unsaon nato kana paghimo? Ang mga tinun-an ni Jesus nakakita sa iyang mga milagro, nakadungog sa iyang pagpanudlo, nakasaksi sa iyang pagpakiglabot sa tanang matang sa tawo, ug nakakita kon giunsa niya pagpadapat ang diyosnong mga prinsipyo. (Buh. 10:39) Karon, dili ta makakita kang Jesus. Pero si Jehova mahigugmaong nagtagana sa mga asoy sa Ebanghelyo nga makatabang nato nga mailhan pag-ayo si Jesus. Pinaagi sa pagbasa ug pagpamalandong sa Mateo, Marcos, Lucas, ug Juan, daghan tag mahibaloan bahin sa panghunahuna ni Kristo. Sa ingon, ‘masunod nato pag-ayo ang iyang mga tunob’ ug ‘masangkapan nato ang atong kaugalingon sa samang kiling sa kaisipan’ ni Kristo.​—1 Ped. 2:21; 4:1. w18.02 22 ¶15-16

Sukad sa sinugdan sa kasaysayan sa tawo, ang may pagtuong mga tawo nakaila sa Diyos sa tulo ka pangunang paagi: pag-obserbar sa kalalangan, gikan sa ubang mahinadlokon sa Diyos nga mga tawo, ug pagtagamtam sa mga panalangin sa pagsunod sa matarong nga mga sukdanan ug prinsipyo sa Diyos. (Isa. 48:18) Pinaagi sa pag-obserbar sa kalalangan, makita ni Noe ang daghang ebidensiya sa paglungtad sa Diyos ug sa iyang dili makitang mga hiyas, sama sa “iyang walay kataposang gahom ug pagka-Diyos.” (Roma 1:20) Busa, si Noe wala lang basta motuo sa Diyos; iyang naugmad ang lig-ong pagtuo Kaniya. Seguradong nakakat-on si Noe gikan sa iyang mga paryente. Apil nila ang iyang papa nga si Lamek, usa ka tawong may pagtuo ug nabuhi una mamatay si Adan. Apil sab nila ang iyang lolo nga si Matusalem ug ang iyang lolo sa lapalapa (lolo sa iyang lolo) nga si Jared, kinsa namatay 366 ka tuig human matawo si Noe. (Luc. 3:36, 37) Bisan unsa pa man, ang nahibaloan ni Noe nakatandog sa iyang kasingkasing ug nagpalihok niya sa pag-alagad sa Diyos.​—Gen. 6:9. w18.02 9 ¶4-5

Kon ang usa ka igsoon sa pagtuo o membro sa pamilya mosulti o mobuhat ug usa ka butang nga makapasakit nato, tingali maglagot kaayo ta. Komosta kon dili nato kana makalimtan? Maghambin ba tag kasuko sulod sa taas nga panahon? O sundon ba nato ang maalamong tambag sa Bibliya nga husayon dayon ang problema? Kon dugay tang makighusay, mas lisod nga makig-uli sa atong igsoon. Unsay imong himoon aron magkauli mo? Una, kinasingkasing nga mag-ampo kang Jehova. Hangyoa siya nga tabangan kang magkaestorya mo pag-ayo sa imong igsoon. Hinumdomi, higala pod siya ni Jehova. (Sal. 25:14) Maayong motratar si Jehova sa iyang mga higala, ug gidahom niya nga ingon ana sab ta. (Prov. 15:23; Mat. 7:12; Col. 4:6) Dayon, hunahunaa pag-ayo kon unsay imong isulti. Ayaw paghinapos nga gituyo sa igsoon nga pasakitan ka. Ug hunahunaa nga basin naa pod kay nahimo nga dili maayo. w18.01 10 ¶15-16

