Marso

May igsoon ba sa kongregasyon nga nakapalagot nimo? Negatibo tingali ang imong unang impresyon niya ug magdugay nâ kon wala kay himoon. Ang Bibliya nag-ingon nga mahimong maayo ang imong relasyon sa uban, bisan sa mga kaaway, kon magmaabiabihon ka. (Prov. 25:21, 22) Kon mangimbitar ka, mamenosan ang dili pagsinabtanay ug kalagot. Ipagawas niana ang makapadaning mga hiyas sa atong bisita, mga hiyas nga nakita ni Jehova dihang Iya siyang gikabig sa kamatuoran. (Juan 6:44) Kon tungod sa gugma imong imbitahon ang tawong wala magdahom sa imong imbitasyon, mahimong sinugdanan kana nga magkasuod mo. Unsaon nimo pagseguro nga gugma ang nagpalihok nimo? Ang usa ka paagi mao ang pagsunod sa awhag sa teksto karong adlawa. Ang paglantaw nga ang atong mga igsoon labaw kay kanato​—sa pagtuo man, paglahutay, kaisog, o ubang Kristohanong hiyas—​makapalalom sa atong gugma kanila ug mas dali tang makaabiabi. w18.03 17 ¶18-19

Usa sa kinalisdang pagsulay sa pagkamatinumanon alang sa pipila ka ginikanan mao ang pagka-disfellowship sa ilang anak. Konsideraha ang usa ka inahan kansang anak nga babaye na-disfellowship ug mibiya sa balay. Ang inahan miadmitir: “Mangita kog lusot diha sa atong mga publikasyon aron makauban nako ang akong anak ug apo.” Siya midugang: “Pero, mapinanggaon kong gipasabot sa akong bana nga ang among anak wala na sa among poder ug dili mi angayng manghilabot.” Pipila ka tuig sa ulahi, napasig-uli ang anak. “Gitahod gyod ko niya ug ang akong bana kay nahibalo siya nga among gituman ang Diyos,” matod sa inahan. Kon na-disfellowship ang imong anak, ikaw ba ‘mosalig kang Jehova sa bug-os mong kasingkasing ug [dili] mosalig sa kaugalingon mong pagsabot’? (Prov. 3:5, 6) Nan, salig sa disiplina ug giya ni Jehova. Buhata kana bisag sakit para nimo ang pagtuman sa giingon ni Jehova. Oo, suportahi ang disiplina sa Diyos, ug ayaw kanag supaka. w18.03 31 ¶12-13

Ang Bibliya wala maghatag ug espesipikong edad nga angay nang magpabawtismo ang usa. Ang Gregong pulong nga gihubad ug “paghimog mga tinun-an” sa Mateo 28:19 nagpasabot ug pagtudlo uban ang intensiyon nga ang usa mahimong estudyante, o tinun-an. Ang usa ka tinun-an nakahibalo ug nakasabot sa gitudlo ni Jesus ug determinadong sundon kini. Busa, ang tumong sa tanang Saksing ginikanan mao ang pagtudlo sa ilang mga anak sukad sa pagkamasuso (baby) uban ang intensiyong mahimo silang bawtismadong tinun-an sa Kristo. Siyempre, ang masuso dili pa mokuwalipikar sa bawtismo. Pero ang Bibliya nagpakita nga bisan ang mga bata makasabot ug modawat na sa kamatuoran sa Bibliya. Pananglitan, si Timoteo nahimong tinun-an ug midawat sa kamatuoran sa bata pa. Lig-on kaayo ang iyang pagtuo. (2 Tim. 1:5; 3:14, 15) Dihang mga 20 anyos na si Timoteo, kuwalipikado na siyang hatagan ug espesyal nga mga pribilehiyo sa kongregasyon.​—Buh. 16:1-3. w18.03 9 ¶4-5

Dihang nahimo tang alagad sa Diyos, nagbag-o ta. Kini nga pagbag-o nakaapektar sa matag bahin sa atong kinabuhi. Ug wala nâ matapos dihang nabawtismohan ta. Kay dili hingpit, kinahanglang padayon tang magbag-o. (Filip. 3:12, 13) Bata man o tigulang, mahimong pangutan-on nato ang kaugalingon: ‘Namatikdan ba nako nga miuswag ko sa espirituwal? Anam-anam ba kong nahisama kang Kristo? Unsay gipakita sa akong kinaiya ug binuhatan diha sa mga tigom bahin sa akong espirituwalidad? Unsay gipakita sa akong pagpakig-estorya bahin sa akong mga gusto? Unsay gipakita bahin kanako sa akong paagi sa pagtuon, sininaan ug pamostura, o reaksiyon sa tambag? Unsay akong reaksiyon kon tentalon? Naningkamot ba kong mouswag aron mahimong hamtong nga Kristohanon?’ (Efe. 4:13) Ang paghunahuna sa atong tubag niini makatabang nato sa pagsusi sa atong espirituwal nga pag-uswag. w18.02 24 ¶4-5