Lahi sa mga tawo karon nga kulag gugma, kadtong nagsimba kang Jehova dunay tinuod nga gugma sa ilang isigkatawo. Tinuod gyod kini. Si Jesus miingon nga ang gugma sa silingan mao ang ikaduha sa labing importanteng sugo diha sa Moisesnong Balaod, nga ikaduha sa gugma sa Diyos. (Mat. 22:38, 39) Miingon usab si Jesus nga ang gugma sa usag usa maoy hiyas nga magpaila sa tinuod nga mga Kristohanon. (Juan 13:35) Ang maong Kristohanong gugma mapakita gani ngadto sa mga kaaway. (Mat. 5:43, 44) Si Jesus nagpakitag dakong gugma sa uban. Mibiyahe siya gikan sa usa ka siyudad ngadto sa lain, nga nagsangyaw sa maayong balita sa Gingharian sa Diyos. Iyang giayo ang mga buta, bakol, sanlahon, ug bungol. Gibanhaw niya ang mga patay. (Luc. 7:22) Gihatag pa gani ni Jesus ang iyang kinabuhi alang sa katawhan. Hingpit nga gisundog ni Jesus ang gugma sa iyang Amahan. Sa tibuok yuta, ang mga Saksi ni Jehova nagpakitag diyosnong gugma sa uban. w18.01 29-30 ¶11-12

Tingali bisag bata pa, mikuwalipikar ka sa bawtismo. Pero dili nimo kanunayng matag-an kon unsang mga kalisdanan ang imo unyang masinatian. Aron matabangan ka nga magmatinumanon sa tanang situwasyon, hinumdomi nga dili kondisyonal ang imong panaad kang Jehova. Nagpasabot kana nga giingnan nimo ang Soberano sa uniberso nga mopadayon ka sa pag-alagad niya bisan pag ang imong mga higala o ginikanan moundang sa pagbuhat niana. (Sal. 27:10) Sa tanang situwasyon, pangayog tabang kang Jehova aron matuman nimo ang imong pahinungod. (Filip. 4:11, 12) Gusto ni Jehova nga mahimo kang iyang higala. Pero aron magpabiling iyang higala ug makapanlimbasog sa imong kaluwasan, kinahanglan kang maningkamot. Gani, ang Filipos 2:12 nag-ingon: “Magpadayon kamo sa pagpanlimbasog sa inyong kaugalingong kaluwasan uban ang kahadlok ug pagpangurog.” Busa konsideraha kon sa unsang paagi magpabilin kang suod kang Jehova ug magmatinumanon kaniya bisan pa sa mga pagsulay. Dili ka angayng sobrang mokompiyansa. Bisan ang pipila nga dugay nang nag-alagad sa Diyos wala makapabiling matinumanon. w17.12 24 ¶4, 6-7

Gipasidunggan ta ni Jehova pinaagi sa paghatag natog kahigayonan nga makasuportar sa dakong buluhaton karon. Mipasalig siya nga panalanginan ta niya kon mohatag ta para sa Gingharian. (Mal. 3:10) Si Jehova misaad nga mouswag ang usa nga mahinatagon. (Prov. 11:24, 25) Ang paghatag makapalipay sab nato, kay “adunay labaw nga kalipay sa paghatag kay sa pagdawat.” (Buh. 20:35) Pinaagig pulong ug buhat, mabansay nato ang atong mga anak ug ang mga bag-ohan kon sa unsang paagi sila makahatag, ug sa ingon, makatagamtam ug daghang panalangin. Ang tanan natong nabatonan naggikan kang Jehova. Ang atong paghatag kaniya nagpakita nga gimahal nato siya ug mapasalamaton ta sa tanan niyang gihimo para kanato. Dihang miamot para sa pagtukod sa templo, “ang katawhan nagmaya tungod sa ilang gihimong kinabubut-ong mga halad.” (1 Cron. 29:9) Hinaot padayon sab tang magmalipayon sa paghatag kang Jehova pinaagi sa gihatag niya kanato. w18.01 21 ¶18-19