Nagkinabuhi ta sa talagsaong yugto sa kasaysayan. Ingon sa gitagna sa Bibliya, si Jehova nagtigom ug “usa ka dakong panon . . . gikan sa tanang kanasoran ug mga tribo ug katawhan ug mga pinulongan.” Kadtong gitigom maoy “usa ka gamhanang nasod” nga may kapig walo ka milyong malipayong katawhan, kinsa “nagahatag [sa Diyos] ug sagradong pag-alagad adlaw ug gabii.” (Pin. 7:9, 15; Isa. 60:22) Mas daghan karon ang nahigugma sa Diyos ug sa isigkatawo kay sukad masukad. Bisan pa niana, ang Kasulatan nagtagna usab nga sa atong adlaw, kadtong nahimulag sa Diyos magpakitag sayop nga matang sa gugma​—hakog nga gugma. Si apostol Pablo misulat: “Sa kataposang mga adlaw, . . . ang mga tawo unya magmahigugmaon sa ilang kaugalingon, magmahigugmaon sa salapi, . . . mga mahigugmaon sa kalipayan inay nga mga mahigugmaon sa Diyos.” (2 Tim. 3:1-4) Kining hakog nga gugma lahi kaayo sa Kristohanong gugma. Sa pagkatinuod, ang maong gugma magpatunghag hakog nga kalibotan nga “lisod sagubangon.” w18.01 22 ¶1-2

Ang tukmang kahibalo naghatag kang Noe ug pagtuo ug diyosnong kaalam, nga nanalipod niya sa kapeligrohan, ilabina sa espirituwal nga kapeligrohan. Pananglitan, kay si Noe “naglakaw uban sa matuod nga Diyos,” siya wala molakaw, o makig-uban, sa mga dili diyosnon. Wala siya malimbongi sa nagmateryalisar nga mga demonyo, kinsa tungod sa ilang pagkagamhanan, gidayeg sa way pagtuo ug daling pabilibon nga mga tawo. Gani, basin gisimba pa sila sa mga tawo. (Gen. 6:1-4, 9) Nahibalo sab si Noe nga ang mga tawo gisugo sa pagsanay ug pagpuno sa yuta. (Gen. 1:27, 28) Busa, nahibalo siya nga daotan ug dili natural ang seksuwal nga relasyon tali sa mga babaye ug sa nagmateryalisar nga mga demonyo. Iya kanang napamatud-an dihang ang maong relasyon nagpatunghag higante ug mas kusgang mga anak. Sa ulahi, gipasidan-an sa Diyos si Noe nga magpahinabo Siyag lunop sa yuta. Ang pagtuo ni Noe sa maong pasidaan nagpalihok niya sa pagtukod ug arka, busa naluwas ang iyang pamilya.​—Heb. 11:7. w18.02 9 ¶8

Kon nakahimo kag seryosong sala, si Jehova andam motabang nimo aron maulian ka. Pero kinahanglang dawaton nimo ang iyang tabang pinaagi sa kongregasyon. (Prov. 24:16; Sant. 5:13-15) Ayaw paglangan​—nagdepende niini ang imong dumalayong kaugmaon! Apan komosta kon hasolon gihapon ka sa imong konsensiya bisag dugay nang gipasaylo ang imong sala? Dayag nga dihay mga higayon nga si apostol Pablo naguol tungod sa kanhi niyang kasal-anan. Siya miingon: “Ako ang labing ubos sa mga apostoles, ug ako dili angay tawgon nga apostol, tungod kay gilutos ko ang kongregasyon sa Diyos.” (1 Cor. 15:9) Gidawat ni Jehova si Pablo kon unsa siya, ug gusto Niyang mahibalo si Pablo niana. Kon sinsero kang naghinulsol sa kanhi nimong kasal-anan ug nagsugid niana kang Jehova, ug sa mga ansiyano kon gikinahanglan, makaseguro ka nga maluoy siya nimo. Busa tuohi nga gipasaylo ka ni Jehova, ug dawata ang iyang pagpasaylo!​—Isa. 55:6, 7. w18.01 11 ¶17, 18

Aron mahimong higala ni Jehova, kinahanglan tang mamati kaniya ug makig-estorya niya. Ang pangunang paagi nga makapamati ta kang Jehova mao ang personal nga pagtuon sa Bibliya. Apil niana ang pagbasa ug pagpamalandong sa Pulong sa Diyos ug binase sa Bibliyang mga publikasyon. Samtang buhaton nimo kana, hinumdomi nga ang pagtuon sa Bibliya dili lang basta pagmemoryag impormasyon nga sama sa imong buhaton kon dunay eksam sa eskuylahan. Ang mapuslanong pagtuon maoy samag pagbiyahe diin makakat-on ug makadiskobre kag bag-ong mga butang bahin kang Jehova. Kini makatabang nimo nga masuod sa Diyos, ug makigsuod sab siya nimo. Ang organisasyon ni Jehova nagtaganag daghang galamiton sa pagtabang nimo nga magmaepektibo sa imong pagtuon. Pananglitan, diha sa jw.org, ang mga giya sa pagtuon nga “Unsay Tinuod nga Gitudlo sa Bibliya?” makatabang nimo nga mahimong kombinsido sa imong gituohan.​—Sal. 119:105. w17.12 25 ¶8-9

Matikdi nga mahitabo kanang malinawong kahimtang tungod “kay ang yuta mapuno sa kahibalo kang Jehova.” Kay ang mga hayop dili man makakat-on bahin kang Jehova, ang espirituwal nga katumanan niana mapadapat sa mga tawo. (Isa. 11:6, 7) Daghan nga sama ka bangis sa lobo kaniadto ang makigdaiton na karon. Mabasa nimo ang pipila sa ilang mga eksperyensiya diha sa seryeng “Ang Bibliya Makabag-o sa Kinabuhi,” nga makita sa jw.org. Ang kanhing bangis nga mga tawo ‘nagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’ (Efe. 4:23, 24) Samtang ang mga tawo nakakat-on bahin sa Diyos, ilang nakita nga kinahanglan nilang sundon ang iyang mga sukdanan. Dayon, mapalihok sila sa pagbag-o sa ilang tinuohan, panglantaw, ug binuhatan. Ang maong mga kausaban dili sayon pero posible kay ang espiritu sa Diyos motabang niadtong sinserong nagtinguha sa pagbuhat sa kabubut-on sa Diyos. w18.01 31 ¶15-16

Maylabot niadtong banhawon ngadto sa langit, ang Bibliya nag-ingon nga “ang matag usa [banhawon] sa iyang kaugalingong han-ay.” Makasalig ta nga ang yutan-ong pagkabanhaw himoon usab sa hapsayng paagi. Makapainteres kana nga palaaboton. Kadto bang di pa dugayng nangamatay banhawon sa bag-o pang magsugod ang Usa ka Libo ka Tuig nga Pagmando ni Kristo ug sugaton sa mga minahal nga nakaila nila? Kadto bang matinumanong mga lalaki sa karaang panahon nga may katakos sa pagpanguna ang unang banhawon aron motabang pag-organisar sa katawhan sa Diyos sa bag-ong kalibotan? Komosta kadtong wala gyod makaalagad kang Jehova? Kanus-a ug asa sila banhawon? Daghan pa ang ikapangutana. Pero, angay ba gyod nâ natong problemahon? Dili ba mas maayong maghulat na lang kon unsaon kana pagbuhat ni Jehova? Sa kasamtangan, angay natong palig-onon ang atong pagtuo kang Jehova, kinsa pinaagi kang Jesus nagpasalig kanato nga mabanhaw ang mga patay nga anaa sa panumdoman sa Diyos.​—Juan 5:28, 29; 11:23. w17.12 12 ¶20-21

Seguradong mouyon ka, nga kon ipadapat karon sa mga bana, asawa, ug mga anak ang inspiradong tambag ni Pablo, sila makabenepisyo gihapon. Ang mga bana gisugo: “Magpadayon sa paghigugma sa inyong mga asawa ug ayaw pagkasuko nga hilabihan kanila.” Ang mahigugmaong bana magpasidungog sa iyang asawa pinaagi sa pagpaminaw sa opinyon sa asawa ug sa pagpasalig kaniya nga gipabilhan ang iyang gisulti. (1 Ped. 3:7) Bisag dili puwedeng kanunayng sundon sa bana ang giingon sa asawa, mas makahimog balanseng desisyon ang bana pinaagi sa pagkonsulta sa asawa. (Prov. 15:22) Paningkamotan sa bana nga maangkon ang pagtahod sa asawa, imbes pugson ang iyang asawa nga motahod niya. Kon ang bana mahigugma sa iyang asawa ug mga anak, mahimong mas malipayon ang pamilya sa pag-alagad kang Jehova ug madawat nila ang ganti. w17.11 28 ¶12; 29 ¶15

Si apostol Pablo misulat sa mga Kristohanon sa Colosas sa hinapos sa iyang unang pagkabilanggo sa Roma, o niadtong mga 60-61 C.E. Gisaysay niya kanila ang kahinungdanon sa pagbaton ug “espirituwal nga pagsabot.” (Col. 1:9) Si Pablo midugang: “Nagsulti ako niini aron walay tawo nga molingla kaninyo pinaagi sa makapaagning mga argumento. Pagbantay kamo: basin adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.” (Col. 2:4, 8) Gisaysay usab ni Pablo kon nganong sayop ang pipila ka popular nga ideya ug kon nganong makadani sa dili hingpit nga mga tawo ang kalibotanong panghunahuna. Pananglitan, tungod niini ang pipila mobati nga sila maalamon ug mas maayo sa uban. Katuyoan sa maong sulat nga tabangan ang mga igsoon sa pagsalikway sa kalibotanong panghunahuna ug sayop nga mga binuhatan.​—Col. 2:16, 17, 23. w17.11 20 ¶1