Ang unang pagkabanhaw mahitabo pipila ka panahon human magsugod ang “presensiya” ni Kristo. Ang mga dinihogan nga buhi pa panahon sa dakong kasakitan “pagasakgawon sa mga panganod.” (1 Tes. 4:13-17; Mat. 24:31) Sila “mangausab, sa daklit, sa pagpamilok sa mata, sa panahon sa kataposan nga trompeta.” (1 Cor. 15:51, 52) Karon, kadaghanan sa matinumanong mga Kristohanon dili dinihogan ug wala pilia nga moalagad sa langit uban kang Kristo. Hinunoa, nagpaabot sila nga taposon kining daotang sistema sa mga butang sa “adlaw ni Jehova.” Walay nahibalo kon kanus-a eksaktong mahitabo ang kataposan, pero gipakita sa ebidensiya nga hapit na kini. (1 Tes. 5:1-3) Human niana, mahitabo ang laing matang sa pagkabanhaw​—ang pagkabanhaw diha sa paraisong yuta. Kadtong banhawon may paglaom nga mahimong hingpit ug dili na gyod mamatay pag-usab. w17.12 11 ¶15; 12 ¶18-19

Kon ugmaron nato ang kaayo ug gugma diha sa atong kasingkasing, dili ta daling masina. Ang Pulong sa Diyos nag-ingon: “Ang gugma hataas-ug-pailob ug maluloton. Ang gugma dili abughoan.” (1 Cor. 13:4) Aron dili moturok ang kasina sa atong kasingkasing, kinahanglang maningkamot ta nga sundogon ang panglantaw sa Diyos, nga isipon ang atong mga igsoon ingong bahin sa usa ka lawas​—ang kongregasyon. Makatabang ni nato nga magmabination sa uban, sumala sa tambag sa Diyos: “Kon ang usa ka sangkap ginahimaya, ang tanang ubang mga sangkap magamaya uban niini.” (1 Cor. 12:16-18, 26) Busa, imbes masina, malipay ta kon ang uban makadawat ug panalangin. Tagda ang ehemplo sa anak ni Haring Saul nga si Jonatan. Wala siya masina dihang gitudlo si David ingong sunod nga hari. Iya hinuong gidasig si David. (1 Sam. 23:16-18) Puwede ba tang magpakitag kaayo ug gugma sama kang Jonatan? w17.11 27 ¶10-11

Gipreserbar ni Jehova para nato ang Moisesnong Balaod diha sa iyang Pulong, ang Bibliya. Gusto niya nga dili ta sobrang magpokus sa matag detalye sa Balaod, kondili sabton ug ipadapat ang “mas bug-at nga mga butang,” ang mga prinsipyo luyo sa mga sugo niana. (Mat. 23:23) Makita sa Moisesnong Balaod ang “gambalay sa kahibalo ug sa kamatuoran” bahin kang Jehova ug sa iyang matarong nga mga prinsipyo. (Roma 2:20) Pananglitan, ang mga siyudad nga dalangpanan nagtudlo sa mga ansiyano kon unsaon “paghukom uban sa matuod nga hustisya,” ug nagtudlo natong tanan nga “ipakita sa usag usa ang mahigugmaong-kalulot ug mga kaluoy.” (Zac. 7:9) Wala na ta mailalom sa Balaod. Bisan pa niana, si Jehova wala mausab, ug ang hustisya ug kaluoy importante gihapon kaniya. Pribilehiyo nato ang pagsimba sa Diyos kinsa naglalang nato sumala sa iyang larawan. Atong sundogon ang iyang mga hiyas ug modangop ta kaniya! w17.11 13-14 ¶2-3; 17 ¶18-19