Unsa tingaliy kinahanglang isakripisyo sa usa ka Kristohanon aron padayon siyang kaluy-an sa Diyos? Kinahanglang andam niyang isakripisyo bisan kadtong importante niya kon kini magtental niya sa pagpakasala. (Mat. 18:9) Kon may mga higala ka nga nag-impluwensiya nimo sa pagbuhat sa mga butang nga makapasuko kang Jehova, undangon ba nimo ang pagpakig-uban nila? Kon maglisod ka sa pagkontrolar sa kaugalingon maylabot sa pag-inom, likayan ba nimo ang mga situwasyon nga mahimong moresulta sa sobrang pag-inom? Kon maglisod ka sa pagpugong sa imoral nga mga tinguha, gilikayan ba nimo ang mga salida, website, o kalihokan nga makapukaw sa hugaw nga hunahuna? Hinumdomi, dili makawang ang bisan unsang sakripisyo nga atong himoon aron magmaunongon kang Jehova. Walay mas sakit pa kay sa talikdan niya. Ug wala nay mas makapalipay kay sa matagamtam ang iyang walay kataposang maunongong gugma.​—Isa. 54:7, 8. w17.11 11 ¶12

Namatikdan ba nimo ang giingon sa Zacarias 5:4 nga “ang tunglo . . . mosulod sa balay sa kawatan . . . ug kini mopuyo taliwala sa iyang balay ug maglaglag niini”? Nagpasabot kini nga ipadayag ug hukman ni Jehova ang bisan unsang daotang buhat sa iyang katawhan. Bisan pag itago sa usa ang iyang pagpangawat gikan sa mga awtoridad, amo, ansiyano, o ginikanan, dili niya kana matago sa Diyos​—kinsa naggarantiya nga ipadayag Niya ang bisan unsang pagpangawat. (Heb. 4:13) Makapalipay gayod ang pagpakig-uban niadtong naningkamot nga magmatinud-anon “sa tanang butang”! (Heb. 13:18) Gidumtan ni Jehova ang tanang matang sa pagpangawat. Usa ka kadungganan nga magkinabuhi sumala sa taas nga sukdanan ni Jehova, nga dili mobuhat ug mga butang nga magpasipala sa iyang ngalan. Sa ingon, malikayan nato ang paghukom ni Jehova niadtong tinuyong molapas sa iyang balaod. w17.10 22 ¶6-7

Maningkamot ta pag-ayo aron mamentinar ang kalinaw uban sa mga igsoon, bisan pag mibati tang nasaypan tag sabot o wala tratara nga patas. (Roma 12:17, 18) Ang pagpangayog pasaylo makatabang para sa nasakitan, pero kinahanglang sinsero kini. Importante kaayo ang kalinaw ilabina diha sa kaminyoon. Ang magtiayon kinahanglang dili magpakaaron-ingnong nagminahalay atubangan sa uban pero sa pribado dili magtinagdanay, sakit manulti, o bayolente. Kinahanglan sab tang andam nga magpasaylo. Kon may makasala nato, ato siyang pasayloon ug wad-on ang atong kasuko. Aron tinuod ang atong pagpasaylo, kinahanglan natong kontrolahon ang atong hunahuna aron “dili [ta] maghupot ug talaan sa kadaot.” (1 Cor. 13:4, 5) Kon magdumot ta, mahimong madaot ang atong relasyon sa mga igsoon ug ilabina kang Jehova.​—Mat. 6:14, 15. w17.10 10 ¶14-15

Sa unsang paagi ang mensahe ni Zacarias nakaapektar sa mga Hudiyo kaniadto? Si Jehova naggarantiyag kasegurohan ug proteksiyon sa ilang buluhaton. Seguradong nakadasig nila ang iyang pasalig nga matukod gyod ang templo. Pero, unsaon man paghuman sa pipila lang ka tawo ang dakong buluhaton? Ang sunod nga giingon ni Zacarias nakawala sa ilang kahadlok ug pagduhaduha. Gawas sa tabang sa matinumanong mga tawo nga si Heldai, Tobiyas, ug Jedaia, ang Diyos nag-ingon nga daghan ang “[mangabot] ug magatukod sa templo ni Jehova.” Kay masaligon sa tabang sa Diyos, ang mga Hudiyo milihok dayon ug ilang gipadayon ang pagtukod bisan pa sa pagdili sa hari sa Persia. Wala madugay, giwagtang ni Jehova ang samag bukid nga babag, ug nahuman ang templo niadtong 515 B.C.E. (Esd. 6:22; Zac. 4:6, 7) Pero, ang giingon ni Jehova dunay mas dakong kapadapatan karon. w17.10 29 ¶17