Kinahanglang segurohon sa mga brader nga ang Kasulatan mao ang pundasyon sa ilang pakigpulong. (Juan 7:16) Unsaon kana paghimo? Pag-amping nga walay bisan unsa​—mga eksperyensiya, ilustrasyon, o ang paagi sa paghatag sa bahin—​ang makasapaw sa mga teksto nga imong gigamit. Dugang pa, ang pagbasag daghang teksto wala magpasabot ug epektibong pagpanudlo gikan sa Bibliya. Gani, kon mobasa kag daghan kaayong teksto, lagmit walay mahinumdoman ang imong mamiminaw. Busa pilia pag-ayo ang mga teksto nga imong basahon, dayon ipatin-aw, iilustrar, ug iaplikar kini. (Neh. 8:8) Sabta kon unsay koneksiyon sa matag punto sa outline ug sa mga teksto nga gisitar. Labaw sa tanan, pag-ampo sa tabang ni Jehova aron epektibo nimong matudlo ang iyang panghunahuna nga naa sa Bibliya.​—Esd. 7:10. w17.09 26 ¶11-12

Ang tuig 537 B.C.E. maoy makapalipayng panahon para sa napahinungod nga katawhan ni Jehova. Human sa 70 ka tuig nga pagkabihag sa Babilonya, sila gipagawas. Naghinamhinam sila sa pagbalik sa Jerusalem aron ipasig-uli ang tinuod nga pagsimba. Pagka-536 B.C.E., nahuman na ang pundasyon sa templo. Milabay ang 16 ka tuig, apan wala gihapon mahuman ang templo. Kinahanglang pahinumdoman ang katawhan nga angay silang mobalik kang Jehova ug mohunong sa pag-una sa kaugalingong kaayohan. Aron pahinumdoman ang iyang katawhan kon nganong gipagawas sila sa Babilonya, gipadala sa Diyos ang iyang manalagnang si Zacarias niadtong 520 B.C.E. Ang ngalang Zacarias, nga nagkahulogang “Nahinumdom si Jehova,” lagmit nagpahinumdom nila sa usa ka importanteng butang. Bisag nalimtan nila ang pagluwas ni Jehova kanila, Siya nahinumdom gihapon sa iyang katawhan. (Zac. 1:3, 4) Mahigugmaon niyang gipasaligan sila nga tabangan niya sila sa pagpasig-uli sa putling pagsimba. Pero gipasidan-an usab sila nga dili niya tugotan ang dili kinasingkasing nga pagsimba. w17.10 21-22 ¶2-3

Ang mga eksperto miingon nga ang pagkamabination makaayo sa imong panglawas, pagkatawo, ug relasyon sa uban. Kon makatabang ka sa uban, mahimo kang mas malipayon, positibo, dili kaayo maguol, ug mas gamayg purohan nga maghunahunag negatibo. Oo, ang pagkamabination makaayo nimo. Ang matinabangong mga Kristohanon nakatagamtam ug hinlong konsensiya, kay nasayod nga ilang gisunod ang mga prinsipyo sa Diyos. Ang pagkamabination makatabang aron mahimong mas maayong ginikanan, kapikas, ug higala. Mas dakog purohan sab nga tabangan sa uban kadtong kanunayng mabination. (Mat. 5:7; Luc. 6:38) Ang mga benepisyo sa pagkamabination dili angayng mahimong pangunang rason sa imong pagkat-on niini. Ang pangunang rason mao nga gusto nimong sundogon ug himayaon ang Tuboran sa gugma ug pagkamabination, si Jehova nga Diyos.​—Prov. 14:31. w17.09 12 ¶16-17