Gisugo si Solomon sa pagdumala sa usa sa pinakaimportanteng proyekto sa pagpanukod​—ang templo sa Jerusalem. Ang templo mahimong “labi gayod ka halangdon,” ug kini mailado sa tanang nasod tungod sa talagsaong kanindot niini. Mas labaw pa, mahimo kining “balay ni Jehova nga matuod nga Diyos.” Giasayn ni Jehova si Solomon ingong tigdumala niini nga proyekto. (1 Cron. 22:1, 5, 9-11) Dakog pagsalig si Haring David nga tabangan ni Jehova si Solomon. Pero “batan-on ug linghod pa” si Solomon. Duna kahay kaisog si Solomon sa pagtuman sa asaynment nga tukoron ang templo? Mahimo kahang babag ang iyang pagkabatan-on ug kawalay kasinatian? Aron molampos, si Solomon kinahanglang magmaisogon ug molihok. Kon dili magmaisogon si Solomon, madaog siya sa kahadlok. Kon mahitabo kana, lisod kaayo para niya bisan ang pagsugod sa iyang asaynment. Sama kang Solomon, nagkinahanglan tag tabang ni Jehova aron magmaisogon ug matuman ang buluhaton. w17.09 28 ¶1-2; 29 ¶4-5

Unsa kaha ang imong kinabuhi kon walay Bibliya? Wala kay kakuhaag kasaligang tambag adlaw-adlaw. Dili ka makakitag makapatagbawng tubag sa mga pangutana bahin sa Diyos, kinabuhi, ug sa umaabot. Ug dili gyod nimo masayran kon unsay gihimo ni Jehova para sa mga tawo kaniadto. Mapasalamaton kaayo ta kay dili ingon niana ang atong kahimtang. Gitagana ni Jehova ang iyang Pulong, ang Bibliya. Ug siya nagpasalig nga ang mensahe niini mohangtod sa panahong walay tino, o hangtod sa kahangtoran. Si apostol Pedro nagkutlo sa Isaias 40:8. Dili ang Bibliya ang espesipikong gitumong nianang tekstoha, kondili ang mensahe mismo niini. (1 Ped. 1:24, 25) Latas sa daghang katuigan, may sinserong mga tawo nga naningkamot pag-ayo sa paghubad ug pagpanagtag sa Kasulatan bisag dili kana kanunayng sayon. Ang ilang tinguha nahiuyon sa kabubut-on sa Diyos nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.”​—1 Tim. 2:3, 4. w17.09 18 ¶1-2

Naeksperyensiyahan sab sa Kristohanong mga batan-on karon ang nahitabo kang Jose. (Gen. 39:7) Konsideraha si Kim. Daghan sa iyang klasmet pirme nang makigsekso. Pagkahuman sa weekend, manghambog sila bahin sa ilang bag-ong naka-sex. Walay ikatampo nga estorya si Kim. Para niya, ang pagkahimong lahi sa uban nagpabati niyang “walay bili ug nag-inusara,” ug giisip siya sa iyang mga kaedad nga weird kay dili makigdeyt. Bisan pa niana, nahibalo si Kim nga ang mga batan-on dunay kusganong pagbati bahin sa sex. (2 Tim. 2:22) Kanunay siyang pangutan-on sa iyang mga klasmet kon virgin pa ba siya. Tungod ana, may kahigayonan siya sa pagsaysay kon nganong dili pa siya makig-sex. Mapasigarbohon ta sa Kristohanong mga batan-on nga wala magpapresyur sa pagbuhat ug seksuwal nga imoralidad. Gipasigarbo sab sila ni Jehova! w17.09 4 ¶8; 5 ¶10

Ang tawong daling masuko sagad magpahungaw sa iyang gibati pinaagig mapasipalahong sinultihan. Klarong dili kana makapalipay sa pamilya. Ang Bibliya nag-ingon nga likayan nato ang kasuko, mapasipalahong sinultihan, ug sininggitay. (Efe. 4:31) Ang maong panggawi sagad moresultag bayolenteng mga buhat. Ang kalibotan lagmit naghunahuna nga normal lang ang pagkamasuk-anon. Pero makapasipala kini sa atong Maglalalang. Gihukas sa daghan kining makadaot nga mga panggawi sa wala pa nila isul-ob ang bag-ong pagkatawo. (Col. 3:8-10) Ang pagpamakak maoy laing bahin sa daang pagkatawo. Pananglitan, naandan na ang pagpamakak aron dili makabayad ug buhis o aron dili masilotan sa nahimong sala. Sa kasukwahi, si Jehova ang “Diyos sa kamatuoran.” (Sal. 31:5) Busa, iyang gisugo ang “matag usa” sa iyang magsisimba nga “magsulti sa tinuod . . . sa iyang silingan” ug dili ‘mamakak.’ (Efe. 4:25; Col. 3:9) Mao nga kinahanglan natong isulti ang tinuod bisan tingalig kini dili sayon o moresultag kaulawan.​—Prov. 6:16-19. w17.08 18 ¶3, 5; 20 ¶12-13, 15