Gawas sa pagkahimong Hari ug Hataas nga Saserdote, si Jesus gisugo sa ‘pagtukod sa templo ni Jehova.’ Sa modernong panahon, apil sa iyang buluhatong pagpanukod mao ang pagpahigawas sa tinuod nga mga magsisimba gikan sa Dakong Babilonya ug ang pagpasig-uli sa Kristohanong kongregasyon niadtong 1919. Nagtudlo sab siyag “matinumanon ug maalamong ulipon” nga maoy manguna sa buluhaton diha sa yutan-ong sawang sa dakong espirituwal nga templo. (Mat. 24:45) Ginahinloan pod ni Jesus ang katawhan sa Diyos ug gitabangan sila sa pagsimba sa hinlong paagi. (Mal. 3:1-3) Panahon sa Usa ka Libo ka Tuig nga Pagmando, si Jesus ug ang iyang 144,000 nga kaubang mga hari ug saserdote magtabang sa matinumanong mga tawo nga mahimong hingpit. Inigkahuman niini, ang tinuod lang nga mga magsisimba sa Diyos ang mahibilin sa nahinloang yuta. Sa kataposan, bug-os nang mapasig-uli ang tinuod nga pagsimba! w17.10 29 ¶15-16

Aron kaluy-an, kadtong wala tuyoang nakapatay kinahanglang molihok dayon. Kinahanglan siyang mokalagiw ngadto sa kinadul-ang siyudad nga dalangpanan. (Jos. 20:4) Kinahanglang dili niya kini pakamenoson; ang iyang kinabuhi nagdepende sa pag-adto dayon sa maong siyudad ug sa pagpabilin diha niana! Kinahanglan siyang mosakripisyo. Biyaan niya ang iyang trabaho ug hayahay nga balay, ug dili siya puwedeng mobiyahe bisag asa​—hangtod mamatay ang hataas nga saserdote. Pero dili makawang ang maong sakripisyo. Aron makabenepisyo sa kaluoy sa Diyos, ang mahinulsolong makasasala karon kinahanglan pong molihok dayon. Kinahanglang bug-os natong biyaan ang makasasalang buhat—​seryoso man o ginagmayng sala nga sagad moresulta sa grabeng sala. Kon maningkamot tang biyaan ang makasasalang buhat, atong gipakita nga dili nato gustong abusohan ang kaluoy ni Jehova.​—2 Cor. 7:10, 11. w17.11 10-11 ¶10-11

Si Jehova nagsugo nato nga magmahinatagon sa atong mga igsoon. (1 Juan 3:17) Pero, kinahanglang himoon nato ni uban ang hustong motibo, nga dili maghunahuna sa kaugalingong bentaha. Kinahanglan natong pangutan-on ang kaugalingon: ‘Giabiabi lang ba nako tong akong mga suod, ilado, o kadtong makaabiabi pod nako? O nangita ba kog paagi sa pag-abiabi sa mga igsoon nga wala kaayo ko kaila o kadtong dili makaabiabi nako?’ (Luc. 14:12-14) O unsa kaha kon magkalisodlisod ang igsoon tungod sa iyang sayop nga mga desisyon, o wala siya makapasalamat sa atong pagkamaabiabihon? Niana nga mga situwasyon, kinahanglan natong sundon ang tambag diha sa atong teksto karong adlawa. Kon sundon na nimo, magmalipayon ka tungod sa paghatag uban ang hustong motibo.​—Buh. 20:35. w17.10 9 ¶12

Ang asawa ni Potipar naibog kang Jose, kay kini “ambongan sa pamarog ug sa panagway,” ug gitental niya si Jose. Pero wala magpadaog si Jose sa iyang balikbalik nga pagpanental. Ug dihang migrabe ang situwasyon, miikyas na si Jose. Unsay atong makat-onan kang Jose? Kinahanglan tingali tang molikay sa mga tentasyon aron dili nato malapas ang balaod sa Diyos. (Prov. 1:10) Sa wala pa ma-Saksi, ang pipila nagpalabig kaon, naghuboghubog, nanigarilyo, nagdroga, nagahimog seksuwal nga imoralidad, ug uban pa. Bisan human sa bawtismo, usahay matental sila nga mobalik sa ilang kanhing bisyo. Busa, kon matental ka nga supakon ang balaod ni Jehova, lig-ona ang imong kaugalingon pinaagi sa pagpamalandong sa espirituwal nga mga kadaot kon magpadaog ta sa atong makasasalang tendensiya. Puwede nimong hunahunaon daan ang mga situwasyon nga posibleng mahitabo ang pagpanental ug paghunahuna daan kon unsaon kana paglikay. (Sal. 26:4, 5; Prov. 22:3) Kon makaatubang kag tentasyon, pag-ampo kang Jehova nga hatagan kag kaalam ug pagpugong sa kaugalingon aron dili ka madaog. w17.09 4-5 ¶8-9

Mahimo tang higala ni Jehova kon menosan nato ang atong pagpakigbahin sa sistema sa negosyo sa kalibotan ug pangitaon ang “matuod” nga bahandi. Si Abraham, usa ka tawong may pagtuo, matinumanong mibiya sa datong siyudad sa Ur ug mipuyo sa mga tolda ug nakighigala kang Jehova. (Heb. 11:8-10) Siya misalig kanunay sa Diyos ingong Tinubdan sa tinuod nga bahandi ug wala gyod mangagpas sa materyal nga bentaha nga magpakitag kawalay pagsalig. (Gen. 14:22, 23) Gipasiugda ni Jesus kini nga pagtuo dihang giingnan niya ang datong batan-on: “Kon buot ka nga mahingpit, lakaw ug ibaligya ang imong mga kabtangan ug ipanghatag sa mga kabos ug makabaton ka ug bahandi sa langit, ug umari ka mahimong akong sumusunod.” (Mat. 19:21) Ang maong batan-on kulag pagtuo, dili sama kang Abraham ug sa uban nga bug-os misalig sa Diyos. w17.07 10 ¶12

Human sa pagtabok ni Abraham sa Euprates, milabay pa ang 430 ka tuig ayha nahimong nasod ang iyang kaliwat nga manag-iya nianang yutaa. (Ex. 12:40-42; Gal. 3:17) Si Abraham andam nga mohulat, kay ang iyang pagpailob gibase sa iyang pagtuo kang Jehova. (Heb. 11:8-12) Malipayon siyang naghulat bisan pag wala niya makita ang tanang katumanan sa saad. Pero hunahunaa kon unsa ka malipayon si Abraham dihang banhawon na siya sa paraisong yuta. Masorpresa gyod siyang mahibalo nga narekord sa daghang bahin sa Bibliya ang iyang kaagi ug nianang sa iyang mga kaliwat. Hunahunaa ang iyang kalipay dihang, sa unang higayon, masabtan niya ang iyang hinungdanong papel sa katumanan sa katuyoan ni Jehova maylabot sa gisaad nga kaliwat! Seguradong bation niya nga wala gayod makawang ang iyang paghulat! w17.08 5-6 ¶10-11

Ang orihinal nga pulong sa Bibliya nga gihubad ug “kahugawan” lapad ug kahulogan, nga naglakip ug labaw pa kay sa seksuwal nga mga sala. Kini puwedeng magtumong sa dili maayong panggawi sama sa pagpanigarilyo o pagsultig law-ay nga mga komedya. (2 Cor. 7:1; Efe. 5:3, 4) Apil usab niini ang mahugaw nga mga buhat diha sa pribado, sama sa pagbasag makapukaw sa sekso nga basahon o pagtan-awg pornograpiya, nga lagmit motultol sa mahugawng bisyo sa masturbasyon. Kadtong nagbatasan sa pagtan-awg pornograpiya makaugmad ug dili makontrolar nga “seksuwal nga gana,” nga mahimong moresulta sa pagkaadik sa sekso. Sumala sa research, ang mga tawong dili makapugong sa pagtan-awg pornograpiya nagpakitag mga simtoma sa pagkaadik nga susama nianang sa mga alkoholiko ug adik sa droga. Dili ikatingala nga may makadaot nga mga resulta sa pagtan-awg pornograpiya​—sama sa grabeng kaulaw, pagkawalay-ganang motrabaho, dili malipayong kaminyoon, diborsiyo, ug paghikog. w17.08 19 ¶8-9