Karon, gigiyahan ta ni Jehova pinaagi sa iyang Pulong, ang Bibliya. Ug sa “katulin nagadalagan ang iyang pulong,” sa pagkaagi nga paspas siyang nagtaganag espirituwal nga giya dihang gikinahanglan nato kini. Hunahunaa ang mga kaayohan sa pagbasa sa Bibliya, pagtuon sa mga publikasyon sa “matinumanon ug maalamong ulipon,” pagtan-awg JW Broadcasting, pag-abli sa jw.org, pagpakig-estorya sa mga ansiyano, ug sa pagpakig-uban sa mga igsoon. (Mat. 24:45) Nakita ba nimo nga paspas kaayong nagtaganag giya si Jehova? Nahibalo ang salmista nga giuyonan sa Diyos ang Israel. Sila lang ang nasod nga gihatagan sa “pulong” sa Diyos ug sa “iyang mga regulasyon ug sa iyang hudisyal nga mga hukom.” (Sal. 147:19, 20) Karon, dako gyong kadungganan nga sa tibuok kalibotan, kita lang ang katawhan nga nagdala sa ngalan sa Diyos. Kay kita nakaila kang Jehova ug nagpadapat sa iyang Pulong, napahimuslan nato ang talagsaong relasyon uban kaniya. Sama sa magsusulat sa Salmo 147, daghan gyod tag maayong rason sa pagdayeg kang Jah ug sa pagdasig sa uban sa pagduyog kanato. w17.07 20 ¶15-16; 21 ¶18

Ang mga sumusunod ni Jesus karon, apil ang kapig usa ka milyong bug-os panahong ministro, naningkamot sa pagpadapat sa tambag ni Pablo kutob sa ilang maarangan. Ilang gisuklan ang pagpangdani sa mga advertisement ug sa kalibotan kay sila nahinumdom sa prinsipyo: “Ang manghuhulam maoy sulugoon sa tawo nga nagapahulam.” (Prov. 22:7) Gusto gyod ni Satanas nga mahurot ang atong panahon ug kusog alang sa iyang sistema sa negosyo. Kon dili ta magbantay, maulipon ta sa utang sulod sa daghang katuigan. Ang dagkong bayranan sa giutang nga balay ug sakyanan, loan sa pagpaeskuyla, ug bisan gani ang engrandeng kasal moresultag grabeng kalisod sa pinansiyal. Gipakita nato ang praktikal nga kaalam dihang atong pasimplehon ang atong kinabuhi ug menosan ang pagpangutang ug paggasto. Pinaagi niini, may kagawasan ta sa pag-alagad sa Diyos imbes maulipon sa sistema sa negosyo.​—1 Tim. 6:10. w17.07 10 ¶13

Si Jehova ang bugtong Soberano sa uniberso. Ang iyang paagi sa pagmando nagpakitag hingpit nga hustisya. Siya miingon: “Ako si Jehova, ang Usa nga nagapakita ug mahigugmaong-kalulot, hustisya ug pagkamatarong diha sa yuta; kay niining mga butanga ako mahimuot.” (Jer. 9:24) Sa pagdesisyon kon unsay matarong, wala siya magdepende sa sinulat nga mga balaod nga hinimo sa dili hingpit nga mga tawo. Ang iyang hingpit nga hustisya naggikan mismo sa iyang personalidad, ug base niana, siya naghatag ug sinulat nga balaod para sa mga tawo. “Ang pagkamatarong ug ang paghukom mao ang pihong dapit sa [iyang] trono,” busa makasalig ta nga matarong ang tanan niyang balaod, prinsipyo, ug desisyon. (Sal. 89:14) Sa laing bahin, bisan pa sa pagkuwestiyon niya sa pagkasoberano ni Jehova, si Satanas wala makapatunghag hustisya sa kalibotan. w17.06 28 ¶5

Si Jehova mao ang Diyos sa kamatuoran. (Sal. 31:5) Ingong mahinatagong Amahan, ihatag sa Diyos ang kamatuoran ngadto sa mga nahadlok kaniya. Sukad nga una natong nadunggan ang kamatuoran, kita may kahigayonan sa pagtigom ug mga kamatuoran gikan sa iyang Pulong, ang Bibliya, gikan sa atong mga publikasyon, ug gikan sa atong mga kombensiyon, asembliya, ug senemanang panagkatigom. Paglabay sa panahon, mabatonan nato ang gitawag ni Jesus nga “tipiganan” sa daan ug bag-o nga kamatuoran. (Mat. 13:52) Tabangan ta ni Jehova sa pagtigom ug bililhon ug bag-ong kamatuoran diha sa atong “tipiganan sa bahandi” kon pangitaon nato kana sama sa natagong bahandi. (Prov. 2:4-7) Unsaon nato paghimo kana? Kinahanglang maghimo tag maayong eskedyul sa personal nga pagtuon ug mag-research pag-ayo diha sa Pulong sa Diyos ug sa atong mga publikasyon. Makatabang ni nato sa pagdiskobreg “bag-o” nga kamatuoran, nga wala nato mahibaloi sa una. (Jos. 1:8, 9; Sal. 1:2, 3) Oo, kinahanglan tang maningkamot aron pun-on ug kamatuoran ang atong tipiganan sa bahandi. w17.06 12 ¶13-14