Sa paghunahuna bahin sa pagpasig-uli sa Jerusalem, ang salmista miawit niana kang Jehova. Mibati gyod ug kasegurohan ang salmista sa pagkahibalo nga ang Diyos magpalig-on sa mga ganghaan sa siyudad aron proteksiyonan ang Iyang mga magsisimba! Tingali, mabalaka ka tungod sa imong mga problema. Si Jehova makahatag nimog kaalam sa pagsagubang niana. Ang salmista miingon nga ang Diyos “nagapadala sa iyang pulong sa yuta; sa katulin nagadalagan ang iyang pulong.” Dayon, siya miingon nga si Jehova ‘nagahatag ug niyebe, nagsaliyab sa nanibuok nga tun-og, ug nagsalibay sa yelo,’ ug siya nangutana: “Sa iyang katugnaw kinsa ba ang makaantos?” Siya midugang nga si Jehova “nagapadala sa iyang pulong ug nagatunaw kanila.” (Sal. 147:15-18) Ang atong labing maalamon, labing gamhanang Diyos, ang usa nga nagkontrolar sa yelo ug niyebe, makatabang nimo sa bisan unsang kalisdanan nga imong maatubang. w17.07 20 ¶14-15

Matarong ang pagkasoberano sa Diyos. Kini ang kinamaayohang pagmando. Ug angayan lang nga bug-os nato kining suportahan. Ngano? Tungod kay gilalang ni Jehova ang tanang butang. Busa, siya lang ang may katungod nga momando sa mga tawo ug sa espiritung mga linalang. Walay nalalang si Satanas. Busa, wala siyay katungod nga mandoan ang uniberso. Sa pagrebelde sa pagkasoberano ni Jehova, si Satanas ug ang unang magtiayon nagmapahitas-on. (Jer. 10:23) Tinuod, ingong mga linalang nga may kagawasan, makapili sila nga mahimong independente sa Diyos. Pero naghatag ba na nilag katungod sa pagbuhat niana? Wala. Makatabang sa mga tawo ang kagawasan sa pagpili aron makahimog hustong desisyon matag adlaw. Bisan pa niana, wala kana maghatag nilag katungod nga morebelde sa Maglalalang ug Maghahatag ug Kinabuhi. Klaro, ang pagsupak kang Jehova maoy sayop nga paggamit sa kagawasan sa pagpili. Ingong mga tawo, kinahanglan tang magpasakop sa matarong nga pagmando ni Jehova. w17.06 27-28 ¶2-4

Kon atong gipabilhan ang atong ministeryo, masundog nato si Pablo nga padayong magsangyaw bisan pa sa pagsupak. (Buh. 14:19-22) Niadtong mga tuig sa 1930 ug sayong bahin sa 1940, grabeng gilutos ang atong mga igsoon sa United States. Pero, sama kang Pablo, sila nagpabiling lig-on ug nagpadayon sa pagsangyaw. Aron maprotektahan ang atong katungod, daghang kaso sa korte ang giatubang sa mga igsoon. Niadtong 1943, si Brader Nathan H. Knorr mikomento bahin sa usa ka kadaogan diha sa Korte Suprema sa Amerika: “Kita nagmadaogon kay kamo nakigbisog. . . . Nahitabo ni nga kadaogan kay ang katawhan sa Ginoo mibarog nga malig-on.” Oo, ang atong gugma sa ministeryo makapildi sa paglutos. Kon gilantaw nato ang ministeryo ingong bililhong bahandi gikan kang Jehova, dili lang ang pagkuwentag oras nga mareport ang atong hunahunaon. Hinunoa, maningkamot ta nga “bug-os magpamatuod sa maayong balita.”​—2 Tim. 4:5. w17.06 11-12 ¶11-12