Usa ka batan-ong brader nga tawgon natog Eduardo ang nakig-estorya sa usa ka hamtong nga minyong ansiyano nga si Stephen. Gihunahuna ni Eduardo ang 1 Corinto 7:28: “Sila nga [magminyo] makaagom ug kasakitan sa ilang unod.” Nangutana siya, “Unsa man ni nga ‘kasakitan,’ ug unsaon man nako ni pagsagubang kon maminyo ko?” Sa wala pa tubaga ni Stephen kanang pangutanaha, iyang gihangyo si Eduardo nga tagdon ang ubang gisulat ni apostol Pablo, nga mao, si Jehova “ang Diyos sa tanang paghupay, . . . nagahupay kanamo sa tanan namong kasakitan.” (2 Cor. 1:3, 4) Si Jehova usa gayod ka mahigugmaong Amahan, ug siya nagahupay nato dihang makaatubang tag kalisdanan. Tingali naeksperyensiyahan nimo mismo ang pagtabang ug paggiya sa Diyos, sagad pinaagi sa iyang Pulong. Makaseguro ta nga gusto gyod niya ang labing maayo para kanato, sama sa iyang gihimo sa iyang mga alagad kaniadto.​—Jer. 29:11. w17.06 4 ¶1-2

Labaw pa kay sa materyal nga tabang, ang bakwet natong mga igsoon nagkinahanglag espirituwal ug emosyonal nga pagpaluyo. (Mat. 4:4) Ang mga ansiyano makatabang pinaagi sa pagkuhag literatura sa ilang pinulongan ug sa pagkontak sa mga brader nga nagsulti sa maong pinulongan. Daghang bakwet ang nahimulag sa ilang mga paryente, komunidad, ug kongregasyon. Kinahanglang bation nila ang gugma ug pagkamabination ni Jehova taliwala sa ilang mga isigka-Kristohanon. Kay kon dili, basig modangop sila sa dili Saksing mga paryente o katagilungsod kinsa makasabot sa ilang kultura ug eksperyensiya. (1 Cor. 15:33) Kon ipabati nato kanila nga bahin sila sa kongregasyon, kita mitabang kang Jehova sa ‘pagbantay sa mga langyaw nga pumoluyo.’ Ang mga bakwet dili na tingali makapauli sa ilang nasod samtang naa pa sa gahom ang nagpaantos kanila. Dugang pa, basin daghan kanila ang na-trauma tungod sa ilang naeksperyensiyahan. Pangutan-a ang kaugalingon, ‘Kon akoy naa sa ilang situwasyon, sa unsang paagi gusto kong trataron?’​—Mat. 7:12. w17.05 6-7 ¶15-16

Ang pagpadaog sa kahigawad makapaluya sa atong pagtuo ug makapabugnaw sa atong gugma sa Diyos. Niining daotang sistema nga gikontrolar ni Satanas, kitang tanan makasinati usahay ug makapahigawad nga mga kahimtang. (1 Juan 5:19) Tingali nag-atubang tag mga problema tungod sa katigulangon, dili maayong panglawas, o kalisod sa ekonomiya. O lagmit kita naluya tungod kay kita mibating dili takos, may mga pagdahom nga wala matuman, o may mga kapakyasan. Bisan pa niana, dili gayod nato tugotan ang maong mga problema o pagbati nga magpahunahuna nato nga gibiyaan ta ni Jehova. Hinunoa, kinahanglan natong pamalandongon ang makapadasig nga mga pulong bahin sa way paglubad nga gugma ni Jehova kanato. Mabasa nato kana sa Salmo 136:23: “[Siya] nahinumdom kanato panahon sa atong timawa nga kahimtang: Kay ang iyang mahigugmaong-kalulot maoy hangtod sa panahong walay tino.” Sa pagkatinuod, ang maunongong gugma ni Jehova sa iyang mga alagad magpabilin hangtod sa hangtod. Busa, makaseguro ta nga iyang dunggon ug tubagon ang atong “mga pangaliyupo” alang sa tabang.​—Sal. 116:1; 136:24-26. w17.05 18 ¶8