Ang pagbaton ug lawom nga gugma kang Jehova makatabang nato sa pagtuman sa iyang mga sugo, sa paglahutay, ug sa pagdumot kon unsay daotan. (Sal 97:10) Bisan pa niana, si Satanas ug ang iyang kalibotan naningkamot sa pagpahuyang sa atong gugma sa Diyos. Ang kalibotan karon may sayop nga panghunahuna bahin sa gugma. Imbes higugmaon ang Maglalalang, ang mga tawo ‘nagmahigugmaon sa ilang kaugalingon.’ (2 Tim. 3:2) Kining kalibotan nga gimandoan ni Satanas nagpasiugda ‘sa tinguha sa unod, tinguha sa mga mata, ug sa mapagawalong pagpasundayag sa mga kahinguhaan sa kinabuhi.’ (1 Juan 2:16) Si apostol Pablo nagpasidaan sa mga isigka-Kristohanon batok sa pagtagbaw sa kaugalingong tinguha, nga nag-ingon: “Ang paghunahuna sa unod nagkahulogan ug kamatayon . . . kay ang paghunahuna sa unod nagkahulogan ug pakig-away sa Diyos.” (Roma 8:6, 7) Oo, kadtong naggamit sa ilang kinabuhi sa pagpangagpas sa materyal nga mga butang o sa pagtagbaw sa ilang seksuwal nga mga tinguha, sa ulahi nahigawad ug nasakitan pag-ayo.​—1 Cor. 6:18; 1 Tim. 6:9, 10. w17.05 18 ¶5-6

Sa dihang magpakitag pagkamapasalamaton ang mga bakwet, nga magmakontento kon unsay ihatag, ilang matabangan ang nag-abiabi nila nga maeksperyensiyahan ang kalipay sa paghatag. Tinuod nga kon magsalig ra ang mga bakwet sa pagkamahinatagon sa uban, mahimong mawad-an silag pagtahod sa kaugalingon ug basin madaot ang ilang relasyon sa mga igsoon. (2 Tes. 3:7-9) Pero nagkinahanglan gyod silag tabang. Wala magkinahanglag daghang kuwarta aron makahatag ug praktikal nga tabang. Mas gikinahanglan nila ang atong panahon ug gugma. Pananglitan, mahimong ipakita nato nila kon unsaon paggamit sa publikong transportasyon, pagpamalit ug barato apan sustansiyadong pagkaon, o kon unsaon pagbaton ug mga galamiton​—sama sa makina sa panahi—​aron makapanginabuhi. Labawng hinungdanon, matabangan nimo sila nga makapasibo sa ilang bag-ong kongregasyon. Kon posible, pasakya sila paingon sa tigom. Ipatin-aw usab kon sa unsang paagi sila moduol sa mga tawo diha sa inyong teritoryo. Ipartner sila diha sa ministeryo. w17.05 5 ¶11-12

Ang mga tawo nga naghunahuna lang sa ilang tinguha ug katagbawan malisdan sa paghupot ug balanseng panglantaw sa materyal nga mga butang. Ngano? Tungod kay mihuyang na ang ilang espirituwalidad. (1 Cor. 2:14) Dihang ang ilang gahom sa pagsabot nahabol na, mas malisdan na sila sa pag-ila kon unsay husto ug sayop. (Heb. 5:11-14) Ingong resulta, dili na makontrolar sa pipila ang ilang pangandoy sa materyal nga mga butang ug wala na silay katagbawan. (Eccl. 5:10) Maayo na lang kay dunay tabang aron dili ta maimpluwensiyahan sa materyalistikong panghunahuna: Ang regular nga pagbasa sa Bibliya. Maingon nga ang pagpamalandong sa kamatuoran gikan kang Jehova nakatabang kang Jesus sa pagsukol sa tentasyon, ang pagpadapat sa mga prinsipyo sa Bibliya makatabang sab nato sa pagsukol sa materyalistikong tinguha. (Mat. 4:8-10) Sa paghimo niana, atong gipakita kang Jesus nga mas gihigugma nato siya kay sa materyal nga mga butang. w17.05 26 ¶17