Sumala sa Galacia 2:11-14, si Pedro nagpadaog sa kahadlok sa tawo. (Prov. 29:25) Bisag nahibalo siya mismo sa panghunahuna ni Jehova, nahadlok si Pedro sa opinyon sa tinuling mga Hudiyo nga membro sa kongregasyon sa Jerusalem. Si apostol Pablo nagbadlong kang Pedro didto sa Antioquia tungod sa pagkasalingkapaw niini. (Buh. 15:12; Gal. 2:13) Klaro nga mapainubsanong gidawat ni Pedro ang pagbadlong ni Pablo. Wala mag-ingon ang Kasulatan nga natangtangan ug pribilehiyo si Pedro. Sa ulahi, giinspirar pa gani si Pedro sa paghimog duha ka sulat nga nahimong bahin sa Bibliya. Ang ulo sa kongregasyon nga si Jesus padayong naggamit kaniya. (Efe. 1:22) Ang mga membro sa kongregasyon makasundog sab kang Jesus ug sa iyang Amahan pinaagi sa pagpasaylo. Hinaot walay bisan kinsa nga mapandol sa sayop sa dili hingpit nga tawo. w17.04 27 ¶16-18

Dihang gilaglag ni Jehova ang maong dapit, mihimo siyag labaw pa kay sa pagtapos sa pagkadaotan didto. Siya “naghatag ug sumbanan alang sa mga tawong dili-diyosnon labot sa mga butang nga moabot.” Sama nga gitapos ni Jehova ang imoral nga mga buhat kaniadto, taposon sab niya ang pagkadaotan karon dihang hukman na niya kining presenteng sistema. Unsay mopuli sa daotang mga buhat? Ang Paraisong yuta mapuno sa makapalipayng mga buhat. Hunahunaa ang paghimo sa yuta nga paraiso o pagtukod ug mga balay para nato ug sa atong mga minahal. Hunahunaa ang kalipay sa pag-abiabi sa minilyong nangamatay nga mabuhi pag-usab ug ang kalipay sa pagtudlo kanila sa mga sugo ni Jehova ug sa mga pakiglabot niya sa iyang katawhan latas sa kasaysayan. (Isa. 65:21, 22; Buh. 24:15) Daghan na kaayo tag buluhaton nga makapalipay nato ug makadayeg kang Jehova! w17.04 12 ¶11-12

Dihang gihimo ni Jepte ang maong panaad, lagmit nahibalo na siya nga ang iyang anak maoy mosugat niya. Bisan pa niana, dili kadto sayon para sa amahan ug anak​—dako gyod to nga sakripisyo. Dihang nakita niya ang iyang anak, “gigisi [ni Jepte] ang iyang besti” ug miingon siya nga nadugmok ang iyang kasingkasing. ‘Gihilakan’ sa iyang anak ang “pagkaulay” niini. Ngano? Si Jepte walay anak nga lalaki, ug ang iyang bugtong anak nga babaye dili na puwedeng magminyo ug manganak. Wala nay paagi nga mapasa ang ngalan ug kabilin sa pamilya. Pero dili kana ang labing importante kanila. Si Jepte miingon: “Ako nakabungat na sa akong baba kang Jehova, ug dili ko na mabakwi.” Ug ang iyang anak mitubag: “Buhata kanako sumala sa migula sa imong baba.” (Maghu. 11:35-39) Maunongon sila nga mga indibiduwal kay wala gyod sila maghunahuna nga lapason ang ilang panaad ngadto sa Diyos​—bisag unsa pay mahitabo kanila.​—Deut. 23:21, 23; Sal. 15:4. w17.04 4 ¶5-6

Si Jose biktima sa grabeng mga inhustisya. Una, gibaligya siya sa iyang mga igsoon aron mahimong ulipon dihang mga 17 anyos siya. Dayon, giakusahan siyang nanglugos sa asawa sa iyang agalon maong napriso siya. (Gen. 39:11-20; Sal. 105:17, 18) Bisag naghimo siyag matarong, daw gisilotan siya imbes panalanginan. Pero human sa 13 ka tuig, kalit nga nausab ang tanan. Siya gipagawas sa prisohan ug gitudlo ingong ikaduha sa kinatas-ang posisyon sa Ehipto. (Gen. 41:14, 37-43; Buh. 7:9, 10) Nasuko ba si Jose tungod sa maong mga inhustisya? Nawad-an ba siyag pagsalig sa iyang Diyos, si Jehova? Wala. Unsay nakatabang kang Jose sa pagpaabot nga mapailobon? Nakatabang niya ang iyang pagtuo kang Jehova. Nahibalo siyang kontrolado ni Jehova ang tanan. Madayag kini sa giingon niya sa iyang mga igsoon: “Kon bahin kaninyo, daotan ang anaa sa inyong hunahuna batok kanako. Kaayohan ang anaa sa hunahuna sa Diyos alang sa katuyoan sa paglihok ingon niining adlawa aron matipigang buhi ang daghang tawo.” (Gen. 50:19, 20) Wala gyod makawang ang paghulat ni Jose. w17.08 4 ¶6; 6 ¶12-13